“‘Nuk i ngrihet’, ishte thjesht një poezi e Ramës”, reagimi i Hysit: Do të ndalohen fjalët me dy kuptime në Kuvend
E mbledhur pasditen e sotme për shqyrtimin e kërkesës së LSI, Byroja e Kuvendit vendosi që të mos e përjashtojë kryeministrin Edi Rama për fjalorin joetik, sipas opozitës, të përdorur në senacën plenare të 29 marsit, saktësisht një javë më parë.
LSI i kërkoi kryetarit të Kuvendit Gramoz Ruçi, që Rama të përjashtohej nga Kuvendi 10 ditë por kjo kërkesë u rrëzua sot.
Menjëherë pas mbledhjes, deputetja Vasilika Hysi është shprehur se kryeministri Rama nuk tha asgjë joetik pasi në deklaratën e tij ai tha një poezi:
“Nuk është përdorur fjalor fyes dhe denigrues.
Byroja lexoi me vëmendje dhe konstatoi se kërkesa e opozitës nuk qëndronte. Ne u ndjemë të çuditur që u ngrit ky pretendim, pasi nga këqyrja, pas fjalës së Ramës e ka marrë fjalën Basha.
Dhe më pas e mori fjalën Vasili dhe s’u ngrit asnjë pretendim. Opozita nuk ishte sot në Kuvend dhe konsumoi një veprim të paligjshëm, tubimi pa asnjë leje.
Që nga sot të gjithë deputetëve, kryeministrir, nuk u lejohej kurrsesi që të shprehin asnjë fjalë që merret me dy kuptime. Ai vet thotë po ju lexoj një poezi.
Në gjuhën shqipe disa fjalë mund të marrin dy kuptime. Kolegët e opozitës nuk bënë asnjë kërkesë për 7 ditë ndaj kjo ishte një lëvizje tjetër e opozitës”, u shpreh Vasilika Hysi për mediat.
Vasilika rrëfen poezinë me ngritjen që i ka recituar Rama
Berisha: 30 vjet më parë, xhelati Kristaq Rama firmosi varjen e poetit Havzi Nela, sot i biri mban të burgosur politikë 11 kuksianë
Ish-Kryeminsitri Berisha shkruan në një postim në Facebook se, 30 vjet më parë, xhelati Kristaq Rama do firmoste varjen në sheshin e qytetit për motive politike të poetit të shquar Havzi Nela, sot i biri Edvini, në një akt urrejtje dhe hakmarrje atërore mban të burgosur politikë 11 qytetarë kuksianë. “Te rinjte e Kukesit ne proteste kunder Edi Rames per lirimin e te burgosurve politik!
30 vjet me pare, xhelati Kristaq Rama do firmoste varjen ne sheshin e qytetit per motive politike te poetit te shquar Havzi Nela. Sot i biri Edvini, ne nje akt urrejtje dhe hakmarrje aterore mban te burgosur politik 11 qytetare guximtare te Kukesit! Fati i eterve mizore e pret!”, shkruan Berisha.
Revolta e protestuesit: Jam pa bukë, më hoqën nga puna pse takova Bashën
Mijëra qytetarë kanë dalë sot në protestë kundër qeverisë dhe rritjes së taksave. Disa nga akset kryesore të vendit u bllokuan nga qytetarët dhe përfaqësues të opozitës. Një prej tyre në Çermë thotë se është pa bukë, pasi e kanë hequr nga puna në OSHEE pas 20 vitesh se kishte takuar Lulzim Bashën.
Protestuesi Skënder Bega, tregon se kishte ardhur nga Tepelena për të protestuar kundër qeverisë pasi edhe ndihmën ekonomike ia kishin hequr.
“Jam pa bukë. Të largohet Edvin Rama se jam pa bukë për darkë. Ndaj po vij në protestë. Protestoj në mënyrë paqësore, ta marrë vesh Edvin Rama sepse jemi pa bukë. Vijmë nga jugu i Shqipërisë. Unë jam nga Tepelena, jam pa bukë për darkë. Edhe ndihmën ekonomike dy muaj ma dhanë dhe ma hoqën. Kam dy djem, një në vit të parë dhe një në klasë të katërt. Më kanë lënë pa bukë, ndaj kam ardhur në çdo protestë. Unë kam qenë në OSHEE prej 20 vitesh, më hoqën nga puna. Këta më hoqën, pse më hoqën sepse vajta takova Lulzim Bashën në mes të Tepelenës dhe më hoqën nga puna. Bashkëshortja ime nuk punon. Nuk ka punuar në asnjë qeveri. Dhe mua më lanë pa punë. Dua të punësohem. Me këtë qeveri nuk punësohem”, tha protestuesi.
