Banorët e nëntë fshatrave të Topojanit dhe Shishtavecit, protestojnë kundër vendimit të qeverisë për ndërtimin e 5 HEC-ve në këta zona. Banorët thonë se, ndërtimi i tyre do të thoshte shkatërrim për mjedisin dhe ekosistemin e zonës.Banorët kërkojnë që qeveria të anulojë vendimin për ndërtimimin e tyre në rast të kundërt, paralajmërojnë përshkallëzim të protestave. Banorët kërkojnë dhe ndihmën e prefektit të Kukësit, Zenel Kuçana.“Nuk është marrë mendimi i këtyre njerëzve. A është marrë mendimi apo jo? Jo! Jo!”, u shprehën banorët.
Zona ku është dhënë leja për hidrocentralet është Park Natyror dhe përfshin ekosistemin malor Korab-Koricnik, ndaj banorët e këtyre zonave paralajmërojnë kundërshtim të ashpër të projekteve. “Ato centrale nuk mund t’i bëjë, sepse zona jonë është zona më e varfër ekonomikisht. Shyqyr që na ka dhënë atë pasuri, atë ujë që të jetojë populli dhe ata duan të na e vjedhin. Kjo nuk është e drejtë e qeverisë”, tha një banor.
Banorët thanë se nuk do t’i ndalin protestat. “Sot protesta paqësore, nesër mund të degradojnë se e kanë të ligjshme mbrojtjen e bukës së fëmijëve të tyre”, thanë banorët. “Ka dalë i gjithë populli i kësaj zone për politikat e hajdutëve dhe keqbërësve që janë bërë në kundërshtim me rregullat ndërkombëtare të devijimit të lumenjve dhe prishjen e ekosistemit. Të mos marrë asnjë guxim që të vendosë hidrocentral në këtë zonë. Jemi të vendosur ta mbrojmë këtë zonë deri në vdekje”, thonë banorët.

Berat, banorët bllokojnë rrugën

Në Berat, punonjësit e firmave që nxjerrin dhe përpunojnë gur në malin e Tomorrit bllokuan rrugën nacionale, që të çon drejt Skraparit, duke kundërshtuar vendimin e Ministrisë së Mjedisit për bllokim të aktivitetit. “Bëhet fjalë për 10 000 frymë që janë të lidhura me gurin”, tha një banor.
Banorët kërkojnë zgjidhje me argumentin se janë pa bukë, ndërsa pronarët kërkojnë përgjigje për lejet mjedisore. “Nëqoftëse ajo nuk bëhet, të vijnë të na thonë nuk bëhet, të na çojnë në një vend tjetër, këtë po kërkojmë ne”, u shpreh një banor tjetër.
Nga mali i Tomorrit, Klosi deklaroi në fillim të këtij viti se do t’i jepej fund krimit mjedisor në këtë pasuri kombëtare, deklaratë i cila pezulloi nga puna të 12 firmat që ushtronin aktivitetin.

Banorët në Zharrëz protestë për dëmshpërblimet e banesave

Banorët e Zharrëzës në Fier kanë dalë sot në protestë për mos shlyerjen e dëmshpërblimeve për banesat, të cilat si pasojë e dëmtimeve tashmë janë të pabanueshme. Banesat e tyre janë dëmtuar si pasojë e shpërthimeve nga kërkimet për naftë. Banorët thonë se ata janë shlyer 25-30% e vlerës së dëmit. “Edhe pse kemi bërë shkresë të herë pas hershme nuk kemi marrë asnjë përgjigje”, thanë banorët.
Problemet kanë filluar që dhjetë vjet më parë. Gjendja e shtëpive sipas banorëve është shumë e rënduar si pasojë e shpërthimeve të shpeshta nëntokësore, ndërsa procesi i dëmshpërblimit që nisi një vit më parë, nuk ka përfunduar ende.
Sipas një vendimi të qeverisë duhej të krijohej një fond prej 1.5 milionë dollarë për dëmshpërblimin e familjeve, nga të cilat 900 mijë dollarë qeveria ia ngarkoi Bankersit dhe 600 mijë të tjera u morën përsipër nga buxheti i shtetit. Deri tani banorët kanë marrë vetëm paratë e dhëna nga qeveria.
Banorët thonë se do të përshkallëzojnë protestat e tyre në rast se, shqetësimi i tyre nuk do të gjejë zgjidhje. “Top Channel” kontaktoi kompaninë Bankers, që përsëriti qëndrimin e njohur të saj se, asnjë nga operacionet e Bankers nuk shkakton lëkundje apo tërmet, prej të cilit janë dëmtuar shtëpitë e komuniteteve rreth fushës së naftës Patos-Marinzë.

