“Studimi i BE fakton se 20% e shqiptarëve deklaruan se kanë shitur votën. Në këto kushte zgjedhje nuk ka. Kanë shitur votën dhe deri sot kjo drejtësi që kontrollohet në çdo qelizë nga Rama nuk ka qenë në gjendje të ndëshkojë një njeri të vetëm, për votë, çka e ka bërë përpara në vitet e shkuara. Kurse tani asnjë njeri nuk është bërë përgjegjës për këtë akt”

– Zoti Berisha, vetëm një ditë më parë Opozita e Bashkuar bëri një mbledhje dhe mori një vendim të unifikuar, ende i papërcaktuar hap pas hapi, por thelbi është mosbindja civile, pra mospagimi i taksave të shtuara, taksave Rama, dhe atyre që janë një barrë ndaj qytetarëve. Pyetja ime është, përpos pjesës teknike se si do të implementohet kjo, mendoni se populli shqiptar ka arritur në pikën, ose nëse mund të themi që ka shtypur frikën që t’i kundërvihet në mënyrë civile qeverisë, e cila ka dhe forcën shtrënguese në anën e saj?
Eshtë e vërtetë që qeveria përdor mjete represive, përdor një kontroll të madh të mediave, me të cilat dhunon dhe manipulon opinionin publik, përdor si shpatë drejtësinë, duke dhënë vendime të njëanshme dhe bërë sulme vetëm kundra opozitës, përdor dhunën policore si një mekanizëm tipik të narkoshtetit, milionat dhe miliardat që disponon nga droga. Në këtë kontekst, qeveria ka arritur të vendosë mbi qytetarët shqiptarë, të cilët nga të gjitha të dhënat e statistikat janë më të varfërit në Europë, taksa dhe tarifa ndër më të lartat. Ndërkohë situata është dramatike në rrafshin ekonomik. Rritja ekonomike 4% është rritje kanabiste, rritje droge. Eshtë e vërtetë që ka individë, të cilët kanë qindra milionë, portë tjerët bëhen gjithnjë e më të varfër. Pra, nuk është kjo një tregues i mirëqenies ekonomike të shqiptarëve. Në këto rrethana, po të marrim historinë, taksat e larta kanë qenë historikisht të të gjitha kohërave shkaqe të revoltave popullore dhe revolucioneve.

Kjo erdhi më në fund dhe në Shqipëri. Qytetarët e Kukësit, Hasit dhe Tropojës vendosën t’i thonë Jo një taksë plaçkë, që Rama vendosi mbi “Rrugën e Kombit”. Them plaçkë se vërtetë është një plaçkitje e madhe që bëhet. “Rruga e Kombit”është një rrugë që lidh Shqipërinë me Kosovën dhe nëse t’i takson qytetarët e Kuksit, Hasit dhe Tropojës pse e përdorin dhe ata këtë rrugë dhe nuk takson qytetarët e tjerë shqiptarë, t’i bën një diskriminim të tmerrshëm ndaj tyre. “Rruga e Kombit” ka nevojë të madhe për mirëmbajtje dhe ne e bëmë studimin. Ne përcaktuam se sa kërkon kjo rrugë në vit për mirëmbajtje. Rama përpiqet të mbrohet me absurditete, por një tarifë që ne nuk e vendosëm dhe studimin e kemi të 2010, do të thotë që ne mirëmbajtjen do ta bënim me taksën e qarkullimit. Taksa e qarkullimit, të cilën ky e rriti me 3.5 herë, mjaftonte me nivelin që kishim ne, 2010 e saj për të mirëmbajtur pa asnjë vështirësi “Rrugën e Kombit” dhe rrugët e tjera. Por, Rama këtë taksë kombëtare që ka destinacion absolut rrugët kombëtare, e përdor për zyra, lukse dhe orgjira dhe nuk e përdor për rrugë. Kështuqë vendosi të plaçkisë qytetarët e Qarkut të Kuksit, por dhe mbarë qytetarët e Kosovës. Rruga sjell në vit mbi 300 mln euro të ardhura për shqiptarët. Sot, më të humbur nga rruga janë qytetarët e Lushnjës apo Kavajës, Beratit dhe Fierit sesa qytetarët e Kukësit. Atyre prodhimet u mbeten në fushë, sepse çdo ditë vinin me dhjetëra kamionë që të hiqnin prodhimet e tyre për në Kosovë. Sapo të fillojë sezoni turistik mbi 1 mln shqiptarë nga Kosova vijnë në brigjet e Shqipërisë për të kaluar pushimet verore. Kështuqë, ky veprim jashtëzakonisht i pastudiuar erdhi si derdhja e kupës.

