Gjykata e Apelit ka ulur dënimin për ish-deputetin e mazhorancës, Mark Frroku. Frroku më parë ishte dënuar me 7 vite e 5 muaj burg, ndërsa Apeli i ka hequr akuzën e vrasjes dhe i ka ulur 1.5 vjet të dënimit. Frroku është dënuar për fshehje pasurie dhe të ardhurat. Frroku kishte kërkuar pafajësi në Gjykatën e Apelit, por kjo e fundit i ka hequr 17 muaj nga dënimi, duke e dënuar me 6 vite burg.
Ish-deputeti i mazhorancës u dënua në korrik të vitit të kaluar me 7 vite e 6 muaj heqje lirie, për akuzën e pastrimit të parave, fshehjes së pasurisë dhe ndërtim i paligjshëm. Prokuroria kërkoi 25 vite burg për Frrokun për akuzën e vrasjes. Frroku u shpall i pafajshëm nga Apeli për akuzën e vrasjes së Aleksandër Kurtit në vitin 1999, duke lënë në fuqi për këtë vepër penale vendimin e Shkallës së Parë.
Ankimimi në Apel ishte bërë nga të dyja palët, pasi Mark Frroku pretendonte pafajësi për të gjitha akuzat. Ndërsa Prokuroria kërkonte dënimin e ish-deputetit me 25 vite burg për vrasjen e 19 viteve më parë. Gjatë gjykimit në Shkallën e Parë, togat e zeza rrëzuan dëshmitë e disa oficerëve belgë, të cilët u pyetën në Gjykatën e Tiranës.
Ata patën deklaruar se, Frroku sëbashku me Kristian Marinajn kishin vrarë Aleksandër Kurtin. Edhe Marinaj u shpall i pafajshëm nga Gjykata për akuzën e vrasjes. Mark Frroku u arrestua në mars të 2015-ës për ‘çështjen Doshi’, por më pas u shtuan edhe akuzat e tjera.

Si u fut në grackë viktima dhe u vra nga Mark Frroku

Mark Frroku u akuzua nga Prokuroria belge për vrasjen e shtetasit Aleksandër Kurti, krim ky i ndodhur më 5 mars 1999. Vrasja ka ndodhur për shkak se një klient i një prej femrave që dyshohet se shfrytëzohen nga Mark Frroku, kishte rënë në dashuri me një prej prostitutave. Viktima kishte lënë takim me prostitutën L.S, kur ra në grackë dhe u vra nga Mark Frroku.
Mark Frroku gjatë qëndrimit në Belgjikë në kohën kur ka ndodhur vrasja, njihej me disa emra, konkretisht identitetet e përdorura prej tij sipas akuzës kanë qenë edhe: Besnik Morina, Dritan Frroku, Dritan Sofrani dhe Piro Sofrani.
Aleksandër Kurti u qëllua me thikë për vdekje nga 4 persona, ndërmjet të cilëve shtetasi Besnik Vuka, në hyrje të stacionit “Midi” në Sent-Zhille, Bruksel. Sipas Prokurorisë, referuar autoriteteve belge, Mark Frroku, besohet se është autor i përfshirë në këtë ngjarje. Frroku ishte i identifikuar nga autoritetet belge me emrin Besnik Morina, i njohur ndryshe si Dritan Frroku, apo edhe i njohur si Piro Sfrani (Sofrani). Disa dëshmitarë, i kanë treguar hetuesve belgë se Besnik Vuka ishte autori i goditjeve me thikë.

