Milan Skriniar është një nga blerjet më të suksesshme të këtij sezoni, teksa me formën e tij të mirë ka ndihmuar Interin në ecurinë pozitive të fillim-sezonit. Mbrojtësi i ka bindur të gjithë me paraqitjet e tij, ndërsa po befason edhe me rolin si shkatërrues, ku është provuar shpesh te kombëtarja sllovake. Skriniar ka përfunduar në radarët e disa skuadrave të mëdha europiane, mes të cilave Barcelona, që po tregon një interes të fortë, për mbrojtësin zikaltër.
“Nuk di asgjë për interesin e Barcelonës dhe nuk dua t’ia di. Për momentin, në mendjen time është vetëm Interi dhe bashkë me djemtë e tjerë, duam ta rikthejmë këtë skuadër atje ku e meriton të jetë”, tha sllovaku.
Mbrojtësi zikaltër foli edhe për takimin e të dielës në mbrëmje, ku në ‘San Siro’ do të vijë Atalanta, ndërsa tifozët do të mbushin sërish shkallët e stadiumit. “Me Atalantën nuk do të jetë aspak e lehtë, por duhet të fitojmë për të ruajtur ecurinë pozitive dhe për të shpërblyer tifozët, që po tregojnë një besim tepër të madh ndaj nesh. Po përgatitemi si duhet dhe jemi të gjithë gati të kthehemi te fitorja, që të dielën në mbrëmje”, u shpreh qendërmbrojtësi i Interit.
Milan Skriniar ka shijuar shpesh edhe komplimentet publike të trajnerit të Interit, Luciano Spalletti, i cili ishte i pari që besoi te sllovaku dhe i dha një fanellë titullari. “Më vjen mirë për fjalët e Spallettit, sepse kjo do të thotë që nuk e kam zhgënjyer as atë dhe asnjë në ambientin zikaltër. Ai ishte i pari që besoi te unë dhe po na ndihmon shumë të rritemi. Duam të qëndrojmë në vendet e para të renditjes, ndonëse e dimë që do të jetë e vështirë”, deklaroi Milan Skriniar.
Ndërkohë, trajneri i Kombëtares së Meksikës, Juan Carlos Osorio, ka zbuluar si mbrojtësi i Tottenham, Davinson Sanchez, e kishte refuzuar Barcelonën, duke u bazuar në këshillën e tij. Sanchez zgjodhi të kalonte te Ajaxi dhe jo te Barcelona në bazë të këshillës së marrë nga atëherë trajneri i tij në Atletico Nacional, Osorio.
Osorio e zbuloi Sanchezin si 17-vjeçar në Kolumbi dhe i ndihmoi të zhvillohet në skuadrën Atletico Nacional. Forma e tij më pas bëri që shumë skuadra evropiane të interesoheshin për të, përfshirë edhe Barcelonën, sipas Osorios.
“Mbaj mend kur më thirri në telefon dhe më pyeti nëse duhet të shkonte në Ajax apo Barcelonë, e cila ishte e interesuar për të, po ashtu. Mendova se gjëja më e mirë për të ishte të luante futboll, dhe mbase në Barcelonë nuk do të kishte hapësirë për të luajtur, do të ishte zëvendësues. Kjo është ajo çka vendosi ai dhe shkoi në Holandë. Luajti një sezon shumë të mirë atje dhe më pas iu bashkua Tottenhamit”, ka thënë Osorio.

Hoffenhaimi konfirmon dëshirën e Sandro Wagner për t’u rikthyer tek Bayerni i Mynihut. Sulmuesi e ka nisur karrierën e tij tek bavarezët, në ekipin e të rinjve dhe pas më shumë se një dekade, dëshiron të kthehet te klubi i tij i parë.
Duke mos pasur mundësinë të ishte pjesë e ekipit të parë të bavarezëve, në vitin 2008 ai u transferua tek Duisburg, për të vazhduar më pas karrierën e tij në disa klube të kampionatit gjerman, përpara se të firmoste me Hoffenheimin, në 2016-ën.
Dëshirën e futbollistit 29-vjeçar për t’u kthyer në qytetin e lindjes, e konfirmoi trajneri i bardhebluve, Julian Nagelsmann, i cili sezonin e kaluar e cilësoi Wagnerin si një prej lojtarëve kyç në arritjen e vendit të katërt në Bundesligë.
Falë paraqitjeve me Hoffenheimin, Wagner debutoi dhe me kombëtaren e Gjermanisë, me të cilën në 7 ndeshje ka realizuar 5 gola. Gjithsesi, Nagelsman ka theksuar se përveç dëshirës së 29-vjeçarit, për t’u rikthyer te bavarezët, nuk ka asnjë lëvizje konkrete nga ana e kampionëve të Gjermanisë.
Ai shtoi se mosha e lojtarit mund të jetë një problem për realizimin e këtij transferimi, duke marrë parasysh rastin e lojtarëve të mëdhenj, si Ribery, të cilët pavarësisht kontributit të dhënë, nuk janë më të preferuar te Bayerni, pikërisht për shkak se janë në fundin e karrierës së tyre.

