Punonjësit e Uzinës së Naftës në Fier protestuan sërish këtë mëngjes për pagën e prapambetur të muajit nëntor dhe mospagimin e sigurimeve shoqërore për 18 muajt e fundit. Të mbledhur para Uzinës, ata kërkuan ndërhyrjen e institucioneve shtetërore për t’i dhënë zgjidhje problematikave në naftëtarëve.
Sipas punonjësve të naftës në Fier, ata nuk janë siguruar nga muaji tetor i vitit 2016, ndërsa nuk janë paguar për muajin e nëntor të këtij viti. Disa prej naftëtarëve thonë se po rrezikojnë pensionin për shkak të mos pagimit nga kompania të sigurimeve shoqërore.
Punonjësit e Uzinës së Ballshit dhe Fierit kanë nisur një valë protestash përmes të cilave kërkojnë rinisjen normale të punës dhe detyrimet e prapambetura. Uzina e Ballshit u mbyll rreth 20 ditë më parë pas një shpërthimi që shkaktoi plagosjen e njërit prej punonjësve të repartit të koksit.

Një qytetar nga Kosova ka denoncuar policinë shqiptare për vënie gjobash ndaj emigrantëve që kthehen për pushimet e fundvitit. Ai i është drejtuar me një mesazh ish-Kryeministrit Berisha. “Qytetari dixhital denoncon çunat e krimit! Ja si ata zhvasin qytetarët që kthehen për pushime. Lexoni mesazhin e tij”, shkruan Berisha.
“Përshëndetje z.Kryeministër, jam një qytetar nga Kosova, tani duke u kthyer nga Zvicra me familjën që jetojmë atje, pasi kaluam Shkodrën 20 km hasëm me një patrullë të policisë shqiptare, makina jonë kishte dritat e fikura, punëtori polic na tregoi që duhet të ju penalizojmë për arsye që dritat janë të fikura, dhe penalizimi ishte 1000 lekë, ne u pajtuam ta paguajmë penalizimin, por kërkuam tiketën e penalizimit, punëtori polic nuk pranoi me na dhënë tiketën, pas insistimit tonë të shumtë atje vajti në makinë dhe mbaroj një tiketë tjetër të re, të lutem shiko tiketën se në tiketë nuk shënon asgjë për çka jemi penalizuar, dhe me këtë ne kuptuam që punëtori polic deshti me na vjedhë”, shkruan qytetari.

Seanca gjyqësore për sekuestrimin e pronave të familjes Balili është shtyrë ditën e djeshme nga Gjykata e Apelit e Krimeve të Rënda. Shkak u bë mosformimi i trupit gjykues. Seanca do të zhvillohet në janar të 2018-ës. Ndërmjet pasurive, të cilave u është vendosur sekuestro preventive, është edhe kompleksi “Santa Quaranta”.
Dhjetëra forca policore kanë mësyrë në 24 nëntor 2016 në hotelin Santa Quaranta në Sarandë, pronë e të shumëkërkuarit të drejtësisë, Klement Balili, për ta vënë nën sekuestro preventive me vendim të Gjykatës së Krimeve të Rënda.
Gjykata e Krimeve të Rënda ka pranuar kërkesën e Prokurorisë së Krimeve të Rënda për të vendosur në sekuestron preventive kompleksin e njohur dhe 20 apartamente që janë pronë e Balilit dhe familjes së tij, me dyshimin se janë përfituar nga aktivitete kriminale, si trafiku i drogës.
Para një muaji Gjykata e Krimeve të Rënda, pas kërkesës së Prokurorisë vendosi nën sekuestro preventive pasuria e Klement Balilit, ose i njohur ndryshe si “Eskobari” i Ballkanit. Nën sekuestro mësohet se janë vendosur troje, biznese dhe apartamente që rezultojnë në emër të familjes Balili në Sarandë. Sekuestroja e pasurive u bë falë bashkëpunimit me sektorin e hetimit të aseteve në Drejtorinë e Përgjithshme të Policisë.
Dyshohet se kjo pasuri dhe të tjera, në pronësi të 44-vjeçarit nga Saranda janë vënë me para të ardhura nga aktiviteti kriminal. Klement Balili është në kërkim që prej një viti pas urdhërit të arrestit ndërkombëtar të lëshuar nga Prokuroria e Krimeve të Rënda.
Në maj të vitit të kaluar, autoritetet greke pas një hetimi të përbashkët me DEA-n amerikane e përmendën emrin e tij si drejtuesin kryesor të një rrjeti të gjerë të trafikut të marijuanës nga Shqipëria në Greqi dhe vende të tjera të BE.
Klement Balili, i njohur si “Eskobari i Ballkanit” është në arrati. Arrestimi i tij nuk është bërë i mundur pavarësisht disa operacioneve blic të Policisë së Shtetit.