Vrasja në Belgjikë

Më datë 05.03.1999, viktima Aleksandër Kurti, lindur më 03.01.1975, u qëllua me thikë për vdekje nga 4 autorë, ndërmjet të cilëve shtetasi Besnik Vuka, në hyrje të stacionit “Midi” në Saint–Gilles, Bruksel. Autor i kësaj ngjarjeje besohet të jetë shtetasi Mark Frroku, i njohur ndryshe si Besnik Morina, i njohur ndryshe si Dritan Frroku, i njohur si Piro Sfrani (Sofrani).
Sipas disa dëshmitarëve, shtetasi Besnik Vuka ishte autori i goditjeve me thikë. Viktima kishte rënë në dashuri me një prostitutë, me emrin L.S. Kjo vrasje e paramenduar shtrihet brenda fushës së vrasjes mafioze e organizuar nga qarqet e tutorëve.
Vajza me iniciale L.S. kishte lënë takim me viktimën në ditën e ngjarjes (fakteve). Aleksandër Kurti kishte menduar se do të takonte prostitutën, por ai ra në grackë, e cila rezultoi fatale për të.
Kristian Kristian, i njohur si Arjan Bytyçi, si dhe Lek Bib Djafa ishin bashkëpunëtorë të Besnik Vukës. Dëshmitarët kishin përmendur numrin e autorëve. Ata u arratisën jashtë vendit, disa ditë pas ngjarjes. Një nga autorët e veprës penale të “vrasjes me paramendim” kryer në bashkëpunim, të viktimës Aleksandër Kurti më datë 05.03.1999, në Bruksel, është shtetasi Mark Frroku, ish-deputet i Kuvendit të Republikës së Shqipërisë.
Me vendim të datës 15 janar 2010 në mungesë, ndaj të akuzuarve Besnik Morina, Besnik Vuka, Arjan Bytyçi dhe Bib Lek Djafa, Gjykata e Krimeve të Rënda të Rrethit të Brukselit ka dënuar secilin prej tyre me nga 10 vjet heqje lirie.
Duke qenë se nga personat e dënuar është ankimuar vendimi i dënimit, Gjykata e Kasacionit, me vendimin e datës 24 mars 2010, ka kthyer çështjen për rigjykim Gjykatës për Krime të Rënda të Provincës Brabant-Wallon, Belgjikë.
Avokati i të akuzuarit Besnik Morina, i identifikuar si Mark Frroku, ka kërkuar shtyrjen e seancës gjyqësore të datës 31 janar 2014 për në datën 23 shkurt 2015.
Prokurori i Përgjithshëm i Brukselit e akuzon shtetasin Mark Frroku për kryerjen e veprës penale të “vrasjes me paramendim” kryer në bashkëpunim.

R.POLISI

Kryetari i Bashkisë Kamëz, Xhelal Mziu, priti në një takim ambasadorin e Çekisë, Jaroslav Ludva, i cili garantoi kryebashkiakun për mbështetjen që do t’i japë për situatën e përmbytjeve. Kryebashkiaku Mziu e informoi ambasadorin çek për punën e bërë nga Bashkia në investimet e vazhdueshme në infrastrukturë, sidomos në investime që kanë të bëjnë kryesisht me mbrojtjen ndaj përmbytjeve, sidomos në pika kritike të territorit.
Edhe pse Bashkia ka bërë investime të shumta në këtë drejtim, ku edhe gjatë reshjeve të fundit që shkaktuan përmbytje të mëdha, Bashkia Kamëz në mënyrë emergjente investoi rreth 300-400 milionë lekë të reja për t’i ardhur në ndihmë familjeve që pësuan përmbytje të rënda. Janë dërguar 140 projekte për financim, por qeveria shqiptare nuk ka financuar asnjë prej tyre.
Ambasadori i Republikës çeke siguroi mbështetjen e plotë të financimit të projekteve emergjente që ka Bashkia Kamëz për parandalimin e përmbytjeve në këtë zonë. Gjithashtu në diskutimin e tij kryebashkiaku Mziu e ftoi ambasadorin për të bërë të mundur sjelljen e biznesmenëve çekë në Kamëz për të sjellë pjesë të investimit të tyre, pasi Kamza ka një pozicion gjeografik mjaft të favorshëm për bizneset, duke theksuar se Shqipëria është një vend mjaft tërheqës për turistët, sidomos ata çekë që çdo vit e më tepër janë të pranishëm në vendin tonë.
Kryebashkiaku Mziu e nderoi ambasadorin çek, Jaroslav Ludva, me çertifikatën “Mirënjohja e Qytetit” për iniciativën dhe kontributin e ndërmarrë në ndihmë të Bashkisë dhe banorëve të Kamzës gjatë situatës së përmbytjeve, si dhe vazhdimin e marrëdhënieve ndërinstitucionale dhe zhvilluese në dobi të qytetarëve dhe qytetit.

