18.5 C
Tirana
E diel, 4 Maj, 2025
type here...

Për të mbuluar tradhtinë e tyre, përdorin si gogol Protokollin e Korfuzit!

Sali BERISHA

Në një përpjekje të re për të mbuluar tradhtinë e tyre të lartë, faljen e fushave më të mëdha të gazit dhe naftës në Jon dhe Mesdhe palës greke, Edvin Kristaq Rama dhe Ditzi Sulejman Bushati nxorën në treg në mediat e tyre dhe po përdorin për shqiptarët në mënyrën më antikombëtare, gogolin e Protokollit të Korfuzit, aktin më tradhtar të firmosur ndonjëherë nga shqiptarët në vitin 1914, në këtë ishull me të cilin pranohej krijesa e Jorgo Zografit, Vorio Epiri!
Ky protokoll është hedhur poshtë nga 6 fuqitë e mëdha, të cilat kanë firmosur në Firence më 27 janar 1925 Protokollin e përcaktimit të kufirit shtetëror midis Shqipërisë dhe Greqisë. Ky protokoll njohu si kufij shtetërorë midis dy vendeve këta kufij që janë edhe sot. Megjithëkëtë duhet të pranojmë se deri në vitin 1996 midis Shqipërisë dhe Greqisë nuk kishte një marrëveshje bilaterale për kufijtë ndërshtetërorë.
Pala greke e konsideronte të panevojshme këtë marrëveshje, pasi të dy palët kishin firmosur aktin e Helsinkit. Por pala shqiptare kërkoi që njohja e kufijve aktualë ekzistues, pra që janë kufijtë e përcaktuar në Protokollin e Firences, të sanksionohej edhe në Traktatin e Miqësisë midis dy vendeve. Kjo kërkesë u pranua nga pala greke. Prandaj në nenin e parë të Traktatit të Miqësisë sanksionohet: “Republika e Shqipërisë dhe Republika greke…. shpallin përkushtimin e tyre ndaj parimit të paprekshmërisë së kufijve ekzistues të njohur ndërkombëtarisht në përputhje me Aktin Final të Helsinkit dhe Kartën e Parisit dhe se vija kufitare midis të dy vendeve do të jetë vijë kufitare paqeje dhe miqësie”.

Pra, në Traktatin e Miqësisë pala greke ka pranuar përfundimisht dhe pa ekuivok kufijtë ekzistues midis dy vendeve dhe vetëkuptohet ka hequr dorë botërisht nga Protokolli i Korfuzit. Kështu që Rama dhe Ditziu i tij pranojnë si plaçkë tregu, si gogol Protokollin e Korfuzit, një protokoll të varrosur përfundimisht nga Protokolli i Firences, Akti i Helsinkit, Karta e Parisit dhe Traktati i Miqësisë dhe Bashkëpunimit midis Shqipërisë, por dhe e përdorin dhe si gogol për të mashtruar, por edhe trembur shqiptarët.
Ata, pasi dështuan me shitjen e heqjes së ligjit të luftës, një akt atavik i turpshëm në kancelarinë greke, si justifikim për dhurimin e fushave më të mëdha të gazit dhe naftës në Jon dhe Mesdhe Greqisë, tani Edvini dhe Ditziu i tij iu servirin shqiptarëve si sukses heqjen dorë nga pala greke nga ky Protokoll i Korfuzit të varrosur në mënyrë përfundimtare që në vitin 1925 dhe si shpërblim i dhuruan Greqisë fushat më të mëdha të naftës dhe gazit në Jon dhe Mesdhe. Edhe një herë u bëj thirrje shqiptarëve të ngrihemi me të gjithë fuqitë tona për të mbrojtur integritetin territorial të vendit dhe të përmbysim këtë qeveri që ka shndërruar në plaçkë tregu për karriget e saj pasuritë përrallore të Shqipërisë!

