Harry Kane ka kryesuar rekordet e Didier Drogba dhe Ronaldinho, duke shënuar golin e nëntë në nëntë paraqitje të tij në Ligën e Kampionëve. Ylli i Tottenham ka dribluar edhe Gianluigi Buffon, pastaj e ka rrëshqitur topin në një portën bardhezi, për të rihapur rezultatin e ndeshjes në Torino, e cila kishte shkuar shumë herët 2-0 në favor të vendësve. Më pas ishte Christian Eriksen, ai që shënoi golin e barazimit 2-2, në minutën e 72-të, duke vulosur një barazim që favorizon dukshëm “Suprs” për të kaluar në çerekfinale të Champions-it. Goli i Kane ishte, gjithashtu, një rekord anglez për golat në një sezon të vetëm të Ligës së Kampionëve, duke e barazuar atë me Steven Gerrard, në shtatë gola. Por, ky gol, gjithashtu, e vendosi yllin e “Spurs” në majë, pavarësisht nga çdo lojtar tjetër në historinë e Ligës së Kampionëve.
Didier Drogba, Ronaldinho, Simone Inzaghi dhe Diego Costa kanë shënuar nga 8 gola në 9 ndeshjet e para të një edicioni të Ligës së Kampionëve, që përbënin para të martës rekordin më të mirë në këtë drejtim. Por, ritmi i jashtëzakonshëm i golave të Kane vazhdoi në Torino dhe ai tani qëndron i vetëm, në majë të “grumbullit”. 24-vjeçari është edhe golashënuesi kryesor në mesin e të gjithë lojtarëve, në pesë ligat më të mira në Europë, me 33 gola në të gjitha garat, këtë sezon. Ai, gjithashtu, kryeson Premier League me 23 gola të shënuar këtë sezon dhe ndjek i vetëm yllin e Real Madridit, Cristiano Ronaldo, i cili ka 9 gola në Ligën e Kampionëve, këtë edicion. Kane do të ketë një shans për të thyer rekordin anglez për golat në një fushatë të vetme të Ligës së Kampionëve në ndeshjen e dytë kundër Juventusit, e cila do të zhvillohet më 7 mars në Londër, në stadiumin “Wembley”.

Trajneri i Juventusit, Massimiliano Alegri, hodhi poshtë kritikat ndaj skuadrës së tij, pas barazimit të Ligës së Kampionëve me Tottenhamin, duke thënë se kundërshtari ishte “i çmendur”. Gonzalo Higuain shënoi një dopietë të hershme në ndeshjen e parë të 1/8 finale, në Torino, të martën, por humbi një penallti në fund të gjysmës së parë. Harry Kane kishte ngushtuar rezultatin me një gol për “Spurs”, teksa këta të fundit barazuan 2-2 në sajë të një goli të Eriksen, në pjesën e dytë. Alegri, i cili pret që Paulo Dybala dhe Blaise Matuidi të kthehen për ndeshjen e kthimit, tha se pritshmëritë që Juve do ta vriste ndeshjen që në Torino ishin të pavendosura.
“Juventusi luan për të fituar Ligën e Kampionëve, por ne nuk jemi favoritë për këtë. Është e pamundur të arrijmë në finale çdo vit. Ne po bëjmë më të mirën dhe lojtarët e mi duhet të jenë të lumtur, sepse ata kanë zhvilluar një sezon të mahnitshëm. Edhe unë jam i lumtur për atë që po bëjnë. Ne e dimë se duhet të përmirësohemi. Ende kemi një shans të mirë për t’u kualifikuar në Londër, por është krejtësisht e çmendur të mendojmë se Juventusi duhet të fitojë 3-0 në raundin e 1/8 finale të Ligës së Kampionëve. Është diçka që më bën të çmendur, sepse nuk jeni në gjendje të analizoni se sa ekipe të mira janë në Ligën e Kampionëve. Unë nuk mund të pranoj që njerëzit mendojnë se rezultati 2-2 ndaj Tottenhamit mund të na bëjë të depresionuar”, tha trajneri bardhezi.
