Është zbardhur dëshmia e dhënë në Gjykatë nga ana e Gledo Hotit, i arrestuar për ngjarjen në ish-Bllok, ku mbeti i vrarë një person dhe u plagosën dy të tjerë.
Hoti është shprehur se ai nuk ka pasur asnjë dijeni për sherrin mes tyre, dhe se ai është fshehur nën tavolinë në momentin kur dy persona kanë qenë duke e qëlluar.
“Nuk kam qëlluar askënd kur ishim në lokal me Ervin Matën, me Mervjol Bilon dhe me Redi Popescun. Ai na qerasi me një verë. Erdhën dy persona që si njihja dhe thanë: Askush të mos lëvizë!, dhe më pas nxorrën armët. Në atë moment u futa poshtë tavolinës nga frika. Në Greqi ika se do merrja nje pajisje por jo se do t’i fshihesha hetimit”, është shprehur Hoti.
Për vrasjen e të riut Fabiol Gaxha derimë tani janë arrestuar tre persona, Ervis Martinaj, Eljo Hati dhe Gledi Hoto.
Ndërkohë që mbeten ende në kërkim Ervin Mata, i dashuri i këngëtares Elvana Gjata dhe komandoja Marviol Bilo, i cili dyshohet të jetë dhe personi që ka qëlluar.

Në Shqipëri një sasi tritoli shpërtheu në mesnatë në Fushë Krujë, në oborrin e shtëpisë ku banon Xhisiela Maloku, vajza 25 vjeçare, ish e dashura e Rexhep Rrajës, djali i deputetit socialist Rrahman Rraja, i cili u arrestua javën e shkuar nën akuzën e përndjekjes ndaj të resë.
Sipas burimeve, bëhet fjalë për një sasi të vogël tritoli, nga shpërthimi i së cilës nuk ka patur, siç njoftoi policia, as dëme materiale. Të paktën 9 persona janë shoqëruar për ngjarjen.
Xhisiela Maloku, tha për gazetarët se ajo ndodhej në banesë në momentin e shpërthimit dhe se të gjithë ishin frikësuar.
Ajo drejtoi gishtin e akuzave ndaj opozitës e cila ‘po bën lojë politike’, duke deklaruar sërish se nuk ndjehet e kërcënuar nga familja Rraja. Maloku shpjegoi se kishte refuzuar deri më tani mbrojtjen nga policia, dhe se pas ngjarjes së mbrëmshme do ta pranonte atë.
Vajza 25 vjeçare, bëri kallëzim ndaj ish të dashurit Rraja në muajin korrik,duke e tërhequr më pas. Megjithatë çështja i kaloi prokurorisë. Maloku i ishte drejtuar disa herë policisë, duke akuzuar Rrajën, me të cilin kishte patur një marrëdhënie të gjatë dashurie, për kërcënime dhe dhunë ndaj saj. Në deklarimet e saj ajo ka pranuar se është detyruar të tërhiqet për shkak të frikës që kishte nga hakmarrja e djalit.
Episodi që çoi në arrestimin e të riut Rraja, lidhet me dhunën që ai kishte ushtruar ndaj Malokut në një dhomë hoteli. Por në dy intervista, vajza mohoi që ndaj saj të ishte ushtruar dhunë, duke deklaruar se ajo e kishte bërë gjithçka nga xhelozia dhe se kallëzimi i saj kishte qenë i rremë. Por në të vërtetë, pohimet e saj duket se konfirmuan pikërisht frikën që ajo ka nga i riu, sepse përtej përshkrimeve apo deklaratave, akti i ekspertizës ligjore nuk lë shteg për dyshime. Ky akt tregon se ajo ka patur shenja dhunë në shpatulla dhe djegie me cigare në kofshë.
Është pikërisht ekspertiza mjeko-ligjore ajo që ka mbajtur në pranga Rexhep Rrajën, sikundër dhe një përgjim i kryer më 29 Shtator, gjatë ballafaqimit mes dy të rinjve në Prokurori, ku sërish Rraja ka kërcënuar vajzën.
Artikull i botuar nga Zeri Amerikës/Shqip

Ish-Kryeministri Berisha ka reaguar me ashpërsi ndaj vendosjes së lëndës eksplozive në shtëpinë e gjyshërve të Xhisiela Malokut.
Berisha shkruan se ky është një krim shtetëror dhe autor i tij është Edi Rama.
Ish-Kryeministri u ka bërë thirrje qytetarëve që “të ngrihemi për tu ndarë sa më parë nga kjo bandë horrash, përdhunuesish dhe drogaxhinjsh”.
Ja postimi i plotë i ish-Kryeministrit Berisha
Vazhdon seriali horror i kryeperdhunuesit Edvin Kristaq Rama kunder viktimes Xh. M!
Tritolin ne shtepine e gjysherve te XH.Malokut e vendosi kryeperdhunuesi i Vjolistanit l, Edvin Kristaq Rama!
Te dashur miq, flake per flake iu pergjigj kryeperdhunuesi Edvin Kristaq Rama deklarates se djeshme Xh M, ne te cilen ajo nga spitali deklaroi se do te flase para ligjit.
Tmerri nga fjala e saj beri qe kryeperdhunuesi i Vjolistanit te urdheroje perdhunuesit e tjere ministra, deputete, drejtore etj, ti mbyllin gojen para ligjit viktimes Xh M me “pakëz” “nje çike” tritol per ca deme materiale.
Denoj me ashpersine me te madhe kete akt kriminal shteteror dhe u bej thirrje qytetareve te ngrihemi per tu ndare sa me pare me kete bande horrash, perdhunuesish dhe drogaxhinjsh. sb

