Ministri i Brendshëm, Fatmir Xhafaj i kërkoi Prokurorisë së Krimeve të Rënda të marrë në pyetje kryetarin e PD-së, Basha dhe ish-kryeministrin Berisha, për shkak të akuzave publike që ata kanë bërë për ngarkesën e kapur të kokainës në Maminas.
Në shkelje të hapur të çdo lloj ligji dhe standardi për pavarësinë e Prokurorisë dhe të drejtësisë nga ekzekutivi, Fatmir Xhafaj i ka shkruar sot një letër zyrtare Prokurorisë së Krimeve të Rënda vetëm për t’i përcjellë këtë kërkesë.
Kërkesa ka frymë urdhërore dhe është e mbushur me opinione apo mendime personale të ministrit Xhafaj, të cilat tejkalojnë përgjegjësitë e tij zyrtare, dhe ndërhyjnë në përgjegjësinë e Prokurorisë për drejtimin e hetimeve penale. Mbi të gjitha Xhafaj, në letër, ushtron trysni mbi Prokurorinë, duke e kërcënuar atë dhe duke thënë se zbatimi i kërkesës së Xhafajt është përgjegjësi ligjore e Prokurorisë.
Ndër të tjera, ministri Xhafaj shkruan:
Çmoj se ka interes të ligjshëm publik dhe posaçërisht për hetimin që është duke u kryer që, nga ana e institucionit që ju drejtoni, të thirren këta persona dhe të deklarojnë përpara Prokurorisë së Krimeve të Rënda, në zbatim të dispozitave të Kodit të Procedurës Penale, faktet për të cilat kanë dijeni dhe provat, që ata zotërojnë për klanet kriminale të trafikut të drogës, përfshi edhe rastin e fundit të sekuestrimit të 613 kilogram kokainë.

Nga këto deklarime publike bie veçanërisht në sy fakti se nga zoti Sali Berisha dhe zoti Lulzim Basha pretendohet qartë që ata kanë dijeni për fakte konkrete lidhur me klanet e trafikut të drogës në Shqipëri. Po sipas këtyre deklarimeve publike, rezulton se të dy këta persona kanë veçanërisht dijeni mbi poseduesit dhe përfituesit e sasisë prej 613 kilogram kokainë të sekuestruar së fundmi në Portin e Durrësit.
Kërkesa e Xhafajt, përveçse ndërhyrje, në pavarësinë e Prokurorisë, ka prapavijë të qartë politike. Nëse shqetësimi i tij do të ishte apolitik, ai duhet të kishte mbajtur të njëjtin qëndrim dhe të njëjtat standarde në çdo rast të ngjashëm të Bashës, Berishës dhe çdo kujt tjetër që ka artikuluar akuza publike.
Në këtë kuptim, Fatmir Xhafaj duhet të pyetet për qëndrimin e tij për shumë raste dhe persona që kanë bërë akuza publike. Si fillim ai mund të pyetet për sa më poshtë:
– Vetë Zoti Xhafaj a nuk duhet të thirret dhe dëshmojë në Prokurori pse bëri deklarata kontradiktore në lidhje me kapjen e drogës?Përse gënjeu ministri Xhafaj në deklaratën e tij të dytë publike, duke qenë se ka të dhëna që policia shqiptare pati informacionin dhe ndihmën e partnerëve të huaj në operacion?

– Pse Policia nuk e arrestoi dhe e lejoi të largohej nga Shqipëria pronarin e kompanisë që kishte porositur ngarkesën edhe pse kishte informacion paraprak për ngarkesën në emër të tij?
– A i ka kërkuar zoti Xhafaj informacion Ambasadorit amerikan Donald Lu në lidhje me 21 klanet dhe 4 familjet mafioze që ambasadori ka përmendur në publik se ekzistojnë në Shqipëri? Nëse po çfarë ka bërë për arrestimin e tyre?
– A i ka kërkuar zoti Xhafaj Prokurorisë të thërrasë Bashën dhe Berishën për të dhënë sqarime në lidhje me akuzat e tyre për Agron Xhafajn, për të cilin ata pretendojnë se kanë prova që është trafikant ndërkombëtar kokaine i dënuar në Itali?
– A i ka kërkuar zoti Xhafaj Prokurorisë të thërrasë Bashën dhe Berishën për akuzat e tyre ndaj Vangjush Dakos dhe Damian Gjiknurit, duke qenë se ata pretendojnë që kanë dijeni për regjistrime telefonike të tyre, ku bëjnë konspiracion me kriminelë për vjedhje votash?
– A i ka kërkuar zoti Xhafaj Prokurorisë të thërrasë Bashën për akuzat për lidhje të kompanisë ruse Gavnurin dhe Jurimeks me Edi Ramën dhe Damian Gjiknurin?
– A i ka kërkuar zoti Xhafaj Prokurorisë të thërrasë edhe Taulant Ballën për çështjen e financimit rus, pasi Balla bën përditë deklarime publike që ka informacion për financim rus të PD-së?

