Dick Advoccat ka paralajmëruar se nuk do të vazhdojë të jetë më trajneri i kombëtares së Holandës. Pasi nuk arriti dot t’i siguronte kualifikimin për në botërorin “Rusi 2018” kombëtares së “tulipanëve”, Advoccat ka vendosur të mos e vazhdojë më aventurën e tij në krye të stolit të kësaj skuadre. Gjithçka do të përfundojë, pasi të jenë zhvilluar dy miqësoret e fundit, kundër Skocisë dhe Rumanisë.
70-vjeçari mori drejtimin e “portokallinjve” pas shkarkimit nga detyra të Danny Blind për shkak të rezultateve të dobëta, ku më shumë peshoi moskualifikimi në europian. Sidoqoftë, edhe nën drejtimin e Advoccat, Holanda nuk pati ndonjë përmirësim të dukshëm, përkundrazi situata vazhdoi të ishte e njëjtë, duke mbylluar fazën kualifikuese në vendin e tretë në Grupin A. Për Advoccat, kjo ishte eksperienca e tretë në krye të Holandës. Më herët, ai ka drejtuar ekipin në periudhat 1993-1995 dhe 2002-2004. Përsa i përket emrit që do të zëvendësojë teknikun 70-vjeçar ende nuk ka ndonjë kandidaturë konkrete.
Ndërkohë, Fabio Cannavaro rikthehet në drejtimin e Guangzhou Evergrande. Pas eksperiencës me Tianjin Quanjian, kampioni i Botës me Italinë në vitin 2006, ka firmosur një kontratë 5-vjeçare me klubin ku ishte asisten i Marcello Lippit në vitin 2015, ndërkohë që e drejtoi skuadrën si trajner i parë për disa ndeshje. Cannavaro pason në postin e trajnerit të Guangzhou Evergrande, ish-teknikun e Brazilit, Luiz Felipe Scolari.

Arsenali duket se ka hequr dorë nga gjermani, nga rinovimi i kontratës së tij, e cila përfundon më 30 qershor 2018, ndaj ai do të jetë i gatshëm të dëgjojë ofertat qysh në merkaton e dimrit. Një tjetër prej lojtarëve të Arsenalit, që mund të largohet nga Londra këtë dimër, është Alexis Sánchez. Kilianit, gjithashtu i përfundon kontrata më 30 qershor 2018 dhe nuk duket i gatshëm të rinovojë. Për të, Wenger mund të pranojë të hapë derën e largimit.
Me këtë rast, destinacioni më i mundshëm do të ishte Manchester City, i cili ishte gati të nënshkruante me të verën e këtij viti, edhe pse trajneri francez do të preferonte të mos përforconte një rival direkt, ndaj do të ishte i interesuar të trokiste në dyert e PSG-së për të propozuar një shkëmbim me Julian Draxler. Do të shohim se si do të zhvillohet kjo histori. Ajo që është e sigurt është se, Arsenali do të përjetojë një merkato dimërore nga më të nxehtat…

Kanë kaluar më shumë se dhjetë sezone, që kur Arturo Vidal debutoi në Bundesliga. Pas aktivizimit me Bayern Leverkusen, në 2011-ën kiliani u transferua te Juventus-i në Torino përpara se t’i bashkohej Bayern Munich-ut. Që nga vera e 2015-ës, mesfushori vesh fanellën e kampionëve të Gjermanisë, por kritikat ndaj tij sa vijnë dhe shtohen. Tashmë në moshën 30-vjeçare, Vidal po i afrohet fundit të karrierës, por fundi te Bayern mund të vijë më përpara se sa ishte parashikuar. Këtë e beson gjermania “Kicker”, sipas së cilës mesfushori kilian nuk po i justifikon më pritshmëritë e bavarezëve. Edhe skadenca në 2019-ën e kontratës së lojtarit nuk e lehtëson situatën.
Dy janë opsionet përpara Vidal. Largimi në merkaton e verës 2018, ose një zgjatje e kontratës. Nëse palët nuk bien dakord, ai do të largohej si lojtar i lirë verën e ardhshme. Interi ka shfaqur ndërkohë interes për kilianin, i cili ka dhuruar ditë të bukura te Juventusi. Por problemi qëndron në faktin nëse Vidal do të pranojë të fusë më pak para në xhepin e tij.

