Goretzka dhe Emre Can, këta janë dy objektivat kryesorë të Juventusit në merkaton e janarit. Dy emrat në fjalë janë në skandencë kontrate me skuadrat respektive, Schalke 04 dhe Liverpool, por konkurrenca për të siguruar shërbimet e tyre është e madhe. Për Juventusin paraqitet një mundësi që nuk duhet humbur. “Janë dy lojtarë luksi me parametër zero, nuk mund ta fsheh që po e studiojmë me shumë kujdes situatën, si shumë skuadra të tjera”.
Kështu u shpreh Beppe Marota, një ditë më parë. Të vëzhgosh nuk të pengon njeriu, por në këtë rast duhet të dish të hidhesh në sulm në momentin e duhur. Juventusi, gjithsesi, ka treguar se di të tregohet një skuadër oportuniste. Për dy mesfushorët e Kombëtares gjermane interesimi është i madh nga klubet më në zë në Europë. Në janar apo në verë me parametër zero, kjo mbetet për t’u parë. Precedentët te Juvja janë të shumtë, që nga Pirlo, Pogba, Llorente, Evra, Khedira e Dani Alves.

Mediat spanjolle raportojnë se sulmuesi i Atletikos së Madridit, Antoine Grizman, ka filluar bisedimet me Barcelonën, për një transferim të mundshëm. Francezi është në krye të listës së dëshirave të katalanasve në merkaton e janarit. 26-vjeçari mori oferta deri në 100 milionë euro verën e kaluar, por transferimi i tij ishte i pamundur për shkak se merkato e Atletikos është pezulluar nga FIFA deri në janar të 2018-ës. Futbollisti rinovoi qershorin e shkuar kontratën me Atléticon e Madridit, që në teori do të ketë shërbimet e lojtarit deri në vitin 2022, me klauzolën e shitjes që nga 200 milionë euro, tashmë është përgjysmuar në shtator.
Mungesa e harmonisë mes lojtarit dhe klubit reflektohet edhe në deklaratat publike të numrit një të shoqërisë madrilene. Presidenti i “Los colchoneros”, Enrique Cerezo, iu kundërpërgjigj gazetarëve, duke i akuzuar se nuk arrijnë të kuptojnë notat e humorit të Grizmannit, por pavarësisht deklaratës së tij, nuk është sekret se marrëdhënia ndërmjet sulmuesit dhe skuadrës së Simeones është e tensionuar.
Sezoni 2017/18 nuk e ka gjetur në lartësinë e viteve të mëparshme lojtarin francez, i cili ka shënuar vetëm 2 gola deri në javën e 11-të të kampionatit spanjoll. Përveç Barcelonës që mendohet të ketë nisur negociatat me përfaqësuesit e sulmuesit, edhe Manchester United-it është përfolur se është i interesuar për të nënshkruar me 26-vjeçarin.
Çelësi i marrëveshjes është arritja e një kompromisi me Atléticon, që mesa duket nuk ka ndërmend të marrë parasysh asnjë ofertë nën shifrën e klauzolës së shitjes, por blaugranat besohet se janë gati të ofrojnë 100 milionë eurot e domosdoshme për transferimin e asit francez.

