Francesco Totti, menaxher te Roma, komentoi nga Lyon-i shortin e 1/8 finale të Ligës së Kampioneve, i cili i vendosi të tijtë kundër skuadrës së Eusebio Di Francesco, Shakhtar Donetsk të Ukrainës: “Për çfarë mund të ndodhte, mendoj se shorti shkoi mjaft mirë për ne. Por, Shakhtari nuk duhet nënvlerësuar. Eshtë skuadër e fortë fizikisht dhe teknikisht dhe posaçërisht në shtëpi është me të vërtetë e rrezikshme. Sa më shumë që të vazhdoni në këtë kompeticion, aq më e vështirë bëhet. Si trajner, Eusebio Di Francesco më befasoi dhe mendoj se do të përmirësohet përsëri. Edhe Roma mund të vazhdojë të rritet. Tani do të bisedojmë me Monçin dhe trajnerin dhe do të përpiqemi ta bëjmë skuadrën edhe më konkurruese. Kampionati është ende objektivi ynë kryesor. Ne nuk duhet ta fshehim: në Ligën e Kampionëve do të përballemi me ekipet më konkurruese në Romë, por kjo nuk do të thotë që ne nuk do të japim gjithçka për të shkuar sa më shumë që të jetë e mundur përpara. Po përshtatem me këtë rol të ri, më pëlqen dhe do të përpiqemi t’i shfrytëzojmë maksimalisht aftësitë që kemi”.

Michel Salgado lëvizi në rezidencën e tij në Dubai. Ai, që ishte pjesë e Real Madridit, e pa të qartë që nga fillimi dhe u vendos në Emirates, duke kërkuar vendin e vet në futboll. Ai ka folur për Benzema dhe Cristiano Ronaldo, lojtarë të cilët janë shënjuar nga mungesa e golave në këto javë të La Liga-s. “Ju nuk mund ta kritikoni Ronaldon. Cristiano është shpirti i Real Madridit. Kur është në fushë, e shihni sa frikësues është për rivalët e tjerë. Kjo është e mirë. Cristiano është shembulli i përsosur i asaj që është Real Madridi. Ky ekip punon dhe merr frymë si Ronaldo.
Kur të vijë momenti i së vërtetës, ai shfaqet. Është si Marcelo, i cili gjithmonë shfaqet në momentet kyçe. Ronaldo është një lojtar themelor. A është ai më i miri në botë? Pa asnjë dyshim, tani. Është një vlerësim personal. Ajo që ne jetojmë nuk është parë kurrë. Pele, Maradona…, si Cristiano dhe Messi, kurrë. Cristiano dhe Messi janë të ndryshëm, por të dy janë “kafshë” futbolli. Ata do të kujtohen përgjithmonë. Ajo çfarë duhet të bëni është të kënaqeni me ta dhe t’i falenderoni. Shpresojmë se në të ardhmen të kemi dy, ose tre lojtarë të tjerë si ata. Ajo që i japin futbollit është mbresëlënëse”, u shpreh Salgado.
Los Blancos do të debutojnë në këtë kompeticion të mërkurën në sfidën gjysmëfinale ndaj vendasve të Al Jaziras, por objektivi i Realit nuk është të mposhtë vetëm skuadrën nga Emiratet e Bashkuara Arabe, por të fitojë trofeun. Diçka të tillë e la të kuptohet në një konferencë për shtyp trajneri Zinedine Zidane.

