Komisioneri i Bashkimit Evropian për Zgjerim dhe Fqinjësi, Johannes Hahn, do të qëndrojë sot për vizitë në Kosovë. Ai pritet të zhvillojë takime me udhëheqësit më të lartë politikë të Kosovës, presidentin Hashim Thaçi, kryetarin e Kuvendit Kadri Veseli si dhe me kryeministrin Ramush Haradinaj.
Ndërkohë, edhe deputetët serbë, që përfaqësohen përmes Listës Serbe, që nga e diela janë mbyllur në Kuvend me kërkesën që ta takojnë komisionarin Hahn dhe t’i shpjegojnë atij qëndrimin dhe shqetësimet në lidhje me vendimin e Qeverisë së Kosovës për taksën doganore prej 100 për qind për prodhimet me origjinë nga Serbia dhe Bosnjë e Hercegovina, të cilat importohen në Kosovë.
Njëri nga deputetët, anëtar i Listës Serbe, Igor Simiq tha për Radion Evropa e Lirë se kërkojnë takim me komisionarin Hahn, në mënyrë që ta njoftojnë atë me krizën humanitare, e cila siç tha ai, po “e kërcënon popullin serb” për shkak të vendimit të Prishtinës që ta vendosë taksën prej 100 për qind ndaj produkteve serbe.
“Kërkesa e vetme e deputetëve të Listës Serbe të cilët ka mbi 22 orë që janë mbyllur në Kuvend, këtu në Prishtinë është që të takohemi me Johannes Hahn që t’ia transmetojmë atij shqetësimin e qytetarëve serbë në lidhje me vendimin e Qeverisë së Kosovës, e cila në fakt ka bllokuar prodhimet e Serbisë si për serbët ashtu edhe për shqiptarët. Kjo ngritë tensione mes qytetarëve duke ditur se 95 për qind e mallrave në mjediset e banuara me popullatë serbe vijnë nga Serbia”, tha ai.
Simiq tha po ashtu se në vendbanimet me popullatë serbe ka mungesë të ushqimit dhe produkte të tjera.
“Kjo në përkthim do të thotë se ne qysh tani kemi mungesë të ushqimit, barnave, shtypi nuk vjen qe 12 ditë në mjediset e banuara me serbë. Pra, po shkelen të drejtat elementare të njeriut dhe dikush nga Bashkimi Evropian duhet të reagojë”, tha Simiq.
Derisa Lista Serbe po paralajmëron katastrofën humanitare për shkak tarifës, në mjediset e banuara me serbë në jug të Ibrit, qytetarët thonë se nuk ka mungesa të ushqimit.

Dyqanet në Graçanicë, një nga gjashtë komunat me shumicë serbe në jug të Ibrit, aktualisht janë plotë me mallra. Punëtorët thonë se për momentin nuk ka mungesë ushqimi, si dhe se nuk ka pasur rritje të ndjeshme të çmimit të prodhimeve. Të njëjtën thonë edhe qytetarët e Graçanicës.
Sinisha Kostiq, banor i kësaj komune nuk beson se do të ndodhë ndonjë katastrofe humanitare.
“Çdo gjë është normale, përveç se çmimi i bukës. Buka është shtrenjtuar, por po paralajmërohet se kjo situatë mund të ndryshojë. Po presim dhe shohim se çka do të ndodhë. Shpresojmë se kjo gjendje shpejt do të zgjidhet”, tha ai.
“Para pak netësh isha në një hipermarket në Prishtinë dhe të gjitha produktet që kemi blerë kanë qenë nga Serbia. Lista Serbe në këtë situatë e bënë atë që duhet, po paralajmëron institucionet dhe komunitetin ndërkombëtarë se çka mund të ndodhë”, thotë ky banor.
