Mbretëria e Bashkuar ka pezulluar bisedimet tregtare me Izraelit në përgjigje të bllokadës së Gazës dhe krizës humanitare që ka lindur, në një kohë kur dy milionë njerëz vuajnë nga uria, sipas Organizatës Botërore të Shëndetësisë.

Sekretari i Jashtëm britanik, David Lamy, njoftoi sot  “ngrirjen” e bisedimeve tregtare midis dy vendeve, duke vënë në dukje se ambasadorja izraelite është thirrur në MB.

Duke iu drejtuar deputetëve, David Lammy tha se “kërcënimi i urisë po i kanoset qindra mijëra civilëve” në Gaza, të cilin ai e quan “të neveritshëm”.

Ai tha se bllokada 11-javore që ndalon ndihmën humanitare që arrin në Gaza është mizore.

“Ata po e izolojnë Izraelin nga miqtë dhe partnerët e tij në mbarë botën, duke minuar interesat e popullit izraelit dhe duke dëmtuar imazhin e shtetit të Izraelit në sytë e botës.”

Lammy tha se Mbretëria e Bashkuar po pezullon negociatat me qeverinë izraelite për një marrëveshje të re të tregtisë së lirë dhe po thërret ambasadoren izraelite në Mbretërinë e Bashkuar, Tzipi Hotovely, në Ministrinë e Jashtme.

Ai tha se ministri i Lindjes së Mesme, Hamish Falconer, do t’i thotë Hotovely-t se “bllokimi 11-javor i ndihmës për Gazën ka qenë mizor”.

“Bota po gjykon. Historia do t’i gjykojë ata”, shton ai.

Duke cituar deklaratat e kryeministrit izraelit Benjamin Netanyahu se do të lejonte vetëm sasi minimale ushqimi të arrinin në banorë, Lamy theksoi: “Më pak se dhjetë kamionë hynë në Gaza dje. OKB-ja dhe Organizata Botërore e Shëndetësisë kanë lëshuar paralajmërime të tmerrshme për rrezikun e urisë që kërcënon qindra mijëra civilë.”

Ministri britanik foli për një situatë të tmerrshme. “Civilët në Gaza po përballen me uri, mungesë strehimi, trauma, dëshpërim për fundin e kësaj lufte, dhe tani ata kanë bombardime të reja, zhvendosje të reja dhe vuajtje të reja”, ndërsa pengjet e mbetura të Hamasit, të cilët kanë qenë larg të dashurve të tyre për gati 600 ditë, janë gjithashtu në rrezik në rritje.

“Bllokada e Gazës është moralisht e gabuar, e pajustifikueshme dhe duhet të ndalet”

David Lamy u bëri thirrje deputetëve të dënojnë pa mëdyshje refuzimin e Izraelit për të siguruar “ushqim për fëmijët e uritur”, duke e quajtur atë moralisht të gabuar dhe veprim të pajustifikueshëm.

“Unë besoj se i gjithë parlamenti duhet ta dënojë pa mëdyshje refuzimin e qeverisë izraelite për t’u siguruar ushqim fëmijëve të uritur. Është gabim. Është e neveritshme”, tha ai.

“Kundërshtimi i zgjerimit të një lufte që ka vrarë mijëra fëmijë nuk është shpërblim për Hamasin. Kundërshtimi i zhvendosjes së 100,000 civilëve nuk është shpërblim për Hamasin. Në këtë anë të parlamentit, ne jemi absolutisht të qartë se ajo që po ndodh është moralisht e gabuar, e pajustifikueshme dhe duhet të ndalet“, tha ai.

Presidentja e Komisionit Evropian, Ursula von der Leyen, njoftoi sot se, megjithëse 27 vendet anëtare sapo kanë miratuar paketën e 17-të të sanksioneve ndaj Rusisë, tashmë është në përgatitje paketa e 18-të, e cila do të përfshijë masa të mëtejshme të ashpra.

“Ka ardhur koha të rrisim presionin mbi Rusinë për të arritur një armëpushim” në Ukrainë, shkroi ajo në platformën X, pas një bisede telefonike me presidentin ukrainas Volodymyr Zelensky.