Barça tashmë po negocion përsëri për Philippe Coutinho. “10” e Liverpool është objektivi numër një në tregun e dimrit për katalanasit. Ernesto Valverde i ka kërkuar klubit të nënshkruajë me brazilianin. Sekretariati teknik Blaugrana është në ndjekje të ligave kryesore europiane, duke kërkuar elementë të rinj, që mund të ndihmojnë në ndërtimin e lojës sulmuese. Ata janë të rinj, të pranishëm dhe me një çmim më të volitshëm, por, në çdo rast, të gjitha opsionet në sfond të çojnë te Coutinho. Klima negociuese ka ndryshuar ndjeshëm në lidhje me luftën e ftohtë dhe mungesën e harmonisë së verës. Barcelona ka filluar një raund të ri bisedimesh, duke shpresuar se kësaj here do ta përfundojë gjithçka pozitivisht. Në mënyrë që Coutinho të bashkohet me “Camp Nou”, klubi katalanas ka vendosur si një kusht të domosdoshëm uljen e çmimit të transferimit dhe përmirësimin e kushteve të pagesës, gjë që nuk është një detaj i vogël.
Merkatoja e dimrit, tradicionalisht është më bombastike se e verës. Dhe, në rastin e Coutinho, pavarësisht se është një yll i klasit botëror, ekziston faktori i mosfunksionimit të fazës vendimtare të eliminimit të Ligës së Kampionëve. Për këtë aksion negociues, Barça ka bashkëpunimin e brazilianit, i cili ka vënë në dispozicion gjithçka nga ana e tij që operacioni të mbyllet në janar. Braziliani ka kërkuar nga përfaqësuesit e tij të injorojnë çdo ofertë që u vjen atyre. Njëra prej tyre është ajo e PSG-së, e cila i ka kërkuar lojtarit që të mos nënshkruajë me Barçën dhe të presë për verën e ardhshme. Më pas, sheikët nga Katari besojnë se do të krijohen kushtet e duhura të “fair-play financiar”, pavarësisht se duhet të paguajnë transferimin e Kylian Mbappé. Oferta prej 120 milionë eurosh është një deklaratë e qëllimeve të klubit, që tregon se ndihet fuqimisht për të reduktuar kushtet financiare të dëshiruara nga “Reds”.

