Albana VOKSHI

“3 lëndë në 6 orë” është një tjetër dëshmi se në krye të Ministrisë së Arsimit dhe të qeverisë kemi të pashkolluar!
“3 lëndë në 6 orë” eksperimenti i rrezikshëm i dyshes Rama-Nikolla,‎ dy njerëzve që çuan arsimin në greminë e po na përdorin fëmijët si kavie!
Çifti Rama-Nikolla prezantuan një nismë të hartuar në ilegalitet e që askush në Ministrinë e Arsimit nuk e kishte dëgjuar deri në momentin që e panë në televizorin e qeverisë. Në vend që të firmosin kontratat kolektive për 36 mijë mësues apo të punojnë për hartimin e akteve nënligjore të arsimit të lartë, të cilat duhet të kishin përfunduar tani e 2 vite më parë, sajojnë portale çdo ditë apo bëjnë eksperimente të rrezikshme si fasadë për të mbuluar dështimet e njëpasnjëshme të Rilindjes‎.
Asnjë studim, asnjë analizë, asnjë konsultim me asnjë forum mësuesish, prindërish, specialistësh apo me deputetë…. ‎thjesht një eksperiment i pamenduar, i lodhshëm dhe i destinuar të dështojë…
“3 lëndë në 6 orë” është nismë e dështuar.
E para, sepse nuk ka një tjetër vend të BE apo rajonit dhe botës ku zbatohet ky sistem;
E dyta, asnjë eksperiment apo nismë, qoftë edhe të studiuara mirë, nuk mund të ndërmerren në mes të një viti shkollor;
E treta, është një nismë e pabazuar në analiza, studime, konsultime. Ministria e Arsimit nuk është konsultuar as me Këshillin Rajonal të Arsimit Paraunivesriar (KRAP) që e ka detyrim ligjor (Ligji 69/2012/Neni 29);
E katërta, ende nuk janë shfuqizuar:
– Plani mësimor i arsimit 9-vjeçar dhe atij të mesëm;
– Programet mësimore për çdo lëndë;
– Udhëzimi i vitit të ri shkollor;
– Udhëzimi për nxënësit e ngujuar;
– Udhëzimi për mësimin në shtëpi;
– Udhëzimi për nxënësit me aftësi dhe nevoja ndryshe;
– Udhëzimi për shkollat e mesme me kohë të pjesshme;
Planet, të cilat janë hartuar mbi bazën e sistemit mësimor aktual… e jo nismave të pastudiuara;
E pesta‎, nuk ka asnjë studim apo vlerësim si do të realizohet ky program mësimor në shkollat që kanë klasa kolektive, apo ai do të organizohet mësimi në shkollat me turne;‎ apo si do të veprohet me nxënësit që ndjekin programin mësimor individual;
E gjashta, ‎koha për trajnimin e mësuesve, drejtuesve të shkollave dhe implementimin e nismës është krejt e pamjaftueshme. Askush, as vetë mësuesit, nuk e kanë të qartë çfarë do të bëhet, kur, si, me çfarë… Një nismë që siç thotë Kryeministri Rama “ma tha një prind nëpërmjet një portali” – do të zbatohet për 600 mijë nxënës, 36 mijë mësues e drejtues shkollash… në vetëm 2 javë kohë.
E shtata, s’ka asnjë vlerësim si do të ndikojë kjo nismë mbi institucionet e arsimit privat, që sipas nenit 46 të Ligjit 69/2012 zbatojnë planin dhe programin mësimor të miratuar në momentin e licencimit. Për çdo ndryshim kërkohet miratimi i ministrit.
“3 lëndë në 6 orë” – një projekt që ngre dhjetëra pyetje, probleme e shqetësime, por një gjë dihet qysh në krye të herës, dështimi i tij (për fat të keq) do t’u faturohet mësuesve. Stresit të mungesës së kontratave, tani do ju shtohet edhe stresi i amullisë dhe pamundësisë së realizimit të një eksperimenti të rrezikshëm për sistemin arsimor…
Por ju e dini se Edi Kryeministër nuk ka kohë për t’u thelluar në mësime, nuk e ka bërë as kur ka qenë nxënës.
