Prokurori i Përgjithshëm, Adriatik Llalla është njohur nga afër me aktet e hetimit të Prokurorisë së Katanias për çështjen “Habilaj”. Në një dokument të Prokurorisë së Katanias të publikuar nga mediat italiane shkruhet se, “hetuesit e Katanias kanë qenë pak ditë më parë me një mision në Tiranë. “Oficerët e Policisë Gjyqësore të ndihmuar nga Interpol dhe Guardia Finanza i dërguan Prokurorit të Përgjithshëm të Shqipërisë aktet që lidhen me hetimin e grupit “Habilaj”. Ata kanë kërkuar ndihmë për arrestimin e një prej katër të akuzuarve me kombësi shqiptare që nuk ndodhej në shtetin italian dhe kanë dorëzuar urdhër-arrestet ndërkombëtare të lëshuara me kërkesë të Prokurorit të Katanias”, thuhet në dokumentin në fjalë.
Referuar këtij dokumenti mësohet se, pas kërkesës së Prokurorisë së Katanias është arrestuar në Shqipëri Nezar Seiti (datlindja 03.03.1977). “Ai kishte detyrën për sigurimit e logjistikës në trafikun e drogës që kryesohej nga Moisi Habilaj (1978). Pjesë e këtij trafiku janë edhe anëtarët Meridian Sulaj (1988) dhe Fatmir Minaj (1962) tashmë nën arrest që nga 14 tetori”, thuhet në dokument.
Ndaj 40-vjeçarit ishte firmosur një urdhër arresti ndërkombëtar. “Nezar Seiti konsiderohet se kishte një rol mjaft të rëndësishëm në grupin e Habilajve për rolin e tij si pikë referuese për logjistikën dhe përgjegjës i zbarkimeve në Itali të lëndës narkotike nga Shqipëria”, shkruhet në dokument.
Organizuesi kryesor i trafikut fitimprurës konsiderohet Moisi Habilaj (datëlindja 1978), bashkëpunëtorët e tij Meridian Sulaj (Datëlindja 1988) e Fatmir Minaj (1962) të arrestuar në Raguzë më 14 tetor 2017.
Me anë të kësaj komunikate, Financa e Katanias informon se ndaj anëtarëve të grupit italo-shqiptar të arrestuar më datë 14 tetor 2017 në kuadër të operacionit “Rosa dei venti” rëndon dhe ngarkesa e 4000 kg të tjera marijuanë e sekuestruar gjatë operacionit të arrestimit në Shqipëri të Nezar Seitit.
“Materialet hetimore të bazuar në përgjimet telefonike, ambientale e në video të kryera përgjatë fazës së parë të këtij operacioni kanë vërtetuar trafikimin e rreth 3500 kg marijuanë nga Shqipëria drejt Italisë, me një vlerë përfitimi prej 20 milionë euro. Droga trafikohej kryesisht në rajonin e Siçilisë në komunat Raguza, Sirakuza e Palermo”. Gjithashtu, kjo bandë e strukturuar kriminale ku çdo anëtar kishte një rol të përcaktuar mirë, akuzohet dhe për trafikim armësh nga Shqipëria drejt Italisë.
Organizata kriminale në fjalë dyshohet se ka dërguar nga Shqipëria në Itali, një sasi prej rreth 4 000 kg marijuanë (e sekuestruar). Janë sekuestruar gjithashtu kallashnikovë dhe qindra municione. Sasia e madhe e drogës që trafikonin Habilajt kap në treg vlerën e 20 milionë eurove.
Policia italiane ka shpallur në kërkim ndërkombëtar 3 anëtarë e tjerë të bandës. Ata janë shtetasit
Florjan Habilaj, vëllai i Moisi Habilaj, lindur në Vlorë më 11.10.1980. Armando Sulaj, vëllai i Meridian Sulaj, lindur në Shqipëri më 12.05.1984 dhe Tigrens Mezuraj lindur në Shqipëri më 29.07.1994. Kreu i bandës, Moisi Habilaj si dhe dy bashkëpunëtorët e tij shqiptarë Meridian Sulaj dhe Fatmir Minaj u arrestuan më 14 tetor. Bashkë me ta u ndaluan edhe 4 italianë.
