Kryeministri Sali Berisha doli në mbrojtje të medias dje në fjalën e tij të parë në seancën plenare të këtij sesioni. Berisha denoncoi atë që ai e quan qëndrim skizoid të kreut të ekzekutivit shqiptar, i cili pak ditë më parë u tha gazetarëve “mirëmëngjesi kazanë”. Berisha tha se duhet të miratohet sa më parë një rezolutë e quajtur “llum-kazanit”. “Jam këtu për të denoncuar para çdo shqiptari qëndrimin banditesk, të turpshëm, skizoid të kreut të ekzekutivit shqiptar, i cili si askush tjetër në planet kalon para një grupi njerëzish dhe u thotë mirëmëngjesi kazanë. Ky poshtërim kolektiv ndaj një grupi vajzash dhe djemsh që kanë për detyrë informimin e publikut, përbën një nga aktet më të pashembullta të skizës të kulturës staliniste. Të vërsulesh ndaj mediave të vendit me fjalën përmbledhëse kazan do të thotë se ke përzgjedhur fyerjen më të rëndë se çdo përmbajtje të veçantë të kazanit, do të thotë se, kafshërisht nuk kënaqesh me etiketimin me një nga përmbajtjet, por do të vërsulesh mbi çdo përmbajtje që ka kazani. Kam kërkuar një rezolutë që do të titullohej rezoluta e llum-kazanit, e cila duhet të dënojë para mbarë botës njeriun që drejton ekzekutivin dhe përdor këtë post që përdor etiketime të tilla që mund ta dëgjosh vetëm në spitalet psikiatrike. Kur një gazetare pati kurajën që denoncoi Olsi Ramën si pjesë të grupit të drogës së Xibrakës, llum-kazani i dërgon mesazherin e tij për të kërcënuar një nënë, një gazetare me fjalën e lirë dhe më pas urdhëron Gëllçin që t’i presë asaj rrogën si në Korenë e Veriut. Kërkoj të vihet në rend dite edhe rezoluta e llum-kazanit për të vendosur nderin në vend të medias shqiptare”, është shprehur Berisha.

Deputetët demokratë në takimin me delegacionin e Komisionit të Marrëdhënieve me Europën të Asamblesë Portugeze, vunë theksin në shkeljen e rëndë të Kushtetutës të votimit nga mazhoranca, pa ngritjen e KLP-së dhe pa vetting, i Prokurorit të Përgjithshëm.
“Reforma në Drejtësi që shpresojmë të japë rezultat, po kompromentohet nga veprime jo kushtetuese, siç ishte rasti i Prokurorit të Përgjithshëm. Nga Progres-Raporti i Komisionit Europian, citohej që duhej të ngrihej Këshilli i Lartë i Prokurorisë, i cili në realitet nuk u ngrit, dhe Prokurori i Përgjithshëm u votua vetëm nga votat e mazhorancës”, kanë deklaruar deputetët e djathtë.
Ata vunë në dukje çështjen “Tahiri”, si ish-ministrin që e ktheu vendin në kultivues të drogës.
“Ka sinjale pozitive nga Komisioni Europian, të cilët i kërkojnë qeverisë të hedhë hapat e duhur në mënyrë që të kemi zhvillime pozitive në mesin e vitit 2018. Por, fatkeqësisht shohim se qeveria nuk po bën çfarë nevojitet për politikanët dhe zyrtarët që e shndërruan vendin në kanabistan në 2016-ën, ministri Tahiri që ishte në vijën e parë të kanabizimit të vendit, mbrohet nga qeveria kur Prokuroria kërkon heqjen e imunitetit. Policët që në masë kanë kanabizuar vendin, janë përsëri në detyrë”.
Deputetët demokratë i thanë delegacionit se: “Korrupsioni qeveritar ka arritur nivele më të larta historike siç e tregojnë edhe konçesionet abuzive dhe kontratat e jashtëligjshme. Gjithashtu, administra publike e paraqitur si sukses deri në vitin 2017, po paraqitet nga Kryeministri si më e keqja e mundshme. Pas zgjedhjeve parlamentare ku u dëshmua blerja masive e votës, Reforma Zgjedhore nuk po ecën në hapat e duhura. Këshilli i Europës vuri disa kushte për heqjen e negociatave, si zgjedhjet e lira e të ndershme, lufta kundër krimit e korrupsionit dhe dekriminalizimi”.

