Nënkryetarja e Komisionit të Ekonomisë, Jorida Tabaku, reagoi për naftëtarët që protestojnë për mosmarrjen e pagës, duke sjellë fakte se gjendja e tyre është pasojë direkte e korrupsionit të kryeministrit Rama dhe qeverisë së tij. Jorida Tabaku theksoi se: “Qeveria mashtroi naftëtarët dhe shqiptarët, kur tha se ARMO-n do ta blejnë amerikanet. ARMO zotërohet nga një kompani offshore, pas të cilës fshihet miku i Edi Ramës, Besnik Sulaj. Brenda 1 viti kompania offshore nuk ka paguar rreth 30 milionë euro taksa. PD denoncoi një vit më parë skemën korruptive dhe parashikoi situatën e sotme, si pasojë e vjedhjes së pasurisë kombëtare nga qeveria e Edi Ramës”. “Kush po vjedh Shqipërinë dhe punëtorët e rafinerisë? Në ditët e fundit të vitit është shumë e trishtueshme të shohësh se si një qeveri që punon për klientelën e saj të bëj kurban mbi 1000 familje vetëm për t’i dhënë mundësi një biznesmeni të lidhur ngushte me qeverinë. Punonjësit që sot u takuan me ministrin Gjiknuri janë të njëjtët që një vit më parë iu premtua e ardhmja e ndritur sepse kompaninë ARMO e kish blerë miku dhe klienti i kryeministrit Rama, i famshmi Besnik Sulaj. Paturpësisht, siç edhe zakoni ia do, kryeministri dhe ministri gënjyen punonjësit e rafinerisë duke i premtuar një kompani amerikane. Por e vërteta ishte se pas kompanisë që morri me qera ARMO-n ishte një kompani offshore që lidhej ngushtësisht me mikun e afërt të kryeministrit. Kompania IRTC sh.a (Ionian Refining & Trading Company) qëaktualisht zotëron aksionet dhe që nuk ka paguar naftëtarët ështëgjithashtu edhe një prej kompanive që brenda 11 muajve (nëntor 2016-shtator 2017) ka krijuar një borxh tek tatimet prej 3.7 mld lekësh. Ky detyrim nëse i shtohet dhe vlerës prej 9.5 mld lekësh të ARMOS jep totalin e 13.2 mld lekësh detyrime të prapambetura të cilat kompania i detyrohet buxhetit të shtetit. Vitin e shkuar, në emër të opozitës e kam denoncuar skemën korruptive dhe klienteliste që kryeministri përdori për t’i dhuruar klientit të preferuar një pasuri kombëtare. Fatkeqësisht ajo çfarë parathamë si opozitë u materializua këto ditë. Paralajmëruam vjedhjen dhe mospagimin e rrogave, paralajmëruam mospagimin e taksave dhe përdorimin e kompanisë offshore që këto taksa mos të paguhen. Ja ku jemi sot! Në atë periudhë mazhoranca vazhdoi orkestrimin e sulmeve pa iu përgjigjur asnjë akuze të ngritur nga opozita ndërsa sot për fatin e keq qeveria jo vetëm ka lënë në mëshirë të fatit gjoja investimin amerikan, por u ka falur detyrimet tatimore kompanisë offshore. Ndërkohë që punonjësve që nuk kanë marrë rrogë ministri i sorollat me premtime boshe dhe pa zgjidhje reale. Fatkeqësisht, punonjësit që sot janë edhe dhunuar nga policia janë viktimat që qeveria e korrupsionit dhe oligarkisë rilindase përdor për t’i dhuruar pasuri kombëtare miqve të kryeministrit nëpërmjet skemave offshore. Shqiptarët ndërkohë vazhdojne pagesën e taksave te rritura, bizneset e vogla mbyllin qepenat që kompanitë offshore te lidhura me qeverine te mos paguajnë, pasi është shumë e kuptueshme që 30 milionë euro që IRTC nuk ka paguar taksa për një vit do ta paguajnë shqiptarët përmes taksave të rritura. Të vetmit që përfitojnë nga e gjithë kjo situatë janë kryeministri Rama dhe bizneset prane tij. Janë ata që përfitojnë ndërkohë që qindra familje vazhdojnë të marshojnë për të drejtat e tyre përballë një qeverie të zhytur në luksin dhe makutërinë që korrupsioni dhe oligarkia prodhon!”

