21.5 C
Tirana
E hënë, 12 Maj, 2025
type here...

Banorët protestojnë me flamuj amerikanë në duar, Rama i rrethon me forca speciale (Foto)

Protesta e banorëve të Unazës së re është tensionuar gjatë mbrëmjes së sotme. Ata kanë pasur edhe një përplasje me policinë në momentin që kanë sulmuar kantierin e firmës private që do të shkatërrojë shtëpitë e tyre.
Por në përgjigje të protestave të banorëve, qeveria e Edi Ramës ka dërguar forcat speciale të FNSH-së, për tu përballur tek Unaza e re.
FNSH-ja ka marrë në mbrojtje edhe kantierin e firmës private.
Ndërsa banorët kanë protestuar me flamuj shqiptarë dhe amerikanë në duar duke hedhur parrulla të ndryshme.
Deputeti i PD, Klevis Balliu iu ka bërë thirrje qytetarëve të mos përplasen me policët pasi ata po zbatojnë detyrën. Balliu i ka bërë thirrje drejtorit të Policisë së Tiranës që të tërheqë efektivët për të mos provokuar më shumë banorët.
“Asnjë prej këtyre nuk do t’iu prishë shtëpinë, po zbatojnë detyrën. I bëj thirrje drejtorit të policisë të tërheqë trupat mos të ketë provokime. Asnjë këtu se ka me Policinë e Shtetit. Ju jeni në të drejtën tuaj të mbroni shtëpitë tuaja. Por fajin nuk ua kanë këta policë”, iu tha Balliu, banorëve.
Pas bisedimeve, banorët janë tërhequr disi, ndërsa forcat e FNSH vazhdojnë të qëndrojnë kordon në pjesën fillestare të kantierit për Unazën e Madhe.

Revolta te Unaza e Re, policia sulmon protestuesit dhe arreston 10 banorë, mes tyre edhe minorenë

Policia ka sulmuar mbrëmjen e sotme protestuesit tek Unaza e re, duke arrestuar dhjetë banorë, mes tyre edhe minorenë.
Protesta është acaruar kur banorët protestues kanë mbërritur tek kantieri i ndërtimit i ngritur nga firma private dhe aty ka nisur edhe një përballje me policinë. Në vendin e ngjarjes kanë mbërritur dhjetëra forca policie dhe ata te FNSH-sqë kanë arrestuar protestuesit.
Mes të shoqëruarve, sipas banorëve, ka edhe minorenë. Mësohet se Policia i ka shpërndarë të shoqëruarit nëpër të gjitha komisariatet e Tiranës, me qëllim, “copëzimi n” e protestuesve dhe të afërmëve të të shoqëruarve.
Nga ana tjetër mësohet se banorët kanë denoncuar në Prokurori, për “mashtrim dhe fyerje”, kryetarin e bashkisë së Tiranës, Erion Veliaj.
Kjo padi vjen, pas premtimit të pa mbajtur të Erion Veliajt, për legalizimin e banesave të tyre, si edhe pas fyerjes dhe etiketimit prej tij si “shpellarë”.
Banorët e Unazës së Re, kanë dalë sërish sot në ditën e 16, në protestën e tyre. Protesta e banorëve të “Astirit” kanë bllokuar sërish sot rrugën, ndërsa kanë artikuluar të njëjtat kërkesa.
Në mbështetje të banorëve, sërish sonte kanë rreshtuar edhe deputetët e opozitës.
Kërkesat e tyre lidhen me dëmshpërblimin për shpronësimin e banesave të tyre, në vlerën e tregut.
Protesta e banorëve të zonës së “Astirit”, filluan pasi qeveria dhe bashkia ju dërgoi njoftim për dëbimin nga shtëpitë e tyre, sepse ato do ti nënshtrohen rikonstruksionit të këtij aksi rrugor.
Përballë kësaj kërkese të qeverisë dhe bashkisë, të cilat “premtojnë” vetëm 3 vjet pagesë qiraje, banorët kërkojnë shpronësim dhe dëmshpërblim për banesat e tyre, me vlerën e tregut.
Kërkesa e tyre ka ndeshur në indiferentismin e qeverisë dhe në fyerjet prej kryebashkiakut ët Tiranës, Erion Veliaj.

