Forcat qeveritare siriane kanë bërë përparime të reja territoriale në pjesën lindore të qytetit të Gutës, që kontrollohet nga forcat e opozitës, duke shkëputur dy qytete nga bastioni i Ushtrisë së Lirë Siriane. Më shumë se 1,100 civilë janë vrarë nga luftimet në tre javët e fundit, mes njoftimeve se qeveria ka rifilluar përdorimin e një gazi helmues, ndoshta me mbështetjen e heshtur të aleatit të saj, Rusisë. Forcat qeveritare siriane përparuan më tej në Gutën Lindore të dielën, duke pushtuar një qytet tjetër të zonës së kontrolluar nga forcat e opozitës. Tanket qeveritare hynë në Mudeira me ndihmën e bombardimeve të rënda. Qeveria e Sirisë, e mbështetur nga Rusia, thotë se ofensiva është e nevojshme për të ndalur sulmet e rebelëve ndaj civilëve në Damask. “Ne hapëm zjarr para se të sulmonim pozicionet e grupeve të armatosura dhe bastionin e tyre, dhe pastaj forcat tona të këmbësorisë sulmuan pozicionet e tyre dhe përparuan disa kilometra”. Hyrja e forcave qeveritare në Mudeira të dielën, një ditë pas pushtimit të Mesrabas, ka shkaktuar një çarje të thellë në bastionin e forcave të opozitës pranë Damaskut. Kryengritësit e Ushtrisë së Lirë Siriane thanë të shtunën se nuk do të tërhiqen dhe nuk do të dorëzohen.

Më shumë se 1100 civilë janë vrarë në këtë zonë gjatë tre javëve të fundit. Ka patur njoftime se qeveria siriane, e mbështetur nga Rusia, ka përdorur gaz helmues në luftime.
Sekretari amerikan i Mbrojtjes, James Mattis, paralajmëroi presidentin sirian Bashar al-Assad dhe Rusinë kundër përdorimit të gazit. “Rusia ishte garantuese e marrëveshjes, sipas së cilës Assadi duhet t’i eliminonte të gjitha armët kimike. Rusia ose është e paaftë ose po bashkëpunon me Assadin. Ka njoftime të shumta për përdorimin e gazit klorik ose për simptoma që mund të rezultojnë nga gazet e klorit”. Mattis nuk tha nëse Shtetet e Bashkuara do t’u kundërvihen forcave siriane, nëse konfirmohen njoftimet për një sulm me gaz klorik. Por ai theksoi se, Presidenti Donald Trump kishte “hapësirë të plotë manovrimi politik” për të ndërmarrë veprime që ai mendon se do të ishin të përshtatshme.
“Vende të tjera perëndimore, që kanë qenë në kontakt me ne, po e ndjekin nga afër gjendjen dhe kanë qëndrime të njëjta me ne për këtë çështje”. Sekretari Mattis tha se, nuk ka dëshmi se në Guta është përdorur gazi klorik, por vuri në dukje se Rusia kishte ndërhyrë për të shpërbërë Mekanizmin e Përbashkët Hetimor, një ekip i Kombeve të Bashkuara që mund të vërtetonte nëse është përdorur gaz helmues.

