Të gjitha financimet e PD janë në përputhje me ligjin dhe hetimet do ta tregojnë këtë. Kreu i PD, Basha tha se fushatat e dëshpëruara anti opozitare të Edi Ramës nuk mbulojnë dot përpjekjet e tij për sabotimin e hetimeve për 613 kg kokainë dhe Saimir Tahirin.
Në përgjigje të akuzave boshe të ngritura nga Rama dhe pyetjes së medias gjithashtu, Basha tha: “Partia Demokratike i ka bërë të qarta si drita e diellit të gjitha aspektet financiare dhe zgjedhore të saj dhe gjithçka ka dalë në përputhje me ligjin. As ulërimat e Edi Ramës, as dëshpërimi i Taulant Ballën, nuk mund ta heqin vëmendjen nga fakti se përmes një takimi sekret ditën e premte në një spital në Kombinat dhe përmes mekanizmave të tjerë korruptiv, po përgatiten dy mënxyra të mëdha:
Sabotimi total i kokainës së Maminasit. Lirimi nga akuza i Saimir Tahirit.
Ndaj fokusi ynë është tek interesi publik, tek lufta kundër krimit dhe lufta kundër drogës. Për të tjerat, kemi qenë ne të parët që kemi kërkuar verifikimin nga Prokuroria, të presë Edi Rama verifikimin nga Prokuroria. Dje na doli një lajm që po verifikoka edhe FBI-ja. Kur verifikon FBI-ja, zakonisht nuk e di as Presidenti i Amerikës. Nëqoftëse është ashtu, të presim hetimin, përse ngutet? Të presim rezultatet e hetimit, por ndërkohë të mos harrojmë se po përgatitet lirimi i Saimir Tahirit dhe po përgatitet sabotimi total i hetimeve të kokainës së Maminasit. Kemi të dhëna dhe denoncime jashtëzakonisht shqetësuese”.

Për opozitën e enjtja do të jetë dita e sjelljes në Parlament të qindra familjarëve, që u është hequr buka e gojës e fëmijëve dhe të kërkojmë ndaljen e këtij akti kriminal.
“Shqetësimi ynë është se në këtë dinamikë ku e ka futur vendin me krim, me drogë, me mbrojtje të kriminelëve ka lënë zbuluar njerëzit e thjeshtë, ka lënë zbuluar shqiptarët, 20 mijë prej të cilëve i ka hequr nga ndihma ekonomike. Disa prej jush keni qenë me mua apo me deputetë të tjerë, i keni parë se në çfarë gjendje çnjerëzore jetojnë.
Mund t’u gjejë punë disave, por nuk mjafton që të shkojë kryetari i opozitës në 20 mijë familje që t’u gjejë punë 20 mijë njerëzve. Pra, është thjesht propagandë dhe nuk është për të qeshur, është për të qartë, është për të vënë duart në kokë se sa i pashpirt dhe cinik tregohet pasi ka qenë ai vetë autori i këtij akti kriminal.
Kjo ka një shpjegim të thjeshtë politik; shpjegimi është që kur vjen në pushtet me paratë e drogës, me qindra miliona bananeve të kokainës, me bandat, nuk të bëhet vonë për njerëzit e thjeshtë, ata janë të parët që braktisen.

Gjithë vëmendjen e ke si të shpëtosh Saimir Tahirin nga hetimet; si të sigurosh moskapjen apo mos hetimin e Olsit, të Agronit, të Qazimit, të Vangjushit, të cilët janë kokat politike bashkë me Edi Ramën dhe Fatmir Xhafën dhe Saimir Tahirin, tashmë të provuar dhe nga Antimafia italiane, pa të cilët nuk lëviz dot sasi të tilla droge në Shqipëri.
Dita e enjte do të jetë një ditë e veçantë, nuk do të jetë një ditë e bilancit 6-mujor, të cilit i trembet Edi Rama dhe që e shpenzon me fushata antiopozitare, por do të jetë dita e sjelljes në sallën e Parlamentit të fytyrave, emrave, gjendjes së qindra apo mijëra familjarëve që ne kemi takuar gjatë këtyre dy javëve të cilëve u është hequr buka e fëmijëve. Ne do ta përdorim sallën e Parlamentit për të vetëdijësuar të gjithë shoqërinë dhe për të kërkuar ndaljen e këtij akti kriminal, rikthimin e ndihmës ekonomike, rikthimin e bukës së fëmijëve, e cila u është hequr, duke i lënë në mes të katër rrugëve.
Paratë janë, por Shqipëria është në gjendje të mjerueshme ekonomike, Edi Rama ka ndarë mjaftueshëm para, për orendi, për zyra, për makina luksi, për inceneratorët e Arben Ahmetajt që do të mjaftonin, jo për 20 mijë, por për 80 mijë familje në vit, me ndihmë ekonomike mesatare.
Ne si opozitë kemi premtuar se do të jemi krahë këtyre njerëzve dhe do të ngremë zërin për ta dhe kjo do të jetë një nga çështjet kryesore në Parlament ditën e enjte”, tha Basha.