Prokurorët e Katanias takuan Llallën në Tiranë
Zagani: Tahiri, luani i djeshëm që në një natë u kthye në lepur
Dritan Zagani, ish-shefi i Antidrogës në Policinë e Fierit dhe të Vlorës, ka reaguar pas deklaratave të ish-ministrit Saimir Tahiri për stresin që po kalon familja e tij. Në një postim në Facebook, Zagani shkruan se, mbrëmë me një paraqitje “viktime” ish-ministri i Brendshëm rrëfeu, se familja e tij ishte shumë e stresuar gjatë kontrollit që kreu Policia dhe Prokuroria në banesën e tij dhe se ai ishte deputeti i parë që nga viti 1990 që i ndodh kjo gjë.
“Tahirua na qenka ndjerë keq kur i bëri kontroll policia… edhe pse e njoftuan një javë para…edhe pse e morën në celular që prit se erdhëm…edhe pse në fund fare i shkuan për kontroll ditën për diell dhe me praninë e gjithë shtypit…prap ky zotëria e tij na qenka ndjerë keq dhe se familja e tij e paska përjetuar shumë rëndë….!
Mahhh…ore njeri me shumë maska që njëherë je luan e njëherë lepur…po ti pyete njëherë veten tënde, ose sejmenët e tu që mua m’i dërgove në ora 01:00 pas mes nate si lukuni hienash 20 veta për kontroll banese….. A mendon ndopak si u ndjenë fëmijët e mi në atë orë të natës me atë që ti gatove për ta…dhe që ishte komplet e jashtëligjshme vetëm e vetëm që ti dhe Habilët e t’u trafikantë të ndjehen fitimtarë ndaj ligjeve të shtetit….!
Ti luani i djeshëm që në një natë të bukur u ktheve në lepur… sot me djallëzinë tënde të ligë del as më pak e as më shumë se një hienë e zezë në gjithë sa thua e shpif ndaj meje…ti që të duket vetja kaq i zoti sa dhe një nga vendet më humane dhe të drejtë në botë, jepka azil në kurrizin tënd…je qesharak deri në dhembje…!”, shkruan Zagani.
Guardia di Finanza e konfirmon:‘Ky Saimiri është ish-ministri’
“Po. Saimiri citohet në letrat e hetimit në disa pasazhe. Po,bëhet fjalë për ish-ministrin. Ai citohet në disa pasazhe. Në njërin pasazh, u referohen parave dhe ata thonë Saimir, flasin për Saimirin dhe sipas Guardia Di Finanzia, ky Saimiri është ish-ministri”
“Guardia Di Finanza” konfirmon se njeriu që qëndron pas përgjimeve të përfitimit të milionave nga trafiku i drogës të Habilajve është ish-ministri i Brendshëm, Saimir Tahiri. Gazetari italian Dario De Luca i intervistuar nga Top Channel ka konfirmuar deklaratën e bërë nga Guardia Di Financa. “Po. Saimiri citohet në letrat e hetimit në disa pasazhe. Po,bëhet fjalë për ish-ministrin. Ai citohet në disa pasazhe. Në njërin pasazh, u referohen parave dhe ata thonë Saimir, flasin për Saimirin dhe sipas Guardia Di Finanzia, ky Saimiri është ish-ministri.”
Në lidhje me përmendjen e emrit Saimir në rolin e një kamionisti sipas me të cilën u mundua të manipulojë ish-ministri, gazetari Italian thotë se kemi të bëjmë me një personazh tjetër. Gazetari Italian thotë se kemi të bëjmë me një grup të madh kriminal ku janë të përfshirë shumë më tepër persona nga sa janë arestuar deri tani.
“Hetimi me siguri do të vazhdojë. Do të vazhdojë, pastaj ka një periudhë kohe teknike, brenda së cilës do të mbyllet dhe nga aty do të nisë rrugëtimi gjyqësor, pra procesi. Sigurisht që është një hetim vërtet i madh sepse në mes ka patur 21 sekuestrime për drogë ndaj ky rrjet narko-trafikantësh, nuk është i limituar në 12 persona por shumë më tepër, ndaj dhjetëra dhjetëra persona”, thotë gazetari italian duke ju referuar burimeve nga Guardia di Finanza.
