Grupi i Partive Popullore Europiane ka ndjekur me vëmendje presionin politik të kohëve të fundit mbi Prokurorinë, nisur nga fakti se Prokuroria Shqiptare për Krimet e Rënda, i ka kërkuar Kuvendit heqjen e imunitetit për ish-Ministrin e Punëve të Brendshme, Sajmir Tahiri në mënyrë që ta hetojë për akuzat e korrupsionit dhe trafikimit të drogës. Megjithatë, Partia Socialiste, shumica qeverisëse në Kuvend, në 25 tetor votoi kundër heqjes së plotë të imunitetit politik të Tahirit.
Kështu thuhet në një reagim zyrtar të EPP.
“Grupi i Partive Popullore Europiane mbështet plotësisht Z. Lulzim Basha, lideri i Partisë Demokratike, i cili dënoi presionin politik të Kryeministrit të Shqipërisë mbi Prokurorinë, dhe përdorimin e shumicës parlamentare për mbrojtjen politike të ish-ministrit Tahiri.
Grupi i Partive Popullore Europiane i bën thirrje Kryeministrit Edi Rama dhe shumicës qeverisëse të ndërpresin menjëherë presionin politik ndaj Prokurorisë si dhe të kanalizojnë instrumentet e tyre politikë, në mbrojtje të drejtësisë.
Grupi i Partive Popullore Europiane, nënvizon se dekriminalizimi i zyrtarëve publik është një hap i rëndësishëm për fuqizimin e kulturës politike në vend. Gjithashtu, lufta kundër krimit të organizuar mbetet një çështje jetike për Shqipërinë në drejtim të angazhimit të saj për sundimin e ligjit në kuadër të procesit të Integrimit Europian”,thuhet më tutje në deklaratë.

Carloalberto Rossi

Dritan Zagani është një zyrtar policie, i lindur në Shkodër, ai është në detyrë si shef i njësisë Antidrogë në Komisariatin e Policisë së Fierit-një detyrë e parehatshme dhe e rrezikshme, mes informatorëve me pagesë dhe të dyshuarve për bashkëpunim të fshehtë me “armikun”, me një rrogë në kufi të mbijetesës dhe me shumë “tundime”.
Por ai beson dhe përpiqet ta bëjë mirë punën e tij, edhe pse tek ai ka hedhur rrënjë prej kohësh dyshimi se dikush dekonspiron operacionet që ai organizon. Për këtë arsye, ka filluar të kalojë informacione tek kolegët e tij të misionit italian të Policisë Financiare, Guardia di Finanza, me shpresën që, të paktën, ata të mund t’i arrestojnë kriminelët shqiptarë kur ata hyjnë në Itali.
Ashtu sikur çdo mbrëmje, edhe më 1 maj të 2014, pas orës 5 të pasdites ai mbyll derën e dhomës së vogël në Komisariatin e Fierit dhe me makinën e tij të rrënuar niset drejt Vlorës, aty ku jeton me dy prindërit e moshuar, bashkëshorten dhe tre vajzat e tij, në një apartament të vogël në lagjen “Skelë”.
Një darkë e thjeshtë, ca biseda të shkurtëra përpara televizorit dhe më pas në shtrat, nuk ka as para dhe as dëshirë për të dalë nëpër rrugët e Vlorës.
***
Saimir Tahiri është një i ri ambicioz, djalë i një farmacisti, që pas një përpjekje të pafrytshme për të studiuar në Itali, përfundoi në “ezaurim nervor” të gjatë, kthehet në Shqipëri dhe diplomohet në Drejtësi në Universitetin e Shkodrës. Puna e tij e parë në jetë është si zëdhënës i Partisë Socialiste, dhe drejtor ekzekutiv i Fondacionit “Qemal Stafa” të themeluar nga Partia Socialiste. Dhe në vitin 2009, pa mbushur tridhjetë vjeç, zgjidhet deputet i Partisë Socialiste. Dihet se për të bërë politikë duhet të njohësh njerëz, dhe Saimiri kthehet në frekuentues të rregullt të jetës së natës së Tiranës, ku njeh personazhet më me emër në qytet.
Saimiri është praktik, dhe falë njohjeve të tij të jetës së natës, organizon skuadra që duhet të “mbrojnë votën” në zgjedhjet e 2013-ës, dhe shpërblimi i merituar i marrë nga Kryeministri Rama pas fitores është posti i ministrit të Brendshëm.
