Administratori i deleguar kuqezi paralajmëron këtë herë Milanin dhe Vincenzo Montellën. “Nuk pres vetëm një lojë të bukur, por edhe rezultate. Në fund të fundit, futbolli është një sport që varet nga rezultatet”, thotë Marco Fassone. Për drejtuesin e “djallit”, ringritja e ekipit kuqezi nuk mund të përparojë nëse mungojnë pikët dhe rezultatet pozitive.
Edhe pse ishte pjesëmarrës në një shfaqje bamirësie, me Fondacionin e Milanit që dhuronte 10 defibrilatorë për shkollat, administratori i deleguar foli kryesisht mbi momentin jo të mirë që po kalon skuadra. “Njerëzit duan të shohin rezultatet. Jam i bindur se jemi në drejtimin e duhur, edhe pse disi me vonesë krahasuar me pritshmëritë tona”, ka theksuar Fassone.
Sa i përket ndeshjeve në Europë, duke qenë se të enjten Milanin e pret një transfertë në Athinë të Greqisë, pas barazimit 0-0 që AEK-u rrëmbeu në “San Siro”, Fassone shprehet kategorik. “Kupat europiane janë si gjithmonë shtëpia e Milanit. Athina më shumë se kushdo tjetër. Shpresoj dhe uroj që të enjten të shohim një ndeshje të bukur, sigurisht edhe një rezultat pozitiv”, tha ai.
Dy ditë më parë ish-trajneri i Milanit, Karlo Ançeloti analizoi situatën e Milanit të tij dhe theksoi rëndësinë e krijimit të VAR në të gjitha garat e mundshme. “Në futboll nuk ka magjistarë, me një shkop magjik. Kjo lojë kërkon durim, për të gjetur lojtarët që i përshtaten projektit. Milani ka bërë një merkato të bollshme në verë dhe njerëzit thanë se do të ishte skuadër e jashtëzakonshme, por jo në gjashtë muaj. Pasi ke bërë grupin e duhur të lojtarëve për ekipin, kërkohet kohë dhe këmbëngulje në investime, si edhe punë. Vendi i katërt për Milanin është shumë i rëndësishëm, sepse e lejon të luajë në Ligën e Kampionëve dhe të bëjë investime, por është edhe më e rëndësishme të mos bjerë, kur gjërat të shkojnë keq”.