Trapp, Pastore, Ben Arfa, por mbi të gjithë Draxler, Lucas dhe Di Maria: 194,5 milionë euro gati për t’u rivënë në qarkullim në merkaton e janarit për arsye bilanci. Blerjet e çmendura të bëra në verë, që i kanë kushtuar Paris Saint-Germain 238 milionë euro, nuk mund të mos kishin pasoja. Pavarësisht mbështetjes nga një shtet me burime ekonomike pa limit si Katari, “Fair Play” Financiar nuk kursen asnjeri dhe PSG është i detyruar të rrisë të ardhurat e klubit me 80 milionë euro, për të shmangur sanksionet e UEFA-s.
Në dosjen e paraqitur para komisionit të FPF-së 5 tetorin e kaluar, klubi i Nasser Al-Khelaifi-t ka prezantuar një strategji me tre faza për të mbuluar shpenzimet e mëdha të bëra në merkaton e verës. Më shumë se të ardhurat nga të drejtat televizive, do të jetë thelbësore të thjeshtohet organika që ka në dispozicion trajneri Unai Emery, i cili do të jetë i detyruar të lërë të largohen lojtarë që, në një situatë tjetër, do të ishin të paprekshëm. Lojtarë si Julian Draxler, i marrë më pak se një vit më parë për 40 milionë euro nga Wolfsburg dhe gati të kthehet në Bundesligë të Bayern Munich, me këta të fundit që e shikojnë si zëvendësuesin ideal të Ribery. Pas tij vjen Di Maria, për të cilin do të kërkohet një sistemim në Kinë.
Ndërkohë, pas zbarkimit në Paris të një ylli botëror si Neymar dhe një talenti premtues si Mbappe, do ta lejojë klubin francez të kërkojë shpërblime më të mëdha nga Nike dhe Emirates, dy sponsorët kryesorë të skuadrës, që derdhin respektivisht në arkat e klubit 25 dhe 30 milionë euro në sezon. Në fund, janë të drejtat televizive, “market pool” dhe Monaco, rivali kryesor i PSG-së në sezonin e kaluar, që mund të bëhet një aleat i çmuar. Eliminimi i mundshëm nga faza me grupe e Champions League do të dërgonte në arkat e Paris SG një shumë më të madhe se 75 milionë euro të llogaritura nga UEFA për skuadrat franceze. Vrapi kundër kohës ka nisur, por në Paris janë të bindur se mund të përgënjeshtrojnë të gjithë ata që kanë folur për një skandal pas blerjeve të Neymar dhe Mbappe. Edhe pse ky përgënjeshtrim mund t’i kushtojë një Draxler dhe një Di Maria.

Sergio Ramos tha se, dera e klubit galaktik, ku bën pjesë, është e hapur për ish-yllin e Barcelonës, Neymar, nëse braziliani dëshiron të shkëmbejë PSG-në me kampionët spanjollë dhe europianë në fuqi. Neymar u bashkua me gjigantët e “Ligue 1” kësaj vere, për një marrëveshje rekord botëror me vlerë 222 milionë euro, por tashmë flitet për “trazira” me brazilianin ndërkombëtar. Sipas raporteve mediatike, Neymar është i pakënaqur me jetën te PSG, nën drejtimin e trajnerit Unai Emery, duke nxitur spekullimin e një rikthimi sensacional në La Liga, konkretisht te fituesit e Ligës së Kampionëve në dy edicionet e shkuara.
I pyetur për Neymar, kapiteni Sergio Ramos tha për “Cadena Ser” se, dera e Real Madridit është e hapur për Neymar. “Më pëlqen të kem më të mirët në skuadër dhe është e qartë se, Neymar është një prej tyre. Ndoshta ishte më e lehtë për të që të shkonte te PSG-ja, në vend që të vinte drejtpërdrejt te Real Madridi. Ato janë vendime personale, nuk e dini kurrë se çfarë mund të ndodhë, sepse futbolli nuk parashikohet shumë. Unë tashmë e kam derën hapur për të, nëse dëshiron të vijë. Kam gjithashtu një marrëdhënie të mirë me të”, tha ai.
Neymar ka shënuar shtatë gola në tetë ndeshje në “Ligue 1”, këtë sezon, për ta ndihmuar PSG-në të lëvizë katër pikë para kampionit francez, Monaco, gjatë këtij pushimi ndërkombëtar. Ai ka shënuar edhe katër gola në Ligën e Kampionëve, për ta drejtuar PSG-në drejt kualifikimit në 1/16 finale të këtij kompeticioni, me dy ndeshje të mbetura për t’u luajtur në fazën e grupeve.
Neymar nuk është i motivuar për të luajtur në disa ndeshje të caktuara të Ligue 1 dhe kjo thuhet se ka qenë arsyeja e mungesës së tij në ndeshjen e fundit të kampionatit francez, ku PSG fitoi 5-0 ndaj Angers, ditën e shtunë. Braziliani ka dashur të jetë i freskët për ndeshjet miqësore që do të luajë me përfaqësuesen e tij. Neymar ka shënuar 7 gola dhe ka dhënë 6 asiste në 8 ndeshje që ka luajtur deri tani në Ligue 1, ndërsa ai nuk ka munguar në asnjë nga katër ndeshjet e Champions League, duke shënuar 4 gola dhe duke dhënë 3 asiste.
Trajneri Unai Emery tha se, futbollisti i blerë për 22 milionë euro kishte pasur një shqetësim të vogël muskulor dhe në një konsultë me mjekët kishte vendosur ta linte pushim, por shtypi pohon se Neymar ka kërkuar të mos aktivizohet në ndeshjet pa rëndësi të kampionatit, duke e ruajtur veten të freskët për në Champions League. PSG kryeson kampionatin me katër pikë avantazh.
Megjithatë, gazeta spanjolle “Sports” shkuan se, ndeshja me Angers ishte një nga ato sfida të kampionatit që Neymar ka kërkuar të pushojë. Ai do të jetë në formacionin e Brazilit për ndeshjen miqësore që do të zhvillojë kundër Japonisë, të premtën në Lilë, ndërsa më 14 nëntor Neymar do të luajë kundër Anglisë në “Wembley”.