Gjykata e Krimeve të Rënda ka rrëzuar sërish kërkesën e Orest Sotës për lirim nga paraburgimi. Në seancën e djeshme, Gjykata nuk pranoi as garanci pasurore të ofruar nga i arrestuari, të cilit rreth dy muaj më parë iu gjetën në makinë mbi 863 mijë euro në mjetin me të cilin po udhëtonte në afërsi të qytetit të Elbasanit.
Prokuroria e Krimeve të Rënda dyshonte e paratë që i janë gjetur Sotës mund të jetë të ish-ministrit të Brendshëm Saimir Tahiri. Por avokati i Sotës, është i bindur në pafajësinë e klientit të tij, duke akuzuar se ai po mbahet peng.
“Orest Sota mbahet në burg pa asnjë provë, mbahet nga një gjykatë që nuk është kompetente. Mbahet në burg peng dhe ai personi që këto duan ta lidhin nuk ka një akuzë është person nën hetim, pra të gjithë e dinë që Sota mbahet në burg pa asnjë fakt”, u shpreh Fatmir Brraka, avokati i Orest Sotës.
Avokati deklaroi se do të ankimojë këtë vendim, ndërsa deklaroi se gjithë kësaj kohe klienti i tij nuk është pyetur nga Prokuroria. Ai deklaroi gjithashtu se, arrestimi me të padrejtë ka ndikuar negativisht edhe në shëndetin e prindërve të Sotës.
Prokurorët e çështjes kanë deklaruar në seancën gjyqësore të Gjykatës së Krimeve të Rënda se, ka dyshime të arsyeshme që Sota të ketë konsumuar veprën penale të “pastrimit të parave” dhe të “fshehjes së të ardhurave”. Sipas tyre, shuma prej 863 mijë euro i përket ish-ministrit Saimir Tahiri, produkt i aktiviteteve të paligjshëm ku dyshohet të jetë përfshirë.
Përfaqësuesit e akuzës paraqitën një sërë përgjimesh ambientale dhe telefonike të Sotës, personit tjetër që ndodhej me të kur u ndalua nga policia, Leonard Almeta, shoferit të Tahirit, Genti Ceka, si edhe babait të 25-vjeçarit. Duke iu referuar një akt-ekspertimit të shumës së sekuestruar, prokurorët thanë se 5 kartmonedha prej 50 euro rezultuan të falsifikuara.
Pretendimi i Sotës se sasia e madhe e parave ishte për të blerë hekur tek “Kurum” u hodh poshtë nga menaxherja e kësaj kompanie, e cila deklaroi në Prokurori se “Kurum” kryen transaksione me shifra deri në 150 mijë euro. Shuma e parave që kishte Sota në makinë ishte disa herë më e madhe. Sekuestrimi i regjistrave të shitblerjes ishte veprimi i parë që kreu Prokuroria e Krimeve të Rënda, në kuadër të verifikimit të pasurisë së Orest Sotës dhe familjes së tij.
Orest Sota u arrestua në nëntor në Elbasan, pasi në automjet iu gjetën 863 mijë euro dhe dy patenta skafi të ish-ministrit të Brendshëm, Saimir Tahiri. Sipas avokatit Fatmir Braka, shuma e parave janë të justifikuara dhe i përkasin të atit të Orest Sotës.

Taksisti Bujar Elezi tregon se ka përjetuar një natë tmerri nga dy të rinj që i grabitën makinën. Ai shprehet se dy autorët e kanë futur me dhunë brenda në bagazhin e makinës për rreth 30 minuta, e dhunojnë dhe i marrin automjetin gjatë rrugës.
Ngjarja ka ndodhur rreth orës 03:00 të mëngjesit të së dielës në aksin rrugor Levan-Vlorë. Elezi u nis nga Durrësi për të dërguar dy të rinj me taksi për në qytetin e Vlorës. Ka qenë vetë shoferi i taksisë, 48-vjeçari Elezi, i cili i ka telefonuar policisë dhe e ka lajmëruar për atë që kishte ndodhur.
Pasi është nisur nga Durrësi, rreth orës 12:00 të mbrëmjes, bashkë me dy të rinjtë, pasagjerët janë treguar të sjellshëm deri në momentin, kur kanë mbërritur pranë autostradës Levan-Vlorë. Pikërisht në këtë segment, të rinjtë kanë ushtruar dhunë fizike mbi taksistin, duke e futur më pas në bagazhin e automjetit të tij.
Më pas, një prej autorëve ka marrë drejtimin e taksisë dhe kanë udhëtuar drejt fshatit Bunavi dhe Kërkovë. Pasi kanë ndaluar makinën, autorët e kanë nxjerrë nga bagazhi dhe pasi kanë ushtruar sërish dhunë fizike mbi të, janë larguar, duke i marrë makinën. I mbetur në mes të rrugës, Elezi ka kërkuar ndihmën e policisë.

