22.5 C
Tirana
E martë, 24 Qershor, 2025
type here...

Basha reagon ndaj sulmeve të Berishës: PD s’do jetë kurban i klubit Partizani

Kryetari i Partisë Demokratike – Demokratët Euroatlantikë, Lulzim Basha, ka reaguar ndaj sukmeve të Berishës, duke postuar një video në me deklaratën e ish-kryeministrit, i cili shprehej në një intervistë se “ishte një fat i madh që PD nuk fitoi zgjedhjet”.

Basha shkruan se ky ishte dhe vullneti i ish-kryeministri Sali Berisha për pushtetin e demokratëve. Sipas tij, PD nuk mund të jetë kurrë kurbani për interesat e Klubit Partizani.

Postimi i plotë:

Ky është Sali Berisha, ky ishte vullneti i tij për pushtetin e demokratëve.
PD nuk mund të jetë kurrë kurbani për interesat e Klubit Partizani!

 

SKANDALET NUK NDALEN/ Kryebashkiakja e Përmetit i jep tenderin 300 mln lekë djalit të Kryetarit të Bashkisë Poliçan

Një tender me vlerë rreth 300 milionë lekë të vjetra, që kishte për objekt “Rehabilitimin e rezervuarit Qilarisht”, është dhënë nga Bashkia Përmet, e drejtuar nga Alma Hoxha, kompanisë G & M CONSTRUCTION 07. Kjo kompani është në pronësi të Maliq Zotkaj dhe Oligert Dyrmishi, ku Maliq Zotkaj rezulton të jetë djali i kryetarit aktual të Bashkisë Poliçan, Adriatik Zotkaj.

Fituesi ka konkurruar në partneritet me kompaninë 2T, në pronësi të Artan Sako dhe Dritan Troksi. Kujtojmë se Artan Sako është vëllai i ish-komandantit të Gardës së Republikës, Gramos Sako.

Tenderi u finalizua me një vlerë prej 24,291,841.78 lekë të reja pa TVSH, e cila përkon me gati 100% të fondit limit, që ishte 24,805,385.84 lekë të reja.

Edhe pse në garë morën pjesë pesë kompani, dy prej tyre ofruan vlera më të ulëta se fituesi, por nuk u morën në konsideratë nga kryetarja e bashkisë Përmet, Alma Hoxha.

Ky fakt ka ngritur dyshime mbi një favorizim të mundshëm, duke sugjeruar se fituesi mund të jetë paracaktuar.

Kjo situatë ngre shqetësime të thella mbi mënyrën se si përdoren fondet publike. Paratë e taksapaguesve shqiptarë duket se përfundojnë në duart e familjarëve të zyrtarëve lokalë, duke krijuar një rreth vicioz të përfitimeve brenda eksponentëve të Rilindjes.

Kjo praktikë ka ndezur debat mbi integritetin e procesit të tenderimit në bashki të ndryshme dhe mbi rolin e SPAK-ut, që deri tani duket se po tregon një qasje pasive.

A është e ligjshme kjo situatë? Çfarë hapash do të ndërmerren për të hetuar këtë rast dhe për të garantuar drejtësi?

Heshtja e institucioneve përkatëse mund të interpretohet si një mungesë vullneti për të adresuar praktika që dëmtojnë interesin publik dhe rrisin mosbesimin tek administrata vendore./ JOQ Albania

Siguria energjetike/ Sekretariati i Komuniteti i Energjisë për vendet e Ballkanit Perëndimor: Shqipëria ende nuk ka plan gatishmërie

Kriza e energjisë që nisi në fund të verës 2021 dhe kulmoi në vitin 2022 u bë dhimbja e kokës e shumë vendeve përfshirë Shqipërinë e cila u detyrua të paguante disa qindra milionë euro në importe. Njëkohësisht ajo kohë shërbeu tek një theks i shtuar për diversifikimin dhe rritjen e sigurisë energjetike.

Por raporti i fundit i Sekretariatit të Komunitetit të Energjisë për vendet e Ballkanit Perëndimor vëren se akoma edhe sot vendi ynë nuk ka një raport gatishmërie për rastet e emergjencës. Treguesi i sigurisë energjetike rezulton në total me një realizim 8 për qind për Shqipërinë duke renditur edhe arsyet pse masat e mara për të rritur këtë siguri mbeten ende të zbehta.

“Shqipëria nuk ka transpozuar Rregulloren (BE) 2019/941 dhe as ka caktuar autoritetin kompetent për gatishmërinë ndaj rrezikut megjithëse afatet mbaronin respektivisht më 31 dhjetor 2023 dhe 5 janar 2023. Zhvillimi i planit të gatishmërisë ndaj rrezikut nuk është iniciuar. Shqipëria nuk i ka dorëzuar Sekretariatit Deklaratat e Sigurisë së Furnizimit me Energji Elektrike, megjithëse e detyruar nga neni 29 i Traktatit. Gjendja e jashtëzakonshme për Furnizimi me energji elektrike është ndërprerë që nga viti 2024. Rregullorja (BE) 2017/2196 gjithashtu nuk është transpozuar deri më tani,” thuhet në raport. Në total vetëm siguria energjetike e lidhur me elektricitetin është vetëm 8 për qind.