Fitorja kundër Verona-s ishte e radhës për zikaltrit. Skuadra e Interit ka arritur një rekord historik të hënën mbrëma. Pas 11 javëve kampionat, Interi ka mbledhur plot 29 pikë, gjë që përbën moment historik për klubin, duke e tejkaluar Interin e Jose Mourinhos të vitit 2010, kur kishte arritur 28 pikë pas 11 ndeshjeve të para. Trajneri Luciano Spalletti tha gjatë konferencës për shtyp pas ndeshjes se, gjithçka po bëhet edhe më e vështirë, pasi të gjithë kryesojnë.
“Nuk më jep asnjë ndjesi rekordi i vendosur sot, sepse, ndonëse kemi bërë kaq mirë, jemi ende të dytët dhe skuadrat pas nesh kanë vetëm 1 pikë më pak. Të gjithë kryesuesit po fitojnë nga java në javë dhe gjithçka bëhet edhe më e vështirë, kur mendon që edhe skuadra si Milani do ta thonë fjalën e vet në këtë sezon. Na pret një sezon i gjatë dhe i vështirë, një tunel që përfundon në qershor dhe deri atëherë nuk mund të flasim për titullin. Zhvilluam një ndeshje të mirë dhe u përpoqëm të bëjmë gjënë e duhur. Ndonjëherë jemi disi të ngadaltë, por nuk e humbim toruan dhe kjo është shumë pozitive. Icardi nuk ka shënuar, por ka bërë një punë fantastike në ndihmë të ekipit dhe për këtë jam shumë i kënaqur”, u shpreh Spaleti.
Inter ka vazhduar ecurinë mjaft pozitive në Serinë A, duke arritur një tjetër fitore, këtë herë jashtë fushe ndaj Verona-s. Të besuarit e Luciano Spalletti-t kanë mundur Cerci me shokë me rezultatin 2-1 pas golave të Valero dhe Perisiç, ndërsa për miqtë ishte Pazzini që barazoi për një moment. Me këtë fitore, Inter tashmë ka 29 pikë në 11 ndeshje, një rekord në historinë e klubit Zikaltër që nuk ka pasur ndënjëherë më tepër pikë se kaq pas 11 javëve të para të sezonit.
Ndeshja ishte e kontrolluar nga Zikaltrit që gjithsesi nuk arritën të depërtonin në zonën kundërshtare dhe si pasojë arritën të ishin të rrezikshëm vetëm nga goditjet nga distanca ose nga goditjet e dënimit. Mbrojtësit e Verona-s arritën të bllokonin plotësisht qendërsulmuesin e Inter Mauro Icardi, i cili pothuajse nuk preku asnjë top gjatë gjithë mbrëmjes.
Por markimi me më shumë se një lojtar të sulmuesit kundërshtar, krijon hapësira për shokët e tij, dhe kështu ndodhi në minutën e 36’ kur Borja Valero arrin të shënojë golin e parë për Inter në Serinë A pas një krosi fantastik të Candreva-s.
Pas golit Inter mundohet të vulosë fitoren, duke tentuar në disa raste dyfishimin e rezultatit, por pa sukses, dhe Verona arrin të barazojë rezultatin në minutën e 59’ me penallti pasi arbitri me ndihmën e VAR pa një faull të Handanoviç ndaj një prej lojtarëve të Veronas.
Por Inter reagon menjëherë dhe ishte Perisiç ai që riktheu avantazhin për të tijtë me një goditje fluturimthi në hyrje të zonës që depërtoi nëpërmjet gjithë mbrojtjes kundërshtare. Në minutat e fundit Inter mbrojti rezultatin pa shumë probleme, duke u rikthyer në vendin e dytë të renditjes së Serisë A.
Arlind RAMA

Suedia është gati të bëjë një “surprizë” Italisë në play off-in e botërorit. Trajneri i përfaqësueses nordike, Janne Andersson, shfaqet tejet i karikuar për përplasjen e dyfishtë të nëntorit. “Nuk zbret historia dhe trofetë në fushë dhe nuk ka fare rëndësi për ne se sa herë e ka fituar Italia botërorin. Kemi respekt, por jo frikë ndaj Italisë. Duhet të tregojmë lojën tonë më të mirë dhe të jemi si gjithmonë, të përqendruar. Nëse do t’ia dalim mbanë, mund të fitojmë ndaj çdokujt. Ventura? Në mendoj se na nënvlerëson, ai dhe bashkëpunëtorët e tij janë profesionistë”, u shpreh Anderson.
Por çfarë mendon Anderson për shortin? Para se të njihja kundërshtarin, nuk kishte kuptim që të studioja të gjitha skuadrat që mund të kishim përballë. Jonas Thern ka ndjekur takimin Shqipëri – Itali, për të spinuar pak. Tani fillon puna e vërtetë. Italia është një kombëtare e madhe, me shumë histori dhe traditë”, përfundoi trajneri i Suedisë.
Ndërkohë, bëhet e ditur se drejtuesit e Leicester City e kanë kërkuar sërish Ranierin, pasi e shkarkuan. Ranieri, tash trajner i Nantes, e fitoi titullin e Premier Ligës me Leicester City në sezonin 2015-‘16, por u shkarkua nga posti i trajnerit sezonin e kaluar pas rezultateve të dobëta. Në një intervistë për “Corriere dello Sport”, Ranieri e ka zbuluar se skuadra angleze ka dashur ta rikthejë atë, pasi e ka shkarkuar Craig Shakespeare. Megjithatë, ish-trajneri i Romës dhe Juventusit i është përgjigjur shkurt: “Jo, faleminderit”.