Veliaj injoron të pastrehët, kreditë e buta për militantët e PS

Adela dhe Albi Osmani do të kishin qenë një çift krejt i zakonshëm dhe i panjohur për publikun e gjerë, nëse kryebashkiaku Erion Veliaj nuk do t’i kishte ekspozuar. Jo më larg se dy ditë më parë, Veliaj ka qenë në çerdhen e tyre të dashurisë, për të promovuar ‘sistemimin dashamirës’ që i ka bërë kryebashkiaku i qytetit më të rëndësishëm në Shqipëri, një çifti të ri, në nevojë. Të dy ata, Adela dhe Albi, e kanë mikpritur në shtëpinë e tyre të re kryebashkiakun. Pas qerasjeve të planifikuara, Veliaj ka dhënë sinjalin për fotot e zakonshme dhe ja ku i kemi: të gjithë të gëzuar, të gjithë të lumtur!
Shkruan Veliaj në postimin e fotove në ‘Facebook’: ‘Urime për shtëpinë e re! Një mikpritje tepër e ngrohtë në strehëzën e re të çiftit Adela dhe Albi Osmani, të cilët përfituan nga programi i kredisë së butë vitin e kaluar’. Ky është episodi i parë, i një planifikimi të imtësishëm. Episodi i dytë ndodhi rreth 15 ditë më parë në një tjetër familje. Erion Veliaj niset drejt rrugës së shtëpisë së re të Arditit dhe Blerinës për të promovuar një punë tjetër të arritur: kredinë e butë dhënë familjes Kaçi. Edhe këtu ekspozimi i tyre është i detyruar. Shkruan për ta Veliaj: ‘Tak-tak, hape derën! Tek Laiza dhe prindërit e saj shembullore Ardit dhe Blerina në shtëpinë e tyre të re, falë programit te Bashkia Tiranë për kreditë e buta. Arditi dhe Blerina janë jo vetëm prindër shembullorë, por edhe veterinerë mjaft të zotë!’
Çfarë i lidh dy episodet është një fakt i vërtetuar: Erion Veliaj i njihte më përpara. Një gjest krejt spontan i të zotërve të shtëpisë përfituar me kredi të butë, ardhur ndoshta nga gëzimi i madh i një shtëpie të re, zbulon krejt padashur njohjen e Veliajt me familjen Kaçi.

Siç shihej nga fotoja që familja mbante të printuar në shtëpinë e saj, Veliaj kishte ekspozuar vajzën e tyre në një foto të hershme, teksa e mbante në park.
Ndërsa njohja me çiftin e parë është edhe më e fortë. Nga një hulumtim i Genc Sejkos, Albi Osmani rezulton të ketë qenë nën shoqërinë e Veliajt para përfitimit të kredisë, siç e tregojnë fotot që ju shihni. Momente miqësore, a nuk ju duken? Nën shoqërinë e Veliajt shfaqet edhe në dy momente të tjera; gjatë emisionit ‘Dritare’ të Rudina Xhungës dhe në një bar, duke tokur grushtat.
Por një njohje, njësoj të fortë, partnerja e Albit ka patur edhe me kryeministrin e vendit: Edi Ramën. Në po të njëjtën festë me Veliajn, në qershor të vitit të kaluar, Adela Osmani ka kaluar një mbrëmje interesante te një nga bar-restorantet e Tiranës, pas shpatullave të së cilës qëndronte kryeministri. ‘Pas festës me shefin’, shkruan Adela Osmani, duke iu referuar Edi Ramës.
Mirëpo në disa foto të tjera rezulton se çifti i ri Albi dhe Adela Osmani kanë shëtitur botën: Venecia, Paris, Barcelonë, Kroaci, etj etj. Por… kreditë e buta janë të destinuara për çifte të reja, në vështirësi ekonomike dhe që nuk mund të përballojnë kredi me interesat normale të bankave.
Këto janë faktet e para të një procesi (dhënie kredie të butë) të dyshuar si të kompromentuar dhe plot favorizime personale te të rinj, të cilët Veliaj i ka mbështetës./Hashtag.al