Verifikohen tabulatet
Prokurorët e Krimeve të Rënda po verifikojnë të gjitha tabulatet telefonike mes ish-ministrit të Brendshëm, Saimir Tahiri dhe vëllezërve Habilaj. Koha kur Prokuroria është përqendruar për të kontrolluar tabulatet varion nga viti 2013 deri në vitin 2015. Sipas Prokurorisë, kjo është periudha kur Tahiri ka pasur komunikime me vëllezërit Habilaj. Ndërkohë, pas publikimit në media të miqësisë Habilaj-Tahiri dhe pretendimeve të Dritan Zaganit, se makina e ish-ministrit përdorej nga një grup kriminal në Vlorë, Prokuroria thotë se komunikimet telefonike mes tyre janë ndërprerë. Prokuroria nuk e ka të qartë se në çfarë forme është kryer komunikimi mes Habiljave dhe Tahirit, por mes tyre nuk ka pasur më komunikime telefonike. Sipas Prokurorisë janë duke verifikuar me imtësi të plotë, të gjitha këto komunikime, dhe se në kohët në vijim do kërkojnë të kryejnë dhe verifikime të tjera në disa drejtime.
Habilajt, 20 milionë euro nga 3.5 tonelatat e drogës
U zhvillua dje në selinë e Gjykatës së Katanias në Rajonin e Siçilisë, seanca e parë gjyqësore ndaj anëtarëve të arrestuar të bandës italo-shqiptare të drejtuar nga Moisi Habilaj. Seanca zgjati rreth dy orë dhe u zhvillua me dyer të mbyllura. Ishin të pranishëm të gjithë të arrestuarit shqiptarë me avokatët e tyre si dhe të arrestuarit italianë me përjashtim të Antonino Riella, avokati i të cilit kish hequr dorë nga kërkesa e ankimit.
Avokatët e të arrestuarve kanë paraqitur pranë tupit gjykues kërkesat e tyre për rekurse ndaj vendimit të Gjykatës për arrest me burg. Pothuajse të gjithë avokatët kanë kërkuar masa alternative ndaj klientëve të tyre siç është masa e arrestit shtëpiak.
I pranishëm në sallën e gjyqit ishte dhe Moisi Habilaj i konsideruar kreu i kësaj organizate të strukturuar kriminale që merrej me trafikun e lëndës narkotike si dhe me trafikun e armëve. Avokati i Moisi Habilajt, Maurizio Katalano pas mbarimit të seancës ka deklaruar se hetimet nuk janë mbyllur ende, duke pretenduar se klienti i tij, Moisi Habilaj “nuk është kreu drejtues i këtij grupi kriminal trafikantësh droge e armësh”.
Sipas mediave italiane, Moisi Habilaj është paraqitur i fundit përpara gjyqtarëve, ndërsa avokati i tij Biagio Maurizio Catalano, i ka mohuar akuzat. “Prokuroria kërkoi që të konfirmohet urdhëri për mbajtjen e tyre në burg. Ndërsa ne kërkuam anulimin për mungesë provash. Kjo është pikënisja ndaj s’mund të themi saktësisht se si do të shkojnë gjërat. Vetë urdhëri i ndalimit, për të cilin besoj se jeni në dijeni, sepse është publikuar, mendoj se është maja e ajsbergut, përmbledhje e një fashikulli të tërë dosjesh voluminoze hetimesh, të cilën unë vetë nuk kam patur kohë të konsultohem. Por në këtë fazë, faza e parë së paku këtu në Itali, është ajo për t’ju drejtuar Gjykatës së Lirisë, për të pasur në qoftë se së paku një prej pozicioneve, nga ky moment, mund të lëshohet dhe t’i rikthehet liria së paku ndonjërit”, u shpreh avokati i Moisi Habilaj.
I vetmi nga të arrestuarit që nuk ka kërkuar rishikimin e arrestimit ishte italiani Antonino Riela, i cili sipas dosjes së hetimit rezulton të jetë një nga kontaktet më të besuara në Catania të Moisi Habilajt.
Trupi gjykues i përbërë nga 3 anëtarë brenda 48 orësh duhet të marrë vendimin e pranimit apo hedhjes poshtë të kërkesave të avokatëve mbrojtës. Pra, më datë 2 nëntor 2017 pritet dalja e vendimit të marrë nga Gjykata e Katanias.
