Real Madrid do të ndeshet me Paris Saint-Germain dhe ish-lojtarin Angel di Maria-n në 1/8 e Champions League, me mesfushorin që ka paralajmëruar Los Blancos duke thënë se Parisi është më i fortë se një vit më parë. “Jemi më të fortë se sezonin e kaluar”, shprehet argjentinasi për faqen zyrtare të klubit parisien. “Të duhet më shumë se talent në ndeshje të tilla. Duhet edhe pak fat për të fituar”.
Sezoni i dobët i Los Blancos në La Liga ka bërë që skuadra të ketë vetëm një objektiv deri në fund dhe ai është Champions League, një kompeticion që e kanë fituar dy herët e fundit. “Real Madrid është një ekip i madh dhe gjithmonë paraqitet mirë në Champions League”, vijon ai. “Është një kompeticion komplet ndryshe nga kampionati. Ata nuk luajnë për të kontrolluar topin, ndeshjet ndaj Real Madrid janë shumë të vështira për të kontrolluar topin. Çelësi është të luajmë lojën tonë, ashtu siç kemi luajtur gjatë gjithë sezonit. Duhet të jemi të fokusuar në mbrojtje pasi ata mund të të ndëshkojnë në çdo moment”.
Di Maria paralajmëron Real Madrid
Zidane realist ndaj PSG-së
Zinedine Zidane ka dhënë një intervistë për “RTL”, në të cilën ai flet për ndeshjen e Ligës së Kampionëve kundër PSG-së, situatën aktuale të Real Madridit dhe merr mbi vete përgjegjësinë e momentit të keq të ekipit të bardhë: “Kam marrë vendimin për të mbajtur këtë ekip, kur gjërat nuk po shkojnë mirë. Çfarë do të bëj? Të them se është faji i lojtarëve? Jo, unë jam përgjegjës për të gjitha”. Po çfarë duhet të bëjë ai dhe “Los Blancos”, që të heshtin kritikët? Përgjigjet Zidane: “Të fitojmë ndeshjet, nuk ka asgjë tjetër. Ne mund të bëjmë gjëra të mira, por në fund mbetet rezultati. Ose duhet të fitoni, ose jeni kritikuar, veçanërisht në këto klube”.
Dy fjalë nga trajneri francez edhe për ndeshjen e Champions-it, kundër PSG-së: “Është një ekip dhe një klub që po ndryshon, PSG-ja përmirësohet çdo vit. Po zhvillon një sezon të pabesueshëm, por nuk jam i habitur. Drejtimi i Unai Emery është mjaft i mirë, rezultatet flasin për të”. Po e ardhmja e tij në Madrid, cila do të jetë? “Më pëlqen shumë Madridi, por e di që nuk do të zgjasë tërë jetën time qëndrimi këtu”, sqaron “Zizou”.
Gjermani, debat i ashpër në CDU
Pas negociatave dhe vendimit për krijimin e koalicionit të madh, nuk ka qetësi as në CDU. Tani po kontestohet ndarja e posteve, madje edhe vetë kancelarja Merkel.
Në CDU “ekziston një dëshpërim” i madh lidhur me vitet e ardhshme, thotë shefi i rinisë së CDU, Paul Ziemiak, për gazetën “Bild am Sonntag”. Kancelarja Angela Merkel “duhet të tregojë guxim dhe në ministri të futen edhe zëra kritikë”. Bëhet fjalë për të ardhmen e CDU-së si një parti popullore.
Ai kërkon nga kreu i partisë që në fund të shkurtit të bëhen publike para kongresit të partisë vendimet për emërimet në ministri, të cilat me marrëveshjen për koalicion, do t’i takojnë CDU-së dhe CSU-së. “Emrat duhet të bëhen publik”, thotë Ziemiak. Vetëm në këtë mënyrë, sipas tij, CDU mund të futet me një ndërgjegje të pastër në koalicion të ri me partitë e tjera.
Shumë politikanë të Unionit kanë kritikuar ndarjen e ministrive. Partia “me vetëm 20% të votave”, SPD, ka marrë gjashtë ministri, ndër to tri shumë të rëndësishme. Kjo ka shktaktuar pakënaqësi të mëdha tek CDU. Në veçanti humbja e Ministrisë së Financave ka shkaktuar protesta.
