Institucionet e Kosovës kanë vetëm pak javë në dispozicion që ta ratifikojnë Marrëveshjen për Demarkacionin e kufirit me Malin e Zi, thonë analistë të çështjeve integruese.
Nisur nga fakti që në shkurt, Presidenti i Komisionit Evropian, Jean-Claude Junker, do të prezantojë strategjinë për Ballkanin dhe Zgjerimin e Bashkimit Evropian, analistët thonë se humbja e këtij momenti, do të nënkuptonte edhe disa vite izolim të Kosovës dhe mungesë të liberalizimit të vizave.
Ishte edhe Presidenti i Kosovës, Hashim Thaçi, ai i cili e kishte ftuar spektrin politik që të jetë i përgjegjshëm dhe i përgatitur që deri në atë kohë t’i kryejë obligimet e veta. Në të kundërtën, siç ka thënë ai, do t’i kushtonte Kosovës me “një çmim shumë të lartë”.
Kriteret për heqjen e vizave për qytetarët e Kosovës ishin dhe mbeten në agjendën politike të të gjitha qeverive të Kosovës, që nga viti 2010 e këndej.
Aktualisht, kanë mbetur dy kriteret e fundit, përkatësisht kriteri për luftimin e korrupsionit dhe ai për shënjimin e vijës kufitare me Malin e Zi.
Jehona Lushaku – Sadriu, analiste e çështje politike në një prononcim për Radion “Evropa e Lirë” e konsideron të rëndësishme që kriteret e mbetura të plotësohen në kohë rekord.
Ajo thekson se në këtë proces janë shënuar ngecje dhe se Kosova është në pikën e njëjtë siç ka qenë para tre vjetësh.
“Është krijuar një situatë paradoksale sa i përket Marrëveshjes së Demarkacionit. Në njërën anë është aprovuar marrëveshja në qeveri, ndërsa në anën tjetër e kemi një thirrje nga ana e kryeministrit që kjo marrëveshje të mos miratohet në Parlament”.
“Ndërkohë, në anën tjetër kemi një thirrje nga presidenti që kjo marrëveshje të aprovohet dhe, po ashtu, kemi thirrje nga bashkësia ndërkombëtare që kjo marrëveshje të kalojë, pasi që është marrëveshje obligative për t’i përmbushur kushtet për liberalizimin e vizave”, thotë Lushaku-Sadriu.
Ajo vlerëson se, përgjegjësia e spektrit politik dhe gjithë parlamentarëve duhet të jetë shumë e lartë dhe të jenë të vetëdijshëm për konsekuencat që mund të ketë Kosova si shtet.
“Do të dëshiroja të shihja një përgjegjësi të lartë nga parlamentarët se në çfarë pozite është Kosova dhe të dinë konsekuencat që mund t’i ketë vendi ynë në rast të mosratifikimit të demarkacionit. Jemi si shtet i bllokuar dhe që nuk e kemi liberalizimin e vizave, ndërkohë kemi plotësuar numrin më të madh të kushteve që i janë parashtruar ndonjë herë ndonjë vendi. Prandaj është paradoksale dhe keq për shkak të një kriteri, siç është demarkacioni, të mbesim të izoluar si shoqëri dhe si shtet”, thotë Lushaku- Sadiku.
Marrëveshja për Demarkacionin e kufirit me Malin e Zi është nënshkruar nga autoritetet e Prishtinës dhe Podgoricës, në fund të gushtit të vitit 2015, në Vjenë.
E njëjta marrëveshje ishte ratifikuar nga Kuvendi i Malit të Zi, por jo edhe nga ai i Kosovës. Për ratifikimin e marrëveshjes nevojiten 80 vota të deputetëve.
Emrush Ujkani, profesor i së Drejtës Evropiane në Universitetin e Prishtinës, thotë për Radion “Evropa e Lirë” se, në çfarëdo varianti, institucionet e Kosovës nuk kanë kohë të humbin në ratifikimin e demarkacionit me Malin e Zi.
