Më e keqja ka kaluar për Shkodrën, e cila u godit nga përmbytjet gjatë muajit mars, megjithatë mbi 1645 ha tokë vijojnë të mbeten nën ujë. Bashkia Shkodër bën me dije se, nevojiten ndihma ushqimore dhe furnizim me ujë për banorët që vijojnë të mbeten të rrethuar nga uji. Nevojitet gjithashtu bazë ushqimore për bagëtitë.
Bashkia Shkodër ka bërë të mundur rivënien në punë të pompave të Ujësjellësit në Dajç, stacionin e ujësjellësit Oblika 2, stacionin e ujësjellësit në Trush e Bërdicë dhe po punohet tek Oblika 1 (megjithëse akoma ka prezencë uji).
Bashkia Shkodër gjithashtu ka bërë dezinfektimin e 2 shkollave në Njësinë Administrative të Dajçit pas largimit të ujit, në shkollën e Dajçit dhe atë të Samrishtit.
Grupet e punës të përbashkëta të specialistëve të Bashkisë Shkodër dhe Drejtorisë Rajonale të Bujqësisë vazhdojnë proçesin e dezifektimit të vendqëndrimeve të gjësë së gjallë.
Deri më tani janë dezifektuar në total 5350 m2 sipërfaqe vendqëndrimesh të gjësë së gjallë në zonat ku uji është tërhequr .

Specialistët tanë janë në terren, dhe po bëjnë vlerësimet e dëmeve të shkaktuara.
Nga ana tjetër, duhet të merren masa për furnizim me klor për dizefektim për zonat e përmbytura pas tërheqjes së ujit.
Sipërfaqe të përmbytura
Njësia Administrative Dajç: 500 ha.
Njësia Administrative Ana e Malit: 1000 ha.
Njësia Administrative Bërdicë: 50 ha.
Njësia Administrative Rrethina: 50 ha.
Qyteti Shkodër: 45 ha(Livadhe).
Shtëpi të rrethuara nga uji: 170 shtëpi.
Njësia Administrative Ana e Malit: 150 shtëpi.
Njësia Administrative Rrethina: 10 shtëpi.
Qyteti Shkodër: 10 shtëpi (Livadhe).
Nevojat për mbështetjen e banorëve në zonat e prekura për ushqime dhe ujë të pishëm janë:
Njësia Administrative Dajç: 400 pako ushqimore dhe 1200 bidona (5 litër)
Njësia Administrative Ana e Malit: 400 pako ushqimore dhe 1000 bidona (5 litër)
Njësia Administrative Bërdicë: 250 pako ushqimore dhe 1000 bidona (5 litër)
Njësia Administrative Rrethina: 150 pako ushqimore dhe 1000 bidona (5 litër)
Qyteti Shkodër: 20 pako ushqimore dhe 500 bidona (5 litër)
Nevojat për bazë ushqimore (koncentrat + bar i thatë): 75 koncentrat dhe 90 bar i thatë.
Njësia Administrative Dajç: 20 t koncentrat + 30 bar i thatë
Njësia Administrative Ana e Malit: 20 t koncentrat + 20 bar i thatë
Njësia Administrative Bërdicë: 15 t koncentrat + 20 bar i thatë
Njësia Administrative Rrethina + Qyteti Shkodër (Livadhe): 20 t koncentrat + 20 bar i thatë

Kryetari i Bashkisë së tropojës, Besnik Dushaj, mbështet protestën e banorëve për heqjen e taksës në Rrugën e Kombit, dhe kërkon lirimin e të arrestuarve. Ai thotë se banorët e qarkut të Kukësit janë më të varfrit në Shqipëri, dhe sipas tij tarifat e larta të vendosura nga Qeveria janë të papërballueshme. Dushaj shprehet se në këto zona është rritur varfëria vitet e fundit, ndërsa shton se kanë munguar investimet e qeverisë.
“Qarku i Kukësit, ku përfshihen bashkitë e Kukësit, Hasit dhe Tropojës është qarku më i varfër në Shqipëri dhe taksa e rrugës së Kombit rëndon të gjithë qytetarët por në mënyrë të veçantë banorët e këtij qarku, dhe sigurisht edhe banorët e Bashkisë së Tropojës. Duke parë rritjen e varfërisë, rritjen e taksave të tjera që ka bërë kjo qeveri, do të ishte me vend rritja e investimeve në këto zona dhe jo vendosja e një barre siç është taksa në rrugën e Kombit. E them me bindje që kjo taksë është e papërballueshme për banorët në këto zona. Kjo taksë do të rrisë biletën e transportit, do të rrisë çmimin e ushqimeve dhe mallrave që i marrin nga Tirana dhe rrethe të tjera”, shprehet ai.