Ndryshojnë procedurat për privatizimin dhe shitjen e tokave shtetërore. Këshilli i Ministrave ka miratuar ndryshimin e kritereve të vlerësimit të pronës shtetërore, që privatizohet apo transformohet dhe procedurën e shitjes. Qeveria vendosi që kësaj procedure t’i nënshtrohen të gjitha ndërmarrjet apo objektet e veçuara, mjetet kryesore, mjetet e xhiros në administrim apo në ruajtje të institucioneve, ndërmarrjeve dhe shoqërive tregtare me kapital tërësisht shtetëror, për të cilat është dhënë miratimi i ministrit përgjegjës për ekonominë për fillimin e procedurave të privatizimit apo të transformimit në shoqëri tregtare.
Në ndryshimet e fundit ligjore të botuara dje në Fletoren Zyrtare mësohet, se kërkesa duhet të shqyrtohet brenda 30 ditë nga marrja e saj. “Institucionet qendrore dhe organet e njësive të vetëqeverisjes vendore dërgojnë kërkesat e tyre për privatizimin e ndërmarrjeve apo të institucioneve që kanë në varësi administrative ose në pronësi, në ministrinë përgjegjëse për ekonominë. Ministri përgjegjës për ekonominë nxjerr urdhrin e miratimit për privatizim, sipas kërkesave të përmendura më sipër. Në rast se ministria përgjegjëse për ekonominë u kërkon institucioneve qendrore apo organeve të njësive të vetëqeverisjes vendore kërkesën për prononcim privatizimi për pasuritë e ndërmarrjeve apo të institucioneve që kanë në varësi administrative, këto institucione janë të detyruara që brenda 30 (tridhjetë) ditëve nga data e marrjes së kërkesës, të dërgojnë mendimin e tyre për privatizimin e këtyre pasurive”, thuhet në VKM-në.

Procedura
Në vendim është përcaktuar që për dokumentacionin e përgatitur nga Komisioni i Vlerësimit ndiqet kjo procedurë: a) I dërgohet ministrit përgjegjës për ekonominë: i) për objektet ndërtimore, linjat e prodhimit/shërbimit, ku përcaktohen vlera e objektit, sipërfaqja e përgjithshme, ajo nën objekt dhe ajo funksionale; ii) për makineritë, pajisjet, mjetet e transportit, inventarin ekonomik, mjetet e xhiros etj., kur asetet do të shiten të veçanta. Fletorja Zyrtare Viti 2018 – Numri 37.

Vendimmarrja
Ministria e Financave dhe Ekonomisë, pasi kontrollon nëse ky dokumentacion ka kaluar në strukturat përkatëse, ia përcjell atë Komisionit të Shqyrtimit dhe Transparencës, të ngritur me urdhër të ministrit përgjegjës për ekonominë, për verifikimin, konfirmimin dhe transparencën e procedurës së dokumentacionit të privatizimit të pronës shtetërore, që dërgohet për shitje. Ndërkohë që Komisioni i Shqyrtimit dhe Transparencës, i ngritur me urdhër të ministrit përgjegjës për ekonominë ka në përbërje: zëvendësministrin e Financave dhe Ekonomisë, kryetar; një përfaqësues të Drejtorisë së Përgjithshme Rregullatore dhe të Përputhshmërisë, MFE, anëtar; dy përfaqësues të Drejtorisë së Përgjithshme Ekonomike dhe të Shërbimeve Mbështetëse, MFE, anëtar dhe një përfaqësues të Drejtorisë së Auditimit, MFE, anëtar.

Shqyrtimi
Komisioni i Shqyrtimit dhe Transparencës i rekomandon ministrit përgjegjës për ekonominë vijimin e procedurës së privatizimit nga struktura përgjegjëse për shitjen e pronës publike, nëse ekziston dokumentacioni i kërkuar ligjor dhe ka kaluar në të gjitha strukturat e parashikuara në këtë vendim. Në rast të kundërt, Komisioni i Shqyrtimit dhe Transparencës kërkon plotësimin e dokumentacionit. Për kontratat e shitjes të deklaruara të pavlefshme me vendim gjykate të formës së prerë, duke kthyer palët në gjendjen e mëparshme, procedurat e rivlerësimit të objektit bashkë me truallin do të bëhen sipas kreut II të këtij vendimi dhe legjislacionit në fuqi për privatizimin.

Punonjësit e Shërbimit të Provës ndodhen nën presion për të dhënë dorëheqjet. Denoncimi është bërë nga punonjës të këtij institucioni, që drejtohet nga Engjell Hysi, bashkëshorti i deputetes socialiste Vasilika Hysi. Shkresat përmes të cilave u kërkohet punonjësve të dorëhiqen ose në të kundërt do të shkarkohen nga detyra janë firmosur pikërisht nga Engjell Hysi. Mësohet se të paktën 100 punonjës në të gjitha zyrat e Shërbimit të Provës rrezikojnë vendin e punës, ndërsa u kërkohet dorëheqja, pasi nuk ka motivacion për t’i larguar nga funksionet që kanë.