Në mesin e muajit tetor, kryetari i Bashkisë së Durrësit, Vangjush Dako, aplikoi pranë ambasadës amerikane për t’u pajisur me vizë. Dako u shfaq në një video ku së bashku me shumë qytetarë qëndronte në radhë në pritje të aplikimit. Por disa ditë më vonë, në media u publikua lajmi se ambasada kishte refuzuar të pajiste me vizë kryebashkiakun e Durrësit, ndërkohë që nuk jepeshin arsye për këtë vendim. A lidhet ky refuzim me dosjen që Prokuroria e Krimeve të Rënda po heton ku pjesë e saj është edhe Dako? Kjo mbetet për t’u parë, por ajo që dihet është se hetimet për kryebashkiakun e Durrësit kishin nisur disa muaj më parë se ai të aplikonte për vizë pranë ambasadës.

Ish-Kryeministri Berisha ka publikuar dje denoncimin e një qytetari sipas të cilit, paratë e kapura në flagrancë në makinën e Orest Sotës janë të Saimir Tahirit. Dhe jo vetëm kaq, sipas denoncimit, këto para Sota po i çonte në shërbim të Saimir Tahirit për t’i pastruar tek një tregtar shumë i afërt me të. “Qytetari dixhital informon: paratë në makinën e Orest Sotës janë të Saimir Tahirit, i cili po i dërgonte për pastrim te një tregtar, mik i ngushtë dhe i afërt i tij”, shkruan Berisha në postimin e tij. Ndërkohë në denoncimin e qytetarit thuhet: “Përshëndetje Doktor. Atëherë kam informacion, që lekët që u gjetën në makinën e Orest Sotës ishin të Saimir Tahirit me destinacion në qytetin e Elbasanit, tek një tregtar cigaresh mik i ngushtë dhe i afërt me Saimirin dhe lekët do të shkonin aty për pastrim dhe ky tregtari tregton edhe cigare pa pullë fiskale ashiqare dhe nuk e ndalon njeri. Ju lutem anonim”.

Për të forcuar cilësinë dhe kredibilitetin e të dhënave kombëtare në projektligjin e ri për statistikat zyrtare janë parashikuar dënime të rënda administrative ndaj personave që raportojnë të dhëna të institucionet ndërkombëtare.
Shprehimisht projektligji i ri, i cili është fazën e konsultimit publik dhe pritet që së shpejti të miratohet nga qeveria parashikon se, “Për rastet e dërgimit të të dhënave zyrtare institucioneve ndërkombëtare pa njoftimin e INSTAT-it, dënohet me gjobë deri në 50 000 lekë. Për rastet e përsëritura, gjobat janë nga 50 000 lekë deri në 250 000 lekë për çdo shkelje. Për shkeljet e kryera nga institucionet publike gjoba i jepet titullarit të institucionit”.
Gjithashtu dënohen me gjobë personat që japin të dhëna konfidenciale ndaj të tretëve për qëllime kërkimore. Moszbatimi ose shkelja e kërkesave të konfidencialitetit nga nëpunësi, përfshirë këtu dhe kohë, kur ai ka lënë detyrën, ose nga një palë e tretë, së cilës i është dhënë e drejta për qëllime kërkimore, dënohet me gjobë nga 200 000 lekë deri në 300 000 lekë, përcaktohet në projektligj.
Gjithashtu gjobat janë parashikuar edhe për persona që pengojnë transmetimin e të dhënave që rrjedhin si detyrim nga ligji i ri.
“Moszbatimi ose shkelja e kërkesave për mosnjoftimin e përgatitjes së projektakteve, që mund të ndikojë veprimtarinë statistikore apo të pengojë transmetimin e të dhënave administrative për qëllime statistikore, përbën shkelje të rëndë disiplinore sipas legjislacionit për nëpunësin civil dhe titullari i institucionit dënohet me gjobë nga 50 000 lekë. Për rastet e përsëritura, gjobat janë nga 50 000 lekë deri në 250 000 lekë për çdo shkelje. Për shkeljet e kryera nga institucionet publike, gjoba i vendoset titullarit të institucionit.
Projektligji i ri i jep të drejtën e vendosjes së gjobave drejtorit të Përgjithshëm, kur të dhënat ose informacioni duhen dërguar në INSTAT.
Gjoba vihet gjithashtu nga drejtuesi i agjencisë statistikore, kur të dhënat janë kërkuar nga agjencia statistikore përkatëse.
Kundër vendimit të gjobës mund të bëhet ankim tek drejtori i Përgjithshëm brenda 10 (dhjetë) ditëve nga data e shpalljes ose e botimit të gjobës, i cili duhet të përgjigjet brenda 30 ditëve. Kundër vendimit të drejtorit të Përgjithshëm ose kur ai nuk përgjigjet, personi i interesuar mund t’i drejtohet Gjykatës brenda 30 ditëve nga data e shpalljes së vendimit ose nga mospërgjigjja.