Në klasifikimin famëkeq të ministrave të Brendshëm në historinë e Shqipërisë, ai ka hyrë si ministri më jetëgjatë në detyrë, falë një sistemi perfekt të marrëdhënieve me publikun, që filloi me hyrjen triumfale të policisë në Lazarat, tek panairet spektakolare të policisë, tek policet e këndshme në rrugët e Tiranës që shpërndajnë lule për shoferet femra në ditën e Festës së Gruas.
Sigurisht, ndonjë shqetësim vjen përherë, sikurse kritikat për premtimin e pambajtur për të mbyllur të gjitha kazinotë në qendër të Tiranës dhe se përdori operacionet e policisë për të riorganizuar tregun e lojërave të fatit, apo për bombën në farmacinë e të atit që u pasua me arrestime të njëpasnjëshme të një sërë kriminelëve që u liruan të gjithë brenda pak kohe, apo për atentatet e njëpasnjëshme me tritol pa asnjë fajtor, apo për serinë e gjatë të vrasjeve të bujshme të pashpjeguara ndonjëherë, apo së fundmi akuza e vazhdueshme (e pabazë sipas partisë së tij) se ka lënë të lirë kultivimin e kanabisit në Shqipëri, deri në pikën sa filloi transporti i tij me avionë.
Një bezdisje e veçantë i erdhi nga ai polici i Vlorës që e akuzoi se u ka dhënë makinën e tij, që do të thotë mbulimin e tij, kushurinjve të Vlorës, të cilët ai e di që janë tregtarë të ndershëm fruta-perimesh. Por roli i tij si ministër dhe pushteti i tij politik që buron nga një marrëdhënie e ngushtë me Kryeministrin i dhanë mundësinë që t’ia hedhë lehtësisht dhe paq këtij problemi, duke cituar raportet miratuese të Guardia di Finanza, të cilat përgënjeshtronin problemin e drogës.
Por kur opozita kërcënon se do të bojkotojë zgjedhjet, ajo arrin të marrë “kokën” e tij, dhe pas ritriumfit zgjedhor të partisë së tij, Saimir Tahiri nuk merr asnjë post ministror, dhe iu desh të kënaqet me detyrën e famshme politike të koordinatorit të projektit të bashkëqeverisjes, një shpikje e pavlerë e Kryeministrit pa asnjë domethënie dhe mbi të gjitha pa asnjë pushtet të vërtetë.
***
Në orën një pas mesnate bie zilja në derën e Dritan Zaganit, dëgjohet zhurmë e madhe, persona të shumtë që flasin nga ana tjetër e derës.
Nga brenda Dritani pyet se kush janë dhe ato i përgjigjen të hapë derën, sepse janë kolegët që kanë ardhur me një urdhër arresti. Dritani nuk do që ta hapi-formimi i tij prej polici i kujton se në Shqipëri ligji nuk lejon arrestimet mes orës 10 të natës dhe 5 të mëngjesit, përjashto rastin kur ata që kërkohet të arrestohen janë të armatosur dhe të rrezikshëm. Kolegët ngulin këmbë për të hyrë, por pa shfaqur forcë (e dinë që ajo që po i bëjnë kolegut nuk është e këndshme dhe ndoshta as e drejtë) dhe ai vazhdon t’u thotë atyre se nuk mund ta arrestojnë në atë orë.
Askush nuk i tregon ndonjë urdhër arresti të lëshuar nga Gjykata dhe as i thotë arsyen pse duan ta arrestojnë.
I gjithë pallati zgjohet nga zhurmat e policëve, nga të bërtiturat dhe nga të qarat e vajzave të tij, të gjithë, kuriozë, dalin në shkallë për të kuptuar se çfarë po ndodh, ndërsa dhjetëra policë presin në rrugë para pallatit, duke pirë cigare dhe duke u llafosur pranë pesë makinave të mbërritura nga Tirana nën drejtimin e shefit të Kontrollit të Brendshme të Ministrisë së Brendshme.
