Ylli i Barcelonës, Lionel Messi, raportohet se i ka thënë shokut dhe bashkëkombasit të tij, Javier Mascherano që të largohet nga “Nou Camp”, për të rritur shanset e tij që të jetë pjesë e skuadrës së Argjentinës në Kupën e Botës Rusi 2018. Deri më tani, Barcelona ka shijuar një fillim fantastik të sezonit, me skuadrën e drejtuar nga Ernesto Valverde që deri tani kryeson klasifikimin në La Liga. Gjithsesi, një furtunë duket në horizont për skuadrën blaugrana, që do të duhet të bëjnë pa mbrojtësin e tyre, Samuel Umtiti për disa muaj, pasi futbollisti i përfaqësueses franceze u dëmtua gjatë barazimit 2-2 të Barcelonës në ndeshjen ndaj Celta Vigo fundjavën e kaluar. Ndërkohë, klubi katalanas po lufton për të mbajtur veteranin Mascherano, i cili është dëshpërimisht i kërkuar nga klube në MLS dhe në Kinë.
Raportohet se më parë, Messi ka bërë çmos që Mascherano të refuzonte çdo ofertë nga jashtë, të paktën deri në përfundim të sezonit. Por, sipas referimeve të medias spanjolle “Diario Gol”, tashmë argjentinasi po shtyn bashkëkombasin e tij drejt largimit. Sipas të gjitha gjasave Barcelona në këto momente do të mbështetej mbi 33-vjeçarin, në mungesë të Umtiti, me Vermaelen të paqëndrueshëm dhe Pique si mbrojtësin e vetëm titullar të garantuar. Por, gjithashtu Mascherano është i vetëdijshëm se me rikthimin e Umtiti nga dëmtimi, ai do të rikthehej në stolin e rezervave të Valverdes. Veteranit argjentinas i nevojiten minutat me qëllim që të sigurojë një vend në përfaqësuesen bardhekaltër për në Kupën e Botës, që luhet vitin tjetër, ndaj dhe Messi i ka sugjeruar shokut të tij të ngushtë të rrisë shanset e pjesëmarrjes në Rusi.

“Gonzalo është një nga sulmuesit më të mëdhenj të brezit të tij”. Portali francez “So Foot” i kushton hapësirë të mjaftueshme Higuain-it, i cili tregon me zemër të hapur adresimin e të gjitha çështjeve më të rëndësishme të karrierës së tij. Idetë, marrëdhëniet me lojtarët e Juventusit, fëmijërinë e tij në Francë dhe, natyrisht lamtumirën e lamtumirës ndaj Napolit. Një pikë kthese në karrierën e tij, që sigurisht nuk ishte padyshim:
“Nuk ishte një vendim i lehtë, por jam krenar dhe i lumtur, sepse që atëherë kam luajtur një finale të Ligës së Kampionëve. Kundërshtimet? Ju mund të dëgjoni një bilbil në dhjetë tifozë që duartrokasin. Eshtë më mirë që të përgatiteni mendërisht për kësi gjërash, përndryshe ju mund të bieni nga shumë lart. Bilbilat, megjithatë, janë një lloj lavdie e tifozit, që në thelb nuk kërkon t’ju duartrokasë për një qëllim. Sarri? Ai tha se isha dembel, sepse donte të shënoja si Messi dhe Ronaldo. Ai ishte pak i drejtë, sepse nuk mori parasysh faktin se unë shënoj mesatarisht 36 gola në sezon”, u shpreh Higuain.

Një qytet i tërë po pret një datë, 12 dhjetorin. Pordenone po pret me padurim sfidën e 1/8-ve të Kupës së Italisë kundër Inter-it, që do të zhvillohet të martën e ardhshme në “San Siro”. Është e lehtë të imagjinohet se shumë tifozë të Pordenone-s, skuadër që luan në Serinë C, nuk do ta humbasin rastin për ta ndjekur ekipin e tyre në “La Scala”-n e futbollit. Klubi friulan ka ftuar të gjithë tifozët, nëpërmjet profilit zyrtar në Twitter, që të jenë në “San Siro”. Këto dy skuadra nuk janë ndeshur kurrë më parë, por kanë një gjë të përbashkët: asnjë nga këto dy formacione nuk ka qenë kurrë në Serinë B. Arsye krenari për zikaltrit, jo aq për Pordenone-n. Ndërkohë në rrjetet sociale ka filluar numërimi mbrapsht dhe Pordenone ëndërron arritjen e madhe.

