Kryetari i PD, Lulzim Basha ka reaguar ashpër për helmimin e 60 nxënësve në Shupenzë të Dibrës. Në një njoftim për mediat, Basha uron për shërim sa më të shpejtë të të rinjve që po marrin mjekim në spital dhe shpreh revoltën për pasigurinë e ambienteve që vënë në rrezik shëndetin e nxënësve në shkolla.
“Po ndjek nga afër gjendjen e nxënësve të gjimnazit të Shupenzës, të asfiksuar në orën e mësimit nga gazi karbonik. Duke ju uruar shërim sa më të shpejtë të rinjve që po marrin mjekim në Bulqizë dhe Peshkopi si dhe për nxënësen e sjellë në Tiranë në gjendje më kritike se të tjerët, shpreh keqardhjen dhe revoltën për pasigurinë e ambienteve që vënë në rrezik shëndetin e nxënësve në shkolla. Investimet në shkolla nuk mund të bëhen pjesë e babëzisë qeveritare qëndrore apo lokale. Deputeti i Partisë Demokratike, Xhemal Gjunkshi, ndodhet në Dibër për të qenë pranë nxënëseve dhe familjarëve të tyre dhe për të marrë informacion të detajuar mbi përgjegjësit e asfiksimit të 60 nxënësve të Shupenzës”, shprehet Basha.

Ish-kryeministri Berisha ka reaguar pas publikimit të lajmit se, ish-ministri i Brendshëm, Saimir Tahiri është larguar drejt Gjermanisë. Në një postim në Facebook, Berisha shkruan se, Saimir Trafiku u arratis nga Rama për të shpëtuar lëkurën e tij dhe të vëlla Olsit.
“Noriega arratis Saimir Trafikun!
Pasi e kërcënoi Tahirin me kokën e tij dhe të djalit 5 vjeç për t’i mbyllur gojën, Edi Rama, për të shpëtuar lëkurën e tij dhe të vëlla Osit, e nisi Saimir Trafikun në arrati. Të gjithë në këmbë për të rrëzuar sa më parë regjimin e Noriegës!!”, shkruan Berisha.
Ditën e djeshme “Top Channel” publikoi lajmin se, ish-ministri Tahiri është nisur drejt Gjermanisë, ndonëse është nën hetim nga Prokuroria e Krimeve të Rënda. Avokati i tij, Maks Haxhia është shprehur se, nuk ka dijeni për lëvizjen e ish-ministrit të Brendshëm.

Ish-Kryeministri Berisha ka reaguar pas ngjarjes së rëndë të helmimit të 60 nxënësve në shkollën e Shupenzës. Në një reagim në Facebook, Berisha shkruan se, për Noriegën fëmijët e Bulqizës thjesht nuk ekzistojnë. Madje ata janë fajtorë për lajmin e keq që prodhuan!
“Të dashur miq, fëmijët e Bulqizës nuk janë gica, por vogëlushë të dashur për çdo prind, fëmijë, të ri e të moshuar, për çdo shqiptar. Në këtë kontekst lajmi për helmimin e tyre ishte tronditës për mbarë shqiptarët. Për më tepër, ata u helmuan kolektivisht në institucionin ku duhet të ishin më të sigurtë se kudo tjetër pas familjeve të tyre. Ata u helmuan në shkollën e tyre dhe në këtë kontekst kemi të bëjmë me një krim shtetëror pa dashje.
Them pa dashje se nuk ekziston asnjë e dhënë për veprim keqbërës kriminal të qëllimshëm.
Duke iu uruar vogëlushëve shërim të shpejtë dhe të plotë, dënoj me ashpërsinë më të madhe qëndrimin cinik, çnjerëzor, amoral të Noriegës, i cili në një akt amoraliteti ekstrem nuk ka thënë një fjalë të vetme për fëmijët e Bulqizës në koprokalinë e sotme shumë orëshe të tij.
Ai, jo që nuk shkoi vetë apo nuk dërgoi atje ndonjërën nga ndrikullat e kabinetit për të parë në vend dramën dhe mbështetur viktimat, por përkundrazi! Edi Rama, si për t’iu thënë fëmijëve të Bulqizës paçi fatin tuaj se mua nuk më lidh gjë me ju, bëri sikur fëmijët e Bulqizës nuk ekzistonin dhe shkoi e bëri show në një shkollë me nxënës, natyrisht jo të helmuar.
Dënoj me ashpërsinë më të madhe këtë qëndrim cinik të Noriegës dhe i bëj thirrje Prokurorisë të vendosë përpara ligjit përgjegjësit e këtij akti të rëndë kriminal”, shkruan Berisha.