Stresi dhe tensioni rriten dhe i bëjnë një lojë të pakëndshme, Dritanit i bie të fikët, duke rënë në dysheme. Gruaja e trembur hap derën për të kërkuar ndihmë nga policët, dhe ata, të shumtë, hyjnë në apartament, ndërsa vajzat qajnë me dënesë, gruaja e trembur bërtet, ndërsa pleqtë e tij shikojnë në heshtje, të trembur nga kujtimet e kohëve që shpresonin se kishin kaluar.
E shtrijnë në divan dhe e sjellin në vete, ndërsa të gjithë qetësohen. Ai kërkon dhe ja arrin që në apartamentin e vogël të rrinë vetëm ata policë që janë të nevojshëm. Këta, të mbetur gjashtë, vazhdojnë me një farë ndroje të kontrollojnë shtëpinë dhe të vendosin në një kuti të gjithë pajisjet elektronike që arrijnë të gjejnë, regjistruesa, memorie të jashtme kompjuteri, kompjuterin portativ dhe makinën fotografike.
Dritani këmbëngul dhe arrin t’i bindë që të paktën t’i bëjnë një proces-verbal për kontrollin e banesës dhe të gjërave që duan të sekuestrojnë, ato pajisje që i ka blerë me vështirësi për zell profesional apo ndonjë dhuratë nga miqtë e Guardi di Finanza, të cilat Dritanit nuk do t’i kthehen më.
Dritani ka ende marrje mendsh dhe ata e sjellin në Spitalin e Vlorës, ku i bëjnë analizat dhe zbulojnë se nga stresi i kanë rënë të gjitha nivelet e sheqerit. I japin serum dhe pas dy orëve e fusin në makinën e policisë, dhe në pesë të mëngjesit e sjellin në Tiranë, ku Dritan Zagani do të qendrojë për tre ditë në një qeli të izoluar në Srejtorinë e Policisë së Tiranës, pa kontakt me asnjeri dhe pa asnjë shpjegim.

***
Më 16 tetor 2017 në orën tre të drekës ish-ministri i Brendshëm Saimir Tahiri po shpejton të mbyllë një ditë normale pune si shef i Partisë Socialiste të Tiranës, mes takimeve me militantë dhe politikanë apo mundësive për foto për gazetarët që e ndjekin, dhe ndonjë mbledhje pune, kur dikush i komunikon se Dritan Zagani sapo ka deklaruar në Facebook, që Moisi Habilaj, kushëriri i tij, me të cilin Zagani kishte pasur një përplasje që për të kishte rezultuar fatkeqe, është arrestuar nga një hetim Antidrogë i Prokurorisë Antimafia të Katanias në Siçili.
Postimi i Zaganit elektrizon shtypin shqiptar dhe menjëherë politika fillon ritualin e saj të sharjeve, shumë shpjet të acaruara nga publikimi i disa përgjimeve në të cilat “kushëriri” Habilaj lëvdohet se gëzon mbrojtjen e ministrit, se përdor policë shqiptarë si transportues droge dhe arrin të përdorë radarët e ushtrisë për të shmangur problemet gjatë udhëtimit në det për të transportuar drogë nga Shqipëria në Itali. Në fund, deklarata e përgjuar e Habilajt thotë se duhet t’i japë 30 mijë euro ministrit, edhe pse ai fiton pesë milionë në muaj.
Opozita publikon menjëherë dokumentin e plotë prej 416 faqesh të Prokurorisë Antimafia të Katanias, duke lënë të nënkuptohet se e ka marrë nga shërbimet sekrete italiane, gjë e cila i jep historisë një dimension tjetër, të një “rregullim hesapesh” të diplomacisë ndërkombëtare.
Partia Socialiste, befas, nguron të ofrojë mbrojtje politike dhe Tahiri detyrohet të zhvillojë disa takime me majën e hierarkisë politike, natyrisht me dyer të mbyllura, për të cilat gazetarët bëjnë festë, duke raportuar histori imagjinare përplasjesh të stuhishme, shantazhesh të dyanshme, kërcënimesh për përfshirjen e gjithë qeverisë e të tjera, si këto. Vetë Tahiri, duke dalë nga shtëpia, ushqen dyshimin e një përplasje force me Partinë Socialiste, duke u përgjigjur në mënyrë lakonike gazetarëve që e pyesin për kërkesën për arrestimin e tij si pjesëmarrës në “grup të strukturuar kriminal”, e përgatitur me shpejtësi të rrufeshme nga Prokuroria shqiptare: Nuk keni parë gjë akoma.