“Goditje e rëndë”
“Kjo të dhemb shumë”, thotë Jens Spahn, anëtar i kryesisë në CDU, për gazetën “Presse am Sonntag”. Fakt është që pa sakrifikuar këtë ministri, nuk ka pasur shanse të krijohet një koalicion me partinë SPD, por “çmimi është bukur i lartë”, tha Spahn. Për CDU-në është kjo një goditje e rëndë. Ministri Peter Altmaier relativizon këtë humbje. Natyrisht që humbja e kësaj ministrie paraqet humbje, sepse ka qenë një pjesë e identitetit të saj”, thotë ai për gazetën “Welt am Sonntag”. Nga ana tjetër, CDU do të ketë Ministrinë e Ekonomisë, që nuk e ka pasur për gati 10 vjet me radhë. Ndërsa Ministria e Financave, sipas të gjitha gjasave, do të drejtohet nga Olaf Scholz (SPD).
Lëkundja e karriges së kancelares Merkel?
Krahas debatit për humbjen e posteve ministrore, kohët e fundit janë shtuar zërat që kërkojnë edhe përfundimin e erës së kancelares Merkel. Deputeti i CDU Klaus-Peter Willsch ka kërkuar nga partia e tij që të përgatitet për kohën pas kancelares Merkel. “Ne duhet të mendojmë që tani se si do pozicionohemi pas kancelares”, tha Willsch për gazetën “Rheinischen Post”.
Edhe më konkret ishte Sekretari i Shtetit Spahn, i cili për gazetën “Presse am Sonntag”, foli për “kohën pas kancelares Merkel”. CDU ka njerëz të mirë gjithandej. Konkretisht ai foli për kryeministrin e Saksonisë, Michael Kretschmer, shefin e partisë në Tyringji Mike Mohring, zëvendëskryetaren Julia Klöckner, deputetin Carsten Linnemann dhe shefin e rinisë në CDU Ziemiak.
Spahn foli për një konkurrencë të denjë për postet udhëheqëse në CDU, “kur të vijë koha”. Christian Wagner i ka bërë thirrje kancelares Merkel që të japë një sinjal të qartë, sa më parë. Politikanët e përgjegjshëm mendojnë edhe për pasardhësit e tyre, por në këtë drejtim ende nuk ka asnjë sinjal. Në CDU mendohet se krerët e partisë duhet të ulen dhe të bisedojnë se si duhet evituar një katastrofë edhe më e madhe, pas rezultateve të dobëta që partia ka shënuar në zgjedhjet e fundit.
Rindërtimi i Irakut do të kushtojë 88 miliardë dollarë
Rindërtimi i Irakut pas tri vitesh luftë me militantët e grupit ekstremist, Shteti Islamik do të kushtojë 88.2 miliardë dollarë, duke vendosur shtëpitë si prioritet urgjent, kanë thënë zyrtarët irakianë në një konferencë ndërkombëtare gjatë ditës së sotme, transmeton Reuters.
Donatorët dhe investitorët janë mbledhur në Kuvajt gjatë kësaj jave për të diskutuar përpjekjet për rindërtimin e ekonomisë dhe infrastrukturës së Irakut.
Iraku ka shpallur fitore kundër Shtetit Islamik në muajin dhjetor, duke arritur të kthejë sërish gjithë territorin e pushtuar nga militantët më 2014 dhe 2015.
Rreth 22 miliardë dollarë do të nevojiten në një periudhë afatshkurtë derisa 66 milionë të tjerë në periudhë afatmesme, ka thënë Drejtori i Përgjithshëm në Ministrinë e Planifikimit, Qusay Adulfattah.
“Rindërtimi i Irakut do të thotë rikthimi i shpresës dhe stabilitetit, duke krijuar idenë se Iraku është në mesin e vendeve stabile në rajon dhe në botë”, ka thënë ministri i Planifikimit, Salman al-Jumaili, duke shtuar se rindërtimi është në një mënyrë edhe përgjegjësi e komunitetit ndërkombëtar.
Shtetet e Bashkuara që kanë qenë udhëheqëse të koalicionit, i cili ka ofruar ndihmë ajrore për forcat irakiane kundër militantëve të Shtetit Islamik, nuk planifikon të garantojë asnjë shumë të të hollave në konferencën e Kuvajtit, kanë thënë zyrtarët amerikanë.
Rreth 138,000 shtëpi janë dëmtuar, ndërsa gjysma e tyre janë shkatërruar plotësisht, ka thënë një anëtar i fondit për rindërtim.
Nju Jorku padit kompaninë Weinstein
Prokurorët e Nju Jorkut kanë ngritur padi kundër kompanisë Weinstein, pas supozimeve se kjo studio ka dështuar të mbrojë stafin nga producenti i filmit, Harvey Weinstein, raporton BBC.
