Juventus nuk ndalet kurrë. Dyshja Marotta-Paratici është vënë në punë për të përmirësuar akoma më shumë organikën, veçanërisht në mesfushë. Pas një ndjekje të gjatë, duket se marrëveshja me Emre Can është vetëm një hap larg. Kontrata e 23-vjeçarit është drejt skadencës dhe lojtari ka refuzuar ofertat për rinovim të Liverpool, ku do të qëndrojë deri në fundin e këtij sezoni, për t’u transferuar më pas te bardhezinjtë me kosto zero.
I ri, i fortë, në gjendje të mbulojë disa pozicione të mesfushës: Emre Can do të ishte një goditje e rëndësishme, ashtu siç do të ishte Fabinho. 24-vjeçari brazilian i Monaco ka bërë të ditur se ka dëshirë të largohet nga bardhekuqtë në fundin e këtij sezoni: “Ky duhet të jetë viti im i fundit këtu, por askush nuk ka folur me mua ose menaxherin tim. Do të flasim përsëri për këtë në maj”. Juventus është gati të sfidojë PSG, Manchester United dhe Atletico Madrid për ta siguruar.
Mes cilësive të Emere Can dhe Fabinho është edhe ajo që të luajnë si mbrojtës të krahut të djathtë, një rol në të cilin Juventus duhet të përforcohet. Mattia de Sciglio po përmirësohet, por Alegri-t i duhet një alternativë cilësore, edhe pse Lichtsteiner do të largohet nga Torino në qershor.
Ndërkohë, braziliani Lucio është shprehur se, “kalimi tek Juventus ishte një gabim, por gabimin më të madh e bëri Inter”. Lucio ka qenë një nga titullarët e Inter-it të Mourinho-s në vitin e “Triplete”-s. Ai do të mbahet mend gjithmonë si një nga heronjtë e asaj skuadre, por në karrierën e tij ka patur edhe një eksperiencë të shkurtër me Juventus, që krijoi shumë polemika. Tani, pas disa vitesh, braziliani është kthyer të flasë për transferimin e tij tek Juventus: “Në 2012-ën, kam patur mundësinë të shkoja tek Juventus, nuk ka qenë një zgjedhje e madhe, sepse kam qëndruar vetëm gjashtë muaj, por gjithsesi kam fituar Superkupën e Italisë”, ka thënë Lucio.
Në intervistën e dhënë për calciomercato.com, qendërmbrojtësi ka thënë se, Inter nuk ka fituar më trofe (nga 2011), sepse klubi vendosi t’i largonte të gjithë në 2012-ën, duke ndryshuar një numër të madh lojtarësh të rëndësishëm: “Në 2012-ën vendosën të rindërtonin ekipin dhe unë nuk mund të vazhdoja aty. Mbaj mend se një nga drejtuesit ishte Branca. Ka qenë një gabim i madh i klubit të ndryshonte gjithçka, sepse nga ai vit nuk ka fituar më asgjë. Sipas mendimit tim, largimet e Eto’o, Julio Cesar dhe Maicon kanë qenë një gabim i madh”.
Sot, Lucio luan me amatorët e Sociedade Sportiva Do Gama në Brazil. Dëshira për të luajtur nuk i është larguar kurrë, ashtu si dëshira për të ndihmuar një qytet dhe shumë të rinj: “Është një eksperiencë e ndryshme, por kam akoma një dëshirë të madhe për të luajtur futboll. E dua këtë sport dhe më ka motivuar të luaj”, ka thënë ai, që më pas ka folur edhe për brazilianët e Juventus, Douglas Costa dhe Alex Sandro: “Juventus dhe Inter kanë mundësinë ta fitojnë titullin, por duhet të bëjnë kujdes nga Napoli, që është përmirësuar shumë në vitet e fundit. Douglas Costa dhe Alex Sandro janë dy lojtarë shumë të mirë dhe janë grumbulluar vazhdimisht nga trajneri i Brazilit. Të shohim nëse do të jetë kështu edhe për Botërorin”.

Mesut Ozil dëshiron të shkojë tek Manchester United për shkak të Murinjos. Sipas “Daily Mail”, Arsene Wenger ka konfirmuar këtë javë se ekipi i tij është ende duke u përpjekur për ta bindur lojtarin të qëndrojë në “Emirates”, por turko-gjermani e ka refuzuar propozimin e fundit të klubit të Londrës, i cili ofron 235.000 paundë në javë, ose rreth 267.000 euro në javë, që do të thotë ndryshe 13.8 milionë euro në sezon. Por qëllimi i Özil duket se është rekordi i tij i ardhshëm 300.000 paundë në javë (341.000 euro), që do të thotë se do të mbledhë rreth 17.800.000 euro në vit. Barcelona mbetet një pistë e mundshme për Ozil, por klubi katalanas ka prioritet marrjen e Phillipe Coutinho (Liverpool), përveçse të shtojë një tjetër brazilian, Arthur (Gremio).
Ndërkohë, klubi tjetër që ndjek hapat e mesfushorit-sulmues është Manchester United. “Djajtë e Kuq”, që duket i zhbilancuar në raport me titullin në Premier League, duan të forcohen, të paktën për të bërë mirë në Ligën e Kampionëve. Dhe ideja e të luajturit në “Old Trafford” e josh më shumë Ozilin, i cili, sipas gazetës britanike, preferon të kthehet nën urdhrat e Jose Mourinho, me të cilin ka punuar te Real Madridi.