Komisioni për Mandatet dhe Imunitetin në Kuvend, i mbledhur urgjentisht për të miratuar ose jo arrestimin dhe kontrollin e banesës së ish-ministrit, u kthye në mënyrë të zgjuar në një proces hetimi dhe gjykimi ndaj prokurorëve, në një linjë politike të papërcaktuar mirë, që mban distancë nga ish-ministri, por pa e braktisur atë në fatin e tij: hetojeni, kontrollojeni, por nuk mund ta arrestoni.
Dy ditë më pas, Kuvendi do të miratojë në seancë plenare këtë vendim dhe Saimri Tahiri do të jetë i lirë për të përgatitur mbrojtjen e tij, pikë së pari, brenda Partisë Socialiste, dhe më pas, nëse do të mbajë të pazbehur mbështetjen politike, gjykatat shqiptare nuk do të mund t’i bëjnë asgjë më, sepse, ndërkohë qeveria do të ushtrojë privilegjet e vetingut dhe atyre prokurorë dhe armiqve politikë mund të mos u mbetet më as hija.

***
Pas tre ditësh arrestim (afati ligjor është 48 orë) në Policinë e Tiranës, Dritan Zagani pret vizitë nga një avokat penalist, ndoshta i thirrur nga ndonjë koleg, i cili e informon se është arrestuar për shpërdorim detyre dhe dyshim për bashkëpunim me grupe kriminale dhe më pas e shoqëron në Gjykatën e Krimeve të Rënda, ku ligjërohet arrestimi.
Për gjashtë muaj e tetë ditët e ardhshme Dritani do të mbetet në qeli në pritje të kotë që ndokush, prokuror apo hetues, t’i drejtojë ndonjë pyetje. Ndërkohë, pasi ndryshoi avokat, arrin të paktën të zbulojë se “grupet kriminale” me të cilët kishte bashkëpunuar ishin oficerët e Guardia di Finanza, të pranishëm në Shqipëri si pjesë e një misioni në ndihmë të policisë shqiptare.
Pas një tjetër viti në arrest, dhe pas shumë “këshillimesh përkujdesëse” për shëndetin e familjes së tij, duke parë që procesi i tij, ndërkohë i kaluar nga Prokuroria e Krimeve të Rënda në atë të Fierit dhe i mbajtur në këmbë vetëm me akuzën e shpërdorimit të detyrës, po zhvillohet shumë ngadalë dhe pa asnjë garanci, Dritani merr familjen e tij dhe ikën në Zvicër, ku kërkon dhe përfiton nga qeveria zviceriane statusin e refugjatit politik, pra, statusin e personit që arratiset nga vendi i tij për t’i shpëtuar persekutimit për arsye politike.

***
Saimir Tahiri feston së bashku me mbështetësit e tij që e thërrasin në rrugë, aspak të lëkundër nga pesha e akuzave, hyn në makinën e tij luksoze dhe në apartamentin e tij lëshohet në selfie festive me figura të njohura të medias-fotot tregojnë si luksin e Saimir Tahirit edhe nivelin e lartë të atyre që ishin në ankthin e pritjes për të.
Por tani topi është në fushën e Prokurorisë Antimafia të Katanias, e cila vazhdon hetimet e saj të kujdesshme. Për të mbrojtur Tahirin dhe, me të, të gjithë zinxhirin e pushtetit, qeverisë shqiptare do t’i duhet të përunjet për të marrë në mëshirë pandëshkueshmëri faktike dhe për të shmagur daljen e informacioneve të tjera të sikletshme për të, të cilat do të ushqenin publikun dhe një opozitë përherë e më të nxehur dhe më të uritur.

***
Në praktikë diferencën, nëse e keni vënë re, e bën pushteti. Dinjiteti, përkundrazi, nuk blihet me Mastercard.

“Exit.al”

Kompania koncesionare e “Check-Up” ka përfituar rimbursim të tvsh-së në vlerën e 2.3 milionë dollarëve. Në raportin e KLSH thuhet se rimbursimi është kryer nga Fondi i Sigurimit të Detyrueshëm të Kujdesit Shëndetësor. Ky fond, ka dhënë ndaj firmës me pronare Vilma Nushin, e cila ofron shërbimin e kontrollit bazë në shëndetësi, 2.3 milion dollarë rimbursim për tatimin mbi vlerën e shtuar.