Eksodi, 95% e bluzave të bardha kërkojnë të ikin nga Shqipëria

Numri i mjekëve që kanë kërkuar të largohen jashtë vendit 4 vitet e fundit është 3-fishuar. Pas publikimit të këtij lajmi nga redaksia e “Pro Pacientit”, pati një reagim shumë të madh nga ana e mjekëve. Ndërkohë, sipas burimeve të redaksisë, reagimi i Ministrisë së Shëndetësisë u reflektua në një urdhër (jo të shkruar) të brendshëm, për mosdhënien në vazhdim të asnjë informacioni lidhur me këtë çështje.
Ndjeshmëria që ka kjo temë, u bë shkak që redaksia e “Pro Pacientit” të publikonte një anketim të thjeshtë. Pyetjet e së cilës lidheshin pikërisht me arsyet e largimit të mjekëve jashtë vendit.
Rezultatet e anketimit, u tha që do të botoheshin bashkë me një analizë të ekspertëve të fushës së shëndetësisë. Por, ajo që u vu re ishte se mjekët jo vetëm që nuk janë treguar të kursyer me përgjigjet, por përkundrazi kanë shtjelluar arsyet, duke bërë kështu që të vlerësonim si të paarsyeshëm ndërhyrjen e ekspertëve të shëndetësisë.
Anketimi ka patur 168 përgjigje, dhe sipas të dhënave të mbledhura, rezulton se pjesa më e madhe e mjekëve që janë përgjigjur, ushtrojnë profesionin në institucionet shëndetësore në Tiranë.
Brain Drain ose ndryshe largimi i trurit përcaktohet si migrimi i personelit shëndetësor në kërkim të standardit më të mirë të jetesës dhe cilësisë së jetës, paga më të larta, qasje në teknologji të përparuar dhe kushte politike, ekonomike më të qëndrueshme. Pjesa më e madhe e migracionit lind si rrjedhojë e zhvillimit të vendeve të zhvilluara, ky është një shqetësim gjithnjë në rritje për shkak të ndikimit të tij në sistemin shëndetësor në vendet në zhvillim, pasi këto vende kanë investuar në edukimin dhe trajnimin e profesionistëve të rinj shëndetësorë, e kjo me kalimin e kohës do të përkthehet në humbje të resurseve të konsiderueshme.

Nga pikëpamja ekonomike, ikja e trurit ndikon ndjeshëm në vendet në zhvillim, këto vende kanë shpenzuar kohë dhe para, duke edukuar personelin e kujdesit shëndetësor që më pas ka emigruar. Ndërsa disa janë kthyer në atdhe, shumica kanë qëndruar jashtë vendit dhe janë pasuar nga familjet e tyre. Dr. Barker i Komisionit Ekonomik të Afrikës së OKB-së ka paralajmëruar se në 25 vitet e ardhshme, Afrika do të jetë e zbrazur nga truri (Tebeje, 2015). Komenti i tij tregon alarmin në rritje mbi fluturimin e kapitalit njerëzor.
Është koha për të kuptuar dhe pranuar që lëvizshmëria e profesionistëve shëndetësor është pjesë e jetës së shekullit 21. Vendet duhet të pranojnë se konkurrojnë me institucionet më të mira në botë për një fuqi punëtore sa më cilësore.

Në 4 vite, numri i mjekëve të larguar nga Shqipëria u trefishua

Largimi i mjekëve nga Shqipëria në katër vitet e fundit ka tronditur gjithë sistemin shëndetësor, ndërsa është shndërruar në një eksod të vërtetë që vijon edhe sot. Shifrat zyrtare flasin për një trefishim të numrit të mjekëve të larguar, ndërsa kërkesa e tyre për të lënë vendin është në rritje. Nga viti 2014 dhe deri vitin e kaluar me qindra mjekë kanë kërkuar çertifikatën e sjelljes profesionale me qëllim paraqitjen e saj për të aplikuar për punë jashtë Shqipërisë. Çertifikata e sjelljes së mirë profesionale (Good Standing Cerificate) lëshohet nga Urdhri/Dhoma apo Shoqata e Mjekëve të vendit të vet, ku vërtetohet se mjeku është i regjistruar, e ushtron profesionin dhe se gjatë ushtrimit të profesionit nuk ka asnjë masë disiplinore kundrejt tij/saj. Kjo çertifikatë është një dokument që kërkohet nga të gjithë mjekët që aplikojnë për specializime afatgjata ose afatshkurtra jashtë vendit, kërkohet për të konvertuar diplomën e Universitetit të Mjekësisë së Tiranës në një vend të huaj, kërkohet për të punuar jashtë vendit.