Legjenda e Argjentinës, Diego Armando Maradona, e ka cilësuar dështimin e Italisë në eliminatoret e Kupës së Botës si “një nga mungesat më të mëdha” në historinë e futbollit ndërkombëtar. Katër herë kampionët e botës nuk arritën të marrin një vend në fazën finale, që do të zhvillohet vitin e ardhshëm në Rusi, pasi u eliminuan nga Suedia në “play off”, me rezultatin e përgjithshëm 1-0. Kanë kaluar 60 vjet nga hera e fundit, që Italia nuk ka luajtur në një kampionat botëror.
“Më vjen shumë keq, që Italia nuk do të jetë në Kupën e Botës. Italianët e bëjnë shumë tërheqëse këtë veprimtari dhe mendoj se kjo është një nga mungesat më të mëdha në historinë e kampionateve botërore, deklaroi Maradona. E pashë ndeshjen. Italia luajti ashtu si donte Suedia, me krosime. Suedezët kishin qendërmbrojtës gjigantë. Eshtë shumë e trishtë që nuk do e shohim Italinë në Rusi. Kjo tregon se eliminatoret po bëhen gjithnjë e më të vështira”, u shpreh Maradona.
Gjest përgjegjësie apo deligjitimimi i trajnerit? Ajo që Daniele De Rossi bëri gjatë sfidës Itali-Suedi, ku mesfushori i Romës refuzoi të hynte në fushë, duke kërkuar që në vend të tij të luante dikush që mund të shënonte, ka ngjallur diskutime.
Në mbrojtje të De Rossi-t ka ndërhyrë pikërisht një emër i madh i trajningut botëror, Joachim Low. Drejtuesi i Gjermanisë kampione në fuqi e botës ka komplimentuar lojtarin axurr: “Lexova se kishte refuzuar të hynte në lojë, sepse Italisë i duhej një sulmues, është treguar i madh”.
Trajneri i “Die Mannschaft”, në të kundërt nga Ballack që ironizoi eliminimin e Italisë, pranon: “Më vjen keq, që nuk do të jetë në Botëror. Mendoj se është diçka e trishtuar, por përgëzoj suedezët. U mbrojtën mirë. Për Italinë, ky mund të jetë një fillim i ri, disa lojtarë po e mbyllin karrierën e tyre, kam respektin më të madh për Buffon-in, Bonucci-n apo vetë De Rossi-n”.
Vetë protagonisti i ngjarjes, De Rossi, duke rishikuar veprimin e tij në fund të ndeshjes ka kërkuar falje: “I thashë trajnerit që duhet të fitonim, dhe përmenda emrin e Insigne, sepse në atë moment nevojiteshin sulmues, nuk e kisha me trajnerin, në fund bëra nxehmjen dhe mund të hyja edhe në fushë. Asnjë problem”.

Pas skualifikimit zhgënjyes në “San Siro”, i gjithë opinoni sportiv në Itali projekton një emër shumë të dashur për stolin e Kombëtares Italiane, pikërisht atë të Karlo Ançelotit. Por rruga që do të çonte drejt një po-je nga ana e 58-vjeçarit has në disa pengesa të vogla. Siç raporton e përditshmja “La Gazzeta Dello Sport”, vetë tekniku italian nuk do ta refuzonte kurrë rolin e “shpëtimtarit” për kombëtaren e vendit të tij dhe as do ta trajtonte atë si një çështje financiare, edhe pse, duke hipotezuar, një pagë prej 4 milionë eurosh sërish do të ishte një shifër shumë më e vogël nga ç’mund të fitonte në stolin e ndonjë klubi europian.
Gjithsesi, pengesë mund të jetë fakti se, tekniku është i prirur ta vijojë karrierën në Angli, ku ka patur sinjale nga Arsenali dhe Chelsea, opsione shumë joshëse për Ançelotin. Sidoqoftë, vështirësia e vërtetë nuk qëndron te trajneri, por tek fakti se për ta ringritur këtë kombëtare njeriut që do të marrë drejtimin e saj do t’i nevojitet një projekt dhe ide të reja.