Gazeta e Beogradit “Veçernje novosti” edhe sot vazhdon të merret me atë që ajo e quan “pako e re për Kosovën” e që vjen nga SHBA-ja, transmeton Koha.net.
Kjo pako, sipas kësaj gazete, do të mund të gjendet para zyrtarëve serbë të mërkurën, kur në Beograd do të jetë Wess Mitchell, emisar i Trumpit dhe ajo do ta vërë në një pozitë shumë delikate kryetarin e Serbisë, Aleksandar Vuçiq: Si të lëvizë nga “pika e vdekjes” zgjidhja e çështjes së Kosovës e të evitohet gracka e fshehtë potenciale e Uashingtonit para zgjidhjes SHBA-ja ose Rusia.
Kështu e kanë komentuar bashkëbisedues të kësaj gazete tekstin e punës të administratës së Trumpit në katër pika: Që Asociacioni i Komunave Serbe të marrë kompetenca të gjëra ekzekutive, të jetë institucionalisht i lidhur me zëvendëskryeministrin (që duhet të jetë serb), që Beogradi të mundësojë anëtarësimin e Prishtinës në organizatat ndërkombëtare dhe që për kompensim, Serbia t’i ketë dyert e hapura për në BE dhe ndihmën ekonomike dhe politike të SHBA-së në skenën ndërkombëtare.

Kryetari i Grupit parlamentar të LSI-së, Petrit Vasili, i ka bërë thirrje Prokurorisë që të vendosi në zbatim Vetting-un e koncesioneve. Vasili ka denoncuar mungesën e transparencës në dhënien e koncesioneve nga qeveria, duke theksuar se ekonomia shqiptare është drejt një kolapsi. “Prokuroria duhet të bëjë me urgjencë Vetingun e koncesioneve, sepse ekonomia shqiptare është futur në rrugën shumë të rrezikshme të kolapsit dhe kriminalizimit shkatërrimtar”, tha Vasili.
Reagimi i Petrit Vasilit
Prokuroria të bëjë Vetingun e koncesioneve, që po rrënojnë ekonominë. FMN foli qartë që koncesionet duhet të ndalen menjëherë. Kryeministri dhe qeveria kanë pasur merak të madh t’u japin privatëve paratë publike që të fitojnë ata dhe qeveria.
Zero Transparence në dhënien e koncesioneve është qyrky për të mbuluar grabitjen e parave të shqiptarëve. FMN është me të drejtë shumë e shqetësuar dhe po e ndjek me shumë seriozitet këtë shkarje kriminale të ekonomisë për shkak të koncesioneve,që jo vetëm rrëmbejnë paratë e qytetarëve, por edhe pastrojnë sheshit paratë e drogës dhe krimit të organizuar. Prokuroria duhet të bëjë me urgjencë Vetingun e koncesioneve, sepse ekonomia shqiptare është futur në rrugën shumë të rrezikshme të kolapsit dhe kriminalizimit shkatërrimtar.

Këshilli Bashkiak i Gjirokastrës shkarkoi sot kryetarin Roland Karalliu të Partisë Socialiste, ndërsa në vend të tij është votuar Mimoza Çomo, këshilltare e PD-së.
Ndryshimi i kryekëshilltarit ka ndodhur si rezultat i bashkimit të votave të këshilltarëve të PD dhe LSI-së. Karalliu së fundmi ishte komanduar edhe drejtor i Spitalit Rajonal të Gjirokastrës. Në lidhje me zgjedhjen e Kryetarit të ri të Këshillit Bashkiak të Gjirokastrës ka reaguar edhe deputeti i PD-së, në këtë qark Tritan Shehu.
“Mimoza Çomo, Kryetarja e sapo zgjedhur e Këshillit Bashkiak të Gjirokastrës. Një përmbysje kjo në atë Keshill Bashkiak. Zj. Como, një personalitet në atë Bashki, një figurë që rezaton shpresë e integritet. Një mesazh i qartë ky për ndryshimet e tjera të mundshme aty”, shkruan Tritan Shehu.