Shtetet e Bashkuara po lëshojnë mesazhe të qarta të braktisjes së qeverisë Rama e lidhur me krimin e organizuar, veçanërisht pas votimit të së mërkurës, kur PS refuzoi kërkesën e Prokurorisë së Krimeve të Rënda për arrestimin e Saimir Tahirit.
“Nuk do të ishte e përshtatshme për mua të them, nëse Saimir Tahiri është fajtor apo i pafajshëm. Por, është jashtëzakonisht e rëndësishme që ju si drejtues të Shoqërisë Civile, ju si të rinj, ju si qytetarë të Shqipërisë të zbuloni të vërtetën. E drejta për të ditur të vërtetën nuk i përket asnjë partie politike. I përket qytetarëve të Shqipërisë. Askush nuk duhet të jetë mbi ligjin”, tha Ambasadori Lu.

Ambasadorja e Holandës në Tiranë, Dewi van de Weerd, deklaroi mungesën e vullnetit për Reformën në Drejtësi.
“Ne kemi arritur shumë sa i përket legjislacionit, por jemi në fazën kur zbatimi i reformës ka nisur. Shoqëria Civile ka një rol të rëndësishëm në ngritjen e institucioneve të drejtësisë dhe një nga proçeset e vonuara është moszgjedhja e kandidatëve që vijnë nga Shoqëria Civile, arsyet mund të jenë të ndryshme, por për popullin shqiptar që beson në reformë duket si një mungesë vullneti për ta çuar procesin përpara.
Ku ka vullnet ka gjithmonë një zgjidhje dhe ne po flasim për një proces që po rihapet për herë të katërt sa i përket kandidatëve për KLP. Ne i duam këto organe për të shkuar më tej dhe për të thyer ngërçin aktual”, tha ambasadorja.

Partia Demokratike ka reaguar nëpërmjet kreut të këshilltarëve të PD në Këshillin Bashkiak të Tiranës, Kreshnik Çollaku, i cili theksoi se 2.5 milionë euro nga taksat e qytetarëve të Tiranës për të shkulur palma e për të ngulur pisha është abuzim që ndodh me paratë e taksapaguesve shqiptarë dhe të Tiranës, që vetëm para disa javësh u ngarkuan me një taksë të re për ujin, që do e paguajë çdo qytetar i Tiranës. “Siç e keni ndjekur sot gjatë ditës, në mbledhjen e Këshillit Bashkiak, këshilltarët e Partisë Demokratike kanë qenë pjesë e debateve konstruktive për çështjet e parashikuara në rendin e ditës. Kemi dhënë argumenta, kritikat dhe oponencën, por edhe mbështetjen në ato që na janë dukur racionale dhe në shërbim të qytetarëve të Tiranës. Në mënyrë të papritur, jashtë çdo lloj procedure të mbledhjes, jashtë çdo lloj detyrimi të rregullores, nga grupi i mazhorancës është tentuar të imponohej dy vendime për t’u diskutuar në mbledhjen e Këshillit, për të cilat në dijeni janë vetëm krerët e grupit të mazhorancës. Asnjë komisioni nuk i ka trajtuar projektvendimet dhe nuk janë mbledhur. Asnjë këshilltar, jo vetëm të opozitës, por edhe një pjesë e mirë e mazhorancës nuk ishin në dijeni të këtyre projektvendimeve dhe për këtë shkak po tentohet me forcën e kartonave në mënyrë abuzive që ato të kalojnë në mënyrë të dhunshme, duke thyer çdo etikë, çdo kod, çdo respekt të mandatit të këshilltarëve, çdo procedurë të ndjekur deri më sot. Një nga këto projektvendime është aferë e pastër, një shërbim dhe favorizim që i bëhet një biznesi taksish në kryeqytet në kundërshtim dhe në dhunim me normat normale të konkurencës dhe respektit të bizneseve të tjera. Për më tepër në dhunim flagrant të institucionit të Këshillit Bashkiak, pa dijeninë e këshilltarëve, në mënyrë klandestine dhe ky proces po ndodh në mënyrë falso dhe fasadë në këto