Deputeti demokrat, Eduard Halimi deklaron se dorëzimi i kryeprokurorit tek kryeministri, si akti i parë i Reformës në Drejtësi është degradim i shtetit të së drejtës. Përmes një statusi në profilin e tij, në rrjetin social Facebook, Halimi thekson se e vetmja rrugë për t’i dhënë fund zhbërjes së shtett të së drejtë është një reagim i fortë brenda dhe jashtë Parlamentit.
“Caktimi i Prokurorit të Përgjithshëm nga Kryeministri dhe nga Partia Socialiste në pushtet, në mënyrë antikushtetuese me kundërshti të forta të opozitës është një ditë e keqe për shtetin ligjor dhe demokracinë.
Kjo nuk është një çështje mes opozitës dhe qeverisë: është çështje e gjithë shqiptarëve.
Kur kryeministri cakton i vetëm Prokurorin e Përgjithshëm të Republikës, ai ka mundësi të ndërhyjë në hetime.
Dorëzimi i Prokurorisë tek Kryeministri është degradim i Reformës në Drejtësi që u votua me 140 vota. Se si e degradon drejtësinë Kryeministri mjafton të shohësh si shembull degradimin që i bëri Parlamentit dhe politikës me futjen e personave me rekorde të tmershme kriminale. Shembull për këtë është degradimi që i bëri policisë, duke e vënë në shërbim të klaneve të drogës. Shembull për këtë është shdërrimi i Shqipërisë në Kolumbi të Europës. Shembull për këtë është si u arrestua komisar Zagani dhe u ndihmua familja kriminale Habilaj të trafikonte drogë, duke i fikur radarët.
Shembull është degradimi që i bëri sistemit politik në proçesin zgjedhor me kontratën me krimin si instrument për të blerë zgjedhjet e mbajtur pushtetin.
Ndaj dorëzimi i kryeprokurorit tek kryeministri si akti i parë i Reformës në Drejtësi është degradim i shtetit të së drejtës, dhe jo çështje e 140 deputetëve.
Rruga e vetme pas asaj që ndodhi në Parlament është reagimi më i fortë.
Më i forti që opozita ka ndërmarrë në këto 5 vjet. E vetmja rrugë”, deklaron Halimi.

Lëvizja Socialiste për Integrim deklaron se do të zhvillojë një koordinim të fortë me Partinë Demokratike dhe me qytetarë për protestat që do të nisin në muajin janar kundër rënies së shtetit të së drejtës, kundër krimit dhe trafikut të drogës në pushtet. Kreu i Grupit parlamentar të LSI, Petrit Vasili në një konferencë për mediat tha dje se, emërimi i kryeprokurorit të përgjithshëm ishte një rrëmbim që Rama i bëri institucionit të organit të akuzës.
