Kreu i PD, Lulzim Basha ka denoncuar ashpër dje sulmet e paprecedenta të Ramës ndaj mediave, ndërsa i cilësoi ato si frymëzim i Ramës për krimin e organizuar që të agresojë e sulmojë gazetarët. “Fjalimi i djeshëm i Edi Ramës kundër gazetarëve është fjalim kriminal. Me fjalime të tilla, ai është duke nxitur për ditë urrejtjen dhe dhunën ndaj gazetarëve. Gazetarët janë ndër njerëzit më të rrezikuar në botë, shënjestër e shpeshtë e krimit dhe e politikanëve të korruptuar. Vetëm pak ditë më parë në Maltë u vra në mënyrë barbare një gazetare që hetonte kryeministrin.
Klima që krijon Edi Rama inkurajon pikërisht kriminelët që të sulmojnë gazetarët që raportojnë dhe hetojnë krimin dhe korrupsionin. Njeriu që ka thurur vetëm lavde dhe përkëdheli për Elvis Roshin, Saimir Tahirin dhe kriminelët e tjerë me të cilët rrethohet, duhet të ndalë menjëherë gjuhën e tij të rrezikshme. Ju bëj thirrje të gjithë qytetarëve, intelektualëve, gazetarëve dhe politikanëve ta denoncojnë dhe të mos heshtin përballë kësaj sjelljeje kriminale të kryeministrit. U bëj thirrje organizatave ndërkombëtare dhe partnerëve të huaj që të dënojnë këtë gjuhë urrejtje dhe të dhunshme të kryeministrit”, shprehet Basha.

Bashkia e Tiranës ka hapur procedurat për koncesionin e ri për ndërtimin dhe mirëmbajtjen e shkollave në Tiranë. Ky është koncesioni i dytë brenda 10 ditësh dhe fondi limit i tij llogaritet në rreth 11 milionë euro, duke e çuar totalin e deritanishëm për Zonën 1 dhe Zonën 2 në Tiranë në 25 milionë euro. Referuar njoftimit në këtë procedurë parashikohet që të ndërtohen të paktën pesë objekte të tjera arsimore.
“Bashkia e Tiranës në rolin e ‘Autoriteti Kontraktor’, fton operatorët ekonomikë në një procedurë ndërkombëtare koncesioni/ partneriteti publik privat për projektimin e detajuar dhe zbatimin e ndërtimit të pesë objekteve arsimore në Zonën Tirana 2, mobilimin dhe mirëmbajtjen e tyre të zakonshme dhe të jashtëzakonshme, mbikëqyrjen dhe kolaudimin në përputhje me procedurat dhe kushtet e përcaktuara në këto dokumente tenderi dhe me kushtet e kontratës.
Kostoja e vlerësuar e projektit është 1.574.138.127 (një miliard e pesëqind e shtatëdhjetë e katër milion e njëqind e tridhjetë e tetë mijë e njëqind e njëzet e shtatë) lekë pa TVSH”, nënvizon Bashkia në njoftimin e saj në APP.
Kompania, e cila do të fitojë koncesionin duhet të llogarisë maksimalisht një marzh fitimi maksimumi 6.28%. Koncesionari do të përballojë me të ardhurat e veta të gjithë investimin për projektimin, ndërtimin, mobilimin dhe pajisjen me laboratorë, mirëmbajtjen, mbikëqyrjen dhe kolaudimin, si dhe vënien në funksion të tyre.
Objektet arsimore duhet të ndërtohen, si dhe të jenë funksionalë në një afat prej 18 muajsh nga data e lidhjes së kontratës. Pas ndërtimit dhe vënies në funksion të objekteve arsimore, koncesionari/PPP do të mirëmbajë objektet për një periudhë 7-vjeçare. Pas përfundimit të ndërtimit, autoriteti kontraktor do t’i paguajë koncesionarit/PPP një shumë të caktuar vjetore deri në përfundim të plotë të shumës së investuar.
Bashkia kërkon të ndërtojë 17 shkolla fillore dhe të mesme. E gjithë kostoja e projektit do të paguhet nga qytetarët e Tiranës përmes taksës speciale të arsimit që ka vendosur Bashkia Tiranë dhe një fondi që do të marrë nga qeveria po nga taksat e qytetarëve.