momente në Këshill. Në këtë situatë, ne kemi vendosur të mos jemi fasadë e kësaj historie të shëmtuar, abuzive dhe të këtij monopoli që duan të krijojnë për interesa oligarkësh të caktuar e interesash private që do t’i zbardhim në ditët në vijim. Gjithashtu pjesë e vendimeve të shëmtuara e të turpshme që ky Këshill Bashkiak i dominuar dhe në dhunën e kartonave socialistë, është edhe një aferë e pastër korrupsioni, një aferë e rëndë për xhepat e qytetarëve, është historia e palmave. Palmat e nglura në mënyrë të marrë nga kjo mazhorancë përgjatë autostradës me një kosto të jashtëzakonshme për xhepat e qytetarëve, sepse qytetarët e Tiranës duhet të dinë se kosto e një palme ka qenë mbi 5 mijë euro, dhe duke qenë se palmat u thanë dhe kjo marrëzi u diskretitua në mënyrë publike, duket se mekanizmi i korrupsionit dhe aferave kërkon një karburant tjetër. Dhe karburanti tjetër e kanë gjetur. Kanë vendosur të shkulin palmat e të ngulin pishat. Qytetarët e Tiranës duhet ta dinë se kostoja e një pishe që duan të mbjellin me këto vendime të turpshme që po marrin në atë sallë, është 5 milionë lekë të vjetra. Vetëm një pishë kushton 5 milionë lekë. Imagjinoni se sa vakte ushqimore për fëmijët, sa shkolla do të ishin ndërtuar apo rehabilituar në rast se këtyre oligarkëve dhe këtyre njerëzve totalisht pa asnjë lloj shenje përgjegjesie në interes të qytetarëve, nuk do t’i kishin rezistuar tundimit për të vjedhur e grabitur. Vendimi që po marrin është një absurditet i radhës. Harxhohen 2.5 milionë euro nga taksat e qytetarëve të Tiranës për të shkulur palma e për të ngulur pisha. Është e turpshme, komike dhe tragjike, duke menduar që ky abuzim ndodh me paratë e taksapaguesve shqiptarë dhe të Tiranës që vetëm para disa javësh u ngarkuan me një taksë të re për ujin, që do e paguajë çdo qytetar i Tiranës. Justifikimi për taksën e ujit ishte se nuk na dalin fondet që të bëjmë rehabilitim në rrjet, ndërkohë që harxhohen 2.5 milionë euro për të ngulur pisha të cilat me projektin e zgjerimit të autostradës, për një vit apo dy do të hiqen prap. Pra është një abuzim i turpshëm dhe i pamerituar për logjikën e qytetarisë në këtë kryeqytet, pavarësisht bindjeve politike. Këshilltarët e PD nuk mund të bëhen pjesë e kësaj fasade, nuk mund të bëhen pjesë e këtij krimi që po u bëhet qytetarëve të Tiranës, ndaj ne sot kemi refuzuar këtë teatër të shëmtuar, sepse në fund të fundit siç thuhet në fjalët e urta; turpin çdo njeri e ka për vete. Këta njerëz që abuzojnë me mandatin dhe besimin e qytetarëve të Tiranës dhe votuesit e tyre në mos paçin turp nga qytetarët e Shqipërisë, të kenë turp para atyre njerëzve që i kanë votuar dhe besuar dhe sot detyrohen të paguajnë tekat e tyre, korrupsionin e tyre me taksa të shtrenja, të cilat çdo familje e Tiranës do të fillojë t’i provojë në kurriz. Beteja jonë do të vazhdojë, do të denoncojmë, do të monitorojmë, por ne nuk mund të bëhemi as fasadë dhe as makiazh i kësaj historie të turpshme e mafioze, ku vetëm mëndje të mbrapshta mund të provojnë historira të tilla të abuzimit flagrant me fondet dhe me mundimin e qytetarëve”, tha Çollaku.

Ish-deputeti demokrat, Katriot Islami ka thënë se qëndrimi i mbajtur nga diplomati amerikan në OSBE është një qëndrim i Uashingtonit dhe jo një qëndrim personal.
