Një skeç i ngjashëm nga ata të diktatorit me Nafijen dybekut që jepej në fillim të viteve ’90 është rishfaqur dje në studion e televizionit Top Channel në emisionin “Të pa ekspozuarit”. Kësaj rradhe personazh ka qenë një deputet i PS me emrin Alket Hyseni, i cili tha se “Kryeprokurorja do ta tundë”. Kjo ka mjaftuar që mes të ftuarve të nisë e qeshura.
‘Arta Marku do ta tundë mirë’, ky ka qenë mesazhi që ka lëshuar mbrëmë deputeti socialist Alket Hyseni gjatë ditës së djeshme. Nuk dihet se çfarë ka dashur të thotë tamam me këtë deklaratë deputeti i PS-së, e cila në fakt ngjan si një mesazh i koduar dhe që paralajmëron zhvillime të forta në muajt e ardhshëm.
Ndonëse shenjat e para të kësaj që sapo ka nisur, ngrenë shumë dyshime se Edi Rama kërkon të përdorë drejtësinë, pas kapjes së kryeprokurores, për të sulmuar kundërshtarët politikë. Për të përforcuar këtë vlen të theksojmë dhe deklaratën e kryeministrit dje në Kuvend, ku duke iu drejtuar Berishës u shpreh se shumë shpejt të dashurit e tij do të shkojnë në pranga. Na mbetet të presim dhe të shohim se ç’do të sjellin lëvizjet në Prokurori në muajt e ardhshëm.

Analistët: Drejtësia do të përdoret
Analisti Andi Bushati, i ftuar në emisionin “Të Paekspozuarit” në Top Channel, ka deklaruar se drejtësia rrezikon të kthehet në një armë që do të përdoret për sulm politik. Bushati tha se në çështjen Tahiri, ka shumë “rastësi”, të cilat po çojnë në mbylljen e procesit, ndërsa nga ana tjetër, po rihapen dosje të vjetra të opozitës, të cilat duhet të hetohen, por jo për tu përdorur politikisht.
“Kemi disa dosje të vjetra që hapen.
Unë nuk kam dyshim se duhet hetuar cështja CEZ. Problemi është ky. Kur folëm për pandëshkueshmërinë, është shumë e rëndë. por më e rëndë është pjesa që drejtësia të përdoret si armë politike. E kemi provuar këtë nga burgosja e njerëzve të opozitës, e deri te burgosja e gazetarëve. Drejtësia jo vetëm që nuk bën drejtësi, por mund të përdoret politikisht”.

Në kulmin e debatit mes Prokurorit të Përgjithshem, Adriatik Llalla dhe ambasadorit amerikan në Tirane, në rrjetet sociale është publikuar një dokument i pa botuar më parë.
Studiuesi Xhaferr Sadiku ka nxjerrë dokumentin e vitit 1947 ku Xhemal Llalla, babai i kryeprokurorit dënohej me burgim të përjetshem si agjent i CIA-s që synonte të rrëzonte regjimin komunist. Sipas vendimit, Xhemal Llalla akuzohej se ishte rekrutuar në shërbimin sekret amerikan kur kishte qenë nxënës i shkollës teknike të “Harry Fultz”.
Më 15 dhjetor 1947, në kinema “Labinoti” në Elbasan, përfundoi gjykimi i 15 të arrestuarëve, të cilët ishin:
1-Zija Luniku, 2- Fadil Gurmani, 3- Xhaferr Miraku, 4- Mahmut Maci, 5- Sabri Baholli, 6- Xhemal Llalla, 7- Veniamin Dashi, 8- Osman Duduci, 9- Seit Kuqi, 10- Qemal Hoxha, 11- Qamil Bylykbashi, 12- Mehmet Haxhihasani, 13- Ibrahim Plaka, 14- Virtyt Gjylbega dhe 15- Refat Haka.

