Lidhja Social Demokrate e Maqedonisë ka shpallur fitoren në një numër komunash të vendit dhe epërsinë e votave në shumë komuna të tjera ku do të ketë balotazh pas dy javësh.
Krerët e partisë dhe mbështetësit e saj festuan mbrëmë para selisë së qeverisë. Sipas LSDM-së, kandidatët e saj për kryetarë komunash kanë fituar që në raundin e parë në Manastir, Kumanovë, në disa komuna në kuadër të qytetit të Shkupit dhe në disa të tjera në brendi të vendit.
Ndërkaq, pothuajse të gjitha partitë shqiptare kanë deklaruar fitore në zgjedhjet vendore të 15 tetorit, por realisht vetëm Bashkimi Demokratik ka arritur të fitojë Kërçovën, të cilën Fatmir Dehari, si kandidat i vetëm shqiptar që ishte, do ta drejtojë edhe një mandat katërvjeçar; si dhe komunën rurale të Pllasnicës, afër Kërçovës.
Ziadin Sela, kryetar i Aleancës për Shqiptarët, i cili garoi për një mandat të dytë në Strugë, ka njoftuar se shkon në balotazh me epërsi votash ndaj rivalit të tij Ramiz Merko të BDI-së.
Në Tetovë do të ketë balotazh midis Teuta Arifit, BDI dhe Kasam Bilallit, Lëvizja “Besa”. Në Gostivar, Nevzat Bejta (BDI) dhe Arben Taravari (ASH), në Çair: Visar Ganiu (BDI) dhe Zeqirja Ibrahimi (Besa).
Në garën për kreun e Shkupit në balotazh pritet të shkojnë Petre Shilegov i Lidhjes Social Demokrate dhe Koce Trajanovski i VMRO-DPMNE-së, i cili garon për një mandat të dytë. Por, fitoren e njërit ose të tjetrit e përcaktojnë votuesit shqiptarë.
Humbësja më e madhe duket të jetë VMRO-DPMNE, e cila nuk ka arritur të mbajë disa komuna në pjesën lindore të vendit dhe brenda qytetit të Shkupit që vlerësoheshin si “bastione” të saj. Partia ankohet për parregullsi të shuma, incidente, trysni, blerje votash e shantazhe. Nikolla Gruevski, ish-kryeministër dhe kryetar i VMRO-së tha gjatë një paraqitjeje në mesnatë se do t’i ankimojë “para organeve përkatëse dhe gjyqësore rezultatet dhe parregullsitë në më shumë komuna”.
Ndërkaq, ministri i Punëve të Brendshme, Oiver Spasovski u tha gazetarëve se janë regjistruar ndërprerje të shkurtra të procesit të votimit në disa qendra votimi, por kjo ka zgjatur për 15-20 minuta, pastaj ka pasur raste të fotografimit të fletëvotimit nga votuesit, të cilët janë ndaluar nga policia.
Zgjedhjet shihen me interes edhe nga komuniteti ndërkombëtar, i cili pret një proces të drejtë dhe demokratik në zgjedhje. Komuniteti ndërkombëtar haptazi ka lënë të kuptohet se pjekuria demokratike, përkatësisht procesi i zgjedhjeve do të diktojë rrugën dhe avancimin e Maqedonisë drejt integrimit në strukturat euroatlantike.
Procesin e ndoqën 373 vëzhgues nga misioni ODIHR, i OSBE-së, vëzhgues nga disa prej komisioneve qendrore të vendeve fqinje dhe nga ambasadat e huaja në Shkup, si dhe mbi pesë mijë pjesëtarë të organizatave joqeveritare vendase.
Ambasadori amerikan, Jess Baily iu është bashkuar pjesëtarëve të ambasadës në vëzhgimin e këtyre zgjedhjeve, ndërsa u bënte thirrje “të gjithëve që të dalin dhe ta japin votën e tyre”.
Ndërkaq, ajo që prej vitesh ka qenë çështje debati është numri i madh i votuesve të regjistruar. Maqedonia ka pak mbi 1 milion e 800 mijë votues. Nuk ka pasur një regjistrim të popullsisë që nga viti 2002 kur kishte pak mbi dy milionë banorë, ndërsa emigracioni është një prirje në rritje dhe shumë shtetas vetëm në vitet e fundit kanë kërkuar qëndrim ose ndodhen tashmë në shtetet perëndimore.