Basha thirrje Ramës: Liro 11 pengjet, shqiptarët më të bashkuar së kurrë kundër grabitjes qeveritare
Ka përfunduar mbledhja e opozitës në selinë e Partisë Demokratike. Kryetari i PD, Lulzim Basha tha se opozita do të vazhdojë të qëndrojë përkrah qytetarëve. Basha i bëri thirrje Ramës të lirojë 11 pengjet kuksianë.
“Ata nuk janë fajtorë, ata janë pengje të Edi Ramës. Ai duhet ta harrojë një herë e përgjithmonë Taksën e Rrugës së Kombit. Opozita do të vazhdojë të qëndrojë në krah të protestës legjitime të qytetarëve kuksianë.
Edi Rama është autokrati që kontrolloj jo thjesht qeverinë, por ka privatizuar policinë. Prokuroria është zbuluar para shqiptarëve si një prokurori politike. Është vendosur një kryeprokurore kukull pa vetting. Peshqit e mëdhenj nuk do të kapen. Vangjush Dako e deri tek Damian Gjiknuri që i ka dosjet më të larta se unë, nuk do të kapen.
Shqiptarët janë më të bashkuar së kurrë kundër grabitjes qeveritare. Janë ngritur njerëzit që kanë parë se do t’u pesfishohet taksa e pronës. Qytetarët kanë reaguar sot dhe i garantoj qytetarët se do të jem në krahun tuaj. Edhe në javën e ardhshme duke nisur nga dita e martë në bashkërendim me sipëmarrjen e vogël, me fermerët dhe natyrisht me kuksianët do të vazhdojmë të mbështesim të gjitha aktet e mobindjes qytetare dhe protestës që do të shtrihen në mbarë Shqipërinë”, u shpreh Basha.
Deklarata e plotë e Bashës për mediat
Mediat të mos bien në kurthin e Edi Ramës, i cili sot ka pranuar fajin, por përsa kohë mban në burg 11 të pafajshëm, ai nuk është tërhequr.
I bashkohemi kërkesës së banorëve të Kukësit dhe mbarë Shqipërisë, të lirojë menjëherë 11 të pafajshmit. Rama duhet të anullojë urgjentisht konçensionin për rrugën e Kombit. Ai dhe vartësit e tij do të mbajnë përgjegjësi ligjore lidhur me urdhrat për rrëmbimin e qytetarëve në orët e natës, duke terrorizuar familjarët e tyre.
Rama është autokrati që kontrollon jo thjesht qeverinë dhe mazhorancën, por ka privatizuar policinë, e cila vuri Tiranën në shtetrrethim, por nuk kap Arbër Çekajn që solli 180 mln euro kokainë, as drejtuesit e policisë që u përfshinë në trafikun e drogës, as Klement Balilin, që kanë 18 muaj që mashtrojnë ndërkombëtarët për arrestimin e tij.
Prokuroria është politike. U vu një kryeprokurore kukull e votuar me 69 votat e Edi Ramës, çka do të thotë se politikanët e korruptuar si Vangjush Dako dhe Damian Gjiknuri që i kanë dosjet më të gjata se unë, nuk do të kapen.
Gjykatat janë të kapura, pasi dje nuk donin të dilnin historitë e njerëzve që u ngritën për bukën e gojës.
Po i mbajnë në qelitë e burgut 11 kuksianët, që dolën të protestojnë për bukën e gojës.
Tarifat dhe trau i Ramës ishin arsyet që shtynë qytetarët në protesta.