“Aksioni ynë është në vazhdimësi, nuk fillon në janar. Vijon të jetë një aksion në rritje. Edhe më parë, ne kemi pasur takime të mëdha, konventat tona, ku mijëra njerëz kanë ndarë bashkë me ne këtë udhëkryq, ku ndodhet vendi. Ka pasur një reagim shumë të fortë lidhur me dhunimin dhe daljen e shtetit nga shinat kushtetuese, siç qe në rastin e rrëmbimit të Prokurorit të Përgjithshëm. Kemi një kryeprokuror të rrëmbyer nga 69 deputetë të mazhorancës, si kurrë më parë në historinë e zgjedhjes së kryeprokurorëve në Shqipëri. Për fat të keq u zgjodh në këtë mënyrë pikërisht gjatë Reformës në Drejtësi. Pikërisht për këtë arsye, ky aksion do të vijojë. Do të ketë kombinimin e arsyeshëm me të gjithë faktorët opozitarë, ku PD është faktori nga më kryesorët. Jo vetëm kaq, por edhe koordinimi me të gjithë qytetarët do të jetë i tillë, pasi në një reagim masiv, në një protestë masive, çdo qytetar që nuk i respektohen të drejtat, siç qe rasti i naftëtarëve apo dhunohet nga organet tatimore në mënyrën me çnjerëzore, selektive, dhe nga më diskriminueset për t’i shkatërruar, çdo qytetar që nuk i fiton dot të drejtat e tij në zyrat e shtetit, apo largohet nga puna për shkak të preferencave politike, edhe të supozuara në shumë raste, për të gjithë këta qytetarë që secili ka ç’të zgjidhë në sheshin e protestës, sigurisht që ka dhe do të ketë një qëndrim të koordinuar me të gjithë faktorët opozitarë”, u shpreh Vasili. I pyetur në lidhje me zgjedhjen e kryeprokurorit të përkohshëm dhe vijimit të Reformës në Drejtësi, Vasili tha: “Kemi pasur njëkohësisht dhe një vullnet të fortë për të mos lejuar që kjo Reformë në Drejtësi të mos deformohet në atë mënyrë të shëmtuar, siç ndodhi me Kryeprokuroren e Përgjithshme të vendit, pasi ky ishte një akt, i cili hodhi një baltë shumë të madhe mbi procesin e Reformës në Drejtësi. E filloi me këmbën më të gabuar këtë reformë dhe dha një anti-mesazh për zbatimin e drejtë të kësaj reforme. Pra kemi qenë dhe jemi për të zbatuar Reformën në Drejtësi në çdo pikë, në çdo germë, por nuk jemi për të deformuar Reformën në Drejtësi siç ndodhi me Kryeprokuroren. Në rast se do të ketë tendenca për ta deformuar, për ta futur në hullitë e paligjshmërisë, në hullitë e interpretimit antiligjor, siç u fut në rastin konkret, qofshin duke përdorur mekanizma vendas, apo të huaj, sigurisht nuk do të jemi dakord. Kurdoherë që do të zbatohet Reforma, të cilën e kemi miratuar me 140 vota, patjetër që do të jemi pjesë aktive e zbatimit të Reformës në Drejtësi. Gjithashtu dhe një çështje tjetër me interes, pasi kemi parë edhe këto çështjet e fundit, që kemi ndjekur, ku Shqipëria ka pasur një sjellje në mënyrë të veçantë në politikën e jashtme, besoj nga më aventuresket që kemi parë, pasi jo thjesht dhe vetëm kemi votuar kundra Shteteve të Bashkuara të Amerikës në mënyrë fare të qartë dhe kjo nuk ka vend për asnjë lloj leximi, për asnjë lloj përkthimi dhe asnjë lloj interpretimi, pasi, siç e dini, qoftë Presidenti Trump, qoftë ambasadorja amerikane në OKB u shprehën shumë qartë lidhur me pozicionin amerikan për këtë votë. Në fund të fundit, të gjithë duhet ta dinë dhe LSI konfirmon raporti me SHBA as nuk ka për të qenë pronë e asnjë kryeministri, cilido qoftë ai, kryeministri i radhës ngado që vijnë e ngado që shkojnë, dhe i asnjë ministri, qoftë ky i ekzaltuar nga e shkuara komuniste që kemi lënë pas, apo në delirin e ditëve të sotme, por ka për të qenë gjithmonë një marrëdhënie e Shqipërisë dhe e popullit shqiptar me SHBA, e cila është marrëdhënie qindravjeçare dhe ka shënjuar integritetin jo vetëm territorial të Shqipërisë, por ka shënjuar dhe integritetin politik të saj dhe vendosjen në krahun më pozitiv të politikës botërore, dhe njëkohësisht në shumë raste SHBA ka qenë pasaporta e besimit të Shqipërisë në praninë e saj në shumë institucione ndërkombëtare, duke filluar nga NATO, por edhe në rrugëtimin e saj drejt Evropës dhe integrimit evropian.