11 korrikun e kaluar, më në fund erdhi rinovimi zyrtar i Gianluigi Donnarumma. Të gjithë tifozët e Milanit mundën të marrin frymë, duke lënë mënjanë psherëtimat për fatin e trashëgimtarit të Buffon, pas një “telenovele” që kishte udhëhequr agjenti i portierit, Mino Raiola. Afrimi i të vëllait Antonio, që luante me grekët e Asteras, si dhe një rikalkulim i pagës, që tashmë i ka kaluar 5.5 milionë euro, plus bonuset, ishin një “trullosje” e madhe për një lojtar vetëm 18 vjeç. Megjithatë, gjithçka mund të jetë vetëm një paraqitje e thjeshtë. “Corriere della Sera” profilizon një skenar që do të ishte i pabesueshëm, nëse konfirmohet. Qëllimi i Raiolës është për të anuluar kontratën e nënshkruar në korrik. Arsyeja? Një “dhunë morale” e pësuar nga Donnarumma në kohën e nënshkrimit, sipas justifikimit: “Pata presione psikologjike, unë nënshkrova, por nuk isha i qetë”. Kontrata ishte depozituar në “Lega” pa asnjë klauzolë përfundimi, me arsyen e thjeshtë se as agjenti, as portieri nuk do ta kishin nënshkruar atë.
Fillimisht duhej të kishte dy klauzola (një për 40 milionë euro në rast të dështimit për të arritur Ligën e Kampionëve, një tjetër për 70 milionë euro), por në fund, asnjëra nga këto nuk është realizuar. Raiola, prandaj, do të apelojë ndaj “dhunës morale”, e cila përbën një defekt pëlqimi, sipas nenit 1435 të Kodit Civil dhe mund të përcaktojë gjithashtu anulimin e një marrëveshjeje të nënshkruar. Në bazë të një tensioni të manifestuar me mungesën e agjentit në kohën e nënshkrimit dhe braktisjes së bisedimeve në shenjë proteste nga avokati Rigo (konsulent i Raiola) mund të rihapet kjo çështje tejet e nxehtë e verës. Qëllimi i Donnarumma do të jetë transferimi me parametra zero (duke qenë se kontrata e re është anuluar dhe e mëparshmja do të përfundojë në qershorin e ardhshëm) në ndonjë klub europian të madh, që i ofron atij një angazhim edhe më të lartë. Një histori e destinuar për të bërë shumë zhurmë dhe kjo me siguri nuk do të mbetet pa u vënë re.
Fatet e Milanit do të ndërthuren me atë të Paris Saint-Germain në fund të sezonit. Kuqezinjtë do të bëjnë të paktën një shitje “të rëndë” për të rregulluar bilancet dhe i sakrifikuari duket se do të jetë Gianluigi Donnarumma. Portieri i ri italian, që ka menaxher të famshmin Mino Raiola kërkohet nga kampionët e Francës, që duan të stabilizojnë çështjen e portës me një lojtar me të ardhme dhe Donnarumma do të ishte goditja ideale. Ky operacion pritet të sjellë në arkën e Milanit të paktën 60 milionë euro dhe të qetësojë sadopak drejtuesit dhe tifozët për të ardhmen financiare të klubit.

“Bashkëshorti im do ta mbyllë karrierën te Los Angelos në MLS”. Në këtë mënyrë ka folur Anna Stachurska, bashkëshortja e sulmuesit polak të Bayern Munich, Robert Lewandowski, në mikrofonat e faqes on-line “Business Insider”. Megjithatë, këto fjalë nuk i kanë pëlqyer Fernando Clavijo, drejtorit teknik të FC Dallas, që në “Goal.com” ka lëshuar një deklaratë plot “helm”. Sipas tij, klubet në SHBA kanë vendosur të investojnë te të rinjtë dhe jo te pensionistët…
“MLS nuk është një kampionat për të bërë pushime, tha Clavijo. Këtu futbollistët duan të tregojnë vlerën e tyre dhe të garojnë në nivelet më të larta. Disa futbollistë si Lewandowski kanë pasur një karrierë fantastike, por nëse dëshiron të vijë në Amerikë për pensionin, atëherë të zgjedhë një kampionat tjerët. Disa skuadra edhe mund të pranojë një futbollist në hapin e fundit të karrierës, por pjesa më e madhe ka vendosur që të bazohet tek të rinjtë. Në harkun e pak viteve kampionati i futbollit në SHBA mund të bëhet një nga pesë kampionatet më të forta të planetit, por më parë duhet të heqim dorë nga pensionistët”.