Përllogariten çmimet mesatare të shitjes së banesave, ja cilat janë zonat më të shtrenjta në vend
Sa i takon sigurisë nga furnizimi me gaz realizimi i këtij treguesi është në nivelin 73 për qind dhe kjo i atribuohet miratimit të kuadrit rregullator.

“Rregulloret e emergjencës së gazit janë vendosur pas ndryshimeve në Ligjin e Gazit në vitin 2021, i cili përfshin aspekte specifike të Rregullores së Sigurisë së Furnizimit me Gaz (BE) 2017/1938. Shqipëria përputhet zyrtarisht me Rregulloren SoS,” thuhet në raport.

Ndërkohë elementi i tretë siguria e furnizimit me naftë diçka që diskutohet prej vitesh dhe ka të bëjë me planin e rezervave. Ky tregues sipas Sekretariatit vlerësohet në 28 për qind.

“Sistemi aktual i ruajtjes së rezervës së natës Shqipëri rregullohet nga legjislacioni që daton që nga viti 1999 (ndryshuar në 2004) dhe dekretet e qeverisë të viteve 2004 dhe 2007, duke vendosur të gjithë detyrimin e stokut mbi industrinë e naftës. Në vitin 2018, u hartua drafti për krijimin, mirëmbajtjen dhe menaxhimin e rezervës minimale të sigurisë së naftës dhe produktet e saj. Megjithatë, kjo nuk u miratua gjatë periudhës raportuese. Në vend të kësaj, në vitin 2022,u hartuan tre projekt-rregullore dhe një vendim qeverie për të krijuar një sistem që përputhet me kërkesat e Direktivës duke ruajtur model të bazuar në industri. Megjithatë, procedurat aktuale të emergjencës mbeten të pamjaftueshme për të përmbushur standardet e Direktivës. Shqipëria nuk ka dorëzuar pyetësorin të importit mujor të naftës bruto të furnizimit (COIR) që filloi në janar 2023. Nuk është bërë gjatë periudhës së raportimit, dhe kuadri ligjor i Shqipërisë mbetet i papajtueshëm,” vëren raporti./ Monitor

Shefi i NATO-s paralajmëron Evropën: Nëse s’doni që lufta t’ju vijë te dera, zgjohuni dhe veproni

“Evropa duhet urgjentisht të zgjohet nga gjumi dhe të shpenzojë shumë më shumë për mbrojtjen e saj, duke parë kërcënimin rus.”

Është ky apeli i fortë nga Sekretari i Përgjithshëm i NATO-s, Mark Rutte, i cili ka pranuar se Evropa është e papërgatitur përballë forcës së Moskës.

“Ne nuk jemi gati për atë që do të na vijë pas katër apo pesë viteve”, tha Shefi i NATO-s, duke shtuar se “është koha për të kaluar në një mentalitet të kohës së luftës dhe për të rritur prodhimin tonë të mbrojtjes dhe shpenzimet e mbrojtjes”.

Rutte bëri thirrje për mbështetje publike dhe një ndjenjë sakrifice për të “parandaluar luftën tjetër të madhe në tokën e NATO-s”.

Ky apel zyrtar i kreut të Aleancës së Atlantikut të Veriut vjen në një kohë kur forcat ukrainase po tërhiqen në fushën e betejës përballë ushtrisë më të madhe dhe më të pajisur ruse.

“Lufta në Ukrainë po shkakton më shumë se 10,000 vdekje dhe lëndime nga të dyja palët çdo javë”, nënvizoi Rutte. “Rreziku po na afrohet me shpejtësi të madhe”, paralajmëroi ai duke iu referuar kërcënimit rus në kontinentin evropian.

“Ajo që po ndodh në Ukrainë mund të ndodhë edhe këtu. Edhe pse nuk ka kërcënim të menjëhershëm ushtarak kundër NATO-s, kjo nuk e pengon Rusinë të përgatitet për një konfrontim afatgjatë me Ukrainën dhe me ne, 32 vendet e NATO-s”, theksoi shefi i NATO-s.

Ai theksoi se “ekonomia ruse është në gjendje lufte”, ndërsa në Evropë, shtetet hezitojnë të shpenzojnë më shumë për të rritur aftësitë e tyre mbrojtëse.

“Dhe përveç Rusisë, Kina, Irani dhe Koreja e Veriut po punojnë shumë për të dobësuar Amerikën e Veriut dhe Evropën. Ne duhet të jemi të qartë për ambiciet e Kinës kur ajo rrit ndjeshëm forcat e saj, përfshirë armët e saj bërthamore, pa kufij dhe me paqartësi”, tha.

Në një botë ku “situata e sigurisë është më e keqja që kam përjetuar në jetën time, ne nuk jemi aty ku duhet të jemi”, u shpreh Rutte.