Raportimet pretendojnë se Chelesea do të lejojë David Luiz që të largohet në janar, më pëlqyeshëm në huazim. Braziliani nuk është aktivizuar në Premier League me “Blutë e Londrës” që nga fundi i muajit tetor. Marrëdhënia e tij me trajnerin Antonio Conte është futur gjithashtu në krizë, pasi italiani e la jashtë fitores 1-0 ndaj Manchester United, muajin e kaluar. Luiz është aktualisht i padisponueshëm për shkak të një dëmtimi në gju, por gjithashtu do të vuajë të rigjejë vendin në formacionin e Contes, edhe pasi të jetë rekuperuar plotësisht. Referuar “Gambling Times”, Chelsea është gati ta huazojë brazilianin në janar. Nga klubi i bluve preferohet që 30-vjeçari të largohet në formë huazimi deri në fund të sezonit, pasi drejtuesit shohin ende një të ardhme të mbrojtësit në “Stamford Bridge”.
Luiz gjithashtu dëshiron të përfundojë kontratën e tij që skadon në vitin 2019, por është i vetëdijshëm se i nevojitet të luajë me minutazh të rregullt, nëse synon që të jetë pjesë e kombëtares së Brazilit në Botërorin Rusi 2018. Real Madrid është përfolur për një tentativë të mundshme në fillim të vitit për ish-yllin e PSG, por do të duhet të përballet edhe me konkurencën e Barcelonës. Nga Spanja raportohet se të dy klubet synojnë përforcimin e reparteve mbrojtëse me eksperiencën e brazilianit, ndërkohë që garojnë në La Liga dhe Champions League. Luiz ka admirues në “Nou Camp” dhe shihet si një zgjidhje emergjente për merkaton e janarit, pas dëmtimit të Samuel Umtiti, që do të qëndrojë jashtë për të paktën dy muaj.

Real Madrid e ka mbyllur fushatën e grupeve të Champions League me fitoren 3-2 kundër Borussia Dortmund në “Santiago Bernabeu”. Kampionët e Europës në fuqi e kishin siguruar më parë kalimin në 1/8 e finaleve të kësaj veprimtarie, ndërsa Dortmund do të vazhdojë më tej në Europa League. Real pati fillimin e ëndërruar pasi me golat e Mayoral dhe Cristiano Ronaldo udhëhiqte 2-0 që në minutën e 12-të.
Dortmund nuk u dorëzua dhe dy minuta para fundit të pjesës së parë Pierre-Emerick Aubameyang shënoi për skuadrën gjermane. I njëjtë autor sigloi barazimin, në minutën e katërt të pjesës së dytë. Fitorja e Real erdhi 10 minuta para fundit me golin e Lucas Vasquez. Ndërkohë, Tottenham, që e kishte siguruar më parë kreun e grupit, e mbylli këtë fazë grupesh me fitoren 3-0 ndaj APEOL Nicosia, me të shënuar në pjesën e parë nga Fernando Llorente dhe Heung-Min Son dhe në pjesën e dytë nga Georges-Kevin N’Koudou.
Në Grupin G, Porto ka fituar 5-2 ndaj Monaco duke siguruar të drejtën për të luajtur në 1/8 e finaleve. Në një ndeshje ku të dyja skuadrat luajtën gjatë gjithë pjesës së dytë me dhjetë futbollistë, si pasojë e kartonëve të kuq të marrë nga Felipe dhe Ghezzal. Në ndeshjen tjetër të grupit, Besiktas u konfirmua si skuadra fituese duke triumfuar 2-1 në fushën e RB Leipzig, që gjithashtu e mbylli ndeshjen me dhjetë futbollistë.

Liverpool-it i duhej fitorja për të siguruar vendin e parë të renditjes së Grupit E ndaj Spartakut të Moskës dhe skuadra e Jurgen Klopp ka keqtrajtuar rusët në Anflied me rezultatin 7-0. Ishte një mbrëmje festive në qytetin e Liverpulit teksa katërshja e sulmit të Kuq Salah, Mane, Coutinho dhe Firmino kanë dhuruar edhe një herë tjetër spektaklin e zakonshëm.
Ndeshja mund të quhej e mbyllur që në minutën e 20’ pas tre golave të Coutinho (2 herë) dhe Firmino, por Liverpool kishte të njëjtin avantazh edhe ndaj Sevilla-s herën e fundit dhe ndeshja përfundoi barazim. Pra, tifozët ishin të shqetësuar mbase edhe pas avantazhit të trefishtë, por këtë herë të besuarit e Klopp nuk e ulën ritmin, duke shënuar edhe tre gola të tjerë pas pushimit. Ndërkohë Sevilla-s i mjaftoi një pikë me Maribor për të kapur vendin e dytë në renditje.