Real Madridi, Barcelona dhe Sevilla do të duhet të tregojnë versionin e tyre më të mirë për të qenë në çerekfinale të Ligës së Kampionëve. Me Atletico Madrid të eliminuar tashmë, tre përfaqësuesit spanjollë në konkurrencën e lartë kontinentale për klubet janë “çiftëzuar” në shortin e 1/8 finale me rivalë të vështirë: PSG për Real Madrid, Chelsea për Barcelonën dhe Manchester United për Sevilla. Për herë të parë në katër vitet e fundit, hegjemonia e ekipeve të La Liga-s në Ligën e Kampionëve duket të jetë në diskutim. Në atë periudhë, Real Madridi ka shtuar tre tituj dhe një Barcelona. Përveç kësaj, Atlético Madrid ka qenë finalist dy herë.
Sikur kjo të mos ishte e mjaftueshme, të bardhët kanë shtatë gjysmëfinale të njëpasnjëshme dhe Barça ka luajtur shtatë të tilla në dhjetë vitet e fundit. Do të ishte e nevojshme të ktheheshim dymbëdhjetë vite në kohë për të gjetur vendet e Champions-it pa praninë e ekipeve spanjolle. Në sezonin 2004-2005, Barcelona ra në raundin e dytë kundër Chelsea dhe Real Madridi bëri të njëjtën gjë kundër Juventusit. Në pesë sezonet e fundit kanë qenë gjithmonë të paktën tri skuadra spanjolle në çerekfinale, një shifër që duket më e vështirë për t’u arritur këtë kohë.
Ja bilanci i ekipeve spanjolle në tetëshe të Champions-it
Champions 2016-2017: Real Madrid, Barcelona, Atlético Madrid dhe Sevilla në tetëshe. Ata janë kualifikuar: Real Madridi kundër Napolit, Barça kundër PSG-së dhe Atlético Madrid kundër Leverkusen, minus Sevilla, që dështoi kundër Leicester.
Champions 2015-2016: Real Madrid, Barcelona dhe Atlético Madrid në tetëshe. Ata janë kualifikuar: Real Madrid kundër Romës, Barcelona kundër Arsenalit dhe Atlético Madrid kundër PSV.
Champions 2014-2015: Real Madrid, Barcelona dhe Atlético Madrid në tetëshe. Ata janë kualifikuar: Real Madrid kundër Schalke 04, Barcelona kundër Manchester City dhe Atlético Madrid kundër Leverkusen.
Champions 2013-2014: Barcelona, Atlético Madrid dhe Real Madrid në tetëshe. Ata janë kualifikuar: Barça ndaj Manchester City, Atlético Madrid ndaj Milanit dhe Real Madrid kundër Schalke 04.
Champions 2012-2013: Valencia, Real Madrid, Malaga dhe Barcelona në tetëshe. Kjo ndodhi kështu: Real Madrid kundër Manchester United, Malaga ndaj Porto dhe Barcelona ndaj Milanit. Valencia ra para PSG-së.
Champions 2011-2012: Barcelona dhe Real Madridi në tetëshe. Të dy u kualifikuan ndaj Leverkusen dhe CSKA Moskës, respektivisht.
Champions 2010-2011: Valencia, Barcelona dhe Real Madrid në tetëshe. Ata u kualifikuan kundër Lyon-it dhe Arsenalit, respektivisht. Valencia u eliminua nga Schalke 04.
Champions 2009-2010: Real Madrid, Barcelona dhe Sevilla në tetëshe. Eliminohet Real Madrid kundër Lyon dhe Sevilla kundër CSKA, kalon vetëm Barça kundër Stuttgart.
Champions 2008-2009: Barcelona, Atlético Madrid, Real Madrid dhe Villareal në tetëshe. Eliminohet Atlético Madrid kundër Porto dhe Real Madrid kundër Liverpool. Kualifikohet Barça kundër Lyon dhe Villarreal kundër Panathinaikos.
Champions 2007-2008: Real Madrid, Sevilla dhe Barcelona në tetëshe. Eliminohet Real Madrid kundër Romës dhe Sevilla kundër Fenerbahce. Kualifikohet vetëm Barça kundër Celtic.