Asnjë analizë si është arritur në këtë propozim, asnjë e dhënë teknike për projektin, asnjë argumentim dhe justifikim ligjor, politik, administrativ apo teknik nuk u është bërë e ditur paraprakisht këshilltarëve bashkiakë që do të duhet të marrin vendimin. Gjithçka është paravendosur dhe Këshilli Bashkiak duhet vetëm të vulosë formalisht një vendim të kryebashiakut Veliaj dhe Kryeministrit Rama.

Stoku i borxhit publik pritet të zgjerohet vitin që vjen me rreth 246 milionë euro, me synimin për të arritur në 68.6% e Prodhimit të Brendshëm Bruto sipas parashikimeve të Ministrisë së Financave më 2018. Stoku i borxhit publik total, përfshirë borxhin shtetëror të garantuar, vlerësohet të arrijë në 1,135,620 milionë lekë, pa përfshirë efektet e mundshme prej ndryshimit të kursit të këmbimit.
Stoku i borxhit publik në raport me PBB-në është vënë në trajektore rënëse, por gjithsesi ulja është e sforcuar dhe nuk i ka qëndruar parashikimeve të qeverisë shqiptare më 2014 që me shtrëngimin fiskal, treguesi i borxhit në raport me PBB-në të zbriste në nivelin 64% më 2019.
Deficiti buxhetor për vitin 2018 planifikohet të jetë në nivelin 2.0% të PBB. Për të tretin vit radhazi, balanca primare parashikohet të jetë pozitive në nivelin 0.6%, duke synuar mbajtjen e borxhit në trajektoren rënëse për të dytin vit radhazi. Sipas Ministrisë së Financave, ky nivel deficiti garanton trendin rënës të borxhit në periudhën afatmesme dhe afatgjatë.
Financimi i deficitit do të realizohet nëpërmjet huamarrjes së brendshme dhe asaj të huaj, e cila do të bazohet tek huatë me terma pjesërisht të favorshme në kuadër të financimit të projekteve prioritare të qeverisë, huatë me terma të favorshme në kuadër të mbështetjes së politikave zhvillimore të ndërmarra nga qeveria dhe huamarrja me terma tregtare, në rast se kushtet e tregjeve financiare do të jenë optimale.
Në bazë të ligjit organik të buxhetit, në çdo ligj vjetor të buxhetit, fillestar apo të rishikuar, si dhe në planifikimet e buxhetit afatmesëm, raporti i borxhit publik ndaj Produktit të Brendshëm Bruto do të planifikohet më i ulët se niveli i vlerësuar për vitin pararendës, deri atëherë kur niveli i borxhit të arrijë dhe qëndrojë poshtë nivelit 45% të Produktit të Brendshëm Bruto.
Në përputhje me këtë dispozitë (rregull fiskal) ligji vjetor i buxhetit 2018 targeton një nivel të borxhit publik total në 68.8% të PBB nga niveli prej 69.1% e PBB i targetuar për vitin 2017.
Vlera e Produktit të Brendshëm Bruto, nominale në lekë, e cila do të përdoret për llogaritjen e raportit të borxhit publik ndaj Produktit të Brendshëm Bruto për vitet buxhetore që planifikohen dhe për vitin pararendës, nuk mund të jetë më e lartë se vlera respektive e parashikuar ose e vlerësuar në raportin “Perspektiva ekonomike botërore” (World Economic Outlook), të Fondit Monetar Ndërkombëtar, më i fundit i publikuar në kohën kur ligji vjetor i buxhetit dorëzohet për miratim në Kuvend.
Në përputhje me këtë dispozitë (rregull fiskal) të LOB, ligji vjetor i buxhetit 2018 bazohet në projeksionet e mëposhtme të PBB nominale, të cilat paraqiten në mënyrë krahasimore kundrejt projeksioneve të raportit “Perspektiva ekonomike botërore” (World Economic Outlook), të Fondit Monetar Ndërkombëtar, më i fundit i publikuar më tetor 2017″.