• Zija Luniku, Fadil Gurmani, Xhaferr Miraku dhe Mahmut Maçi, me vdekje; • Xhemal Llalla e Sabri Baholli, me burgim të përjetshëm; • Veniamin Dashi e Osman Duduci, me nga 20 vjet; • Seit Kuqi me 15 vjet; • Qemal Hoxha e Qamil Bylykbashi, me nga 10 vjet; •Mehmet Haxhihasani e Ibrahim Plaka, me nga 7 vjet; • Virtyt Gjylbega me 5 vjet; • Refat Haka me 3 vjet burg.
Vendimi përmbante edhe konfiskimin e pasurisë dhe humbjen e të drejtës politike e civile.
Kështu, të dënuarit me vdekje humbisnin në mënyrë të përhershme të drejtat politike e civile.
Të dënuarit me burgim të përjetshëm, humbisnin të drejtat politike e civile për aq kohë;
Veniamin Dashi, Osman Duduci, Seit Kuqi, Qemal Hoxha, Qamil Bylykbashi, Mehmet Haxhihasani e Ibrahim Plaka, humbisnin të drejtat politike e civile për 5 vjet, ndrësa Virtyt Gjylbega për 3 vjet.

Parlamenti ka miratuar në heshtje listën me short të anëtarëve të përzgjedhur në mënyrë antikushtetuese në krye të KLP dhe KLGJ, dy institucioneve që do të bëjnë të famshmin veting të prokurorëve dhe gjyqtarëve që tani do të bëhet direkt nga zyra e Ramës. Më keq akoma do të jenë këto institucione, të cilët do të zgjedhin e Prokurorit të Përhershëm, që do të jetë tërësisht politik dhe në varësi të Ramës.
Është e qartë se kemi të bëjmë me një tepsi të re të drejtësisë që po merr formën e një pushteti kriminal dhe të korruptuar.
Ambasadori amerikan, Lu ka reaguar menjëherë pas votimit nga Parlamenti të listave për KLP dhe KLGJ, dy institucioneve drejtuese të Drejtësisë që do të bëjnë vetingun e gjyqtarëve dhe prokurorëve, por edhe do të zgjedhin Prokurorin e Përhershëm. Lu thotë në mesazh se beson më shumë tek lista e rastësishme që ka dalë në Parlament se tek përzgjedhja që do të bënte politika. Në fakt përzgjedhjen e ka bërë Rama, i cili përmes selektimit të kandidaturave nga Sekretari i Përgjithshëm iParlamentit futi në listë prokurorë dhe gjyqatarë të diktaturës që kanë ushtruar genocide ndaj shqiptarëve. A mund të jenë dakort Shtetet e Bashkuara me këto prokurorë dhe gjyqtarë të sistemit diktatorial që ofrohen politikisht për të bërë Reformën në Drejtësi?

Dy gjyqtarët dhe prokurorët e diktaturës që dënuan për rrëzimin e bustit të diktatorit
Bëhet fjalë për Fatmira Lulin dhe Nurihan Seitin, të cilat kanë qenë përkatësisht gjyqtare dhe prokurore, në procese politike të zhvilluara deri para mesit të vitit 1991, pra përpara institucionalizimit të pluralizmit në Shqipëri. Kryetari i Këshillit të Legjislacionit, Enkelejd Alibeaj, denoncoi dje me fakte sesi sistemi i ri i drejtësisë po kapet nga qeveria nëpërmjet promovimit në krye të sistemit të gjyqtarëve dhe prokurorëve të kohës së komunizimit, të përfshirë në gjyqe politike.
“Procesi për anëtarët e KLGJ dhe KLP prodhoi një rezultat dramatik, ku sot anëtarë të KLGJ dhe KLP janë jo vetëm kandidatë të përjashtuar nga ONM, jo vetëm kandidatë që nuk plotësojnë kriteret, jo vetëm kandidatë që nuk kanë paguar taksat, jo vetëm kandidatë të angazhuar në politikë, por edhe individë të kriminalizuar, për shkak se kanë dënuar politikisht qytetarët shqiptarë, thjesht se kanë menduar që liria dhe demokracia janë vlera që duhet të aplikohen edhe në shoqërinë tonë”, tha Alibeaj gjatë mbledhjes së Këshillit.
Për të faktuar këtë zoti Alibeaj publikoi vendimet politike të dhëna nga këta gjyqtarë dhe prokurorë, që janë zgjedhur të qeverisin sistemin e ri të drejtësisë në vend. Në këto vendime konstatohet se dënimet dhe akuzat ndaj qytetarëve shqiptarë, nga anëtarët e sotëm të KLGJ dhe KLP, janë dhënë për motive qartazi politike dhe me akuzë për tradhëti ndaj vijës së partisë dhe vlerave të partisë.
PD publikoi dje fotokopjet e vendimeve politike të dhëna nga ish-gjyqtarja Fatmira Luli (e zgjedhur si anëtare e KLGJ), apo ish-prokurorja Nurihan Seiti (e zgjedhur si anëtare e KLP).
Përkatësisht një vendim është dënim i dhënë nga Fatmira Luli në 19 prill 1991 për një person që ka marrë pjesë në 20 shkurt në rrëzimin e monumentit të Enver Hoxhës.
Gjithashtu, një tjetër vendim është dënim i dhënë nga Fatmira Luli për një person (minator i Valiasit) që kishte tentuar të futej në ambasadë pas hapjes së ambasadave më 2 korrik 1990.
Ndërkohë që nga dokumentat e PD janë 4 vendime që Nurihan Seiti (KLP) ka dhënë për 4 persona të ndryshëm për akuzat e agjitacion propagandë, kalim i paligjshëm i kufirit.

