Me James Rodriguez si forcë të shtuar në organikë, Bayneri Mynihut ka arritur një avantazh prej 11 pikësh me ndjekësit më të afërt, duke shënuar njëherazi edhe sukse të tjera në kompeticionet paralele. Pas vetëm disa muajve të shpenzuar në klubin bavarez, i huazuar nga Reali i Madridit (marrëveshja parashikon qëndrimin e 26-vjeçarit në Gjermani deri në qershor të 2019-ës), mesfushori kolumbian shprehet shumë i lumtur për eksperiencën e tij te kampionët e Bundesligës.
“Bayerni qëndron në të njëjtat nivele me Realin e Madridit. Objektivat e tyre janë gjithnjë maksimale, synojnë titujt e të gjitha kompeticioneve ku marrin pjesë. Te Bayerni janë mësuar me fitoret. Pa më të voglin dyshim, Bayerni është një ndër klubet më të mira europiane. Kam nisur një jetë të re në Gjermani, jam përshtatur mirë dhe ndihem shumë i lumtur në këtë ambient”, tha James Rodriguez.
Diçka e dukshme në fakt, pasi James ka realizuar dy gola dhe ka dhuruar tre asiste në 12 takimet e fundit të Bundesligës. “I duhej pak kohë që të përshtatej, por tashmë e ka shumë të qartë mentalitetin tonë dhe është unifikuar me këtë skuadër. Jo të gjithë e kuptojnë sa shumë impenjohet, koha do ta tregojë se gjithnjë e më shumë ai do të bëhet një element vendimtar në ecurinë e Bayernit”, deklaron trajneri Jupp Heynckes për fituesin e Këpucës së Artë të edicionit 2014. Bayerni ka në marrëveshje të drejtën e blerjes më 30 qershor të 2019-ës, kohë kur përfundon edhe huazimi i tij.
Pas lamtumirës së Karlo Ançelotit, të gjithë ishin dëshmitarë të një rilindjeje për Bayernin e Mynihut. Heynckes rezultoi të ishte kura më e mirë për lojtarët e klubit bavarez, çka lë të kuptohet se, pavarësisht faktit që Ançeloti është një ndër më të mirët në fushën e tij, sintonia mes palëve nuk ishte në maksimum dhe kjo reflektohej e gjitha në fushë. Edhe ish-lojtari i Juventusit, Arturo Vidal, ka përfituar nga ndryshimet që ndodhën në stolin e klubit gjerman, duke u rikthyer të bëjë diferencën falë golave shumë të rëndësishëm, përkatësisht 5 të tillë në kampionat përgjatë 15 prezencave të tij. Në këtë fillim sezoni, kiliani 30-vjeçar i ka dhënë edhe më shumë karakter kësaj skuadre.
Zhgënjimi për moskualifikimin në Botërorin e Rusi 2018 të Kombëtares së Kilit nuk i erdhi aspak në ndihmë mesfushorit që përjetoi disa javë vështirësie dhe që e bëri të mendonte edhe për një lamtumirë të parakohshme nga përfaqësuesja e vendit të tij. Shpesh herë protagonist i polemikave të shumta duket se që me mbërritjen e Don Heynckes tek Bayerni, gjithçka ka ndryshuar edhe për mesfushorin. Ish-juventini tashmë luan gjithnjë titullar në një skuadër që gjithnjë e më shumë po tregon se nuk mund të bëjë më pa të. Tekniku gjerman është mjaft strikt dhe nuk lejon asnjë lloj komportimi jashtë normave që ka vendosur dhe Vidal është përshtatur në mënyrë perfekte me këtë mentalitet rigoroz, duke dhënë më të mirën e tij e duke premtuar shumë më shumë për pjesën e dytë të sezonit.

Ardhja e Gattuso nuk ishte e mjaftueshme për Milanin, për të ndryshuar situatën në kampionat. “Djalli” vazhdon të mbledhë shfaqje zhgënjyese dhe menaxhmenti fillon të studiojë zgjidhje të reja për të ardhmen. Ideja e fundit mban emrin e Roberto Mançinit. Sipas “La Gazzetta dello Sport”, kuqezinjtë do të donin që ta fillonin projektin e ri me një figurë të njohur jashtë vendit dhe me përvojë ndërkombëtare, një emër që mund të shfrytëzohet edhe në Kinë, ku Milani tregon për një zhvillim të fortë të markës. Mançini tashmë ka një marrëdhënie të mirë me Fassone dhe Mirabellin, por pengesa e madhe e operacionit është e përfaqësuar nga një angazhim prej 8 milionë eurosh në sezon, i cili mund të jetë shumë i madh për arkën e kuqezinjve.