Kryetarja e LSI, Monika Kryemadhi zhvilloi një takim me komisionerin për Zgjerimin, Johannes Hahn. Takimi u zhvillua në Kryesinë e Kuvendit ku të pranishëm ishin dhe ambasadorja e BE, znj. Vlahutin, si dhe kryetari i Grupit parlamentar të LSI-së, Petrit Vasili. Kryemadhi i shprehu falënderimet Bashkimit Europian për mbështetjen e Shqipërisë në ecurinë e procesit të integrimit europian, si dhe për asistencën financiare ndër vite për reformat integruese. Në mënyrë të veçantë kryetarja e LSI ka vlerësuar investimin e partnerëve ndërkombëtarë, BE dhe SHBA për reformën në drejtësi, por ka denoncuar bllokimin nga ana e mazhorancës aktuale të ngritjes së strukturave të Vettingut, të cilat janë shtylla kryesore të reformës.
Kryemadhi i parashtroi komisionerit faktet për situatën e rënduar politike, ekonomike dhe sociale, ku theksi është vendosur te influenca direkte e krimit të organizuar në zgjedhjet e 25 qershorit, si dhe aktualisht në instancat shtetërore apo në qeverisje. Kryetarja e LSI kërkoi nga Bashkimi Europian hapjen sa më të shpejtë të negociatave, si garanci për të luftuar bashkërisht krimin, drogën dhe korrupsionin qeveritar, për të rikthyer stabilitetin, ringritjen e shtetit të së drejtës dhe zhvillimin ekonomik të vendit. Znj. Kryemadhi ndër të tjera theksoi nevojën për një rol më aktiv, denoncues dhe paralajmërues ndaj qeverisë nga Bashkimi Europian, ku në këtë situatë ku është Shqipëria është vendimtare jo për fatin politik të opozitës, por për fatin e vendit dhe shqiptarëve.

Deputeti demokrat, Oerd Bylykbashi njëkohësisht bashkëkryetar i Komisionit për Reformën Zgjedhore deklaroi se, përmes kësaj reforme duhet t’i jepet fund përgjithmonë shitblerjes së votës. Dje, ka nisur punën Komisioni i Reformës Zgjedhore. Gjatë diskutimeve deputeti demokrat, Bylykbashi kujtoi shqetësimet dhe rekomandimet e OSBE në lidhje me shitblerjen e votës dhe përfshirjen e strukturave të krimit të organizuar gjatë zgjedhjeve.
“Më së fundi po fillojmë Reformën Zgjedhore. Është për të ardhur keq, që ne sot jemi këtu për të trajtuar 3 raporte të OSBE. Është e papranueshme që në një legjislaturë të plotë shkeli angazhimet ndërkombëtare të Shqipërisë. Për herë të parë që nga viti 2001 dhe kjo nuk është në nderin e këtij Parlamenti OSBE-ODIHR kërkon ngritjen e një Komisionit për Reformën Zgjedhore. Vullenti politik është themeli për Reformën Zgjedhore. Ka vullnet bëhet, nuk ka nuk bëhet.
Të luftohet shitblerja e votës, sepse OSBE e ka parë me fakte si zgjedhjet janë blerë me paratë e krimit dhe drogës. Përdorimi i abuziv i shtetit për të ushtruar presion mbi zgjedhjet ka detyruar OSBE-ODIHR të nxjerrë këtë raport. Mazhoranca ka bërë atë që dihet nga të gjithë shqiptarët. Ka legjitimitetin e vet mbi shitblerjen e votës për të bërë presion mbi zgjedhësit, këto i thotë OSBE- ODIHR.
Ne sot jemi këtu sëbashku, sepse nëse nuk rregullohen standardet e zgjedhjeve, shqiptarët nuk do të kenë një qeveri legjitime. Do të kemi kohën për të diskutuar për votimin elektronik, që mos blihet vota, mos manipulohet votimi. Pra një sistem votimi elektronik përtej duarve të 40 mijë komisionerëve politik. Kjo duhet të jetë kryefjalë. Votimi i emigrantëve nuk do të jetë i sukseshëm nëse nuk vendosim standardin sot këtu. Është qesharake votimi me postë. Ju keni detyrimin t’i qëndroni Reformës Zgjedhore”, tha Bylykbashi.

