Emisioni “Të Paekspozuarit” ka arritur të zbulojë , bisedat që zhvillon kryebashkiaku i Durrësit Vangjush Dako me pjestarë të bandës së Avdylajve pak ditë para dhe pas zgjedhjeve të 25 qershorit 2017. Në emisionin e Ylli Rakipit janë treguar dy nga mbi 20 bisedat që mendohet se janë në dosjen e prokurorisë që mban numrin 339. Dako del një herë kur trafikantët flasin për të dhe herën tjetër kur ai me numrin personal të celularit që përfundon me shifrat 99 300 i telefonon numrit 2 të grupit, Altin Avdyli (që e thërrasin Niçja) në 27 qershor 2017.
“Dosja 339”, transkipt:
Biseda e bandes me Gjushin…. një nga 20 bisedat:
Niçja: Hë kryetar, hë vllai.
0692099300: Niçe, ku je?
Niçja: Këtu vërdallë…
0692099300: Ku është Astriti?
Niçja: Ka lëviz një çikë.
0692099300: Ku ka lëviz? Jashtë Durrësit?
Niçja: Eh… ça ka? Ka ndonjë gjë?
0692099300: Po jo mo, doja ta takojsha, ta falenderojsha, ta pyesja një çikë.
Niçja: Po, po ku je ti? Të vij të të takoj…
Njësoj është, si ai si unë, e di që jemi një.
0692099300: Po mirë mo, mirë, por doja ta takoja…kanë pi ato.
Niçja: Po, e di po, kanë lëviz… Me të taku një çikë unë ty!
0692099300: Unë tani jam duke ardh nga… rrugës… rrugës…
Dyshimet që lindin nga këto biseda janë se ai e ka përdorur bandën shijakse të trafikut të kokainës për qëllime elektorale të PS-së duke vërtetuar kështu tezën e opozitës se Rilindja i ka toleruar bandat duke kërkuar si këmbim ndihmën e tyre në zgjedhje.

Në bisedën e parë Vangjush Dako, komunikon me Altin Avdylin, alias, “Niçe” dhe i kërkon atij takim me Astrit Avdylin, kreun e grupit të Shijakut, për ta falenderuar.
Në bisedën e dytë të publikuar nga “Të Paekspozuarit”, Altin Avdyli (Niçja), komunikon me një person të paidentifikuar, një ditë përpara zgjedhjeve të vitit 2017. Në këtë bisedë personi i paidentifikuar i kërkon Niçes, para nga “Vangjushi”, për të blerë vota.
Prej më shumë se dy vitesh PD insiston se në përgjimet e nisura nga Gjermania, për të cilat prokuroria shqiptare ka filluar çështjen në Dhjetor 2016 ka dalë edhe emri i kryebashkikaut të qytetit të dytë më të madh në vend.
Vetë kjo dosje që mori emrin “NR 339” ka një odise të veçantë. Ajo fillimisht iu caktua prokurorit Anton Martini. Por në kohën kur ende Adriatik Llalla ishte kryeprokuror ai u shmang, u emërua në Shkodër dhe dosja ra në duart e Besim Hajdarmatës që ishte njëkohësisht edhe shefi i Prokurorisë për krimet e rënda.
Por, pasi kamikazja Arta Makru u vendos në krye të institucionit të akuzës me votat e PS, ajo jo vetëm e shkarkoi Hajdarmatajn nga drejtues, për ta zevendesuar me shoqen e saj D. Prela, por duke e transferuar i hoqi atij nga duart edhe dosjen ku dilte emri i Dakos.
Ajo ia caktojë atë dy prokurorëve të tjerë Dritan Prençi dhe Vladimir Mata. Dhe papritmas kjo dosje me mbi 30 mijë faqe, që vetëm për të lexuar fizikisht do kërkonte javë të tëra, brenda 10 ditësh u çua në gjykatë…..
Por ndërkohë ç’kish ndodhur?
Për Vangjush Dakon, gjoja për të hetuar më thellë, u hap dosja 339 /1 dhe kështu emri i tij u tentua të mbahej i fshehtë për të mos goditur politikisht qeverinë.
Pikërisht materialet ende sekret të 339/1 kanë ‘rrjedhur” deri tek emisioni “Të Paekspozuarit”.
Natyrisht me aq sa u shfaq sonte në mbrëmje, ato nuk përbëjnë një provë fajësie për Dakon për të cilin opozita kërkon arrestimin.
Por ato janë një njollë e tmershme politike për Rilindjen që i provohet një tjetër lidhje me bandat e trafikut të drogës dhe një pistë që nëse do të kishte vërtet një drejtësi të pavaruar, do të hetonte për ndikimin që bandat e trafikut kanë pasur në zgjedhje.

