Udhëheqësi i opozitës ruse Alexei Navalny bëri thirrje për protesta në të gjithë Rusinë më 28 janar për të mbështetur një bojkot të zgjedhjeve të ardhshme presidenciale.
Zoti Navalny e bëri thirrjen për protesta sot, të njëjtën ditë që Presidenti Vladimir Putin u regjistrua zyrtarisht si kandidat për t’u rizgjedhur.
Sondazhet tregojnë se zoti Putin ka të ngjarë të fitojë një mandat tjetër gjashtë-vjeçar në zgjedhjet e 18 marsit.
Zoti Navalny është ndaluar të marrë pjesë në zgjedhje për shkak të një dënimi me burg që ai thotë se ishte i fabrikuar. Dënimi i tij është pezulluar.
Ai thotë se zoti Putin, i cili 17 vitet e fundit ka qenë ose president ose kryeministër, ka qenë në pushtet për një kohë tepër të gjatë. Sipas udhëheqësit të opozitës, popullariteti i zotit Putin ka ardhur kryesisht për shkak të mediave shtetërore të njëanshme dhe një sistemi zgjedhor që përjashton kundërshtarët legjitimë.
Zoti Putin, ish-oficer i KGB-së, kandidon në zgjedhje si i pavarur, vendim që disa vëzhgues besojnë se do ta rriste imazhin e tij si udhëheqës kombëtar në vend që të dilte në rolin e një figure politike partiake.
Aleatët e kanë lavdëruar presidentin Putin për rikthimin e krenarisë kombëtare dhe forcimin e pozitës së Rusisë si udhëheqëse globale me ndërhyrjet ushtarake në Siri dhe Ukrainë.

Kremlini: Navalny do të hetohet

Kremlini ka thënë se autoritetet do të hetojnë nëse lideri opozitar, Aleksei Navalny është duke shkelur ligjin duke bërë thirrje për protesta mbarëkombëtare.
Navalnyt, i cili ka bërë fushatë për presidentin gjatë gjithë vitit, i është ndaluar edhe zyrtarisht kandidimi për president nga Komisioni Zgjedhor në Rusi.
Presidenti rus, Vladimir Putin është duke garuar për mandatin e tij të katërt dhe sipas sondazheve fitorja e tij është lehtë e parashikueshme.
Navalny ka njoftuar të mërkurën për një mori të marsheve në qytetet ruse për të protestuar rreth vendimit për të, që i ndalon kandidimin për president, në zgjedhjet e marsit më 2018.
Zëdhënësi i Putinit, Dmitry Pekov u ka thënë gazetarëve se ai “nuk ka dyshim” se thirrjet e Navalnyt për protesta do të hetohen nga autoritetet për të kuptuar nëse ato janë joligjore.
Videoja e Navalnyt në YouTube, përmes së cilës bën thirrje për protesta nuk ka qenë e qasshme në Rusi, në mëngjesin e sotëm.

Në merkaton e dimrit të kaluar, duke vënë “në pjatë” 28 milionë euro për kartonin e tij dhe një kontratë 4-vjeçare prej 8 milionësh neto në sezon, kroatin e Juventusit e kishte tentuar klubi kinez i Tianjin. Tani, përsëri, nga i njëjti vend, Hebei China Fortune po teston terrenin. Objekti i dëshirës mbetet i njëjtë: Mario Mandzukiç. Sulmuesi 31-vjeçar i Juventusit, i lidhur me bardhezinjtë deri në vitin 2020, i ngroh mendimet e Superligës kineze. Ka klube atje, që nuk kursejnë asnjë shpenzim, teksa kanë siguruar lojtarë dhe trajnerë të nivelit më të lartë. Dhe Hebei China Fortune, midis Ezequiel Lavezzi dhe Gervinho, ka treguar një fuqi ekonomike jashtëzakonisht mbresëlënëse. E gjithë kjo, duke përdorur njohurinë e Manuel Pellegrinit në stol. Pasi e ka mbyllur kampionatin me vendin e katërt, në qytetin e Quinhuangado është koha për të menduar për goditje të reja. Idetë nuk mungojnë. Paratë jo. Pra, klubi kinez në fjalë është duke ndjekur më të mirën e merkatos europiane. Dhe lind sugjerimi “Mandzukiç”.
Disa ndërmjetës të lidhur me futbollin kinez, në mënyrë krejtësisht embrionale, do të mundoheshin të provonin gjendjen shpirtërore të sulmuesit kroat. Paraja, veçanërisht në këtë periudhë historike, për një profesionist mund të nënkuptojë gjithçka. Por bomberi i Juventusit, edhe pse i kënaqur nga këto sirena të reja, do të preferonte të qëndronte në futbollin italian. Përgjigjja, pra, do të kufizohej në një “jo, faleminderit” e qartë. Në të njëjtën kohë, në mes të sezonit, “Zonjës së Vjetër” historikisht nuk i pëlqen ta privojë veten nga pjesët më të mira të saj. Aq më shumë nëse ato kanë karakteristika unike. Pjesa tjetër është një çështje nderimi mes Max Allegrit dhe numrit të tij 17, bazuar në një marrëdhënie të fortë dhe produktive.

