Shqipëria duket se po ndeshet me një skandal të ri korrupsioni, lidhur me një prej kompanive që ka fituar tenderin për një prej segmenteve të unazës së madhe në Tiranë. Kompania shqiptare funksionon si degë e një kompanie të regjistruar në shtetin Delaware në Shtetet e Bashkuara.
Zyra e Sekretarit të Shtetit në Delaware konfirmoi për Zërin e Amerikës se ka filluar hetimet për të përcaktuar në se kompania Dunwell Haberman, ose ndonjë prej zyrtarëve të saj, është përfshirë në aktivitete të paligjshme, mashtrime ose falsifikime.
Firma Dunwell Haberman vepron në Shqipëri përmes filialit të saj vendas “DH Albania”, e cila ka fituar një tender prej rreth 20 milionë dollarësh për një prej segmenteve të unazës së madhe në Tiranë.
Firma dyshohet se ka kryer dy falsifikime për të siguruar kontratën në Shqipëri. Ka falsifikuar datën e krijimit; në Dalaweare kompania figuron e regjistruar para 6 muajsh, në 25 qershor 2018, ndërsa në Shqipëri ka depozituar dokumente, sikur ekziston që nga qershori i 1998. Dokumenti i dytë, që dyshohet të jetë falsifikuar, është një certifikatë e Sekretarit të Shtetit se kjo firmë nuk i ka detyrime fiskale shtetit. Zëdhënësi i Sekretarit të Shtetit Doug Denison, i tha Zërit të Amerikës, se për certifikatën nuk ka patur asnjë kërkesë nga firma dhe as nuk është lëshuar ndonjë dokument.

Dokumentet e faksifikuara dolën për herë të parë në Shqipëri mbrëmë, gjatë emisionit Të Paekspozuarit” në televizionit News24.
Sipas zëdhënësit, çështja pritet t’i kalojë për hetime penale zyrës së Prokurorit të Përgjithshëm në Daleware, që drejtohet nga Matt Denn.
Nëse autoritetet gjejnë shkelje, firmës mund t’i anulohet regjistrimi si biznes në këtë shtet dhe ndaj saj mund të ngrihen akuza kriminale. Meqë kompania ka aktivitet në një vend tjetër, jashtë Shteteve të Bashkuara, rasti mund t’i referohet për ndjekje edhe Departamentit të Drejtësië në Uashington.
Shteti Delaware, njihet si një prej shteteve që ka ligje tepër favorizuese ndaj korporatave. Mijëra kompani amerikane janë të regjistruara në këtë shtetet, për të përfituar nga taksat. Dalaware njihet edhe si “parajsë fiskale” pasi nuk mbledh taksa nga korporatat që, ndonëse të regjistruara aty, nuk ushtrojnë aktivitet në këtë shtet.
Në bazë të ligjeve të shtetit, korporatat e regjistruara aty, nuk janë të detyruara të publikojnë emrin e drejtuesit të kompanisë ose të aksionerëve të saj.
Në Delaware, regjistrimi i kompanisë mund të bëhet edhe pa qënë fizikisht i pranishëm dhe ka firma të tjera që e kryejnë këtë funksion për klientin. Në bazë të dokumenteve të regjistruara në këtë shtet, firma Dunwell Haberman është regjistruar përmes firmës “Apex Resident Agent Services”.

Pas publikimit të fakteve për skandalin me tenderit korruptiv të Unazës së Re, zbulohen detaje të reja, për përfaqësuesin shqiptar, të firmës së huaj. Avdjol Dobi, 26-vjeçari shqiptar, përfaqësuesi ligjor i kompanisë “D Haberman”, e regjistruar në shtetin Dalaëare, është “shembull çudibërës” se si falë përvojës së tij të vetme profesionale si recepsionist në një spital privat në Tiranë, ku gjatë dy viteve të fundit ka shërbyer si pritës e përcjellës i klientëve. ky djalosh, në emrin e të cilit është ngarkuar tenderi multi-milionësh, “gdhihet” si fitues tenderi me 18 milionë eurosh.
Natyrisht, “suksesi” i Avdjol Dobi, përfaqësuesit të firmës “Dunwell Haberman”, e cila ka fituar tenderin 18 milionë eurosh për Lotin 1 të Unazës së Re, lidhet me faktin se ai ka qenë pjesë e stafit elektoral të Gjiknurit.
Si përfaqësues i “Dunwell Haberman” në Shqipëri, Avdiol Dobi është pronari i DH Albania.
Sipas dokumenteve të bërë publikë, të cilët i referohen Qendrës Kombëtare të Biznesit (QKB), kompania DH Albania është degë e kompanisë Dunëell Haberman, themeluar në shtetin Delëëere të Shteteve të Bashkuara të Amerikës në qershor të vitit 1998. Për këtë ajo ka depozituar në Qendrën Kombëtare të Biznesit në Shqipëri, një letër nga Sekretari i Shtetit të Delaweare, Jeffrey Bullock, që vërteton aktivitetin e saj në këtë shtet dhe po ashtu dhe datën e themelimit 20 vjet më parë.