Sondazhi, 87% e mjekëve shqiptarë të pakënaqur nga qeveria

A janë të motivuar mjekët në Shqipëri?
89.3% – aspak të motivuar
8.3% – disi të motivuar
2.4% -shumë të motivuar
Sa të kënaqur jeni me pagat që merrni?
87.5% – aspak të kënaqur
9.5% -disi të kënaqur
2.4% -shumë të kënaqur
0.6% -mjeku nuk shpërblehet për punën që bën (përgjigje e shtuar nga vetë mjekët)
A mendoni se pagat e ulëta janë arsyeja kryesore përse po largohen mjekët nga Shqipëria?
66.1% -po
12.5%- jo
Përgjigje të shtuara:
-përveç pagave edhe organizimi i dobët i sistemit shëndetësor
-pagat e ulta dhe kushtet e këqija të punës
-pagat dhe siguria në punë, imazhi i keq i mjekëve i ushqyer nga media
-mungesa e mjeteve dhe motivimit
-pagat dhe trajtimi
-pagat dhe presioni
-kushtet e këqia në punë
-standardi, siguria në punë

-kushtet dhe paga
-përbuzja dhe mosvlerësimi
-arsyet e largimit të mjekëve janë pagat e ulta dhe kushtet e punës
-pagat, kushtet dhe siguria, jetesa
-mungesa e vlerësimit
-paga, por më e rëndësishmja, kushtet në të cilat punojmë
-mungesa e sigurisë në punë, kushtet jo të mira, mungesa e ngritjes në karrierë
-shihemi si armiq
– mungesën e kushteve për të ushtruar siç duhet profesionin dhe mungesa e meritokracisë në çdo institucion
-kushtet e punës
-përveç pagave skandaloze kemi dhe mosrespektim të figurës sonë nga qeveritarët e le pastaj nga populli i thjeshtë; mungesë totale e kushteve të punës dhe për në shërbimin parësor gjoba të pajustifikueshme për shkak të një sistemi shumë të gabuar rimbursimesh
-të pambrojtur nga Ligji dhe Urdhri i Mjekut
-mungesa e besimit te mjekët dhe faturimi i të gjitha dështimeve të sistemit të tyre; mungesa e vlerësimit
Nëse do t’ju jepej mundësia, a do të punonit jashtë?
95.2% – po
3%- jo
0.6%- Nuk është çështje mundësie, por guximi për të nisur nga e para në vendin që do të shkosh

(Përgjigje të shtuara)
-tashmë jemi familjarë dhe nuk është vetëm vendim personal
-dua të jem e vlerësuar këtu
A ndiheni të pambrojtur në punën tuaj?
79.8% -shumë të pambrojtur
19% -disi të pambrojtur
1.2 %- të mbrojtur
A keni menduar të përfitoni nga sistemi i bonusit për të punuar në spitalet rajonale?
70.2%- jo
23.2%- po
(Përgjigje të shtuara)
-nuk jam mjeke specialiste, por mjeke familje
-nëse do të përfitoja, pse jo
-nuk jam mjek specialist
-punoja në sptial rajonal, por kushte shumë të këqia s’munda t’i përballoja
-ta marrin bonusin ata që punojnë e shërbejnë jo vetëm ata që vijnë nga Tirana
-është mashtrim
-jo të gjithë specialistëve iu ofrohet bonusi
-ky bonus nuk ofrohet për të gjithë specialitetet
-ndonjëherë
-ndoshta
A mendoni që profesioni i mjekut në 5 vitet e ardhshme do të jetë më i vlerësuar?
81% -jo
11.3%- po
1.2% -ndoshta
(Përgjigje të shtuara)
1.2% -shpresoj
-nuk shoh asnjë përpjekje reale
-ndoshta
-duhen bërë politika të tilla që figura e mjekut të fitojë sërish respektin në popull
-të shohim
-jo, jemi të kultivuar me një kulturë materialiste deri në qelizë, kjo sepse fillojnë që tek shkolla e marrë me pagesë. Si vlerësohet një profesion i blerë?
-të shpresojmë

