Reshjet e dendura të shiut mbrëmjen e kaluar kanë sjelle reshje dëbore dhe temperatura të ulëta në Bulqizë.

Reshjet e dëborës kanë filluar në lartësinë 700 metra mbi nivelin e detit, teksa raportohet se ka patur reshje edhe në afërsi të minierave të Zonës D, si dhe tek minierat e Tërnovës dhe ato të Martaneshit.

Momentalisht nuk raportohet për problematika në qarkullim. Rrugët e minierave ku bëhet transporti i minierave gjithashtu janë të kalueshme pa probleme.

Një 79-vjeçar ka ndërruar jetë si pasojë e një aksidenti të ndodhur në aksin Lushnjë-Rrogozhinë.

I moshuari është përplasur nga një automjet dhe nuk i ka mbijetuar dot plagëve. duke ndërruar jetë në vendngjarje.

Njoftimi i policisë:

Fier/ Informacion paraprak

Rreth orës 08:20, në aksin rrugor “Lushnjë-Rrogozhinë”, shtetasi H. F., 27 vjeç, duke drejtuar automjetin, ka përplasur këmbësorin, shtetasin A. F., 79 vjeç.

Si pasojë e përplasjes shtetasi A. F., ka ndërruar jetë në vendngjarje.

Drejtuesi i automjetit, shtetasi H. F., u shoqërua në Komisariat për veprime të mëtejshme.

Grrupi hetimor ndodhet në vendngjarje dhe po punon për sqarimin e plotë të rrethanave të aksidentit.

Nga Ervis Iljazaj

Sot në mediat shqiptare mbizotëronte lajmi se bashkëshortes së kryetarit të bashkisë Tiranë i është sekuestruar telefoni. Një emër tjetër “big” i politikës shqiptare që ka të bëjë me organin e ri të drejtësisë SPAK.

Për 33 vite me radhë raporti midis drejtësisë dhe politikës ka qenë vetëm në një drejtim. Ka folur politika dhe drejtësia ka heshtur. Nuk ka asnjë dyshim se gjatë tranzicionit politika ka bërë çmos që ka patur në dorë për ta dominuar drejtësinë dhe për ta kontrolluar atë, dhe ia ka dalë. Fakt është që pothuajse për 30 vite me radhë drejtësia ka hetuar pak ose aspak njerëz me pushtet. Rastet mund të numërohen me gishtat e njërës dorë.

Ndërsa sot, kemi një situatë totalisht të përmbysur. Sot është drejtësia ajo që po ndikon politikën. Po e ndikon me hetimet dhe arrestimet që po kryen. Lajmet e vetme politike që vijnë sot janë lajme që vijnë nga SPAK. Politika shqiptare nuk prodhon më asgjë. Në këtë kuptim ajo që po prodhon politikë është SPAK.

Rasti i fundit është ai i arrestimit të Ilir Metës i cili njëkohësisht shënon dhe fundin e tij politik. Pa hyrë në detaje se si u arrestua dhe përmbajtjes së dosjes, ajo që vlen për t’u përmendur është se si rinovimi i klasës politike shqiptare po vjen nëpërmjet drejtësisë. Shpesh herë ne mundohemi që nëpërmjet një rasti të caktuar të shpjegojmë fenomenin SPAK, ndërsa e kundërta duhet bërë. Nëpërmjet fenomenit SPAK duhet të shpjegojmë rastet e caktuara.

SPAK është Prokuroria Speciale. Nga vetë emri kuptohet që ka një mision special, i cili është hetimi i klasës politike 34 vjeçare. Të gjithë e dinë këtë, dhe ata që e votuan vetë me unanimitet Reformën në Drejtësi. Kudo që është ngritur një prokurori e tillë, është bërë me qëllimin për të hetuar klasën e vjetër politike dhe për ta rinovuar atë. Pasi klasa politike për një kohë të gjatë dështon të ripërtëritet me mjete politike apo me vullnet politik, sigurisht që do të ndërtohen mjete të tjera për ta bërë atë. Dhe në Shqipëri po ndodh ajo çfarë ka ndodhur në shumë vende të rajonit dhe përtej tij.

Se kur do vijë radha e njërit apo tjetrit politikan kjo pak rëndësi ka. E rëndësishme është të shkojmë te thelbi. Dhe thelbi i kësaj gjykate speciale, prandaj quhet e tillë, është pikërisht thyerja e paprekshmërisë së njerëzve me pushtet. Sot çdo njeri me pushtet politik në Shqipëri mund të hetohet dhe kjo nuk përbën aspak habi.