Grupit pritet t’i bashkohet edhe Nezar Seiti, i cili u arrestua në Shqipëri. Prokuroria e Katanias e cila kreu hetimet, ka sjellë në Tiranë një grup oficerësh të Guardia di Financa, për t’i dorëzuar Prokurorisë së Përgjithshme fashikujt hetimor për katër persona të grupit, të cilët nuk u arrestuan, pasi nuk gjendeshin në territorin italian.
Në veçanti oficerët italianë kanë sjellë fakte dhe të dhëna mbi Nezar Seitin, i arrestuar në Vlorë në datën 20 tetor, për të cilin Prokuroria italiane kërkon ekstradimin e tij. 40-vjeçari, sipas hetuesve italianë, ka qenë një ndër personat më të rëndësishëm të grupit përgjegjës për zbarkimet e drogës në Itali.
Prokuroria shqiptare po heton paralelisht për grupin e Habilajve dhe ka përfshirë në hetime edhe ish-ministrin e Brendshëm, Saimir Tahiri.
Hetimet e Antimafias
Grupi i organizatës së Habilajve u arrestua më datë 14 tetor 2017 me urdhër të Gjykatës së Katanias në operacionin e Policisë italiane të koduar “Rosa dei Venti”. Organizata kriminale e drejtuar nga Moisi Habilaj vetëm në një ngarkesë me 3.500 kg marijuanë që kishte transportuar në Itali nga bregdeti shqiptar kishte përfituar 20 milionë euro. Në momentin e arrestimit bandës iu sekuestruan rreth 20.000 euro cash. Sipas Prokurorisë së Katanias, në veçanti, organizata kriminale, ku disponueshmëria e armëve dhe municioneve është konfirmuar me ekzekutimin e konfiskimit të armëve të tipit Kallashnikov dhe qindra municione, kishte fituar kontrollin mbi importin e sasive të mëdha të marijuanës nga Shqipëria, të cilët më pas përdoreshin për të furnizuar sheshet në Katania dhe në krahinat e Raguzës dhe Sirakuzës.
Operacioni, i koduar me emrin “Rosa dei Venti” është kryer nga financierët e Gico dhe Guardia di Finanza e Katanias, duke kryer funksione komplekse teknike për gjurmimin e telefonatave dhe përgjime mjedisore, për të cilat është e nevojshme prova për të përdorur të dyja, si në tokë dhe në det, të vendosjes së njëkohshme të pajisjeve të artikuluara për të luftuar trafikun e paligjshëm.
Gjatë hetimeve, në fakt është bërë e mundur marrja në dëm të komponentëve të organizatës kriminale me profil ndërkombëtar, konfiskimi në mënyrë të përsëritur e lëndëve narkotike, ku janë arrestuar më shumë se 20 korrierë, edhe me ndihmën e njësisë të “antiterrorizmit dhe impenjimit të shpejtë” e qentë e grupit të Guardia di Finanza të Katanias.
Kushëriri i Tahirit, Habilaj me pranga në duar në Itali
Moisi Habilaj, kushëriri i ish-ministrit të Brendshëm, Saimir Tahiri u paraqit mëngjesin e djeshëm në ambientet e Gjykatës së Rivlerësimit të Katanias për ankimim. Mediat italiane transmetuan pamjet e kushëririt të Tahirit me pranga në duar, ndërsa ecte në korridoret e Gjykatës, i shoqëruar nga karabinierët. Pavarësisht përgjimeve që italianët kanë kryer për tonelatat me drogë dhe armëve të sekuestruara 6 të arrestuarit e “Grupit Habilaj” nuk i pranuan akuzat.
Prokuroria e Katanias njoftoi arrestimin në Shqipëri të Nezar Seitit. Bie në sy, që italianët i dërguan materialet direkt në Prokurorinë e Përgjithshme shqiptare për arrestimin e Nezar Seitit, duke treguar edhe njëherë mosbesimin tek Ministria e Brendshme dhe Policia e Shtetit. Në bazë të këtyre informacioneve u kap një sasi prej 4 tonësh hashash në Babicë.
Rama ri-inauguron Qendrën Shëndetësore të inauguruar përpara nga Mziu
Bashkia Kamëz ka reaguar pas aktivitetit të kryeministrit Edi Rama në Kamëz, ku inauguroi një qendër shëndetësore. Sipas Bashkisë Kamëz, Kryeministri “ri-inauguroi” rikonstruktimin e qendrës shëndetësore, përurimi i së cilës është bërë nga kryebashkiaku Xhelal Mziu.