Paulo Dybala është një nga sulmuesit më të kërkuar në Europë. Manchester United, Real Madrid dhe Barcelona janë disa nga super klubet e Europës që janë interesuar dhe vazhdojnë të interesohen për “La Joya”, i cili nuk po kalon një moment të mirë tek Juventus. Në javët e kaluara, shtypi anglez ka folur për një marrëveshje të arritur mes Manchester United dhe “Zonjës” për transferimin e lojtarit në “Old Trafford” në merkaton e janarit për 68 milionë euro.
Por këto zëra janë hedhur poshtë nga klubit torinez që ka vendosur një çmim për sulmuesin argjentinas. Në fakt, kampionët në fuqi të Italisë, sipas “Corriere della Sera”, e vlerësojnë 150 milionë euro kartonin e numrit 10.

Ronaldo tronditi botën në vetëm një sezon te Barcelona, por pastaj u largua tek Interi për 5.000 milionë pesetas. Atje pësoi disa lëndime, por mundi të gjente një mundësi te Real Madridi, ku luajti në mes të viteve 2002 dhe 2006. Ish-sulmuesi i njohur kurrë nuk e ka fshehur se “Los Blancos” janë maja e arritjeve të tij me zemër gjatë karrierës, por tani e krahason largimin e tij nga klubi katalanas me atë të Neymar këtë verë, drejt PSG-së.
“Fenomeni” pranon se largimi i tij nga Barcelona ishte shumë i shëmtuar. “Ndihem shumë më mirënjohës dhe më i lidhur me Real Madridin, pavarësisht se e kam kaluar vitin më të mirë në Barcelonë. Por, fundi i eksperiencës sime me Barçën ishte i keq, shumë i ngjashëm me atë të Neymar, të jetuar tani”, tha ai për “Esporte Interativo”. Ronaldo nuk e kupton pse Barcelona përfundon kaq keq me lojtarët brazilianë. “Kjo ka ndodhur për disa kohë, sepse drejtorët e Barçës kanë bërë diçka të ngjashme me Romarion. Pastaj e bënë atë me Ronaldinhon. Por Barcelona është një qytet dhe një klub i pabesueshëm”, tha Fenomeni Ronaldo.
Ronaldo Nazário ka zbuluar se cili ishte karakteri që frymëzoi flokët e tij të famshëm në Kupën e Botës 2002, në një intervistë me “Deporte Interactivo”. Braziliani ishte një nga protagonistët e mëdhenj të Kupës së Botës së zhvilluar në Kore dhe Japoni, si për lojën e tij, ashtu edhe për pamjen e shumëkomentuar dhe shumimituar në mbarë globin. Tani vetë Ronaldo ka shpjeguar në një intervistë për median braziliane origjinën e “hairstyle” origjinal. Në atë kohë, “Fenomeni” shënoi tetë gola dhe udhëhoqi ekipin brazilian drejt fitoreve, duke u bërë një hero i vërtetë në vendin e tij. Mijëra fëmijë kopjuan prerjen e famshme të flokëve të lojtarit, i cili kujtonte me të qeshur dëshpërimin e tij kur i pa ata në rrugë. “Sa herë që shihja një fëmijë me atë prerje flokësh isha e dëshpëruar. Kjo nuk ishte ajo që dëshiroja, nuk doja t’i ndikoja fëmijët në këtë mënyrë”, shpjegoi ai i mërzitur.
E vërteta është se futbollisti u frymëzua nga një karakter i njohur i disa karikaturave shumë të famshme në vendin e tij, të quajtur “Cascão”, nga seria e “Monica”. Neymar, gjithashtu, mori modelin e Ronaldos. Sulmuesi i PSG-së pranoi në një intervistë se ishte një nga shumë tifozët e Ronaldos, që bëri atë prerje të famshme flokësh: “Në vitin 2002 kam pasur prerje flokësh si Ronaldo, por nuk mund të më mbani mend shumë”. Gruaja, Sonia, shpjegoi se edhe djali i Ronaldos, i cili në atë kohë ishte vetëm 2 vjeç, nuk e njohu të atin e tij kur u kthye nga Kupa e Botës.