U mbush kupa dhe u derdh. Filloi një revoltë qytetare e një guximi të jashtëzakonshëm kundër qeverisë, kundër Ramës për taksën e tij. Qytetarët e Kuksit, Hasit dhe Tropojës ja thyen turinjtë Edi Ramës, pushtuan kështjellën, vendosën aty flamurin e fitores së tyre. Ky është një frymëzim për të gjithë qytetarët shqiptarë të tjerë, të ngrihen për biznesin e vogël, të cilit këto ditë i hyri në fuqi vendosja e TVSH, e denoncuar dhe nga vetë FMN dhe unë i bëj thirrje dhe komunitetit ndërkombëtar të vijnë në Shqipëri të shohin pse ikin shqiptarët kaq masivisht dhe pse nuk iknin më parë. Ka trefishur faturën e ujit, ka rritur në mënyrë marramendëse taksën e pronës. Shqiptarët ndonëse më të varfërit në Europë, janë populli apo ndër 5 popujt që paguajnë më shtrenjtë naftën në botë. Pse? Sepse e ka bërë 320 lekë, apo 32 lekë taksën e qarkullimit. Për të gjitha këto së bashku, opozita vlerëson se është koha e revoltës qytetare, e mosbindjes civile. Revolucioni kundër taksave të larta është revolucion për thelbin e lirisë ekonomike, pa të cilën liritë e tjera vyshken dhe bëhen thjesht fasadë. Liria ekonomike ka një rëndësi kritike për jetësimin e të gjitha formave të tjera të lirisë. Ndaj dhe kam besim të madh që opozita mori dje një vendim historik dhe qytetarët shqiptarë do jenë në lartësinë e guximit të tyre për të përmbysur këtë regjim që ka tejkaluar të drejtën në të gjitha veprimtaritë etij.

-Pyetje për deklaratën e bërë dje në emisionin Debati në Channel One për mosmarrjen pjesë të PD në zgjedhje
Unë nuk them, të mos marri pjesë, por unë them që me Ramën zgjedhje nuk ka. U faktua kjo. Dhe njeriu nuk mund të bëjë të paditurin, eksperimenti u bë. Po marr vetëm dy fakorë: kohën televizive që ka përdorur Rama me kohën televizive të liderit të opozitës. Eshtë 152 min me gjithsej 53 min të liderit të opozitës, në një nga matjet flas. Më e tmerrshmja është blerja e votës. Studimi i BE fakton se 20% e shqiptarëve deklaruan se kanë shitur votën. Në këto kushte zgjedhje nuk ka. Kanë shitur votën dhe deri sot kjo drejtësi që kontrollohet në çdo qelizë nga Rama nuk ka qenë në gjendje të ndëshkojë një njeri të vetëm, për votë, çka e ka bërë përpara në vitet e shkuara. Kurse tani asnjë njeri nuk është bërë përgjegjës për këtë akt.

– Një tjetër kërkesë që vjen e përsëritur në publik nga ata që kanë nostalgji për kohën kur ju ishit lideri i PD, kjo dhe për shkak të nevojës për një bashkim të PD sot. Ju e keni thënë në mënyrë të qartë, që nuk ktheheni në pozicionin që keni qenë, nuk merrni më vendime, por a e keni menduar të jeni një figurë më e angazhuar për të bërë një afrim të atyre që janë larguar nga partia dhe që mund të jenë figura shumë të rëndësishme për PD?
PD kalon në një proces, i cili nuk është një proces i lehtë, por është një proces plotësisht i mundshën. Ky proces, në vlerësimin tim duhet të garantojë bashkimin e të gjitha kontributeve të saj nga njëra anë dhe nga ana tjetër të krijojë gjithë mekanizmat për elektrizimin, afrimin e të rinjve shqiptarë me PD. Ndryshime të rëndësishme statutore po bëhen, me ç’jam informuar, në të cilat do të gjejnë veten edhe ata, të cilët kanë patur vërejtje të ligjshme për ecurinë, zhvillimet dhe vendimmarrjet. Këto ndryshime duhet të garantojnë demokratët se, rruga e tyre për një konkurrencë të ndershme është e hapur në të gjitha nivelet, duhet të garantojë anëtarët e PD se zëri i tyre, për ata që do zgjidhen do të përfillet dhe do merret parsasysh, duhet të garantojë kufizimin e pushtetit të secilit. Kryetari i PD ka njohur gabimet e tij dhe është shprehur se, ai është i gatshëm me masa konkrete të korrigjojë ato gabime që u bënë me listën. Mendoj se, procesi i bashkimit të kontributeve kalon njëkohësisht nëpërmjet kompromiseve të të gjitha palëve. Dhe, në një sens, nuk mund të ketë demokratë dhe demokraci pa kompromise. Kështuqë, unë i shoh të mundshme. Do jetë mbledhja e Këshillit Kombëtar, e cila do miratojë ndryshimet statutore të propozuara nga flukse të ndryshme të PD. Do jetë Kuvendi Statutor që do i miratojë përfundimisht këto vendime, kurse përsa i përket rolit tim ky është një rol tërësisht i parëndësishëm dhe unë jam dorëhequr një herë e përgjithmonë, duke mbetur i betuar se do qëndrojë një avokat me të gjithë mundësistë e mia në interesin publik të shqiptarëve.

