Avokatët e zotit Berisha, kryetar i PD-së,  nuk janë pajtuar me vendimin e 17 Qershorit 2024 të SIAC “Komisionit të Posaçëm të Apelimit të Çështje të Emigracioni”, komision i cili rrëzoi apelin e zotit Berisha.

SIAC e gjeti të drejtë vendimin e ish sekretares së shtetit Priti Patel marrë më 19 Korrik 2022, ku Sali Berishës i ndalohej hyrja në Britaninë e Madhe me argumentin se ai kishte lidhje  të dyshuara me krimin e organizuar dhe korrupsion.

Dokumentet e Gjykatës së Apelit në Londër tregojnë se më 15 Gusht 2024 avokatët e zotit Berisha iu drejtuan kësaj gjykate për të marrë leje në apelimin e vendimit të SIAC.

Gazetari Top Channel Muhamed Veliu, ekskluzivisht disponon vendimin e marrë në 23 Tetor 2024 nga gjykatësja britanike e apelit Lady Justice Elisabeth Laing,  e cila refuzoi  kërkesën e zotit Berisha për të apeluar vendimin e SIAC.

E si pasojë ai vendim jo në favor të zotit Berisha mbetet në fuqi duke i ndaluar hyrjen në Britaninë e Madhe.

Avokatët e zotit Berisha kërkuan leje për të apeluar duke ngritur tre pretendime për shkelje të ligjit nga SIAC “Komisionit të Posaçëm të Apelimit të Çështje të Emigracioni”.

1-SIAC gaboi në ushtrimin e diskrecionit të tij’ kur hodhi poshtë një kërkesë për zbulimin e çdo materiali që Sekretari i Shtetit kishte në datën e vendimit fillestar, kur tregoi se persona të tjerë përveç Apeluesit  kishin lidhje me krimin e organizuar dhe korrupsionit.

2-SIAC gaboi edhe në ushtrimin e diskrecionit të tij duke u shprehur se një letër e shkruar për avokatët e Apelantit, nga GLD e datës 8 mars 2024 nuk ishte vendim i ri i cili mund të kundërshtohej pasi nuk ishte marrë personalisht nga Sekretari i Shtetit.

3-SIAC kreu shkelje të  detyrës për të siguruar që anëtarët e tij të ishin të pavarur. Një prej anëtarëve të tij kishin “punuar ngushtë me Ministrinë e Brendshme për luftën kundër narkotikëve çështjet në hapësirën e politikës evropiane.

Gjykatësja britanike e apelit Lady Justice Elisabeth Laing, thotë se pikën 1 dhe 2 të kërkesës për apelim, nuk gjen asnjë shkelje ligjore nga SIAC.

Ajo jep një shpjegim të detajuar për pretendimin e tretë se SIAC shkeli pavarësinë e trupës gjykuese e për këtë fajëson avokatët e zotit Berisha.

“Për herë të parë pretendimet për njëanshmëri në apel erdhën si të gjetura nga një kërkim në internet për karrierën e zotit Golland. Nuk tregohet kur është bërë ky kërkim. Një këshillues i përgjegjshëm duhet ta kishte bërë përpara datës  19 Mars 2024.

Kjo duhej ti ishte thënë SIAC e më pas SIAC të komentonte. Apeluesi nuk jep shpjegime se përse nuk iu dha mundësia SIAC të komentonte. Kjo më shkakton shqetësim pasi këshilluesit e apelantit në mënyrë të qëllimtë, nuk e ngritën këtë shqetësim në SIAC por e ruajtën për ta përdorur, në këtë aplikim në këtë gjykatë. Në tilla kushte unë nuk mund ti japë peshë pretendimit për anësi” shprehet në vendim gjykatësja britanike.

Në pikën 40 të vendimit gjykatësja Justice Elisabeth Laing mbërrin në përfundimin se “nuk ka arsye bindëse për të shqyrtuar apelin e propozuar”.

Ky vendim vulos njëherë e mirë betejën e humbur  juridike të zotit Berisha përballë vendimit të ndalimit të hyrjes në Britaninë e Madhe.