Efektivët e Policisë Rrugore të Tiranës, që u kërkojnë qytetarëve çdo ditë të respektojnë rregullat e qarkullimit, nuk i njohin ato vetë ose në rastin më të keq i njohin, por nuk i zbatojnë. Një autoambulancë është e bllokuar në trafik në unazë në Bulevardin “Dëshmorët e Kombit”, në semaforin para bulevardit dhe njofton përmes sinjaleve të ndezur se ka një urgjencë. Por efektivët e Policisë Rrugore, edhe pse e konstatojnë këtë, e mbajnë të bllokuar, sepse po mbajnë të lirë bulevardin për disa minuta me radhë, për shkak se aty do të kalojë një delegacion. “Siç shikohet nga kjo video, polici i ka dhënë përparësi një delegacioni, duke bllokuar autoambulancën”.
Por si duhet të vepronte polici rrugor në këtë rast? Çfarë parashikon Kodi Rrugor? Kujt duhej t’i jepte përparësi, ambulancës apo eskortës? Ekspertët rrugorë që shikojnë këtë situatë thonë se, gabimet e policit janë të shumta. Veç pandjeshmërisë që kanë për rastin e urgjencës dhe faktit që me bllokimin e autoambulancës vënë në rrezik jetën e një qytetari, kjo sjellje e këtyre efektivëve është antiligjore, siç argumentojnë ekspertët. Për më tepër, ajo vë në dyshim të gjithë veprimet e tyre dhe trupës së Policisë Rrugore dhe i bën ata të besueshëm përballe qytetarëve, të cilëve u duhet t’u kërkojnë të respektojnë rregullat e qarkullimit apo t’i ndëshkojnë me gjoba në rast të shkeljes së tyre.

Vetëm në 21 ditët e para të muajit shkurt kanë humbur jetën nga aksidentet rrugore 14 persona. Ky numër është më i lartë se ai i viktimave nga aksidentet gjatë gjithë muajit janar në vendin tonë. 14 persona kanë humbur jetën nga aksidentet rrugore në të gjithë vendin deri më datë 21 shkurt.
ABC News ka mësuar nga Drejtoria e Policisë Rrugore, numri më i madh i viktimave u shkaktuan nga 10 aksidente të rënda, vetëm në një ndër to që ndodhi të dielën e kaluar në aksin Shkodër-Velipojë, humbën jetën katër pjesëtarë të familjes Preka.
Shifrat e viktimave nga aksidentet në këtë fillim të 2018-ës kanë pasur tendencë rritjeje. Muaji shkurt nuk është mbyllur ende, por në 21 ditë të tij kanë humbur jetën nga aksidentet automobilistike 14 persona, ose 1 më shumë se viktimat e gjithë muajit janar.

Në 21 ditët e para të shkurtit, sipas Policisë Rrugore në gjithë territorin e Shqipërisë kanë ndodhur 140 aksidente rrugore. Numri i të plagosurve ishte 144 persona, 84 prej tyre në gjendje të rëndë, të cilët pasi kanë marrë mjekim në spital, ndodhen jashtë rrezikut për jetën.
Nga hetimet paraprake, sipas specialistëve të Policisë Rrugore ka rezultuar se shkaktar i aksidenteve kanë qenë dy faktorë kryesorë. E para, lidhet me shpejtësinë tej normave të lëvizjes së drejtuesve të automjeteve në rrugë, ndërsa faktori i dytë që ka rritur numrin e viktimave në rrugë është mungesa e infrastrukturës rrugore si edhe prania e akullit në rrugë.

Një ngjarje e rëndë ndodhi gjatë stërvitjes së skuadrës së “Vllaznisë”, kur trajneri Ernest Gjoka ishte objekt i një sulmi fizik me armë të ftohtë, fatmirësisht pa pasoja. Një person i armatosur me një thikë tentoi të godiste teknikun e skuadrës shkodrane, por Gjoka u shmang, duke evituar agresionin, që mund të rezultonte fatal për jetën e tij.
Më parë, agresori rreth 26 vjeç e kishte qëlluar trajnerin Gjoka me grusht nga pas. Policia erdhi menjëherë në fushën sportive “Reshit Rusi”, por pa mundur të arrestojë autorin e sulmit, ndërsa janë marrë në pyetje edhe 3 persona, si të dyshuar për lidhje me ngjarjen.
Trajneri Ernest Gjoka shkoi në Komisariatin e Shkodrës për të dhënë dëshminë e tij, në lidhje me konflikte të mundshme që mund të ketë.
Mësohet se në muajin dhjetor, trajneri Gjoka ka kërkuar praninë e policisë në stërvitjet e “Vllaznisë”, por nuk dihet nëse kjo është bërë për konflikte personale, apo për të vendosur rregull te tifozët. Për ngjarjen e rëndë reaguan edhe Bashkia e Shkodrës dhe drejtues të Klubit të Futbollit “Vllaznia”.