Kryebashkiaku i Tropojës thotë se kjo protestë nuk është politike. “Ne e mbështesim protestën e banorëve. Kjo nuk është protestë politike, por është protestë që kërkon t’i tregojë qeverisë se i gjithë ky qark janë shumë të varfër. Ka shumë të papunë, ka shumë familje në mjerim dhe ka nevojë urgjende për investimeve, të punësohen njerëzit e të rritet numri i turistëve. Kësaj nuk i shërben taksa.
Kam komunikuar vazhdimisht me përfaqësues të qeverisë dhe u kam kërkuar që taksa të hiqet për banorët e këtij qarku dhe ajo duhet të jetë 0 për këta banorë. Kërkoj që edhe ata 23 të arrestuar të lirohen menjëherë sepse protestuan me dinjitet, protestuan për përmirësimin e jetës së tyre dhe nuk protestuan për asnjë arsye politike. Varfëria i ka pllakosur. Ne do të mbështesim protestat e banorëve tanë por edhe të gjithë protestat që bëhen kundër varfërisë dhe rritjes së taksave. Do të mbështesim protestën për heqjen e taksës në rrugën e Kombit”, thotë Dushaj.

Avokati Genc Gjokutaj i ftuar në “360 Gradë” në Ora Nes, thotë se arrestimet e banorëve të Kukësit gjatë natës janë bërë në shkelje nga ana e prokurorisë dhe e konsideroi “terror”.
“Vetëgjyqësia është kur një shtetas të drejtën që ai gëzon e zgjidh personalisht dhe nuk i drejtohet shtetit. Këta njerëz nuk i janë drejtuar shtetit sepse shteti është fajtori i gjithë kësaj shkeljeje. Njerëzit e kanë zgjedhur vetë. Prokuroria ka vepruar në shkelje flagrante, pasi si kontrolli i banesës, si arrestimi i personave që u dihet vendi, arrestimi nuk lejohet të bëhet natën. Ata janë familjarë, kanë fëmijë. Ky është një terror që nuk mund të lejohet në asnjë mënyrë. Këto janë metoda që vetëm e agravojnë situatën.
Kjo punë bëhet sepse kanë frikë se do ua nxjerrin njerëzit nga gjykata jo se nuk kanë salla. Ç’punë ka t’i sjellësh nga Kukësi në Tiranë. Këtu ka RENEA-n. Në Tiranë është shumatore.
Kjo qeveri do të mbahet mend si hasmi i të varfërve. Modeli ekonomik është i gabuar. Nuk mund të zgjidhet kjo punë me repression”, u shpreh avokati Gjokutaj.

Vatrat e zjarrit riaktivizohen herë pas herë në magazinën, e cila u dogj plotësisht në rrugën, “Siri Kodra”. Rreth 30 automjete zjarrfikëse luftuan me flakët nga mesdita e së hënës, ndërsa magazina me materiale hidrosanitare u shkrumbua totalisht.
Flakët dukeshin nga disa kilometra larg kryeqytetit, pasi materiali ishte lehtësisht i djegshëm, duke krijuar panik tek banorët që ndodheshin shumë pranë me ndërtesën në flakë.
Bujar Kacana, efektiv i zjarrfikësve të kryeqytetit tregon luftën me flakët dhe ndihmën që i dhanë edhe kolegët e Fushë-Krujës, Durrësit si edhe ata të ushtrisë.
Për të përcaktuar shkaqet e rënies së flakëve, Kacana thekson se do të duhet ende kohë.
Fatmirësisht nga zjarri nuk ka pasur njerëz të lënduar, por u raportua se kërkuan ndihmën e parë disa efektivë zjarrfikës, pasi mbetën të asfiksuar nga flakët.

Dëmi është i konsiderushmëm, pasi nga magazina e cila tregtonte pajisje hidrosanitare dhe elektrike nuk ka mbetur asgjë, ndërsa fatmirësisht kanë shpëtuar banesat dhe objektet pranë saj.
Shefi i zjarrfikësve të kryeqytetit, Luan Shehu tha se, operacioni ka qenë i vështirë edhe për shkak të kushteve ku ndodhej objekti, pasi në zonën për rreth nuk ka burime hidrike.
“Ne punuam në kushte tepër të vështira, në një errësirë të plotë se hoqëm dhe mundësinë e pasjes së elektricitetit, pra u fikën me anë të KESH-it. Pastaj puna vështirësohet natën. Megjithatë, arritëm ta lokalizojmë brenda tre orëve dhe ta ndalojmë këtë incident dhe ta presim zjarrin që të mos na jepte premisa për të vazhduar tek shtëpitë”, tha ai.
Nuk është përcaktuar ende shkaku i zjarrit, por mësohet se flaka ka ardhur nga brenda magazinës, ku fatmirësisht nuk kishte punonjës. Vatra e zjarrit për neve ka qenë në qendër të magazinës dhe zjarri u shfaq menjëherë fuqishëm në brendësi të magazinës.