“Jemi të gjithë shumë të lumtur, sepse po punojmë fuqishëm në fazën mbrojtëse dhe rezultatet janë të dukshme. Edhe dje ishte e rëndësishme të mos pësonim gol dhe të arrinim objektivin e parë të sezonit, kalimin e grupit”. Është Juan Guadrado që rikthehet të flasë për ndeshjen e Champions League kundër Olympiacos. “Trajneri insiston shumë që unë të futem drejt portës, duke krijuar superioritet numerik kur topi ndodhet në zonën kundërshtare. Dua të falënderoj Alex Sandro që shpeshherë ma shërben topin pikërisht aty. Shpresoj që një ditë të mund t’i kthej favorin, ndonëse asistet e mi janë gjithmonë për Mandzukic dhe Higuain. Të luash këto ndeshje të karrikon maksimalisht, të vjen spontane që të japësh 100% dhe të shënosh. Gjëja më e rëndësishme është të zbresësh në fushë me dëshirën për të bërë maksimumin”, deklaroi kolumbiani i Juves.
Më pas nuk mund të mos fliste edhe për supersfidën e ardhshme të Seria A, atë kundër Inter, që po kryeson klasifikimin. “Që kur shkoi Spalletti po ecin shumë mirë. Duket që u ka dhënë diçka më shumë në raport me kampionatin e kaluar. Janë të fortë dhe duhet të jemi të gjithë shumë të kujdesshëm, por ne jemi një skuadër e madhe dhe duhet të qëndrojmë të qetë e të tentojmë të arrijmë rezultat pozitiv përpara tifozëve tanë, që është gjëja më e rëndësishme. Jam i bindur se do të bëjmë një ndeshje të madhe. Jam besimtar dhe mbështetem shumë në Zot. Falënderoj gjithmonë Zotin që më dha këtë talent dhe në çdo ndeshje tentoj të jap më të mirën. Është falë Zotit që jam ky që jam”, rrëfeu Guadrado.
Një sfidë totale, edhe për Kupën e Botës! Nga njëra anë Mauro Icardi dhe nga ana tjetër Gonzalo Higuain. Do të jenë që të dy përballë, të shtunën e ardhshme në “Allianz Stadium”, për të garuar për vendin e parë në kampionat, në një sfidë të gjithën argjentinase. Kapiteni i Inter krenohet me një mesatare të frikshme: 16 gola në 15 javët e para do të thotë se ka shënuar dy gola më shumë sesa ecuria që ka pasur “El Pipita” në vitin e fundit me Napolin, ku arriti shifrën e 36 golave në fund të Serie A. Kësisoj është e logjikshme të mendojmë se në shënjestrën afatgjatë të Maurito është edhe rekordi i Higuain, që gjatë këtij sezoni me Juventus, po udhëton më ngadalë, me shtatë gola më pak të shënuar se bashkatdhetari.
Një sfidë në “Allianz Stadium” të Torinos, që për Icardi (që ka shënuar 7 gola në 9 ndeshje kundër bardhezinjve) dhe për Higuain ka edhe një nënkuptim për Botërorin 2018. Këta dy qendërsulmues janë në garë të drejtpërdrejtë për një vend në kombëtaren çeleste, që do të luajë në Rusi, verën e ardhshme. Më saktësisht, në këtë moment Icardi është në avantazh ndaj Higuain, duke fituar besimin e Sampaolit, por lojërat janë ende të hapura deri në fund, ashtu si gara mes Inter dhe Juventus në historinë e Serie A.

Real Madridi përballet me shortin e 1/8 finale të Champions-it si skuadër e renditur e dyta në grup. Kjo situatë e komplikon shumë vazhdimësinë e tij në Europë. Kjo do të thotë se ekipi i Zinedine Zidane mund të përplaset me Manchester City i Guardiolës, PSG e Neymar, Manchester United e Mourinhos dhe Liverpool e Coutinhos. Secila nga këto katër skuadra paraqitet si rivale me vështirësi maksimale, sidomos duke pasur parasysh se Real Madridi do të duhet ta luajë ndeshjen e dytë (të kthimit) larg “Bernabeut”. Megjithatë, ka edhe dy rivalë në “pjatë” apriori, që nuk do të kishin vështirësinë e katër të përmendurve më lart. Njëra do të ishte Roma e De Rossit, një ekip i kualifikuar në një nga grupet teorikisht “të vdekjes”, pasi iu imponua Chelsea dhe Atlético Madrid, ndërsa “eksperti i ëmbël” është kampioni turk, Besiktas, i cili u kualifikua për herë të parë në grupin e vet, duke mundur Porto, Leipzig dhe Monako. Është e qartë se tifozët e Real Madridit do të kryqëzojnë gishtat e tyre për fat, që t’i shoqërojë ata në shortin e së hënës, duke ëndërruar, pse jo, Besiktas e Pepe, që do të thotë kthim i portugezit në klubin e bardhë.