Drejtori i Përgjithshëm i Policisë së Shtetit, Haki Çako u shkarkua dje nga kryeministri Rama. Në një njoftim të Ministrisë së Brendshme thuhet se, Çako u shkarkua nga detyra me propozim të ministrit të Brendshëm, Fatmir Xhafaj. Xhafaj e ka argumentuar kërkesën e tij, për shkarkimin e Çakos “me nevojën për ritëm më të shpejtë dhe dinamikë më të madhe pune, për një lidership të ri me energji të reja”. Në fakt, shkarkimi i drejtorit të Përgjithshëm të Policisë së Shtetit është bërë pas presionit të fortë të opozitës dhe ndërkombëtarëve.
Haki Çako gjatë dy viteve e gjysëm që ka qrnë në krye të Policisë së Shtetit ka zbatuar me përpikmëri urdhërat e Tahirit dhe Ramës për kanabizimin e të gjithë territorit të vendit dhe lejimin e trafikut të drogës drejt Italisë e Greqisë. Po ashtu, Çako zbatoi me përpikmëri urdhërin e Ramës për organizimin e bandave dhe trafikantëve të drogës në blerjen e votave në zgjedhjet e qershorit të vitit të kaluar. Policia nën drejtimin e Çakos u vu në shërbim të banditëve për të ushtruar presion dhe terror tek zgjedhësit për të votuar Partinë Socialiste si dhe për blerjen e votave me paratë e drogës.
Për t’i mbyllur gojën Çakos, ministri Xhafaj e ka falenderuar Çakon dhe ka vlerësuar kontributin, angazhimin dhe përkushtimin e tij në drejtimin e Policisë së Shtetit, gjatë viteve të fundit, pas shkarkimit të tij. Shkarkimi i Çakos u bë në prag të vizitës së prokurorit të ri të Antimafias italiane, Federico Cafiero de Raho. Bëhet e ditur se prokurori i ri i Antimafias italiane brenda janarit 2018 do të kryejë vizitën e parë zyrtare të tij në Shqipëri. Duket se Rama bëri kokë turku Çakon për t’i treguar kreut të Antimafias italiane se gjoja po lufton trafikun e drogës. Por ka dyshime të forta se shkarkimi i Çakos është bërë nga partnerët ndërkombëtarë.
Shkarimi i Çakos u komentua gjerësisht edhe nga politika. Lideri i opozitës, Lulzim Basha u shpreh për mediat se, shkakrimi i Çakos është shumë i vonuar dhe është një kokë turku, sepse krerët realë të trafikimit të drogës janë Rama, Tahiri dhe Xhafaj.
Kreu i Grupit parlamentar të PD, Edi Paloka u shpreh se, “shkarkimi i drejtorit të Përgjithshëm të Policisë Haki Çako, është koka e turkut, ndërsa kupola e drogës është Rama”. “Njerëzit e Tahirit” apo të Xhafajt, janë në radhë të parë njerëzit e Ramës. Shkarkimi i Çakos, ashtu si i Tahirit, janë lëvizje të detyruara të Ramës. Rama “preu” kokën e Çakos me shpresë se do të shpëtojë kokën e tij”, tha Paloka.
Edhe kreu i Grupit parlamentar të LSI-së, Petrit Vasili ka reaguar pas shkarkimit nga detyra të drejtorit të Përgjithshëm të Policisë, Haki Çako.
Vasili e ka ironizuar këtë lëvizje, pasi sipas tij, ata që janë të suksesshëm dekorohen dhe nuk largohen. Sipas tij, Rama e shiti ish-drejtorin me të cilin priu dhe u bë njësh me bandat dhe trafikantët në zgjedhjet e qershorit. “Edhe i “suksesshëm” edhe e shkarkuan Haki Çakon. Të “suksesshmit” zakonisht dekorohen, ndërsa këta i heqin. Gjithë ajo drogë pa fund në kohën e Çakos ishte një arritje e “paparë” dhe me paratë e së cilës kryeministri bleu zgjedhjet. Çfarë kryeministri mosmirënjohës, si e shiti ish-drejtorin me të cilin priu dhe u bë njësh me bandat dhe trafikantët në 25 qershor dhe me të cilin na vuri në faqet e para të të gjithë medias botërore”, shprehet ai.