Alegri tha se skuadra e tij kurrë nuk ishte favorite kundër “Spurs”, ndërsa përgatitet për një “finale” në ndeshjen e dytë, në “Wembley”, muajin e ardhshëm. “Ne patëm një shans 50 për qind përpara ndeshjes së parë dhe ende kemi 50 për qind mundësi kualifikimi për më tej. Tottenham është një skuadër e mahnitshme. Gjithsesi, futbolli është i çuditshëm, sepse Buffon na shpëtoi kur ishim 2-0. Pastaj patëm mundësinë të shkojmë përpara 3-0. Rezultati u ngushtua 2-1. Mund të shkonim 3-1 me penallti, por Higuain e humbi atë. Ne e dinim se do të ishte një ndeshje e vështirë. Jemi përballë Tottenhamit në Ligën e Kampionëve, një ekip fizik dhe teknik. Tani, në Londër, do të jetë një finale dhe do të duhet të luftojmë për ta kaluar me sukses”, përfundoi Alegri.
Juventus pati fillimin e ëndërruar pasi shënoi dy gola në harkun e tetë minutave. Gonzalo Higuain vuri rekordin me dygolëshin më të shpejtë në historinë e Champions League. Pas dy minutash lojë argjentinasi shënoi me një kthesë të befasishme, pas pasimit të marrë nga Pjaniç, ndërsa gjashtë minuta më vonë ai tundi rrjetën me penallti, si rrjedhojë e faullit që Davies shkaktoi ndaj Bernardeschi. Përgjigjja e Tottenham erdhi dhjetë minuta para fundit të pjesës së parë me anë të Harry Kane.
Juve humbi mundësinë për të mbyllur llogaritë në minutën e fundit të pjesës së parë kur Higuain humbi penalltinë e dytë të dhënë për bardhezinjtë, duke e përplasur topin në traversë. Tottenham nuk hoqi dorë nga sulmi dhe mori barazimin e merituar, 18 minuta para fundit. Cristian Eriksen shënoi me goditje dënimi golin e barazimit 2-2, duke përfituar edhe nga ai që mund të quhet gabim i portierit Buffon, i cili nuk mbrojti shtyllën e tij. Në “Allianz Stadium” mbyllet në barazim 2-2 dhe skuadra çerekfinaliste do të vendoset në sfidën e kthimit në Londër, më 7 mars.

Ish-mbrojtësi qendror i Juventusit dhe ekipit kombëtar italian ka dhënë një intervistë për mikrofonat e “Casa Baggio” dhe “GazzaMercato”, duke kujtuar episodin e shumëdiskutuar të ndeshjes Juventus-Inter, në vitin 1998. Në të gjitha ato që thotë, ai mban ndjenjën e humorit, teksa një sy e ka vigjilent ndaj asaj që do të bëjnë bardhezinjtë e tij në Ligën e Kampionëve. Nuk ka munguar pyetja dhe përgjigjja e tij edhe për karrierën si trajner, veçanërisht për eksperiencën e ndërprerë në mes në stolin e Partizanit të Tiranës. Pyetja e gazetarit ishte: Pse eksperienca juaj me Partizan Tirana, me drejtor Luciano Moggi, përfundoi para kohe?
Përgjigjja e Iulianos është denoncuese për vërtetësinë e futbollit shqiptar. “Në fillim kisha hezitim për ta pranuar këtë ofertë dhe gjatë punës kuptova se ndjenjat e mia ishin të drejta. Kjo, për shkak se, për fat të keq, në Shqipëri u është dhënë mundësia futbollistëve, menaxherëve dhe presidentëve që të vënë baste për ndeshjet. Dhe e gjithë kjo më ka vënë shpesh në vështirësi, për shkak se ishte një ambient i kushtëzuar dhe për këtë arsye nuk mund të punoja i qetë. Shumë lojëra, sipas mendimit tim, kanë pasur rezultate të dyshimta. Më vonë hodha poshtë disa propozime për të drejtuar në Seria B dhe C. Tani dua të përgatis veten e të kthehem për të dhënë më të mirën”, u shpreh Iuliano.