Petrit Vasili, Kryetari i Grupit parlamentar të LSI-së, tha se në seancën e fundit të këtij Kuvendi u dhunua Kushtetuta me zgjedhjen e Prokurores së Përkohshme të Përgjithshme. “Rikthehemi në një sallë, e cila u dhunua në mënyrë flagrante nga Garda e Republikës, e cila u ngrit pa asnjë lloj kontrolli, duke vepruar në atë që quhet salla e të zgjedhurve të popullit”, tha Vasili, duke iu referuar situatës së krijuar në Kuvend në seancën e dhjetorit 2017. Vasili theksoi se, Edi Rama për shkak të frikës po tenton të kapë drejtësinë. “Vetingu ka rënë moralisht, pasi Kryeprokurori u zgjodh pa veting. Të parën e organit të akuzës e kemi pa veting, ndërkohë që betoheshim që vetingut nuk do t’i shpëtojnë asnjë prokuror apo gjyqtar, madje edhe policia. Ne zgjodhëm ONM, por opinionet e saj nuk përfillen as nga Sekretari i Përgjithshëm i Kuvendit. Dhe kjo po ndodh, pasi qëllimi është vetëm një: kapja e drejtësisë. Ky nuk është fati i një mazhorance apo opozite, por fati i Shqipërisë”, tha Vasili, në fjalën e tij në Kuvend. Sipas tij, për shkak të frikës që ka sot Rama po kapet drejtësia, po vihet në rrezik integrimi europian, të cilin kjo mazhorancë nuk e do, e ka frikë. “Zbatimi i Reformës në Drejtësi sipas Komisionit të Venecias kërkon tjetër qasje. Qytetarët këtë presin. Nëse 90 % e qytetarëve kërkojnë Reformën në Drejtësi, kjo nuk do të thotë se ato duan një drejtësi kundër interesave të tyre”, tha Vasili. Sipas tij, nga Sekretari i Përgjithshëm i Kuvendit sot disa opinione për disa kandidatë i merr parasysh, ndërsa për disa të tjerë as nuk i përfill. “Kjo është një betejë, një luftë e gjatë, për të cilën nuk do të ketë asnjë hap prapa, përsa i takon Kushtetueshmërisë dhe zbatimit të ligjit. Mbi Kushtetutën dhe Ligjin nuk mund të dalë askush, kushdo që del mbi to është ilegjitim”, tha Vasili.

Pyetjes mbi strategjinë që do të ndjekë Bashkimi Europian për integrimin e Ballkanit Perëndimor, zëdhënësja e Komisionit Europian për punët e jashtme, fqinjësinë e mirë, zgjerimin dhe negociatat për anëtarësim, Maja Koçijançiç, i është përgjigjur duke thënë se, viti 2018 përfaqëson një mundësi unike për Ballkanin Perëndimor në mënyrë që të bëjë hapa të patjetërsueshëm drejt rrugëtimit evropian, por nuk do të ketë nga ana tjetër asnjë kompromis në këtë çështje. Kjo, sqaron Koçijançiç, do të mund të arrihet vetëm nëpërmjet reformave kyç, atë në drejtësi dhe sundim të ligjit si dhe të drejtat themelore. “Bashkimi Europian është i qartë në pikën, se nuk do të bëjë asnjë kompromis me kriteret e anëtarësimit”, nënvizon Koçijançiç për “Scan”. Çdo progres serioz është i varur nga reformat, vijon ajo. Ndër të tjera, Koçijançiç thekson se perspektiva europiane vazhdon të udhëheqë transformimin e rajonit, gjë që është në interes edhe të Bashkimit Europian, çka është më e dukshme se asnjëherë më parë. Këtu, Koçijançiç ndalet duke sqaruar se, pavarësisht progresit ka ende shumë punë për t’u bërë, veçanërisht sa i përket reformave. Në mënyrë që të ruhet ky moment pozitiv në rajon, Komisioni Europian ka vendosur që të adresojë sfidat e secilit vend në mënyrë të detajuar. Strategjia do të miratohet në shkurt, ndërkohë që në muajin prill do të prezantohen raportet e detajuara për secilin vend, ku do të sqarohet edhe niveli i përgatitjes së vendeve të rajonit për t`iu bashkuar unionit”, thotë Koçijançiç për “Scan’.