Producenti i filmit është duke u përballur me dhjetëra akuza për abuzim seksual, duke përfshirë dhunimin.
Padia pretendon se Weinstein ka abuzuar me punëtoret e kompanisë dhe ka bërë kërcënime verbale për të vrarë anëtarët e stafit.
Avokati i Weinstein ka thënë se “hetimi i drejtë”, do të tregonte se shumica e supozimeve janë të pabaza.
Kompania Weinstein nuk ka komentuar ende rreth këtij rasti.
Në tetor të vitit të kaluar, The New York Times ka publikuar një raport që tregonte në detaje për akuzat e ngacmimeve seksuale kundër producentit.
Që nga ajo kohë më shumë se 50 gra, duke përfshirë emrat më të mëdhenj të Hollywoodit, kanë akuzuar producentin e filmit për sulme seksuale, ngacmime, abuzim dhe dhunim.
Talibanët vrasin 16 luftëtarë pro-qeveritarë
Zyrtarët afganë kanë thënë se në një sulm të talibanëve kanë vdekur 16 anëtarë të milicisë pro-qeveritare në jug të provincës Helmand.
Zyrtarët kanë thënë se një zonë që i përkiste burrave të milicisë në distriktin Gareshk ka qenë caku i sulmit më 10 shkurt.
Disa raportime kanë thënë se një infiltrues taliban që ka punuar me milicët për disa muaj ka kthyer armën forcave të milicisë para se të ikte me armët dhe municionin.
“Ne e dimë se një luftëtar taliban ka vrarë 16 milicë që kanë luftuar së bashku me forcat qeveritare, mirëpo nuk e dimë ende se kujt i përkasin këto forca”, ka thënë zëdhënësi i provincës, Omar Zëak.
Ai ka deklaruar se hetimi është duke vazhduar.
Talibanët kanë marrë përgjegjësinë për sulmin, duke thënë se dy talibanët që kanë qenë të përfshirë në sulm kanë arritur të ikin.
Qeveria e Kabulit e mbështetur nga Perëndimi ka qenë duke u përballur me talibanët dhe grupe të tjera militante nga tërheqja e grupeve të NATO-s më 2014.
Në javët e fundit, Kabuli ka qenë cak i disa sulmeve, duke përfshirë një sulm me makinë bombë në një zonë të populluar më 27 janar.
Nga ky sulm kanë vdekur më shumë se 100 persona derisa incidenti është pretenduar të ketë qenë vepër e talibanëve.
Në muajin gusht të vitit të kaluar presidenti amerikan Donald Trump ka prezantuar strategjinë e re për rajonin e Azisë Jugore, sipas së cilës Uashingtoni do të shtonte edhe 3000 trupa të tjerë në Afganistan.
Detyra e këtyre ushtarëve është planifikuar të fokusohet në trajnim, këshillim dhe misione kundër terrorizmit.
Shtetet e Bashkuara kanë aktualisht rreth 14,000 persona me uniformë në këtë shtet.
Rekordi europian, 132 mijë kërkesa për azil në BE nga Shqipëria në 2015-2017
Në shtatë vitet e fundit (2011-2017), nga Shqipëria janë larguar në total rreth 330 mijë persona, si emigrantë.
Të dhënat janë bërë publike sot nga një grafik i INSTAT, duke treguar faktin e dhimbshëm se 28 vjet pasi u shënua vala e parë e emigrimit, shqiptarët ende duan të ikin dhe shumë pak duan të kthehen.
Që nga viti 2011 vihet re që ka pasur një rritje të shqiptarëve që braktisin vendin. Në atë vit u shënua dhe numri më i lartë i të ikurve, me rreth 52 mijë. Pasi është zvogëluar gradualisht në vite, një valë e re emigracioni u shënua sërish në 2017, në rreth 40 mijë persona të ikur.
Ndërsa ka shumë persona që kthehen, numri i atyre që ikin mbetet gjithnjë më i lartë dhe diferenca është negative. Në 2017-n, në një zhvillim negativ, pasi migracioni neto është përkeqësuar.
Të dhënat e INSTAT tregojnë se në vitin 2017, numri i emigrantëve është 39.905 persona dhe numri i imigrantëve, 25.003 persona. Migracionit neto (diferenca midis imigrantëve dhe emigrantëve), rezulton -14.902 persona. Një vit më parë, diferenca ishte shumë më e ulët, më pak se 10 mijë persona. Kjo tregon se më shumë po ikin dhe më pak po kthehen.