Champions 2006-2007: Real Madrid, Valencia dhe Barcelona në tetëshe. Eliminohet Real Madrid kundër Bayern Munich dhe Barcelona kundër Liverpool. Kalon vetëm Valencia kundër Interit.
Champions 2005-2006: Real Madrid, Villarreal dhe Barcelona në tetëshe. Eliminohet Real Madrid kundër Arsenalit. Kalon Barça kundër Chelsea dhe Villarreal kundër Rangers.
Champions 2004-2005: Real Madrid dhe Barcelona në tetëshe. U eliminuan të dyja skuadrat: Real Madrid kundër Juves dhe Barça kundër Chelsea.

Për PSG-në nuk ishte lajm i mirë shorti i së hënës në Nyon, që u hodh nga UEFA për 1/8 finale të Champions. Parizienët e dinë se sa e vështirë është të përballen me kampionët e Europës në fuqi, ndaj sfida është maksimale. Por, në të njëjtën kohë, ata e kuptojnë se është momenti për të treguar se investimet e mëdha ia kanë vlejtur, se janë kandidatë serioz për të fituar Champions-in e tyre të parë. Nga Parisi mbërrijnë reagimet e para ndaj shortit dhe përballjes me Real Madridin. Presidenti Nasser al Khelaifi pret një duel të gjallë: “Ne kemi respekt të madh për Real Madridin. Do të jenë dy ndeshje, që do të na dhurojnë momente të gjalla dhe magjike, si në Madrid, ashtu edhe në Paris. Ne duhet të jemi gjithmonë të gatshëm të masim veten kundër çdo kundërshtari dhe do të jemi gati për t’u përballur me Real Madridin”, tha Al Khelaifi.

Presidenti i Real Madrid, Florentino Perez, po lëviz për të marrë “yllin” e Liverpool, Mohamed Salah, sipas asaj që bën të ditur shtypi spanjoll. Salah ka shkëlqyer gjatë gjashtë muajve në “Anfield Road”, duke e dyfishuar çmimin e tij, që ishte 50 milionë euro. Me 18 gola dhe 4 asiste në 22 ndeshje zyrtare, egjiptiani ka qenë zbulimi i sezonit në Premier League. 25-vjeçari ka shënuar më shumë se Cristiano Ronaldo dhe Karim Benzema, të dy së bashku.
Sipas gazetës “Don Balon”, Perez dëshiron t’i jap një sulmues tjetër trajnerit Zinedine Zidane dhe në vend të tij do të sakrifikojë Lucas Vazquez. Pikërisht, Vazquez i është ofruar Liverpool për t’u ulur disi çmimin e Salah, që ka shkuar deri në 100 milionë euro. Vazquez, 26 vjeç, ka luajtur 13 ndeshje në La Liga, ku në 8 prej tyre e ka nisur nga stoli. Ai ka një kontratë me Real deri në vitin 2021, por do ta priste me kënaqësi kalimin nën urdhërat e Klopp. Kështu, pas Barcelonës që nuk ka hequr dorë nga Coutinho, Salah është “ylli” i radhës në Liverpool, që mund të transferohet në La Liga.
Të hënën, Salah u shpall futbollisti më i mirë afrikan i sezonit nga “BBC”. Kalimi i tij te Real Madrid është përmendur kohë më parë edhe nga trajneri i kombëtares së Egjiptit, Hector Cuper, i cili në një deklaratë për “ON Sport TV” tha: “Personalisht e di nga burime shumë të sigurta se Real Madrid është i interesuar për Salah, por vetëm kaq mund të them. Ai është një futbollist i shkëlqyer. Nuk dua të nxitohem, por e ardhmja e tij nuk do të jetë te Liverpool. Sipas këndvështrimit tim, Salah do të shkojë te një skuadër më e madhe”.