Komisioni Qendror i Zgjedhjeve ka zëvendësuar sot deputetët Aqif Rakipi dhe Gledion Rehovica, të cilëve u hoqi mandatin disa ditë më parë.
Me unanimitet KQZ vendosi t’i japë mandatin e deputetit të PDIU-së në Elbasan kandidatit Dritan Bici dhe nga lista shumëemërore e LSI në Qarkun e Beratit, kandidates Silva Caka.
Ndërkohë me 4 vota pro dhe 3 kundër, KQZ vendosi që Florenc Xhindi të vijojë të mbajë mandatin e anëtarit të LSI në Këshillin Bashkiak të Beratit.
Administrata e Komisionit propozoi të kundërtën, pasi Xhindi nuk ka deklaruar në formular se ka qenë më herët i dënuar nga Gjykata e Sarandës për kalim të paligjshëm të kufirit.
Por sipas 3 anëtarëve të KQZ të propozuar nga PS dhe atij të propozuar nga LSI, nuk mund të konsiderohet fshehje informacioni një e dhënë që ndërkaq është publike, siç janë dënimet e gjykatave shqiptare.

Pak ditë para takimit të ministrave të Jashtëm të Shqipërisë e Greqisë, që do të mbahet në Korçë, Presidenti i Republikës greke, Prokopis Pavlopulos, ka drejtuar sërish një mesazh ndaj vendit fqinj. Kësaj here, Pavlopulos ka shfrytëzuar takimin me përfaqësues të diaporës greke dhe të organizatave të hebrenjve në SHBA, për të shpalosur qëndrimet e tij në marrëdhëniet me fqinjët. “Ne synojmë integrimin europian edhe të Shqipërisë fqinje. Mirëpo Shqipëria, që të ketë perspektivë europiane, duhet të respektojë të drejtën europiane dhe ndërkombëtare. Dhe një nga akset më të rëndësishme të së drejtës europiane dhe ndërkombëtare është respektimi i të drejtave themelore të njeriut. Dhe nga të drejtat themeltare të njeriut është posaçërisht e drejta mbi pronën dhe të drejtat e minoritetit. Përderisa ka respektim nga ana e Shqipërisë, ne jemi këtu që të ndihmojmë. Mirëpo, nëse nuk ka respektim, Shqipëria duhet të marrë përsipër pasojat. Të jemi të qartë: Ne nuk mund të bëjmë lëshime në emër të çfarëdo miqësie dhe fqinjësie të mirë”, ka deklaruar Pavlopulos. Presidenti grek ka përdorur një gjuhë ultimative edhe ndaj fqinjit verior të Greqisë, Maqedonisë, në kohën që Athina dhe Shkupi po intensifikojnë përpjekjet për zgjidhjen e çështjes së emrit, raporton Ora News. “Zgjidhja e kësaj çështjeje është kusht edhe për anëtarësimin e vendit fqinj në NATO dhe integrimin europian. Ju garantoj se ne grekët nuk kemi asnjë pretendim ndaj vendit fqinj dhe kemi çdo arsye të favorizojmë integrimin euro atlantik të tij. Mirëpo kjo ka një kusht: duhet të zgjidhet çështja e emrit. Duhet të jetë një emër që së pari të respektojë historinë; historia nuk falsifikohet. Dhe së dyti, ky emërtim nuk duhet të inkurajojë tendenca rivendikuese”, ka deklaruar Presidenti i Republikës greke. Siç duhet, Greqia e kundërshton emrin kushtetues të Maqedonisë, me argumentin se mbart pretendime territoriale ndaj Greqisë.