Nga Boldnews.al
Operacioni policor i fundjavës, në të cilin u arrestuan 24 persona, mes të cilëve edhe dy ish-deputetët e Partisë Socialiste, Arben Çuko dhe Arben Ndoka, ka nxitur një përplasje të re mes klaneve të maxhorancës.
Në krye të këtyre linjave kundërshtare brenda socialistëve janë kryeministri Edi Rama nga njëra anë, i cili kontrollon pjesën më të madhe të partisë dhe ministri i Brendshëm, Fatmir Xhafaj, i cili kontrollon me dorë të fortë Policinë, Prokurorinë dhe të gjithë sistemin e drejtësisë, nëpërmjet levave të Komisionit të Vetingut.
“Megaoperacioni” policor, pavarësisht se ishte gjysmak dhe nuk arriti të arrestonte kokat e vërteta të trafikut dhe politikanët e lartë të lidhur me grupet kriminale, gjithësesi u përhap në media si një sukses i ministrit të Brendshëm, Fatmir Xhafaj. Ai e paralajmëroi operacionin, pak ditë përpara se të zhvillohej dhe, nëpërmjet një fushate të fortë mediatike, zuri të gjithë hapësirën publike të fundjavës së varfër me lajme.
“E veçanta” e këtij aksioni policor ishte, ndër të tjera, arrestimi i dy ish-deputetëve, Arben Çuko dhe Arben Ndoka, i pari për korrupsion gjatë kohës që drejtonte Burgjet, ndërsa i dyti për përfshirje në tjetërsim pronash në Lezhë. Kjo “veçanti” rreshtohet sërish në meritat e Xhafajt, i cili synon t’u tregojë ndërkombëtarëve se “nën drejtimin e tij, të gjithë janë të barabartë përpara ligjit”.
Edi Rama, ndoshta jo i befasuar, por i keqardhur që nuk mund të ndalonte revanshin e Xhafajt për të arrestuar dy prej “produkteve të tij politike”, u mjaftua vetëm me dy rreshta në rrjetet sociale, ku përsëriti qëndrimin e dalë boje se “drejtësia është e barabartë dhe nuk ka dy standarte për shkelësit e ligjit…” e disa fjalë të tjera pa bosht.

Ky qëndrim ishte vetëm për Çukon. Ndërsa Arben Ndokën nuk e ka përmendur fare gjatë këtyre ditëve, si të ishte inekzistent.
Qartësisht, mbi Ramën bien kostot politike, së pari brenda radhëve të partisë dhe së dyti, mbi vetë atë, në cilësinë e personit që promovoi Çukon e Ndokën në politikë.
Arrestimet e dy ish-deputetëve kanë shkaktuar pakënaqësi të mëdha tek socialistët, si ata të Lushnjes së Çukos e të Lezhës së Ndokës, por edhe brenda radhëve të grupit parlamentar. I pari që reagoi shumë ashpër ishte Pjerin Ndreu, deputet i Lezhës dhe mik i ngushtë i Arben Ndokës. Ligjvënësi Ndreu akuzoi policinë dhe prokurorinë për “arrestime skandaloze dhe me standarte të dyfishta”.
Kjo shprehje e Ndreut do të kishte mjaftuar për largimin e tij nga grupi parlamentar i socialistëve, duke mbajtur në vëmendje faktin se, për diçka të ngjashme, Edi Rama “fluturoi” nga radhët e partisë deputetin e Kurbinit, Gjetan Gjetani, në fillim të muajit shtator. Por, ndaj Pjerin Ndreut, i cili kritikoi ashpër policinë dhe, në mënyrë indirekte Fatmir Xhafajn, kryetari i Partisë, Edi Rama, nuk ndërmorri asnjë masë penalizuese.
Ndërkohë, ndaj Edi Ramës erdhi një kritikë e fortë, edhe nga salla e gjyqit. Një prej të arrestuarve si bashkëpunëtor me familjen Ndoka, deklaroi në seancë se “po bëhen koka turku nga Edi Rama për procesin e integrimit”. Kjo shprehje u tha nga një prej personave më periferikë në këtë çështje, arrestimi i të cilit nuk ka asnjë ndikim në proceset integruese të Shqipërisë.
Ndikim në kriterin e goditjes së paligjshmërisë kanë arrestimet e zyrtarëve, deputetëve e ish-deputetëve.