Bashkia e Shkodres dhe KF “Vllaznia” janë njohur me ngjarjen e rëndë të ndodhur pasditen e sotme në Fushën e Lëkurave, ku pas stërvitjes është goditur dhe kërcënuar me jetë traineri i ekipit të parë Ernest Gjoka.
Menjëherë, trajneri Gjoka, drejtuesit e Bashkisë dhe të Klubit, kanë komunikuar me Policinë e Shtetit, duke i vënë në dijeni për ngjarjen si dhe duke u kërkuar zbardhjen e plotë të saj dhe arrestimin e agresorit.
Ky akt i turpshëm, i cili nuk ka lidhje me qytetarinë e spikatur shkodrane, dënohet me vendosmërinë më të madhe nga ana e Bashkisë, Klubit, stafit drejtues-teknik dhe futbollistëve. Nuk përjashtojmë mundësinë e një prapavije të qëllimtë, ndoshta edhe të sponsorizuar, por që mbetet në duart e organeve kompetente që të zbardhet plotësisht.
Aktin e goditjes dhe të kërcënimit me jetë me armë të ftohtë- thikë të trajnerit Gjoka, futbollistët, stafi teknik dhe drejtues i KF “Vllaznia”, Bashkia e Shkodrës dhe tifozët e shumtë e konsiderojnë si goditje të qëllimshme, të mirëmenduar të dikujt/disave që duan të dëmtojnë“Vllazninë” në momentin e saj ndoshta më të mirë.
Në këto kushte Klubi dhe Bashkia e Shkodrës do t’i kërkojnë FSHF-së shtyrjen e takimit me Luftëtarin në Gjirokastër në një datë tjetër.

23-vjeçarja Elena Avdillari, banuese në Tiranë, por me origjinë nga Korça, humbi jetën në një aksident tragjik mesnatën e të mërkurës bashkë me shoferin e taksisë. 23-vjeçarja po kthehej nga Porti i Durrësit. Ajo do të nisej me traget drejt Italisë, por për shkak të dokumentacioneve të munguara, uniformat blu në port e kishin kthyer mbrapsh. Kështu, ajo mori taksinë për t’u kthyer në Kombinat, ku edhe kishte banesën, por fatkeqësisht nuk arriti dot të shkonte më kurrë. Aksidenti fatal i mori jetën asaj dhe taksistit nga Durrësi, Bujar Agalliu 60 vjeç.
Aksidenti i rëndë ndodhi pak para mesnatës së të mërkurës. Sipas policisë, makina tip “Benz” me targa AA 060 SP është përplasur me mjetin Taksi me targa DR 475 TX. Kjo e fundi për të devijuar është futur në një karburant. Në sediljen e parë të mjetit tip “Benz” janë gjetur dhe njolla gjaku.
Në sediljen ku ishte ulur 23-vjeçarja nga Tirana u gjet një biletë udhëtimi për në Itali. Por Policia Kufitare e Durrësit konfirmoi se Elena Avdillari nuk ishte paraqitur në port për të kryer veprime.
Elena Abdillari ka bërë check-in mbrëmjen e së mërkurës në Portin e Durrësit rreth orës 21:00, por është kthyer nga Policia Kufitare, me motivacionin e mosplotësimit të dokumentacioneve. Sipas të dhënave konfidenciale, Elena rezulton person me lëvizje të herë pas hershme nëpërmjet pikave të ndryshme kufitare të vendit. Po ashtu, rezulton person që është kthyer shumë shpesh nga thyerja e dokumenteve për leje qendrimi sipas marrëveshjeve Schengen.

Elena ka hyrë dhe dalë vetëm këtë vit 4 herë jashtë vendit, ndërsa herën e fundit që nuk është lejuar të dalë jashtë vendit nga pika kuftare e Rinasit më 10 janar 2018.
Ndërsa personi i shpallur në kërkim, është shtetasi Dardan Gjekaj 24 vjeç banues në Shkodër, po ashtu rezulton shtetas me hyrje dhe dalje të shpeshta jashtë vendit nëpërmjet pikës kufitare Hani i Hotit, që përkojnë me të njëjtat data të viktimës.
Aksidenti rrugor me dy viktima që ndodhi mbrëmë në mesantë pranë Maminasit sipas hetuesve mund të jetë shkaktuar me qëllim nga i riu që ndodhej në “Benz”-in që përplasi taksinë. Sipas burimeve policore, pas aksidentit drejtuesi i automjetit, gjendja shëndetësore e të cilit nuk dihet, është larguar nga vendngjarja dhe nga një person tjetër. Sipas deklaratës për shtyp të policisë në mjetin tip “Benz” me targa AA060 SP, patrulla që mbërriti në vendnngjarje nuk gjeti asnjë person.
Hetuesit flasin për një aksident të qëllimshëm, ku drejtuesi i mjetit që e shkaktoi atë mund të ketë pasur njohje me 23-vjeçaren.
Policia dyshon se, në momentin që 23-vjeçarja është larguar me taksi në drejtim të Tiranës, është ndjekur nga automjeti tip “Benz”. Në pamundësi për të ndaluar taksinë, mendohet se i riu që ndodhej në timon e ka goditur atë nga pas, duke shkaktuar edhe aksidentin fatal.