KLSH thotë se kthimi i këtyre parave është bërë në mënyrë padrejtë. Në një tjetër raport të KLSH, thuhet se organi kompetent që vlerëson nëse një kompani është subjekt i rimbursimit të tvsh-së apo jo, është vetëm Drejtoria e Përgjithshme Tatimeve.
Në kontratën e shtetit me kompaninë e “Check-Up” nuk qartësohet nëse ky subjekt është i përjashtuar apo jo nga tvsh, ndërsa në ligjin “Për tatimin mbi vlerën e shtuar” në Shqipëri, subjektet që ofrojnë shërbime në fushën shëndetësore janë të përjashtuara nga tvsh-ja.
Në rast se kompania e Vilma Nushit është e përjashtuar nga tvsh, atëherë përfitimi i këtyre parave është bërë në mënyrë të jashtëligjshme. Për të zbardhur këtë çështje, KLSH i është drejtuar Tatimeve me një letër për të saktësuar kontratën e Vilma Nushit.

Një grusht i fuqishëm koncesionesh pritet të jepen nga qeveria në nisje të vitit 2018. Janë plot 8 koncesione shifrat e tyre secila kapin qindra miliona euro. Këto konçesione kanë një destinacion të vetëm ashtu si edhe të mëparshmet që janë dhënë nga Rama në katër vitet që shkuan, të pasurojnë xhepat e tij dhe të klientëve të tij.
Qeveria ka deklaruar se do të shtrijë më tej politikën e partneritetit publik-privat. E në fakt në buxhetin e vitit 2018 janë parashikuar 8 kontrata të reja, nga të cilat 1 në sektorin e arsimit, 1 në sektorin e shëndetësisë dhe 6 në sektorin e transporteve. Në total, për vitin 2018 parashikohet të lidhen kontrata PPP në vlerë rreth 156,7 miliardë lekë, raporton portal ekonomik Scan. Këto kontrata do të jenë të shtrira në vite, çka bën që vlera e tyre të jetë e lartë.
Referuar tabelës shoqëruese të projektbuxhetit 2018, gjatë vitit 2018 në sektorin e arsimit është parashikuar kontrata për ndërtimin e shkollave në arsimin parauniversitar në Bashkinë e Tiranës me vlerë 6,440,000,000 lekë. Në sektorin e shëndetësisë, është parashikuar lidhja e kontratës për ndërtimin dhe mirëmbajtjen e Spitalit Rajonal të Fierit, me vlerë 9,598,120,000 lekë.
Në sektorin e transporteve është parashikuar lidhja e kontratave për Ndërtimin dhe Operimin e aksit Tiranë-Thumanë-Vorë me vlerë 34,307,000,000 lekë, për Ndërtimin dhe Operimin e Rrugës Kardhiq-Delvinë me vlerë 8,652,000,000 lekë, për Ndërtimin dhe Operimin e Rrugës Kashar-Rrogozhinë me vlerë 41,580,000,000 lekë, për Ndërtimin dhe Operimin e Rrugës Milot-Balldren me vlerë 14,280,000,000 lekë, për Ndërtimin dhe Operimin e Rrugës Orikum-Himarë me vlerë 17,808,000,000 lekë dhe Ndërtimi dhe Operimi i Rrugës së Arbrit me vlerë 24,052,000,000 lekë.
Lista e Kontratave Koncesionare/PPP aktive ekzistuese është rreth 504,8 miliardë lekë. Në total, lista e kontratave ekzistuese dhe e kontratave të parashikuara për vitin 2018 arrin vlerën rreth 661,6 miliardë lekë. Këshilli i Ministrave ka vendosur ndërkohë shfuqizimin e vendimit që pezullonte përkohësisht procedurat e prokurimit publik. Vendimi i datës 5 korrik 2017, kërkonte që të gjitha njësitë e qeverisjes qendrore dhe autoritetet kontraktore në varësi të tyre të mos hapnin më tendera apo koncesione publike deri në një njoftim të dytë.