Në shtatë vitet e fundit, njerëzit që kanë ikur janë të barabartë, ose më shumë sesa numri i banorëve që ka qarku i dytë më i madh i vendit, Fieri, me 302 mijë banorë. Më pas renditet qarku i Durrësi me 285 mijë.
Emigracioni, së bashku me rënien e lindshmërisë janë arsyet kryesore që po çojnë në tkurrjen e popullsisë. Instat raportoi sot se me 1 janar 2008 popullsia e Shqipërisë 2018, rezultoi 2.870.324 banorë duke pësuar një rënie me 0,2 % krahasuar me 1 Janar 2017.
INSTAT sqaron se Migracioni Neto (Lëvizjet e njerëzve që hyjnë dhe dalin nga vendi) është komponenti më i vështirë për t’u matur, duke qenë se Shqipëria nuk ka ende një regjistër popullsie. Në këtë mënyrë INSTAT thotë se përdor të dhënat më të mira ’proxy’ për vlerësimin e migracionit, duke u bazuar kryesisht në të dhënat e mbledhura nga moduli i migracionit nëpërmjet anketës së forcave të punës kombinuar me koeficientet e projeksioneve të popullsisë 2011-2031.
Fenomeni, pse po vazhdojnë të ikin shqiptarët
Emigracioni i trurit është duke dëmtuar rëndë edhe shërbimin shëndetësor në vend. Sipas të dhënave nga Urdhri i Mjekut, në tre vitet e fundit, e kanë lënë vendin më shumë se 600 mjekë, ku vetëm gjatë 2017 kanë kërkuar referencë largimi rreth 167 të tillë, kryesisht kardiologë, ortopedë, pediatër etj. Përgatitja e një mjeku kërkon së paku 20 vjet vetëm arsimim, ndaj zëvendësimi i tyre është i vështirë. Ndërkohë spitalet e Sarandës, Përmetit dhe Dibrës janë pothuajse pa stafe mjekësore.
Ndryshe nga fillimi i viteve 90, problematike është ikja e forcës së kualifikuar. Forca e aftë e punës ka qenë një problem i hershëm që ka shoqëruar sipërmarrjet shqiptare por, së fundmi, bizneset e sektorit call center, shërbimeve teknologjike dhe teknologjisë së informacionit kanë nisur të ndiejnë mungesën e interesit për të punësuar edhe operatorë të thjeshtë. Lorenc Goga, administrator i Facile.it, që ofron shërbime në ëeb marketing pohon se, në momente të caktuara, gjetja e disa profesioneve specifike ka qenë shumë e vështirë, jo vetëm për IT, por edhe për ekonomistë të profilit, menaxherë etj.
Sipas të dhënave të Eurostat, gjatë viteve 2015-2017 kanë kërkuar azil në vendet e Bashkimit Europian 132 mijë shqiptarë, por nga ana tjetër, mijëra të tjerë janë laruar nga vendi me kontrata pune, studime, me Lotarinë Amerikane, me aplikime për në Kanada ose po bashkohen me të afërmit e tyre, teksa emigracioni i paligjshëm po lulëzon deri në Australinë e largët.
Tjetër problem është ikja e moshave të reja, që do të sjellin probleme më vonë në forcën e punës, uljen e produktivitetit dhe skemën e pensionit.
Më e keqja është se gjysma e shqiptarëve që jetojnë në Shqipëri po planifikojnë të ikin nga vendi. Sipas anketimit që ka bërë Barometri i Ballkanit, 50% e të anketuarve më 2017 janë përgjigjur se po planifikojnë të largohen nga vendi. Kjo tendencë po vjen në rritje, pasi më 2016 kishin pohuar se po merrnin në konsideratë të largoheshin nga vendi 48% e të anketuarve.
Eksperti i ekonomisë, Selami Xhepa, tha se problemi i papunësisë dhe i krijimit të vendeve të punës dhe me paga të pëlqyeshme do të jetë një sfidë për të cilën nuk ka ndonjë adresim të posaçëm nga autoritetet publike edhe për 2018-n. Për këtë arsye, problematika sociale dhe ekonomike do të vazhdojë të mbetet e mprehtë dhe serioze dhe shqiptarët do të dëshirojnë të largohen gjithnjë e më shumë në kërkim të mundësive më të mira. FMN llogariti në një studim të fundit mbi efektet e emigracionit në ekonominë e Ballkanit se, PBB-ja e Shqipërisë ka humbur 18% në dy dekadat e fundit, si rezultat i largimit masiv të “trurit”.