“Gjeli i Egër” që detyroi ministrin të fshijë postimin në rrjetet sociale

Pas publikimit të një postimi, ku faqja e ministrit të Turizmit Blendi Klosi, shprehet për një projekt 20mijë euro për gjelin e Egër në Malin e Tomorrit, ku ndër të tjera shkruhet me superlativa për moratoriumin e gjuetise, kanë vërshuar një sërë komentesh nga gjuetarët për rezultatet e moratoriumit.
Në postim e ministrit shkruhej me superlativa për moratoriumin, por nuk jepet asnjë shifër konkrete të numrit të llojit në fjalë, ndërkohë që ministri jep dhe lajmin për hapjen e një shtegu, ku turistët do kenë mundësine të shohin gjelin e Egër.
Sipas komentuesve kjo është një propagande e pastër për të mbyllur shkatërrimin e vërtetë të faunës që po ndodh çdo ditë.
Gjithashtu ata shprehen të alarmuar për gjendjen, duke kritikuar me sarkazmë dhe deklaratat e ministrit, ku sipas tyre janë qesharake e aspak profesionale, madje të rrezikshme dhe shqetësuese kur dalin po vete nga ministri.
Komentet e shumta të gjuetarëve kanë bërë që ministri Klosi, të fshijë postimin e tij në rrjetet sociale, duke mos dhënë asnjë shpjegim për komentuesit.

Borxhi i paralajmëruar dhe projekti “1 miliard euro”

Nga Jorida Tabaku

Një vit më parë në ditën e miratimit të buxhetit në emër të grupit parlamentar të PD propozova amendamentin për mosrritjen e borxhit dhe rreshtova gjithashtu problematikat e projektit “1 miliard euro”.
Fatkeqësisht për shqiptarët qeveria dhe mazhoranca ndërmorri nismën që do të shkatërrojë arkat e shtetit shqiptar dhe paratë publike si asnjëherë më parë.
Skemat e dështuara dhe të konfirmuara si dështim të PPP-ve u çuan në një stad tjetër duke përfshirë në një skemë piramidale gjithë buxhetin e shtetit.
Sot Shqipëria ka një borxh publik 71% të PBB-së ndërsa vetëm PPP-të e dhëna deri më tani përbëjnë 12% të PBB-së.
Këto skema janë kontrata e përjetshme që qeveria ka lidhur me oligarkët për të kaluar përjetësisht paratë e shqiptarëve në xhepat e tyre dhe më pas xhepat e qeveritarëvve.
Pasi u dhuron kontrata disa milionë euro në xhepat e koncesionarëve oligarkë dhe më pas në xhepat e qeveritarëve të lidhur me to. Nis një gjoja reformë për të rritur taksat për qytetarët duke shtuar varfërinë dhe duke prodhuar më shumë pabarazi.
Një vit më parë e paralajmëruam por ato vazhduan me kokëfortësinë e tyre duke ndërmarrë këtë nismë me pasoja të frikshme për ekonominë shqiptare.
Ballona e borxhit tanimë është kokëposhtë, vitin tjetër borxhi pritet të shkojë më shumë se 83% e PBB-së ndërsa taksat jane rritur më shumë se 5 miliardë USD, biznese do të mbyllen duke marrë me vete në humnerë ekonominë dhe të ardhurat e gjithsecilit prej nesh ndërsa qeveria shfaq filmin me zë të propagandës.

