Urdhëri për arrestimin e protestuesve është dhënë nga drejtori i Policisë Tiranë, Ardi Veliu. Kryetari i PD të Lushnjës, Myslim Murrizi, shkruan në një postim në Facebook se, drejtori i Policisë Tiranë, Ardi Veliu, një enverist i sëmurë arreston protestuesit pa urdhër nga Prokuroria.
Murrizi shkruan se, policia ka arrestuar 3 qytetarë nga Lushnja pse morën pjesë në protestën para Parlamentit. “Për pjesëmarrje në protestë ky fundërrinë, shërbëtor i komunizmit, mendon që nuk lejohen protestat. Nën urdhërin e këtij drejtori janë arrestuar Manol Priti, Igli Hasani, Elvis Hajredini nga fshati Rrapëz i Njësisë Kolonjë, Lushnjë. Po sot, me porosi të këtij fundërrine të regjimit monstër të komunizmit, janë thirrur në Policinë Divjakë, Agron Sopjani dhe disa protestues të tjerë.
Të drejtën e protestës shqiptarët e kanë fituar më 8 dhjetor të vitit 1990. Shumë shpejt do ta merrni atë që meritoni, o enveristë, nga i pari tek i fundit. Nuk ka asnjë shërbëtor të Sorosit, që mund të kthejë Shqipërinë 27 vjet pas, me çfardo lloj funksioni, kombësie apo pashaporte qoftë ai ose ajo. Kush cënon të drejtën dhe liritë e qytetarëve të fituar me mund dhe plot sakrificë nga një regjim gjysëm shekullor diktaturë, mund të marrë si “shpërblim” atë që meriton”, shkruan ndër të tjera Murrizi.

Një nga deputetet që është kallëzuar nga policia pas protestës së ditës së hënë të opozitës para dhe brenda Kuvendit, është dhe Grida Duma. Në emisionin ‘Studio e Hapur’ në News 24, Duma deklaroi se kjo situatë është diçka qesharake. Ajo tha se qëllimi mazhorancës është që të frikësojë aktivistët e opozitës të mos dalin në protesta.
Duma bëri me dije se frika e opozitës nuk është fare çështja e kryeprokurores, por me këtë gjë që i kanë bërë shqiptarëve; duhet të ketë më shumë frikë mazhoranca. Pyetjes, si ndiheni që jeni proceduar në gjendje të lirë, Duma u përgjigj se është qesharake. “Si ndihemi me situatat qesharake?! Si gjithmonë i kemi pranuar këto. Më vjen mirë që disa deputetë të PD ju gjendën aktivistëve që ishin marrë me idenë për t’i futur brenda për t’i frikësuar. Gjëja e mirë është që me asistencën dhe presionin e deputetëve të PD aktivistët kanë dalë. Frika e opozitës nuk është fare çështja e kryeprokurores. Me këtë që i kanë bërë shqiptarëve duhet të ketë më shumë frikë mazhoranca”, u shpreh Duma.
Dhjetë deputetë opozitarë janë proceduar në gjendje të lirë për shkak të tensioneve të shkaktuara ditën e djeshme në seancën parlamentare. Të proceduarit penalisht nga ana e PD janë deputetët Ervin Salianji, Gent Strazimiri, Edi Paloka, Klevis Balliu, Flamur Noka, Grida Duma. Ndërsa nga ana e Lëvizjes Socialiste janë Floida Kërpaçi, Monika Kryemadhi, Kejdi Mehmetaj, Endrit Braimllari. Noka, Paloka dhe Duma, janë proceduar për “Prishje së rendit dhe qetësisë publike’, ndërsa të tjerët për “Kundërshtim të punonjësit që kryen një detyrë shtetërore ose një shërbim publik”.

Deputetja Kejdi Mehmetaj, një prej protagonisteve të përplasjeve në Kuvend, tashmë edhe e proceduar penalisht nga Policia deklaroi se mazhoranca kishte orkestruar një skenar për të provokuar opozitën në seancën plenare të së hënës, ku u zgjodh prokurorja e përgjithshme e përkohshme.
Në intervistën e mbrëmjes në “Ora News”, ajo tha e pyetur mbi procedimet e policisë ndaj saj dhe tre kolegëve të tjerë të LSI, ajo u shpreh se e priste një gjë të tillë. “Nuk u shqetësuam shumë. Nuk kemi asnjë lloj habie për situatën që ka ndodhur dje, që të mos e prisnim që sot të kishte procedim. Unë nuk e di pse e kanë bërë, as unë dhe kolegët e mi jo vetëm që nuk kemi ushtruar dhunë, por jemi dhunuar”, tha ajo.
Mehmetaj zbardhi edhe përplasjen verbale me shefin e Komisariatit të Rinasit, i cili ndaloi 8 vajza të LRI. “Isha dje në Komisariatin e Rinasit, takoj shefin e komisariatit që padrejtësisht kishte shoqëruar 8 vajza, disa prej tyre 18 dhe 19 vjeç i kishte shoqëruar me dhunë dhe fjalor fyes në komisariat me urdhër të Ramës. E pyes, cili është motivi që ti i mban dhe më tha kam marrë urdhër nga shoqëruesi kryesor i Ramës, për t’i shoqëruar. Në përfundim, pasi i liroi sërish me urdhër, i them çfarë policie jeni ju, të jep urdhër kryeministri i arreston, të jep urdhër ministri dhe i liron. Tani e kuptove që jemi polici e urdhrave, më tha. I thashë si do ndiheshe ti po t’i ndalonin fëmijët e t’u. Më tha, fëmijët e mi do t’i mësoj të mos protestojnë dhe të mos flasin.
Ndërkohë lidhur me letrën drejtuar Ambasadorëve Lu dhe Vlahutin, Mehmetaj tha se ka pasur edhe një komunikim me Lu. “Pata një komunikim të rastësishëm me Ambasadorin amerikan, i cili më tha ndoshta interpretimi i deklaratës së tij nuk është ai që kemi perceptuar. I tregova pamjet filmike të situatave të djeshme në Parlament, çfarë ka ndodhur me kolegen Kërpaçi, videon e ndalimit të vajzave. Nuk ishte i informuar, më tha se u informua prej letrës time mbi situatat që kishin ndodhur”, u shpreh Mehmetaj.