Numri i të vdekurve nga pasojat e shpërthimit të së shtunës në Mogadishu, kryeqytetin e Somalisë, ka arritur në afro 240, ndërsa mbi 300 u plagosën, në sulmin më vdekjeprurës në historinë e vendit.
Zëvendëskryetari i Dhomës së Lartë të Parlamentit somalez, Abshir Mohamed i tha Shërbimit somalez se numri i të vdekurve është 237.
Presidenti i Somalisë, Mohamed Abdullahi Farmaajo, shpalli tre ditë zie ndërsa bëri thirrje për dhurim gjaku dhe ndihmë për viktimat e sulmit.
Ai u bëri gjithashtu thirrje qytetarëve të bashkohen kundër terrorit, duke thënë se është koha të bashkohemi dhe të lutemi së bashku. “Terrorizmi nuk do të fitojë”, tha Presidenti.
Ende askush nuk e ka marrë përgjegjësinë për sulmin që ndodhi në një kryeqëzim të ngarkuar në kryeqytetin somalez, por grupi militant islamik Al Shabab, që është aleat me Al Qaedan, ka kryer rregullisht sulme në Mogadishu dhe në zona të tjera të vendit.
Abdulkaidr Mohamed Abdulle, korrespondenti i shërbimit somalez të “Zërit të Amerikës”, është mes të plagosurve. Gruaja e tij, konfirmoi për “Zërin e Amerikës” se ai ka pësuar plagë në kokë, qafë dhe në dorën e djathtë.
Sulmi u dënua ashpër nga Shtetet e Bashkuara dhe Kombet e Bashkuara.

Në mbledhjen e ministrave të Jashtëm të vendeve anëtare të Bashkimit Evropian në Luksemburg, është përsëritur përkushtimi për perspektivën në BE të Bosnje-Hercegovinës si shtet i vetëm, i bashkuar dhe sovran.
Ministrat e Jashtëm i kanë miratuar konkluzionet ku shprehet keqardhje për “retorikën përçarëse me origjinë në të kaluarën, ndërsa axhenda e zgjedhjeve të parakohshme gjatë muajve të fundit i ka ngadalësuar reformat dhe ka ndikuar në klimën politike” në Bosnjë.
Ministrat, po ashtu, kanë kërkuar që Sarajeva “t’i shtojë përpjekjet për funksionimin dhe pavarësinë e sistemit të drejtësisë, luftën kundër korrupsionit dhe krimit të organizuar, luftën kundër terrorizmit dhe parandalimin e radikalizimit”.
Bosnja ka mbetur prapa fqinjëve të vet në rrugën për anëtarësim në Bashkimin Evropian.
Marrëveshja për Asociim ndërmjet BE-së dhe Bosnje-Hercegovinës ishte nënshkruar në vitin 2008, por ajo nuk kishte hyrë në fuqi deri në vitin 2015, kryesisht për shkak të mungesës së progresit të Bosnjës në reforma.

Ushtria irakiane ka raportuar se pjesëtarët e saj kanë lëvizur në drejtim të pjesëve të zotëruara nga kurdët, në provincën jugore të Kirkukut.
Në një deklaratë nga ushtria irakiane, thuhet se forcat pro-qeveritare kanë marrë kontrollin e urave, rrugëve dhe infrastrukturës, përfshirë kapacitetet e gazit, një stacion të rrymës dhe një stacion policor, derisa forcat po vazhdojnë të avancojnë.
Zëdhënësi i forcave kurde, Bahzad Ahmed, ka konfirmuar se forcat federale e kanë marrë kontrollin e hapësirave industriale në jug të Kirkukut, gjatë luftimeve nga të cilat ka “shumë viktima”. Ai nuk ka dhënë shifra specifike lidhur me viktimat eventuale.
Ushtria irakiane dhe forcat kurde po përballen me njëra-tjetrën, derisa tensionet vazhdojnë të rriten, pas mbajtjes së referendumit për pavarësi nga Kurdistani, muajin e kaluar.
Ditë më parë, kryeministri irakian Haidar al-Abadi, kishte thënë se ata “nuk do të luftojmë kundër qytetarëve kurdë”.