“Industria e mbrojtjes e Evropës është shumë e vogël, shumë e ngadaltë dhe shumë e fragmentuar”, shpjegoi ai, duke u bërë thirrje qeverive, industrisë dhe publikut të bëjnë një hap besimi.

E vërteta është se vendet e NATO-s shpenzojnë “shumë më pak” për mbrojtje sesa gjatë Luftës së Ftohtë, kur ata i kushtuan mbrojtjes më shumë se 3% të prodhimit të tyre të brendshëm bruto.

Në vitin 2023, aleatët vendosën të rrisin shpenzimet e tyre ushtarake në 2% të PBB-së, por vetëm 23 prej tyre e kanë arritur këtë kufi. “Mund t’ju them se do të na duhen shumë më tepër se 2%”, theksoi Rutte.

Disa vende të NATO-s po flasin për nevojën e rritjes së këtij kufirit në 3%, por ato mbeten të ndara dhe ende nuk është marrë një vendim.

Çdo njësi shtesë e PBB-së përfaqëson rreth 200 miliardë më shumë për vendet e BE-së, 23 prej të cilave janë gjithashtu anëtarë të NATO-s, sipas Komisionerit të ri Evropian të Mbrojtjes, Andrews Koubilius.

“Kjo përpjekje vjen me një kosto, e cila kërkon sakrifica. Sot po bëj apel për mbështetjen tuaj. Unë e di që të shpenzosh më shumë për mbrojtjen do të thotë të shpenzosh më pak për prioritetet e tjera, por është një pjesë e vogël e shpenzimeve sociale që duhet të përdoret për të arritur këtë. Për të mbrojtur lirinë tonë politikanët tuaj duhet t’ju dëgjojnë. Thuajuni atyre se jeni gati të bëni sakrifica sot, në mënyrë që ne të mund të qëndrojmë të sigurt nesër. Thuajuni atyre se duhet të shpenzojnë më shumë për mbrojtjen në mënyrë që ne të vazhdojmë të jetojmë në paqe. Nëse nuk shpenzojmë më shumë kolektivisht tani për të parandaluar luftën, ne do të paguajmë një çmim shumë, shumë, shumë më të lartë më vonë duke bërë luftë,” përfundoi Sekretari i Përgjithshëm i NATO-s.

Udhëheqësit e NATO-s ranë dakord t’i japin fund shkurtimeve të mbrojtjes që filluan kur Lufta e Ftohtë përfundoi pasi Rusia aneksoi Gadishullin e Krimesë të Ukrainës një dekadë më parë, duke lëvizur drejt shpenzimit të 2% të PBB-së në buxhetet e tyre ushtarake.

Por që kur Rusia pushtoi Ukrainën pothuajse tre vjet më parë, ata kanë rënë dakord që objektivi prej 2% duhet të jetë minimumi për shpenzimet e mbrojtjes.

Ndërsa aleanca e përmbush atë objektiv kolektivisht, rreth një e treta e anëtarëve nuk e godasin atë individualisht. Të paktën 23 nga 32 anëtarët e saj do të përmbushin objektivin prej 2% këtë vit, vlerëson aleanca.

Presidenti i sapozgjedhur i SHBA, Donald Trump, i cili merr detyrën më 20 janar, ka kërcënuar se SHBA nuk do të mbrojë vendet “delikuente” që nuk shpenzojnë mjaftueshëm për mbrojtjen e tyre.

Aleanca është themeluar mbi parimin se një sulm ndaj një anëtari konsiderohet si sulm ndaj të gjithëve dhe komentet e zotit Trump ngritën frikën nëse SHBA do të vepronte për të ndihmuar në një krizë.

Të gjithë me sytë nga Armando Broja, sulmuesi shqiptar hyn në historinë e Evertonit

Me debutimin e Armando Brojës javën e kaluar, me fanellën e Evertonit, Shqipëria u bë kombi i 50-të i ndryshëm që përfaqësohet nga klubi blu në Premier Ligë. Kësisoj Broja ka hyrë në historinë e klubit të Evertonit si futbollisti i parë shqiptar që aktivizohet me këtë skuadër.

Kujtojmë që sulmuesi kuqezi debutoi me skuadrën angleze në duelin ndaj Uolves, ku blutë triumfuan pastër me rezultatin 4 me 0.

Tashmë shpresat janë të shumta, që Broja të gjejë edhe golin e parë me fanellën e Evertonit, duke lënë pas momentin e vështirë pas dëmtimit që e mbajti gjatë jashtë fushave të blerta.

Studimet: Disa paciente me kancer gjiri mund të shmangin operacione të caktuara! Ja rastet

Disa paciente në fazat e para të kancerit të gjirit mund të shmangin në mënyrë të sigurt operacione të caktuara, sipas dy studimeve që eksplorojnë mënyrat për të lehtësuar barrën e trajtimit.

Një studim i ri, i botuar në gazetën e përjavshme mjekësore ‘New England Journal of Medicine’, shqyrton nëse heqja e nyjeve limfatike është në çdo rast e nevojshme në fazat e hershme të kancerit të gjirit.