Më herët, ministri i Jashtëm gjerman, Johann Wandeful, theksoi gatishmërinë e Shteteve të Bashkuara për të shqyrtuar vendosjen e sanksioneve shtesë ndaj Rusisë, duke theksuar se përderisa Vladimir Putini nuk tregon vullnet për negociata serioze, evropianët do të jenë të gatshëm të intensifikojnë masat ekzistuese.

Duke folur në Bruksel, në kuadër të një takimi me homologët e tij nga BE, Wandeful shprehu zhgënjimin e Perëndimit për qëndrimin e Moskës. “Është demoralizuese të shohësh që Rusia nuk ka bërë këtë hap. Duhet të reagojmë,” tha ai, duke iu referuar mungesës së një armëpushimi të menjëhershëm dhe të pakushtëzuar nga ana e Rusisë.

Zyrtari gjerman theksoi gjithashtu se pritshmëritë nga Uashingtoni janë të qarta: “Kemi bërë të qartë në mënyrë të përsëritur se presim vetëm një gjë nga Rusia – një armëpushim të menjëhershëm dhe pa kushte. Gjithashtu presim nga aleatët tanë amerikanë të mos e tolerojnë mungesën e këtij angazhimi nga Moska.”

Ish-sekretari i përgjithshëm i Organizatës së Traktatit të Atlantikut Verior (NATO), Anders Fogh Rasmussen, i tha Radios Evropa e Lirë se përgatitjet për një forcë evropiane që do të vendosej në Ukrainë pas një armëpushimi ose marrëveshjeje paqeje “po ecin shumë ngadalë” dhe se i gjithë modeli i sigurisë evropiane ishte “në një pikë kthese”.

“Nuk dua të shoh një koalicion të të gatshmëve që kthehet në një koalicion të pritësve”, tha Rasmussen, duke iu referuar një plani të shpallur nga kryeministri britanik, Keir Starmer, në Londër, më 2 mars.

Që atëherë ka pasur një sërë takimesh në nivele të ndryshme. Megjithatë, pyetjet kyç për mandatin e misionit, rregullat e angazhimit dhe se cilat vende do të dërgojnë trupa, ende nuk kanë marrë përgjigje publikisht.

“Në parim, në Evropë, shpenzojmë shumë kohë duke diskutuar e folur, dhe përpjekjet për veprim janë të pakta”, tha Rasmussen.

“Megjithatë, shpresoj që sulmi i [presidentit rus, Vladimir] Putin ndaj Ukrainës dhe zgjedhja e [Donald] Trumpit [president në Shtetet e Bashkuara të Amerikës] të shërbejnë si thirrje zgjimi që t’u tregojnë evropianëve se duhet të veprojmë shpejt”, shtoi ai.

Rasmussen foli në një intervistë të gjerë mbi çështjet ushtarake, sigurinë ekonomike dhe komentet e përsëritura të presidentit amerikan, Trump, për marrjen e Grenlandës nga Danimarka.

Ai ishte kryeministër i Danimarkës përpara se të shërbente si sekretar i përgjithshëm i NATO-s, nga viti 2009 deri më 2014.

“Është e turpshme ta kërcënosh Danimarkën, një aleate të ngushtë, me mjete ushtarake për ta pushtuar Grenlandën”, tha Rasmussen.

“Nuk mendoj se do të ndodhë. Por, në mënyrë të qartë, ekziston potenciali për të krijuar një ndarje brenda NATO-s kur kërcënon një aleat”, tha ai.

Që prej largimit nga roli në NATO, Rasmussen ka krijuar organizatën jofitimprurëse Aleanca për Demokracitë, e cila synon të kundërshtojë atë që e përshkruan si ngritje globale të “autokratëve dhe diktatorëve”.

Javën e kaluar, grupi shpalli një plan me pesë pika për mbrojtjen evropiane që përfshin një thirrje për rritjen e buxheteve të mbrojtjes në katër për qind të Prodhimit të Brendshëm Bruto (PBB) deri në vitin 2028.

Kjo pason lëvizjet e Bashkimit Evropian dhe fuqive të mëdha ushtarake të Evropës – Britania, Franca dhe Gjermania – për të rritur shpenzimet e mbrojtjes në vitet e ardhshme, por shkon përtej planeve të shpallura deri më tani.

