Ish-sulmuesi i Italisë, Christian Vieri, goditi Gary Lineker për kritikat e tij ndaj Karim Benzema, duke mbrojtur francezin e Real Madridit. Lineker dhe Benzema kanë qenë të përfshirë në një luftë fjalësh. Francezi ndërkombëtar ka shënuar vetëm dy herë në 12 ndeshje me Real Madridin, në të gjitha garat e këtij sezoni, duke marrë kritika ndaj shfaqjeve të tij. Vieri, një sulmues tjetër, i cili shënoi rregullisht për klubin dhe kombëtaren e tij, tha se kritikat e Lineker ishin të padrejta. “Nuk e di pse Gary Lineker punon në TV. Ai i shënoi të gjithë golat e tij në “six-yard box”, tha italiani për “Bein SPORTS”. Ai është një ish-sulmues dhe duhet ta dijë mirë se, kur një sulmues nuk shënon për disa ndeshje, kjo nuk do të thotë se duhet ta vrasësh?” Lineker u përgjigj në Twitter duke shkruar: “Jam në TV për të bërë pyetje rreth futbollit, çuditërisht që përfshin edhe pyetje rreth futbollistëve”.

Dani Alves lë të hapur mundësinë e kalimit në Premier League, në të ardhmen. Braziliani i Paris Saint-Germain deklaron se gjatë merkatos së verës kishte rastin të transferohej në Angli te Manchester City, prej Pep Guardiolës, por në fund zgjodhi parizienët, pasi aty kishte dhe shumë miq të tij. Megjithatë mbrojtësi nuk e fsheh dëshirën se pas disa kohësh synon të luajë në Premier League. 34-vjeçari ka kontratë me klubin francez deri në vitin 2019.
Ndërkohë, sulmuesi uruguajan i Barcelonës, Luis Suarez, ka dhënë një intervistë për katalanasen “Sport”, ku ka folur edhe për Neymar, që verën e këtij viti la “Camp Nou” dhe u transferua te PSG për një shifër rekord, 222 milionë euro. “Largimi i Neymar na ka peshuar edhe më shumë, sepse ishte i veçantë. Ai na bënte të qeshnim shumë, i transmetonte lumturinë dhe gëzimin e vet skuadrës gjatë gjithë kohës. Neymar ka qenë i rëndësishëm për ne. Tani ai është në një ekip tjetër, por unë nuk kam ndonjë pakënaqësi, përkundrazi, gjithmonë jam përpjekur që të qëndronte te Barcelona, sepse mendoj se këtu do të ishte më mirë”, tha ai.
“Në të vërtetë, Neymar është i pjekur të dijë nëse është penduar që e ndërmori këtë hap. Ai duhet të dalë dhe ta thotë atë që ndjen. A ka kërkuar këshilla nga unë dhe Messi para se të pranonte ofertën e PSG? Më shumë se këshilla, ai kishte dyshime për vendimin që po merrte. Ne donim që të qëndronte, pa diskutim, duke u nisur nga dobia që kishte si partner i sulmit. Ne u përpoqëm që të qëndronte, por në asnjë moment nuk i kemi thënë: “Neymar, mos u largo, sepse nuk do të jesh i lumtur”! Ne i thamë atij se nuk duam që të largohet, por nëse donte ta bënte këtë, ishte i lirë të merrte vendimin që donte. Për shkak të miqësisë që kemi, ishte e dhimbshme që ai u largua”, u shpreh Suarez.