Parakalimi i pushtetarëve përpara SPAK tashmë është bërë normalitet. Një gjë e cila vetëm disa vite më parë dukej një utopi.

A është kjo një drejtësi e kulluar? Sigurisht ky është një diskutim i rëndësishëm, por zakonisht rastet nuk e shpjegojnë fenomenin, fenomeni shpjegon rastin. Mbipushteti 33 vjeçar i politikës solli mbipushtetin e drejtësisë sepse ekstremet sjellin ekstreme. Ne kemi patur një klasë politike ekstremisht të pushtetshme e cila solli dhe pushtetin dhe mbipushtetin ndoshta të drejtësisë.

Në të gjitha vëndet e botës, sa herë që klasa politike nuk rinovohet me mjete klasike, ajo rinovohet me mjete të tjera, një ndër to është drejtësia. Normale do të ishte që klasa politike shqiptare të rinovohej nëpërmjet zgjedhjeve apo procesve politike, ashtu sikurse ka ndodhur të gjitha vëndet e ish-lindjes komuniste. Për sa kohë kjo nuk ndodh, ajo vjen me mënyra të tjera. Insistimi i politikës shqiptare për të qëndruar në pushtet përjetësisht është padyshim një nga arsyet se po i çon ata përpara drejtësisë.

Drejtësia e sotme sigurisht nuk mund të jetë e kulluar, por askush në politikën shqiptare, nga kryeministri e deri te punonjësit e thjeshtë të administratës, nuk është i lumtur./Liberale.al

Nga Myzafer Elezi

Sot kujtojmë një nga momentet më të rëndësishme në historinë e Shqipërisë së re. Më 8 dhjetor 1990, studentët shqiptarë ngritën zërin kundër sistemit komunist, duke kërkuar lirinë dhe pluralizmin politik. Me thirrjen e fuqishme “E duam Shqipërinë si gjithë Europa”, ata ndezën shkëndijën e parë për rrëzimin e diktaturës dhe hapën rrugën drejt demokracisë.

Ata të rinj idealistë, që me guximin dhe sakrificat e tyre shembën diktaturën dhe hapën rrugën për demokracinë, kanë merituar jo vetëm nderimin simbolik të çdo 8 dhjetori, por një rol të denjë në politikëbërje dhe në vendimmarrjen e lartë shtetërore.

Për fat të keq, pasioni dhe përkushtimi i tyre janë përdorur shpesh si dekor, për t’u përkujtuar një herë në vit, dhe më pas, janë lënë në harresë. Kjo sjellje përfaqëson një padrejtësi historike, që kërkon reflektim dhe veprim.

Është koha që klasa politike të ndalojë të përdorë kontributin e tyre si kartë simbolike dhe të angazhohet për të rikthyer rolin e merituar të këtyre individëve dhe të brezit që përfaqësuan. Demokracia e sotme, sado e brishtë, mbetet amanet i atyre që guxuan të ëndërrojnë dhe të luftojnë për të.

Reflektimi nuk është vetëm simbolikë; ai duhet të jetë fillimi i një angazhimi të ri për të përfshirë këto zëra të heshtur, për t’i dhënë vendin që u takon në historinë e gjallë të vendit dhe për t’i kthyer dinjitetin një brezi që meriton më shumë.

Pas 34 vitesh, Shqipëria vijon të përballet me sfida që shpesh e largojnë nga ato aspirata të dhjetorit të ftohtë. Ëndrra e një Shqipërie të lirë, të drejtë dhe europiane ende kërkon guxim, përkushtim dhe mbi të gjitha, angazhimin e të rinjve për ta bërë realitet.

Shpreh mirënjohje të thellë për ata studentë që guxuan të sfidonin diktaturën, duke rrezikuar gjithçka për liri. Ata janë simbol i guximit dhe vizionit që çdo brez duhet ta trashëgojë dhe kultivojë.

Inkurajoj sot çdo të ri dhe student shqiptar të mos e braktisë përgjegjësinë për të ndërtuar të ardhmen e vendit. Është koha që rinia të angazhohet më shumë në politikë dhe vendimmarrje, për të marrë në dorë fatet e Shqipërisë dhe për t’i dhënë vendit një drejtim të ri, të bazuar te meritokracia, drejtësia dhe zhvillimi.

Urime për këtë ditë të veçantë të gjithë miqve të mi!

Gëzuar Ditën e Rinisë!