Javier Hernandez, i cili njihet si “Chicharito”, i shpreh besnikërinë e tij ekipit të West Hamit. Sipas mediave angleze, 29-vjeçari ka refuzuar ofertën e ardhur në drejtim të tij nga skuadra meksikane e Chivas-Guadalajara. “Chicharito” deklaroi se nuk ka aspak ndërmend të largohet nga Premier League gjatë merkatos së janarit, pasi në drejtimin e Moyes ndihet shumë mirë. Në fakt, formën e mirë që po kalon meksikani, pas rikthimit në Premier League, e konfirmojnë vetë shifrat. Ai është aktivizuar në 11 ndeshje të kampionatit, duke shënuar 4 gola.

Hatem Ben Arfa ka kohë që mendon largimin nga Paris Saint-Germain, me skuadrën franceze që mund ta lërë të lirë futbollistin që në janar, pavarësisht se kontrata e tij përfundon në qershor të 2018. 30-vjeçari nuk bën pjesë në planet e trajnerit Unai Emery dhe në rast se menaxherët e tij i sigurojnë një skuadër të re në dimër, atëherë francezet do ta linin të lirë të largohej në janar. Ben Arfa u bë pjesë e Parisit në verë të 2016-ës, për në sezonin e tij të parë me klubin kryeqytetas luajti në 23 ndeshje të kampionatit, në sezonin aktual nuk ka një minutë në këmbë, qoftë si zëvendësues.

Gjermania mund të bëjë “bis” në Kupën e Botës, që do të zhvillohet verën e ardhshme në Rusi. Kampioni i botës në fuqi me “Pancerat”, Jerome Boateng, ka shumë besim se skuadra e Joakim Lowe do të përsëritë suksesin e arritur në “Brazil 2014”.
“Jemi rritur në çdo repart, falë grumbullimit të lojtarëve të rinj, që janë shumë të uritur. Që kur jam në kombëtare, kemi mbrojtjen më të mirë, ndërsa në mesfushë jemi forcuar shumë me lojtarë të tillë si Goretzka e Can, ndërsa Sané ofron një alternativë më shumë. Jemi me shumë fat që në sulm është afruar Timo Werner”, u shpreh Boateng.
Përfaqësuesja e Gjermanisë ka pësuar ndryshime të shumta këto katër vitet e fundit. Joakim Lowe, nga 11-shja që triumfoi në Brazil (Neuer; Lahm, Hummels, Boateng, Howedes; Schweinsteiger, Kramer; Mueller, Kroos, Ozil; Klose) ka kaluar te formacioni që mposhti Azerbajxhanin në ndeshjen e fundit kualifikuese të “Rusi 2018” (Leno; Kimmich, Mustafi, Sule; Can; Brandt, Goretzka, Mueller, Sané; Stindl, Wagner). Me një fjalë, ndryshojnë futbollistët, por rezultatet janë po ato.

Zlatan Ibrahimoviç dhe Paul Pogba janë gati të rikthehen në fushë dhe të japin kontributin e tyre për skuadrën e Manchester United-it. Sulmuesi suedez dhe mesfushori francez, vijnë nga dëmtime të gjata dhe ditët e fundit i janë bashkuar grupit dhe kanë kryer të plotë ciklin stërvitor.
Mediat angleze raportojnë se Mourinho po merr në konsideratë që të ulë në stol dy yjet e skuadrës, që në sfidën e të shtunës përballë Newcastle-it, ndonëse duket e vështirë që të kenë minuta në dispozicion.
Plani i trajnerit portugez është aktivizimi gradual i tyre, për të mos rrezikuar dëmtim tjetër dhe për t’i pasur plotësisht të gatshëm në ditët e para të dhjetorit. Manchester United është duke zhvilluar një sezon mjaft të mirë, si në Champions, ashtu edhe në Premier League, ndërsa rikthimi i Pogbasë dhe Ibrës, do të jetë një vlerë e shtuar për skuadrën.