Një studim tjetër i publikuar në ‘Gazetën e Shoqatës Mjekësore Amerikane’ sugjeron një qasje të re ndaj një lloji të kancerit të gjirit të quajtur “ductal carcinoma in situ”, ose DCIS.

Hulumtimi u diskutua të enjten në Simpoziumin e Kancerit të Gjirit në San Antonio.

DCIS dhe mbikqyrja e vazhdueshme

Çdo vit, rreth 50 mijë gra në Shtetet e Bashkuara diagnostikohen me karcinoma duktale in situ, ose DCIS, ku qelizat që formojnë kanalet e qumështit bëhen kancerogjene, por indi i gjirit aty pranë mbetet i shëndetshëm.

Shumë gra zgjedhin të kryejnë operacion, megjithëse është e paqartë nëse në vend të ndëryrjes kirurgjikale mund të ndjekin një qasje “të presim dhe të shohim”, paralelisht me një mbikqyrje më të shpeshtë.

Studimi i ri, i bazuar në të dhëna dyvjeçare, sugjeron se një monitorim i tillë aktiv është një alternativë e sigurt ndaj operacionit për shumë prej këtyre grave, megjithëse disa mjekë kërkojnë të shohin nëse rezultati do të vazhdojë të jetë i efektshëm me kalimin e kohës.

“Ky është një opsion që pacientet duhet ta marrin në konsideratë për trajtimin e kancerit DCIS”, tha doktoreshë Virginia Kaklamani nga Qendra e Shkencave Shëndetësore e Universitetit të Teksasit ‘San Antonio’, e cila nuk ishte e përfshirë në hulumtim. “Për një kohë të gjatë, ne kemi pasur ndjenjën se po i mbitrajtonim pacientet me DCIS. Ky është një konfirmim i asaj që dyshonim se po ndodhte”.

Duke mbajtur një pikëpamje më të kujdesshme, doktoreshë Monica Morrow nga Qendra e Trajtimit të Kancerit ‘Memorial Sloan Kettering’, e cila nuk ishte e përfshirë në hulumtim, tha se një studim dyvjeçar nuk është i mjaftueshëm për të nxjerrë përfundime.

Gjetja bazohet në ndjekjen e më shumë se 950 pacienteve amerikane, të cilave u ishte rekomanduar operacion ose monitorim aktiv. Të gjitha kishin kancer DCIS me rrezik të ulët, pa asnjë shenja të kancerit invaziv. Ato vuanin nga lloji i DCIS që reagon ndaj ilaçeve që bllokojnë hormonet dhe shumë paciente të përfshira në studim i morën këto barna si pjesë të trajtimit të tyre.

Pas dy vitesh, shkalla e kancerit invaziv, (që ishte përhapur në kanale të tjera të gjirit), ishte e ulët dhe nuk ndryshonte ndjeshëm midis grupeve, me rreth 6 për qind në grupin pacienteve të trajtuara me operacion dhe rreth 4 përqind në grupin e pacienteve nën mbikqyrje.

Në radhët e pacienteve në grupin e monitorimit, nëse viheshin re ndryshime gjatë mamografisë, atëherë do t’u kërkohej të bënin një biopsi. Ato gjithashtu mund të zgjedhin operacionin në çdo kohë për çfarëdo arsye.

Disa pjesëmarrëse në studim nuk iu përmbajtën trajtimit që iu caktua rastësisht.

Pra, në një analizë të veçantë, duke parë ato që bënë ose jo operacion, shkalla e përhapjes së kancerit ishte rreth 9 për qind për grupin e kirurgjisë dhe 3 për qind për grupin e monitorimit.

Studiuesit do të vazhdojnë të ndjekin pacientet për të parë nëse zbulimi qëndron mbi një dekadë.

Tina Clark, 63 vjeç, nga qyteti Buxton, në shtetin Mein, iu bashkua studimit pasi u diagnostikua me DCIS në vitin 2019. E caktuar rastësisht në grupin vetëm për monitorim, ajo pati mundësi të shmangte operacionin dhe rrezatimin ndërsa kujdesej për rritjen e nipit si dhe përpiqej të kapërcente vdekjen së e të shoqit.

“Ndihem shumë mirënjohëse dhe me fat që e gjeta këtë studim”, tha zonja Clark.

Ajo bën mamografi çdo gjashtë muaj për të mbajtur nën kontroll kancerin e llojit DCIS në gjirin e djathtë, i cili nuk është përhapur. Mamografitë vunë re një kancer të vogël në gjirin tjetër të saj në vitin 2023, të palidhur me DCIS. Ajo iu nënshtrua një operacioni për heqjen e tij.

“Nëse jeni diagnostikuar me kancer DCIS me rrezik të ulët, keni kohë për të kuptuar më shumë për sëmundjen dhe cilat janë opsionet tuaja,” tha autorja e studimit, doktoreshë Shelley Hwang nga Universiteti ‘Duke’.

