Nasser al-Khelaifi ka udhëtuar për në Brazil për të takuar Neymar dhe shumë vetë e kanë interpretuar këtë udhëtim të pronarit të Paris SG si një takim për të diskutuar për të ardhmen e sulmuesit, që sipas gjasave mund të shkojë te Real Madrid vitin e ardhshëm, edhe në bazë të ndikimit të sponsorit teknik “Nike”. Al-Khelaifi do të përpiqet ta bindë Neymar të qëndrojë.
Ndërkohë, trajneri i PSG, Unai Emery, sqaroi: “Pas eliminimit nga Real Madrid do të duhet pak kohë që gjërat të kthehen në normalitet. Presidenti dhe Neymar do të kenë një takim miqësor në Paris dhe për mendimin tim është e qartë se klubi ynë ka një projekt solid që bazohet te Neymar. Al-Khelaifi dhe drejtori teknik Artero Henrique do t’i tregojnë Neymar se cilat janë planet tona për të ardhmen. Ai nuk do të largohet nga PSG”. PSG do të kthehet në fushë pasditen e së mërkurës dhe do të presë në shtëpi Angers, një ndeshje e vlefshme për javën e 31-të, por që do të luhet sot për shkak se Parisi do të luajë finalen e Kupës së Ligës kundër Monaco 31 marsin e ardhshëm, kur do të luhen edhe ndeshjet e javës së 31-të të kampionatit francez. Kryesuesit e Ligue 1 pritet të marrin tri pikët e radhës mbrëmjen e sotme duke parë se ata i kanë fituar të 15 ndeshjet e këtij kampionati që kanë luajtur në shtëpi me rezultatin e përgjithshëm 59 me 9. Skuadra e Emery kryeson me një avantazh prej 14 pikësh ndaj Monaco dhe ka shënuar 25 gola në 5 ndeshjet e fundit të kampionatit. Angers, nga ana tjetër, është në vendin e 14 të renditjes me 32 pikë, katër pikë larg zonës së rënies nga kategoria. Miqtë kanë marrë dy fitore dhe një barazim në tri ndeshjet e fundit që kanë luajtur në kampionat. Ata kanë humbur 35% të ndeshjeve të kampionatit që kanë luajtur në transfertë dhe, bashkë me Montpellier, janë skuadra që ka regjistruar më shumë barazime në ndeshjet e kampionatit të luajtura larg shtëpisë. Ndeshja e fazës së parë është mbyllur 5-0 në favor të Parisit.

Gianfranco Zola po mbështet ish-klubin e tij të mëparshëm për të bërë një surprizë kundër Barcelonës në Ligën e Kampionëve. Skuadra e drejtuar nga Antonio Conte udhëton për në “Camp Nou” me barazimin 1-1 të ndeshjes së parë të 1/8 finale të Ligës së Kampionëve, me synimin për t’u kualifikuar në çerekfinale, edhe pse goli i Lionel Messit në “Stamford Bridge” e vështirëson misionin e kampionëve të Anglisë në fuqi. Zola shënoi gol në fitoren 3-1 ndaj Barcelonës, në çerekfinalen e vitit 2000, përpara se gjigantët katalanas të përputheshin me atë rezultat në ndeshjen e dytë dhe të “kalonin lumin” në kohën shtesë. Këtë herë, Zola shpreson që Chelsea nuk do të vuajë aq shumë në “Camp Nou” dhe beson se Conte me lojtarët e tij mund t’ua bëjnë jetën të vështirë udhëheqësve të La Liga-s. “Nuk do të jetë e lehtë, duke luajtur në Barcelonë është një lojë e vështirë, por Chelsea është një ekip i fortë, me lojtarë të mirë, tha Zola për ‘Omnisport’. Unë mendoj se blutë mund të shkojnë atje dhe ta befasojnë Barcelonën, ata e kanë aftësinë ta bëjnë këtë. Chelsea ka llojin e lojtarëve që Barcelona nuk i pëlqen shumë, kështu që, sipas mendimit tim, është ende një lojë e hapur. Chelsea do të duhet të mbrohet mirë. Ndeshja e parë përfundoi 1-1, ndaj Barcelona do të përpiqet ta fitojë ndeshjen e kthimit, duke mos bazuar në avantazhin e golit larg fushe. Unë jam i sigurt se katalanasit do të duan të jenë të sigurtë me fitoren. Nëse Chelsea do të mbrohet më së miri, atëherë mund ta përdorë kundërsulmin, që di ta bëjë me të vërtetë mirë”.