“Ai ka lexuar një qëndrim të SHBA, i cili është përpunuar. Në rastin konkret mesazhi i tij ka disa piketa shumë të forta, së pari, në lidhje me manipulimin e zgjedhjeve ku janë evidentuar blerja e votës dhe kërcënimi i votuesve. Momenti i dytë është lidhja e kësaj qeverie me korrupsionin dhe krimin. Sfidat kryesore kanë të bëjnë me çështje që peshojnë rëndë me situatën në Shqipëri, krimin dhe korrupsionin. Mesa duket SHBA e ndjekin çështjen Tahiri nga shumë afër dhe mesa duket kanë bindjen se Tahiri është i implikuar”, ka thënë Islami për Syri.net.

Kryetarja e Lëvizjes Socialiste për Integrim, Monika Kryemadhi bën përgjegjës kryeministrin Edi Rama se po fsheh të kërkuarit nga drejtësia. Gjatë një konference, kryetarja e LSI-së tha se, Rama dhe bashkëpunëtori i tij siç e quan ajo, Saimir Tahirin, pengojnë arrestimin e vëllezërve Habilaj. Kjo bëhet sipas saj, për shkak se ata mund të flasin. “Urdhërarrestet për 3 ish-drejtuesit e lartë të Policisë së Shtetit janë faktet më të fundit alarmante për të treguar që rendi nuk ekziston më në Shqipëri. Përfshirja në trafikun ndërkombëtar të lëndëve narkotike të kupolës së Policisë së Shtetit vërteton edhe njëherë akuzat tona dhe të një pjese të medias, se Narkoshteti nuk ka ndaluar aktivitetin e tij. Përkundrazi me fshehjen që po u bën 3 të akuzuarve të drejtësisë po vërteton përpara shqiptarëve se vijon të jetë pjesë e banditizmit të Habiljave apo të bandave të tjera që kanë në pronësi drogën në Shqipëri. Ky veprim i sotëm është në vazhdim të mbrojtjes së bandave të drogës dhe tregon edhe njëherë, se sot e kësaj dite nuk janë ndaluar nga policia 2 vëllezërit Habilaj, të cilët janë në kërkim. Askush më mirë se sa Edi Rama nuk e di se ku fshihen të kërkuarit e Drejtësisë. Ai së bashku me mikun e tij dhe bashkëpunëtorin e tij Saimir Tahiri, janë në dijeni të çdo lëvizje të tyre dhe janë në dispozicion të fshehjes së tyre. Kjo për faktin e thjesht se kanë frikë, se nëse dikush nga ata flet, flet për çorbën që zien në kazanin e krimit, e cila do të nxjerrë në krye të saj emrin e Edi Ramës, njeriu që mban përgjegjësinë kryesore për kanabizimin dhe banditizmin e qeverisjes në Shqipëri. Njeriu që sot ka frikë më shumë se 3 policët e akuzuar për trafik, por edhe më shumë se sa vetë Haki Çako apo drejtues të tjerë të policisë që janë njësoj të implikuar në trafikimin dhe bashkëpunimin me bandat kriminale, me të njëjtat banda që garantuan fitoren me votat e blera, me paratë e krimit, të njëjtat banda që i japin sot garancinë Edi Ramës se do të vijojë të drejtojë Shqipërinë”, tha ajo. Në fund të fjalës së saj Kryemadhi tha se, fronti opozitar është i vendosur për ta larguar nga pushteti Edi Ramën, ndërsa përshëndeti deklaratën e ambasadorit të SHBA-së në OSBE, i cili foli në mënyrë të drejtpërdrejtë për kriminalizimin e vendit. “Ndaj sot më shumë se kurrë, fronti ynë opozitar kundër krimit të organizuar dhe mafies që mban peng pushtetin e blerë me votat e drogës duhet të bashkojmë forcat dhe të shporrim njëherë e mirë nga pushteti këtë lloj politikani që është përlyer në pazare dhe trafiqe me banditë. Sot, Edi Rama dhe oborri i tij heshtin për skandalin e radhës, hesht ish-ministri dhe drejtori i Përgjithshëm i Policisë, por ta kenë të qartë se heshtja e tyre nuk do t’i shpëtojë dot as nga fajësia dhe përgjegjësia që kanë për katastrofën ku po çojnë Shqipërinë. Sot dua të përshëndes deklaratën e Ambasadorit të Shteteve të Bashkuara të Amerikës në OSBE për gjuhën e tij të drejtpërdrejtë në këtë situatë, për të cilën ndodhet Shqipëria. LSI ka të njëjtin qëndrim të palëkundur se, korrupsioni dhe kriminaliteti ngelen pengesat më të mëdha për zhvillimin e Shqipërisë. Kjo deklaratë, e cila flet me emra të përveçëm dhe vendos gishtin mbi plagë është e kundërta e gjuhës së rrumbullakosur që kemi dëgjuar rëndom për këtë situatë kritike, ku krimi dhe droga janë ulur këmbëkryq në qeverisjen e Rilindjes”.