Bashkia redukton kuotat ushqimore për të hedhur paratë në pisha dhe palma

Këshilltari i PD-së, Kreshnik Çollaku në një postim në Facebook, ka publikuar menunë për fëmijët e kopshteve dhe çerdheve në Tiranë. Çollaku shkruan se menuja është ndryshuar dhe se nga kjo javë fëmijët konsumojnë gjithmonë e më pak ushqim në kopshte. Çollaku akuzon Bashkinë se ka reduktuar kuotat për të hedhur paratë në pisha dhe palma. “Një tjetër skandal në Tiranë. Sot një grup prindësh na kanë kontaktuar. Shqetësimi është i pabesueshëm por i vërtetë.
Prindët ankohen se në kopshtet publike, që administrohen nga Bashkia Tiranë, kuota ushqimore për fëmijët është reduktuar ndjeshëm.
Nga menuja ushqimore janë hequr produketet ushqimore kryesore.
Fëmijët nuk konsumojnë ushqimin. Fëmijët kthehen në shtëpi të uritur dhe të paushqyer. Askush nuk mund të imagjinonte një ngjarje të tillë.
Bashkia e Tiranës nuk mund të detyrojë dietë për fëmijët e moshave 5-10 vjeç.
Kjo ose është një idiotësi totale, ose është një akt kriminal. Idiote është ideja që të detyrosh fëmijët të ruajnë linjat duke i detyruar të konsumojnë vetëm barishte e zarzavate. Kriminale është nëse me reduktimin e kuotës ushqimore të fëmijëve…dikush ose disa fusin duart në fondet të dedikuara për ushqimin e fëmijëve të kopshteve e çerdheve të dedikuara në buxhetin e vitit të miratuar me vendim të Këshillit Bashkiak. Bashkia e Tiranës që harxhon 2.5 milionë euro për palma e pisha…nuk mund të nxjerrë këtë harxhim duke reduktuar kuotat ushqimore të fëmijëve me kopshte e çerdhe”, shprehet Çollaku.

Vazhdojnë koncesionet, Ministria e Energjisë i hap rrugë tjetër HEC-i

?????????????????????????????????????????????????????????

Ministria e Infrastrukturës dhe Energjisë ka hapur garën koncesionare për ndërtimin e një hidrocentrali në lumin Veleshicë, në Qarkun e Dibrës. Sipas njoftimit të publikuar, vlera e parashikuar e projektit është 750 milionë lekë, ndërkohë që ofertat mund të dorëzohen deri në datën 9 mars.
Fuqia e instaluar do të propozohet nga koncesionari, ndërkohë që ajo përbën edhe një nga kriteret e përzgjedhjes së fituesit, duke u vlerësuar me 22 pikë. Po ashtu, pjesë e kritereve është edhe ndikimi ekologjik e social, me 22 pikë, vlera e ‘Fee’ koncesionare me 20 pikë dhe koha e zbatimit të punimeve me 19 pikë. Peshën tjetër të vlerësimit e mban skema e lidhjes së centralit me sistem elektroenergjetik, me 17 pikë.
Hapja e kësaj procedure vjen në një kohë, kur Ministria e Infrastrukturës dhe Energjisë ka kërkuar ndryshime ligjore për procedurat e dhënies me koncesion të HEC-ve.
Sipas projektligjit, që po diskutohet në Kuvend kërkohet që ndërtimi dhe shfrytëzimit i burimeve të energjisë së rinovueshme me kapacitet të instaluar nën 2MW, të cilat kanë vlerë investimi mbi 100 milionë euro të përjashtohen nga procedurat aktuale të dhënies me koncesion apo Partneritetit Publik Privat.
Sipas relacionit të projektligjit, ky përjashtim do të mundësojë thithjen e investimeve strategjike të huaja dhe atyre vendase, për shkak të përshpejtimit të procedurave, që aktualisht shkojnë deri në 2 vjet.