Nga hetimet e Prokurorisë rezulton se, ish-ministri i Brendshëm, Saimir Tahiri në vitin 2014 ka udhëtuar 4 herë drejt Italisë nën shoqërinë e Artan Habilaj, vëllai i të arrestuarit Moisi Habilaj. “Me datë 16.08.2014, 30.08.2014, 29.08.2014, 08.08.2014, personi në hetim Saimir Tahiri udhëton dhe përdor mjetin me targa AA 003 GB, i cili sipas aktit të shitjes rezulton të jetë shitur me datë 05.11.2013. Në këto udhëtime, rezulton që personi në hetim Saimir Tahiri ka qenë i shoqëruar nga subjektet e tjera të dyshuara Artan Habilaj, etj”, thuhet në njoftimin e Prokurorisë.
Tahiri i ka siguruar Habilajve paprekshmërinë e veprimtarisë kriminale.
Këto udhëtime, Tahiri i bie t’i ketë bërë gati një vit, pasi deklaroi se e ka shitur këtë makinë. Në 2015-ën, ish-ministri tha se në vitin 2013 ua shiti makinën kushërinjve të largët. Tahiri shfaqet sërish në prani të Habilajve në Vlorë në vitin 2016.
Të dyja këto dokumente i janë vënë në dispozicion Prokurorisë për Krimeve të Rënda, mbrëmjen e së mërkurës nga autoritetet italiane, dhe konsiderohen si prova të forta për implikimin e Tahirit në veprimtarinë e grupit kriminal.
Mbi bazën e tyre dhe jo vetëm, Prokuroria vendosi t’i kërkojë Kuvendit heqjen e imunitetit dhe autorizimin për arrestimin e tij. Mësohet se komunikimi ka qenë tejet sekret dhe vetëm mes Antimafias së Leçes dhe disa prokurorëve të Krimeve të Rënda, për të shmangur dekonspirimin e të dhënave.
Po ashtu, Prokuroria thotë se, nga hetimet është arritur të zbulohet se, “personi në hetim Moisi Habilaj dhe bashkëpunëtorët e tij kanë bashkëpunuar me zyrtarë të lartë të Policisë së Shtetit, ku si person i dyshuar është dhe ish-ministri i Brendshëm, personi në hetim Saimir Tahiri. Personi në hetim Moisi Habilaj në bashkëpunim me persona të tjerë, duke përfituar nga lidhjet e ngushta me ish-ministrin e Brendshëm dhe kundrejt shpërblimeve kanë arritur të bëjnë të mundur kultivimin e sasive të konsiderueshme të lëndës narkotike, transportimin e tyre në mënyrë të organizuar me destinacion jashtë vendit. Në dijeni të këtyre detajeve dhe me veprime aktive dyshohet të ketë vepruar dhe ish-ministri i Brendshëm Saimir Tahiri, i cili ka siguruar paprekshmërinë e veprimtarisë kriminale të grupit të strukturuar kriminal”.
Përfitimet monetare shkonin direkt te ish-ministri Tahiri. “E gjithë veprimtaria kriminale mbështetej në bashkëpunimin e grupit kriminal me strukturat e Policisë së Shtetit, ku përfitimet direkte monetare shkonin tek ish-ministri i Brendshëm, Saimir Tahiri”.

