Ushtira izraelite pranoi të mërkurën përgjegjësinë për një sulm ajror të vitit 2007, që shkatërroi një objekt në Siri, i cili mendohet se ishte reaktor bërthamor. Izraeli publikoi video të sulmit në objektin që ndodhet në rajonin Deir al-Zour, për të cilin Tel Avivi tha se do të ishte së shpejti aktiv. Siria ka mohuar se po ndërtonte një reaktor bërthamor në atë zonë.
Shefi i Shtabit të Forcave Mbrojtëse të Izraelit tha se sulmi ajror shërben si paralajmërim se Izraeli nuk ka për të lënë që disa aktivitete të ndikojnë tek siguria e vendit. Izraeli ka kryer një numër sulmesh ajrore në Siri, që mendohet gjerësisht se synojnë të mos lejojnë kalimin e furnizimeve tek grupi Hezbollah në Liban.

Me 80 vota pro, 11 kundër dhe asnjë abstenim, Kuvendi i Kosovës ka ratifikuar Marrëveshjen e Demarkacionit të kufirit me Malin e Zi. Seanca e jashtëzakonshme e Kuvendit të Kosovës për ratifikimin e demarkacionit u zhvillua nën tensione e masa të shtuara të sigurisë. Lëvizja Vetëvendosje tentoi që ta pengojë ratifikimin e demarkacionit përmes hedhjes së gazit lotsjellës. Hedhja e gazit lotsjellës dhe ndërprerja e seancës në katër rastet kur është provuar të votohet për ratifikimin e demarkacionit, ka sjellë si rezultat largimin e deputetëve të Lëvizjes Vetëvendosje nga salla e Kuvendit nga Policia e Kosovës. Gjatë procedimit të votimit, nga Vetëvendosje mbeti vetëm shefi i Grupit parlamentar, Glauk Konjufca. Shtatë deputetë u shoqëruan në polici, kurse të tjerë u përjashtuan apo nuk u paraqitën fare në sallë gjatë aktit të votimit. Pas ratifikimit të Marrëveshjes së Demarkacionit, Kryeministri Ramush Haradinaj tha se tani Kosova pret që Bashkimi Evropian të bëjë pjesën e vet, “që më në fund qytetarëve të Kosovës t’u mundësohet lëvizja e lirë në BE, si të gjithë evropianëve tjerë”.
Vendimin e Kuvendit, e ka përshëndetur edhe kreu i këtij institucioni, Kadri Veseli.

“Urime dita e parë e pranverës. Sot merr fund dimri i gjatë politik dhe nga sot fillon pranvera e re për të gjithë”, u shpreh figurativisht kryetari i Kuvendit, Kadri Veseli. Ai ka falënderuar ambasadorin amerikan, Greg Delawie dhe shefen e Zyrës së BE-së, Nataliya Apostolova, si dhe LDK-në për mbështetjen që i dhanë ratifikimit të marrëveshjes. Veseli u shpreh i bindur se pas ratifikimit të demarkacionit, Kosova e përmbushi kriterin kryesor të Bashkimit Evropian për liberalizimin e vizave. “Jam i sigurt që brenda vitit do të kemi lëvizjen e lirë të qytetarëve të Kosovës”, theksoi Veseli. Zhvillimet në Kuvend, i ka përcjellur nga afër edhe ambasadori amerikan në Prishtinë, Greg Delawie. Ai tha se është i zhgënjyer me veprimet e Lëvizjes Vetëvendosje. Ndërkaq, pas ratifikimit të marrëveshjes ka uruar deputetët dhe Kuvendin e Kosovës. Me qëndrime të ashpra kundër vendimit të Kuvendit të Kosovës është paraqitur kryetari i Vetëvendosjes, Albin Kurti. “Sot 80 deputetë të Kuvendit të Kosovës iu bashkuan tradhtisë së presidentit Thaçi dhe shkeljes së integritetit dhe Kushtetutës së Kosovës”, tha Kurti. Ai e ka cilësuar si shumë të dëmshëm për Kosovën ratifikimin e demarkacionit, duke e arsyetuar kështu edhe veprimin e deputetëve të partisë së tij për hedhjen e gazit lotsjellës në Kuvend.

