Rikthehen në detyra të rëndësishme ish-krerët e Policisë së Elbasanit të shkarkuar nga drejtori i Përgjithshëm i Policisë, Haki Çako në tetor të vitit të kaluar. 12 zyrtarë të Policisë së Elbasanit u shkarkuan në kuadër të masave ndëshkimore që u morën pas ngjarjes së rëndë, ku një makinë e blinduar e personave me precedent penalë goditi automjetin e zv/drejtorit të Rendit, Gjergji Oshafi.
Pikërisht ky i fundit, pak muaj pas shkarkimit me akuzën e mosveprimit ndaj elementëve kriminalë, është emëruar në Drejtorinë e Përgjithshme të Policisë së Tiranës si specialist në Sektorin e Narkotikeve.
Ndërkohë ish-drejtori i Policisë të Qarkut të Elbasanit, Arben Dashi, është transferuar në Drejtorinë e Përgjithshme të Policisë së Shtetit si drejtor i Analizës dhe Informacionit Kriminal.
Kryekomisar Zija Sulaj, pas shkarkimit në Elbasan është transferuar shef Komisariati në Dibër. Ky i fundit më parë ka mbajtur detyrën e Shefit të Komisariatit të Policisë Elbasan. Kryekomisar Kujtim Muça është emëruar shef i Drejtorisë së Kufirit në Dibër.
Ish-drejtuesit e Policisë së Elbasanit u akuzuan vitin që shkoi se nuk vepruan në kohë, duke mos arrestuar autorin e goditjes ndaj nëndrejtorit të policisë. Autori i dyshuar i këtij incidenti, Enea Bekteshi u kap vetëm pas ndërhyrjes së forcave RENEA nga Tirana që u dërguan në Elbasan për të vënë në kontroll situatën.
Kreu i Policisë së Shtetit komandoi si drejtor policie në këtë qark Altin Qaton, nga Drejtoria e Përgjithshme në Tiranë me qëllim ndryshimin e situatës dhe rritjen e forcës reaguese të strukturave të rendit.
Pak ditë më parë ministri i Brendshëm, Fatmir Xhafaj, zhvilloi në Elbasan një takim me strukturat lokale të policisë ku paralajmëroi hetimin e ngjarjeve të rënda pa autor dhe goditjen e grupeve kriminale që veprojnë në këtë qytet.

Një person ka mbetur i plagosur me armë zjarri në Tiranë. Ngjarja ka ndodhur dje në mesditë në zonën e Institutit, në Kamëz. Burimet e policisë bënë të ditur se, është plagosur shtetasi Korab Peposhi rreth 40 vjeç, me origjinë nga Kukësi, ndërsa autori i dyshuar i kësaj ngjarje është identifikuar si shtetasi A.Rushi. “Në rrugën e “Shkodrës”, pranë “Nish Tulla nr.3″ dhe urës së Institutit, dyshohet se është plagosur me armë zjarri shtetasi K.P., rreth 40 vjeç. Shtetasi i plagosur është dërguar në spital dhe ndodhet nën kujdesin e mjekëve”, sqaron policia.
Policia është vënë në ndjekje të autorit i cili ka mundur t’i shpëtojë patrullave të policisë. Nuk dihet ende shkaku i kësaj ngjarje, ndërsa mësohet se 40-vjeçari është dërguar në spital. Sipas dëshmitarëve i dëmtuari dhe autori para ngjarjes janë konfliktuar me njëri-tjetrin.
Autori i plagosjes së 40-vjeçarit Korab Peposhi në Kamëz, Fredi Rrushi nuk është një emër i panjohur për policinë, pasi rezulton person me precedent penal. Bëhet e ditur se, Rrushi ka qenë i dënuar më parë për një plagosje të ndodhur në Kamëz dy vite e ca më parë. Ndërkohë, edhe i plagosuri, Korab Peposhi është person me precedent penal, pasi në gusht të 2011 është arrestuar në Itali për kokainë.
Ngjarja e rëndë ku u përfshi Rrushi u regjistrua tre ditë para Vitit të Ri, në 28 dhjetor 2015, në vendin e quajtur Bulevardi “Blu”, pranë vilës nr. 23 Kamëz. Për këtë ngjarje u dënua me 10 vite burg i riu, Amarild Dushku, pasi plagosi rëndë, shtetasit Klevis Halili dhe Jurges Mullaj dhe 5 vite burg shokut të tij, Fredi Rushi.
Amarild Dushku dhe Fredi Rrushi pas një debati për hedhjen e fishekzjarrëve janë konfliktuar fizikisht me të dëmtuarit Klevis Halili dhe Jurges Mullaj. Më pas, pranë dy viktimave u afrua një mjet i tipit “Benz” me targa gjermane DO 107 C, i drejtuar nga i pandehuri Amarild Dushku, ndërsa brenda ishte dhe Fredi Rrushi, ndërsa është qëlluar me breshëri nga brenda me një armë zjarri ndaj Klevis Halilit dhe Jurges Mullajt.
Në atë kohë u raportua se shkaku i konfliktit ka qenë fakti, se Jurges Mullajit kishte hedhur një fishekzjarr në afërsi të një bilardoje ku ndodhej Amarild Dushku. Kaq ka mjaftuar që mes tyre të nis një sherr që degjeneroi deri në përdorimin e armës.