Ish-kreu i Hipotekës së Kavajës, Said Çikalleshi, i përfshirë në skandalin me pronat në Spille, kërkon të bashkëpunojë me drejtësinë, në këmbim të gjykimit të shkurtuar. Një ditë pas vetëdorëzimit në Policinë e Kavajës, Seid Çikalleshi, ish-kryeregjistrues i Hipotekës së qytetit bregdetar ka kërkuar gjykimin e shkurtuar nga organet e drejtësisë.
Çikalleshi ka pranuar të bashkëpunojë, duke u vënë në dispozicion të Prokurorisë për të shpjeguar mënyrën se si ka funksionuar transaksioni i pronave ranishte në zonën e plazhit të Spillesë. Sipas organit të akuzës, janë tjetërsuar rreth 36 ha tokë në zonën bregdetare, ndërsa falsifikimi i pronave kishte filluar prej vitit 2000. Për këtë çështje, janë nën hetim 11 persona të prangosur, për 8 nga të cilët Gjykata ka caktuar, masat e sigurisë, arrest me burg.
ABC News ka siguruar një pjesë të deklarimeve të të pandehurve në Prokurori, ku rasti më tipik është ai i familjarëve të ish-nënprefektit të Tiranës, Fatos Kaja. Nga deklarimet e personave të marrë në pyetje lidhur me hetimet për këtë dosje, vihet re se pjesa më e madhe e atyre që kanë fituar tokë ranore në Spille, sipas kësaj skeme, i kanë dhënë Ilir Kajës vetëm kartën e identitetit.
Pas vitit 2011, sqarohet nga Prokuroria, përfituesit e pronave thjesht ishin paraqitur tek noterët për të bërë transaksione, me persona që nuk i kishin takuar apo njohur më parë.
“Nga thëniet sqarohet se kanë marrë tokë në mënyrë të kundraligjshme, persona, të cilët ose nuk kanë bërë kërkesë për marrje toke siç është rasti Hekuran Kaja, ose kanë kërkuar tokë, por nuk kanë dijeni se komisioni i ka pajisur me tokë dhe nëpërmjet mashtrimit, iu është kaluar disa personave të tjerë siç është rasti Dritan dhe Nas Tani. Toka e përfituar në këto pasuri, është dhënë jashtë kritereve ligjore të përcaktuara në Ligjin 7501”.
Përfituesi më i madh i tokave ranore, sipas Prokurorisë është Fatos Kaja me 51 mijë metra katrorë, i cili ka qenë edhe kryetar i komunës Kryevidh. Ndërkohë që, familjarët e ish-kryebashkiakut të Kavajës kishin përfituar afërsisht 11 mijë metra katror tokë.
Të shtunën pritet të dalin para gjykatës për caktimin e masës së sigurisë edhe drejtori i ALUIZNI -t Kavajë, si dhe dy ish–zyrtarë të Komunës Kryevidh, të arrestuar gjatë operacionit policor “Ranishtja”.

Një person, i cili vuan dënimin në burgun e Fierit është dhunuar nga gardianët në institucionin e vuajtjes së dënimit, ndërkohë që ngjarja është mbajtur larg vëmendjes së mediave nga institucionet. Është Komiteti Shqiptar i Helsinkit që bën publike ngjarjen, pas shqetësimit të shprehur pranë KShH nga e ëma e të dënuarit me iniciale T.D.. Sipas paraqitjes së ngjarjes nga KShH, vihet re një tendencë e fshehjes së episodit nga institucioni i vuajtjes së dënimit. Ndërkohë, Shërbimi i Kontrollit të Burgjeve ka nisur një hetim lidhur me ngjarjen.