Ibra: Prej atij u lragova nga Juventus…

Revista “Fuorigioco ka publikuar disa fragmente nga libri biografik i Zlatan ibrahimovic. Në veçanti, mosmarrëveshjen me ish-drejtuesin e bardhezinjve, Luciano Moggi, gjatë kohës që luante tek Juventusi.
Suedezi ka thënë se kur po negocionte për rinovimin e kontratës me Juventus-in u la jashtë në ndeshjen kundër Bayern-it. Në lidhje me këtë episod Moggi i tha se duhet ta harronte rinovimin dhe kjo ka bindur suedezin t’i japë fund aventurës me bardhezinjtë dhe të refuzojë çdo propozim për paqe.
“Nuk dua të qëndroj në Torino. Nuk ka asgjë që mund të më ofrosh për të më bërë që të qëndroj”, mësohet t’i ketë thënë sulmuesi drejtuesit.
Më pas ndodhi Calciopoli dhe shitja e tij ishte e pashmangshme. Në vazhdim, Ibra ka folur edhe për kalimin e tij nga Inter-i tek Barcelona:
“Teksa Maxwell po mblidhte gjërat e tij, i dhashë një palë nga atletet e mia dhe i thashë: ‘M’i dërgo te Barcelona. Do të të takoj në një kohë shumë të shkurtër atje’. Të gjithë filluan të qeshnin. Mendonin se po bëja shaka. Brenda dy ditësh, Barça më ftoi në një takim zyrtar dhe pas 20 minutash isha lojtar i blaugranave”.

Spaho flet pas takimit me përfaqësuesit e “Venecias”

Përfaqësues e komisionit të Venecias, për rreth një orë kanë zhvilluar një takim me kryetarin e grupit paralamentar të PD-së, Edmond Spaho, i cili shoqërohej nga Oerd Bylykbashi, Enkelejd Alibeaj dhe eksperti ligjor Gazmend Bardhi.
Në përfundim të takimit, Spaho u shpreh se PD kërkon nga Komisioni i Venecias që të ndjekë të njëjtin standard që është vendosur për prokurorët dhe gjyqtarët.
“Në thelb është që nuk duhet të ketë dy standarde, por ai që zbatohet për prokurorët dhe gjyqtarët të aplikohet edhe për politikanët kur flasim për lidhje me botën e krimit të organizuar. Shpjeguam me fakte që asnjë reformë nuk do të ketë sukses nëse nuk do të shkëputen lidhjet e politikës me krimin” deklaroi Spaho për mediat.

Sa vonë, është shumë vonë!

Komentet monotone të diplomatëve të huaj që në Tiranë gjithnjë më pak arrijnë të mbulojnë realitetin e zymtë të reformës në drejtësi.
Duke ju përgjigjur në tym shpërqendrimeve ekzotike që ofron politika shqiptare dhe hollësive te pakuptueshme të teksteve ligjore të reformës—asnjë prej tyre nuk duket se i ka lexuar apo kuptuar siç duhet këto tekste—diplomatët janë vënë në garë me njëri-tjetrin për te dhënë afate kohore kur do funksionojë reforma dhe po artikulojnë qëllime e arritje të pakuptimta të reformës, teksa po zhyten ngadalë në gropën e rërës, të cilën ata dikur e kishin imagjinuar si themel të fortë për një të ardhme “evropiane”.
Çdo deklaratë dashamirëse, çdo thirrje për “shpirtra të ndershëm’” që duhet të dalin vullnetarë dhe t’i japin një dorë reformës për të mirën e vendit, çdo thirrje për bashkëpunim dy partiak, po i thith ata edhe më thellë në gropën e llucës nga e cila nuk do të mund ta nxjerrin më veten.
Dhe, ndërsa rëra e lagur ka arritur pothuajse në buzët e tyre, ata me krenari shpjegojnë: “Reforma në drejtësi është një sukses i madh! Ne ia dolëm!”
Për të pasur një prespektivë më të qartë të gjendjes së tanishme, duhet ta nisnim që në momentin kur filloi reforma në drejtësi, me miratimin unanim të ndryshimeve kushtetuese në korrik 2016.
Më 22 korrik 2016, me votat e 139 deputetëve nga 140 të mundshëm, u miratua Ligjin 76/2016 për ndryshimin e Kushtetutës së Shqipërisë. Ky ligj, pra ndryshimet kushtetuese, hynin në fuqi 15 ditë pas publikimit në Fletoren Zyrtare. Ligji u publikua më 27 korrik 2017 në Fletoren Zyrtare 138, që do të thotë se ndryshimet kushtetuese hynë në fuqi më 11 gusht 2017.