Fillimisht premtoi se do të dorëhiqet, më pas e përgënjeshtroi. Por jo vetëm kaq, thotë madje se është trajneri më i mirë i Italisë në 40 vitet e fundit. I kontaktuar nga “Le Ienne” (gazetarët e një emisioni investigativ në Itali), gjatë fluturimit të tij nga Milano drejt Barit, Gian Piero Ventura nuk dëshiron të flasë, por diçka i shpëton nga goja. “Botërori pa Italinë? Po, do të jetë i shëmtuar, por unë çfarë mund të bëj? Për fat të keq, nuk u kualifikuam. E kam thënë edhe më parë, u kërkoj falje të gjithë italianëve për rezultatin sportiv. Statistikat e mia janë më të mirat e 40 viteve të fundit, kam humbur vetëm 2 ndeshje në dy vjet”, u shpreh Ventura.
Në realitet janë 3 humbje, 9 fitore dhe 4 barazime, sepse, përveç disfatës 3-0 në “Bernabeu” me Spanjën dhe humbjes 1-0 në ndeshjen play off me Suedinë, është edhe dështimi 1-3 me Francën në miqësoren e zhvilluar në Bari në debutimin e tij në krye të Kombëtares. “Kam shkruajtur historinë në njëfarë mënyre? Për fat të keq, po! A do të dorëhiqem? Po”, tha Ventura.
Giampiero Ventura ka marrë kohë, në pritje për t’u këshilluar me presidentin e Federatës Italiane të Futbollit, Carlo Taveçhio, një tjetër që ka vendosur gjithashtu të marrë kohë. Pas konferencës për shtyp ku i ka kërkuar falje italianëve për rezultatin negativ, trajneri i Italisë, në një video me gazetarët e “Le Iene”, ka pranuar se do të jepte dorëheqjen, por më pas ka përgënjeshtruar gjithçka. Por tani ka filluar të qarkullojë në internet një video, e realizuar në 2009-ën, me protagonist Giampiero Ventura. Në videon në fjalë, trajneri i “axurrëve”, në atë kohë në drejtim të Barit është në studiot e stacionit televiziv “Antenna Sud” për t’iu përgjigjur pyetjeve të tifozëve. Një nga pyetjet ka qenë nëse do të donte që një ditë të bëhej trajner i Italisë. Përgjigja e tij është ironike dhe emblematike: “Unë, trajner i Italisë? Do të duhej të arrestoheshin të gjithë ata të federatës…”. Një video kjo që merr një domethënie të veçantë pas dështimit kolosal të ekipit të Ventura-s. Një dështim, i parashikuar nga vetë trajneri.

Australia është përfaqësuesja e 31-të që siguron kualifikimin në finalet e Botërorit “Rusi 2018”. “Socceros” fituan 3-1 ndaj Hondurasit në sfidën e luajtur në “ANZ Stadium” të Sidney-t, teksa takimi i parë kishte përfunduar në barazim pa gola. Në pjesën e parë të dyja skuadrat u treguan të kujdesshme për të mos pësuar gol, por diferenca u bë në pjesën e dytë, me vendasit që kaluan në avantazh në minutën e 54-t me Jedinak direkt nga goditja e lirë. I njëjti autor shndërroi në gol një 11-metërsh në minutën e 72-të dhe, për të kompletuar një ndeshje të madhe për kombëtaren e tij, realizoi edhe golin e tretë në minutën e 85-të, po me 11-metërsh. Në minutat shtesë, Hondurasi realizoi golin e nderit me Elis, por që nuk vlejti për asgjë. Kjo është herë e pestë që Australia merr pjesë në finalet e Botërorit.

Ja 31 skuadrat e kualifikuara deri tani në finalet e Botërorin “Rusi 2018”:
Europa:
Rusia, Belgjika, Gjermania, Anglia, Spanja, Polonia, Islanda, Serbia, Portugalia, Franca, Kroacia, Suedia, Zvicra, Danimarka.
Amerika e Jugut:
Brazili, Uruguai, Kolumbia, Argjentina.
CONCACAF:
Meksika, Kosta Rika, Panamaja.
Afrika:
Egjipti, Senegali, Maroku, Tunizia, Nigeria.
Azia:
Irani, Japonia, Koreja e Jugut, Arabia Saudite.
Oqeania:
Australia.