Përmbytjet në fillim të dhjetorit sollën dëme të mëdha edhe në frutikulturë. Në Njësinë Administrative Frakull banorët të cilët u bënë të famshëm nga kultivimi i luleshtrydhes tashmë janë drejt falimentimit. Serrat e shkatërruara totalisht dhe luleshtrydhe të kalbura është panorama që gjejmë në fshatrat Kashisht dhe Kafaraj të Bashkisë Fier.
Edhe pse kanë kaluar më tepër se 2 javë askush nuk është paraqitur tek ata për të mbajtur një procesverbal e për të evidentuar dëmet në të mbjella. “Këtu dëmi është kolosal. I gjithë prodhimi që lidhi dhe zhvilloi luleshtrydhja është kalbur komplet, më kanë ikur rreth 20 mln lekë të vjetra. Tani do presim që pas dy muaj të lidhë lule sërish”, shprehet një prej fermerëve, ndërsa kërkon ndihmën e shtetit.
Edhe pse të rrënuar disa prej fermerëve vazhdojnë të pastrojnë serrat, duke u munduar të shpëtojnë ato pak bimë që kanë mbetur. Të zhgënjyer banorët e fshatit Kashisht shprehen se para përmbytjes erdhi kryetari i Bashkisë Fier për të paralajmëruar për daljen e lumit Vjosë, por pas përmbytjes askush nuk është interesuar për ta. Të irrituar banorët shprehen para kamerave se janë harruar nga shteti edhe pse për vite i kanë paguar çdo detyrim shtetit. “Turpin ta mbajnë ata! Ne jemi të ndershëm do punojnë e do e përballemi me gjithçka”, pohon një tjetër fermer.
Edhe më e rëndë është gjendja e fermerëve në fshatin Kafaraj. “Këtu nuk ka ardhur njeri të shikojë. Janë 100 hektarë luleshtrydhe në këtë fshat. Ndihmat shkojnë në Frakull të Madhe jo tek ne në Kafaraj. Mua më sollën një thes miell po ç’e dua unë miellin?! Unë dua të më përgjigjet shteti për dëmin në serra”, shprehet një prej fermerëve, ndërsa thekson se në 2015 ka marrë vetëm 600 mijë lekë të vjetra dëmshpërblim, kur në të vërtetë dëmi ishte disa herë më i lartë.
Gazetarët e Fiks Fare i drejtohen Njësisë Administrative Frakull, por në godinë nuk gjejnë asnjë person. Ndërsa dera e godinës është e hapur dhe mund të lëvizësh lirisht në të. Pas rreth 30 minuta pritje në godinë shfaqet kryetari i Njësisë z. Dashnor Troka. Meqenëse vetë është fermer, ai shprehet se e di mirë sa dëm i madh u është shkaktuar fermerëve të zonës, por nuk mund të thotë nëse për ta do të ketë dëmshpërblim apo jo.
“Jemi interesuar në Bashkinë Fier se çfarë do të bëhet për verifikimin e dëmeve, por Ligji për Emergjencat Civile është shprehur qartë se në rast se nuk shpallet gjendja e jashtëzakonshme nuk mund të bëhen vlerësimet për dëmet në bujqësi, përveçse të specifikohen dëmet në banesa”, pohon Troka.
Për 2015 vlerësimet kanë qenë me 30% të vlerës së dëmeve. Gjithsecili prej tyre ka marrë nga 1.400 milionë lekë të vjetra, shprehet kryetari i Njësisë Frakull.

Një 26-vjeçar ka humbur jetën dhe tre persona të tjerë janë plagosur ditën e djeshme në tre aksidente automobilistike. Rreth orës 18:00 të ditës së djeshme në Fier në afërsi të fshatit Baltëz, një makinë doli nga rruga dhe si pasojë drejtuesi i mjetit humbi jetën. “Shtetasi J.I, 26 vjeç, banues në Fier, duke drejtuar mjetin tip “Benz” ka humbur kontrollin dhe ka goditur betonin e mbikalimit të autostradës. Për pasojë ka gjetur vdekjen e menjëhershme drejtuesi i mjetit”, sqaron policia. Policia dhe grupi hetimor po punon për zbardhjen e shkakut të aksidentit.
Ndërkohë, dy efektivë policie u përfshinë në një aksident paraditen e djeshme pranë Stacionit të Trenit në Tiranë. Nga të dhënat paraprake mësohet se një i moshuar u ka prerë rrugën efektivëve që ecnin me motorë. Për shkak të devijimit, ata janë përplasur me një makinë “Benz” të parkuar dhe më pas motori është përmbysur. Aktualisht mësohet se dy efektivët janë në Spitalin e Traumës në gjendje të rëndë, por jashtë rrezikut për jetën.
Po ashtu, një aksident ka ndodhur në hyrje të qytetit të Burrelit, ku dy automjete janë përplasur midis tyre. Për pasojë, një person ka përfunduar në spital. Ende nuk dihet nëse ka persona të tjerë të lënduar si pasojë e përplasjes së automjeteve. Policia ndodhet në vendin e ngjarjes, po punon për zbardhjen e shkakut të aksidentit.