Fushata e qeverisë kundër euros dhe dollarit

Euro ka shënuar rënie edhe gjatë ditës së sotme në tregun vendas, ndonëse në bursa ai është në rritje për të dytën ditë radhazi.
Sipas kursit zyrtar të Bankës së Shqipërisë, një euro u këmbye sot me 132.83 lekë, me një rënie prej 0.08 lekësh në krahasim me një ditë më parë, në nivelin më të ulët që nga 27 dhjetori. Kjo është e 11-a ditë radhazi që euro vetëm nënçmohet, periudha më e gjatë me rënie që nga qershori i vitit të kaluar, kur oferta për valutë në atë kohë çoi monedhën e përbashkët në pikiatë.
Në rënie më të fortë ka qenë dhe dollari, i cili luan rolin e stabilizatorit me raportet e këmbimit në tregjet ndërkombëtare. Një dollar u këmbye me 104.49 lekë, me një nënçmim prej 0.25 lekësh, duke u luhatur afër nivelit më të ulët të katër viteve.

Çfarë po ndodh?!

Euro u këmbye sot në bursa me 1.234 dollarë, me një rritje të lehtë nga një ditë më parë, ndërsa afër nivelit më të lartë të tre viteve. Si rrjedhojë, luhatjet e euros në tregun vendas nuk shpjegohen me ndryshimet në bursa.
“Shqipëria është anticiklike”, thotë Ilirian Ligaçaj, drejtor i Thesarit në Union Bank. Ai thotë se, nuk ka një arsye të saktë se çfarë po ndodh në tregun e brendshëm, i cili që prej verës së vitit të kaluar ishte stabilizuar në nivelin e 133-134 lekëve.
Faktorët kryesorë që ndikojnë lidhen me kërkesën dhe ofertën. Oferta, sipas Ligaçaj vijon të jetë e lartë, ndërsa kërkesa është e dobët. Tregu valutor është relativisht i vogël, si rrjedhojë edhe kërkesa e dy apo tre kompanive mund ta ndikojë atë.
Lidhur me ofertën ajo është e vështirë të vlerësohet dhe matet nga të dhënat zyrtare, pasi ka shumë hyrje të padeklaruar.

Ligaçaj nuk e mohon as efektin psikologjik të fushatës së de-euroizimit që ka ndërmarrë Banka e Shqipërisë. “Tregu pak do për t’u çorientuar”, pohoi ai, ndonëse efekti real nuk do të ndihet që tani.
Bankat do të fillojnë të parapërgatiten, pasi efekti nuk do të jetë i vogël dhe masat e ndërmarra do të ndryshojnë edhe situatën e likuiditetit në monedha të ndryshme.
Një tjetër efekt psikologjik lidhet me faktin që individët, duke pritur që euro të zhvlerësohet më tej, do të nxitojnë të këmbejnë monedhën e përbashkët sa më shpejt, në mënyrë që të mos humbin nga zhvlerësimi.
Ekspertët parashikojnë që trendi i forcimit të lekut të jetë i ngadaltë dhe i qëndrueshëm.