Gjykata e Shkallës së Parë në Tiranë është gjykata më e madhe në vend. Fluksi i çështjeve për një vit, bën që një pjesë e dosjeve të mbarten në vitin pasardhës. Kështu ka ndodhur edhe sivjet ku vetëm për çështjet penale janë mbartur nga viti i kaluar mbi 600 dosje.
Fluksi i madh i çështjeve penale që gjykohen në Gjykatën e Shkallës së Parë të Tiranës bën që për çdo fund viti një pjesë e çështjeve të mbarten në vitin pasardhës. Numri i dosjeve të mbartura nga viti në vit ka ardhur duke u zvogëluar, nga mbi 2 mijë dikur, në disa qindra sivjet. Por gjithsesi, mbartja e dosjeve nga një viti i kaluar, bën që për momentin në Gjykatën e Tiranës të mos hidhet short për të përcaktuar gjyqtarë për çështjet e reja të këtij viti.
Vitin e kaluar, Gjykata e Tiranës shqyrtoi gjithsej 2387 çështje penale, nga të cilat 366 nuk përfunduan brenda vitit. E njëjta situatë paraqitet edhe për kundërvajtjet penale.
Gjatë vitit 2017, Gjykata shqyrtoi 1711 çështje, nga të cilat 245 prej tyre janë mbartur për këtë vit. Nga dosjet penale numrin më të madh të çështjeve të mbartura e mbajnë ato çështje që kanë shënuar edhe numrin më të madh të procedimeve, dhuna në familje, vjedhja dhe ndërtimet pa leje. Ndërsa për kundërvajtjet penale numrin më të madh të çështjeve të mbartura e zënë ato për drejtim mjeti në mënyrë të parregullt.

Dy prej tre kushërinjve Lika, të cilët u arrestuan se qëlluan me armë natën e ndërrimit të viteve në Laç janë lënë në burg nga Gjykata. Tre të rinjtë qëlluan me armë në lagjen Sanxhak ku mesnatën e datës 31 dhjetor mbeti i vrarë nga një plumb qorr 16-vjeçari Klejdi Gjeta. Alban dhe Ernis Lika janë lënë në burg nga togat e zeza deri në përfundim të hetimeve.
Ndërsa Arbër Lika u lirua, duke caktuar si masë sigurie për arrestin shtëpiak. Vendimi i Gjykatës është kundërshtuar fort nga familjarët e tre të arrestuarve. Ata pretendojnë se djemve iu është adresuar një vepër që nuk e kanë kryer dhe se ata vetëm kanë qëlluar në ajër dhe nuk janë autorë të vrasjes së adoleshentit. Sipas tyre dy ngjarjet e ndodhura në Laç nuk kanë lidhje me njëra-tjetrën.
Por, sipas policisë tre kushërinjtë Lika kanë qëlluar me kallashnikov atë natë nëpër qytet natën e Vitit të Ri dhe kjo është e konfirmuar nga një video, të cilën të rinjtë e kanë hedhur në rrjetet sociale. Të arrestuarit u morën në pyetje nga grupi hetimor dhe pranuan se kishin qëlluar, por nuk treguan vendin ku kanë hedhur armën. Gjetja e armës është shumë e rëndësishme për hetimin. Kjo për faktin se duhet të bëhet krahasimi me plumbin që i mori jetën Klejdi Gjetës. Adoleshenti natën e ndërrimit të viteve ishte ngjitur në taracën e shtëpisë për të ndezur fishekzjarret, por humbi jetën nga një plumb qorr që e goditi në kokë.