Rama po kërkon që të zgjedhë një Kryeprokuror polotik në mënyrë antikushtetuese, duke pasur si synim mbylljen e dosjeve të nxehta të lidhjeve të qeverisë me krimin. Vetëm në këtë mënyrë, Rama do të mund të jetë i qetë nga hetimet që kanë nisur ndaj ministrave të tij dhe të zgjedhurve lokalë për lidhjet e tyre me mafien. Kapja e kreut të Prokurorisë qoftë edhe në mënyrë të përkohshme ka si synim të vetëm shkarkimin e prokuroirëve që po hetojnë dosjet e njerëzve të tij të kapur në flagrancë në lidhje me krimin.
Teksa qeveria Rama ende nuk ka marrë asnjë pozicion publik për pasardhësin e Prokurorit të Përgjithshëm Adriatik Llalla, mandati 5-vjeçar i të cilit mbaron në fillim të dhjetorit, duket se misionet e ndihmës teknike të BE dhe SHBA, EURALIUS dhe OPDAT kanë propozuar zgjedhjen e një kryeprokurori të përkohshëm, i cili do të jetë në funksion derisa Këshilli i Lartë Prokurorial (KLP) të zgjedhë një pasardhës.
Për shkak se mandati i Llallës po mbaron ndërsa KLP, një nga institucionet e reja të Reformës në Drejtësi, ende nuk është ngritur nga Parlamenti, ekziston rreziku i vakuumit në përzgjedhjen e pasardhësit të tij. Kushtetuta shqiptare kërkon që KLP të drejtojë procesin e përzgjedhjes së kandidaturave për kryeprokuror, i cili më pas do të miratohet në Parlament me të paktën 84 vota.
Por duket se tani OPDAT dhe EUALIUS sugjerojnë që kryeprokurori të zgjidhet me shumicë të thjeshtë në Kuvend, dhe teorikisht mund të zgjidhet me mbështetjen e 71 prej 140 deputetëve. Kjo do të thotë se Kryeministri Rama praktikisht mund të propozojë çdo emër që dëshiron për kryeprokuror të përkohshëm.
Nëse kjo do të ndodhë, do të jetë një goditje për Reformën në Drejtësi të imponuar nga BE-ja dhe qeveritë amerikane, misionet e së cilëve gjatë gjithë kësaj kohe kanë rishikuar sistemin shqiptar të drejtësisë me qëllim kufizimin e ndikimit politik dhe rritjen e pavarësisë së sistemit.
Më e rëndësishmja, një zgjedhje e tillë mund të ndikojë në një numër çështjesh që po hetohen aktulisht, përfshirë dhe ish-ministrin e Brendshëm Saimir Tahiri, nën hetim për bashkëpunim me organizatën kriminale të vëllezërve Habilaj dhe kryebashkiakun e Durrësit, Vangjush Dako, për të cilin ka të dhëna se po hetohet për mashtrim elektoral, korrupsion dhe shoqëri kriminale.
Opozita ka propozuar që në vend të emërimit të një prokurori të ri të Përgjithshëm, mandati aktual i Llallës të zgjatet deri në institucionin e PJK-së.
Është e paqartë se pse EURALIUS dhe OPDAT morën përsipër të japin një opinion për çështjen. Sidoqoftë, gjuha e përdorur në opinionin e tyre tingëllon më shumë si ndërhyrje politike sesa zhargon ligjor. Pretendimet e tyre janë se nuk ka autoritet kushtetues apo ligjor që i lejon Parlamentit të zgjasë mandatin e Prokurorit të Përgjithshëm pas përfundimit të mandatit të tij dhe se, përkundrazi, ekziston një dispozitë e qartë që urdhëron emërimin e Prokurorit të Përgjithshëm të përkohshëm.
Por në fakt, duket se nuk ekziston një dispozitë e tillë e qartë, prandaj përfundimi i mandatit të kryeprokurorit dhe mosformimi i KLP-së krijon një ngërç të tillë. Gjykata Kushtetuese e Shqipërisë është institucioni i vetëm që interpreton Kushtetutën dhe për këtë arsye ka një shans të lartë që çështja e kryeprokurorit të ri – të përkohshëm ose jo – të përfundojë në Gjykatën Kushtetuese.