Ujkani konsideron se ratifikimi i demarkacionit me Malin e Zi do të ishte mirë të ndodhte para se Presidenti i Komisionit Evropian, Jean-Claude Junker, të prezantojë strategjinë për Ballkanin dhe Zgjerimin e Bashkimit Evropian.
Ai thotë se. nuk është i sigurt nëse institucionet do të arrijnë të ratifikojnë marrëveshjen para kësaj date, porse pasojat në rast të mosratifikimit të kësaj marrëveshjeje, do të jenë të mëdha për vendin.
“Mosratifikimi i kësaj marrëveshjeje do të na lërë larg nga shumë procese, jo vetëm nga agjenda evropiane, pasi do të vazhdojmë të jemi një njollë e zezë dhe nuk mund të flitet për progres as në fusha të tjera derisa e kemi këtë. E dyta, do të largohemi nga aleatët tanë, ata që e mbështesin ratifikimin e kësaj marrëveshjeje, prandaj po humbim mbështetjen e aleatëve tanë”, vlerëson Ujkani.
Ndryshe, zyrtarë nga Bashkimi Evropian në vazhdimësi janë duke kërkuar që institucionet të mos vonojnë në përmbushjen e kritereve, nëse synojnë liberalizimin e vizave në një afat më të shpejtë.

Një zëdhënëse e përfaqësueses së lartë të Bashkimit Evropian për Politikë të Jashtme dhe Siguri, Federica Mogherini, thotë se moslejimi i politikanit opozitar, Aleksei Navalny, që të kandidojë në zgjedhjet presidenciale ruse në mars të vitit 2018, “ka hedhur dyshime serioze në sistemin e pluralizmit politik në Rusi” dhe perspektivën për zgjedhje demokratike në këtë vend.
Zëdhënësja, Maja Koçijançiq, tha sot se për Navalnyn, “Gjykata Evropiane për të Drejtat e Njeriut kishte marrë vendim se ai ishte privuar nga e drejta për proces korrekt në çështjen e tij gjyqësore në vitin 2013”.
Sipas saj, “akuzat e motivuara politikisht nuk duhet të përdoren kundër pjesëmarrjes politike”.
Këto komente u bënë një ditë, pasi Komisioni Qendror i Zgjedhjeve në Rusi, mori vendim për moslejim të kandidaturës së Navalnyt në zgjedhjet presidenciale, ku pritej se do të ishte rival kundër Presidentit aktual, Vladimir Putin.
Komisioni, në vendimin e djeshëm, tha se Aleksei Navalny nuk mund të garojë, për shkak të dënimit penal nga e kaluara lidhur me akuza për keqpërdorim.
Navalny ishte dënuar me kusht, ndërsa këtë veprim të autoriteteve ai e ka përshkruar shumë herë si të motivuar politikisht.
Zëdhënësja, Maja Kocijançiq, tha se Bashkimi Evropian pret që Rusia t’i ftojë monitoruesit zgjedhorë nga Zyra e OSBE-së për institucione demokratike dhe të Drejta të Njeriut (ODIHR).
“Bashkimi Evropian do t’i mbështesë vlerësimet e veta për procesin zgjedhor në gjetjet e tyre, siç kemi vepruar në të kaluarën”, tha Maja Kocijançiq, zëdhënëse e përfaqësueses së lartë të Bashkimit Evropian për Politikë të Jashtme dhe Siguri, Federica Mogherini.
Aleksei Navalny, pas vendimit të komisionit për moslejimin e kandidaturës së tij, i ka ftuar mbështetësit e vet që t’i bojkotojnë zgjedhjet presidenciale ruse.
“Dalja në vendvotime tash është votim për gënjeshtra dhe korrupsion”, tha Navalny.