“Edi Rama, në mungesë të bilancit të investimeve, ishte në Kamëz si struci për të ri-inauguruar rikonstruksionin e Qendrës Shëndetësore, përurimi i së cilës është bërë nga kryebashkiaku Xhelal Mziu, duke qenë se punimet kanë kohë që kanë përfunduar. Kamza ka nevojë për një tjetër qendër shëndetësore, duke pasur një numër popullsie të madhe. Për këtë, Bashkia Kamëz ka si projekt zhvendosjen e qendrës shëndetësore tek ish-shkolla profesionale, duke pasur hapësirë më të madhe. Me ardhjen në pushtet të PS-së, ky projekt nuk u mor parasysh, duke mbetur në sirtarët e qeverisë. Rama e ka diskriminuar Kamzën, duke mos financuar projekte, të cilat kanë të bëjnë me zhvillimin e zonës në infrastrukturë, arsim, shëndetësi etj”., thuhet në njoftimin e Bashkisë Kamëz.
Më tej thuhet se, ky Kryeministër hakmarrës vijon të diskriminojë jo vetëm Bashkinë e gjashtë në vend, kryebashkiakun e saj, por edhe qytetarët e Kamzës. Është absurd dhe i dhimbshëm një diskriminim i tillë politik, pasi në Kamëz nuk jetojnë vetëm demokratë, por edhe qytetarë të bindjeve të majta apo bindjeve të tjera, të cilët e vuajnë këtë sjellje skandaloze të Ramës. Ky Kryeministër hakmarrës ka treguar që banorët e Kamzës nuk i diskriminon thjesht politikisht, por ai herë pas here ka pasur qëndrime, duke i diskriminuar edhe për prejardhjen e tyre.
“Edi Rama ndodhet sot pak metra nga vendi “i krimit”, aty ku premtoi legalizime falas në fushatën e vitit 2013, një premtim i pambajtur. I kujtojmë Kryeministrit hakmarrës se në Kamëz hoqi 5 mijë familje nga skema e ndihmës ekonomike, duke u mohuar edhe kafshatën e gojës. Papunësia është rritur më shumë në këto vite, varfëria është ulur këmbëkryq në Kamëz. Rama i ka masakruar banorët e Kamzës dhe Paskuqanit gjatë qeverisjes së tij me faturat e fryra të energjisë. Teksa baronët e drogës kanë bërë qindra miliona euro me ndihmën e qeverisë, Rama dhe policia e tij me aksionet kanë shoqëruar në polici dhe kallëzuar në Prokurori qindra qytetarë në pamundësi ekonomike të paguajnë energjinë. I kujtojmë Ramës që në Kamëz dhe Paskuqan ka futur padrejtësisht e përjetësisht në borxh për energjinë e pakonsumuar mijëra familje”, përfundon njoftimi për shtyp i Bashkisë Kamëz.
Prokuroria sekuestron pasurinë e Habilajve në Vlorë
Sekuestrohet pasuria e Habilajve në Vlorë. Me kërkesë të Prokurorisë së Krimeve të Rënda, Policia në bashkëpunim me Drejtorinë e Vlorës, policia ka sekuestruar 6 njësi shërbimi dhe apartamente banimi me sipërfaqe të ndryshme. “Prej Specialistëve të Seksionit të Hetimit të Krimit Ekonomik e Financiar në DVP Vlorë, në vijim të informacionit, lidhur me procedimin penal në ngarkim të shtetasve, Artan Habilaj, Moisi Habilaj dhe Florian Habilaj, si persona të dyshuar për kryerjen e veprës penale “Pastrimi i produkteve të veprës penale ose veprimtarisë kriminale”, është bërë ekzekutimi i Vendimit Penal Nr. 379 datë 30.10.2017 të Gjykatës së Rrethit Gjyqësor Vlorë, e cila ka vendosur caktimin e masës së sigurimit pasuror “Sekuestro- preventive” mbi pasuritë”, informon policia.
Pasuritë e sekuestruara
-Njësi Shërbimi me sipërfaqe 157 m2, ndodhur ne lagjen “28 Nëntori”, Vlorë, në pronësi të shoqërisë Turi&Mzb shpk dhe Florian Habilaj.