“Investimi i Rusisë në mbrojtje tani është më i madh se investimi i kombinuar i mbrojtjes në pjesën tjetër të Evropës. Kështu që, duhet të përshpejtojmë. Duhet të dyfishojmë të paktën investimin evropian në mbrojtje”, i tha Rasmussen Radios Evropa e Lirë.

“Për një kohë të gjatë, kemi mbështetur një model që nuk funksionon më — një kombinim i energjisë së lirë nga Rusia, mallrave të lira nga Kina dhe sigurisë së lirë nga SHBA”, shtoi ai.

Tema si çështjet e sigurisë dhe ekonomisë ishte temë kryesore në një konferencë që Rasmussen organizoi javën e kaluar në Kopenhagë, ku u diskutua edhe plani me pesë pika.

Veterani 72-vjeçar i politikës dhe diplomacisë veçon tarifat globale të administratës Trump si një rrezik të ri që ka krijuar nevojën për një lloj “NATO-je ekonomike”.

“Administrata Trump shpalli një luftë tregtare kundër të gjithë botës, përveç Rusisë dhe Koresë së Veriut”, tha ai.

“Do ta sugjeroja krijimin e asaj që e quajmë D7, shtatë demokracitë e botës: Bashkimi Evropian, Mbretëria e Bashkuar, Kanadaja, Australia, Koreja e Jugut, Japonia dhe Zelanda e Re. Dhe, mendoj se shtylla kurrizore e kësaj do të ishte ajo që do ta quanim një Nen 5 ekonomik. Ne do ta konsideronim një sulm ose shtrëngim ndaj njërit prej atyre shtatë vendeve si një sulm ndaj të gjithve, dhe do të përgjigjeshim në mënyrë kolektive”, shtoi ai.

Është e habitshme të dëgjosh një ish-shef të NATO-s që përjashton Shtetet e Bashkuara nga një listë e demokracive globale.

“Po, por Shtetet e Bashkuara kanë zgjedhur izolimin… Nuk shoh një gatishmëri amerikane për të ushtruar udhëheqjen globale të botës së lirë. Kështu që, për këtë arsye, SHBA-ja është përjashtuar nga kjo D7”, tha Rasmussen.

Qeveritë në të gjithë botën po përballen me sfidën se si të reagojnë ndaj tarifave të Trumpit. Bashkëpunimi më i ngushtë dhe tregtia me partnerë të tjerë janë, pa dyshim, pjesë e përllogaritjeve të tyre.

Por, ashtu si me shpenzimet e mbrojtjes, propozimet e Rasmussenit shkojnë shumë përtej asaj që po konsiderohet në shumicën e kryeqyteteve.

Për shembull, marrëveshja e shumëpërfolur e tregtisë së lirë e Bashkimit Evropian me katër shtete të Amerikës së Jugut në grupin Mercosur është përmendur si pjesë e përgjigjes kolektive të BE-së ndaj një mjedisi të ri, por Franca ende është shumë e kujdesshme për ta ratifikuar atë.

Ndërkohë, BE-ja dhe vendet individuale kanë reaguar veçmas ndaj tarifave të SHBA-së, duke kërkuar të negociojnë me Uashingtonin në vend se të formojnë një front të përbashkët.

Rasmussen nuk ofron përgjigje të thjeshta për zgjidhjen e rrjetit kompleks të interesave që e bëjnë të vështirë për shumë vende të krijojnë struktura të reja globale. Por, ai thotë se kjo është sfida që duhet kapërcyer.

“Për të 19-tin vit radhazi, kemi parë një rënie të lirisë dhe demokracisë globale. Kështu që tani është koha për të krijuar një bashkëpunim më të fortë”, tha ai.

“E di nga përvoja me Putinin dhe autokratë të tjerë se ata respektojnë vetëm forcën, unitetin dhe një qëndrim të vendosur… Nëse veprojmë së bashku, nëse veprojmë të bashkuar, atëherë mund të kundërshtojmë autokracitë që po përparojnë”, përfundoi ai./REL