Nyjet limfatike dhe kanceri i hershëm i gjirit

Gratë që kryejnë operacion për kancerin e gjirit shpesh i nënshtrohen edhe asaj që quhet biopsi e nyjeve limfatike qendrore, ku hiqen disa nyje limfatike në sqetull për të kontrolluar për përhapjen e kancerit.

Por heqja e nyjeve limfatike mund të shkaktojë dhimbje të qëndrueshme dhe ënjtje të krahut, ndaj po bëhen kërkime për të përcaktuar se kur mund të shmanget një gjë e tillë. Një studim në Evropë vitin e kaluar tregoi se gratë e moshuara me tumore të vogla mund të shmangnin në mënyrë të sigurt këtë ndërhyrje tjetër.

Në studimin e ri, hulumtuesit në Gjermani panë nëse gratë me kancer të hershëm të gjirit që planifikonin të bënin një operacion për heqjen e kancerit, por duke ruajtur gjirin, mund të shmangnin në mënyrë të sigurt heqjen e nyjeve limfatike. Ata ndoqën 4,858 gra të cilave iu caktua rastësisht për të hequr ose jo nyjet limfatike.

Pas pesë vjetësh, rreth 92 për qind e grave në të dyja grupet ishin ende gjallë dhe pa kancer.

“Heqja e nyjeve limfatike nuk rrit shanset për mbijetesë dhe rreziku i rikthimit të kancerit në sqetull është mjaft i ulët kur nyjet limfatike nuk hiqen”, tha doktoreshë Monica Morrow nga Qendra e Trajtimit të Kancerit ‘Memorial Sloan Kettering’.

Ajo shtoi se disa gra do të vazhdojnë të kenë nevojë për procedurën e nyjeve limfatike për të ndihmuar në përcaktimin e trajtimit dhe barnat që duhet të marrin pas operacionit./VOA

“PD nuk është klubi Partizani”, Basha: Është një kauz që shkon përtej çdo individi dhe duhet të vazhdojë t’i shërbejë Shqipërisë

Në intervistën për emisionin “Të Paekspozuarit”, kreu i Demokratëve Euroatlantikë, Lulzim Basha, ka theksuar se liderët politikë duhet të jenë të gatshëm të marrin vendime të vështira, duke e konsideruar atë një përgjegjësi dhe një mundësi për të sakrifikuar për interesin e partisë dhe vendit.

Basha tha se Sali Berisha e sheh Partinë Demokratike si pronën e tij personale. Ai ka shtuar se PD nuk mund të trajtohet si klubi Partizani dhe se është forcë politike që duhet të shërbejë për Shqipërinë dhe për qytetarët, duke kaluar përtej interesave të individëve.

Pjesë nga intervista:

Lidershipi ndahet në dy grupe. Ata që marrin parasysh riskun për të sakrifikuar nga vetja e tyre, sepse derisa kanë hipur në atë karrige, me të vërteë kanë përgjegjësinë, disa e shohin edhe si privilegje e vendimeve, por kanë dhe riskun. Se gjërat mund të shkojnë mirë, por mund të shkojnë dhe keq. Prandaj duhet të marrin vendime edhe kur riskojnë veten e tyre. Ka dhe të tjerë që thonë pastaj pas meje kiameti. Qartësisht dhe unë e kuptoj pse e përdor fjalën pronë, zoti Berisha sheh Partinë Demokratike si pronën e vet. Që do të thotë, “më ndodhi mua diçka, këtë pronë e kam për ditë të zezë. Keq unë, keq prona, pas meje kiameti”.
Unë nuk e kam parë këtë për asnjë moment kështu. As ato ditët e para kur sapo u zgjodha kryetar i PD dhe influenca e zotit Berisha ishte e dukshme. Sepse për njerëzit ikja e tij ishte tragjedi dhe as nuk mësohshin dot të më thonin kryetar. Dhe as në ditët e mia të fundit në atë detyrë para se të jepja dorëheqjen në mars të 2022-it. Pse? Për një arsye të thjesht, as sot 12 dhjetor, ditë e shënuar po kështu, seps ka disa që mendojnë se duhej të ishte 12 dhjetori dhe jo 11 dhjetori dita e themelimit të PD, në veçanti sot PD nuk është pronë e një individi. Nuk mund të jetë pronë e një individi. Dhe zoti Berisha i cili e trajton si një pronë, e ka marrë mesazhin nga unë që dje: PD nuk mund ta trajtojë si pronë të tij private.
Ndaja e madhe kjo është, kush e ka parë karrigen e vet, veten e vet, kush e ka parë PD thjesht dhe vetëm si një mundësi për veten e vet, padiskutim ka thënë: kur bëri Berisha këtë punë, “pronari”, po shkojmë dhe ne aty. Kush nuk e ndan këtë mendësi, kush nuk e sheh PD si pronë private të Sali Berishës, kush thotë që PD, siç them unë, nuk mund të jetë klubi Partizani e të trajtohet si klubi Partizani, sepse nuk është pronë private. Por është një kauz që shkon përtej çdo individi dhe gjithë individëve bashkë dhe duhet të vazhdojë t’i shërbejë Shqipërisë.