Kushtetuta vendosi afate kohore të ngurta për formimin e institucioneve shtetërore të sistemit të ri të drejtësisë: Këshillit të Lartë Gjyqësor (KLGJ), Këshillit të Lartë të Prokurorisë (KLP), dhe Inspektoriatit të Lartë të Drejtësisë (ILD).
KLGJ është përgjegjëse, ndër të tjerave, për emërimin e gjyqtarëve të rinj, ndërsa KLP për emërimin e Prokurorit të Përgjithshëm dhe ngritjen e Prokurorisë Speciale (SPAK) dhe Byrosë së Hetimit (BKH).
Të dyja bashkë, KLGJ dhe KLP, janë përgjegjëse për caktimin e kuotave të studentëve që pranihen çdo vit në Shkollën e Magjistraturës, dhe emërimin e të sapodiplomuarve nga kjo shkollë, prokurë dhe gjyqtarë, në sistemin e drejtësisë. Me fjalë të tjera, krijimi i KLP-së dhe KLGJ-së është thelbësor për të vazhduar më tej me reformën në drejtësi.
Duke qënë se një pjesë e magjistratëve mund të mos e kalojnë vetingu, KLP dhe KLGJ do të bëjnë zëvendësimin e tyre. Prandaj, neni 179 i Kushtetutës parashikon që KLP dhe KLGJ duhet të formohen 8 muaj nga hyrja në fuqi e ligjit, që do të thotë përpara 11 prillit 2017.
Në mënyrë që të fillohet me vetingun, parlamenti miratoi më 30 gusht 2016 me 138 vota, Ligjin 84/29016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, i njohur ndryshe si ligji i vetingut. Në mënyrë të pashpjegueshme, ligji nuk i jepte prioritet kalimit në procesin e vetingut të kandidatëve për KLP dhe KLGJ, edhe pse ato ishin thelbësore për përparamin e reformës në drejtësi.
Ligji u publikua në fletoren zyrtare më 23 shtator 2016 dhe hyri në fuqi më 8 tetor 2016. Partia Demokratike dhe Bashkimi i Gjyqtarëve të Shqipërisë e apeloi një pjesë të ligjit në Gjykatën Kushtetuese, e cila dha vendimin e saj më 18 janar 2017, duke u shprehur se ligji i vetingut është kushtetues.

Ligjet e tjera të reformës në drejtësi u kundërshtuan kushtetueshmërisht, gjithashtu. Ligji 96/2016 “Për statusin e gjyqtarëve dhe prokurorëve në Republikën e Shqipërisë” u miratua nga Kuvendi më 6 tetor 2016 me 86 vota të shumicës, dhe më pas u padit në Gjykatën Kushtetuese nga Shoqata Kombëtare e Gjyqtarëve dhe Unioni i Gjyqtarëve. Më 16 prill 2017 Gjykata Kushtetese vendosi të pranojë pjesërisht padinë e tyre.
Ndërkohë, që u bë e qartë se procesi i aplikimit për anëtarë të KLP-së dhe KLGJ-së nuk kishte mbledhur numrin e mjaftueshëm të kandidatëve të kualifikuar.
Si fakti se shumica votoi e vetme ligjin dhe fakti që u ai dërgua në Gjykatën Kushtetuese tregoi se procesi legjislativ nuk ishte tërësisht i suksesshëm, dhe që shpirti i bashkëpunimit dypartiak u thye, pavarësisht trysnisë të madh të ndërkombëtarëve.
Njësoj, ligji 97/2016 “Për organizimin dhe funksionimin e Prokurorisë në Republikën e Shqipërisë” dhe ligji 98/2016 “Për organizimin e pushtetit gjyqësor në Republikën e Shqipërisë” u miratuan vetëm me votat e shumicës më 6 tetor 2016. Ky vendim pati menjëhere pasoja negative.
Më 3 dhjetor 2017, përfundoi mandati 5-vjeçar i Prokurorit të Përgjithshëm Adriatik Llalla dhe duhej të emërohej një kryeprokuror i ri. Por, në shkelje të Kushtetutës, KLP nuk ishte formuar ende, dhe ligji i prokurorisë ishte i paqartë për periudhën kalimtare dhe, natyrisht, nuk e parashikonte një situatë të tillë të shkeljes së afateve kushtetuese në fromimin e KLP-së.