Kontrolli në qeli

Komiteti Shqiptar i Helsinkit (KShH) bën me dije, se u njoftua nga e ëma e të dënuarit T.D., i cili është duke vuajtur dënimin në burgun (IEVP) e Fierit, se djali i saj është keqtrajtuar nga punonjësit e sigurisë në këtë institucion. KShH e vlerësoi njoftimin e mësipërm dhe e verifikoi gjendjen në vend, më dt. 16.11.2017. Në përbërje të grupit të vëzhgimit të KShH-së ishte edhe një mjek ligjor.
Gjatë këtij verifikimi rezultoi se më dt. 14 nëntor 2017, rreth orës 12:00, i dënuari ndodhej në ajrim së bashku me të burgosurin tjetër, me të cilën bashkëjeton në të njëjtën dhomë, në sektorin e observimit. Në këtë kohë, i dënuari është thirrur nga Grupi i Sigurisë për të ushtruar kontroll në dhomën e tij.

Dhuna

Kontrolli i mësipërm nuk zbuloi asnjë send të ndaluar. Për shkak të kontrollit ka nisur një konflikt që sipas të dënuarit vijoi me keqtrajtimin e tij, ndërsa sipas informacionit të institucionit ku pasqyrohen konkluzionet e kontrollit dhe Raporti i Shërbimit ndaj të dënuarit, rezulton se ai ka ofenduar një ndër specialistët e Grupit të Sigurisë. I dënuari pretendon se pas konfliktit verbal, u mor nga Grupi i Sigurisë dhe u vendos në një nga dhomat e veçimit, ku është goditur në pjesë të ndryshme të trupit, shenjat e të cilave janë konstatuar edhe nga ekzaminimi i jashtëm i ekspertit të angazhuar të KShH-së (grupi monitorues).
Nga ky ekzaminim u konstatuan 5 dërmishtje nën nivelin e artikulacioneve të gishtërinjve të dorës së djathtë, një dërmishtje gjatësore në trajtë shiriti në pjesën e brendshme të kyçit të dorës së djathtë dhe ekimoza në pjesën e mesme të brendshme të parakrahut të majtë dhe të djathtë. Në kofshën e djathtë, në nivelin e 1/3 të mesme u konstatua një zonë tjetër ekimotike, me përmasa më të mëdha.
Vlen të përmendet se mjeku i institucionit deklaron se nuk ka patur informacion për këtë ngjarje, ndërsa në Kartelën Klinike nr. 2053, më dt. 14.11.2017 (dita e ngjarjes) përmendet shkurtimisht se i dënuari është dërguar urgjentisht në Spitalin e qytetit të Fierit, me pretendimin e tij se ka gëlltitur disa copa qelqi të një ampule të thërrmuar të gjetur në tualetin e dhomës. Nga verifikimi i kartelës nuk rezulton të ketë shënime lidhur me shenjat e verifikuara si më sipër, si nga mjeku i institucionit ashtu edhe nga eksperti mjeko-ligjor të dërguar për ekzaminim nga Shërbimi i Kontrollit të Burgjeve (ShKB).
Mospasqyrimi në kartelë, i vizitës që është kryer nga eksperti mjeko-ligjor i ShKB-së, bie ndesh me detyrimin për dokumentimin e veprimit dhe gjendjes. KShH e konsideron pozitive reagimin e menjëhershëm të ShKB-së dhe kryerjen e veprimeve të para hetimore, në funksion të detyrës ligjore të Policisë Gjyqësore.

Rast i përsëritur

Pavarësisht këtij fakti, KShH reagon publikisht për këtë verifikim, sepse raste të tilla janë të përsëritura. Kështu psh., më dt. 30.09.2017 është keqtrajtuar i dënuari V.G, në burgun e Peqinit dhe kjo çështje është në hetim penal. KShH u bën thirrje organeve përkatëse dhe veçanërisht drejtuesve të burgjeve që të marrin masa parandaluese, përfshirë edhe rritjen e ndjenjës së sigurisë për të gjithë të paraburgosurit dhe të burgosurit në Institucionet e Ekzekutimit të Vendimeve Penale. Personeli i burgjeve ka detyrimin ligjor të denoncojë çdo akt dhune, edhe kur kjo dhunë është ushtruar nga kolegët e tyre. Moskallëzimi i krimit dënohet penalisht sipas Kodit Penal.