Mançini e mori drejtimin e Zenitit në korrik dhe ka kontratë me të deri më 2020, me një pagë vjetore prej 8 milionë euro. Deri tani, 53-vjeçari ka regjistruar 17 fitore, tetë barazime dhe gjashtë humbje në 31 ndeshje me Zenitin. Thuhet se Mançinit i mungon futbolli italian dhe është i intriguar nga mundësia për ta drejtuar gjigantin tjetër të Milanos, pasi në të kaluarën e ka udhëhequr Interin drejt tre titujve radhazi në Serinë A.
Gjithashtu, nuk duhet të nënvlerësohet hipoteza e një thirrjeje në ekipin kombëtar italian, i cili mund ta bindë ish-trajnerin e Interit që të braktisë ambiciet në rang klubi. Trajneri aktualisht nuk është plotësisht i kënaqur me Zenit, i detyruar të ndjekë udhëheqësit e Lokomotivës së Moskës, me tetë pikë prapa. Kampionati rus do të rifillojë në mars: ndërkohë, Milani mund të lehtësojë arkën e vet me “vendbanimin” e ri të Montellës, nëse ky i fundit bëhet trajner i Sevilla.
Kurrë e parëndësishme fjala e tij. Fabio Capello tani ndëshkon edhe Leonardo Bonucci, çfarë duhet të ketë qenë pika kryesore e merkatos së kuqezinjve, por është bërë një nga blerjet më të këqija të sezonit. Duke folur për “Sky Sport 24”, Capello vlerëson cilësitë në fazën e vendosjes së ish-qendërmbrojtësit të Juventusit, por shkatërron aftësitë shënuese të Bonuccit. “Me topin në mes të këmbëve është më i miri në Itali dhe në mesin e top-3 më të mirëve në botë, por ai nuk mund të mbrojë, ka probleme të mëdha me modulin si luan Milani. Te Juve ka qenë i lirë dhe kjo ishte ideale për të. Është perfekt për të luajtur në sistemin me tre mbrojtës. Të luash me katër është tjetër gjë, është shumë vështirë, duhen bërë shumë përpjekje”.
Mbrojtësi italian kaloi nga Juventusi në Milan verën që lamë pas, pas një marrëveshjeje tronditëse që kapi shumën 42 milionë euro, por është duke kaluar nëpër formë tepër të dobët në një kohë të vështirë për skuadrën e Milanit. Capello, i cili e u udhëhoqi Milanin drejt katër titujve kampion në Serinë A dhe një titulli në Ligën e Kampionëve në vitin 1994, i ka vlerësuar cilësitë e Bonuccit, si dhe e ka treguar arsyen pas formës së tij të dobët.

“Virusi” vazhdon. Pas rastit “Axel Witsel”, të cilit iu afrua shumë, por nuk e mori dot, Juventusi pritet të ketë një fund të ndryshëm me “telenovelën Emre Can”. Gjermani është në fakt objektivi kryesor për të forcuar mesfushën e bardhezinjve në sezonin 2018-2019, kur, ndoshta, ai mund të marrë vendin e bashkatdhetarit Sami Khedira, që synon ta përfundojë karrierën e tij në SHBA. Emre mund të arrijë te Juventusi si transferim i lirë, pasi kontrata e tij me Liverpool skadon qershorin e ardhshëm. Siç shkruan “Tuttosport”, Juventusi do t’i informojë “Reds” në janar për kontaktet e vendosura tashmë me lojtarin e tyre.
Më shumë se nga Liverpool, megjithatë, bardhezinjtë do të duhet për t’u mbrojtur nga konkurrenca e fortë e Manchester United të Mourinhos, edhe pse Juventusi shpreson të ketë në anën e vet deklaratat e bëra një muaj më parë nga menaxheri i kombëtares së Gjermanisë, Oliver Bierhof, i cili siguroi: “Emre Can, me 80 për qind do të shkojë te Juventusi”. Vendimtare në këtë kuptim mund të jenë bisedimet e mesfushorit me dy shokët e tij në kombëtare, si Howedes dhe Khedira, tashmë të stacionuar në Torino dhe të gatshëm për të sponsorizuar zgjedhjen bardhezi. Marotta pret dhe përgatitet për të bërë një tjetër goditje pa asnjë kosto. Kuptohet, nëse e lejon Manchester United.