Një opinion ligjor ad hoc dhe i argumentuar dobët nga misioni i SHBA-ve për ndihmë teknike OPDAT dhe misioni i ndihmës teknike të BE-së EURALIUS u përdor nga qeveria për të zgjedhur, sërish vetëm me votat e shumicës, Arta Markun si Prokurore të Përgjithshme të Përkohshme, një titull dhe funksion që ligjërisht nuk ekziston askund, por që tani ka gjetur vend deri edhe në termat e përdorur nga institucionet e vetingut.
Arta Marku u betua më 18 dhjetor 2017, e zgjedhur me një shumicë të thjeshtë prej 69 deputetësh, pra, më pak se gjysma e numrit të deputetëve të Kuvendit, duke u bërë kështu e para funksionare në historinë e Shqipërisë e zgjedhur nga Kuvendi pa marrë as shumicën e thjeshtë të anëtarëve të tij. Emërimi i saj i hapi rrugë një sërë veprimesh antikushtetuese dhe krijoi imazhin e një prokurorie të kapur nga qeveria.
Ndërkohë, qeveria miratoi personelin dhe buxhetin e institucioneve të vetingut, Komisionit të Pavarur të Kualifikimit, Komisionerit të Posaçëm të Apelimit, dhe Komisionerët Publik, në 17 shtator 2017, duke e ulur buxhetin e tyre me 40 për qind nga ai i kërkuar prej tyre.
Dosjet e para të vetingut, përshfirë edhe të kandidatëve të KLP-së dhe KLGJ-së, filluan të shqyrtohen më 1 dhjetor 2017, 8 muaj pas afatit të përcaktuar nga Kushetuta.
Aktualisht, dy kandidatë për anëtarë të KLP-së dhe një kandidat i KLGJ-së janë ende në pritje të vetingut, ndërsa ka pasur një sërë parregullsish me procesin e aplikimit të kandidatëve.

Që prej 11 majit 2018, Gjykata Kushtetuese nuk ka numrin e nevojshëm të anëtarëve për të formuar kuorumin, pra, ajo nuk mund të gjykojë asnjë çështje. Më shumë se gjysma e anëtarëve të KED-së së vitit 2018, e cila bën renditjen e kandidatëve për Gjykatën Kushtetuese, nuk e kaluan vetingun.
Ndërkohë, asnjë student nuk mund të pranohet në Shkollën e Magjistraturës, pasi ligji për statusin e magjistratëve përcakton se numri i tyre caktohet nga KLGJ dhe KLP, të cilat nuk janë krijuar ende—ndryshimet në këtë ligj kërkojnë edhe votat e opozitës e cila kundërshton amendimin e përgatitur nga socialistët për t’ja dhën komptencat kalimtare kryeprokurores në dytyrë Arta Marku dhe KLD-së aktuale.
Ky ortek me data, ligje dhe procedura mund të jetë i ngatërrueshëm, por është një antidot i domosdoshëm ndaj termave të thjeshta me të cilat bashkësia ndërkombëtare dhe qeveria kanë portretizuar reformën e drejtësisë dhe përparimin e saj.
Ndërveprimi ndërmjet Kuvendit, aktualisht i kontrolluar nga shumica socialiste, institucioneve të vetingut, dhe pjesës së mbetur e gjyqsorit janë të ndërlikuara dhe të politizuara.
Grafiku më poshtë përmbledh të gjithë zhvillimet kryesore të reformës në drejtësi që prej korrikut 2016, dhe kjo është vetëm një tablo e thjeshtuar, ku nuk janë të përfshira proceset për zgjedhjen e anëtarëve jo-magjistratë të KLP-së e KLGJ-së, debatet e shumta në parlament mes shumicës e opozitës, roli i Komisionit të Venecias gjatë procesit të hartimit të reformës, deklaratat e ambasadorëve të BE-së dhe SHBA-ve për kohëzgjatjen e vetingut, e shumë të tjera.
Megjithatë shpresoj që grafiku të japë një pamje të gjendjes aktuale të reformës së drejtësisë dhe se kemi arritur këtu ku ndodhemi sot.
/Exit.al

Përgjimet, kush janë katër zyrtarët e lartë të PS që i pret burgu për lidhjet me bandat!