Pas kualifikimit në Botërorin, Rusi 2018, kombëtarja e Suedisë e ka festuar pafund këtë moment tepër të veçantë dhe të rëndësishëm e për më tepër një kualifikim me peshë përballë një kundërshtari të madh. Festa nisi që në fushën e blertë, fill pas vërshëllimës së gjyqtarit.
Më pas, momentet e festimit u spostuan në dhomat e zhveshjes. Sigurisht në momente të tilla nuk mund të llogaritësh dëmet që mund të shkaktosh, sepse normalisht është gjëja e fundit që të shkon në mendje. Sidoqoftë gjesti i bërë nga ana teknikut të Suedisë, Janne Andersson është me të vërtetë për t’u duartrokitur.
Mediat e huaja kanë arritur të fotografojnë 55-vjeçarin teksa pastron dhomat e zhveshjes mbeturinat që kishin lënë pas lojtarët e tij në dhomat e zhveshjes. Sigurisht, pjesë e festimeve ka qenë edhe ai, por gjesti i bërë është vërtet i habitshëm. Një gjest ky për t’u duartrokitur. Veprim i radhë ku ndoshta shumë prej kolegëve të tij do të kishin hezituar ta bënin.
Europa ka përcaktuar mbrëmjen e sotme skuadrën e fundit që do të marrë pjesë në kampionatin botëror ‘Rusi 2018’, Danimarkën.
Sfida e luajtur në Dublin, mes Irlandës vendase dhe Danimarkës, përfundoi me fitoren 1-5, për këtë të fundit, me mesfushorin e Tottenhamit, Eriksen, që shënoi 3 herë në portën e irlandezëve.
Irlanda e nisi mjaft mirë sfidën, teksa gjeti avantazhin që në minutën e 6’, me anë të qendërmbrojtësit Duffy, që dërgoi në rrjetë topin, pas një rrëmuje në zonën e danezëve.
Gjithsesi, Danimarka nuk e humb toruan dhe fillon një presing mbytës ndaj vendasve, deri sa gjen golin e barazimit në minutën e 29’, kur irlandezi Christie dërgon topin në portën e tij.
Vetëm 2 minuta më pas fillon Eriksen-show, që shënon fillimisht golin e avantazhit dhe në pjesën e dytë shënon edhe 2 gola të tjerë, duke siguruar përfundimisht kualifikimin për në botëror.
Në minutën e parë shtesë, nuk mungoi as firma e Niklas Bendtner, që shndërroi në gol, një 11-metërsh të fituar nga danezët dhe vulosi rezultatin final 1-5.
Kështu, Danimarka shënon në Irlandë, golat që nuk arriti t’i realizojë në Kopenhagen dhe bëhet skuadra e 30, që siguron biletën për në botërorin ‘Rusi 2018’.
90′ – Lord Bendtner lë shenjën e tij në këtë sfidë. Sulmuesi danez fiton një penallti, të cilën e shndërron po vetë në gol dhe vulos rezultatin final 1-5.
74’ – Eriksen nuk ndalet. Tregolësh për danezin dhe kualifikim për Danimarkën, në ‘Rusi 2018’.
63’ – Sërish Eriksen, Danimarka kryeson 1-3. Mesfushori i Tottenhamit ka ndëshkuar sërish irlandezët me anë të një kundërsulmi dhe ka hipotekuar kualifikimin.
32’ – Danimarka përmbys gjithçka dhe prek kualifikimin. Christian Eriksen shënon një super gol, pas një supergoli dhe i jep avantazhin danezëve.
29’ – Barazohet sfida në Dublin. Pas minutash të tëra në kërkim të golit, Danimarka e gjen atë, pas një autogoli të pafat të mbrojtësit irlandez Christie.
06’ – Duffy kalon Irlandën në avantazh. Qendërmbrojtësi i vendasve shfrytëzon një rrëmujë në zonë, pas ekzekutimit të një faulli dhe dërgon topin në rrjetë dhe Irlandën në botëror (momentalisht).