Qindra naftëtarë të Kombinatit të Përpunimit të Naftës në Ballsh kanë dalë sot në protestë. Për këtë ngjarje ka reaguar edhe ish-Kryeministri Berisha, i cili ka publikuar një video të protestës së naftëtarëve. “Viktimat e vjdhjes së Armos nga Rama dhe Beso i tij në proteste!”, shkruan Berisha në një postim në Facebook. Protesta është zhvilluar për të kërkuar ndërhyrjen e shtetit për pagën e papaguar të muajit nëntor dhe për mbylljen e përkohshme të punës për shkak të mungesës së lëndës së parë.
Rreth 1000 punonjës prej 15 ditësh janë të pa punë, pasi Inspektoriati Shtetëror Teknik Industrial ka pezulluar punën për të kryer remontin në repartin e Koksit, ku rreth 15 ditë më parë ndodhi një avari dhe u plagos një punonjës.
Sot punonjësit kërkojnë ndërhyrjen e shtetit për të furnizuar me lënd të parë uzinën për fillimin e punës sipas premtimit të kryeministrit Rama që nafta shqiptare të përpunohet në Uzinën e Ballshit. Kryetari i Sindikatës, Kamber Iljazi tha se, i kërkon shtetit të marrë masa, në të kundërt do të përshkallëzojnë protestat në ditët në vazhdim.
“I kërkojmë shtetit të marrë masa. Do të përshkallëzojmë protestat nëse nuk merren masa. Po kështu, nëse nuk na japin pagesën do t’i vëmë flakën uzinës”, thonë protestuesit. Për shkak të defektit, rreth 1 mijë punonjës të Uzinës së Naftës në Ballsh kanë mbetur pa punë prej 2 javësh.

Të gjithë ata që menduan se pas protestës së opozitës para Parlamentit do të kishte qetësi, e kanë pasur gabim. Kjo për faktin se me të rënë mbrëmja, policia ka nisur një fushatë arrestimesh të personave, të cilët ishin të përfshirë në këtë protestë. Mes të shoqëruarve në orët e vona të mbrëmjes së sotme ishte edhe Sali Lusha, një nga simpatizantët e njohur të Partisë Demokratike, dhe njëkohësisht babai i reperit Stresi.
Me të marrë lajmin e shoqërimit të të atit në polici, Stresi, ka vrapuar menjëherë te Drejtoria e Policisë, ku janë grumbulluar të shoqëruarit. Por ajo që nuk pritej ishte fakti se, protesta e reperit problematik shqiptar ishte shumë civile, madje në prononcimin për “News 24”, ai u tregua shumë qytetar dhe elokuent në kërkesat e tij.
“Babain tim e kanë shoqëruar vetëm e vetëm se ka marrë pjesë në një protestë të ligjshme. Po na sulmojnë politikisht, pasi ai nuk ka bërë asgjë. Ai ishte në një protestë të ligjshme, ku duhet të marrin pjesë të gjithë qytetarët për të mbrojtur të drejtën e tyre. Jam këtu me vëllanë dhe po presim t’i lirojnë, ndërkohë që ju bëj thirrje të qëndrojnë fort…”, u shpreh Stresi.