Të paktën katër zyrtarë të lartë të PS kanë rënë në rrjetën e përgjimeve për lidhjet e tyre me krimin dhe bandat e trafiqeve. Në kushtet kur gjykatat kanë rënë dhe Prokuroria ëhstë kapur nga Rama bëhet gjithnjë dhe më e vështirë dhënia e drejtësisë për këta zyrtarë të lartë të PS.
Kreu i opozitës Basha deklaroi dje nga Berati se pa arrestimin e këtyre zyrtarëve e pa pastrimin e politikës nga krimi nuk d të ketë asnjë negocion me opozitën.
Kush janë katër zyrtarët?
Ta mendojnë mirë, ata që bëjnë pakte kriminale me votat, se i pret largimi nga institucionet dhe i pret burgu. Dhe ky është kushti i dytë, i panegociueshëm. Dhjetëra qindra qytetarë prehen sot nëpër burgje për shkelje të ndryshme të ligjit, duke përfshirë edhe shkelje të detyruara nga kushtet e tmerrshme në të cilat jetojnë. Baballarë apo nëna që janë shtyrë të kryejnë vepra të ndryshme penale, vjedhje apo vepra të tjera penale, shpeshherë për bukën e fëmijëve të tyre, por ligji është ligj apo jo? Ligji është i verbër, ligji i takon të gjithë njësoj, apo jo? Është kështu apo jo?
Jo, nuk është kështu, se dikush apo dikë e detyron e keqja të shkelë ligjin e të vjedhë diçka, përfundon në burg, kurse një politikan që kapet duke vjedhur vota me bandat e krimit të organizuar, që të mbajë pushtetin e të vjedhë përmes pushtetit tendera me miliona, vazhdon të krekoset në karrigen e kryeministrit apo të kryebashkiakut. Pa ndëshkuar krimin elektoral, pa ndëshkuar krybashkiakët dhe ministrat, të cilët janë kapur në përgjimet zyrtare të prokurorisë duke bërë pakte kriminale me bandat për qëllime elektorale, nuk mund të ketë asnjë luftë kundër krimit, as drejtësi, as përparim në Shqipëri.
Nuk mund të ketë e nuk do të ketë kompromis as me opozitën, as me Partinë Demokratike. Do të ketë betejë të vendosur. Këta njerëz duhet të arrestohen, duke filluar nga Vangjush Dako, Taulant Balla, Qazim Sejdini, Saimir Tahiri, njerëz që bredhin në kuaj me shalën miliona euroshe, bredhin me jahte e me makina luksoze dhe që japin konferenca shtypi nga hotelet luksoze të kryeqytetit.

Duhet të jenë prapa hekurave, para prokurorëve, para drejtësisë, në burg.
Dhe ky të jetë një investim, që të nesërmen ta mendojë mirë çdo politikan, i çdo lloj ngjyre dhe çdo lloj partie, se pazari me bandat kriminale për të tjetërsuar vullnetin tuaj, do ta çojë jo në pushtet, por në burg, prapa hekurave. Dekriminalizimi i zgjedhjeve nis me ndëshkimin e krimit elektoral. Edi Rama futi duart në vullnetin e popullit në vitin 2013, futi duart në vitin 2015, futi duart në vitin 2017. Shqiptarët e dinë, opozita e di, unë e di, miqtë tanë ndërkombëtarë e dinë. Të mos bëjnë sikur s’e shikojnë. Nuk ka për të pasur zgjidhje politike pa ndëshkimin e krimit elektoral të Edi Ramës dhe bashkëpunëtorëve të tij.
Marrja e pushtetit nuk është diçka abstrakte për organizatën kriminale të “Rilindjes”. Ajo bëhet për një qëllim të caktuar dhe qëllimi nuk është abstrakt, ndonëse shifra është e paimagjinueshme për shumicën e shqiptarëve. Qëllimi i pushtetit është të vjedhë e të zhvasë këtë vend dhe qytetarët shqiptarë.
Po marrim vetëm një shembull, kontratat e tenderave dhe koncesioneve dhe të ashtuquajturave Partneritet Publik Privat, të bëra pa garë, me garë fallso, me garë ku nuk fiton më i miri, pra oferta më e lirë, por oferta më e shtrenjtë, me kompani që themelohen të hënën dhe fitojnë farën të premten, me kompani fantazëm, të regjistruara në parajsat fiskale, sepse pronarët e vërtetë janë ministrat dhe pushtetarët aktualë. 2,2 miliardë euro për 10 apo 15 oligarkë.
Nuk ka vend në Ballkan, nuk ka vend në Evropë, qeveria e të cilit të hartojë, të firmosë dhe të vërë në veprim shpenzime të tilla marramendëse, duke iu dhënë një grushti njerëzish, me një të rënë apo me 15 të rëna të lapsit, gjysmën e buxhetit të shtetit. 150 milionë euro në vit do të mjaftonin për subvencionimin total të bujqësisë, do të mjaftonin për ndjekjen e një politike pensionesh që do të fillonte me një rritje të menjëhershme prej 30 % të pensioneve, do të mjaftonin për rifutjen në skemë të mijëra familjeve me ndihmë ekonomike, të cilat u hoqën me pa të drejtë do mjaftonin për dëmshpërblimin e banorëve të ASTIR-it në Unazën e Re dhe të dhjetëra projekteve të tjera që meritojnë shpronësim dhe janë lënë mes katër rrugëve.