Edhe Sasha Qosiq nga Graçanica, thotë se përveç produkteve nga Serbia, në Kosovë ka mallra edhe nga shtetet nga rajoni, siç janë Maqedonia e Kroacia. Për këtë arsye nuk beson që mund të ndodhë krizë, përveç kur janë barnat në pyetje.
“Ne ende kemi në dispozicion qumështin, produktet e qumështit të cilat nuk janë prodhuar në Serbi dhe janë me çmime po të njëjta. Unë nuk shoh ndonjë krizë ekonomike. Është e vërtetë se kjo është negative për prodhuesit serbë që kanë partnerë biznesi në Kosovë ku eksportojnë shuma të mëdha”, tha Qosiq.
Pothuajse njësoj është edhe në fshatin Babimost, ku shumica e banorëve janë serbë. Ky fshat i takon komunës së Obiliqit.
Dyqani në këtë fshat tash për tash nuk ka pasoja nga taksa, përveç rritjes së lehtë të çmimeve të disa produkteve.
“Nga Serbia me telefonojnë të familjes dhe më pyesin a kemi ushqim. Iu them, po i kemi krejt, sigurt është, pakëz po ngriten tensione qe nuk kemi bukë, por krejt normal është, tash për tash kremi krejt”, thotë Mira, punëtore në dyqanin lokal në Babimost.
Katër kryetarët e komunave veriore, të banuara me shumicë serbe, ditë më parëdhanë dorëheqje, si dhe u organizuan protesta në Mitrovicën Veriore në kundërshtim të taksës.
Pritet që Hahn ta diskutojë këtë çështje me udhëheqësit e Kosovës, dhe sidomos me kryeministrin Ramush Haradinaj. Ky i fundit ka deklaruar në disa raste se taksa do të mbetet në fuqi përderisa Serbia të mos e ndalë, siç ka thënë ai, fushatën ndaj Kosovës dhe përderisa të mos e njeh Kosovën si shtet e pavarur e sovran.
Qeveria e Kosovës ka rritur taksën nga 10 për qind në 100 për qind ndaj produkteve të Serbisë dhe Bosnje e Hercegovinës, si kundërpërgjigjej ndaj fushatës agresive të Serbisë për Kosovën, veprim ky që ka nxitur reagime të shumta.
Shtetet e Bashkuara të Amerikës dhe Bashkimi Evropian u kanë kërkuar autoriteteve të Kosovës që të heqin tarifat ndaj importeve me origjinë nga Serbia dhe Bosnje e Hercegovina dhe të punojnë me Serbinë për të shmangur provokimet dhe zbutur tensionet.
Një çështje tjetër të cilën Hahn pritet ta diskutojë me autoritetet e Kosovës është edhe ajo e liberalizimit të vizave. Këshilli i Ministrave i BE-së, nuk e ka vënë në agjendën e takimit të 6 dhe 7 dhjetorit çështjen e liberalizimit të vizave për Kosovën, çka në Prishtinë ka zgjuar reagime të shumta.

Në takimin e udhëheqësve botërorë të mbledhur këtë javë në Argjentinë, Presidenti Donald Trump u shfaq me tematikën e politikës së tij të jashtme “Amerika e Para”. Rezultati ishte një samit me pak marrëveshje të arritura. Siç njofton nga Buenos Aires korrespondenti i Zërit të Amerikës Bill Gallo, në samitin shumëpalësh mbizotëroi ndërveprimi dypalësh.
Megjithë valën në rritje të nacionalizmit në mbarë botën, në samitin e G20-tës në Argjentinë u bë një përpjekje për bashkëpunimin ndërkombëtar.
Çështjet e debatueshme, si emigracioni dhe tregtia, përgjithësisht u shmangën. Për ndryshimet klimatike, SHBA-ja thjesht doli kundër të gjithëve.
Në një intervistë me shërbimin në gjuhën spanjolle të Zërit të Amerikës, Sekretari i Shtetit Mike Pompeo tha se Shtetet e Bashkuara vazhdojnë të jenë të përkushtuara ndaj bashkëpunimit ndërkombëtar.