Sipas të dhënave të SPAK në dosjen Berisha për apelin e humbur në SIAC e bija Argita Berisha pagoi përmes transfertave bankare, kompaninë avokatore në Londër Zaiwalla & Co, një shumë prej rreth 400.000 euro.

Nga Vladimir Karaj

Pasi refuzoi të zbatonte një vendim të Gjykatës Kushtetuese mbi mandatin e deputetes socialiste, Olta Xhaçka, kryetarja e Kuvendit iu drejtua në shtator të këtij viti me një set pyetjesh Komisionit të Venecias me pretendimin se çështja kishte nevojë për një interpretim.

Në përgjigjen e publikuar të martën, Komisioni i Venecias rithekson normën e gjithëditur se vendimet e Gjykatës Kushtetuese duhet të zbatohen.

“Kur një vendim i Gjykatës Kushtetuese interpreton Kushtetutën si kufizuese për kompetencat vendimmarrëse të Parlamentit, ky i fundit duhet të miratojë vendimin në përputhje me gjykimin e Gjykatës dhe të votojë mbi çështjen e kufizuar, ashtu siç është përcaktuar nga Gjykata Kushtetuese”, thuhet në konkluzionet e Komisionit të Venecias.

Komisioni arsyeton se zbatimi i vendimeve të Gjykatës Kushtetuese bazohet në parimin e “besnikërisë ndaj Kushtetutës si një element i shtetit të së drejtës”. Ekspertët interpretojnë se kjo nuk duhet lexuar si detyrim i deputetëve për të votuar në një mënyrë të caktuar, por si “një kërkesë thelbësore e shtetit të së drejtës”.

Po ashtu, opinioni thotë se ndërsa deputetët nuk mund të detyrohen të votojnë në një mënyrë të caktuar, ata mund të votojnë vetëm për çështje që janë brenda kompetencës së Parlamentit. Komisioni i Venecias thekson se përsa kohë ka një vendim të Gjykatës Kushtetuese, ai vetëm mund të zbatohet.

“Për shkak se vendimet e Gjykatës Kushtetuese, njihen nga kushtetuta si detyruese, të gjitha autoritetet janë të detyruara të respektojnë këto vendime dhe t’i zbatojnë ato në mënyrë efektive”, thuhet në opinion.

Duke iu referuar refuzimit të shumicës për të zbatuar vendimin e Gjykatës Kushtetuese bazuar mbi pretendimin e lirisë së votës së deputetit, Komisioni e bën të qartë në opinion se kjo nuk qëndron.

“Sidoqoftë, Komisionit dëshiron të theksojë se në këtë rast konkret Gjykata Kushtetuese e Shqipërisë ka marrë tashmë një vendim, sipas të cilit Kuvendi është i detyruar të dërgojë mocionin mbi papajtueshmërinë e mandatit të deputetit specifik në Gjykatën Kushtetuese”, thuhet në arsyetim.

Komisioni i Venecias më tej ka refuzuar të dalë me përfundime mbi çështjen konkrete, duke vënë në dukje se qëndrimet mbi papajtueshmërinë nuk kanë standard të përcaktuar ndërkombëtar dhe se për këto vendoset rast pas rasti apo bazuar në legjislacionin e vendit. “Sa i përket procedurës për vendimmarrjen mbi papajtueshmërinë, nuk ka standarde të qarta”, thuhet në opinion.

Xhaçka akuzohet se gjatë kohës kur mbante detyrën e Ministres së Jashtme, Komiteti i Vendimeve Strategjike i drejtuar nga kryeministri Edi Rama miratoi statusin e “investitorit strategjik” për bashkëshortin e saj, Artan Gaçi, i cili po ndërton një hotel në Dhërmi. Më pas, përmes një vendimi qeverie, hotelit iu dha e drejta e përdorimit afatgjatë të brigjeve të detit.

Xhaçka këmbëngul se nuk është në konflikt interesi, nuk ka përfituar asnjë centimetër tokë shtetërore dhe asnjë lloj përfitimi tjetër publik.