Pasi shkëlqeu dhe e ndihmoi Monakon të fitojë ligën e Francës dhe të arrijë deri në gjysmë finale të Ligës së Kampionëve sezonin që lamë pas, Mbappe iu bashkua PSG-së në gusht në bazë të një marrëveshjeje fillestare për huazimin, e cila do të bëhet e plotë për një shumë prej 180 milionë euro vitin e ardhshëm. Kjo do ta bëjë Mbappen lojtarin e dytë më të shtrenjtë në histori të futbollit pas Neymarit, por performanca e fundit të yllit francez janë të dobët dhe mediat kanë filluar ta kenë në qendër të vëmendjes për këtë.
Mbappe ka shënuar katër gola në 10 ndeshjet e para me PSG-në, përfshirë golin e parë në fitoren 4-0 ndaj Anderlechtit në Belgjikë dy javë më parë. Por që nga ajo ndeshje, ai mori një vlerësim 2 nga 10 nga e përditshmja “L’Equipe” për performancat e tij në barazimin 2-2 ndaj Marseille dhe ishte i dobët në fitoren 3-0 ndaj Nice. “Kur luan mirë, i hap të gjitha gazetat dhe i shikon emisionet sportive dhe ata thonë se ju jeni më i miri. Duhet të jesh në gjendje ta balancosh mentalitetin e mocionet. Kur luan keq, duhet të jesh gati për kritika”, ka thënë trajneri i tij Unai Emery.

Igli Tare kryeson bindshëm sondazhin e hapur nga “Tuttomercatoweb” dhe me shumë gjasa do të fitojë çmimin e drejtorit sportiv më të mirë në Itali nga faqja e specializuar italiane. Deri tani ish-sulmuesi i kombëtares shqiptare ka grumbulluar 33,82% të votave duke lënë pas drejtorin sportiv të Carpit, Matteo Lauriola, por edhe emra të rëndësishëm si Massimiliano Mirabelli i Milanit, Carlo Osti i Sampdorias dhe Giuseppe Marotta i Juventusit. Ecuria fantastike e Lacios ku një meritë të padiskutueshme e ka Igli Tare që edhe pse ka patur në dispozicion një buxhet të vogël i ka vendosur trajnerit Simone Inzaghi në dispozicion lojtarë shumë të mirë, është vlerësuar jashtëzakonisht nga lexuesit e “Tuttomercatoweb”, një pjesë e madhe e të cilëve e konsiderojnë shqiptarin si drejtorin më të mirë sportiv në Itali.

“Mbërrinte në stërvitje para magazinierëve dhe qante kur gabonte, ndërsa sot është një lider”. Kështu do të shprehej Christian Ferrante, trajneri i parë Thomas Strakoshës te të rinjtë e Lazios. Sa shumë rrugë ka bërë portieri shqiptar që nga ajo kohë, duke fituar madje edhe vendin e titullarit në formacionin e Lazios! Inzaghi ka ditur t’i japë besim dhe vazhdimësi paraqitjeve të tij. 11-metërshi që i priti Paulo Dybalas, për të ruajtur fitoren e Lazios ndaj Juventusit, e shndërroi portierin më vendimtar në Serinë A. Tani, një tjetër rekord për portierin e Kombëtares Shqiptare. Vetëm Perin i Genoas ka kryer më shumë pritje (47) se Strakosha (46) në 5 kampionatet më të forta në Europë.

Massimiliano Allegri nuk i ka kursyer komplimentat për kroatin Mario Mandzukiç, të cilin e shndërroi nga qendërsulmues, në një sulmues krahu. Sulmuesi kroat është më i besuari i trajnerit të bardhezinjve, në këto javë të para dhe do të vazhdojë të aktivizohet edhe në vijim. “Mario është një futbollist model, që bën në fushë atë që i kërkohet. Jam i bindur që ai mund të luajë edhe si mesfushor, apo mbrojtës krahu, nëse i kërkohet, sepse është mjaftueshëm i zgjuar. Madje ka një fizik për t’u admiruar, që e lejon të luajë çdo 3 ditë, pa e ndjerë peshën e lodhjes”, tha Allegri.