“Është për të vënë duart në kokë”, Basha: Rama dhe Berisha bashkëpunojnë haptas, po përpiqen të riciklojnë një elitë të kalbur

Kryetari i Partisë Demokratike-Demokratët Euroatlantikë, Lulzim Basha, në një intervistë për emisionin “Të Paekspozuarit” ka theksuar se politikës shqiptare i është imponuar një kalcifikim i plotë, ndërsa ka kritikuar ashpër veprimet e kryeministrit Edi Rama dhe ish-kryeministrit Sali Berisha. Ai ka deklaruar se të ata dy bashkëpunojnë hapur, duke përpjekur të riciklojnë një elitë të kalbur që ka pasur ndikim të thellë në korrupsion dhe lidhje me krimin.

Basha e ka quajtur këtë situatë shqetësuese, duke theksuar se përveç pasurimit të papërshkrueshëm të këtyre grupeve, ata dominojnë ekonominë dhe median.

Ai foli edhe për të shkuarën, vitin 2005 kur erdhi në fillim në Partinë Demokratike. Basha deklaroi se nuk ka përfituar vetëm ai me ardhjen në PD, por tha se edhe Berisha kë përfituar prej tij dhe punës që ka bërë, madje deklaroi se ka fituar disa gara të cilat në finale i kanë shërbyer Berishës.

Basha gjithashtu është shprehur se PD duhet të hapë rrugën për një elitë të re dhe të shëndoshë për të mundësuar një rritje të vërtetë të politikës në Shqipëri.

Pjesë nga intervista:

Ylli Rakipi: Sali Berisha iu dha mundësi të panumërta dhe poste të panumërta, nga prona e vet, sepse edhe sot pronë e ka dhe ti ishe koshient. Lul Basha njeri i mençur dhe e kuptonte, që pa garë pa gjë, erdhi, të mori dhe të dha të gjitha. Ngjitja juaj në PD ishte e rrufeshme sepse kështu kishte vendosur Ai. A e keni pyetur ndonjëherë veten, përse i duheshit ju Sali Berishës kur ju thirri?

Lulzim Basha: Vokacioni im nuk ka qenë në raport me një individ, por në raport me atë që mund të bëja për vendin. A kam bërë diçka për vendin dhe për PD-në? Apo më janë dhënë gjëra? Sigurisht propaganda në fillim e Nanos dhe pastaj Ramës dhe pastaj e Berishës, përpiqet ta rivizatojë të kalurën siç u intereson atyre, i ka marrë thonë. E vërteta është krejt ndryshe. Unë kam bërë garë mazhoritare, kokë më kokë, me të famshmin Arben Ahmetaj, që atëherë ishte një nga yjet në ngjitje të Fatos Nanos dhe e kam mundur në një zonë elektorale që PD e kishte fituar për herë të fundit në vitin 92’. Kam drejtuar në 2009 garën e Elbasanit dhe kam sjellë 7 nga 14 deputetë, ndërkohë që në legjislaturën e mëparshme kishte vetem dy deputetë PD.

Ylli Rakipi: Nuk tha njeri që nuk ke punuar por ti po thua përgjigje tjetër. Jo po nuk të pyeta për këtë.

Lulzim Basha: Jo se the më janë falur gjëra. Kam mundur Edi Ramën për Bashkinë e Tiranës.

Ylli Rakipi: Ky vend do të vazhdojë të shkojë për lesh nëse ne nuk themi të vërtetën. Unë nuk të pyeta për këto, të pyeta, që ai të ka marrë ty… Ku ka patur garë?

Lulzim Basha: Berisha ka marrë prej meje një mandat në Tiranë, që ndryshe nuk do ta merrte në 2005. Ka marrë 5 mandate në Elbasan që nuk do ti merrte. Ka marrë Bashkinë e Tiranës. Por nuk i ka marrë Berishë dhe as demokratët, por shqiptarët, sepse kam sjellë një model të ri që shkallmoi modelin e instaluar në Shqipëri, qoftë në përballje me Ahmetajn, qoftë në Elbasan dhe në garën për kryetar bashkie.

Ylli Rakipi: Nuk them se ti nuk ke punuar. Por, ty të ka thirrur në çifligun e vet, doktor Berisha, sikundërse ndodh edhe me këta të tjerët. Nuk je i vetmi, je njëri prej tyre, por më i rëndësishëm.

Lulzim Basha: Ti the atë natë, njëri prej nesh…

Ylli Rakipi: Po njëri prej nesh, pse ti mendon se në këtë botë qesharake 32 vjecare, ti mendon se unë dua të përjashtoj veten? Bëhem qesharak po përjashtova veten. Ne kemi qenë 30 e ca vjet qesharake të gjithë, kjo qe kemi ndërtuar këtu, nuk është ndërtuar në asnjë vend të botës.