Navalny bën thirrje për bojkot të zgjedhjeve presidenciale
Udhëheqësi i opozitës ruse, Alexei Navalny bëri thirrje për bojkotimin e zgjedhjeve të ardhshme presidenciale, pasi Komisioni Qendror i Zgjedhjeve mori vendimin për ta ndaluar atë të kandidojë.
Komisioni votoi të hënën kundër kandidimit të tij në zgjedhjet e marsit 2018 për shkak të dënimit të tij për akuza kriminale, të cilat blogeri anti-korrupsion dhe pasuesit e tij i cilësojnë si të motivuara politikisht.
Vendimi i komisionit erdhi një ditë, pasi zoti Navalny deklaroi se kishte mbledhur numrin e kërkuar të mbështetësve në mbarë vendin për të kandiduar për president.
Pas vendimit të KQZ-së të hënën, Alexei Navalny publikoi një video ku u bënte thirrje mbështetësve të tij që të bojkotojnë zgjedhjet presidenciale.
“E kuptuam që vendimi i KQZ-së ishte i mundur, por kemi një plan të qartë dhe të saktë…Deklarojmë një “grevë të votuesve” për aq kohë sa procedura në të cilën na kërkohet të marrim pjesë, nuk është proces zgjedhor”, tha ai.
Zoti Navalny tha se, tani ekipi i tij do të bëjë fushatë kundër pjesëmarrjes në zgjedhjet presidenciale, duke shtuar se pjesëmarrja do të ishte “një votë pro mashtrimit dhe korrupsionit”.
Presidenti Vladimir Putin ka njoftuar kandidimin e tij në zgjedhjet e 18 marsit dhe besohet gjerësisht se ai do të fitojë një mandat të katërt si kryetar i shtetit rus.

Parlamenti i Maqedonisë arriti me vështirësi të miratojë Prokurorin e ri të Përgjithshëm, për mungesë kuorumi. Më në fund, 61 deputetë nga 120 që ka Parlamenti gjithsej, votuan pro Lubomir Joveskin-it për postin e kryeprokurorit publik.
Lubomir Joveskin vjen në këtë pozicion në një kohë, kur gjyqësori në Maqedoni përballet me probleme si korrupsioni dhe mungesa e reformave. Zoti Joveski pason në këtë detyrë Marko Zvërlevskin, i cili u shkarkua nga Parlamenti për mungesë profesionalizmi dhe mosaktivizimi për të hetuar rastet e shkeljes së ligjit nga politikanët.
Prokurori i ri i Përgjithshëm tha për shtypin se është i vetëdijshëm për sfidat me të cilat do të përballet, por premtoi se do t’u kthejë qytetarëve besimin tek institucioni.
63-vjeçari Joveski u zotua se, Prokuroria Publike do të mbrojë ligjet, do të sigurojë sundimin e ligjit, do të distancohet nga pushteti ekzektutiv dhe se do të jetë një organ i pavarur që do të hetojë rastet kriminale.

Mijëra shtetas të Perusë kanë protestuar mbrëmë në kryeqytetin Lima kundër amnistisë për ish-Presidentin, Alberto Fujimori.
Protestuesit kanë kërkuar që presidenti aktual i Perusë, Pedro Pablo Kuczynski, të paraqes dorëheqje, pasi pardje e ka amnistuar Fujimorin, për siç ka thënë, shëndetin e dobët. Ka pasur edhe përleshje të policisë me demonstruesit.
Alberto Fujimori, 79-vjeçar, ishte duke vuajtur dënimin prej 25 vjetësh burg, për vrasjen e 25 njerëzve gjatë fushatës kundër grupit terrorist të krahut të majtë, Shining Path.
Para tri ditësh, Fujimori është dërguar nga burgu në spital, për shkak të problemeve me zemër.
Duke brohoritur “tradhtar”, protestuesit kanë bartur flamuj të Perusë dhe fotografi të viktimave të fushatës kundër kryengritjes nga qeveria e e Fujimorit, në periudhën 1990-2000.