Harry Kane shënoi të martën tripletën më të rëndësishme të karrierës, pasi arriti të vendosë një rekord në Premier League, por njëkohësisht të jetë futbollisti që ka shënuar më shumë gjatë 2017-ës.
Sulmuesi i Tottenhamit shkoi në kuotën e 39 golave në vit, në Premier League, duke thyer rekordin që mbahej nga Alan Shearer me 36. Gjithashtu, Kane shënoi golin e 56 në të gjitha kompeticionet, për vitin 2017, duke parakaluar Lionel Messin me 54, por edhe Cristiano Ronaldon dhe duke u konfirmuar si futbollisti që ka shënuar më shumë në këtë vit kalendarik.
Pas ndeshjes, Kane nuk i fshehu emocionet, ndërsa pranoi se ishte shumë i lumtur që emri i tij tashmë rreshtohet krah më të mirëve.
“Jam shumë i lumtur që vendosa një rekord në Premier League, por edhe që arrita të shënoj më shumë se të gjithë. Messi dhe Ronaldo janë 2 futbollistët më të mirë në planet dhe të parakaloj ata, është një kënaqësi e jashtëzakonshme. Është një nder për mua, që emri im të shënohet krah futbollistëve më të mirë”, tha Harry Kane.
Ndërkohë, ylli i Arsenalit, Mesut Ozil, i prin listës prej pesë futbollistëve që Ernesto Valverde dëshiron t’i sjellë në Barcelonë gjatë afatit kalimtar të janarit. Ozil, të cilit i skadon kontrata me Arsenalin në fund të sezonit, është i lakmuar në “Camp Nou”, dhe mund të jetë në dispozicion në tregun e transferimeve të janarit, nëse Arsenali dëshiron të mos e humbë gjermanin falas. Por, ylli gjerman është vetëm njëri prej emrave që lidhen me Barçën, përkrahë Nabir Fekir, Aleksandr Golovin, Max Meyer dhe Leon Goretzka.

Sapo ka ardhur dimri dhe, pas gjashtë muajsh me Valverde në stol, tashmë mund të nxjerrësh disa përfundime rreth preferencave te Barcelona. Janë tre lojtarë, që kanë marrë pjesë në 17 ndeshje të La Liga-s, pra në të gjitha ato të luajtura. Njëri prej tyre, sigurisht, është Leo Messi. Ylli i madh azulgrana jo vetëm i ka luajtur të gjitha lojërat, por nuk është zëvendësuar në asnjë prej tyre. Asgjë e çuditshme, lojtari më i mirë në botë luan gjithçka. Tjetër lojtar fiks është Ter Stegen dhe këtu nuk ka asnjë dyshim. Gara e tij ka qenë jetike, që ky kampionat të ruhet nga ndalesat në disa raste. Pritjet e portierit gjerman kanë rezultuar shpëtimtare në jo pak ndeshje. Leo dhe Ter Stegen janë “Pichichi” dhe “Zamora” në La Liga (shënuesi më i mirë dhe portieri me më pak gola të pësuar), kështu që është normale që ata të luajnë gjithçka.
“Tridenti” përfundon me një emër, që nuk është më aq i zakonshëm. Lojtari i tretë që ka luajtur të gjitha ndeshjet e kampionatit është Ivan Rakitiç. Kroati është bërë një pjesë jetike për Valverde. Ai është futbollisti, i cili i jep ekuilibrin ekipit në mesfushë. Taktikisht, ai është një futbollist i jashtëzakonshëm, i cili di të jetë gjithmonë në vendin e duhur. Rakitiç është bërë shoqëruesi më i mirë i Busquets, i cili në sezonin e kaluar e pa shumë herë veten në vështirësi, se si duhej të mbulonte shumë hapësirë dhe nuk ia arriti. Tani me Rakitiç situata ka ndryshuar, sepse ata janë gjithmonë shumë afër së bashku në fushë. Një arsye tjetër që ka qenë thelbësore për përmirësimin e mesfushorit ka qenë se Valverde ka rivendosur besimin e tij.