Çdo ditë që kalon duket se rrit edhe më shumë hendekun e krijuar mes Neymar dhe trajnerit Unay Emery te PSG. Siç raporton e përditshmja franceze “L’Equipe”, me gjithë sforcon e bërë, marrëdhëniet e tyre janë të tendosura. Me sa duket, braziliani nuk pëlqen apo miraton mënyrat e stërvitjes së teknikut dhe nga ana e tij spanjolli Emery nuk pranon aspak disa sjellje të sulmuesit. Situata e krijuar e ka shqetësuar shumë ish-“yllin” e Barcelonës. Siç konfirmon për “L’Equipe” një burim nga dhomat e zhveshjes së klubit francez, Neymar nuk e fsheh më antipatinë për teknikun, duke e injoruar atë hapur me gjeste, që shihen nga të gjithë.
Ndërkohë që Emery ka tentuar të flasë me “Princin” e Parisit, për të sqaruar situatën e nderë, që i ngjason një lufte të ftohtë, e që po ndikon në klimën brenda grupit. Të gjitha kanë rezultuar tentativa të dështuara, mes tyre nuk ka “feeling” dhe, ashtu siç thekson edhe tabloidi francez, duan s’duan, të dy janë të detyruar që, deri në qershor, të bëjnë një bashkëjetesë të sforcuar. Me Neymar të pakënaqur shtohen edhe më shumë spekulimet se, pikërisht fundi i sezonit mund të sjellë edhe zëvendësimin e Emery, që pavarësisht ecurisë shumë të mirë, mund të lirojë stolin. Emrat që janë lakuar që tani si kandidatë të mundshëm për të vijuar rrugëtimin e PSG-së drejt majave janë Jose Mourinho, Antonio Contes dhe Massimiliano Allegri.
PSG-ja është shumë më tepër se vetëm Neymar, Kylian Mbappe dhe Edinson Cavani, sipas uruguajanit ndërkombëtar. Udhëheqësit e Ligue 1 paguan një rekord prej 222 milionë eurosh për Neymarin gjatë verës dhe do të shpenzojnë 180 milionë euro më shumë për Mbappe në fund të sezonit aktual, pasi marrëveshja e tij e huazimit nga Monaco të jetë e plotë. Treshja (tridenti) ka kombinuar për të ndihmuar “rrjetën” e Unai Emery me 58 gola në të gjitha garat, me PSG-në e kthyer në numrin 1 të Ligës së Kampionëve, referuar golave të shënuar në kualifikuese për fazat e nokaut-it, pas vetëm katër ndeshjeve.
Por Cavani këmbëngul, edhe pse dallimet në lojërat përkatëse të treshes i bëjnë ato një vijë të frikshme sulmuese, se ata nuk mund të kenë sukses pa shokët e tyre të skuadrës, që janë pas tyre. “Ne kemi stile të ndryshme dhe kjo na lejon të luajmë në mënyra të ndryshme. Kjo na ndihmon t’i bëjmë gjërat të punojnë mirë, tha ai për “Goal”. Shumë njerëz flasin për Cavani, Neymar dhe Mbappe, por lojtarë të tjerë na ndihmojnë të bëjmë gjithçka që duam. Ne nuk mund t’i harrojmë shokët tanë të skuadrës”. Mbappe ka “lulëzuar” që kur arriti në “Parc des Princes”, me adoleshentin që ka shënuar gjashtë gola dhe ka dhënë gjashtë asiste në 14 paraqitjet e tij të para për “Les Parisiens”.
Cavani thotë se po përpiqet të punojë me të riun e talentuar të Francës për të përmirësuar vetëdijen e tij taktike, ndërsa ata duket se formojnë një kombinim vdekjeprurës: “Unë kam qenë në gjendje t’i tregoj atij se futbolli është një lojë taktike dhe kjo do ta ndihmojë ta transformojë në një lojtar më të plotë ndërsa. Unë mendoj se aspekti taktik është shumë i rëndësishëm për një lojtar dhe kjo do të ishte këshilla ime. Mbappe është i përulur dhe i mirë. Ai është i ri dhe ndoshta ka nevojë të mësojë më shumë, por kjo është pjesë e jetës”.

Sipas asaj që raporton “tuttomercatoweb.com”, Paris Saint-Germain dëshiron të blejë portierin e Milan, Gianluigi Donnarumma, që në merkaton e janarit që ndodhet vetëm dy muaj larg. Në fakt, klubi parisien kërkon të sigurojë një portier të niveleve maksimale për vitet e ardhshme, dhe numri 99 i kuqezinjve është në krye të listës së PSG.
Pikërisht për këtë motiv, klubi i PSG që po udhëheq klasifikimin në Ligue 1 të Francës, pas blerjes së Neymar dhe huazimit me të drejtë blerje të Mbappe, po përgatit tentativën e sulmit për blerjen e Donnarummas që në merkaton e janarit. Vështirë që Donnarumma të vendosë të transferohet në Ligue 1 në fillim të vitit 2018, por përballë një oferte ekonomike faraonike, gjithçka mund të ndodhë, përfshirë dorëzimin e numrit 99 të kuqezinjve, sikurse dhe vetë Milan, që ndodhet në pozita shumë të vështira për sigurimin e një vendi në Champions për sezonin e ardhshëm.
E ardhmja e Antonio Conte te Chelsea mbetet në dyshim, pavarësisht se ka mposhtuar Jose Mourinho për herë të tretë në katër përballje gjithsej. “Blutë” kanë nevojë për një mrekulli të vërtetë për të arritur Manchester City në krye të Premier League dhe kjo mund ta shtyjë pronarin rus, Roman Abramovich të divorcohet me trajnerin italian. Sipas asaj që bëjnë të ditur mediat në Britani dhe Itali, Conte nuk do të qëndrojë shumë gjatë pa punë, sepse AC Milan e kërkon me ngulm si pasardhësin e trajnerit Vincenzo Montella. Conte është etiketuar nga pronarët e klubit kuqezi si njeriu i duhur për të rivalizuar Juventus në garën për titullin në Serinë A. Trajneri italian e ka marrë ofertën nëpërmjet menaxherit të tij.