Ndërprerja e seancës me anë të gazit lotsjellës është dënuar nga pjesa tjetër e spektrit politik që përfaqësohet në Kuvend. Deputetja e Partisë Demokratike të Kosovës, Blerta Deliu-Kodra, ka thënë se aktet e tilla, si hedhja e gazit lotsjellës në sallën ku po zhvillohej seanca, janë të papranueshme dhe bien ndesh me parimin e demokracisë. “Duke e ditur rëndësinë e seancës së sotme dhe duke qenë e vetëdijshme se koalicioni qeverisës tashmë i ka siguruar votat e nevojshme për ta kaluar këtë marrëveshje jetike për qytetarët e Republikës së Kosovës, Lëvizja Vetëvendosje edhe një herë dëshmoi që është po ajo e njëjta, me akte, të cilat i përsëriti pas tre vjetësh debati në Kuvendin e Republikës së Kosovës”, ka thënë deputetja Deliu-Kodra. Shefi i Grupit parlamentar të Lidhjes Demokratike të Kosovës, Avdullah Hoti, ka thënë se votimi për ratifikimin e Marrëveshjes për Demarkacionin do të marrë fund sot dhe se nuk duhet dorëzuar para akteve të tilla, sikurse hedhja e gazit lotsjellës që shkaktoi ndërprerjen e seancës. “Është fatkeqësi për vendin. Mesazhe të tilla nuk duhet t’iu dërgojmë miqve tanë ndërkombëtarë. Nuk do të dorëzohemi para kërcënimeve të tilla, para formave të tilla të prishjes së rendit të punës në seancën e Kuvendit”, ka thënë Hoti. Ndërkaq, deputeti i partisë Nisma, Milaim Zeka tha se Vetëvendosje kishte hedhur gazin lotsjellës në momentin kur e kishte kuptuar se u siguruan 80 votat për ratifikimin e demarkacionit. Sipas tij, në sallë në atë moment ishte paraqitur edhe deputeti i komunitetit goran, Adem Hoxha, i cili është pjesë e Listës Serbe, por që kishte shprehur vullnetin ta votonte marrëveshjen. Në atë moment, sipas deputetit Zeka, Vetëvendosje kishte parandaluar procedurën e votimit përmes gazit lotsjellës.

“Personalisht mendoj që ky është turpi më i madh që po ndodh në Kuvendin e Kosovës. Ky është terrorizim i Parlamentit. Ku është gazi i botës dhe turpi i këtyre njerëzve. Do të thotë që përmes metodave më barbare, të sillesh në këtë mënyrë është turp”, tha Zeka.
Deputetja e lëvizjes Vetëvendosje, Albulena Haxhiu e ka arsyetuar hedhjen e gazit lotsjellës në seancë duke thënë se veprimi i Lëvizjes Vetëvendosje është për të mbrojtur territorin e Kosovës. “Ne kemi thënë që Lëvizja Vetëvendosje është konsistente në kundërshtim të demarkacionit”, ka theksuar deputetja Haxhiu. Votimi për demarkacionin pason debatin prej rreth nëntë orëve që u zhvillua të martën në seancën e jashtëzakonshme, e cila përfundoi në orët e hershme të mëngjesit të ditës së mërkurë. Marrëveshja e Demarkacionit të kufirit me Malin e Zi është nënshkruar në gusht të vitit 2015 në Vjenë. Pas ratifikimit të demarkacionit, Kosova pret që Komisioni Evropian, qysh në muajin qershor, të konfirmojnë gatishmërinë e BE-së për lëvizjen e lirë, pa viza.

Protestues nga Shkupi dhe zona të tjera të Maqedonisë shprehën të mërkurën pakënaqësinë e tyre para ndërtesës së qeverisë, pas vendimit të Prokurorisë shtetërore për rikualifikimin e akuzës në rastin e njohur “Almiri” në Kumanovë. Protestuesit kërkuan dorëheqjen e Kryeprokurorit të Përgjithshëm Lubomir Jovevski, të prokurorëve dhe gjykatësve të përfshirë në gjyqin që ka të bëjë me vrasjen e 4-vjeçarit Almir Aliu para më shumë se një viti. Po ashtu, kërkuan përgjegjësi nga qeveria për zvarritjen e reformave në gjyqësor. Rikualifikimi nga vrasje me paramendim në aksident trafiku me pasojë vdekjen, ka indinjuar shumë shqiptarë, ndërsa aktivistë të të drejtave të njeriut e organizuan përmes thirrjeve në rrjetet sociale protestën, të cilës iu përgjigjën qindra njerëz. “Pa përgjegjësi nuk ka drejtësi, pa drejtësi nuk ka qetësi!”, brohoritnin protestuesit, disa prej të cilëve mbanin lodra fëmijësh që i lanë në rrethojat e oborrit të qeverisë. Aktivistja Diana Tahiri paralajmëroi ngritjen e kallëzimeve penale ndaj prokurores së rastit, Suzana Kusigerska, ndaj gjykatëses dhe përfaqësuesve të tjerë gjyqësorë të përfsirë në këtë lëndë, “për mosparaqitjen e fakteve dhe dëshmive për çka dëshmoi i gjithë opinioni publik”, u shpreh ajo.