Kryeministri japonez Shinzo Abe kërkoi falje, pasi Ministria e Financave pranoi se kishte ndryshuar dokumentat që lidheshin me një skandal nepotizmi. Dokumentat kishin të bënin me shitjen e një toke në pronësi të shtetit një shkolle private me të cilën ka lidhje bashkëshortja e zotit Abe, me një ulje të konsiderueshme çmimi. Ministria e Financave konfirmoi se, dokumenta zyrtare ishin ndryshuar, duke hequr emrat e zotit Abe dhe gruas së tij, Akie. Zoti Abe tha se ndjehej përgjegjës. “Kjo është një situatë që ka tronditur besimin tek e gjithë qeveria. Dhe si kreu i saj, unë ndjej përgjegjësi. Do të doja t’u kërkoj thellësisht ndjesë të gjithë qytetarëve”. Zoti Abe u tha gazetarëve se donte që ministri i Financave, Taro Aso të sqaronte faktet: “Për të zbuluar se pse ndodhi kjo dhe për të qartësuar gjithçka, ne do të vazhdojmë hetimin tonë. Shpresoj që ministri i Financave Aso të përmbushë përgjegjësitë e tij”. Zoti Aso po përballet me thirrjet për të dhënë dorëheqjen. Ai kërkoi falje në emër të Ministrisë, por përsëriti se nuk do të jepte dorëheqjen. Mbijetesa e tij politike është thelbësore për ambicjet e zotit Abe për një mandat të tretë. Popullariteti i tij u godit rëndë për këtë çështje, gjë që ishte e dukshme edhe në një anketë këtë muaj. Dokumentat nga të cilët ishin hequr emrat e zotit Abe dhe bashkëshortes së tij, kishin të bënin me shitjen e një toke shtetërore një çmim jashtëzakonisht të ulur, një shkolle private me të cilën ka lidhje gruaja e kryeministrit. Drejtori i shkollës dhe e shoqja u arrestuan në korrik, nën dyshimet se kishin marrë subvencione të paligjshme. Zoti Abe ka mohuar vazhdimisht që të ketë favorizuar shkollën dhe ka thënë se do të japë dorëheqjen, nëse provat tregojnë të kundërtën.

Mbretëria e Bashkuar “do të pendohet” për largimin nga Bashkimi Evropian, tha presidenti i Komisionit Evropian, Jean-Claude Juncker. Duke iu adresuar Parlamentit Evropian në Strasburg, Juncker tha se negociatat për Brexit-in tashmë janë bërë urgjente.
Ai tha se nuk dëshiron që qytetarët e BE-së “të bien viktimë e Brexit-it” dhe shtoi se është e rëndësishme që të sigurohen të drejtat e tyre. “Unë do të doja më shumë që Britania të mos kishte vendosur për t’u larguar nga BE-ja, por secili që e lë BE-në duhet të dijë se çfarë do të thotë kjo. Nëse vendosni të ikni, t’i lini prapa rregullat dhe marrëveshjet e përbashkëta, atëherë duhet të pranoni se gjërat nuk mund të mbeten ashtu siç janë”, tha Juncker. Ai po ashtu i kërkoi kryeministres britanike, Theresa May, të japë “më shumë qartësi se si Mbretëria e Bashkuar e sheh marrëdhënien e saj të ardhshme me BE-në”. Britania duhet të largohet nga Bashkimi Evropian deri në mars të vitit 2019. Ajo e ka marrë këtë vendim në një referendum të mbajtur në vitin 2016. Ritmi i negociatave midis Britanisë dhe BE-së ka ngecur për shkak të tregtisë dhe Irlandës Veriore.

Marrëveshja për shënjimin e vijës kufitare me Malin e Zi do të ratifikohet gjatë kësaj jave, ka thënë zëvendëskryeministri i Kosovës, Behgjet Pacolli. “Jemi lodhur me deklaratat e politikanëve ‘sot, nesër’. Unë ju kam thënë, në javën e dytë të marsit, që moti. Java e dytë e marsit do të jetë java kur do të kalojë, do të miratohet Marrëveshja për Demarkacionin me Malin e Zi”, ka thënë Pacolli. Megjithatë, ai nuk ka sqaruar nëse për ratifikimin e kësaj marrëveshje është arritur ndonjë pajtim me partneren e koalicionit qeverisës, Listën Serbe. Kjo e fundit, më herët ka thënë se çështja e Demarkacionit nuk ekziston për këtë subjekt dhe për të nuk paraqet kurrëfarë interesi.