Ishte një ditë e veçantë, si gjithmonë. Ndeshja traditë e futbollit brazilian është zhvilluar në mbrëmjen e së mërkurës. Evenimenti i organizuar nga Zico ka bashkuar yjet e futbollit brazilian dhe të arenës ndërkombëtare.
Skuadra e Kuqe kishte lojtarë si Adriano, Romario dhe Petkoviç dhe në fund ishte ajo që triumfoi ndaj skuadrës së Bardhë, me lojtarë si Renato Gaucho, Alex dhe Marinho, me rezultatin 7-3.
Lista e lojtarëve të konfirmuar ishte: Junior, Tita, Renato Gaucho, Aldair, Juan, Leonardo, Jorginho, Zinho, Camilo, Bruno Silva, Djalminha, Neto (i mbijetuar i aksidentit të Chapecoense) dhe Amoroso, ndër të tjerë. Ndërsa lojtarë të huaj ishin Edgar Davids, Recoba, Sorin dhe Goycochea, bashkë me serbin Petkoviç.
Ndeshja shënoi edhe rikthimin e Adriano-s në Maracana. Ndeshja e tij e fundit ka qenë më 2010, në atë kohë Perandori mbante veshur fanellën e Flamengo-s në fitoren 2-1 ndaj Universidad de Chile në Copa Libertadores. Adriano shënoi golin e pestë të skuadrës së tij, por përgatiti edhe dy të tjerë për Zico dhe Romario.

Ëndrra për të qenë protagonisti i Botërorit para publikut të tij është kthyer në një makth. Kjo është ajo që mban mend Neymar nga Kupa e Botës e 2014-ës, e zhvilluar në Brazil. Ai mori një goditje të rëndë në kurriz nga Zuniga, që i shkaktoi atij një dëmtim që ka rrezikuar t’i mbyllë para kohe karrierën. Më pas ka ardhur humbja e pabesueshme kundër Gjermanisë, me pesë herë kampionët e botës që janë turpëruar në shtëpinë e tyre.
“O Ney” është kthyer të flasë për këto makthe në një intervistë të dhënë për ish-shokun e skuadrës te Barcelona, Gerard Pique. “Ai dëmtim ka qenë momenti më i keq i jetës sime, ka thënë Neymar. Në ato ditë kam qarë shumë, kam parë të qajnë prindërit dhe miqtë e mi. Të gjithë familjen time…”.
“Nuk arrija të ngrija këmbët, nuk arrija t’i lëvizja. Doktori më prekte këmbët dhe unë nuk ndieja asgjë. Pas vizitave më tha se do të ecja, por se nuk mund të luaja në Botëror. Nëse goditja do të kishte qenë dy centimetra më anash mund të kisha mbetur i paralizuar”.
Por futbolli i ka dhuruar një tjetër surprizë të keqe: “Disa ditë më vonë kam ndjekur humbjen 7-1 të Brazilit kundër Gjermanisë në gjysmëfinale, por nuk mund të bëja asgjë”. Njolla e fundit që Neymar do të provojë ta fshijë verën e ardhshme, kur do të udhëheqë Brazilin në Botërorin e Rusisë.

Hugo Lloris i ka thurur elozhe makinerisë së golave Harry Kane, duke e cilësuar si sulmuesin më të mirë me të cilin ka luajtur. Një kompliment i madh duke konsideruar se kapiteni i Francës ka luajtur përkrah disa prej sulmuesve më të mirë në botë, duke përfshirë Nikolas Anelka, Thierry Henry, Antoine Griezmann dhe Kylian Mbappe.
Portieri 31-vjeçar shihte i mahnitur teksa Kane shënonte një tjetër tripletë në “Wembley” në fitoren 5-2 ndaj Southampton. Sulmuesi i Spurs dhe Anglisë ka thyer rekordin 22-vjeçar të Alan Shearer për golat e shënuar në Premier League brenda një viti kalendarik.
Kur pyetet rreth Kane, gardiani i Spurs Lloris shprehet: “Nuk kam luajtur ndonjëherë me një sulmues që shënon kaq shumë gola brenda një viti. Kam luajtur me shumë sulmues të nivelit të lartë dhe ai me shumë mundësi është më i miri. Ai meriton të gjitha komplimentet për momentin. Por pjesa më e vështirë e sezonit fillon tani dhe ai duhet ta ruajë këtë formë.
Por me mentalitetin dhe kualitetin e tij nuk kam dyshime se ai do ta bëjë këtë. Ai është një nga më të mirët dhe ai do të vazhdojë ta tregojë këtë. Ai ka shumë besim në vetvete. Në futboll gjithmonë kur ka rekorde ti kërkon t’i thyesh”.
Në historinë e Premier League askush nuk i është afruar më shumë golave të shënuar nga Alan Shearer, i cili ka shënuar 260 herë me fanellën e Southampton, Blackburn Rovers dhe Newcastle.
Harry Kane mund të jetë njeriu që do ta kapë një ditë. Por ditën e martë ai ka thyer rekordin e golave të shënuar brenda një viti kalendarik me një tripletë ndaj Southampton.
Teksa të gjithë kanë thurur elozhe për Kane, kishte disa tifozë, sidomos ata të Everton, që kanë shprehur pakënaqësi duke u shprehur se ai nuk ishte rekordi anglez. Dixie Dean e mban atë rekord. Tifozët kanë të drejtë, deri diku, futbolli nuk ka filluar në vitin 1992, vetëm periudha e Premier League ka filluar. Gjithsesi, një vit i shkëlqyer i Harry Kane.