“Krijimi i prosperitetit për çdo qytetar të botës. Krijimi i rregullave që e mundësojnë këtë gjë. Këto janë temat e përbashkëta. Ndonjëherë debatojmë për mënyrat se si t’i realizojmë këto. Por, të gjithë synojmë të njëjtat objektiva”, tha Sekretari Pompeo.
Por, ndërsa vendi më i fuqishëm i botës bën haptazi thirrje që interesat kombëtare të kenë përparësi, disa vende më të vogla shqetësohen për dobësimin e institucioneve ndërkombëtare.
“Nuk është gjë e mirë për ne, pasi jemi vend i vogël dhe na duhen rregullat që t’ja dalim më mirë. Nëse mbetemi me vetëm politikën e forcës, atëherë do dalim humbës”, thotë Roberto Bouzas, profesor i ekonomisë në Universitetin e San Andreas.
Mes jodakortësive, më shumë ranë në sy takimet dypalëshe.
Princi i kurorës saudite, Mohammed bin Salman, shfrytëzoi G20-ën për të rehabilituar imazhin e tij pas vrasjes së gazetarit Jamal Khashoggi.
Presidenti Trump dhe ai kinez Xi Jinping shfrytëzuan mundësinë për të ulur tensionet SHBA – Kinë.
Por, Presidenti Trump anulloi takimin e shumëpritur me Presidentin rus Vladimir Putin, për shkak të agresionit të Moskës ndaj Ukrainës.
Në përfundim, një forum i krijuar për të forcuar unitetin ndërkombëtar, ndoshta do të mbahet më shumë mend për mungesën e unitetit.

Dy ekonomitë më të mëdha në botë kanë rënë dakord për një armëpushim të vogël në luftën e tyre të shkallëzuar tregtare pas një takimi midis presidentëve Donald Trump dhe Xi Jinping pas samitit të G-20.
Duke folur me gazetarët në avionin presidencial pas largimit nga Argjentina, presidenti Trump tha se marrëveshja e tij e bërë gjatë darkës me presidentin Xi, do të shënohet “si një nga marrëveshjet më të mëdha të bëra ndonjëherë. … Dhe do të ketë një ndikim tepër pozitiv në bujqësi, prodhimet industriale, kompjuterat dhe çdo lloj produkti. ”
Sipas një deklarate të Shtëpisë së Bardhë, Presidenti Trump ra dakort t’i lerë tarifat ndaj mbi 200 miliardë dollarë të produkteve kineze në normën 10 për qind dhe të mos i rrisë ato në 25 për qind, tani për tani, siç kishte kërcënuar të bënte më 1 janar.
“Kina ka rënë dakort të blejë një sasi produktesh bujqësore, energjitike, industriale dhe produkte të tjera nga Shtetet e Bashkuara për të zvogëluar disbalancën tregëtare mes dy vendeve tona”, tha Sekretarja e Shtypit të Shtëpisë së Bardhë, Sarah Sanders. “Kina ka rënë dakord të fillojë menjëherë blerjen e prodhimeve bujqësore nga fermerët tanë”, thuhet në deklaratë.
Sipas deklaratës së Shtëpisë së Bardhë, presidentët Trump dhe Xi gjithashtu “ranë dakord të fillojnë menjëherë negociatat për ndryshimet strukturore në lidhje me transferimin e detyruar të teknologjisë, mbrojtjen e pronësisë intelektuale, barrierat jotarifore, ndërhyrjet kibernetike dhe vjedhjet kibernetike, shërbimet dhe bujqësinë. “Të dy palët ranë dakord të përpiqen që ky transaksion të përfundojë brenda 90 ditëve të ardhshme. Nëse në fund të kësaj periudhe, palët nuk janë në gjendje të arrijnë një marrëveshje, tarifat prej 10 përqind do të rriten në 25 përqind “.