Deputeti i Lëvizjes Socialiste për Integrim, Petrit Vasili, me anë të një statusi në “Facebook” i bën thirrje kryeministrit Rama të flasë për skandalin e 2 miliardë eurove të zhdukura. Sipas Vasilit, frika e Ramës qendron në faktin se ky skandal mund ta rrëzojë nga pushteti për 24 orë, dhe kjo e bën të heshtë për atë që Avokatura e Shtetit ia ka vënë në tavolinë. “Kryeministër boll u trembe, fol për 2 miliardë eurot, kursejua shqiptarëve një ’97 të dytë! – shkruan Vasili në Fb. – Skandali i 2 miliardë eurove është më i rëndi, që mund të imagjinohet. Kryeministri e ka prej kohësh në tavolinë. Kryeministri nuk flet nga frika e madhe për pushtetin e tij, sepse e di mirë që ky skandal i 2 miliardë eurove e rrëzon për 24 orë. Ai është përgjegjës direkt për disa nga këto gjyqe, pasi i ka frymëzuar e mbështetur personalisht veprimet antiligjore dhe për dëmin kolosal financiar që ka ardhur prej këtyre veprimeve. Skandalin nuk e ka zbuluar opozita, por Avokatura e Shtetit, e cila e ngriti me shumë të drejtë dhe përgjegjshmëri këtë aferë gjigante.
Humbja e 2 miliardë eurove është një tragjedi me dimensione politiko-shoqërore të ngjashme me tragjedinë e vitit ‘97. Kryeministri lodhet kot duke u fshehur. Të gjithë e dinë që kur të ndodhë kjo tragjedi, kryeministri do të ikë duke i lënë pas zjarrin Shqipërisë, njëlloj si ata që në ’97, pasi i vunë zjarrin ikën nga vendi.
Shqipëria dhe shqiptarët lënguan për vite të tëra pasojat e ‘97. Ndaj kryeministri nuk ka asnjë të drejtë që të heshtë më, sepse Shqipëria nuk është pronë e tij. Kryeministër kurseja Shqipërisë një ‘97 të dytë”.

Presidenti i Republikës Ilir Meta ka kthyer në Kuvend për rishqyrtim ligjin e tarifave gjyqësore. Ligji i ri për tarifat gjyqësore parashikon një reformim të skemës së tarifave të shërbimit gjyqësor. Ndër të tjera, ligji parashikon që për gjykimin e kërkesave civile, administrative dhe penale të vendosen dy tarifa fikse prej 2.500 (dymijë e pesëqind) lekësh dhe prej 5.000 (pesëmijë) lekësh për çështje të caktuara, raporton portali SCAN. Por edhe pse vendosen tarifa fikse, ligji parashikon që duke nisur nga 1 janari i vitit të ardhshëm, ato do të pësojnë rritje progresive me 500 lekë çdo vit.
Nga shuma e përgjithshme e arkëtuar për tarifat gjyqësore, 10% do t’i kalojnë buxhetit gjyqësor, ndërsa pjesa tjetër shkon në arkën e shtetit.