Intervista e dhënë për Abc News

Kryetari i PD, Lulzim Basha deklaroi dje se PD dhe opozita do të udhëheqë popullin drejt mosbindjes civile dhe refuzimit pa kushte të grabitjes së Ramës përmes taksës korruptive së“Rrugës së Kombit”. Përmes një deklarate për mediat, Basha deklaroi se refuzimi pa kushte i vjedhjes së Ramës përmes kësaj takse është e vetmja përgjigje që populli do t’i tregojë Ramës deri në tërheqjen e këtij të fundit. Thirrja që unë i drejtoj është që të tërheqë menjëherë policinë nga Kukësi. Të lirojë të 23 personat e grabitur në mes të natës. Të arrestojë Saimir Tahirin. Të arrestojë Fatmir Xhafajt vëllanë e vet, që është i dënuar për drogë dhe vazhdon të jetë një ndër bosët kryesorë të drogës në Vlorë. Të arrestojë Balilin, të arrestojë Habilajt. Të mos merret me njerëzit e thjeshtë. Deri në atë moment, mosbindja civile, refuzimi i grabitjes së dyfishtë dhe padrejtësisë së dyfishtë, është rruga që opozita i tregon popullit dhe me të cilën do të udhëheqë popullin drejt refuzimit pakushte të kësaj grabitje dhe padrejtësie të dyfishtë. “Mashtrimet e Edi Ramës dhe sejmenëve të tij janë shenjat e panikut dhe dëshpërimit që e ka kapur. Thelbi i çështjes është ky: Rama i grabit dyfish shqiptarët dhe pastaj iu bie dyfish me kërbaç dhe reagimi i tyre në Kukës dhe reagimi i tyre në mbarë Shqipërinë është reagim kundër padrejtësisë dhe grabitjes.

Çfarë dua të them me këtë?Merr 200 milionë euro në vit nga taksat e shqiptarëve për mirëmbajtjen e rrugëve, nuk shpenzon asnjë cent nga këto lekë për “Rrugën e Kombit”,por vendos taksë të re të papërballueshme. Nuk shpenzon asnjë cent nga këto 800 milionë euro që ka mbledhur në këto 5 vite dhe taksën e qarkullimit që e ka rritur për mirëmbajtjen e rrugëve, por i jep ato me koncesion, pra iu vendos taksë të dyfishtë shqiptarëve. Ata që u çuan janë njerëzit më të varfër, më të shpërfillur, më të braktisurit e Shqipërisë ndër vite, ata u çuan për bukën e gojës.E dëgjuat atë burrin që thoshte se, jetoj 20 metra nga trau dhe s’kam mundësi të shkoj e të vij në shpi me 5 euro sa herë që kaloj traun.Kjo është arsyeja e revoltës së këtyre njerëzve të thjeshtë. Revoltë, e cila ka përkrahjen e gjithë shqiptarëve, të cilët po deklarojnë një zëri që janë dhe ndihen kuksianë.Pse e thonë këtë?!Sepse janë njësoj si kuksianët subjekt i grabitjes së dyfishtë të Edi Ramës; mbledh taksa, por këto taksa nuk i çon për arsyet që i mbledh, as për mirëmbajtje rrugësh, as për shkolla të reja, as për spitale të reja, i çon për inceneratorët e Arben Ahmetajt, i çon për milionat që merr Vilma Nushi. Asnjëri prej tyre nuk bën punë. Për Vilma Nushin, falsifikohen formularët dhe checkohen të vdekurit. Për 25 milionë euro në vit që merr Arben Ahmetaj, po bëhet gati të sjellë plehrat e Italisë”, tha Basha.