Në sezonin e kaluar, Rakitiç kurrë nuk kishte vazhdimësinë e nevojshme. Luis Enrique e vuri atë në dhe jashtë ekipit, për asnjë arsye të dukshme. Dhe loja e kroatit çedoi. Valverde i ka dhënë atij besim të plotë që nga dita e parë. Nuk ka dyshim se së bashku me Busquets dhe Iniesta janë tre lojtarët fiks në qendër të fushës. Numrat thonë kështu: Ivan ka luajtur gjithçka, Busquets ka humbur një ndeshje dhe Iniesta tri ndeshje, të gjitha për shkak të lëndimit. Në rastin e Rakitiç, ai ka marrë pjesë në të gjitha ndeshjet zyrtare, përveç kthimit të Kupës së Mbretit, kundër Murcia.

Manchester City i Guardiola-s mund të bëhet pjesë e grupit ekskluziv të skuadrave “shekullore” europiane, ato që kanë arritur dhe kaluar kuotën e 100 pikëve në një kampionat. Një arritje e realizuar vetëm nga pesë skuadra europiane. A mund t’ia dalë City? Po dhe mund t’i lejojë vetes luksin edhe që të ngadalësojë, duke parë se në 19 ndeshjet e para të kampionatit ka grumbulluar 55 pikë. Nëse do të marrë të njëjtin numër pikësh edhe në fazën e dytë, do të arrijë në 110 pikë, plot pesë më shumë se uellsianët e Barry Town, formacioni që në sezonin 1996-97 ka arritur në kuotën e 105 pikëve dhe që në vitin paraardhës ka grumbulluar 104 pikë.
Këto janë skuadrat e tjera që kanë arritur në kuotën e 100 pikëve:
Celtic Glasgow (103 në sezonin 2001-02)
Skuadra skoceze ka fituar kampionatin me Martin O’Neill në stol, duke humbur vetëm një ndeshje në gjithë sezonin. Henrik Larsson dhe John Hartson kanë qenë golashënuesit e skuadrës së rekordeve të kampionatit skocez.
Juventus (102 në sezonin 2013-14)
Më mirë se Inter-i i sezonit 2006-07 që është ndalur në 97 pikë. Skuadra e Antonio Conte ka fituar 33 ndeshje nga 38, duke marrë pikë të plota në shtëpi. Shifra të pabesueshme që kanë lënë në hije ato të regjistruara nga Roma, e dyta me 85 pikë (rekord për klubin verdhekuq në kampionat).
Real Madrid (100 në sezonin 2011-12)
Pas katër vitesh, Real Madrid është kthyer të fitojë në Spanjë dhe e ka bërë me Jose Mourinho-n në drejtim. Një ekip rekordesh me 121 gola të shënuar, 46 prej të cilëve nga Cristiano Ronaldo dhe 9 pikë avantazh ndaj Barcelona-s së Messi-t. Ka qenë skuadra e parë spanjolle që ka bërë një “shekull” me pikë.
Barcelona (100 në sezonin 2012-13)
Barcelona e Villanova-s ka barazuar rekordin e vendosur nga Real Madrid në sezonin paraardhës dhe është kthyer të triumfojë në La Liga. Messi ka qenë i papërmbajtshëm: 46 gola në kampionat.

Kylian Mbape thotë se Cristiano Ronaldo ishte heroi i tij i fëmijërisë, por kjo nuk ndodh më. Mbape iu dha mundësia të bashkohej me Ronaldon te Real Madridi këtë sezon, por më pas vendosi të bashkohet me klubin e djalërisë, PSG, për një marrëveshje që do të kushtojë 180 milionë euro, kur të bëhet i përhershëm në fund të sezonit. Shfaqjet mbresëlënëse të 19-vjeçarit për Monakon, sezonin e kaluar, dhe PSG-në në këtë sezon, e kanë parë atë si një pasardhës të mundshëm të yllit të Real Madridit, Ronaldo, si një nga yjet më të mëdhenj të botës. Në vend të kësaj, të dy do të përplasen “kokë më kokë” në raundin e radhës të Ligës së Kampionëve, kur PSG-ja do të ndeshet me Real Madridin. Dhe Mbape po shkon me synimin për ta mposhtur portugezin.
“Ai është një hero nga fëmijëria ime dhe ishte e mahnitshme ta takoja kur vizitova Valdebebas, tha 19-vjeçari për “Marca”. Por unë jam një person shumë konkurrues dhe gjithçka që dua të bëj është të fitoj, të fitoj, të fitoj. Pra, nuk ka rëndësi se kush është para nesh, ne duam të fitojmë. E admirova Ronaldon kur isha më i ri, por tani kjo ka përfunduar. Tani shkoj në ‘Bernabeu’ për të luajtur dhe për të fituar ndaj ish-idhullit tim. Nga dikush që ka fituar pesë herë ‘Topin e Artë’ ju mund të mësoni shumë. Ai është një lojtar i madh, por Neymar është këtu, te PSG-ja, dhe mendoj se është shumë i ngjashëm dhe praktikisht i të njëjtit nivel si Cristiano Ronaldo. Unë mësoj shumë edhe nga Edinson Cavani, një golashënues shumë i fortë”.