Nga rregulli përjashtoheshin kontratat e nënshkruara para hyrjes në fuqi të vendimit, prokurimet për blerjet me vlerë të vogël. Ndërsa prokurimet me vlera të mëdha në raste të veçanta dhe për nevoja urgjente mund të nisnin procedurën vetëm me miratimin e Kryeministrit. Vendimi i atëhershëm u pa si një mjet për të kontrolluar shpenzimet dhe tenderimet abuzive në një moment tranzitor në krijimin e qeverisë së re, kur 7 portofole ministrore ishin nën drejtimin e Partisë Demokratike dhe 4 nën drejtimin e Lëvizjes Socialiste për Integrim.

Përurimi i memorialit të Azemit në vendlindjen e tij kishte një simbolikë të fortë politike. Një betim tek simboli i përmbysjes së diktaturës komuniste për të përmbysur sot diktaturën e krimit. Kanë kaluar 27 vite nga dhjetori ’90 dhe vendin e shpresë së madhe e ka zëvendësuar zhgënjimi i madh ku vendi qeveriset në koalicion me klanet ordineve të mafias së drogës.
Opozita është shpresa njësoj si atëhere dhe vendimet nuk do të jenë të lehta.
Kryetari i PD, Basha dhe ish-Kryeministri Berisha shprehën para shtatores së Azem Hajdarit se me të njëjtën forcë që tribuni i lirisë dhe demokracisë ngriti gjithë rininë shqiptare e më pas gjithë shqiptarët kundër regjimit, PD do të vijojë deri në fund betejën për t’i kthyer Shqipërinë shqiptarëve. Basha paralelizoi idealet e Azem Hajdarit si frymëzim për Partinë Demokratike, e cila sot në gjurmët e idealeve të tij në çlirimin e Shqipërisë nga kthetrat e klikës në pushtet. “Ata që ngrihen dhe përballen për kombin, lirinë dhe dinjitetin e bashkëqytetarëve të tyre, mbeten të pavdekshëm në altarin e lirisë dhe frymëzim për brezat. I tillë është Azem Hajdari. Sot në këto ditë të erreta ku krimi është bërë njësh me qeverinë, Azem Hajdari është frymëzim për çdo shqiptar, për çdo të ri, për t’u ngritur dhe përballur me të keqen, për të luftuar dhe fituar për një Shqipëri të drejtë, të ndershme e të begatë”, tha Basha.
Tropoja u ngrit në këmbë dje, për të pritur djalin e saj, tribunin që ajo rriti në trojet e saj. Azem Hajdari u përjetësua dje në vendlindjen e tij. Një shtatore madhështore 5 metra e lartë, e punuar me mjeshtëri nga skulptori i njohur Isa Baliaj nga sot lartëson imazhin e Azem Hajdarit në siluetën e pamjen e tij të vendosur drejt betejës për të ndërtuar Shqipërinë e shqiptarëve, Shqipërinë si gjithë Europa. Një zotim, të cilin dje para tij e shprehu vendosmërisht kryetari i PD, Lulzim Basha, ish-kryeministri Berisha, vajza e tij Rudina Hajdari, e gjithë përfaqësuesit e Partisë Demokratike. Dje, demokratët u bashkuan në Tropojë për të përuruar shtatoren madhështore të Azem Hajdarit. Shtatorja është e vendosur në sheshin kryesor të qytetit në një sipërfaqe prej 7 mijë metra katrorë. Në ceremoninë e përurimit të shtatores, ishin të pranishëm kryetari i Partisë Demokratike Lulzim Basha, ish-lideri historik Sali Berisha, kryetarja e Lëvizjes Socialiste për Integrim, Monika Kryemadhi, deputetë demokratë, pesonalitete dhe të afërm të familjes Hajdari.
Shqipëria e krimit, e drogës, korrupsionit dhe mjerimit, thërret Azem Hajdarin dhe forcën e qëndresës së tij për të mposhtur edhe njëherë ashtu si 27 vite më parë regjimin famëkeq hoxhist. Një tjetër regjim është instaluar në vend, njëlloj i rrezikshëm dhe nënshtrues si ai hoxhist. Krimi i organizuar ka marrë frenat e shtetit dhe drejton çdo sektor në vend, duke shkelur njerëzit e thjeshtë, duke i lënë pa bukë, pa punë e pa nder, e duke i larguar masivisht jashtë kufijve të vendit. Sot, shqiptarët janë në luftë për mbijetesë, ndërsa pushteti majmet me paratë e drogës dhe krimit, duke shkatërruar çdo aset publik.