Në Uashington po flitet shumë për atë që mund të jetë zhvillimi më i madh diplomatik i dekadës së fundit, një takim i mundshëm mes Presidentit Donald Trump dhe udhëheqësit të Koresë së Veriut, Kim Jong Un. Siç na njeh edhe materiali në vazhdim, pothuajse nuk ka asnjë të dhënë konkrete mbi takimin, i cili u njoftua pa paralajmërim javën e shkuar, duke befasuar të gjithë botën. Pas muajsh përçmimi ndaj udhëheqësit të Phenianit, Presidenti Trump është mbuluar nga shkëlqimi i një “rrufeje diplomatike” lidhur me programin bërthamor të Koresë së Veriut. “Shumë njerëz menduan se po shkonim në luftë. Papritur, ofrohen për të zhvilluar një takim. Nuk ka lëshim raketash dhe ata duan të heqin dorë nga armët bërthamore”, u shpreh presidenti amerikan. “Do të vendoset për vendin dhe kohën e takimit. Nuk kemi të dhëna të tjera”, tha zëdhënësi i Shtëpisë së Bardhë, Raj Shah në një intervistë për emisionin “THIS WEEK” në stacionin televiziv ABC. Takimi Trump-Kim është në fazat e hershme të planifikimit, thotë zoti Shah. “Është rënë dakord për këtë takim të mundshëm. Nuk po përcaktohen kushte të tjera. Ata nuk mund të zhvillojnë prova me raketa apo prova bërthamore, nuk mund të kundërshtojnë publikisht manovrat e planifikuara ushatarake mes Shteteve të Bashkuara dhe Koresë së Jugut”. Në mënyrë të përsëritur, Presidenti Trump ka akuzuar paraardhësit e tij se dështuan për të trajtuar në mënyrë efikase kërcënimin bërthamor nga Pheniani. Një këshilltar i lartë i ish-administratës së Presidentit Obama, Ben Rhodes, e shikon me mosbesim takimin për të cilin thotë se mund të ketë përfitime ose humbje të mëdha.

“Është ekstreme të mendosh se Pheniani do të pajtohet të heqë dorë nga raketat dhe armët bërthamore brenda një takimi. Nuk mendoj që dikush që e shikon rastin do ta besojë këtë. Nuk duhet nxituar që situata të trajtohet siç duhet. Sepse, nëse gjithçka bazohet tek një takim dhe takimi dështon, rreziku i konfliktit do të rritej”. Vetë presidenti amerikan zotëron taktikën e pritjes. “Nuk dihet çfarë do të ndodhë. Mund ti jap fund takimit menjëherë ose mund të arrijmë marrëveshjen më të mirë për botën dhe për të gjitha vendet, përfshi Korenë e Veriut. Shpresoj të ndodhë kjo”. Ligjvënësit amerikanë nga të dy krahët e politikës kanë shprehur mosbesim të thellë lidhur me qëllimet e Phenianit. Shumë thonë se mundësia e një zgjidhje diplomatike për një sfidë të ndërlikuar bërthamore është shumë joshëse për ta refuzuar.

Koreja e Jugut vlerëson rolin e Kinës
Këshilltari i Koresë së Jugut për Sigurinë Kombëtare vlerësoi Kinën për rolin që ka luajtur për të nxitur Phenianin drejt bisedimeve të reja për çarmatim bërthamor. Takimi i Chung Eui-yong-ut me këshilltarin më të lartë për Politikën e Jashtme të Kinës, Yang Jiechi pason njoftimin e javës së kaluar për një takim mes Presidentit amerikan Donald Trump dhe udhëheqësit të Koresë së Veriut, Kim Jong Un. “Presidenti Moon Jae-in dhe qeveria e Koresë së Jugut besojnë se, përparimet drejt arritjes së qëllimit për paqe dhe çarmatim bërthamor të Gadishullit Korean janë arritur me mbështetjen aktive dhe kontributin e presidentit Xi Jinping dhe qeverisë kineze”, tha Chung. Zoti Yang përsëriti qëndrimin e Kinës për një gadishull pa armë bërthamore dhe zgjidhje të problemeve nëpërmjet dialogut. Të dielën zyrtarët amerikanë deklaruan se nuk do të bëjnë lëshime ndaj Koresë së Veriut përpara takimit Trump-Kim dhe se do të vazhdojnë të ushtrojnë presion ndaj Phenianit. “Nuk duhet gabuar, ndërsa këto negociatat janë në proces, nuk do të bëhet asnjë lëshim”, tha drejtori i Agjencisë Qendrore të Zbulimit, Mike Pompeo për “Fox News Sunday”.