Atletico e Madridit vëzhgon Timo Werner

Siç raporton gazeta gjermane “Bild”, Atletico e Madridit ka dërguar vëzhgues në Gjermani për të ndjekur nga afër Timo Werner në ndeshjen e fituar nga Leipzigi kundër Freiburgut. Sulmuesi 21-vjeçar mund të jetë një nga objektivat kryesorë të “Los Colchoneros” në rast se Antoine Griezmann vendos të largohet nga madrilenët. Kontrata aktuale e Werner me Leipizgu përfundon në vitin 2020 dhe drejtuesit e klubit gjerman kanë këmbëngulur se nuk duan ta humbasin sulmuesin dhe janë duke punuar për t’i rinovuar kontratën me rritje të ndjeshme të pagës. Gjithsesi, përballë një oferte të majme të Atleticos, ky qëndrim mund të ndryshojë.

Caicedo i Lazios në telashe

Një futbollist i Lazios dyshohet si i përfshirë në trukimin e ndeshjeve në kohën kur luante në Spanjë. Bëhet fjalë për futbollistin nga Ekuadori, Felipe Caicedo, për të cilin bardhekaltrit shpenzuan 2.5 milionë euro një vit më parë për ta shkëputur nga Espanyoli. Sulmuesi 29-vjeçar është një ndër 41 personat e dyshuar se kanë manipuluar rezultatin e ndeshjes së fundit të sezonit 2010–2011 mes Levantes dhe Saragozës, e zhvilluar më 21 maj 2011.
E përditshmja spanjolle “Marca”, duke rreshtuar faktet, sqaron se në këtë përballje skuadrës mike i duhej fitorja për të shpëtuar nga rënia në Segunda Division dhe kështu ndodhi. Real Saragoza triumfoi 1-2, ndërsa Deportivo la Coruna ra nga kategoria. Hetuesit pretendojnë se Saragoza u ka paguar gati një milion euro futbollistëve të Levantes, që ata të humbnin. Paratë më pas janë shpërndarë mes drejtuesve dhe lojtarëve. Hetuesit kanë arritur në përfundimin se futbollistët e Levantes kishin ulur në maksimum shpenzimet atë verë, sepse, sipas tyre, pagesat i kishin bërë me para në dorë, që sigurisht i kishin përfituar në të zezë.
Sipas akuzës, janë 9 lojtarë që kanë marrë para për të humbur, mes të cilëve edhe sulmuesi aktual i Lazios, që në atë kohë ishte huazuar nga Manchester City te Levante. Fillimisht kjo çështje ishte arkivuar, por u rihap më 5 shkurt, pasi u siguruan prova të reja inkriminuese. Nga prokurorët e çështjes mësohet se është kërkuar 2 vite burg dhe 6 vite pezullim për 38 të hetuar për këtë skandal.

Ndërhyn Raiola

Mino Raiola dëshiron të veprojë si një ndërmjetës, për ta dërguar Mauro Icardin te Manchester United në verë, raporton “Corriere dello Sport”. Superagjenti i futbollit duket se synon të marrë përsipër përfaqësimin kryesor të Icardit, megjithëse sulmuesi i Interit është i lumtur të vazhdojë të punojë me agjenten aktuale, njëherazi gruaja e tij, Wanda Nara. Kjo e fundit, mesa duket është në procesin e negocimit të një marrëveshjeje të re me Interin, megjithëse Raiola ofron gatishmërinë e të punuarit për një transferim të argjentinasit në “Old Trafford”. Diskutimet aktuale mes Wanda Nara dhe klubit zikaltër ende nuk kanë filluar, por të dyja palët kanë konfirmuar gatishmërinë e tyre për t’u marrë me këtë çështje në kohën e duhur. Po, çfarë ka ndërmend të propozojë “Corso Vittorio Emanuele” për Wanda dhe për pjesën tjetër të shoqërimit të sulmuesit, domethënë agjentët Ulysses Savini dhe Pino Letterio?
Do të fillojë me një rritje prej pothuajse 2 milionë euro, krahasuar me pjesën aktuale fikse të angazhimit financiar, pastaj nga 4.7 në 6.5 milionë euro. Në këmbim, Interi do të dëshironte ta anulonte klauzolën krejtësisht. Ndërsa, përveç kësaj, do të kishte një grup të pasur shpërblimesh, të lidhura me qëllimet e ekipit dhe madje, edhe ato personale. Këto do të ishin shpërblime thelbësore, disa më të lehta për t’u arritur, të tjerat më pak, por ende në gjendje për ta rritur kapitenin zikaltër. Si në të gjitha negociatat, në fazën e parë, distancat mbeten të rëndësishme, por jo të paarritshme. Tashmë, për pjesën e pagës së garantuar, Wanda fillon nga një kërkesë prej 7 milionë euro, por në të njëjtën kohë, klauzola nuk do të eliminohej, por vetëm do të rritej: deri në 150 milionë euro, por me disponueshmërinë edhe për të arritur 200.

