Kryetari i Partisë Demokratike, Lulzim Basha, priti në takim kryetarin e Parlamentit të Maqedonisë, z.Talat Xhaferri, me të cilin ndau vlerësimin dhe kënaqësinë që sjell caktimi i tij në krye të Parlamentit në vendin fqinj, si një shenjë kjo e emancipimit politik dhe progesit të shoqërisë maqedonase, si tregues i ecjes përpara në realizimin e të drejtave të shqiptarëve, dhe si pikë kulmore e bashkëjetesës demokratike.
Partia Demokratike, tha z.Basha, e ka interesin e shqiptarëve dhe interesin kombëtar, në krye të qëndrimeve dhe vokacionit të saj politik.
Basha tha se, PD ka mbështetur dhe ka nxitur vazhdimisht respektimin dhe përmbushjen e plotë të Marrëveshjes së Ohrit dhe integritetin territorial të Republikës së Maqedonisë, si një interes strategjik i vendit tonë.
Kryetari i Partisë Demokratike nënvizoi se, përmbushja e plotë e Marrëveshjes së Ohrit me avancimin e mëtejshëm të të drejtave të shqiptarëve dhe gjuhës shqipe atje, është rruga drejt sigurisë dhe stabilitetit në Maqedoni dhe më gjërë në rajon.
Partia Demokratike, theksoi Basha, do të vazhdojë të mbështesë pa u kursyer procesin e integrimit të Maqedonisë në NATO.
Duke u ndalur në zhvillimet e brendshme, kryetari i opozitës, vuri në dukje se rreziku kryesor që kanos ëndrrën europiane për Shqipërisë dhe vendet e tjera të rajonit, është korrupsioni dhe krimi i organizuar i lidhur me qeverinë.
“Korrupsioni dhe krimi i lidhur me qeverinë, janë armiku numër një i demokracisë, i ekonomisë, i qytetarëve”, u shpreh Basha, duke theksuar se përgjigja ndaj këtyre fenomeneve është ngritja dhe konsolidimi i institucioneve të pavarura, sidomos atyre të drejtësisë.
Basha bëri të ditur se opozita në Shqipëri do të luftojë deri në fund, për Kushtetutën, dhe për drejtësinë e pavarur që lufton krimin e korrupsionin.

Dy deputetët e PD, Flamur Noka dhe Edi Paloka, kanë deklaruar se ajo që ka bërë opozitë ka qenë vetëm mbrojtja e Kushtetutës. Në një dalje për mediat, deputetët thanë se opozita nuk do të ndalet, duke luftuar për të mbrojtur Kushtetutën dhe qytetarët. “Ne deputetët që jemi prezent ishim aty si deputetë për të bërë detyrën, e përsëris ne deputetët të opozitës PD dhe LSI ishim aty si deputetë të betuar për të mbrojtur Kushtetutën. Në funksion të këtij betimi, ne mbrojtëm Kushtetutën, e patë që Kushtetuta u shkel dhe u dhunua nga Kryeministri dhe Parlamenti. Në rast se ka një rresht në Kushtetutë që flet për mënyrën si u zgjodh kryeprokurori, atëhere mund të kishte gjykim ndaj nesh. Këta zgjodhën ditën e Stalinit për të na dënuar ne, por të jeni të sigurtë që deputetët e opozitës kanë qenë dhe janë në mbrojtje të Kushtetutës. Narkotrafikantët vrapuan për tja dhënë prokurorin Ramës për të mbuluar dosjen”, tha Paloka. Ai u shpreh se, Parlamenti tashmë e ka humbur legjitimitetin. “Gjithë deputetët e opozitës bënë maksimumin e mundshëm për të mbrojtur Kushtetutën dhe nuk ka Byro që drejtohet nga Ruçi apo Rama që të pengojë opozitën të bëjë detyrën e saj. Ky Parlament e ka humbur legjitimitetin prandaj ta harrojë t’i bëjë shantazh apo presion deputëteve të opozitës. Ky Parlament nuk ka parë realisht asgjë akoma”, theksoi Paloka.