Kryetarja e Lëvizjes Socialiste për Integrim, Monika Kryemadhi, gjatë një takimi me strukturat e Fierit të LSI-së, deklaroi edhe një herë se shqiptarët po vuajnë çdo ditë e më shumë nga gjendja e keqe që ka kapur vendin. Sipas saj, kryeministri Edi Rama, është një vegël në duar e krimit të organizuar dhe bandave. Ajo theksoi se ka ardhur momenti që shqiptarët të zgjohen dhe të vënë në vend dinjitetin dhe krenarinë që ua ka marrë Rama dhe e ka shtruar përtokë. ‘Sot jemi në një moment shumë të vështirë për Shqipërinë, prandaj zgjodhëm të jemi në opozitë, për të qenë zemra e shqiptarëve. Atë atdhedashuri dhe atë krenari që shqiptarët kanë dhënë jetën për ta mbrojtur, sot Rama e ka shtrirë në tepsi për ta lënë në dorë të bandave dhe krimit. Para disa muajsh ishim krenarë para miqve ndërkombëtarë për Shqipërinë. Ju e patë dhe vetë se çfarë publiciteti i bëri Papa Françesku Shqipërisë.
Edi Rama sot është telekomanda në duart e krimit të organizuar dhe bandave. Ne nuk ndihemi krenarë, prandaj kemi vetëm një rrugë, atë të zgjimit të shqiptarëve për të ndryshuar këtë realitet’, deklaroi Kryemadhi. Deklarata e kryeministrit Edi Rama, për vendosjen e matësve për të gjithë ata që kanë puse uji, indinjoi jo pak qytetarët shqiptarë, por pati reagim të ashpër dhe nga opozita. Kryetarja e Lëvizjes Socialiste për Integrim, Monika Kryemadhi, gjatë takimit me strukturat e LSI në Fier, tha se është për të ardhur keq, kur dëgjon kryeministrin që flet për matësa për puset e ujit, kur ai s’ka vënë matësa për puset e naftës, një pasuri kombëtare që po vidhet çdo ditë. Rama do të vendosi matësa për puset e ujit. Por ju në Fier e dini shumë mirë, se ai nuk ju ka vendosur taksa puseve të naftës, e cila është një pasuri kombëtare që po vidhet çdo ditë’, tha Kryemadhi.

Kreu i Grupit parlamentar të LSI, Petrit Vasili ka reaguar për debatin e krijuar së fundmi mes Edi Ramës dhe disa mediave në vend, ku veçohet përplasja e fundit me “Top Channel”. Vasili e konsideron debatin për median shfokusim të qëllimshëm të Edi Ramës për drogën dhe krimin. “Mos u merrni me marrëzitë e tij, do të krijojë muhabete pa vlerë thjesht për ta devijuar vëmendjen”, shprehet Vasili duke paralajmëruar se në Shqipëri do të ketë media të ndershme që do të denoncojnë krimin në pushtet. “Të përgjigjet kryeministri për drogën dhe krimin, debati për median shfokusim i qëllimshëm i tij. Kryeministri u shqye më dysh që të bëjë protagonistin duke goditur mediat. Nuk ka asnjë merak ky, as për të drejtat e njeriut e as për liritë, sepse ky veç i shet e i blen ato. Kryeministri dhe parimi (parimet) janë të kundërtat e njeri-tjetrit. Ky duhet të përgjigjet deri më një për drogën dhe krimin që mbolli në Shqipëri, që e damkosi si askush tjetër këtë vend. Sa për mediat të blejë sa të dojë…Po ‘France International’, ‘Frankfurter Alegmaine Zaitung’, ‘Corriere della Sera’, ‘New York Times’, ‘The Telegraf’, a i blen dot?! Mos u merrni me marrëzitë e tij, do të krijojë muhabete pa vlerë thjesht për ta devijuar vëmendjen. Të përgjigjet kryeministri përpara task-forcës së tre milionë shqiptarëve për drogën dhe krimin epidemik. Sa për mediat, media të ndershme e me integritet në Shqipëri e në botë ka plot, që do të tregojnë çdo gjë sot e çdo ditë për pushtetin e krimit dhe krimin në pushtet”, shprehet Vasili.