Në rastin konkret, arrestimet e ish-deputetëve Çuko e Ndoka mund të jenë një sinjal për ndërkombëtarët se Edi Rama “e ka seriozisht me luftën kundër kriminalitetit”.
Por, as Çuko, as Ndoka nuk e deklaruan pretendimin se janë “koka turku”-ata, megjithëse në kushtet e paraburgimit, duket se janë koordinuar për t’ia përcjellë këtë mesazh kryetarit të tyre nëpërmjet një hallexhiu, i cili gjendet me pranga bashkë me ata.
Edi Rama, me shumë mundësi, po tenton të gjejë zgjidhje për të dalë nga laku që i ka ngritur Fatmir Xhafaj. Ky i fundit, pikërisht për shkak të “megaoperacionit” gjysmak, po tenton ta mbajë peng kryetarin e Partisë. Xhafaj, si edhe Rama, e dinë shumë mirë se pas këtyre grupeve kriminale janë njerëz me pushtet të madh politik, të gjithë bashkëpunëtorë të ngushtë të kryeministrit Edi Rama. Ministri i Brendshëm i ka të gjithë në dorë, nëpërmjet përgjimeve që gjenden në duart e vartëses së tij “de facto”, Kryeprokurores së Përkohshme, Arta Marku.
Ndaj, përplasja Rama-Xhafaj duket se po mban pezull maxhorancën dhe sidomos kryetarin e saj, i cili po tenton të tërheqë vëmendjen me skenarë të tjerë politikë, siç janë ligji për shkatërrimin e teatrit dhe ai për ndalimin e basteve.
Afrimi i zgjedhjeve lokale dhe rreshtimi i dukshëm i kryebashkiakut të Tiranës, Erion Veliaj, në krah të Fatmir Xhafaj, janë kokëçarje të mëdha për kryetarin e Partisë Socialiste, i cili, për shkak të goditjes së Xhafajt, humbi mbështetje të madhe në Lezhë e Lushnje. Por, humbi dhe po humbet më shumë politikisht, për faktin se arrestimi i Arben Çuko dhe Arben Ndokës është një dëshmi e radhës së “Rama, pasi të përdor, të hedh….prangat”, si në rastin e dy ish-deputetëve.

Ish-Kryeministri Sali Berisha, ka vijuar me publikimin e denoncimeve të mbërritura në adresë të tij.
Me anë të një postimi në rjetet sociale, Berisha ka publikuar një denoncim, sipas të cilit thuhet se Bashkia e Roskovecit po rinovon shtëpinë e prindërve të Engjëll Agaçit për ta përdorur atë si një sekser për një rikanidim të dytë.
“Kjo shtëpi që shikoni është banesa e prindërve të Sekretarit të Përgjithshëm të Kryeministrisë, Engjëll Agaçi, me vendodhje në Roskovec.
Banorët e lagjes denoncojnë se shtëpia e Don Agaçios po rinovohet nga puntorët e Bashkisë Roskovec. “Majlinda me shpirt djalli” po i rinovon banesën Don Agaçios, për ta përdorur si sekser tek Rama për të siguruar rikandidimin”. shkruhet ndër të tjera, ndërsa ngrihen dy pyetje.

Vjedhjet janë kthyer në shqetësim në zonën e Mirditës. Hajdutet po veprojnë si natën ashtu dhe ditën, ndërsa nuk kanë munguar as grabitjet me armë dhe maska. Në shënjestër të tyre janë kryesisht njësitë tregtare në qytetin e Rrëshenit, ndërsa në fshatra bagëtitë e imta.
Denoncimi ka ardhur nga banorët e Mirditës, të cilët thonë se situata e krijuar ka shkaktuar frikë dhe pasiguri. Ata akuzojnë policinë për neglizhencë dhe bashkëpunim me autorët dhe grupet kriminale.
Nga ana tjetër, Policia ka bërë me dije se në çdo rast është vepruar në përputhje me ligjin dhe se fton qytetarët për bashkëpunimin e të gjithë banorëve për të denoncuar jo vetëm vjedhjet, por edhe vetë punonjësit e policisë, në rastet kur ata vërejnë se ka hezitime për të ndjekur çdo ngjarje.