Dy persona kanë mbetur të plagosur me armë në dy atentate në Korçë dhe Himarë. Bëhet e ditur se, një 39-vjeçar ka mbetur i plagosur mbrëmjen e djeshme rreth orës 18:05, në hyrje të Korçës, përgjatë aksit rrugor Korçë-Ersekë. Burime nga policia bënë të ditur se, shtetasi Mina Zoja, ka mbetur i plagosur në këmbë, ndërsa nga dëshmia e këtij të fundit ka qenë një person, që ka qëlluar ndaj tij. Ky i fundit është larguar fill pas ngjarjes. Sipas burimeve, fillimisht ka pasur përleshje midis 39-vjeçarit dhe 8 personave të tjerë. Pasi e kanë goditur, autorët janë larguar me shpejtësi. Më pas janë kthyer dhe e kanë qëlluar me armë, ku ka marrë një plumb në këmbë.
I plagosuri sapo ishte kthyer nga Gjermania, ku jeton prej vitesh. Vetë i plagosuri Mina Zoja është shumë i rezervuar në dhënien e informacioneve. Aktualisht, ai ndodhet në spital nën kujdesin e mjekëve, jashtë rrezikut për jetën. Shkak për plagosjen e 39-vjeçarit dyshohet të jetë bërë një konflikt i vjetër. Policia tha se, po punon për zbardhjen e ngjarjes. Ngjarja në fjalë ndodhi në rreth orës 18:05, në hyrje të Korçës, përgjatë aksit rrugor Korçë-Ersekë.
Po ashtu një 70-vjeçar, shofer taksie ka mbetur i plagosur mbrëmjen e djeshme në Himarë. Ngjarja ka ndodhur në aksin rrugor Himarë-Llogara, në fshatin Palasë. Mësohet se shtetasi B.G., është qëlluar me armë zjarri në krah nga dy shtetas të tjerë, të cilët ishin pasagjer në mjetin e tij.
Në njoftimin e policisë thuhet se, Shërbimet e Policisë shkuan menjëherë pranë vendit të ngjarjes dhe kanë konstatuar se në fshatin Palasë shtetasi B.G., 70 vjeç, shofer taksie, është qëlluar me armë zjarri dhe ka mbetur i plagosur në krah prej dy shtetasve të tjerë, të cilët ishin pasagjer. Shtetasi B.G., është transportuar në spital për të marrë mjekimin e nevojshëm, aktualisht jashtë rrezikut për jetën. Policia ka ngritur pika të shumta kontrolli me qëllim kapjen e autorëve. Grupi hetimor po punon për zbardhjen e plotë të rrethanave të ngjarjes.

Temperaturat e ulta, bora dhe ngricat e kanë detyruar policinë të bllokojë disa segmente rrugore për shkak se drejtuesit e mjeteve kanë hasur vështirësi në qarkullim. Reshjet e dëborës kanë shkaktuar kështu vështirësitë e para nga Jugu në Veri, ku Qafë Thora mbetet e bllokuar, duke izoluar banorët e Thethit.
Po ashtu është vështirësuar qarkullimi i mjeteve në Qafën e Llogarasë. Trashësia e dëborës aty arrin deri në 20 cm dhe lëvizja e mjeteve bëhet vetëm me zinxhirë. Rruga ishte e bllokuar gjatë orëve të natës dhe lëvizja në këtë aks nisi vetëm pas ndërhyrjes së firmës nënkontraktore që hodhi kripë e skorje.
Gjatë orëve të mbrëmjes së të hënës, dëbora nisi edhe në qytetin e Korçës. Në mëngjesin e së martës u shfaqën vështirësi momentale në disa rrugë, por të gjithë janë të kalueshme. Në Dardhë, dëbora ka arritur deri në 15 cm, ndërsa në Voskopojë deri në 10 cm. Drejt këtyre zonave malore në disa pjesë kërkohet përdorimi i zinxhirëve. Por problemi më i madh tashmë janë ngricat në rrugë pas uljes së ndjeshme të temperaturave.
Borë në male e akull në rrugë ka edhe në Qarkun e Dibrës. Drejt zonave rurale Ostren, Trebisht e Krastë udhëtohet vetëm me zinxhirë, pasi trashësia e dëborës arrin disa cm. Në rrugët nacionale Peshkopi Bulqizë – Klos, Burrel nuk ka probleme. Policia e Dibrës, ndërkohë ka shtuar forcat e shërbimit në akset rrugore për t’u ardhur në ndihmë drejtuesve të mjeteve.
Në efektin e temperaturave të ulta e reshjeve të dëborës mbetet edhe Qarku i Kukësit. Lartësia e borës varion në akset rrugore nga 3 cm deri në 15 cm në rajonin e Tunelit Kalimash dhe 10 cm në Valbonë. Aktualisht të gjitha akset rrugore që përshkojnë Qarkun e Kukësit janë të qarkullueshme pa zinxhirë. Në të gjithë qarkun janë vënë në punë 14 borëpastruese 3 fadroma, për mbajtjen në gatishmëri të këtyre akseve. Ndërkohë në Tropojë vijojnë kërkimet për të gjetur trupin e Gentian Bajram Zallin, i cili dyshohet se është vetëflijuar, duke u hedhur në lum, pasi pak ditë më parë iu dogj banesa në Tropojë.
Në Qarkun e Shkodrës mbetet e bllokuar Qafë Thora, ku trashësia e dëborës arrin në 50 cm. Në zonat e tjera malore të Malësisë së Madhe, dëbora arrin deri në 15 cm, por rrugët janë të kalueshme. Reshje debore ka edhe në Pukë, por nuk raportohen problematika.