Lulzim Basha: Kjo që është ndërtuar këtu nuk është për të qeshur, por për të vënë duart në kokë. Kjo ka sjellë në këtë kalcifikim total të politikës, këta njerëz janë pasuruar në mënyrë marramendëse, janë lidhur me krimin, dominojnë ekonominë, dominojnë median dhe gjithçka. Më e keqja, është betonizuar, që këto dy anë bashkëpunojnë haptazi me njëra tjetrën. Qeveria e korruptuar e Edi Ramës, e vërtetuar nga përgjimet, që është në bashkëpunim me krimin dhe tani edhe me Sali Berishën.

Ylli Rakipi: Ju e kuptuar që ai po ju thërriste, për të projektuar njeriun e ardhshëm të partisë, kryetarin. Nuk të ka vajtur mendja?

Lulzim Basha: Kam dëgjuar një thashethem të tillë, me thënë të drejtën të filluar jo nga miq dhe dashamirës por nga njerëz që kishin frikë.

Ylli Rakipi: Se ti erdhe dhe u fute nëpër “gara” këtu dhe mbetën të tjerë poshtë…

Lulzim Basha: Nuk thashë këtë, por rrugëtimin tim nuk e kam nisur asnjëherë me ngërçin e brendshëm se dua të kap këtë dhe jam gati të thyej gjithcka për të kapur këtë.

Ylli Rakipi: Marshalli, sic e quante ndjesë pastë Azem Hajdari Berishën, të thirri ty, që ti të bëheshe kryetar i ardhshëm. Ti e dije këtë, por mirë mos e prano.

Lulzim Basha: Nuk është e vërtetë. Nga momenti kur unë jam zgjedhur kryetar i PD, janë tetë vite, nuk mund të thuash, që erdhe në 2005 për t’u bërë kryetar në 2013.

Ylli Rakipi: Ai tjetri, që është në burg tani (Meta) më tha mua, a e pe cfarë ka gjetur? Sa njeri të zotin… Ti ishe me karizmën më të madhe atje, nuk kishte burrë me karizëm më të madhe aty. Edhe kështu tha Ilir Meta, shiko çfarë njeriu. Të presim i thashë unë. Por, që ai të kishte sjellë me një ide, që ti do të bëheshe udhëheqësi, kjo nuk ka pikë dyshimi.

Lulzim Basha: Gjërat në këtë botë i shkruan zoti. Nuk e mohoj se hapja e PD në 2005, që edhe u njoh, edhe u shpërblye nga elektorati, më dha mundësinë mua dhe një grupi njerëzish që të angazhoheshim dhe të merrnim përgjegjësi, pastaj të gjithë sipas talentit, mundësisë edhe fatit, kanë patur rrugëtimin e tyre. Mësimi i vlefshëm i 2005, është se sa herë formacionet politike hapen dhe ka qarkullim elitash, i shërbejnë jo vetëm kauzës së tyre, ardhjes në pushtet, por edhe interesit publik. E kundërta po ndodh sot, përpiqen të riciklojnë një elitë të kalbur.

Demokratët Euroatlantikë do jenë alternativë në zgjedhje/ Basha: Do t’u ofrojmë shqiptarëve një rrugë tjetër nga ajo e Ramës e Berishës

Lulzim Basha ka deklaruar se Demokratët Euroatlantikë do të ofrojnë një rrugë të ndryshme nga ajo e Edi Ramës dhe Sali Berishës, të cilët sipas tij, nuk kanë më asgjë për të ofruar. Gjatë intervistës në emisionin “Të Paekspozuarit”, Basha theksoi se ideja dhe programi i fuqishëm i Demokratëve Euroatlantikë do të frymëzojë shqiptarët dhe se kjo parti ka një strukturë të shtrirë në të gjithë vendin.

Ai e konsideroi situatën aktuale të Shqipërisë, ku shteti është privatizuar, si një moment të pafalshëm dhe theksoi se ai ka detyrë të ofrojë një alternativë politike për vendin.

Pjesë nga intervista:

Ylli Rakipi: Ja tani çfarë përkhrahësish të kanë mbetur ty aty? Edhe miqtë e tu, që i krijove ti, janë vërsulur të gjithë te doktori. Gaz Bardhi përshembull, ishe hija juaj, shkeltë këmba e Lul Bashës dhe një hap më mbrapa vinte Gaz Bardhi. Sot, ai të “vret” për Sali Berishën. Pra, kush të ka mbetur aty?

Lulzim Basha: Ke të drejtë kur e shtron nga kjo pikëpamje. Kjo është pikëpmaja e stilit politik që ka dominuar Shqipërinë dhe aktorët e vjetër duan ta dominojë sërish. Pra, kë ke, ku e ke, kë të fortë ke nga mbrapa, kë oligark ke nga mbrapa, cilat media ke, cilat mund të kapësh.

Ylli Rakipi: Unë nuk thashe për oligarkët, thashë për Gazin dhe këta të tjerët..