Gjykata e Apelit Tiranës konfirmoi masën e sigurisë “arrest në burg” të dhënë nga Shkalla e Parë për Efthimious Efthimiou. 41-vjeçari grek dyshohet të jetë ekzekutori i Devi Kasmit, ngjarje e ndodhur mbrëmjen e 29 janarit pranë Spitalit të Fëmijëve në Tiranë.
Në seancën e së enjtes, togat e zeza të Apelit refuzuan kërkesën e tij për zbutje të masës së sigurisë. Efthimiou nuk ishte i pranishëm në sallën e gjyqit, ku u përfaqësua nga avokati i tij, Saimir Vishaj. Para treshes gjykuese, avokati mohoi përfshirjen e klientit të tij në ngjarje, si edhe pretendoi mungesë provash nga ana e Prokurorisë.
Kundër këtij qëndrimi ishte prokurori, i cili tha se hetimi ishte në vazhdim dhe se nuk kishte ndryshuar asnjë rrethanë që mund të sillte nevojën e ndryshimit të masës së sigurisë.

Në të njëjtën seancë, Apeli la të pandryshuar masën e sigurisë edhe për Elton Halipajn dhe Elton Hoxhallarin, të dyshuar si bashkëpunëtorë në vrasje. Burime pranë Apelit bënë me dije se, ankimi i bërë nga i prangosuri tjetër për krimin, Malvin Dinellari, do të shqyrtohet në ditët në vijim.
Javën e kaluar, Apeli la të pandryshuar masën e sigurisë “arrest në burg” edhe për Mario Meshinin, dëshmitar okular në vrasjen e Kasmit, i cili po hetohet si i përfshirë në ngjarje.
Katër të arrestuarit nga operacioni policor i koduar “Enigma” dyshohet të kenë konsumuar veprat penale të “vrasje me paramendim”, në bashkëpunim, “armëmbajtje pa leje” dhe “prodhim dhe shitje të lëndëve narkotike”.

Policia e qytetit të Ravenës në Itali ka shkatërruar një bandë trafikantësh shqiptarë me 41 kg kokainë në vlerë 1 milion euro. Kokaina mendohet të jetë trafikuar nga Holanda. Lënda narkotike ishte fshehur në një nga bazat e bandës në një apartament në qendër të Ravenës dhe ishte e konfeksionuar në 76 pako, gati për t’u shitur në tregun e Rivierës Adriatike.
Për arsye hetimesh, policia italiane nuk ka bërë publik emrat e shqiptarëve, shumica e të cilëve janë në gjendje arresti. “Është një nga sasitë më të mëdha të kokainës e sekuestruar në territorin tonë, me një vlerë 1 milion euro”, ka deklaruar kreu i skuadrës Operative të Policisë së Ravenës, Claudio Cagnini.
“Është një goditje e fortë që i kemi dhënë trafikut të drogës.Hetimet deri më tani kanë zbardhur se kemi të bëjmë me një bandë trafikantësh profesionistë, të cilët zotëronin armë dhe kishin lidhje me disa banda grabitësish, që vepronin në territorin e rajonit të Emilia Romanjës”, tha në konferencën e shtypit kreu i Policisë së Ravenës, kuestori Rosario Eugenio Russo.
Gjatë operacionit janë sekuestruar dhe 20 kg paracetamol, i cili përdorej si pluhur përziers me kokainën. Mbi pakot me kokainë ishin stampuar fjalë në kode në gjuhën shqipe.

Një shqiptar është arrestuar në Itali për shpërndarje të lëndëve narkotike.Alvaro Basi, 25 vjeç nga Shkodra, kishte kohë që ndiqej nga policia në Leçe, por u arrestua mëngjesin e së enjtes pas një kontrolli në shtëpinë e tij.
Në shtëpinë e tij iu gjetën 19.4 gramë kokainë, disa materiale për paketimin e drogës në doza si dhe 415 euro, të cilat mendohet se janë fituar nga shitja e lëndës narkotike.Gjithashtu, 25-vjeçari mbante në shtëpi në mënyrë të fshehtë 48 fishekë të kalibrit 12.Sipas mediave lokale, Alvaro Basi, në moshën 19-vjeçare është arrestuar për vjedhje.