Mbrojtësi i PSG-së, Marquinhos, mbështeti Neymarin që të shkëlqejë kundër Real Madridit, pavarësisht se është një objektiv i gjigantëve të La Liga-s. Neymar dhe PSG përballen me Real Madridin, në ndeshjen e parë të 1/8 finale të Ligës së Kampionëve, në “Santiago Bernabeu”. Deri në këtë përplasje, braziliani ndërkombëtar ka qenë i lidhur me një kalim në Madrid, pavarësisht se u bashkua me PSG-në vitin e kaluar. “Goal.com” kupton se Neymar, në fakt, do të lejohet të largohet nga “Parc des Princes” për në kryeqytetin spanjoll vetëm nëse PSG-ja do të fitojë Ligën e Kampionëve këtë sezon. Por Marquinhos tha se shoku i tij i skuadrës, i cili ka shënuar 28 gola këtë sezon, do t’i injorojë të gjitha spekulimet. “Neymar është një lojtar që kontrollon emocionet e tij dhe presionin e mirë. E demonstron këtë në fushë, tha mbrojtësi i parisienëve në një konferencë shtypi. Ai është një lojtar me personalitet, është duke bërë gjëra të mira në Paris”.

Pep Guardiola ishte i kënaqur me performancën e Manchester City-t në Basel, në mbrëmjen që i vë “qytetarët” në shortin e çerekfinaleve të Ligës së Kampionëve, më 16 mars. Manchester City fitoi 4-0 në Basel, që do të thoshte se duhet një mrekulli në stadiumin “Etihad”, më 7 mars, që të besuarit e Guardiolës të mos arrijnë në çerekfinale për herë të dytë në historinë e klubit. Tani, “qytetarët” mund të përqendrohen në ndeshjet e tyre të tjera në mars, duke përfshirë dy sfida kundër Arsenalit, në pesë ditë dhe një përballje e ethshme në Premier League, me Chelsea, në stadiumin “Etihad”, më 4 mars. “Është një rezultat i mrekullueshëm në këtë raund të këtij kompeticioni, tha Guardiola. Sidoqoftë, një raund në Ligën e Kampionëve zgjat 180 minuta. Të presim, edhe pse jemi pothuajse aty, në çerekfinale. Unë nuk jam duke thënë se gjithçka është bërë, sepse në futboll çdo gjë mund të ndodhë, por është një rezultat i mahnitshëm. Jam i kënaqur dhe tani do të përgatitemi për Wigan”.
Guardiola tha se nuk ishte aspak pritshmëri e tij që Manchester City ta vriste kualifikimin që në ndeshjen e parë: “Nuk isha duke menduar për këtë. Në përvojën time, kur luani në 1/8 finale të Champions-it, gjithmonë ka një ndeshje të dytë. Hapi i parë është të bëhet më mirë se sezonin e kaluar (kur Manchester City u eliminua në këtë fazë, nga Monako), pastaj është tjetër gjë mënyra se si arrijmë në çerekfinale”.
FC Basel është dukur i pashpresë teksa Manchester City i ka shkatërruar me rezultatin 4-0 në St. Jakob-Park duke mos i lënë asgjë fatit për ndeshjen e kthimit. Skuadra e Pep Guardiola-s është 99% në çerekfinale me rezultatin e djeshëm, me një Basel që asnjëherë nuk e vuri në vështirësi kundërshtarin megjithëse luante në fushën e tij.
City-t i duheshin vetëm 14’ minuta për të kaluar në avantazh me golin e Ilkay Gundogan dhe që nga ai moment kishte vetëm një ekip në fushë. Skuadra e Guardiola-s sundoi në Zvicër dhe shënoi edhe dy gola të tjerë brenda 10 minutave. Në fillim ishte Bernardo Silva dhe më pas Sergio Aguero me një goditje fantastike në hyrje të zonës.
Pas pushimit Guardiola vendosi të pushonte yjet e ekipit, teksa me kalimin e minutave ai nxori nga loja Sterling, De Bruyne dhe në fund fare Aguero. Por jo përpara se Gundogan të kompletonte dopietën e tij në minutën e 53’ duke mbyllur përfundimisht ndeshjen. Ajo e kthimit do të jetë një shëtitje në “Etihad” dhe me siguri pritet që trajneri spanjoll të lerë pushim disa prej yjeve të tij në pritje të kundërshtarit të radhës në çerekfinalen e Champions League.