Ndërkohë, Skriniar është shprehur i lumtur për interesimin e klubeve të mëdha. “Mesa di unë gjatë merkatos së janarit ka ardhur një ofertë e pabesueshme, por unë e kam lënë gjithçka në dorë të menaxherit. Nëse ai do të mendonte të arsyeshme largimin atëherë do të ikja nga Inter. Gjithsesi, jam i lumtur për interesimin e klubeve të mëdha, ashtu si jam i lumtur që Inter, një tjetër klub i madh, ka vendosur mos më shesë”. Nuk kanë qenë fjalë çfarëdo ato të thëna nga Milan Skriniar gjatë një interviste, për një të ardhmen e tij, që mund të jetë larg nga Milano. “Në cilin ‘top club’ do të doja të luaja? Real Madrid dhe Barcelona më pëlqejnë shumë, por e njëjta gjë vlen për dy ekipet e Manchester. Për më tepër, Premier League është kampionati më i bukur në botë”.
23-vjeçari nga Sllovakia nuk e fsheh se mendon skuadra të tjera krahas Inter, gjithmonë nëse do të jetë titullar. “Largimi im do të varej nga disa faktorë, si për shembull marrëveshja mes klubeve dhe roli që do të kem aty ku do të shkoj. Nëse do të jem në stol atje ku do të shkoj, atëherë zgjedh të qëndroj përjetësisht te Inter”. Në fund, Skriniar shtoi: “Champions League është objektivi që kemi në këtë sezon. Sigurisht që kur ishim në krye nisëm të mendojmë edhe për titullin, por tani i përket gjithçka së kaluarës dhe ne synojmë të arrijmë mes katër të parave. Nuk duhet të humbasim më pikë rrugës, sepse jemi në vend të tretë dhe gjithçka është në dorën tonë”.

Ylli i Ajax: “Kush jam unë që të refuzoj Real Madrid?”

Në Europë po shkëlqen një futbollist që sapo ka mbushur 18 vjeç dhe që ka tërhequr vëmendjen dhe interesin e të gjithë klubeve më të mëdha të Europës. Justin Kluivert, djali i ish-sulmuesit të Barcelonës dhe Milan, Partick Kluivert, ka folur në mikrofonin e “Helden” në lidhje me të ardhmen e tij, duke shpallur kështu preferencat e tij mes klubeve më elitare të kontinentit.
“Barcelona është një klub shumë i madh, por kush jam unë për t’i thënë jo Realit, nëse do të vinte oferta?”, deklaroi Kluivert Jr, duke treguar vlerësimin e tij superior për “Los Blancos” në raport me klubin katalanas.
Ndërkohë, ylli i Ajax, ka hapur edhe dyert në Premier League, ku veçoi disa skuadra: “Anglia më tërheq: Arsenal, Tottenham, Chelsea ose Manchester United janë klube të bukura ku e shoh veten të luaj pas ndonjë viti. Një menaxher të ofron mundësitë, por jam unë ai që merr vendimet, babai im nuk ndërhyn. Ai e di që nuk më pëlqen”, përfundoi ai duke treguar edhe marrëdhënien me babain-menaxher.

1...5 9115 9125 913...8 279Faqja 5 912 nga 8 279

Kryesore

Continue to the category
Më shumë
© 2024 Rilindja Demokratike Euroatlantike