Shumica ka zyrtarizuar në Parlament vendimin e anti-amerikan të qeverisë për votën kundër SHBA në OKB për njohjen e Jeruzalkemit si kryeqytet të Izraelit. Me shumicë votash, shumica ka rrëzuar projekt-rezolutën e opozitës që kërkonte distancim dhe rishikim nga vota në OKB.
Partia Demokratike i paraqiti Kuvendit për miratim një projekt-rezolutë në lidhje me votën kundër të Shqipërisë ndaj SHBA-së në Kombet e Bashkuara, votim i kryer pas qëndrimit të shpallur nga Presidenti Donald Trump për njohjen e Jeruzalemit si kryeqytet i Izraelit.
Përmes pr/rezolutës i kërkohet Kuvendit të Shqipërisë të distancohet zyrtarisht e publikisht nga Komunikata Finale e Deklarata e Samitit të Organizatës së Bashkëpunimit lslamik, më 13 dhjetor 2017.
Gjithashtu i kërkohet të rishikojë votën për rezolutën “Për statusin e Jeruzalemit” të datës 21 dhjetor 2017, të Asamblesë së Përgjithshme të OKB e në përputhje me rregullat e OKB të deklarojë një qëndrim jo miratues ndaj kësaj rezolute.
Po kështu, kërkohet që brenda një muaji, qeveria të informojë Kuvendin lidhur me përmbushjen e detyrave si më lart.