“3 lëndë në 6 orë” është një tjetër dëshmi se në krye të Ministrisë së Arsimit dhe të qeverisë kemi të pashkolluar!

Kreu i Partisë Demokratike, Lulzim Basha ka reaguar për miratimin e ligjit të gjuhës shqipe në Parlamentin e Maqedonisë. Ndërsa e ka përshëndetur miratimin e ligjit që e bën gjuhën shqipe gjuhë zyrtare në Maqedoni, Basha ka theksuar se ky është një hap i suksesshëm për faktorin politik shqiptar në shtetin fqinj. “Miratimi i sotëm i ligjit të gjuhës shqipe nga Parlamenti i Maqedonisë, është një hap i rëndësishëm përpara në realizimin e statusit të gjuhës shqipe në Republikën e Maqedonisë. Përshëndes këtë hap si një sukses i bashkërendimit dhe bashkëpunimit të faktorit politik shqiptar në Maqedoni. Vlerësoj qëndrimin e forcave politike maqedonase që mbështetën me votën e tyre këtë ligj, i bindur se kjo votë është një kontribut i rëndësishëm për bashkëjetesën etnike dhe konsolidimin e një shoqërie demokratike në Maqedoni. Partia Demokratike nxit këtë klimë uniteti mes faktorit politik shqiptar dhe bashkëpunimi me atë politik maqedonas, si një garanci për një Maqedoni të orientuar drejt standardeve dhe vlerave euroatlantike dhe europiane”, u shpreh Basha. Edhe ish-Kryeministri Sali Berisha ka reaguar në lidhje votimin e ligjit për gjuhën shqipe në Parlamentin maqedonas, duke theksuar se zbatimi i këtij ligji do shënonte një fitore historike për shqiptarët e Maqedonisë dhe kombin shqiptar në tërësi. “Votimi i ligjit për gjuhën shqipe në Parlamentin e Maqedonisë, një arritje e madhe! Të dashur miq, sot Parlamenti i Maqedonisë në përputhje me Marrëveshjen e Ohrit miratoi ligjin për përdorimin e gjuhës shqipe në territorin e Republikës së Maqedonisë. Duke përshëndetur këtë akt të rëndësishëm dhe të gjitha ata që bënë të mundur votimin e tij, theksoj se zbatimi i këtij ligji do shënonte një fitore historike për shqiptarët e Maqedonisë dhe kombin shqiptar në tërësi!”, shprehet Berisha. Ndërsa ish-ministri i Jashtëm, Tritan Shehu, shprehet se miratimi i ligjit për përdorimin e Gjuhës Shqipe nga Parlamenti i Maqedonisë, një sukses tjetër i madh jo vetëm për shqiptarët në Maqedoni, por për të gjithë atë vend e rajonin tonë, për stabilitetin e të ardhmen europiane. “Miratimi sot i Ligjit për Përdorimin e Gjuhës Shqipe nga Parlamenti i Maqedonisë, një sukses tjetër i madh jo vetëm për shqiptarët e atjeshëm, por për të gjithë atë vend e Rajonin tonë, për stabilitetin e të ardhmen europiane. U realizua dhe një nga pikat e fundit të mbetura nga Marrëveshja e Ohrit. Ky hap shumë i rëndësishëm, plotëson më qartë arritjet mahnitëse që kombi i ynë ka prekur në këto 25 vite.
Unë dua të kujtoj sot disa nga ata që kontribuan fuqishëm për këtë rrugëtim në Maqedoni, që nga miku im i vjetër Arbër Xhaferri, te Mendu Thaçi e deri te politikani i shquar e i qartë Ali Ahmeti. Pa dyshim një meritë thelbësore i takon partnerëe tanë të mëdhenj SHBA e BE”, shprehet Shehu.