Nëna e Almirit, Myxheverja tha se kishte dalë në protestë jo vetëm për të birin e vrarë “por për të gjithë fëmijët që mund të rrezikohen nga ai kriminel, të cilin shteti ynë po e lë të lirë”.
Boban Iliç është personi i akuzuar për shtypjen me makinë të Almir Aliut. Rastit i kishte paraprirë një zënkë verbale midis të akuzuarit dhe babait të 4-vjeçarit. Në një prej videoregjistrimeve të publikuara në internet duket se si makina me shpejtësi të madhe në një rrugë të ngushtë godet bashkëshortët Aliu dhe fëmijën e tyre katër vjeç. Avokatët e familjes së viktimës thonë se dëshmitë tregojnë qartë për vrasjen me paramendim. I akuzuari u lirua para pak ditësh nga paraburgimi. Ai me të dalë nga burgu kërcënoi një gazetar, ndërsa vëllai i tij bëri gjeste ofenduese ndaj familjes së viktimës. Prokurori i Përgjithshëm, Jovevski ka hedhur poshtë akuzat ndaj Prokurorisë për prirje dhe anime mbi baza etnike në këtë rast.
Rasti ka marrë dhe dimensione politike. Ministri i Drejtësisë që vjen nga radhët e BDI-së, Bilen Saliji ka njoftuar dorëheqjen, për shkaqe morale, siç thotë, dhe “për shkak se besimi në gjyqësor po lëkundej”. Saliji thotë se nuk ka pasur trysni ndaj tij, ndërkohë që fajëson kryeprokurorin Jovevski për ndërhyrje në rikualifikimin e lëndës së Almirit. Por kritikët dhe kundërshtarët vlerësojnë se dorëheqja e ministrit është pjesë e riformatimit të paralajmëruar të kabinetit qeveritar të Zoran Zaevit.

Presidenti i Shteteve të Bashkuara, Donald Trump ka mbrojtur vendimin e tij për të uruar presidentin rus, Vladimir Putin për fitoren në zgjedhje, duke thënë se marrëdhëniet e mira me Rusinë janë të domosdoshme për të zgjidhur disa prej problemeve të botës. “Media e lajmeve të rreme është çmenduar sepse ata duan ta dëmtojnë atë. Ata e kanë gabim. Raportet e mira me Rusinë dhe të tjerët është gjë e mirë, jo gjë e keqe”, ka shkruar presidenti Trump në Twitter. “Ata mund të ndihmojnë në zgjidhjen e problemeve me Korenë e Veriut, Sirinë, Ukrainën, (Shtetin Islamik), Iranin dhe madje edhe garën e armëve”, ka shkruar Trump në një postim tjetër në Twitter. Trump është kritikuar pasi ia ka uruar Putinin gjatë një bisede telefonike më 20 mars, për rizgjedhjen e tij si president.

Një nga miqtë më të afërt të President Trump dhe këshilltar jo zyrtar për Sigurinë kibernetike, Rudi Giulani thotë se është surprizuar nga Presidenca e Trump. “Ai po rezulton një President më i mirë nga sa kisha menduar. Po hap vende të reja pune, po zhvillon ekonomikisht Amerikën. Nuk më interesojnë se çfarë thonë të tjerët, por ajo që ai po bën për Amerikën.” Giulani tha se e ka shumë mik Presientin Trump dhe e takon shpesh dhe bisedon me të.
Ai ka mbërritur në Shqipëri për të parën herë dhe sikurse ka pranuar, muxhahedinët apo njohur ndryshe si refugjatët iranianë, kanë qenë qëllimi i kësaj vizite.
RG: Si fillim dua të them që ai është një mik shumë i ngushtë. Për 30 vjet.
BF: Keni 30 vjet që e njihni?
RG: 30 vjet. Nga Nju Jorku. Dhe mund të them se tani kemi zhvilluar një miqësi shumë të ngushtë.
BF: Kur e keni takuar për herë të parë?
RG: E kam takuar kur, besoje ose jo, kur ai po riparonte parkun Ëollman Rink. Parkun për të bërë ski. Ai dhe kryebashkiaku Ed Kaç u grindën për emrin e parkut. Dhe ai vendosi të më mbështeste mua për kryebashkiak.
BF: Ai ishte një nga mbështetësit e tu?

RG: Ai ishte një nga mbështetësit e mi më të fortë, më besnikë dhe më të qëndrueshëm. Edhe pse në atë kohë ai i mbështeste si republikanët ashtu dhe demokratët. Por ne kishim një këndvështrim të ngjashëm. Ai më mbështeti kur unë garova për president. Sigurisht që dhe unë e mbështeta atë. Dhe ai pati sukses.
BF: Ti ishe mbështetësi i tij më i rëndësishëm brenda partisë republikane?
BF: Z. Giuliani, çfarë do ndryshojë në politikën e presidentit Trump kundrejt Iranit?
RG: Mendoj se kjo politikë do jetë një ri-shqyrtim shumë i detajuar i marrëveshjes. Një mundësi e mirë që ata të zbulojnë se Irani nuk po e zbaton siç duhet marrëveshjen gjë e cila do të thotë se Iranit do i vendosen përsëri sanksione. Kjo do të ishte shkatërrimtare për ta sepse edhe me sanksionet të cilat i hoqëm, me qindra milionat që u kemi dhënë atyre, ekonomia e tyre nuk është përmirësuar. Pra, ne u vendosim atyre sanksione.
BF: Shikoni ju një ndryshim në Iran gjatë këtyre viteve të shkuara në lidhje me ekonominë?
RG: Unë mendoj se presidenti Trump inkurajohet nga fakti që në Iran po ndodhin protesta. Mendoj edhe se ai ndjeu se sekretari Tillerson, sekretari i tij i shtetit, nuk po vepronte mjaftueshëm shpejt. Prandaj e zëvendësoi me kreun e CIA-s.
BF: Është i aftë populli i Iranit që ta ndryshojë regjimin pa ndihmë nga jashtë?