Qytetarët kanë protestuar për padrejtësitë që iu bënë, kuksianët nuk janë vetëm. Janë ngritur dhjetra mijëra qytetarë që u nxorën nga ndihma ekonomike, janë ngritur dhjetra mijëra biznese të vogla, që u përfshinë në skemën e TVSH nga truthari i ekonomisë me qëllimin e vetëm që të shkatërrohet biznesi i vogël dhe të përfitojnë oligarkët. Janë ngritur ata që do të paguajnë taksën e pronës me faturën e ujit dhe dritave.
Nis protesta në Kukës, banorët rrethojnë komisaritin e policisë: “Lironi vëllezërit tanë”, “Rama ik”!
Qytetarët e Kukësit janë ngritur sërsih në protestë sot pasdite rreth orës 18:30 para komisariatit të policisë ku kërkojnë lirimin e 11 të arrestuarve, për të cilët një ditë më parë gjykata dha masën e sigurisë arrest me burg. Banorët kanë rrethuar komisariatin e policisë dhe hedhin parrulla, “Lironi vëllezërit tanë”, “Faleminderit që nuk u dorëzuat!”, “Poshtë diktatura”, “Rama ik”, etj.
Arrestimet ndodhën gjatë natës së të dielës, ku 23 qytetarë u rrëmbyen nga shtëpitë pas protestës së zhvilluar në mesditë në rrugën e Kombit për të kundërshtuar vendosjen e tarifës në këtë aks rrugor.
Të arrestuarit u transferuan drejt Tiranës, ndërsa prej të dielës, para drejtorisë së Policisë së Tiranës, qytetarët kërkonin lirimin e protestuesve.
Dje gjykata vendosi që 11 prej të arrestuarve të qëndrojnë në burg, vendim ky që nuk u mirëprit jo vetëm nga protestuesit dhe opozita, por edhe nga përfaqësues të shoqërisë civile.
Sot banorët e Kukësit po protestojnë para policisë në këtë qytet për të kërkuar lirimin nga burgu të bashkëqytetarëve të tyre.
Gjyqtarja që dha vendimin për 23 protestuesit është bashkëshortja e një zyrtari të lartë të policisë, çka e detyronte atë të dorëhiqej nga çështja.
Personat e arrestuar janë:
1-Shpëtim Todaj “Arrest në burg me afat 20 ditë”
2- Xhevahir Hereni “Arrest me burg”
3- Elton Cengu “Arrest me burg”
4-Florian Onuzi “Arrest me burg”
5- Shkëlqim Vata “Arrest me burg”
6- Xhevahir Gashi “Arrest me burg”
7- Ervis Oruci “Arrest me burg”
8- Rasim Onuzi “Arrest me burg”
9- Vasil Laçi “Arrest me burg”
10- Abdi Haziri “Arrest me burg”
11- Edmond Matmuja “Arrest me burg”
Lista me emrat – Rama nuk komunikoi me banorët e Kukësit por me zyrtarët e tij
Takimi i Edi Ramës nuk ishte me qytetarë të zakonshëm të Kukësit, sepse prej tyre ka frikë dhe nuk shkel në Kukës.
Takimi i Ramës ishte me rrogëtarët e tij në poste kyçe të administratës në Kukës dhe me persona me preçedentë kriminalë.
Protagonisti i propagandës së Edi Ramës është Xhevdet Sopaj, i dënuar në vitin 2012 për armëmbajtje pa leje.
Për shkak të mosdeklarimit të dënimit, KQZ vendosi ndërprerjen e mandatit të tij.
Disa nga pjesëmarrësit e tjerë në takimin e Ramës janë rrogëtarët nga administrata e Ramës, që kanë lënë punën për t’u mbledhur në Prefekturë.