Përplasja mes Kuvendit dhe Gjykatës Kushtetuese vijon prej gati dy vjetësh, pasi shumica parlamentare ka zvarritur vazhdimisht vendimmarrjen për këtë çështje, duke refuzuar të dërgojë në Gjykatë për shqyrtim mocionin për shqyrtimin e kushtetutshmërisë së mandatit të Xhaçkës të kërkuar nga opozita.

Në korrik të këtij viti, Gjykata Kushtetuese doli me vendim në të cilin e akuzoi shumicën parlamentare se kishte shkelur kushtetutën dhe cënuar themelet e shtetit.

“Ky refuzim i Kuvendit për zbatimin e vendimit të Gjykatës ka çuar në krijimin e një krize kushtetuese që jo vetëm cenon themelet e shtetit demokratik dhe humb besimin e publikut te shteti dhe organet e tij, por vë në diskutim edhe vetë rolin dhe funksionin e Gjykatës”, shkruhet në vendimin e arsyetuar të Gjykatës, e cila kërkoi që Kuvendi t’ia referonte çështjen siç ishte kërkuar në vendimin e saj./BIRN

Në “Opinion” në News24, është diskutuar lidhur me opinionin e dhënë nga Komisioni i Venecias lidhur me mandatin e Olta Xhaçkës.

Gazetarja Klodiana Lala tha se tashmë Kuvendi duhet të mblidhet dhe të marrë një vendim, ndërsa theksoi se Venecia fitoi kohë duke e çuar çëshjen në Komision.

Klodiana Lala: Kuvendi duhet të mblidhet jo më larg se nesër dhe të marrë vendim. Duhet të shkojë me vendim. Mazhoranca duke e dërguar në Venecia fitoi kohë, mandati i saj përfundon deri kur GJK ta marrë në shqyrtim sepse zgjedhjet janë afër. Socialistët po mbrojnë një aferë 100 mln euro, investim strategjik i marrë në kundërshtim me ligjin. Një kryetar bashkie në detyrë është pas hekurave. Artan Gaçi dhe Olta Xhaçka janë pyetur nga SPAK. GJK nuk e detyron Kuvendin të votojë në mënyrë të caktuar, por thotë merrni vendim.

Nga Citizens Channel

Ish-Blloku, dikur zona më popullore për lokalet dhe jetën e natës, po transformohet në një hapësirë të dominuar nga kullat. Një prej tyre është “The One”, një 10-katësh i projektuar “jo për të gjithë” me çmimin që kapërcen €4,500 për metër katror. Ky transformim urban po ridimensionon të ardhmen e zonës, duke ngjallur diskutim jo vetëm mbi burimin e parave, por edhe zhdukjen e kujtesës historike dhe ndikimet sociale.

“The One” po ndërtohet në kryqëzimin e rrugëve “Vaso Pasha” dhe “Brigada VIII”, zona më e lakmuar e ish-Bllokut. Me leje të siguruar nga qeveria në mars 2022, ndërtesa po zhvillohet nga kompanitë “Texas Development” dhe “Daton” të zotëruar nga vëllezërit Alban, Andi dhe Olsi Efthimi (Eftimi), si dhe Arjan (Orion) Cenalla.

Vëllezërit Eftimi zotërojnë gjithashtu studion “Atelier 4”, e cila ka projektuar “The One” dhe të paktën tre kulla të tjera në ish-Bllok: 9-katëshi te “Rruga Moskat” dhe dy 11-katëshit te “Rruga Nikolla Tupe” dhe “Sami Frashëri”.

E konceptuar për “banim dhe shërbime”, ndërtesa përmban elemente arkitektonike moderne që ndjekin një filozofi të “dualitetit gjeometrik”, duke reflektuar stilin e aplikuar më parë në ndërtesën seli qendrore të Bankës Credins në kryqëzimin tjetër, ndërtesë e projektuar gjithashtu – si studio lokale – nga “Atelier 4” (2007-2016).

Në dekadën e fundit, të paktën dhjetë kulla kanë ndryshuar rrënjësisht karakteristikat e zonës së ish-Bllokut, duke zëvendësuar vilat, që me ndryshimin e regjimit u kthyen në lokale të njohura. Projekti “The One” po zë vendin e një ndërtese trekatëshe ku më parë gjendeshin lokalet “Raum” dhe “Tribeca” vende mjaft të frekuentuara të jetës së natës në Tiranë.