Seanca gjyësore për çështjen Shullazi është shtyrë ditën e djeshme. I pandehuri Gilmando Dani kërkoi kohë për t’u përgatitur. Ai ka kërkuar kohë për t’iu përgjigjur pyetjeve të avokatëve. Ndërkohë Emiljano Shullazi i ka qëndruar deklarimeve se është i pafajshëm dhe se nuk ka kërcënuar asnjë person.
Gjykata për Krimet e Rënda përmbylli fazën e marrjes në pyetje të Emiljano Shullazit në procesin ku ai është i pandehur për “gjobëvënie”, “kanosje” e “grup të strukturuar kriminal”. Shullazi rikonfirmoi qëndrimin e tij mohues ndaj akuzave të Prokurorisë dhe pretendimeve të bëra në kallëzimin e biznesmenit Ylvi Beqja.
“Nuk e kam kërcënuar asnjëherë Ylvi Beqjen”. Përmes kësaj fraze të kthyer gati në një refren prej tij, Emiljano Shullazi rikonfirmoi të hënën qëndrimin e tij mohues ndaj akuzave të Prokurorisë. Pasi dha shpjegime për prokurorët në seancën e kaluar, në këtë seancë Shullazi iu përgjigj pyetjeve të bëra nga avokatët mbrojtës. I pandehuri tha se kishte firmosur tre akte noteriale gjatë marrëdhënies së tij me biznesmenin Beqja, i cili nga ana e tij pretendon se i ka dhuruar Shullazit një pjesë të ish-hotel Vollgës në kushte presioni.
“Noteret i njihte Ylvi Beqja. Unë nuk njihja asnjërën”, tha Shullazi. Sipas të akuzuarit si drejtues i një grupi kriminal të angazhuar në “gjobëvënie” dhe “kanosje” Ylvi Beqja kishte nënshkruar me dëshirë akt-marrëveshjet e bëra mes tyre tek noteri dhe se nuk kishte pasur asnjë shtrëngim ndaj tij apo personave të lidhur me të. “Nuk ka pasur asnjë arsye për mungesë vullneti nga ana e Beqjes. Ishte ai që më mori aty”, tha i pandehuri.
Ndryshe nga pretendimet e shfaqura më herët nga ana e biznesmenit Beqja, se Shullazi kishte shkuar tek noteret bashkë me “shpurën” e tij, vetë i pandehuri tha se kishte qenë i vetëm në këto takime. Pasi shpjegoi marrëdhëniet e tij miqësore apo familjare më të bashkëpandehurit, Shullazi i përjashtoi ata nga historia e gjobëvënies. Sipas tij, Endrit Qyqja, Endrit Zela dhe Blerim Shullazi nuk kishin asnjë dijeni mbi marrëdhëniet mes tij dhe biznesmenit Ylvi Beqja deri në momentin që u arrestuan. Më tej, Shullazi kujtoi se në një rast kur Beqja i kishte marrë një borxh prej 2 mijë euro Gilmando Danit. “Nuk di nëse ia ktheu më apo jo, s’i vura rëndësi”, tha Shullazi. Pas përfundimit të pyetjes së Shullazit trupi gjykues ftoi Gilmando Danin për të dhënë shpjegime. Ai dha pëlqim për t’u pyetur, por në një seancë tjetër, duke u bërë shkak për ndërprerjen e seancës.