Lista e rrogëtarëve të Ramës në takimin në Kukës
Jaho Hoxha – Drejtor i Postës Kukës
Agron Hoxha – Drejtor i Drejtorisë së Shëndetit Publik
Fadil Morina – Drejtoria e Shëndetit Publik
Shpresa Kërxhaliu – Nëndrejtoreshë e Gjimnazit
Manushaqe Muça – Mësuese
Afrim Hoda – OSHEE
Ledian Halilaj – Zyra Punës
Skender Ahmeti -DAR
Clirim Spahiu – Drejtoria e Transportit Rrugor
Azem Elezi -Drejtor i Arkivit dhe kryetar i PS aktual
Besart Tota -Drejtor i IKMT-së
Ipeshkvijtë e Shqipërisë në mbështetje të protestuesve
Ipeshkvijtë e Shqipërisë mbajnë qëndrim për gjendjen e Kukësit, pas protestave të ditëve të fundit për taksën e Rrugës së Kombit. Në një deklaratë të djeshme për shtyp – “me shpresë se do të japim kontributin tonë si pjesëmarrës në jetën sociale dhe shpirtërore të vendit”, siç shkruajnë – ata theksojnë:
“Së pari, mbështesim çdo nismë civile që kërkon të drejtat e patjetërsueshme të qytetarëve. Është e drejtë e çdokujt që kur i duket e arsyeshme, të protestojë e të thotë fjalën e tij, vetëm apo i mbledhur së bashku me të tjerë.
Së dyti, ne dënojmë si moralisht të papranueshme çdo sjellje dhune ndaj personave, institucioneve, objekteve private apo shtetërore. Dhuna nuk është kurrë zgjidhje dhe ne bëjmë apel që ajo të shmanget në çdo nismë të ligjshme për kërkimin e të drejtave personale apo komunitare. “Kisha nuk mund të pranojë dhunën …. sepse dhuna sjell gjithmonë dhunë dhe prodhon në mënyrë të pashmangshme forma të reja të shtypjes dhe të skllavërisë, më të rënda se ato që ajo pretendonte të çlironte” (Papa Pali VI).
Së treti, ne u bëjmë apel institucioneve shtetërore të gjejnë rrugët e duhura për t’u ardhur në ndihmë personave në nevojë. Jemi të vetëdijshëm se rrugët, apo çdo objekt që ka të bëjë me të mirën e përbashkët, kanë nevojë për mirëmbajtje dhe kjo duhet bërë. Por gjithashtu, sikurse e kemi shprehur edhe në letrën tonë për Krishtlindjet e vitit 2017, duhet kujdes ndaj personave, grupeve shoqërore dhe zonave që janë më në nevojë. Duhet të punojmë të gjithë bashkë në mënyrë që hendeku i krijuar midis të pasurve dhe të varfërve të ngushtohet, sidomos i atyre të zonave të thella e periferike”./Radio Vatikani
Bizneset: Sot ishte vetëm fillimi, revolta po afron!
Në të njëjtën kohe me bllokimin e katër rrugëve kryesore të vendit, biznesi i vogël zhvilloi një grevë dy orëshe, për të kundërshtuar përfshirjen në skemën e TVSH-së. Ata thanë se taksa e re i çon drejt falimentit në një kohë kur fuqia blerëse sipas tyre ka rënë.
Përfaqësues të biznesit të vogël në të gjithë vendin ulën qepenat ne shenjë protestë kundër rritjes së taksës për vlerën e shtuar, në të njejtën kohe, kur qytetarë të mbështetur nga opozita bllokuan katër akset kryesore të lëvizjes në vend.
Tregtarët e pazarit të Korçës, pezulluan punën për dy orë dhe kërkuan përgjysmimin e tarivës së TVSH që hyri në fuqi më 1 prill.
Paralajmërimi për protesta masive
Pas grevës, paralajmëruan se do të zbresin në protesta masive, por theksuan se do të shkojnë drejt falimentit për të mos rritur çmimet.
Tarifa e pranueshme për ta është niveli 6 % për produktet e shportës.
Të njejtën gjë benë edhe rreth 100 biznese në pedonalen e Fierit.
Tregtarët thonë se taksa për ta do të thotë faliment.
Protesta të ngjashme pati edhe në qytete të tjera.
Prej datës 1 prill nisi zbatimi i skemës së re të TVSH-së prej 20 % për çdo biznes që kalon xhiron 2 milion lekë.
Fox News: Skema 9 milionë dollarë për ti dhuruar drejtësinë politike Ramës
Kush është ndryshimi mes filantropisë dhe aktivitetit politik? Asnjë ndryshim nuk ka, nëse emrin e ke Xhorxh Soros” me këto fjalë Foxneës komentoi skandalin financimit me 9 milionë dollarë të “Fondacionit për Shoqëri të Hapur” nga ambasada amerikane në Tiranë, i zbuluar nga Judicial Ëatch, një grupim konservator në SHBA.