Francezi ka përfituar nga të luajturit së bashku me Neymarin dhe Cavanin, që kur u bashkua me PSG-në në verë, ndërsa thotë se ka vënë re që ylli brazilian nuk është aq egoist, sa shumë besojnë. “Njerëzit nga jashtë shohin një Neymar në fushë, duke bërë truket dhe driblimet individuale. Ju mendoni se është duke u përpjekur të gëzojë veten, se është egoist dhe vetëm mendon për veten e tij, por kur ndani një dhomë të zhveshjes me të, e kupton se nuk është kështu. Është e vërtetë se ai është një person shumë i mirë, se është i interesuar për të tjerët, është shumë i mirë dhe luan me mish e me shpirt për PSG-në. Është e vërtetë se futbolli i tij ka të bëjë me driblimin dhe aftësitë, ndaj nuk mund t’i kërkoni të ndalet, sepse ai e bën shumë mirë këtë gjë. Askush nuk ka dribluar si ai në këtë aspekt të lojës, është një futbollist që mund të fitojë tituj dhe ne duhet të përfitojmë prej tij”.
Mbape ka zbuluar se ka zhvilluar bisedime me Real Madridin, para se të transferohet në kryeqytetin francez, megjithëse këmbënguli që është në të kaluarën. Një lëvizje për te kampionët spanjollë dhe europianë të Real Madridit u shfaq në horizont për Mbape, në mes të spekulimeve të forta, pasi ndihmoi Monakon të fitojë Ligue 1 në sezonin 2016-2017. “Është e vërtetë që kemi folur, por mendoj se tani i takon së kaluarës për mua Real Madridi”, tha Mbape për “Marca”. Tranzicioni nga “Stade Louis II” në “Parc des Princes” ka qenë i pandryshueshëm për Mbape, i cili ka shënuar 12 gola në të gjitha garat. Mbape e ka ndihmuar PSG-në të ndërtojë një distancë prej nëntë pikësh në majë të renditjes, ndërsa francezi ka shënuar katër gola në Ligën e Kampionëve, pasi klubi i tij fitoi Grupin B me rivalë të tillë si Bayern Munich, Celtic dhe Anderlecht, një rekord i fazës grupore, me 25 gola të shënuara.

Kurrë nuk ka qenë një sekret, që merkato e Chelsea verën e kaluar nuk i ka përmbushur të gjitha pritshmëritë dhe kërkesat e Antonio Conte, i cili do të pëlqente më shumë përforcime, sidomos në mesfushë dhe sulm. Deri tani, në funksion të sesionit të dimrit, që po afrohet, tekniku i “Blues” pret nënshkrime të reja për gjysmën e dytë të sezonit dhe nuk e “kafshon gjuhën” për të thirrur Arturo Vidal: “Do ta doja gjithmonë me mua”. Një frazë ajo e Contes, i cili është dorëzuar pas fitores së djeshme të Chelsea të tij në Brighton: 2-0, çka i çoi kampionët në fuqi të Premier League -1 pikë nga Manchester United, në vendin e dytë. Ish-trajneri i kombëtares italiane iu rikthye dëshirës së tij për të pasur nën urdhra Arturo Vidal, me të cilin te Juventusi fitoi tri kampionate radhazi.
Kilieni, bashkë me Pirlon, ishte njeriu kryesor i asaj skuadre, teksa ofroi një punë të pashtershme në të dyja fazat, difensive dhe ofensive. Kontrata e Vidal me Bayern Munich skadon në vitin 2019 dhe gjendja e tij, për disa kohë, nuk është më si më parë, e blinduar. Mesfushori nuk është një lojtar i patundur në formacionin bavarez dhe tashmë, Interi është përpjekur që në verë që ta marrë nga klubi gjerman. Gjashtë muaj më vonë, situata nuk ka ndryshuar shumë, në kuptimin që alternativat për Heynckes (dhe më përpara Ancelotti) nuk mungojnë dhe për këtë arsye kilieni mund të jetë i sakrifikuar. Chelsea do të ishte një zgjidhje ideale për të, sidomos për Conte, i cili është i etur për ta “përqafuar” nxënësin e tij.