Monitor
Lu kërkon ngritjen e padive penale ndaj ish-Kryeprokurorit Llalla. Ku qëndron problemi?
Ambasadori Lu ka kërkuar ngritjen e padive penale ndaj atyre që tërhiqen nga drejtësia duke nënkuptuar në këtë rast ish-Kryeprokurorin Llala, i cili u tërhoq nga drejtësia dy ditë më parë. “Tërheqja nuk i shfajëson këta ish-zyrtarë nga përgjegjësitë e mundshme penale për korrupsion apo shpërdorim detyre. Ata që kanë frikë nga vetting-u, duhet të kenë frikë edhe nga hetimet e pashmangshme penale”, theksoi ambasadori.
Të shtunën ish-kryeprokurori Adriatik Llalla i dorëzoi Presidentit kërkesën për t’u tërhequr nga e drejta e emërimit në Gjykatën e Apelit. Njëherësh, ai iu drejtua organeve të vettingut me kërkesën për të mos iu nënshtruar këtij procesi. “News 24” dhe “BalkanWeb” pyetën ambasadorin amerikan Donald Lu për këtë veprim të ish-kreut të akuzës, që jo pak herë është bërë pjesë edhe e fjalimeve kritikuese të zyrtarit të lartë amerikan.
Duke e konsideruar këtë si një akt individual, Ambasadori Lu thotë se spastrimi i drejtësisë nga të korruptuarit, është një arritje.
“Vendimi për t’u tërhequr është një vendim personal, por largimi i çdo gjykatësi apo prokurori të korruptuar e të paaftë, është një fitore në betejën për një sistem drejtësie më të mirë. Ata nuk mund të rikthehen në sistem për 15 vjet”, tha ambasadori Lu.
Në vijim të interesimit të “News24” për Llallën, kryediplomati amerikan në vendin tonë heq dyshimet nëse pas tërheqjes nga sistemi do t’i nënshtrohet ose jo procesit të vetting-ut.
Deklarata
“Tërheqja nuk i shfajëson këta ish-zyrtarë nga përgjegjësitë e mundshme penale për korrupsion apo shpërdorim detyre. Ata që kanë frikë nga vetting-u, duhet të kenë frikë edhe nga hetimet e pashmangshme penale”, theksoi ambasadori.
Mandati i Adriatik Llallës përfundoi më 7 dhjetor 2017, pas qëndrimit në krye të organit të akuzës për 5 vite. Gjatë procesit të zëvendësimit të tij me një prokuror të përkohshëm, ishte sërish Donald Lu që foli ashpër. Ai tha se Shqipëria duhet të zgjedhë një kryeprokuror, që të mos mbrojë më politikanët e korruptuar, duke iu referuar indirekt Adriatik Llallës, që sipas ambasadorit ka mbyllur çdo dosje korrupsioni.
Po përse lu ka reagzura në këtë mënyrë ndaj Llallës kjo mbetet për tu parë në marrëdhëniet problematike mes ambasadorit dhe llalës në të kaluarën, kur Llala tha se Lu i kishte kërkuar të mos hetonte një dosje të një kompanie.
Tre këshilla për blerjen e një banese që duhet të keni parasysh
Vendndodhja e pronës duhet të jetë e mirë. Sekreti është vendndodhja. Mos blini një shtëpi në lagje problematike, ku lëvizja natën është e rrezikshme. Një vendndodhje e mirë përcaktohet në përgjithësi nga një lagje e dëshirueshme, me shkolla të mira pranë, ka pranë institucione apo njësi biznesi, të cilat japin siguri për zonën.
Nëse blini një shtëpi në zonë shumë të zhurmshme, në kryqëzime ku trafiku i rënduar prish cilësinë e ajrit dhe shton ndotjen akustike, vlera do të jetë në rënie. Prandaj agjencitë e pasurive të paluajtshme nuk këshillojnë asnjëherë blerjet e shtëpive në vijën e parë të rrugëve kryesore. Kryesisht, individët preferojnë shtëpi me distancë të shkurtër nga vendi i punës dhe me akses të shpejtë në transportin publik. Sipas agjentëve të pasurive të paluajtshme, arsyeja kryesore që preferohen shtëpitë brenda Unazës është qasja e shpejtë në linjat e transportit publik.