Të dhënat e “Judicial Watch” faktojnë lidhjet financiare mes organizatave të Soros dhe ambasadës amerikane, duke hedhur dyshime se reforma në drejtësi ishte që në zanafillë, një projekt që synonte kapjen e drejtësisë nga Edi Rama, mik i ngushtë me Soros.
Duke marrë shkas nga 9 milionë dollarët e taksapaguesve amerikanë për Xhorxh Soros, Foxneës ka kujtuar 18 bilionë dollarë të shpenzuara në total nga “filantropi”. Siç u shpreh gazetari Lou Dobbs, financimet nuk janë thjesht kundër të majtëve, por siç tregojnë shumë shembuj janë edhe “antiamerikanë”.
“Mos po tallemi gjë?” ishte pyetja e gazetarit, në nisje të intervistës me Matt Schlapp, një politikan konservator i ftuar në Foxnews për këtë temë.
Dobbs nga ana tjetër përmendi faktin se financimet për Xhorxh Sorosi përgjithësisht nuk kontrollohen, megjithëse Fondacioni për Shoqëri të Hapur ka dhënë prova se është qartësisht i përfshirë në financime okulte të politikës.
Policia kërcënon sërish protestuesit, VOA: Basha thotë se s’do kërkojnë leje për protestat e ligjshme
Në Shqipëri, që prej orës 10.00 të ditës së sotme opozita ka nisur protesta në katër zona të ndryshme të vendit duke bllokuar akset rrugore kombëtare në Vorë, në Bradashesh në dalje të Elbasanit, në Çermë të Lushnjes dhe në Milot ku bashkohet rruga që vjen nga Kosova me atë nga Shkodra, drejt Tiranës. Në Milot, protesta nisi me një përlasje me policinë e cila kërkoi që të mos bllokohej rruga, duke u tërhequr më pas. Protestat e sotme vijnë pas vendimit të marrë pak ditë më parë nga opozita për t’i bërë thirrje qytetarëve për mosbindje civile, ndonëse ajo shprehet se protestat e sotme janë organizuar nga qytetarët dhe ajo vetëm po i mbështet ato.
Mbrëmë Policia deklaroi se ajo nuk kishte marrë njoftim për protestën. “Organizatorët e kësaj proteste të paligjshme do të përballen me ligjin për çdo pasojë të paparashikuar, që mund të sjellë një protestë e organizuar për të nxitur rrëmujë dhe konflikt në pika nevralgjike për qarkullimin e njerëzve dhe mjeteve”, nënvizonte deklarata e policisë.
I ulur mes protestuesve në rrugën e Vorës, kryetari demokrat Lulzim Basha u shpreh se “protesta është legjitime. I paligjshëm është privatizimi kriminal i Shtetit nga ana e Edi Ramës. Ky është një shtet që burgos popullin dhe lë të lirë kriminelët. Nuk do të kërkojmë kurrë leje për një protestë të ligjshme”, theksoi zoti Basha.
Protestat e sotme u nxitën nga manifestimi i zhvilluar fundjavën e shkuar në Rrugën e Kombit për të kundërshtuar tarifën e pagesës së vendosur për kalimin në aksin që lidh Shqipërinë me Kosovën. Protesta çoi në përplasje të dhunshme me policinë dhe më pas në djegien, nga ana e protestuesve të sporteleve të ngritura për pagesën e tarifës që nis nga 2.5 euro për motorrët deri në 22.5 euro për kamionët.
Duke folur sot në parlament, kryeministri Rama pranoi se “nuk kemi qenë mjaftueshmërisht të përgatitur për çfarë mund të krijonte një risi e tillë nga pikëpamja psikologjike për njerëzit e painformuar”. Ai tha se “po punohet intensivisht për krijimin e mundësisë optimale që edhe procesi i mirëmbajtjes, jetike, të Rrugës së Kombit, të garantohet dhe problemi i banorëve të adresohet”, deklaroi kryeministri duke njoftuar se “vendimi ynë është i qartë. Ne nuk do fillojmë sistemin e pagesës pa dhënë zgjidhjen më të mirë të mundshme, për atë zonë”.
Kryesore
Continue to the category