Kreu i PD dënoi faktin se, Rama i grabit dyfish shqiptarët dhe pastaj iu bie dyfish me kërbaç dhe reagimi i tyre në Kukës dhe reagimi i tyre në mbarë Shqipërinë është reagim kundër padrejtësisë dhe grabitjes. Basha tha se, kjo është padrejtësia e dyfishtë, ku kriminelët, ata që bëjnë drogën, politikanët e korruptuar, politikanët e lidhur me krimin bredhin të lirë, ndërsa njerëzit që çohen dhe protestojnë për të drejtat e tyre, që çohen dhe protestojnë kundër grabitjes dhe padrejtësisë, terrorizohen. “Me paratë e shqiptarëve nuk u shërbejnë shqiptarëve. Ndaj dhe kjo është në radhë të parë një reagim dhe kryengritje qytetarësh kundër grabitjes së dyfishtë që i bën Edi Rama dhe banda e tij e hajdutëve dhe oligarkëve që ndan këto para. Së dyti, është një reagim ndaj padrejtësisë së dyfishtë. Një javë i la kohë me Prokurorinë dhe Policinë e tij, Arbër Çekajt, të arratisej megjithëse kishte sjellë 180 milionë euro kokainë në Portin e Durrësit. Saimir Tahiri iu dha makinën trafikantëve të drogës dhe është kapur në përgjimet e Antimafies, bredh i lirë dhe i lirë bredh edhe Agron Xhafaj, vëllai i ministrit të Brendshëm, i dënuar si trafikant ndërkombëtar droge. Të lirë janë Habilajt, Balili dhe dhjetëra kriminelë, por iu turri policinë familjeve më të varfëra të Shqipërisë. Në mes të natës, arrestoi 23 kryefamiljarë. Pse?! Sepse protestuan për mbijetesën e tyredhe fëmijëve të tyre. Kjo është padrejtësia e dyfishtë. Kriminelët, ata që bëjnë drogën, politikanët e korruptuar, politikanët e lidhur me krimin bredhin të lirë, ndërsa njerëzit që çohen dhe protestojnë për të drejtat e tyre, që çohen dhe protestojnë kundër grabitjes dhe padrejtësisë, terrorizohen”, u shpreh Basha.

Thirrja e Bashës: Asnjë qytetar dhe biznes të mos paguajë taksat
Asnjë qytetar dhe asnjë biznes të mos paguajë taksat. Ka qenë kjo, thirrja e përsëritur e kreut të PD drejtuar të gjithë qytetarëve si shenjë e revoltës ndaj vjedhjes që Rama u bën në xhepat e çdo familjeje shqiptare. “Pse ushtrohet ky terror?! Ky terror ushtrohet që të mos ngrejnë zërin, që ti bëjnë shembull para shqiptarëve dhe kjo është mendësia e diktatura, kur iu afrohet fundit. Prandaj kam bërë thirrjen e djeshme për mosbindje qytetare, që do të thotë refuzim i padrejtësisë, refuzim i grabitjes. Po, do të thotë të mos paguajnë taksat e rritura. Është një thirrje ndaj sipërmarrjeve të vogla të mos e paguajë TVSH-në, sepse këto taksa nuk shkojnë për qytetarët. Këto taksa vidhen dhe shpërdorohen nga Edi Rama dhe banda në pushtet. Ndaj e përsërish këtë thirrje; mos paguani taksat. Nuk ka çfarë t’u bëjë. Nuk arreston dot të gjithë popullin. Kjo është rruga për t’ju kundërvënë grabitjes së dyfishtë dhe padrejtësisë së dyfishtë. Dhe në këtë rrugë dhe në çdo veprim që qytetarët do të ndërmarrin, opozita do të jetë tërësisht dhe në të gjitha format dhe mënyrat në krahun e tyre siç jemi sot në krahun e qytetarëve kuksianë, siç jemi sot në krahun e atyre 23 të arrestuarve që protestuan për fëmijët e tyre dhe për mbijetesën e tyre, që duhet të lirohen menjëherë”, tha kreu i PD. I pyetur nga gazetarët se kur do të fillojnë protestat, Basha u shpreh: “Protestat kanë filluar”.