Këshilla e dytë: Më mirë pak dhe saktë
Sipas agjentëve të pasurive të paluajtshme, shtëpitë me sipërfaqe më të mëdha janë më të vështira për t’u lënë me qira se sa shtëpitë me një sipërfaqe më të vogël. Konfigurimi i shtëpive 3+1 dhe deri-diku 2+1, ka pasur një rënie të çmimit të qirave. E kundërta ka ndodhur me sipërfaqet më të vogla.
Sipërfaqet e mëdha të shtëpive kërkojnë ose familje të mëdha, të cilat kostot e jetesës i kanë më të larta dhe mendojnë për zgjedhje më ekonomike, ose nga studentë të cilët ndajnë qiranë duke u bërë bashkë.
Këta të fundit nuk parapëlqehen shumë nga pronarët e shtëpive duke qenë se janë më të prirë për të mos qenë të qëndrueshëm, si dhe më pak të kujdesshëm ndaj shtëpive. Pronarëve iu rriten kostot e mirëmbajtës me studentë. Një tjetër zgjidhje praktike që japin agjentët e pasurive të paluajtshme në rastet e sipërfaqeve 3+1 është ndarja më praktike dhe maksimizimi i të ardhurave nga qiraja. Në rastet e 3+1, ata gjithmonë këshillojnë konfigurimin në dy apartamente 2+1 dhe 1+1, të cilët lihen më lehtë dhe mund të merren qira më të larta.
Këshilla e tretë: Shtëpi e re vs. shtëpi e vjetër
Të blesh një shtëpi të re, shpeshherë përkthehet në kosto më të ulëta për riparime dhe mirëmbajtje. Megjithatë shtëpitë e reja, kanë kosto të larta mobilimi. Sipas agjentëve të pasurive të paluajtshme, në fillim tentohet që shtëpitë e reja, të blera për t’u lëshuar me qira, të lihen fillimisht për zyra, pasi kërkohen më pak burime financiare për mobilim.
Nga ana tjetër, shtëpitë e reja në përgjithësi, nëse janë të ndërtuara sipas standardeve, janë eficiente për sa i përket energjisë. Më të ngrohta, më mirë të izoluara. Megjithatë, për ata që kanë një buxhet të kufizuar, në të njëjtën zonë, ku çmimet e qirave nuk kanë luhatje, çmimet e blerjeve të apartamenteve në varësi, nëse është pallat ekzistues apo i ri, ndryshojnë me rreth 200 euro për metër katror.
A ia vlen të blesh apartament tani, çfarë po ndodh me tregun?
Nga Ledina Loga
Tashmë e dypunësuar, Ina J., po kërkon që të shpërngulet me qira në shtëpi më pranë qendrës. Që kur u vendos në qytetin e Tiranës për të studiuar në moshën 18-vjeçare, ajo ka qëndruar në shtëpi me qira. Në fillimet e saj, qiranë e ndante me shoqet. Aktualisht jeton vetëm në zonën e Medresesë dhe paguan një qira mujore prej 25 mijë lekësh. Kohët e fundit Ina po kërkon që të ndryshojë shtëpi. Së pari nuk është e kënaqur me kushtet e banesës.
Segmenti i qirave i tregut të pasurive të paluajtshme ka ndryshuar shumë dhe Ina tregon për “Monitor” se shtëpitë me këtë nivel çmimesh në përgjithësi nuk kanë kushte të mira. Prej më shumë se një muaji, Ina është në kërkim të një shtëpie të re. Ajo është në kërkim të një shtëpie, brenda Unazës dhe pranë qendrës, që të mos kalojë qiranë mujore prej 30 mijë lekësh në muaj. Deri më tani, kërkimi i saj nuk ka rezultuar i frytshëm. Edhe pse i është drejtuar edhe agjencive të pasurive të paluajtshme, Ina tregon se nuk ka oferta të mjaftueshme në treg që të përmbushin kërkesat e saj.
Agjencitë e pasurive të paluajtshme argumentojnë se në këtë moment të tregut, në segmentin e qirave, kërkesa për të marrë me qira është e lartë, ndërsa çmimet nuk kanë pasur ndryshime të mëdha.
Në rrezen e parë, ku përfshihet zonat elitare si ish-Blloku, RTSH-ja, çmimet variojnë nga 500-600 euro/muaj. Zona, sipas agjentëve të pasurive të paluajtshme, preferohet për zyra nga biznesi, por edhe nga të huajt që punojnë në Shqipëri. Sipas inxhinieres Xheni Jahja nga Tirana Real Estate, çmimet e qirave kanë ruajtur një lloj stabiliteti, por ajo që ka ndryshuar, sipas saj, është kërkesa.