Barcelona dhe Chelsea do të përballen mbrëmjen e së mërkurës në “Camp Nou” për të siguruar një vend në çerekfinalet e Champions League. Takimi i parë, i luajtur tri javë më parë në “Stamford Bridge”, është mbyllur në barazim 1-1, një rezultat që mban në lojë të dy skuadrat. Barcelona ka arritur në këtë fazë të Champions-it pa shumë vështirësi duke zënë vendin e parë në një grup ku përfshiheshin Juventus, Sporting dhe Olympiakos. Gerard Pique me shokë kanë pësuar vetëm një gol në gjashtë ndeshjet e luajtura në fazën e grupeve. Katalanasit kryesojnë në La Liga me një avantazh prej tetë pikësh ndaj Atletico Madrid dhe kanë siguruar një vend në finalen e Kupës së Mbretit. Kështu, Barça është në garë për të fituar gjithçka në këtë sezon. Gijgantët e futbollit spanjoll janë një nga ekipet favorite për të triumfuar në Europë, por të mëkurën do të kenë një pengesë të vështirë për të kaluar. Ata arritën të marrin një barazim në ndeshjen e parë dhe ajo që është edhe më e rëndësishme, shënuan një gol në transfertë, që mund të rezultojë vendimtar në fund. Skuadra e Antonio Conte nuk po kalon një moment të mirë në kampionat pas dy humbjeve të njëpasnjëshme të pësuara kundër dy ekipeve të Mançesterit. Gjithsesi, në javën e fundit të kampionatit ata kanë marrë një fitore 2-1 në shtëpi kundër Crystal Palace. Aktualisht, londinezët janë jashtë zonës Champion në Premier League, katër pikë larg vendit të katërt që mbahet nga Liverpool. Ecuria e tyre në Europë ka qenë pozitive deri në këtë moment, por për të siguruar një vend mes tetë më të mirave të Europës ata duhet të shënojnë në “Camp Nou”, një gjë aspak e lehtë për t’u realizuar.

Cristiano Ronaldo do të shpërblehet me një kontratë të re nga Real Madrid, pasi ka shkëlqyer në këtë fillim viti kalendarik. “Ylli” i Real ka një kontratë deri në vitin 2021, por kohët e fundit kanë qarkulluar zëra se do të largohet nga “Bernabeu” duke shtuar hipotezat për një rikthim te Manchester United. Gjithsesi, 33-vjeçari që ka shënuar 17 gola në 12 ndeshjet e fundit, ka bindur presidentin “merengues” Perez për t’i ofruar një kontratë të re, më “luksoze” në historinë e futbollit. Sipas “Mundo Deportivo”, presidenti Florentino Perez i ka propozuar portugezit ta mbyllë karrierën te Real Madrid. Me këtë marrëveshje, ai do të bëhet më i paguar se Lionel Messi dhe Neymar. Në janar, në bazë të renditjes së “Marca”, Ronaldo është lojtari i gjashtë më i paguar i planetit, me Messi në vend të parë që merr 45.7 milionë euro në sezon, Neymar 38 milionë euro në sezon dhe dy futbollistët që luajnë në kampionatin kinez Ezequiel Lavezzi (29 milionë euro) dhe Oscar (26 milionë euro). Me kontratën e re, Ronaldo do të marrë 47 milionë euro në sezon për tre vitet e ardhshme, derisa të jetë 36 vjeç dhe të mendojë për të ardhmen e tij. Mes 10 futbollistëve më të paguar të planetit janë edhe Hulk, Kylian Mbappe, Paul Pogba e Graziano Pelle. Ronaldo kishte shënuar vetëm 13 gola para Krishtlindjeve, duke ngjallur dyshime për formën e tij, por që nga ajo ditë ai ka shënuar 20 gola në të gjitha veprimtaritë për ekipin e drejtuar nga Zinedine Zidane.