Rezoluta e plotë
Megjithë kërkesat e vazhdueshme të Komisionit parlamentar për Punët e Jashtme, ministri për Europën dhe Punët e Jashtme, vijon të mos konsultohet me pushtetin ligjvënës, mbi çështje të rëndësishme që kanë të bëjnë me politikën e jashtme. Në këtë frymë mungese bashkëpunimi dhe konsultimi, ishte edhe qëndrimi i mbajtur nga qeveria shqiptare lidhur me Deklaratën e Samitit të Organizatës së Bashkëpunimit Islamik të mbledhur në Stamboll më 13 dhjetor 2017, e cila përmban veprime të njëanshme lidhur me statusin e Jeruzalemit, sulme të padrejta e të padobishme ndaj partnerit tonë strategjik Shteteve të Bashkuara të Amerikës, si dhe përjashtimin e tyre nga procesi i paqes në Lindjen e Mesme. Gjithashtu, pa asnjë proces konsultimi dhe informimi, ishte edhe vota pro në OKB ndaj Rezolutës “Për statusin e Jeruzalemit”, të miratuar më 21 dhjetor 2017.
Në këtë drejtim, vlerësojmë se qëndrime të tilla janë të papranueshme dhe Kuvendi duhet menjëherë të distancohet dhe të kërkojë nga qeveria, të ndërmarrë hapat e nevojshme për rregullimin e kësaj situate. Ndërmarrja e veprimeve aktive në kundërshtim me qëndrimin e partnerit tonë strategjik Shteteve të Bashkuara të Amerikës, nuk duhet të përkrahen nga ana e Kuvendit të Shqipërisë, sepse kjo bie ndesh me interesin tonë kombëtar dhe interesat e qytetarëve shqiptarë.
Nisur nga sa më lart, në mbështetje të nenit 98 dhe 99 të Rregullores së Kuvendit, paraqesim këtë mocion me qëllim zhvillimin e një debati në Kuvend për qëndrimet e papranueshme të qeverisë shqiptare mbi këtë çështje, sipas tekstit bashkëlidhur kësaj kërkese për zhvillimin e mocionit. Në mbështetje të nenit 55 të Rregullores së Kuvendit, bashkëlidhur ju dërgojmë për shqyrtim dhe miratim nga Kuvendi i Shqipërisë të projekt-rezolutës “Për ndryshimin e qëndrimit të mbajtur nga qeveria shqiptare mbi rezolutën ‘Për statusin e Jeruzalemit’” të OKB të datës 21 dhjetor 2017.
Duke synuar ruajtjen e paqes dhe stabilitetit në Lindjen e Mesme dhe në botë;
Duke qenë të vetëdijshëm për rolin e pazëvendësueshëm që Shtetet e Bashkuara të Amerikës (SHBA) luajnë e do të luajnë për tejkalimin e konflikteve, bashkekzistencën dhe vendosjen e demokracisë në atë rajon;
Duke pasur një besim të patundur se pozicionimi amerikan është në mbrojtje të vlerave, lirisë dhe parimeve universale;
Duke konsideruar SHBA si partnerin kryesor gjeostrategjik të vendit tonë, Kosovës së lirë, shqiptarëve në Maqedoni, Mal të Zi, Serbi e kudo ku janë;
Duke provuar konkretisht këtë rol të padiskutueshëm amerikan si fakton kryesor i arritjeve madhore jo vetëm për kombit tonë, por edhe për të gjithë rajonin tonë;
Duke shprehur miqësinë ndaj Shtetit të Izraelit, një vend mik dhe demokratik në Lindjen e Mesme;
Duke shprehur miqësinë ndaj popullit palestinez e duke përkrahur të drejtën e tij për të patur një shtet të qëndrueshëm përmes negociatave e marrëveshjes;
Duke mbështetur pa rezerva procesin e paqes përmes negociatave mes Izraelit dhe Autoritetit Palestinez, bazuar në vizionin e dy shteteve fqinjë e në paqe me njëri-tjetri e me vendet e rajonit;
Duke apeluar OKB, SHBA, BE dhe të gjithë aktorët ndërkombëtarë që të angazhohen në procesin e paqes në mënyrë aktive e konstruktive ne Lindjen e Mesme;
Duke konstatuar se disa komunikata e rezoluta të miratuara në dhjetor 2017 për këtë çështje janë të njëanshme, jokonstruktive, me gjuhë të papërshatshme dhe nuk i shërbejnë procesit të paqes e gjetjes së një marrëveshjeje mes palëve;
Duke qenë të shqetësuar nga miratimi nga ana e qeverisë shqiptare i Komunikatës Finale dhe Deklaratës së Samitit të Organizatës së Bashkëpunimit Islamik, të mbledhur në Stamboll më 13 dhjetor 2017, e cila përmban veprime të njëanshme lidhur me statusin e Jeruzalemit, sulme të padrejta e të padobishme ndaj SHBA, si dhe përjashtimin e tyre nga procesi i paqes në Lindjen e Mesme;
Duke qenë të shqetësuar nga vota pro e qeverisë shqiptare për Rezolutën “Për statusin e Jeruzalemit”, të miratuar më 21 dhjetor 2017 në Asamblenë e Përgjithshme të OKB, përmbajtja e së cilës nuk ndihmon në procesin e paqes dhe i kundërvihet qëndrimit të një vendi sovran, SHBA-ve, që kanë rol thelbësor për zgjidhjen e problemeve aty;
Duke gjykuar se miratimi nga ana jonë e këtyre rezolutave, që godasin vendimin e SHBA, është edhe një akt flagrant në kundërshtim me interesat tona kombëtare;
Duke shprehur keqardhje që këto veprime të qeverisë u bënë pa informuar Kuvendin e pa u konsultuar me Komisionin e Punëve të Jashtme, si dhe duke përjashtuar Presidentin e Republikës nga procesi konsultativ vendimmmarrës;
Kuvendi i Shqipërisë:
I kërkon menjëherë qeverisë:
1. Të distancohet zyrtarisht e publikisht nga Komunikatat Finale e Deklarata e Samitit të Organizatës së Bashkëpunimit Islamik, më 13 dhjetor 2017.
2. Të rishikojë votën për rezolutën “Për statusin e Jeruzalemit” të datës 21 dhjetor 2017, të Asamblesë së Përgjithshme të OKB, e në përputhje me rregullat e OKB të deklarojë një qëndrim jo miratues ndaj kësaj rezotute.
3. Të informojë brenda një muaji Kuvendin lidhur me përmbushjen e detyrave si më lart.