Ylli” i Monaco, Fabinho pritet të largohet nga kampionët në fuqi të Ligue 1, përpara se të fillojë sezoni i ardhshëm. Futbollisti i kombëtares braziliane është kërkuar nga disa klube në merkato, mbi të gjithë nga Manchester United. Gjithsesi, gjatë verës së kaluar, Monaco zgjodhi të mbante edhe për një sezon Fabinho në ekip, duke parë largimet e Bernardo Silva, Tiemoue Bakayoko, Benjamin Mendy dhe Kylian Mbappe. Tani ka ardhur radha e tij që të vazhdojë karrierën në një klub më të madh. “Nuk kam ndërmend të largohem në janar. Kam pasur kontakte me klube të tjera, por kam vendosur të qëndroj te Monaco, pas një bisede që pata me drejtuesit. Gjithsesi, ky do të jetë sezoni im i fundit me Monaco. E kam vendosur dhe nuk do të ndryshoj mendim. Tani do të mendoj vetëm për futbollin e luajtur dhe para se të fillojë sezoni i ardhshëm do të kem ndërruar ekip”, deklaroi Fabinho para se të nisej për në Saint-Etienne, ku Monaco do të luajë ditën e premte për Ligue 1.

Manchester United po shënjestron blerjen e mesfushorit Saul Niguez nga Atletico Madrid. Vetë futbollisti e ka pritur me kënaqësi interesimin e “djajve”, teksa Mourinho e sheh si njeriun e duhur për të përforcuar mesfushën. Spanjolli ka një klauzolë prej 140 milionë eurosh për prishjen e kontratës me skuadrën e Simeone dhe faktikisht Manchester United do të përballet me një konkurrencë të fortë për të marrë shërbimet e tij, pasi shumë skuadra europiane, përfshi edhe ato angleze kanë nisur të interesohen për lojtarin, që tanimë është edhe pjesë e kombëtares spanjolle.
Atletico Madrid e Madrid e konsideron Saul si një futbollist shumë të rëndësishëm dhe nuk ka ndërmend të privohet nga futbollisti, gjithmonë nëse nuk paguhet klauzola. Strategjia e merkatos së ardhshme e Manchester United do të jetë ajo e ngjashme me PSG, duke investuar gjithçka në blerjen e futbollistit dhe kjo nuk e përjashton mundësinë që të paguajnë shumë rekord 140 milionë euro për Saul. Ai do të zëvendësonte bashkatdhetarin Ander Herrera, gjithnjë e më larg nga “Old Trafford”.

Kjo është një luftë e hapur mes Milanit dhe Mino Raiolës. Arsyeja për mosmarrëveshjen është edhe një herë Gianluigi Donnarumma, një pasuri që kuqezinjtë synojnë ta mbrojnë nga ambiciet e supozuara të menaxherit të tij. Lidhur me këtë problem ka folur edhe Massimiliano Mirabelli, i intervistuar në zonën e përzier, pas ndeshjes Milan-Verona: “Ne nuk do ta marrim më qafë Gigion, sepse është një djalë i madh. Kam biseduar me të një minutë më parë dhe nuk ka thënë kurrë se dëshiron të largohet. Ndoshta ka disa zotërinj që dëshirojnë të organizojnë diçka, por ne do të mbrojmë Milanin. Ne nuk kemi nevojë për të shitur askënd. Cilido lojtar që dëshiron të largohet duhet të jetë i lirë nga kërkesat tona. Unë nuk kam asnjë takim të planifikuar me Raiola.
Portieri ka një kontratë deri në vitin 2021. Unë nuk kam asgjë për t’i thënë Raiolës. Ne jemi të vendosur për të mbrojtur Gigio dhe Milanin nga disa zotërinj, të cilët janë duke u përpjekur për të dëmtuar klubin tonë. Nëse dikush përpiqet të prishë imazhin tonë, do të mbrohemi në forumet e duhura. Dhuna morale? Unë nuk mendoj se e kemi bërë ndonjëherë diçka të tillë. Ne qeshim për këtë, por nuk do të lejojmë asgjë të ndodhë. Lojtari ishte shumë i lumtur të rinovonte kontratën dhe është ende në të tilla pozita. Ne të gjithë e dimë qëllimin e dikujt, ku dëshiron të arrijë. Jemi më afër se kurrë me Gigio, sepse nuk kemi ndërmend ta dorëzojmë atë. Nëse dëshiron të largohet, duhet të na lutet, por ai e do Milanin”.