PD nuk do të kthehet në Parlament, kriza politike drejt radikalizimit

Kryetari i Opozitës Basha deklaroi nga Berati se opozita nuk do të kthete në Parlament duke vendosur si kusht të panegociueshëm pastrimin e Parlamentit nga të inkriminuarit.
Deklarata e Bashës
Dy janë kollonat që e mbajnë në pushtet këtë të keqe;Aleanca me krimin
Servilizmi, hipokrizia, mungesa e guximit, indiferenca e atyre që bëjnë propagandën e regjimit, pranojnë heshturazi apo kanë guximin ta mbrojnë në studio televizive, në artikuj gazetash dhe qëndrime të paskrupullta, nuk guxojnë të shfaqin të vërtetën ashtu siç është, por i bëjnë lajka dhe përpiqen t’u shesin shqiptarëve sapunin për djath.
Flasin për rritje ekonomike në një vend ku vetëm në katër vite janë larguar 500 mijë shqiptarë.
Sa veta janë larguar nga blloku ku jetoni ju? Nga pallati? Nga lagjia? Nga fshatrat? Larguar për shkak të mungesës së mundësive.
Larguar për shkak të mungesës së perspektivës.
Bëhet fjalë për 500 mijë shqiptarë, 500 mijë shqiptarë, 1/6 e popullsisë rezidente, sepse 1 milionë shqiptarë janë emigrantë.
Si mund të ketë rritje ekonomike në një vend, ku 1 në 6 qytetarë është larguar, kjo do të thotë të largohet 1/6 e fuqisë blerëse, do të thotë të largohet 1/6 e taksapaguesve. Si mund të ketë rritje ekonomike. Nuk ka rritje ekonomike ka vetëm gënjeshtra dhe mashtrime, për të mbajtur në këmbë një regjim që nuk ka as legjitimitet, as vizion, as mëshirë, për të punuar për qytetarët.
Gjendja ku ndodhet vendi është një thirrje e madhe për opozitën, për Partinë Demokratike, për vizionin tonë për daljen nga kjo situatë.
Dhe sot kemi ardhur këtu para qytetarisë së Beratit për të shpalosur tre elementë bazë mbi të cilën ngrihet kjo platformë, e para dhe më kryesorja, e padiskutueshmja, pa të cilën nuk mund të ketë rrugë përpara dhe me të cilën nuk mund të ketë asnjë loj kompromisi, asnjë lloj kompromisi.
Dua ta them qartë nga Berati dhe të na e dëgjojë e gjithë Shqipëria.
Asnjë lloj kompromisi pa pastruar parlamentin nga kriminelët.
Pa dyshim që jemi një parti europianiste.