-Njësi shërbimi me sipërfaqe 136 m2, në lagjen “29 Nëntori”, Vlorë, në pronësi të shtetasit Florian Habilaj.
-Apartament banimi në Vlorë, në pronësi të shtetasit Artan Habilaj.
-Apartament banimi me sipërfaqe 69 m2, në lagjen “Uji i Ftohtë”, në pronësi të K.H..
-Apartament banimi me sipërfaqe 104.5 m2 në Vlorë, në pronësi të shtetasit F.M..
-Njësi shërbimi dhe banimi, me sipërfaqe 156 m2, në Vlorë, në pronësi te shtetasit Artan Habilaj.
Ndërkohë vijon puna për evidentimin dhe sekuestrimin e pasurive të tjera që kanë buruar nga aktiviteti kriminal.
Materialet iu referuan Prokurorisë së Rrethit Gjyqësor Vlorë për veprën penale “Pastrimi i produkteve të veprës penale ose veprimtarisë kriminale”, parashikuar nga neni 287 i Kodit Penal.
Kryebashkiaku i Belshit prish lokalin 300 mijë euro me leje për të bërë pallatin e tij
Kryetari i Bashkisë së Belshit, Arif Tafani ka prishur një lokal 300 mijë euro me dokumenta të rregullta për të ndërtuar një pallat të tijin. Për këtë ngjarje të rëndë ka reaguar edhe ish-Kryeministri Berisha. Në një postim në Facebook Berisha shkruan se, kreu i Bashkisë së Belshit, Arif Tafani dhe financuesi i PS, Sopot Ferhati, i prishën lokalin personit të akuzuar se e kërcënoi kryebashkiakun për të ndërtuar pallatet e tyre.
Reagimi i Berishës vjen pas një mesazhi të dërguar nga një qytetar nga Belshi. “E vërteta e kërcënimit me 300 mijë euro të narko-kryetarit të Belshit! Lexoni mesazhin e qytetarit dixhital”, shkruan Berisha.
“Doktor, po ju shkruaj nga Belshi. Kryetari i Bashkisë Belsh, Arif Tafani, paska nxjerrë lajmin se e kanë kërcënuar me armë. Dua të them se personit të akuzuar, ky bashkë me biznesmenët e vet në Belsh i kanë prishur lokalin me vlerë 300 mijë euro. I kishte letrat e rregullta, por Arif Tafani dhe financuesi i PS, Sopot Ferhati, ia prishën për të bërë pallatin e tyre në mes të Belshit.
Nuk di nëse është kërcënuar me të vërtetë apo jo, sepse edhe mundet, por ngjarja kështu është. Këta kanë shkatërruar gjithë Belshin për të ndërtuar pallatet e tyre”, shkruan qytetari nga Belshi.
Edhe policia ka konfirmuar se zanafilla e konfliktit mes personit të shoqëruar dhe kryebashkiakut ishte lokali i prishur nga Bashkia. “Shtetasit R.T., në vitin 2016 në Belsh qendër i është prishur lokali i familjes së tij nga ana e Bashkisë, pasi ishte përfshirë në objektet që do prisheshin në zbatim të planit urbanistik të qytetit”, thuhet në njoftimin e Policisë.
“Nuk ke më jetë po nuk më dhe 300 mijë euro brenda një muaji. Më ke prishur lokalin buzë liqenit dhe kjo do të paguhet me kokën tënde. Që të shpëtosh kokën do më paguash eurot dhe do më japësh një shesh ndërtimi te bashkia e re”, është shprehur autori që e kërcënoi me armë kryebashkiakun.
Ngjarja ndodhi dje në mesditë pak pas orës 12:00 në vendin e quajtur Pekisht te Puset e Naftës. Kryebashkiaku Arif Tafani ka bërë denoncim në polici. Kanosësi është vëllai i ish-kandidatit të pavarur për kryetar bashkie në Belsh, Besjon Tafani.