Manchester City ka arritur fitoren e 15-të radhazi në Premier League, duke vënë një rekord të ri në Angli, pasi më parë kishte qenë Arsenal që kishte arritur 14 fitore të njëpasnjëshme. Suksesi ndaj Swansea pati si protagonist spanjollin David Silva, i cili shënoi golin e parë dhe të tretë në fitoren 4-0, që e konsolidon skuadrën e Pep Guardiola, në vendin e parë, me 11 pikë më shumë se Manchester United. Pati lavdi edhe për Kevin de Bryune, autor i golit të dytë, si dhe për Sergio Aguero, që realizoi golin e katërt për “qytetarët”.
Ndërkohë, goli i shënuar nga Romelu Lukaku, në mesin e pjesës së parë, i ka dhënë Manchester United fitoren e ngushtë 1-0 ndaj Bournemouth, që i konsolidon “djajtë” në vendin e dytë të Premier League. Në një ndeshje që u luajt në një shi të rrëmbyeshëm, të besuarit e Mourinho mund të kënaqen vetëm me rezultatin e jo me lojën. Nga ana tjetër, Liverpool “ngec” në shtëpi kundër West Brom. Në barazimin 0-0 në “Anfield Road”, “të kuqtë” koleksionuan një “mal” me raste për shënim, por pa gjetur golin e fitores.

Trajneri i Manchester United, Jose Mourinho, këmbënguli se gara e titullit të Premier League është ende e gjallë, përkundër distancës së të tijve nga kryesuesit e Manchester City. Skuadra e Pep Guardiolës shënoi një fitore të 15-të në listën e “top-fluturimeve” në renditjen e së mërkurës, duke hedhur skuadrën në tapet Swansea City 4-0, ndërsa Manchester United “pickoi” jashtë fushe, duke mposhtur minimalisht Bournemouth. Goli i Romelu Lukakut ishte i mjaftueshëm për të mposhtur “qershitë”. “Djajtë e Kuq” vinin pas disfatës në derbi dhe Mourinho, më pas, pranoi se lojtarët e tij po tregonin shenja të lodhjes. Ai, gjithsesi, nënvizoi vendosmërinë e tij për të mbyllur boshllëkun me ekipin e Guardiolës. Kur u pyet për garën e titullit, ai i tha “BBC Sport”:
“Ne luajmë ndeshje pas ndeshje dhe duhet të përpiqemi të fitojmë sa më shumë. Kemi një sfidë të vështirë në West Brom dhe po përpiqemi ndeshje pas ndeshje. Titulli përcaktohet vetëm gjatë majit. Nëse kjo çështje do të kishte përfunduar, do të shkoja me pushime në Brazil, apo në Los Anxhelos”. Kur u pyet nëse skuadra e tij kishte pësuar një “hangover” nga humbja 2-1 ndaj Manchester City, Mourinho u përgjigj: “Lodhje po, “hangover” jo. Ndeshja ishte e madhe. Natyrisht, një humbje nuk ndihmon në rimëkëmbjen tuaj. Ndihmojnë fitoret, humbjet nuk e bëjnë këtë gjë. Ata ishin kundërshtarë të vështirë dhe u luajt në kushte të vështira. Po të kishim shënuar golin e dytë do të kishte qenë një natë e qetë për ne”, u shpreh Murinjo.