Fillimisht shqiptarët paguan për “Rrugën e Kombit” taksën “Majko”. U mblodhën 250 milionë euro, por nuk u ndërtua asnjë metër rrugë.
Taksa vjetore që shqiptarët paguajnë për mirëmbajtjen e rrugëve llogaritet sipas zv.ministrit të Ramës në 470 milionë euro në vit, por asnjë euro e vetme nga këto që paguhen nuk ka shkuar gjatë këtyre 5 viteve për të ndërtuar qoftë edhe një kilometër rrugë apo për të mirëmbajtur një rrugë.
“Rruga e Kombit” përllogaritet sipas qeverisë aktuale se ka kushtuar 1.2 miliardë dollarë dhe ka bashkuar fizikisht Shqipërinë me Kosovën.

Ministrat e Ramës thonë se do të marrin nga xhepi i taksapaguesve edhe 220 milionë euro të tjera për vetëm katër ura që sipas tyre do të ndërtohen në segmentin e mbetur, një shifër e fryrë sipas qejfit të Kryeministrit-vizë.
Më e bukura vjen në fund. Pasi nuk kanë mjaftuar rreth 2.5 miliardë dollarë në total për ndërtimin dhe mirëmbajtjen vjetore të “Rrugës së Kombit” të paguara nga shqiptarët, Rama i vendos edhe pagesën e fundit përmes koncesionit prej 10 eurosh vajtje-ardhje. Shuma që duhet të paguajnë vetëm për këtë koncesion të Ramës arrin shifrën e rreth 400 milionë eurove për 35 vitet e ardhshme.
Pra, e përllogaritur ndryshe. Vetëm për taksat e vendosura nga Rama dhe bashkë me taksën Majko, shqiptarët kanë paguar dhe duhet të paguajnë plot 1.34 miliardë euro. Më këto shuma do ndërtohen vetëm 4 ura.
Ndërkohë për të gjithë “Rrugën e Kombit” janë shpenzuar për ndërtimin e saj 1.2 miliardë dollarë.
E thënë ndryshe; sa lirë na ka kushtuar ndërtimi i kësaj rruge dhe sa shtrenjtë privatizimi i saj nga Rama.

Më 28 mars, qytetarët e Kukësit njoftuan zhvillimin e një proteste të madhe më 31 mars, kundër vendosjes së tarifave për përdorimin e rrugës Milot-Morinë, si pjesë e një marrëveshjeje koncesionare që do t’i kushtojë taksapaguesve shqiptarë rreth 66 milionë euro. Tarifa për autoveturat prej 5 eurosh për një segment prej 115 km e bën autostradën Milot-Morinë më të shtrenjtën në Evropë. Kukësi, nga ana tjetër është rajoni më i varfër i Shqipërisë, e cila është po ashtu një nga shtetet më të varfëra të Evropës.
Në seancën plenare të një dite më pas, Kryeministri Rama iu përgjigj ashpër thirrjes për protestë, duke deklaruar se populli shqiptar është i pafuqishëm për “t’u ngritur”:
“Nuk mundet dot ju të bllokoni asgjë dhe të pengoni asgjë. Për më tepër, kur fillojnë ato kërcënimet, “shiko se do ngrihen këta dhe do ngrihen ata”. Kjo e ngritjes është “thirri, thirri të të ngrihet, ai i shkreti kokulur s’të përgjigjet dot”.
Deklaratat e Edi Ramës u komentua gjerësisht në median sociale.
Një protestë e parë, më e vogël në përmasa, u zhvillua më 30 mars, nga tregtarë dhe qytetarë, nga Kosova e Shqipëria. Tregtarët kundërshtuan vendosjen e tarifave dhe thanë se, në tregti do të ketë pasoja negative; rritje të shpenzimeve të tregtarëve dhe rritje të çmimeve për klientët.