Pas Gianluiggi Buffon një tjetër portier fiton çmimin prestigjoz. Golden Foot. Bëhet fjalë për ish- gardianin e Realit të Madridit dhe kombëtares spanjolle, aktualisht pjesë e Portos në kampionatin portugez, Iker Casillas. Ky i fundit ka qenë më i votuari nga publiku, duke bërë të vetin këtë çmim prestigjioz, i cili mund të fitohet vetëm një herë në karrierë. Casillas për të fituar trofeun ka mposhtur konkurencën e dy futbollistëve më të mirë në Botë për momentin Lionel Messit dhe Cristiano Ronaldos, ndërsa ka vendosur në rresht pas tij edhe emra të tjerë të rëndësishëm si Andrea Pirlo, Manuel Neuer, Sergio Ramos, Yaya Toure etj.

Lufta për tituj dhe për shpërblime individuale vendoset metër më metër, centimetër për centimetër. UEFA publikoi një raport me renditjen e lojtarëve që kanë përshkuar më shumë kilometra në katër ndeshjet e Ligës së Kampioneve, deri më tani. Dhe organi qeverisës i futbollit ka pasur për të bërë një koment të veçantë për shkëlqimin e të dhënat e Cristiano Ronaldos dhe Messit. Dy yjet e futbollit botëror, që kanë pronësuar “Topin e Artë” në dekadën e fundit, janë dëmtuar rëndë nga të dhënat e ofruara nga UEFA. Portugezi ka përshkuar 36,870 metra në katër angazhimet (ndeshjet) e Real Madridit. Argjentinasi, shumë më pak, 29,802 metra me fanellën e Barçës.
Kjo do të thotë se, Ronaldo ka përshkuar mesatarisht 1,767 metra më shumë se Messi për ndeshje në katër sfidat e para të konkurrencës maksimale kontinentale për klubet. Shumë larg të dyve, 48.052 metra është Kevin de Bruyne, që ka akumuluar më shumë metra në këmbët e tij. Belgu i Manchester City është lider në shifrat aboslute dhe i teti në mesatare, me 133.48 metra në minutë (8 km/h, me shpejtësi mesatare). Udhëheqësi i kësaj renditjeje në terma relativë, (duke luajtur së paku 200 minuta) është Christian Eriksen. Danezi ka përshkuar 140.5 metra çdo minutë në tri lojërat e plota, që ai ka luajtur për Tottenham.
Cristiano Ronaldo dhe Messi mbulojnë respektivisht 102.41 m/min (6.145 km/h) dhe 82.78 m/min (4.97 km/h). Duke eliminuar atë kërkesë prej 200 minutash, që UEFA e merr në konsideratë për këtë klasifikim, lojtari që mbulon distancën më të madhe në minutë do të ishte Julian Draxler. Mesfushori i PSG-së ka bërë 19.185 metra në 139 minuta, mesatarisht 138 m/min (8.55 km/h).

Fytyra e dyfishtë e Ronaldos dhe Messit
I “mohuar” përpara golave të rivalit në La Liga, Cristiano Ronaldo po tregon versionin e tij më të mirë në Ligën e Kampionëve. Me gjashtë gola, ai është golashënuesi më i mirë i edicionit aktual të Champions-it. Që nga çereku i fundit i sezonit të kaluar, portugezi ka realizuar 16 gola në nëntë ndeshje. Ai ka shënuar në të gjitha ndeshjet, përveçse në raundin gjysmëfinalist kundër Atlético Madridit, në “Calderón”. Asgjë nuk ka të bëjë me rënien e tij në La Liga, ku pas pezullimit në katër javët e para, portugezi ka vetëm një gol në gjashtë ndeshje dhe është golashënuesi me suksesin më të keq të pesë ligave kryesore europiane. Nga ana tjetër, Messi ka 12 gola në La Liga dhe 3 gola në Champions.
Janë marrë në konsideratë vetëm lojtarët me të paktën 200 minuta të luajtura.