Kryetarja e LSI, Monika Kryemadhi, pasi doli nga Byroja e Kuvendit tha se, nuk i intereson vendimi për masën disiplinore që do të marret. Në një dalje për mediat, ajo tha se çizmja në Parlament ishte një paralajmërim për krimin dhe drogën. “Mbrojtja është jo vetëm morale, por edhe ligjore. Deputetët në Kuvendin e Shqipërisë janë betuar se do respektojnë Kushtetutën dhe do të bëjnë çdo gjë për përparimin e vendit dhe të popullit. Veprimi ynë ka qenë legjitim, ka qenë një veprim legjitim për mos shkeljen e Kushtetutës nga partia shtet. Sepse është një Kushtetutë që ne e votuam me 140 vota, është një Kushtetutë që i ka kushtuar popullit shqiptar dhe sot ka ardhur dita që sot ajo të zbatohet. Njerëzit, të cilët donin që ta përdornin këtë sistem drejtësie ditën e hënë e shkelën Kushtetutën”. E pyetur në lidhje me masat disiplinore për përjashtimin nga Kuvendi, Kryemadhi: “Absolutisht fare nuk më shqetëson asgjë. Më shqetëson varfëria, e cila po pllakoset çdo ditë e më shumë mbi shqiptarët. Sa më të varfër të jenë shqiptarët aq më shumë nënshtrohen nga Edi Rama dhe kjo është një nga arsyet që ai po i varfëron shqiptarët çdo ditë dhe më shumë për t’i pasur argat të plantacioneve të tij të drogës. Për t’i pasur dhe për t’i kthyer fëmijët e shqiptarëve në spaçator. Nuk është më problemi i politikës, por po them është problem i jashtëzakonshëm droga e tmerrshme, e cila ka zaptuar shkollat 9-vjeçare, gjimnazet dhe nuk po hyj fare te universitetet. Kjo është klithma më e madhe e popullit shqiptar. Dhe kjo është një nga klithmat që ka terrorizuar dhe që po i ngre në makth nga mëngjesi në darkë nënat shqiptare. Për këtë gjë nuk do të ndalem në asnjë moment. Luftë kundër drogës dhe kundër atyre njerëzve që duan t’i kthejnë shqiptarët dhe fëmijët e tyre në spaçator”. Monika Kryemadhi tha se, Rama është përgjegjësi kryesor për bllokimin e procesit të integrimit të Shqipërisë. “Statusin për hapjen e negociatave e ka shkatërruar Edi Rama, ai është përgjegjësi kryesor. Ai nuk ka dashur dhe ka sabotuar në çdo moment Reformën në Drejtësi. Ai është i vetmi përgjegjës, i cili e solli në këtë situatë për të zhvilluar seancën e ditës së hënë, sepse nuk do të ngrihet Byroja e Hetimit, KLP, Prokuroria kundër korrupsionit, sepse është një nga njerëzit më të korruptuar”, theksoi Kryemadhi. E pyetur mbi hapat që do të ndërmarrë opozita për protestën në janar, Kryemadhi tha: “Do të ndjekim të gjitha hapat, sepse ajo që është më e rëndësishme, dua të them që shqiptarët duhet të kenë një sistem drejtësie. E patë çfarë ndodhi dje me familjen Hoxha? Ishin në shtëpi të tyre, në pronë të tyre dhe oligarkët i nxorën jashtë për të ndërtuar pallatet e tyre shumëkatëshe, të cilat krijojnë jo vetëm fitime marramendëse, por pastrojnë paratë e drogës. Këto para, të cilat Edi Rama kërkoi t’i rifusi përsëri në ekonominë shqiptare për ta infektuar atë dhe për ta futur në black list Shqipërinë siç ka bërë gjithmonë”. Ajo theksoi se, akoma në dyert e Prokurorisë flenë dosjet e Ministrisë së Kulturës, të tenderave të tij dhe të fasadave të famshme. “Pafund ka dhe kjo është frika dhe makthi i Edi Ramës. Edhe pse ai e futi në këtë rrugë antikushtetuese Parlamentin shqiptar, frika e tij e madhe është KLP. Dhe do vazhdojë me të gjitha mënyrat, me avokatët e mafies dhe krimit për të uzurpuar këtë sistem drejtësie dhe për ta kthyer atë në një vegël të krimit të organizuar”, theksoi Kryemadhi.

Deputeti i Lëvizjes Socialiste për Integrim, Endrit Braimllari, ka lëshuar akuza të forta në adresë të deputetes së PS-së, Vasilika Hysi. Gjatë mbledhjes në Byronë e Kuvendit, Braimllari bëri me dije se deputetja Hysi, i kishte bërë presion ditën e hënë gjatë tensioneve në Kuvend, dhe i ka thënë që ai së bashku me babain e tij, do të përfundonin në burg. Braimllari thekson, se qeveria po përdor Reformën në Drejtësi për t’i bërë presion çdo shqiptari. “Vasilika Hysi më bëri presion në seancë që do të përfundosh në burg dhe babai yt do të ketë pasoja, sepse është gjyqtar. Ndërkohë, babai im nuk është gjyqtar, ka një profesion krejt tjetër. Kjo tregon qartë atë ç’ka përfaqësonte ajo seancë”, u shpreh Braimllari. Më tej, Braimllari ka shtuar se dhuna ndaj deputetes Kejdi Mehmetaj është e patolerueshme. “Ka përdorur një fjalor jashtëzakonisht të turpshëm për deputeten Mehmetaj, më vjen turp mua si mashkull të them ato fjalë. Është e turpshme ajo që bëri deputeti Çelaj, që ushtroi dhunë ndaj deputetes Mehmetaj”, tha ai.