Pasi ka hipotekuar Kupën Libertadores, tashmë ai pret Real Madrid në finalen e Botërorit për klube. Renato Portaluppi është i pangopur dhe Gremio i tij synon surprizën për të hipur mbi fronin e botës së futbollit. Është i karikuar, madje shumë. Beson në vetvete, mbase edhe me tepricë. Mjafton të lexosh fjalët e tij në konferencë: “Si futbollist isha më i fortë se Cristiano Ronaldo, do të doja ta shihja të luante në skuadrat ku kam luajtur unë”. Në deklaratën e tij, një vend të veçantë kishte edhe Giuseppe Giannini, ish-shok i skuadrës te Roma e sezonit 1988/’89. Trajneri aktual i Gremio e akuzoi ‘Principe’ se e ka shkatërruar në eksperiencën e tij me verdhekuqtë. Një akuzë që nuk mund të mos pasohej nga replika e protagonistit, Giannini, që foli për ‘Centro Suono Sport’.
“Me Renaton nuk kam patur kurrë probleme. Mes nesh ka patur vetëm një debat gjatë një derbi. Shënoi Di Canio dhe unë i thashë Portaluppi-t se duhej të ishte tërhequr në fazë mbrojtëse. Ai m’u përgjigj se ishte një sulmues dhe se nuk ishte detyra e tij të mbështeste mbrojtjen. Unë nuk dua të ndërhyj, por ndonjëherë nuk ishte i kthellët. Kam veshur fanellën e Romës për 16 vite, por në të gjithë karrierën time kam parë vetëm atë që të mbërrinte i dehur në seancën stërvitore të mëngjesit. Kur ndodhte, Liedholm e mbronte dhe e largonte. Besoj se është e ekzagjeruar nga ana e tij që të hedhë baltë mbi të tjerët. Unë te Roma si kapiten kam qenë gjithmonë mes atyre që e mbronin”, deklaroi Giuseppe Giannini.
Real Madrid ka rrezikuar jashtë mase kualifikimin për në finalen e Kupës së Botës për Klube teksa i është dashur të përmbysë rezultatin në pjesën e dytë me Ronaldo dhe Bale. Ishin miqtë ata që kaluan të parët në avantazh, por në pjesën e dytë me shumë mundime Los Blancos arritën të përmbysnin. Ronaldo është kthyer golashënuesin më të mirë të këtij kompeticoni me 6 gola, duke parakaluar Messi-n, Suarez dhe Delgado.
U duk që në minutat e para se në fushë do të kishte vetëm një ekip, dhe ai do të ishte Real Madrid. Los Blancos dominojnë ndeshjen dhe vetëm në 12 minutat e para krijojnë gjashtë mundësi të pastra për të shënuar me Ronaldo, Benzema dhe Modriç, por pa sukses. E pamundur se si Real vazhdon të shpërdorojë raste që normalisht do t’i kishte të sigurta në La Liga apo në Champions League.
Al Jazera ka topin në zotërim vetëm pas rivënieve dhe kur dilte në ndonjë kundërsulm të rrallë e pa pretendime. Në minutën e 31’ u duk sikur më në fund Real zhbllokoi rezultatin, por VAR e anuloi për pozicion jashtë loje. Pak minuta më pas, disa minuta përpara se të përfundonte pjesa e parë, vjen befasia: Romarinho (nuk ka lidhje me Romario-n) arrin të shfrytëzojë një nga kundërsulmet e ekipit të tij, duke shënuar golin e avantazhit.
Pas pushimit, Real nervozohet akoma më shumë dhe e shpëton VAR nga goli i dytë i Al Jazera-s. Ishte një episod që me sa duket zgjoi spanjollët, të cilët barazojnë rezultatin pak më pas me të përhershmin Ronaldo. Duhet të dilte nga loja Benzema, i cili vetëm shtyllën dinte të godiste në gjithë ato raste të krijuara, dhe të futej Gareth Bale që Real të kalonte për të parën herë në avantazh. Një ndeshje makthi, por me një fund të lumtur për Real që shkon në finale.

Andre Silva nuk ka shënuar asnjë gol në Serinë A dhe ka përfunduar në shënjestrën e mediave dhe tifozëve. Edhe nga trajneri Gattuso, i cili nuk është treguar shumë i butë ndaj tij pas ndeshjes së Europa League të luajtur kundër Rijeka-s. Por Cristiano Ronaldo duket se ia ka këshilluar bashkatdhetarin e tij Real Madridi-t.
Sipas shtypit spanjoll, pesë herë fituesi i Topit të Artë, CR7 i ka dhënë klubit që të blejë Andre Silva-n në verë. Si “Diario Gol”, ashtu edhe “A Bola”, kanë shkruar për këto zëra dhe kanë shtuar se Ronaldo i ka thënë presidentit Perez që të marrë Andre Silva-n në vend të Icardi-t, që është golashënuesi më i mirë i kampionatit italian. Përveç kombësisë, CR7 dhe Silva kanë të përbashkët edhe menaxherin Jorge Mendes.
22-vjeçari i kuqezinjve është një nga sulmuesit e rinj më të fortë në qarkullim. Vitin e kaluar ka shpërthyer te Porto, me 16 gola në 32 ndeshje, por ka befasuar akoma më shumë me kombëtaren. Me Portugalinë ka shënuar 11 gola në 18 ndeshje. Marrëdhënia me Ronaldo-n është e mirë, brenda dhe jashtë fushës. Me Milan-in ka pasur disa probleme në Serinë A, ku nuk ka shënuar asnjë gol deri tani. Por ka shënuar 8 herë në Europa League në 10 ndeshje. Gattuso shpreson që ai të vazhdojë të bëjë gola në Europë dhe që të zhbllokohet edhe në kampionat. Real e mban nën vëzhgim për sezonin e ardhshëm.