Kryetari i opozitës, Lulzim Basha ishte sërish mbrëmjen e sotme në krahë të protestës së banorëve të Astirit.
Basha tha se tërheqja e qeverisë nga loti 1, tregoi se qendra qytetare fitoi përballë arrogancës dhe hajdutërisë qeveritare.
‘Pas 30 ditëve protestë të banorëve të “Astir” për të mbrojtur shtëpitë e tyre nga shembja pa demshpërblim dhe përkrahjes së opozitës ndaj tyre duke denoncuar edhe këtë aferë të pashembullt, qeveria është tërhequr nga ky lot.
Skandali i publikuar mbrëmë për 18 milion euro për një firmë anonime me dokumenta të falsifikuara në SHBA, Edi Rama është detyruar të pezullojë punimet pasi një hetim edhe amerikan pritet për këtë megaskandal.
30 ditë protestë të banorëve dhe po kaq ditë përkrahje nga opozitë në mbështetje të tyre, duket se ka ngrohur edhe më skeptikët për një opozitë më qendrestar.
PD, LSI dhe figura publike ishin çdo ditë në krah të banorëve duke denoncuar këtë vjedhje të madhe dhe duke bllokuar prishjen e banesave.
Mjaftonte një ditë larg protestës dje Edi Rama do të kishte rrafshuar çdo shtëpi që bëhej pengesë për megavjedhjen me “amerikanin” anonim dhe falsifikator, pjesë e stafit elektoral të Gjiknurit i cili tashmë është larguar nga Shqipëria për tu fshehur.

Lulzim Basha mund ta konsiderojë muajin e tij politik, pse jo dje fitore të strategjisë për qëndresë në këtë rast. si përfundim, këto ditë treguan se Edi Rama njeh vetëm gjuhën e qëndresës dhe të forcës.
Është padyshim një triumf i të vërtetës.
Ka më shumë se dy muaj që PD kemi denoncuar që ky është një projekt vjedhjeje, këtu ka vjedhjeje nuk ka zhvillim. Këtë e dinim ne, e dinin banorët e dinin gazetarët, tani ka dalë haptazi para botës. Ky nuk është një projekt vjedhjeje por edhe pastrim parash.
Ne e dinim që kjo ishte një vjedhje, ne qëndruam kundër këtij projekti vjedhjeje. Edi Rama i quajti shpellarë, Veliaj i quajti shpellarë, i çuan policinë paradite, gangsterët pasdite, arrestuan të rinj e të reja. E mbytën me propagandë kundër të gjithë atyre që qëndruan. Tani e kanë humbur davanë sepse kanë frikën e karriges. Kam thënë se Rama është ulur kokë më kokë me bandën e hajdutëve për të vjedhur.
Të gjitha sharjet ndaj banorëve por dhe censura e disa mediave nuk ja dolën të zhdukin protestën e banorëve, sepse ata qëndruan. Donin t’i varrosnin brenda 10 ditëve por nuk ja dolën. Ishte qëndresa e tyre e banorëve që sollën këtë fitore. Këta në vend që të tërhiqeshin por përkrahën firmën me dokumente false, këtë e bën vetëm një njeri si Edi Rama.
Ky është mësimi i protestës s Astirit, i protestës së studentëve. Për 48 orë studentët e futën Ramën poshtë minderit. Të bashkuar do të zmbrapsim çdo hajdut. Siç i sprapsëm tek Unaza e Re, siç i sprapsën studentët. 10 muaj betejë kanë bërë Artisët për Teatrin Kombëtar’, tha Basha.

Banorët e Astirit kanë dalë sërish mbrëmjen e sotme në protestë, duke kërkuar që marrëveshja të tërhiqet nga projekti kortruptiv. Protestuesit i kanë vënë zjarrin disa gomave dhe kazanëve twë plehrave përgjatë Unazës.
Ata i kanë kërkuar Edi Ramës të heqë dorë nga prona e shqiptarëve.
Pasi kanë marshuar për tek ish-sheshi “Shqiponja” me thirrjet se nuk do të lënë prishjen e banesave të tyre, duke kujtuar dhe aferën e fundit që u publikua ku kompania që ka fituar njërin nga lotet për ndërtimin e Unazës së Madhe ka falsifikuar dokumentet, ata janë zotuar se do vazdojnë deri në fund të protestën e tyre.
Banorët kanë paralajmëruar sërish protestë ditën e nesërme. Kjo ishte dita e 34-t që ata vazhdojnë të protestojnë, ndërkohë që kanë patur dhe një paralajmërim për policinë.
“Policia larg duar nga ne, të mos na provokojë se boll kemi dhënë deklarime se boll u bë. Nesër sërish në protestë”, tha njëri prej tyre.
Të pranishëm në protestë ishin dhe deputetë të opozitës dhe kreu i PD, Basha, i cili theksoi se vetëm të bashkuar do mund t’ja dalim përballë kësaj qeverie që synim ka vetëm grabitjen.