Jahja argumenton se rritja e kërkesës ka ardhur kryesisht prej biznesit, të cilët, nisur nga faktorë pozitivë, kanë kërkuar një vendndodhje më të mirë ose zgjerim të hapësirave operuese. Në zonën e ish-Bllokut, qiratë kanë pasur një lloj stabiliteti – tregon ajo. Të njëjtat nivele qiraje, kanë edhe zonat si Rruga e Kavajës dhe Rruga e Durrësit, lagje që kanë institucione me rëndësi apo ambasada. Në Rrugën e Kavajës, çmimet luhaten nga 450-600 euro për metër katror. Ndërkohë që brenda Unazës së Tiranës, për shtëpi me kushte optimale, çmimi i qirave nuk bie poshtë nivelit të 300 eurove. Shtëpitë që kanë një vlerë më të ulët se kjo, janë në pallatet ekzistuese, të pamobiluara mirë, me lagështirë dhe një sërë problemesh të tjera, shton Jahja.
Blerje për rihedhje në tregun e qirave
Duket se ekonomia shqiptare hedh poshtë çdo ligj ekonomik. Për dy të mira zëvendësuese (blerje dhe qira), kur rritet kërkesa për njërën, rrjedhimisht kërkesa për të mirën e dytë do të duhet të ulet. Aktualisht, segmenti i shitblerjeve të pasurive të paluajtshme është në lulëzim. Bumi i lejeve të pasurive të paluajtshme, i cili ka shtuar ofertën për banesa në kryeqytet, duket se nuk po e plotëson kërkesën për shtëpi në vend.
Çmimet e shtëpive kanë shënuar një rritje me 100-250 euro për metër katro muajt e fundit.
Rritja e çmimeve vjen në një periudhë kur oferta për apartamente të reja është më e lartë dhe lejet e ndërtimit shënuan rritje në tremujorin e tretë të vitit që lamë pas. Të dhënat e INSTAT tregojnë se ka një rritje të ndjeshme të lejeve të ndërtimit në kryeqytet. Për 9-mujorin 2017 janë dhënë gjithsej 167 leje ndërtimi nga 65 për të njëjtën periudhë të një viti më parë, me një rritje prej 157%. Krahas rritjes së lejeve të ndërtimit, po rriten çmimet, po ashtu edhe kërkesa.
Por, përveç rritjes së kërkesës për blerje banesash i lartë është edhe interesi për qira. Sipas Ing. Xheni Jahja, nga Tirana Real Estate, i gjithë qyteti i Tiranës jepet me qira. Konkretisht ka familje të cilat të ardhurat e tyre i kanë nga qiraja. Me normat aktuale të depozitave, individët po investojnë në blerjen e shtëpive, si formë më e mirë kthimi. Edhe Dritan Caka nga ‘DevInf’, konfirmon rritje të kërkesës, si për blerje apartamentesh ashtu edhe të kërkesës për apartamente me qira. Ai jep si arsye ndryshimet demografike, por shton se një kategori individësh me të ardhura të mira, si për shembull ata që ushtrojnë profesionet e lira, po blejnë një shtëpi të dytë si formë investimi për ta dhënë me qira.
Ulet kthimi nga qiraja në qendër
Sipas Numbeo.com, portalit me bazën më të gjerë të të dhënave për kostot e jetesës, treguesit e banesave, trafikut, krimit dhe ndotjes, Shqipëria nuk renditet më e para në rajon për sa i përket kthimit nga qiraja. Ky tregues përllogaritet si raport i qirasë vjetore me çmimin e apartamentit dhe shprehet si përqindje. Sipas të dhënave më të fundit të Numbeo-s, në krahasim me korrikun e vitit 2017, kthimi nga qiraja ka pësuar rënie për shtëpitë në qendër, duke reflektuar rritjen e çmimit të shtëpive në qendër të qytetit, me një rënie prej 0.2 pikë përqindje. Ndryshe nga qendra, kthimi i qirave në periferi është rritur me 0.1 pikë përqindje, duke qenë se edhe çmimet në periferi, sikurse tregojnë agjencitë e pasurive të paluajtshme kanë rënë.
Në korrik të vitit të kaluar, Shqipëria kryesonte në rajon për sa i përket këtij treguesi. Të dhënat e fundit të Numbeo-s rendisin Shkupin si qytetin ballkanik me kthimin më të lartë të qirave në qendër. Nga të dhënat më të fundit, kthimi vjetor i qirasë për apartamentet në qendër në Shqipëri është 3.7%, më poshtë mesatares së rajonit, që është 3.8%.