Rrëfimi i një 18-vjeçareje nga Durrësi që është shfrytëzuar si prostitutë në Francë, ka zbuluar një rrjet trafikantësh të cilët janë nën hetim në Francë, Shqipëri e Itali. Vajza me inicialet A.K, gjimnaziste në një shkollë në qytetin bregdetar, vendosi t’u shpëtojë trafikantëve, duke u hedhur mbi një makinë policie në Bordo.
Prej tetë muajsh vajza ka marrë në Francë statusin e viktimave që mbrohen nga shteti. Autoritetet franceze u kanë përcjellë Krimeve të Rënda rrëfimin e vajzës. Hetimi i mëtejshëm i autoriteteve shqiptare, ka shpëtuar edhe dy vajza të tjera në Shqipëri, që ishin gati të trafikoheshin në të njëjtën mënyrë, por kësaj here në Itali.
Në pranga në Shqipëri ranë 3 persona, në Francë 2 persona, i akuzuari si tutor Nuredin Dumani dhe një taksist. Kurse hetimet në Shqipëri dhe Itali pritet të nxjerrë emra të tjerë të implikuarish.
Vajza nga Durrësi me inicialet A.K u ka rrëfyer me detaje autoriteteve franceze në Bordo, historinë e saj. “Isha në shkollë, kur një shoqja ime më foli për Nuredin Dumanin, më tregoi se ai donte të martohej shprehet vajza e trafikuar. Vajza tregon se ka vazhduar komunikimin me Nuredin Dumanin përmes rrjetit social Facebook. Ai më thoshte që jetonte në Belgjikë dhe se me të jeta ime do të ndryshonte”, ka treguar ajo.
Prokuroria shqiptare ka dyshime se në fakt gjatë kësaj kohe i akuzuari mbahej në një burg në Shqipëri për veprën e vjedhjes. Pas propozimit për martesë, trafikanti kishte takuar të atin e vajzës, i cili kishte refuzuar bashkimin e tyre. “Duhet të zgjedhesh o familjen, o djalin”, ka dhënë ultimatumin i ati.
“Unë zgjodha familjen”, shprehet vajza e trafikuar. Pikërisht në këtë moment kanë filluar edhe kërcënimet për jetën. Rezulton se Nuredin Dumani ka fotografuar motrën 3-vjeçare të adoleshentes A.K dhe me këtë e ka kërcënuar në Facebook.
“Do ta vras motrën, po nuk u martove me mua”, mësohet ta ketë kërcënuar ai. Pas një vargu kërcënimesh, vajza ka udhëtuar drejt Francës me mendimin se po martohej, por brenda javës ka përfunduar prej tij në rrugë.
Në dosjen e dorëzuar Shqipërisë, autoritetet franceze shprehen se në një rast vajza është arratisur prej trafikantit, por një tjetër femër pjesë e rrjetit e ka rikthyer në rrugë. Vajza mundi t’i shpëtojë rrugës vetëm më 20 mars 2017, kur ajo u hodh para makinës së policisë franceze në Bordo.

Një aksident i rëndë rrugor u shënua mbrëmjen e së premtes në segmentin rrugor Shkodër-Koplik, në vendin e quajtur “Ura e Vrakës”. Automjeti me targa italiane, drejtuar nga 35-vjeçari Emiljano Zeneli banues në Malësi të Madhe, përplasi për vdekje 66-vjeçarin Xheladin Ivziku nga Shtoji i ri.
Ky i fundit ka qenë duke ecur me biçikletë në drejtim të fshatit të tij, kur si pasojë e shpejtësisë në lëvizje, është përplasur nga mjeti tip “Ford” dhe nga goditja e marrë, ka gjetur vdekjen në vend, duke mos arritur të dërgohet i gjallë në spital. Menjëherë në vendngjarje mbërritën forcat e policisë dhe grupi ekspertizës, të cilat nisën punën për zbardhjen e plotë të shkaqeve të këtij aksidenti.
Nga këqyrja e bërë në terren, konstatohen gjurmët e lëna nga shenja e frenimit, ç’ka tregon se mjeti ka qenë duke ecur me shpejtësi tej normave të lejuara dhe pasi ka parë biçikletën, drejtuesi Zeneli ka tentuar të frenojë, por e ka patur të pamundur të shmangë goditjen. 66-vjeçari si pasojë e përplasjes ka marrë goditje të forta në kokë, ç’ka edhe i kanë shkaktuar vdekjen thonë burime paraprake të policisë.
Trupi i pajetë u dërgua në Morgun e Spitalit Rajonal të Shkodrës, ndërsa i riu Zeneli që mësohet se është emigrant i kthyer për pushime në atdhe, u shoqërua në mjediset e komisariatit deri në sqarimin e plotë të rrethanave.

Një i moshuar mbeti i vdekur, nga asfiksia, pasi zjarri përfshiu banesën ku ai jetonte i vetëm në rrugën “Frosina Plaku”. Ngjarja ndodhi ditën e djeshme, kur pensionisti Spiro Ndino 85 vjeç, kishte lënë ndezur furrnellën për t’u ngrohur. Një batanije që i moshuari kishte lënë pranë furrnellës kishte marrë flakë fillimisht. Më pas, zjarri përfshiu të gjithë dhomën në të cilën po flinte 85-vjeçari Spiro Ndino.
Ndihma e fqinjëve qe tepër e vonuar, për shkak se tymi kishte asfiksuar të moshuarin. Banorët njoftuan policinë dhe zjarrfikësen dhe u përpoqën të ndihmonin të moshuarin. Pavarësisht përpjekjes së tyre, i moshuari ndërroi jetë menjëherë. Zjarrfikësit mundën të izolonin zjarrin dhe më pas të ndërhynin. Nga këqyrja e zjarrfikësve u konfirmua se zjarri ishte shkaktuar nga ndezja e batanijes, e cila kishte qenë fare pranë furrnellës.
I moshuari jetonte vetëm në banesë, pasi bashkëshortja i kishte vdekur. Pas veprimeve në vendin e ngjarjes, trupi i të moshuarit u përcoll në morgun e kryeqytetit për veprime të mëtejshme.