Projekti po ndjek kështu modelin e rëndomtë të zhvillimit që favorizon ndërtimin ekskluziv dhe vertikal. Nga një zonë rezidenciale me funksion kryesor banimin apo rekreacionin, ish-Blloku po kthehet në qendër urbane luksoze me përqendrim të lartë zyrash dhe shërbimesh duke ngritur shqetësim për trafikun dhe mungesën e hapësirave publike.

Në këtë transformim, “The One” qëndron si shembull i përqendrimit të projekteve luksoze, ku shtrenjtësia dhe pamundësia për të aksesuar këto hapësira nga pjesa më e madhe e qytetarëve do të thellojë më tej ndarjet sociale.

Zanafilla nga një studio projektimi

“Atelier 4” është një nga studiot më të njohura në projektimin e ndërtesave publike dhe private në Shqipëri.

Studioja u hap zyrtarisht në vitin 2003 nga familja Eftimi, e njohur për kontributet akademike në hidro-gjeologji, urbanistikë dhe arkitekturë të çiftit Romeo dhe Tamara Gjoka-Eftimi, kjo e fundit ish-rektore e Universitetit Politeknik të Tiranës (UPT, 1997-2003).

Që në nisje, partner i tyre ishte Altin Premti, një ish-student i UPT-së, mik me djemtë e familjes. Më i madhi, Albani, i specializuar në Francë dhe Itali, iu bashkua grupit pas një përvoje në krye të departamentit të Urbanistikës gjatë mandatit të parë të Edi Ramës në drejtimin e Bashkisë Tiranë (2000-2011).

Kontakti me atë që më pas u bë politikani më i pushtetshëm në 25 vitet e fundit dhe ekspertiza e fortë që garantonin akademikët Romeo dhe Tamara Eftimi i dha rrugë suksesit të studios “Atelier 4” që falë edhe bashkëpunimeve me studio të huaja, ofroi studime dhe projektime të shumta.

Pas 20 vitesh në treg emri “Atelier 4” lidhet me dhjetëra projekte publike dhe private si rezidenca, vila, resorte, por edhe kopshte, shkolla, spitale, apo projekte madhore si aeroporte dhe stadiume.

Në portofolin e saj radhiten projektet restauruese si: TID Vlora, Hotel Dajti, Muzeu Etnografik i Krujës dhe Mozaiku i Muzeut Kombëtar.

“Atelier 4” rezulton projektuese e spitaleve të Pediatrisë, Urgjencës dhe Kardiologjisë në QSUT, gjithashtu spitalit të Laçit, Fierit dhe Krujës. Ngjashëm si studio lokale e projekteve të stadiumit Loro Boriçi, apo Elbasan Arena apo dhe Aeroportit të Kukësit.

Por ndër projektet më të përfolura janë Pazari i Ri, ArTurbina, Teatri i Operas dhe Baletit dhe Selia Qendrore e Bankës Credins.

Paralelisht “Atelier 4” ka gëzuar bashkëpunime me studio ndërkombëtare si Bolles+Wilson te kulla pas 15-katëshit në qendër, 51N4E te Hotel Plaza gjithashtu në qendër, Coop Himmelb(I)au në dy kullat 21-22 katëshe që pritet të ndërtohen në Vlorë dhe së fundmi me NOA Architects në konceptin e një kulle paraqitur si “fshati vertikal” parashikuar për t’u ngritur në Komunën e Parisit.

Nga projektues në investitorë ndërtimi

Vëllezërit Eftimi po kthehen në “lojtarë të fortë” të sektorit të ndërtimit duke e kthyer në cikël të mbyllur sipërmarrjen e tyre të arkitekturës pasi prej vitit 2019 ata janë edhe investitorë ndërtimi. Kryesori në sipërmarrje duket të jetë Albani.

Në janar 2019 Alban Eftimi themeloi “Texas Development” dhe një vit më vonë e ndau sipërmarrjen me vëllezërit Olsi dhe Andi. Paralelisht riorganizoi portofolin e biznesit duke kaluar kuotat e tij në “Atelier 4” (60%) dhe “Texas Development” (80%) nën ombrellën e “Zurich Investment Group” themeluar në vitin 2021.