Për apartamentet më larg rrezes së parë të qendrës, kthimet nga qiraja vjetore janë më të larta, argumentuar me faktin se çmimet për blerje të banesave janë më të lira, ndërsa hendeku midis qirave nga qendra në periferi është më i ngushtë.
Kosova dhe Shqipëria kanë kthimin më të lartë nga qiraja në të gjithë rajonin, ku ky tregues përllogaritet rreth 5% në Kosovë dhe 4.94% në Shqipëri, 1 pikë për qind më shumë se mesatarja e rajonit për kthimin nga apartamentet në periferi.
Për këtë arsye, agjentët e pasurive të paluajtshme rekomandojnë blerjen e shtëpive më në periferi, për të pasur kthim më të lartë nga qiraja. Diferenca e çmimit të blerjes së një apartamenti nga zonat elitë si ish-Blloku apo zona pranë RTSH-së, me zonat po në afërsi të qendrës si Rruga e Kavajës, Myslym Shyri dhe Rruga e Durrësit, është nga 500 deri në 1000 euro për metër katror. Ndërkohë që sipas të dhënave që “Monitor” ka grumbulluar në terren dhe ka marrë nga agjencitë e pasurive të paluajtshme, diferencat në qira janë thuajse të papërfillshme.
Periferia bëhet më e lirë, qendra më e shtrenjtë
Duket se përqendrimi i kërkesës është vetëm në qendër. Si për segmentin e qirave, ashtu edhe të shitblerjeve të banesave, periferia duket se ka mbetur në vend. Për shkak të mungesës së lejeve për një kohë të gjatë brenda vijës së verdhë të Tiranës, periferia e kryeqytetit pa një rritje të lartë të numrit të ndërtimeve. Ish-Komuna e Kasharit dhe e Dajtit (skaji perëndimor dhe lindor i kryeqytetit) lulëzuan me ndërtime, që sipas aktorëve të tregut ishin pa cilësi dhe standarde. Në zonën e Unazës së Re (apo siç njihet zona e Astirit), agjencitë e pasurive të paluajtshme tregojnë se oferta për të shitur në atë zonë është më e lartë se kërkesa.
Ndërsa për sa i përket segmentit të qirave, zona në përgjithësi është zgjedhje e ndikuar nga faktorët ekonomikë, për individët me të ardhura të ulëta. Burime nga tregu referojnë se çmimet për banesë kanë arritur edhe në 400 euro për metër katror. Zona kryesisht ka probleme infrastrukturore, vështirësi të furnizimit me ujë, pasi kryesisht pallatet nuk kanë kontrata me ujësjellësin, por kanë puse kolektive që furnizojnë të gjithë pallatin. Shtimi i popullsisë në ato zona, gjithashtu ka nxjerrë në pah edhe një problem tjetër: mungesën e shkollave të arsimit parauniversitar.
Përpos kësaj, largësia me qendrën, ku pjesa më e madhe e vendeve të punës, po edhe universiteteve është përqendruar, e bën këtë zonë më pak të preferuar edhe për segmentin e qirave. Sipas agjencive të pasurive të paluajtshme, individët preferojnë të shpenzojnë më shumë për një banesë që të ketë afërsi me vendin ku punojnë apo studiojnë.
Të blesh një shtëpi që është e lehtë për t’u lënë me qira
Edhe pse një formë pasive investimi, blerja e pasurive të paluajtshme në tregun e Tiranës është një nga format më të sigurta të investimit. Qyteti i Tiranës është qendër jo vetëm e Shqipërisë, por e të gjithë trevave shqipfolëse. Thuajse një e treta e gjithë popullsisë së vendit është e përqendruar në kryeqytet, po ashtu edhe ekonomia.
Përpos kësaj si qendër universitare, Tirana ka një fluks të vazhdueshëm të banorëve të rinj. Duke qenë se kërkesa është e pashtershme, si nga biznesi për zyra, ashtu edhe nga individët, po rritet numri i investitorëve që blejnë për të rihedhur në tregun e qirave. Rritja e kërkesës për shtëpi është konfirmuar nga të gjithë aktorët e tregut, si dhe është reflektuar edhe nga çmimet e banesave, të cilat në zona të caktuara kanë shënuar rritje deri në 20%.
“Monitor”
Kryesore
Continue to the category