Një ditë më vonë, të shtunën, më 31 mars, rreth orës 10:40, qindra protestues u mblodhën para kabinave me pagesë të ndërtuara në dalje të tunelit në “Rrugën e Kombit”, e vetmja rrugë funksionale që lidh rajonin verilindor të Shqipërisë me Kosovën dhe pjesën tjetër të vendit.
Forcat e policisë, me qëllim për të mbrojtur kabinat ku bëhen pagesat, godisnin me shkopinj gome këdo protestues që tentonte të afrohej. Protestuesit u përgjigjen, duke goditur me gurë drejt policëve, të cilët më pas u detyruan të tërhiqen. Rreth orës 11:30, protestuesit arritën të çanin kordonin e policisë dhe i vunë flakën kabinave.
Sipas ministrit të Brendshëm Fatmir Xhafaj, 12 oficerë policie, përfshirë drejtorin e Policisë së Kukësit, Parlat Vatoci, u plagosën. Ndërkohë deputeti i LSI Petrit Vasili, foli për më shumë se 100 protestues që ishin plagosur nga përleshjet me policinë.
Në 12:39, Kryeministri Edi Rama bëri deklaratën e parë për protestën, në Facebook, duke i akuzuar qytetarët për “dhunën barbare ndaj pronës së përbashkët”. Shumë nga komentuesit i kujtuan Kryeministrit se në të vërtetë ata po mbronin pronën publike kundër taksës abuzive të vendosur nga koncesionari privat, me mbështetjen e shtetit.

Forcat speciale u nisën nga Tirana për në Kukës dhe protestuesit u shpërndanë rreth orës 14:30. Në orën 14:38, Rama shkroi në Facebook se do të jepte një deklaratë të drejtpërdrejtë në orën 19:00 në kanalin televiziv të tij, ERTV.
Gjatë deklaratës, përpara kamerave ishte një Kryeministër i shqetësuar, që i merrej fryma dhe mezi ishte në gjendje të mbajë veten. Kryeministri, për herë të parë, përmendi se përdoruesit e shpeshtë të autostradës nga zonat aty pranë do të paguanin një çmim të reduktuar, ndonëse nuk përmendi asnjë shifër konkrete. Rama po ashtu, bëri dallimin mes “njerëzve të vërtetë” të Kukësit dhe “agjitatorëve nga Tirana”, të cilët me sa duket kishin udhëhequr protestën. Kryeministri gjithashtu i përjashtoi menjëherë nga partia të gjithë anëtarët e Këshillit Bashkiak të PS që mbështetën protestën.
Gjatë mesnatës së 1 prillit, 19 persona u arrestuan nga policia për pjesëmarrje në protestë. Gjatë ditës, më 1 prill, Avokati i Popullit deklaroi se arrestimet ishin bërë në mungesë të dokumenteve të rëndësishme, përfshirë edhe urdhër-arrestet dhe se shumë prej të burgosurve nuk ishin ushqyer ose ishin lënë pa ujë për më shumë se 12 orë.

Për më tepër, dokumentet ekzistuese mbi të cilët janë bërë arrestimet, përmbanin informacione të gabuara. Zyra e Prokurorisë, po ashtu, nuk ka mundur t’i vërtetojë Avokatit të Popullit se zotëron urdhrat origjinalë të arrestit.
Në median sociale dhe intervistat në rrugë, arrestimet e paligjshme në mesnatë u krahasuan me momentet më të errëta të diktaturës komuniste.
Në orën 11:00, ERTV transmetoi një konferencë të Kryeministrit Rama me gazetarët, nga ku Rama njoftoi se brenda 60 ditëve qeveria do të shpallë tarifat speciale për përdoruesit e shpeshtë, banorët e zonës dhe më pas, do të nisë një fushatë informacioni. Ai fajësoi “dezinformimin” dhe “manipulimin” nga media dhe opozita për ngjarjet e një dite më parë. Megjithatë, shumica e mediave shqiptare janë në duart e oligarkëve pranë Kryeministrit.
Ndërkohë, qytetarët dhe aktivistët e Shoqërisë Civile u mblodhën në drejtoritë e ndryshme policore në Tiranë, ku protestuesit e sjellë nga Kukësi, po mbahen të burgosur për akuza ende të panjohura. Shumë protestues, familjarë dhe miq të të burgosurve, qëndruan gjatë natës në Tiranë dhe protestat vazhduan dhe më 2 prill.
Më 2 prill, policia ngriti padi kundër 8 prej aktivistëve të Shoqërisë Civile që protestuan përpara stacioneve të policisë, për “zhvillim të protestave të paligjshme”. Një studiuese amerikane u arrestua, pasi po filmonte protestën.
Sot, më 3 prill, protestuesit nga Kukësi kanë seancën e parë të gjyqit në Gjykatën e Shkallës së Parë në Kukës.