Bashkë me Altin Premtin – ortak në “Atelier 4”, – grupi rezulton në marrëdhënie biznesi me Armand Metanin dhe Orion Cenallën në “Futuris Gen”, “Oreo & Tony” dhe “Daton”.

Përveç studios “Atelier 4” të gjitha kompanitë e vëllezërve Eftimi rezultojnë me humbje. Megjithatë, kjo nuk i ka penguar të vijojnë biznesin si ndërtues, pasi sektori operon kryesisht me parablerje – e ashtuquajtura shitje në ajër, – nën-kontraktim dhe kliring punimesh.

Në të vetmin bilanc të deklaruar (viti 2022), “Texas Development” deklaron rreth €170 mijë humbje dhe rreth €8.3 milionë kapital nga huamarrje apo parapagime porosish.

Projekti “The One” në ish-Bllok është projekti i gjashtë që “Texas Development” dhe partnerët e tij po zhvillojnë aktualisht, ndërsa mbeten në pritje të lejeve për të zhvilluar edhe tre projekte të tjera.

Projektet në zhvillim nga “Texas Development” dhe partnerët:

• Rosé Residence – pallat 9-katësh “Rruga Emin Duraku”
• South Residence – pallat 9-katësh “Rruga Gjik Kuqali”
• Galeria Roma – pallat 9-katësh “Rruga Kavajës”
• Lake Diamond Villas & Residences – bllok rezidencial vilash, “Rruga Mustafa Xhabrahimi” (Liqeni i Thatë)
• The One – pallat 10-katësh “Rruga Vaso Pasha”
• Unico Residence – pallat 11-katësh “Rruga Nikolla Tupe”

Projektet në pritje nga “Texas Development”:

• Puzzle Tower – kullë 19-katëshe “Rruga Medar Shtylla”
• Lake Diamond Tower – kullë 28 katëshe “Rruga Kristo Luarasi”
• Aquazzura Tower – ende pa detaje, reklamuar si “kulla e parë në jug të Shqipërisë” (Vlorë)

Shenim: Titulli eshte i redaksise. Titulli origjinal: Nga “Raum” në “The One”, kullat që po transformojnë ish-Bllokun

‘Kampion i luftës anti-korrupsion’ ishte titulli që iu akordua kreut të SPAK-ut, Altin Dumani, nga Departamenti amerikan i Shtetit, ndërsa medalja iu dha prokurorit nga Sekretari amerikan Anthony Blinken.

Gazetarja Klodiana Lala në “Opinion” në News24 tha se SHBA i dhanë Dumanit një vlerësim për ta inkurajuar në luftën kundër korrupsionit dhe krimit të organizuar.

Lala tha se nga momenti kur Altin Dumani mori drejtimin e SPAK ka një tjetër qasje të hetimeve dhe mënyrës se si trajtohen çështjet nga Prokuroria Speciale.

“Sot kemi ish-zv.Kryeministrin Arben Ahmetajn në arrati, ish-ministrin Lefter Koka në burg, ish-Kryeministri Sali Berisha i pandehur, ish-deputeti i PS-së, Alqi Bllako në burg, ish-ministri Ilir Beqaj është prapa hekurave, ish-Presidenti Ilir Meta është në burg. Kemi goditjen e grupeve kriminale, kemi goditjen e organizatave kriminale.

Kemi bosët e Niklës të goditur, grupeve të Durrësit e Shijakut, organizatave të Elbasanit. SPAK ka shumë punë për të bërë, ka tendera miliona euro, ka konçensionet në shëndetësi që duhen hetuar me prioritet, po hetohet edhe Kryetari i Bashkisë së Tiranës, të hetohen edhe krimet zgjedhore.

Dumani ka dhënë disa sinjale që konsiderohen domethënëse. Unë mendoj se Dumani ka çelur disa çështje, ai përfundon mandatin si Kryetar pas 1 viti dhe më pas pa edhe disa vjet mandat si prokuror i SPAK. Në këto kushte mendon se ky çmim është inkurajues”, tha Lala.