Lulzim Basha: Është një mënyrë e të menduarit në raport me personin apo me objektivin e personit në qendër të veprimtarisë politike. Ka një qasje tjetër, që është dominuese në perëndim dhe mua më ka frymëzuar. Nuk ka lidhje me kë ke dhe ku e ke, ka lidhje me idetë. Nëse idetë janë të fuqishme, të duhura, ato kanë aftësinë të frymëzojnë një numër të madh njerëzish, një shumicë njerëzish. Mund të marrim shembuj sa të duash, jo nga starti i Demokratëve Euroatlantikë që kanë strukturë të shtrirë në gjithë vendin…

Ylli Rakipi: Po ide, e di çfarë ideje kam unë sot? Të jem kryetari i Evropës… Po pyet njeri?

Lulzim Basha: Ajo është ambicie për një karrike.

Ylli Rakipi: Jo jo, kam idenë që unë mund ta bëj Europën më mirë se këta… Po ti çfarë ke në dorë ta bësh këtë punë?

Lulzim Basha: Unë kam në dorë ti ofroj dhe kam për detyrë ti ofroj shqiptarëve një rrugë tjetër nga ajo që ofron Edi Rama dhe Sali Berisha, që realisht nuk ofrojnë më asgjë. Kam detyrë të ofrojë një rrugëdalje nga situate ku ndodhen. Është e paimagjinueshme që Shqipëria në 2024 të vinte prapë në këtë ditë, ku ke një shtet të privatizuar tërësisht.

Ylli Rakipi: Ke njerëz në PD ti?

Lulzim Basha: Padiskutim që po.

Ylli Rakipi: Jo popull, se mund të thuash kam gjithë popullin. Edhe Edi Rama thotë, Saliu… Ata që ishit në PD, kë ke?

Basha: Qeveria e Ramës e kalbëzuar, rasti Çyrbja vërtetoi që mandatin e 2021 e ka marrë në bashkëpunim me bandat

Kreu i demokratëve Euroatlantikë, Lulzim Basha ka deklaruar se qeveria e Edi Ramës është e kalbëzuar dhe ka marrë mandatin e vitit 2021 në bashkëpunim me bandat kriminale. Gjatë një interviste në emisionin “Të Paekspozuarit” në MCN TV, Basha theksoi se rastet si Çyrbja dhe përgjimet që lidhin Ramën me bandat e Durrësit dhe Elbasanit e vërtetojnë këtë bashkëpunim.

Ai gjithashtu tha se opozita po kalon një moment të vështirë, për shkak të problemeve të shkaktuara nga Sali Berisha dhe ndikimeve ndërkombëtare. Basha theksoi se, pavarësisht situatës aktuale, ai është i angazhuar për të ofruar një alternativë politike të re për shqiptarët.

Pjesë nga biseda:

Lulzim Basha: Që kur ka ndodhur gjyqi i 11 qeshorit, PD zyrtare e deri atij momenti është riformatuar në atë që e quajnë edhe mediat Demokratët Euroatlantikë, që është një strukturë me njerëz nga jugu në veri, në çdo qendër votimi dhe që aktualisht pasi ka shpallur programin në Konventën e 1 qershorit, aktualisht është në proces të finalizimit të kandidaturave për deputetë.
Siç mund ta imagjinosh, ky është një proces shumë intensiv edhe në rrethana normale, sigurisht nuk ndodhemi në rrethana normale. Kemi nga njëra anë një qeveri të kalbëzuar si kjo e Edi Ramës, të vërtetuar që mandatin e 2021 e ka marrë në bashkëpunim me bandat kriminale, sic tregojnë përgjimet e rastit Cyrbja, me bandat e Durrësit dhe Elbasanit. Apo sic tregoi VOA, ku një në katër votues pranoi se kishte votuar për qeverinë nën presion për vendin e punës. Nga ana tjetër kemi një opozitë me një problem të madh brenda, të shkaktuar nga ish drejtuesi i PD, zoti Berisha, për shkak të interesave dhe problemeve që ka me SHBA dhe MB, ashtu edhe me drejtësinë shqiptare.
E gjithë kjo ka krijuar një situatë ku aktorët e vjetër të politikës duan që Shqipëria të mos ndryshojë. Këtë e bëjnë në një pakt të ndërsjelltë me njëri tjetrin. Zoti Berisha është pajtuar thuajse edhe publikisht me faktin që në rrethanën ku ndodhet opozita për fajin e tij, nuk ka ai vetë asnjë mundësi të largojë Ramën, ndonëse për tre vite i gënjeu demokratët se ai ishte zgjidhje për të larguar Edi Ramën.
Është goditur rëndë shpresa e demokratëve dhe shqiptarëve, ndaj nuk është e lehtë të ndërtosh një program dhe ekip për të dalë para shqiptarëve.
Kurrë nuk e kam parë atë pjesë të misionit që më angazhoi në politikën aktive, të lidhur me një karrike apo me një funksion të vecantë. Veprat e mia, jo vetëm fjalët kanë folur qartë se kam vendosur misionin mbi karriken.
Në këtë kuadër kam një axhendë të ngjeshur nga mëngjesi deri në darkë, në takime në Tiranë dhe jashtë Tiranë, që para shqiptarëve të dalim me një alternativë.

1...546547548...8 382Faqja 547 nga 8 382

Kryesore

Continue to the category
Më shumë
© 2024 Rilindja Demokratike Euroatlantike