Zoti Pompeo tha se udhëheqësi i Koresë së Veriut duhet të: “vazhdojë të na lejojë të kryejmë stërvitjet e nevojshme ushtarake me Korenë e Jugut dhe të sigurojë që në tryezën e bisedimeve të jetë diskutimi lidhur me çarmatimin bërthamor të ushtrisë së tij”.
Në të kaluarën, zoti Trump është tallur me mundësinë e bisedimeve të drejtpërdrejta me Korenë e Veriut. Në tetor të vitit të kaluar ai i tha Sekretarit të Shtetit, Rex Tillerson se po “humbiste kohë”, duke konsideruar mundësinë e negociatave. Por të shtunën zoti Trump vuri në dukje rëndësinë historike që do të kishte pranimi nga ana e tij të ofertës së udhëheqësit të Phenianit për t’u takuar. I pyetur se çfarë mund të arrijë zoti Trump, duke zbutur qëndrimet ndaj udhëheqësit të Phenianit, senatori republikan Ron Johnson nga Wisconsi i tha CNN të dielën “jo shumë”. Një kundërshtare politike e zotit Trump, senatorja demokrate Elizabeth Warren e Masaçusetsit, tha për televizionin NBC se, “dua të shoh presidentin tonë të shënojë sukses, sepse nëse ai ia del, Amerika shënon sukses dhe bota është më e sigurt. Por druhem se Pheniani do ta përdori për qëllimet e veta”.

Marrëveshja e koalicionit qeveritar mes CDU/CSU dhe SPD u nënshkrua. Kancelarja e lëvdoi marrëveshjen në ceremoninë e nënshkrimit. Krerët e partive dhe të grupeve parlamentare të CDU dhe CSU dhe SPD nënshkruan në Berlin marrëveshjen prej 177 faqesh për programin e tyre të ardhshëm qeveritar. Në ceremoninë përkatëse në ndërtesën Paul-Löbe-Haus të Bundestagut, kancelarja tha se marrëveshja e koalicionit u përgjigjet si duhet sfidave të kohës dhe ofron zgjidhje. Përpjekja për marrëveshjen ia vlejti, edhe në frymën e respektit për njëri-tjetrin. Marrëveshja parashikon përmirësime konkrete për njerëzit dhe njëkohësisht mban parasysh të ardhmen, shtoi ajo. Ministri i caktuar i Financave dhe zëvendëskancelari, socialdemokrati Olaf Scholz theksoi se, koalicioni i madh duhet të mbajë parasysh preokupimin për ta mbajtur të bashkuar shoqërinë. Ai shtoi më tej se është një sinjal i mirë që politika ndaj Evropës luan një rol kaq të madh në marrëveshjen e koalicionit. Për CSU-në, kryetari i partisë Horst Seehofer theksoi se, marrëveshja e koalicionit mban parasysh njerëzit me pak të ardhura. Dokumenti ka përmbajtje të fortë, tha ai. Tani rëndësi ka që ai të zbatohet me frymën e duhur dhe me ritëm. Më parë, kryetarët e partive patën theksuar se duan të përpiqen për një përafrim të kushteve të jetesës në Gjermani. Mirëqenia duhet të mbërrijë tek të gjithë njerëzit, tha Merkeli. Të mërkurën, në Bundestag do të hidhet në votë zgjedhja e Angela Merkelit si kancelare e Gjermanisë. Pas kësaj, pritet që qeveria e re të bëjë betimin.