Mario Balotelli ka konfirmuar se e do ekipin kombëtar dhe do të shkonte me vrap, por nuk e di nëse trajneri i përkohshëm Di Biagio do ta telefonojë. Sulmuesi i Nice nuk ka luajtur me Italinë që prej Kupës së Botës 2014 dhe është grumbulluar vetëm një herë nga Antonio Conte dhe asnjëherë nga Ventura. “Nuk di asgjë, por nëse më telefonojnë do të kisha shumë dëshirë të luaja sërish për kombëtaren, por siç e thashë nuk di asgjë”, shprehet Balotelli për “Tiki Taka”. Balotelli-t i skadon kontrata me Nice në fund të sezonit, dhe është pyetur se ku do të luajë sezonin e ardhshëm. “Akoma nuk kam vendosur asgjë. Ligue 1 është më fizike, ndërsa Serie A më taktike”. “Kam gjetur qetësi shpirtërore me një person. Sekreti është shtëpia, pastaj në vitet e fundit kam pasur probleme fizike, të cilat nuk i kam më”. “Kjo më ka përmirësuar”.

Mesfushori i Barcelonës, Sergio Busquets, përballë mediave në konferencën për shtyp, në vigjilje të sfidës së skuadrës katalanase ndaj Chelseas, e vlefshme për takimin e dytë të të tetave të Champions League, foli ndër të tjera edhe për deklaratat shokuese të shokut të tij të skuadrës, André Gomes, në lidhje me përshtatjen e vështirë te klubi blaugrana. “Ne dimë diçka, por jo në këtë pikë, sepse është një çështje shumë personale. Ne kemi tentuar që ta ndihmojmë atë aq sa ka qenë e mundur, si një hobi ne duhet të bëjmë një hap përpara dhe të jemi më pozitivë. Sipas meje Andre është gati të luajë. Unë e shoh atë në stërvitje, duke punuar maksimalisht, pastaj ndodh ajo që nuk është e mirë për askënd dhe merr problemin me vete në shtëpi. Të gjithëve na ndodh. Kjo nuk i ka ndodhur vetëm atij, por të gjithëve”, deklaroi Busquets.

Drejtori ekzekutiv i Manchester City, spanjolli Ferran Soriano, deklaroi se nuk ka asnjë shans që klubi i tij të blejë yllin argjentinas, Lionel Messi, të cilin e takoi kur ishte menaxher i Barcelonës. “Nuk ka shanse për të blerë atë. Unë e njoh mirë Leon dhe familjen e tij dhe di që ata janë mirë në Barcelonë, që është vendi ku ai duhet të jetë. Ne do të bëjmë rrugëtimin tonë pa atë, ndonëse do të jetë më e vështirë, sepse ai është futbollisti më i mirë në historinë e futbollit”, deklaroi Soriano në një intervistë të dhënë në Buenos Aires. “Një rregull që kemi diktuar është që të mos marrim vendime pas gëzimit, ose mërzisë së përjetuar në fushën e lojës. Nëse kombinohet puna dhe vizioni afatgjatë, gjërat do të shkojnë mirë. Messi është një gjeni dhe futbollisti më i mirë në historinë e futbollit. Messi ndryshon gjithçka”, deklaroi Soriano. Soriano ishte zëvendëspresident ekonomik i Barcelonës në vitet 2003-2008, periudhë gjatë të cilës bashkëpunoi me Messin dhe Josep Guardiolan, trajnerin aktual të Manchester City, shok dhe koleg. “Sekreti më i madh i Guardiolas është puna, ai punon më shumë se çdokush tjetër. Ndonjëherë njerëzit mendojnë se ai është një gjeni dhe ai është një punëtor i madh. Ai e di që futbolli është i paskrupullt dhe kur relaksohesh, atëherë pëson katër gola”, tregoi Soriano.