Lufta midis lojtarëve të Manchester United dhe Manchester City në derbin e fundjavës së kaluar do të ketë shumë njerëz që do të flasin rreth saj. Arsene Wenger nuk është admiruesi më i madh i José Mourinhos, por trajneri i Arsenalit ka ardhur në mbrojtje të portugezit, pasi doli në dritë ajo që ndodhi. “Gjërat mund të dalin jashtë kontrollit, tashmë ka ndodhur. Nuk jam i sigurt se çfarë ka ndodhur, por e di se është e vështirë të pranosh të shikosh festimet nga ana tjetër, është një përvojë fyese, prandaj e admiroj një sport si “sumo” në Japoni, sepse kushdo që fiton nuk tregon gëzimin e tij nga respekti për kundërshtarin. Eshtë diçka që ne mund ta kopjojmë, edhe pse nuk është pjesë e kulturës sonë”, u shpreh Wenger.
Wenger e kupton trajnerin portugez, ndoshta sepse ai tashmë e di se si të ndihet ashtu, siç ndodhi në vitin 2004, kur në një ndeshje mes United dhe Arsenalit, lojtarët e të dyja ekipeve u përleshën dhe Cesc Fàbregas i hodhi një copë “pizza” Sir Alex Fergusonit në të ashtuquajturën “Battlle of the Buffet”.
Derbi i Manchesterit përfundoi si “përleshje” në tunelin dhe dhomat e zhveshjeve të “Old Trafford”. Pjesëtarët e stafit teknik të “qytetarëve”, euforikë pas triumfit, e dërguan këtë mesazh tek Ibrahimoviç: “Ibra, ju flisni shumë, por lëvizni pak”. Këta anëtarë shkuan shpejt në dhomën e zhveshjes së Manchester City, ndërkohë që lojtarët dhe pjesëtarët e tjerë të stafit po vallëzonin dhe këndonin në tunelin e stadiumit. Manchester United e kuptoi se ky ishte një provokim dhe që nga ai moment, një përleshje nisi mes të dyja skuadrave, me goditje mes të dyja palëve, sipas burimeve të klubit të “Djajve të Kuq”. Rreth 20 vetë morën pjesë në përleshje dhe u hodhën në erë shishe plastike të pijeve tipike energjike. Lojtarët e Guardiolës festuan në dhomën e tyre të zhveshjes triumfin, që i vendos ata me një avantazh prej 11 pikësh, goxha larg nga Manchester United.
Në atë moment, Mourinho, duke kaluar i vetëm nëpër tunelin e stadiumit, një domosdoshmëri për të shkuar te të tijtë, iu afrua dhomës së zhveshjes së mysafirëve, duke kërkuar prej tyre më shumë respekt dhe takt në fitore. Megjithatë, fjalët e tij nuk rrinin mirë me Edersonin, portierin brazilian të Manchester City, i cili e kuptoi portugezin në gjuhën e tij reagoi. Filluan fyerjet e ndërsjella, zhurma dhe trazirat, një rrëmujë e madhe, disa minuta pas përfundimit të ndeshjes dhe humbjes lokale të “Djajve të Kuq”. Momenti më konfliktual ndodhi kur Lukaku, ndër të tjera, hodhi një shishe që, në veçanti, goditi një mjek të Manchester City, duke rezultuar në plagë.
Përveç kësaj, Mikel Arteta, ish-lojtar dhe një nga ndihmësit e Pep, gjithashtu, përfundoi disa lëndime në ballë nga goditje me një shishe plastikoje. Arteta ishte në dhomën e zhveshjes, por, i alarmuar nga zërat për rrahje, u sulmua kur doli të kuptonte se çfarë po ndodhte. Këtë të hënë, “Mirror” publikoi disa fotografi të spanjollit, që dilte nga dhomat e zhveshjes me dorën në ballin e tij. Së fundi, policia duhej të shkonte në afërsi të dhomave të zhveshjes, derisa të dyja skuadrat u larguan nga “Old Trafford”. Federata angleze është duke hetuar përleshjen dhe, pas asaj që ka ndodhur, ka kërkuar një shpjegim nga të dyja klubet. Manchester United dhe Manchester City kanë kohë deri të mërkurën që t’i përgjigjen federatës.