Në fjalën e tij kreu i PD-së, Lulzim Basha, tha se duke i prirë betejës së madhe dhe heroike për lirinë e të gjithëve, Azemi Hajdari ka fituar përjetësinë. “Demokratët janë dhe do të jenë përherë mirënjohës dhe krenarë me prijësin e tyre të orëve të para, me tribunin e tyre të pavdekshëm. Si heroi i demokracisë Azemi i përket gjithë Shqipërisë, i përket gjithë kombit. Sa më shumë shkon koha, Azem Hajdari fiton përmasat e një figure politike të papërsëritshme, që afron, që bashkon, që frymëzon me shembullin dhe veprën e tij. Shqiptarët i detyrohen shumë me mirënjohje dhe nderim për gjithçka bëri e dha për lirinë e të gjithëve ne. Duke i prirë betejës së madhe fisnike dhe heroike për lirinë e të gjithëve, Azemi fitoi përjetësinë. Ky është fati i luftëtarëve të lirisë. Kjo përmendore që ngrihet sot në nderim të tij është vetëm njëra prej përmendoreve në mbarë vendin, në mbarë kombin”, tha Basha. Kreu i opozitës Lulzim Basha, e ka cilësuar figurën e Azem Hajdarit, si frymëzim për çdo shqiptar dhe shqiptare për t’i bërë ballë dhe për t’i thënë stop të keqes që ka kapur vendin. Pas përurimit të shtatores së Azem Hadarit në Bajram Curri, kreu i PD-së, Basha ka shkruar në Facebook, se Tribuni i Demokracisë, vijon të jetë pikë frymëzimi për shqiptarët për të luftuar çdo të keqe.
Rudina Hajdari e prekur, por dhe e vendosur njëkohësisht foli për të njëjtin zotim që ajo bashkë me Partinë Demokratike do të çojnë përpara në realizimin e ëndrrës së Azem Hajdarit për Shqipërinë e shqiptarëve dhe Shqipërinë europiane.
“Ky bashkim idealesh dhe perspektive europiane na bën më të fortë dhe roli ynë në rajon do të jetë gjithnjë e më i madh! E frymëzuar nga idealet demokratike për të cilat luftoi dhe ja përkushtoi jetën Azem Hajdari dhe e mbështetur nga të gjithë shqiptarët e mi që më zgjodhën deputete për t’u ulur në karrigen ku ishte ulur babai im, zotohem se do të qëndroj gjithmonë në ballë të përpjekjeve për të mbrojtur dhe mbështetur interesin e kombit tim dhe shqiptarëve kudo”, tha Rudina Hajdari.
Ndërsa ish-kryeministri Sali Berisha, tha se duhet të luftojnë për të bërë realitet ëndrrën e Azem Hajdarit për një Shqipëri europiane, në një situatë të vështirë ku sipas tij, tashmë ndodhet Shqipëria për shkak të krimit dhe drogës. “Ndaj dhe sot, ai është një apel, një frymëzim, sepse pas 27 vitesh, nuk mund të mos mohojmë se një vello e zezë ka mbuluar Shqipërinë dhe kjo vello e zezë është velloja e narkotikëve, e cila bën shqiptarët të mos marrin dot vendimet e tyre, bën votën e shqiptarëve të mos vendosë për fatin e tyre, bën emrin e tyre të mos shkëlqejë midis kombeve të tjera. Por sot ne jemi këtu, më të vendosur se kurrë, të frymëzuar nga Azem Hajdari për t’u ndarë dhe nga kjo e keqe, për t’u ndarë nga çdo e keqe që nuk meritojmë, për të ecur të sigurtë drejt hapësirave europiane që ne meritojmë”, është shprehur Berisha.
Nga ana e saj, kryetarja e LSI Kryemadhi vlerësoi se, Azem Hajdari nuk u tremb kurrë nga pengesat dhe nuk hoqi kurrë dorë nga betejat. “Rruga drejt demokracisë ka pengesat e veta dhe Azemi ishte një nga ata që i kapërcente ato. Herë me lehtësi, herë me vështirësi. Por ai nuk u tremb kurrë nga pengesat”, u shpreh ajo.

A.Shahini