Si fshehu policia vdekjen e punëtores së kanabisit në kullën e njeriut të Ruçit
Një punëtore e kanabaisit që punonte në kapanonin e një trafikanti në Tepelenë, që njihet si njeri i afërt i Gramos Ruçit, ka vdekur gjatë punës, ndërsa policia e ka mbajtur të fshetë këtë ngjarje të rëndë. Denoncimi është bërë nga dy qytetarë nga Tepelena, të cilëti i janë dretjuar me mesazhe ish-Kryeministrit Berisha.
“Qytetarët dixhital informojnë vdekjen e punëtores së kanabisit në kullën e Qerem Braçit!
Policia mbante të fshehtë vdekjen! Lexoni mesazhet e qytetarëve dixhital!”, shkruan Berisha.
“Përshëndetje zoti Berisha, ai Qerem Braçi i famshëm i Gramoz Ruçit dy ditë para se të digjte kapanonin e tij i ka vdekur një zonjë që ka qenë duke qethur hashash dhe bashkë me kryetarin e degës Emiljanon e kanë çuar në Spitalin e Gjirokastrës, sikur ka qenë me tension. Ka pasur shumë gra të tjera prezente që e kanë parë atë çfarë ka ndodhur… Jepua pak këtë lajm atyre kuqove që t’i fusin brenda këta bastard trafikant”, shkruan qytetari.
“Prsh Dr. Berisha, dua të të informoj se dje ka vdekur një zonjë nga Lazarati në malet e Gusmarit të Tepelenës. Ishte duke qethur hashash te njerëzit e Saje Qorrit … zonjës në fjalë sot ju është bërë varrimi … ju deshën 3 orë e ca që e zbritën nga malet … dhe këtë Policia e mban të fshehtë, ndoshta dhe me miratimin e familjarëve të së ndjerës … anonim ju lutem”, shkruan qytetari tjetër.
Arrestohet polici në Durrës, shiste drogë me trafikantët
Një polic në Komisariatin e Durrësit u vu në pranga nga shërbimi i çështjeve të brendshme, pasi dyshohet se shiste drogë. Ai është Fatmir Meço 33 vjeç dhe u kap pas një hetimi disa mujor.
Në pranga ra dhe një bashkëpunëtorii policit si dhe dy persona të tjerë u shpallën në kërkim. 33- vjeçari Meço, sipas hetimeve, bashkëpunonte me Fitim Selacin dhe dy personat e shpallur në kërkim. Ai u garantonte pjesëtarëve të grupit lehtësi në mbajtjen dhe shpërndarjen e lëndëve narkotike. Gjatë kontrollit në banesë, atij iu sekuestrua lëndë narkotike e llojit kanabis sativa, si dhe një presë për paketimin e lëndës narkotike. Kurse në banesën e Fitim Selacit në Fushë Krujë u sekuestrua një sasi prej 6.3 kg kanabis.
33-vjeçari akuzohet për “Shpërdorim të detyrës” dhe “Prodhim e shitje të narkotikëve”. Gjithashtu u arrestua dhe Fitim Selaci 19 vjeç, banues në Fushë Krujë, si dhe janë shpallur në kërkim dy persona, A.M., 24 vjeç dhe R.T., 19 vjeç, me akuzën e “Prodhimit dhe shitjes së narkotikëve”. Arrestimi i punonjësit të policisë, Meço, u bë pas një hetimi disa mujor, zhvilluar me metoda speciale nga SHÇBA.
Nga ky hetim rezultoi se, efektivi i Komisariatit të Durrësit bashkëpunonte me Fitim Selacin dhe dy personat e shpallur në kërkim, për prodhimin dhe shpërndarjen e lëndëve narkotike. Fatmir Meço, duke shfrytëzuar pozicionin e tij, u garantonte pjesëtarëve të grupit lehtësi në mbajtjen dhe shpërndarjen e lëndëve narkotike. Në disa raste, dyshohet se ky punonjës policie ka transportuar dhe shpërndarë edhe vetë lëndë narkotike.
Gjatë kontrollit në banesë, atij iu sekuestrua në cilësinë e provës materiale një sasi lënde narkotike e llojit kanabis, si dhe një presë për paketimin e lëndës narkotike.
Në banesën e shtetasit Fitim Selaci në Fushë Krujë u sekuestrua një sasi prej 6.3 kg lëndë narkotike e llojit kanabis. Materialet i kaluan Prokurorisë së Rrethit Gjyqësor Durrës për veprime të mëtejshme.
Kryesore
Continue to the category