Pa dyshim, jemi një parti institucionale.
Ne do t’ju ofrojmë përmes votës dhe besimit tuaj shqiptarëve plarformën e daljes nga kjo e keqe në fushën ekonomike, politike, të ligjit, të rendit, të
luftës kundër krimit, por kompromis me krimin nuk mund të bëjmë, ndaj i bëj thirrje të gjithëve, edhe miqve tanë që s’i kanë hapur sytë akoma, t’iu hapin mirë.
Kthim në parlament me politikanët e lidhur me krimin, nuk ka dhe nuk do të ketë.
Zgjidhja është para jush.
Tash tre muaj, në formën e amendamentit kushtetues, për pastrimin e politikës nga krimi.
Nesër vjen një delegacion i Komisionit të Venecias, personalisht dua t’u them se janë munduar kot që kanë ardhur.
Ne s’kërkojmë asgjë më shumë sesa standardi që ata miratuan për gjyqtarët dhe prokurorët.
Që politikanët e lidhur me krimin të humbasin mandatet.
Nuk po kërkojmë të marrim drejtësinë në duart tona.
Nuk jemi ne, as prokurorët, as gjyqtarët.
Një drejtësi e pastruar nga krimi dhe korrupsioni le të vendosë fatin e tyre, nëse kanë shkelur ligjin, le t’i çojnë ata në burg, por në institucione nuk mund të qëndrojnë asnjë ditë, s’mund të ketë standarde të dyfishta e të trefishta. I njëjti standard që Venecia rekomandoi për gjyqtarët dhe prokurorët, i njëjti standard që kjo qeverie bëri ligj për policët dhe gardistët.
Ne do e kishim votuar po të kishin pranuar amendamentin tonë që vetingu i policisë të niste nga Ministri i Brendshëm, por që këta nuk e deshën, i njëjti standard duhet të vlejë edhe për politikanët.
Kjo është vija e dytë e kuqe për opozitën.
Trajtim preferencial për politikanët, nuk do të ketë.
Dita kur politikanët të mos jenë më mbi ligjin, do të jetë dita e parë e bardhë për qytetarët në Shqipëri.
Nëse duan zgjidhje institucionale, kjo është zgjidhje institucionale.
Miratimi i amandamentit kushtetues për vetingun e politikanëve, dhe shporrja një orë e më parë nga parlamenti dhe bashkitë e vendit dhe jashtë çdo institucioni, e politikanëve mafiozë, e politikanëve të lidhur me krimin.

Urgjent!

Nga Erl Kodra

Banorët e Unazës që do t’u shembin shtëpitë duhet të bëjnë një padi urgjente në Gjykatën Administrative në Tiranë, ku mes të tjerash, të kërkojnë që kjo Gjykatë të nxjerrë një Urdhër (Vendim i Ndërmjetëm) që pezullon çdo aksion ose veprim kundër shtëpive të tyre.
Krahas kësaj, ata duhet të bëjnë një padi në Gjykatën Kushtetuese (!!) meqenëse kjo është një çështje e të Drejtave të Njeriut. Pavarësisht faktit që Gjykata Kushtetuese nuk funksionon, minimalisht ata duhet ta regjistrojnë çështjen e tyre në këtë Gjykatë.
Gjithashtu, ata duhet të bëjnë një padi në Gjykatën Europiane të të Drejtave të Njeriut, duke nënvizuar faktin e mungesës së Gjykatës Kushtetuese, dhe në këto rrethana, ata t’i kërkojnë kësaj Gjykate një Vendim Urgjent për Masa të Përkohshme (Interim Measures).
Në të gjitha çështjet urgjente, Masat e Përkohshme nga Gjykata Europiane e të Drejtave të Njeriut jepen brenda 24 orësh, madje edhe brenda ditës.
Sigurisht ka edhe mundësi të tjera ligjore, siç është ankesa në Komitetin e OKB-së për të Drejtat e Njeriut në Gjenevë, për shkeljen e nenit 11 të Konventës Ndërkombëtare për të Drejtat Ekonomike, Sociale dhe Kulturore nga Shqipëria.
Ata që kanë kontakte me këta banorë, ju lutem t’i informojë ata për mundësitë ligjore që kanë akoma në dispozicion. Do të ishte ideale që një grup avokatësh i të Drejtave të Njeriut t’i asistojë ata në rrugën që duhet të ndjekin.

1...5 1435 1445 145...8 301Faqja 5 144 nga 8 301

Kryesore

Continue to the category
Më shumë
© 2024 Rilindja Demokratike Euroatlantike