Ish-Kryeministri Berisha ka reaguar dje pas vendimit të Gjykatës së Strasburgut ndaj qeverisë shqiptare në lidhje me prishjen e pallatit në Vlorë dhe faturën 13 milionë euro që bie mbi kurrizin e qytetarëve shqiptarë. “Nuk është 13 milionë, por 2 miliardë euro gjoba e urrejtjes patologjike të skizofrenit Edi Rama për shqiptarët! Të dashur miq, javët e para të instalimit në pushtet Edi Rama i kremtoi duke shfryrë urrejtjen shtazore ndaj kundërshtarit politik dhe rrafshuar në kundërshtim flagrant në Vlorë një pallat të tërë vetëm se aksioner në ndërtimin e tij ishte vjehrri i kryetarit të opozitës. Pallati ishte ndërtuar në truall privat në përputhje me planin e qytetit me leje të rregullt të kryetarit socialist të Bashkisë së Vlorës dhe nuk kishte asnjë lidhje me projektin e Lungomares, por vetëm me urrejtjen kafshërore të pakontrolluar të paranojakut me kartelë klinike të botuar, ndaj kundërshtarit politik. Duke përshëndetur këtë vendim të Gjykatës Europiane të Strasburgut informoj shqiptarët se ky është vetëm fillimi, sepse gjobat që Shqipëria po merr e do të marrë nga arbitrazhet ndërkombëtare dhe Gjykatat e vendeve të mëdha si dhe Gjykata e Strasburgut arrijnë që tani, sipas disa burimeve të besueshme, në mbi 2 miliardë euro. Ju siguroj se kjo shumë, që ka lidhje vetëm me katër vitet e shkuara do rritet me shpejtësi çdo javë dhe muaj që Noriega qendron në pushtet. Gjobat e urrejtjes të të sëmurit psikik në krye të ekzekutivit janë një thirrje për çdo shqiptar të përmbysim sa më parë regjimin e tij”, shprehet Berisha në reagimin e tij.

Deputetja demokrate, Jorida Tabaku reagoi dje në lidhje me mbylljen masive të bizneseve në vitin 2017. “13 mijë biznese të mbyllura gjatë 2017 në Shqipërinë e taksave të larta, korrupsionit qeveritar dhe drogës si i vetmi biznes i subvencionuar nga qeveria. 36 biznese në ditë janë mbyllur vitin e shkuar dhe përgjigja e qeverisë për këtë situatë është rritja e taksave për bizneset. Vetëm në Tiranë mbyllen 12 biznese në ditë ndërsa hapen gjithnjë e më pak. Ky është rezultati i qeverisjes socialiste”, shprehet Tabaku në një reagim të saj.

Kur ka “të drejtë” Balla i Ramës…
Pas largimit tonë nga konferenca e kryetarëve, Balla, njeriu më i rëndësishëm i “Rilindjes” pas Ramës dhe zëvendësi i denjë i tij, është shprehur se paskemi ikur “prej frikës nga drejtësia”.
Refreni i dikurshëm i Ramës me “vettingun” duket se do të përsëritet trashë dhe neveritshëm. E meqë dhe Rama vetë e di se sa erë të qelbur lëshon një justifikim i tillë pas seancës së fundit parlamentare, ku pa vetting e kundër Kushtetutës u vetëzgjodh Prokuror i Përgjithshëm, e le që kjo të dalë nga goja e Ballës.
Ti bësh replikë Ballës është si të shkelësh me dëshirë mbi bajgë, po meqe ai mbetet përfaqësuesi më i denjë i Ramës…
Sipas Ramës me gojën e Ballës, unë dhe Mond Spaho paskemi frikë nga drejtësia kurse Rama, Balla, Tahiri, Beqja, Ahmetaj, Dako, Sejdini e me rradhë, janë ata që po luftojnë për drejtësinë e vërtetë…
Fatkeqësia është se këtë herë Rampalla “ka të drejtë; nga drejtësia që kërkon ai duhet të “kemi frikë” ne dhe qytetarët e thjeshtë e jo kriminelët e të korruptuarit në stanin e rampallëve.