Nga Boldnews.al

Hoteli i Ervin Mata, i shpallur në kërkim për ngjarjen e rëndë të ndodhur në ish-Bllok, në mes të javës, ka shërbyer për takime sekrete e konfidenciale të Shërbimit Informativ Shtetëror.
Ervin Mata, pavarësisht se nuk rezulton zyrtarisht, është bashkëpronar, me të atin, në hotel “Victoria”, i cili gjendet në rrugën e Dibrës. Ambjentet e këtij hoteli, gjatë periudhës 2015-2018 kanë shërbyer për mbi 50 takime të zyrtarëve të lartë të Shërbimit Sekret Shqiptar me homologë të tyre të shërbimeve partnere.
Këto të dhëna janë organizuar me fonde shtetërore dhe gjenden të publikuara në portalin informativ “Spending data.al”.
“Boldneës.al” ka realizuar një kërkim në këtë burim informativ, nga ku ka rezultuar se Apartati Qendror i Shërbimit Informativ Shtetëror, për periudhën 2015-2018, ka zhvilluar plot 53 aktivitete në hotel “Victoria”, pjesa më e madhe të shoqëruara me shënimin “pritje delegacioni klasifikuar sekret” ose “pritje delegacioni klasifikuar konfidencial”.
Shumat e depozituara nga Shërbimi Informativ për llogari të hotel “Victoria” nuk mund të vlerësohen të konsiderueshme-në total, vlera e fondeve publike të këtij institucioni për hotelin e Elvis Mata llogariten në një total prej 2 milionë lekësh të reja në 3 vjet.
Por, nga ana tjetër, fakti që Shërbimi Informativ ka pasur bashkëpunim për të paktën 50 herë me hotelin e Ervis Mata është një dëshmi se drejtuesit e tij, ambjentet dhe personeli kanë qenë të sigurt për zhvillimin e takimeve sekrete të drejtuesve të lartë të spiunazhit shqiptar me bashkëpunëtorët e tyre të huaj.

Ervin Mata, deri në mesjavë, njihej si një biznesmen i madh në Tiranë dhe që ishte i dashuri i këngëtares së njohur, Elvana Gjata. Gjithësesi, në Qendrën Kombëtare të Regjistrimit (QKR), ai rezulton se është pronar i kompanisë “Computer City”, e cila është pezulluar prej vitit 2014 dhe aktualisht është në fazë likujdimi.
Ndërkohë, hotel “Victoria” është në pronësi të babait të tij, gjithnjë sipas dokumentave zyrtrë të QKR-së.
Pra, Ervin Mata, pavarësisht se njihet si “biznesmen i suksesshëm” dhe për jetën e tij luksoze, në fakt, sipas dokumentave zyrtarë, nuk rezulton të ketë në pronësi të tij aktiviteve që i lejojnë shpenzime të mëdha.
Fakti që Ervin Mata jeton në mënyrë luksoze, ndërkohë që ai vetë nuk rezulton zyrtarisht të ketë të ardhura që e justifikojnë, nuk është konstatuar, me shumë mundësi, as nga Shërbimi Informativ Shtetëror, përsa kohë që hotel “Victorian” e ka vlerësuar si një vend të sigurt ku mund të ndante informacionet me partnerët ndërkombëtarë.
Ervin Mata aktualisht është shpallur në kërkim nga Policia, si një prej personave të përfshirë në ngjarjen e përgjakshme në zonën e ish-Bllokut, ku mbeti i vdekur Fabiol Gaxha dhe u plagosën Ervis Martinaj e Eljon Hato. Bashkë me Matan, në kërkim janë edhe Fabiol Alushi e Mervjol Bilo.
Deri më tani, shkaku zyrtar i konfliktit ndërmjet dy grupeve është ngacmimi që viktima, Gaxha, i ka bërë të dashurës së Ervin Mata, këngëtares Elvana Gjata. Gjithësesi, grupi hetimor nuk ka përjashtuar edhe pista të tjera të mundshme për përplasjen me armë mes tyre.
Disa nga personat e përfshirë kanë një skedë të pasur kriminale, si edhe janë persona që njihen si “biznesmenë” ose njerëz që qarkullojnë shumë para në jetën e tyre të përditshme.