Disa muaj pasi ishte në gjendje të bëhej lojtar i Barçës, Ángel di María ka folur për herë të parë hapur për këtë mundësi. Ai e ka bërë atë nga Rusia, ku është i përqendruar me ekipin e tij kombëtar, bashkë me Messin dhe Mascheranon. Argjentinasi, në deklaratën e bërë për “ESPN”, ka pranuar se “isha afër kalimit te Barcelona, afër dhe larg në të njëjtën kohë. Është e vështirë për të shkuar në kësi klubesh. Kjo nuk ndodhi, por jeta vazhdon…” Në këtë mënyrë, ai konfirmon se ishte në gjendje për t’u bërë lojtar i Barcelonës dhe e lë një derë të hapur për ta realizuar këtë në të ardhmen.
Pavarësisht nga e kaluara e tij te Real Madridi, Di Maria bëri të qartë se ka vetëm një klub, ku ai nuk do të luajë: “Unë jam një tifoz i Rosario Central dhe natyrisht, që nuk do të luaja kurrë me Newell, por më vonë mund të bëhem pjesë e çdo ekipi”. Një ditë ai shpreson të kthehet në Argjentinë dhe ta përfundojë karrierën e tij në klubin e zemrës. “Tifozëve të Central u them që t’i mbajnë shpresat e tyre. Gjithmonë e kam pasur në kokën time që të tërhiqem nga futbolli si pjesë e Central”, tha DiMaria.

I ardhur me bujë te Interi verën e kaluar, Gabriel Barbosa po vuan shumë ambientimin e tij në futbollin europian. Këtë verë zikaltrit vendosën ta huazojnë brazilianin te Benfica, por edhe atje ai nuk po gjen dot hapësira për të luajtur, për shkak edhe të një debati që pati me trajnerin. Së fundi futbollisti, bashkë me klubin zikaltër, kanë vendosur që të mos qendrojë më te Benfica, por të huazohet në një tjetër klub. Ofertat e para janë nga ish-klubi i tij në Brazil, Santosi, PSV-ja në Holandë dhe Genoa.
Vetë Gabriel Barbosa është shprehur tërësisht kundër rikthimin te Santosi, ndërsa ka refuzuar edhe pistën holandeze. Më ndryshe ka qenë qëndrimi i tij në lidhje me huazimin te Genoa, ndonëse do të preferonte ndonjë klub tjetër në Serinë A. “Dua të shkoj në një klub të Serisë A, ku të luaj dhe të gjej formën time, me qëllim që në verë të rikthehem dhe t’i shërbej Interit. Te Benfica jam i zhgënjyer, sepse nuk më aktivizojnë dhe askush nuk më jep arsyet se pse nuk luaj. Jam stërvitur maksimalisht dhe jam i bindur se kam formën e duhur për të luajtur”, tha Gabigol.