Nga 25 pikat që në mënyrë të përmbledhur japin premtimet e qeverisë për 100 ditët e para të qeverisjes, 3 kanë të bëjnë me situatën e rendit: Përcaktimi i kornizës së Vetting-ut në Policinë e Shtetit, Lançimi i operacionit kombëtar kundër rrjeteve kriminale dhe Çrrënjosja e kanabisit dhe heqja përfundimisht e Shqipërisë nga harta e vendeve kultivuese.
Këto premtime rezultojnë pjesërisht të realizuara. Përcaktimi i kornizës së Vetting-ut për policinë ka përfunduar dhe projektligji do të diskutohet në Parlament me rifillimin e sesionit të ri më 15 janar. Pra, ky premtim mund të quhet i mbajtur, ndonëse pr/ligji nuk është bërë ende publik dhe efektet reale të tij pritet të ndihen shumë më vonë.
Premtimi i dytë në lëmin e rendit, ai për lançimin e një operacioni kombëtar kundër rrjeteve kriminale, mund të quhet pjesërisht i plotësuar. Operacioni “Forca e Ligjit” për goditjen e grupeve kriminale vërtet u lançua në fillim të nëntorit, por rezultatet e tij janë të vakta. Një rast i shfrytëzimit të prostitucionit u godit në Shkodër për të cilin procedimi penal kishte filluar 6 muaj më parë nga një denoncim i një organizate joqeveritare për të drejtat e njeriut. Rasti i dytë dhe i fundit i këtij operacioni të njoftuar me bujë ishte në Fier, ku operacioni përfundoi vetëm me sekuestrimin e disa gramëve kanabis, një pistolete dhe arrestimin e 3 personave, njëri prej të cilëve u lirua në arrest shtëpie.
Tani që formalisht operacioni ka nisur, policia mesa duket nuk ka specialistë hetimi për të luftuar grupet kriminale. Njoftimi i uniformave blu që bën thirrje për aplikime të bën të mendosh se Task Forcat rajonale dhe ajo qëndrore kanë mungesë burimesh njerëzore. Operacioni do të asistohet nga 7 hetues të huaj, ndërkohë që akoma po punohet për ngritjen e zyrave të Task Forcës qëndrore, ku do të vendosen edhe pajisjet speciale.
Lufta ndaj kanabisit, që ishte një tjetër premtim duket se është fituar përsa i përket kultivimit. Vrojtimi i fundit i territorit i Guardit di Financias më 3 nëntor nxori rreth 5000 bimë të kultivuara, ndërkohë që për vitin 2016 vetëm të raportuara si të asgjësuara nga policia kanë qenë rreth 2.5 milionë bimë.
Por, nëse është fituar lufta ndaj kultivimit, nuk mund të thuhet e njëjta gjë për trafikimin ndërkombëtar të drogës. Gjatë 100 ditëve ka pasur të paktën 4 tentativa për të kontrabanduar sasi të mëdha droge drejt Italisë dhe Greqisë që janë kapur nga policitë e vendeve fqinje, në ndonjë rast edhe me bashkëpunimin e policisë shqiptare./TCH/

Dy ditë pas grabitjes me maska dhe armë të mjetit tip “Benz”, Policia e Korçës nuk ka rënë në gjurmë të dy autorëve. Edhe pse në zonën ku ndodhi grabitja po vijojnë kontrollet në një perimetër të gjerë, deri tani policia, nuk ka mundur të gjejë as gjurmë të mjetit të grabitur dhe as të autorëve. Burime nga grupi hetimor konfirmojnë se 23 -vjeçarja, e cila mbrëmjen kur ndodhi ngjarja, ishte në shoqërinë e të riut, që ju grabit makina, është efektive policie. Ajo ka deklaruar para kolegëve, se nuk ka pasur konflikte dhe nuk i njihte autorët e grabitjes. Policia dyshon se mjeti i grabitur mund të çohet për pjesë këmbimi në pika servisi jashtë Qarkut të Korçes. Policia kërkon ndihmën e qytetarëve, duke ofruar 200 mijë lekë të reja për informacione që çojnë në zbulimin e vendndodhjes së mjetit, apo autorëve.
Burime thonë se po hetohet në pistën e grabitjes, por ka dyshime se autorët kanë njohje me 23-vjeçaren, e cila ishte brenda në automjetin e grabitur. Policia e Korçës është tepër e rezervuar në dhënien e informacioneve. Dyshohet se autorët janë larguar jashtë kufirit. Dhjetëra postblloqe policie janë ngritur në të gjithë qarkun për kapjen e autorëve por ende nuk ka persona të shoqëruar apo të dyshuar për ngjarjen.
Grabitja me armë ndodhi në rrethinat e qytetit të Korçës. Në vendin ku u grabit mjeti janë gjetur edhe 2 (dy) gëzhoja të kalibrit 7.62mm. Dyshohet që grabitësit kanë qëlluar në ajër. Më pas kanë goditur edhe 35-vjeçarin në fytyrë.