Petrit Vasili, kryetari i Grupit të LSI, deklaroi sot se e vetmja forcë politike që nuk e do drejtësinë është Rilindja e kryeministrit Edi Rama. Po ashtu, njoftoi se LSI-ja e ka depozituar sërish padinë e ngritur ndaj Ramës, për thirrjen që ai i bëri Policisë së Shtetit gjatë fushatës elektorale që të mblidhte vota për PS-në.
Vasili, nga selia e LSI, tha se “Jemi në këtë komunikim së bashku lidhur me fillimin e sesionit të ri parlamentar më datë 15 janar, ku LSI-ja konfirmon pjesëmarrjen e saj në këtë seancë hapjeje dhe njëkohësisht, jemi këtu për të ndarë bashkë disa qëndrime politike dhe pozicionime shumë të qarta të LSI lidhur me procesin politik dhe Reformën në Drejtësi.
Së pari, kemi dëgjuar prej një kohe të gjatë dhe të vazhdueshme një maskaradë të Partisë Socialiste, të folësve apo suflerëve të saj lart e poshtë, lidhur me dëshirën e tyre për Reformën në Drejtësi.
Jam këtu për të konfirmuar njëherë e përgjithmonë se e vetmja forcë politike që nuk e do Reformën në Drejtësi, por kërkon vetëm një drejtësi të kapur, është Rilindja e kryeministrit Edi Rama.
Po kështu edhe ligji i Prokurorisë, mban vulën e votave të LSI, pa të cilat këto ligje nuk do të ishin sot në diskutim dhe do të kishim ngecje të reformave dhe sidomos të integrimit evropian.
Lidhur me procesin e integrimit, e vetmja forcë politike në mënyrë koherente ndër vite dhe sot që nuk ka parë interesin e saj, por të vendit, ka qenë LSI. E tillë ka qenë edhe kur PS, duke parë interesin e saj bllokoi procesin e integrimit për një prefekt në Fier.
Në të gjitha rastet e tjera, LSI ka qenë promovuese e konsensusit. Penguesit e mëdhënj kanë qenë ata që janë sot Rilindja, që nuk ka kursyer asnjë lloj fjalë kundër Shqipërisë që nga bllokimi i tre ligjeve apo historitë me Griseldën…
Ne e kemi mbështetur Reformën në Drejtësi dhe kjo ditë sot përkon me një moment shumë të rëndësishëm, sepse ne sot kemi ridepozituar para pak, padinë ndaj shtetasit Edi Rama, kryeministër sot në detyrë, lidhur me shkeljen flagrante të ligjit të padëgjuar në 25 vjet, kur ai bëri thirrje publikisht Policisë të linte e braktiste dhe të bënte vota për PS-në, duke rrënuar zgjedhjet dhe bëri njësh Policinë me krimin.
Pse e kemi ridepozituar dhe pse kjo padi sot është ridepozituar në Gjykatën e Krimeve të Rënda dhe në Gjykatën e Lartë? Për një arsye shumë të thjeshtë: Pasi Prokuroria, në kohë rekord, brenda 2-3 javësh – Prokuroria që nuk shqyrton çështje me vite të caktuara, që nuk çon deri në fund aferat kriminale të ish-ministrave – në dy javë e pak, e mbylli. Këtu kam vendimin, përgjigjen për mbylljen e çështjes që ne e kemi ridepozituar sot.
Këtë padi e depozitojmë sërish dhe po e ndajmë me publikun se në ç’pozicion qesharak bëhet Prokuroria kur kapet dhe kjo është Prokuroria që do të kapë Edi Rama. Pasi, Prokuroria thotë se “lidhur me deklaratën”, i referohet për ta mbyllur çështjen”, faljes që Kryeministri kërkon në Facebook”. Shumë e thjeshtë, sipas kësaj drejtësie, drejtësisë së Edi Ramë, një vrasës mund të vrasë e të kërkojë falje që të mos vejë në burg, një hajdut mund të vjedhë një pronë e të kërkojë ndjesë në Fb apo Twitter…”