Tensionet kanë filluar kur komandantët kurdë kanë thënë se kishin kundërshtuar afatin e caktuar nga Bagdadi, për t’u smbrapsur nga pozicionet e tyre në Kirkuk, që i kishin rimarrë derisa luftonin grupin ekstremist, Shtetit Islamik (IS).
Kirkuku është qytet në dalje të rajonit autonom të Kurdistanit, ndërsa forcat kurde Peshmerga, u vendosen aty kur forcat irakiane u larguan pas një disfate nga militantët e IS-it.
Të dyja palët, ajo irakiane dhe forcat kurde janë aleatë të Shteteve të Bashkuara dhe Uashingtoni ka këshilltarë ushtarakë në të dyja grupet, ka thënë Sekretari amerikan i Mbrojtjes, Jim Mattis.
“Të gjithë duhet të përqendrohemi për të mposhtur, militantët ekstremistë të Shtetit Islamik. Nuk duhet të luftojmë me njëri-tjetrin tani”, ka thënë Mattis.
Departamenti amerikan i Shtetit po ashtu kishte reaguar ndaj përballjes, duke shprehur shqetësimet e tyre, ku e rikonfirmuan se ishin të përfshirë në të dyja palët.
Zyrtarët amerikanë u kanë bërë thirrje forcave irakiane dhe kurde që “t’u shmangen lëvizjeve eskaluese”, pas raportimeve për përleshje ushtarake në mes të ushtrisë irakiane, që ka lëvizur në drejtim të qytetit Kirkuk.
Pentagoni ka thënë se të gjithë aktorët në rajon duhet të fokusohen në rrezikun e përbashkët që është grupi ekstremist, Shteti Islamik, dhe që të t’u shmangen rritjes së tensionit në mes të njerëzve në Irak.
Zëdhënësja e Pentagonit, Laura Seal, ka thënë se Pentagoni e kundërshton dhunën nga cilado palë, duke shtuar se, “jemi kundër veprimeve destabilizuese që shpërqendrojnë nga luftimi i grupeve ekstremiste dhe atyre që destabilizojnë stabilitetin në Irak”.
Ushtria amerikane kanë thënë se vazhdojnë ta mbështesin “Irakun e bashkuar” dhe se dialogu është opsioni më i mirë për të mënjanuar tensionet në mes të Qeverisë së Bagdadit dhe liderëve të rajonit autonom, Kurdistanit.
Palët irakiane dhe kurde janë në tension që kur kurdët votuan për pavarësi nga Iraku më 25 shtator.
Bagdadi ka refuzuar bisedimet me palën kurde, derisa referendumi për pavarësi të anulohet.
Referendumi është kundërshtuar edhe nga fuqitë perëndimore, me arsyetimin se një votë e tillë mund të destabilizojë Irakun dhe luftën kundër militantëve ekstremistë të Shtetit Islamik.

Sekretari amerikan i Shtetit, Rex Tillerson e pranoi sot se, Irani “teknikisht po respekton” marrëveshjen ndërkombëtare për frenimin e zhvillimit të armëve bërthamore, por tha se Presidenti Donald Trump kërkon të zbatojë një “stategji më të plotë” për të rregulluar ato që udhëheqësi amerikan i shikon si të meta në pakt.
Kryediplomati amerikan i tha rrjetit televiziv CNN se, Teherani ka “demonstruar praktikën e shkuarjes deri në kufi” të moszbatimit të marrëveshjes së vitit 2015, duke bërë që Presidenti Trump të mos çertifikojë të premten respektimin e marrëveshjes nga Irani, dhe duke ia lënë në dorë Kongresit mundësinë për të rivendosur sanksionet që ishin para arritjes së marrëveshjes së Teheranit me Shtetet e Bashkuara, Bashkimit Evropian, Francën, Britaninë, Gjermaninë, Rusinë dhe Kinën.
Zoti Tillerson tha se, Presidenti Trump dëshiron që Kongresi, ndoshta përmes një marrëveshjeje tjetër, të rregullojë një “numër mangësish” në marrëveshjen bërthamore dhe të trajtojë “një listë më të gjerë kërcënimesh” që Irani paraqet me agresionin ushtarak dhe “aktivitetet destabilizuese” në Lindjen e Mesme. Ai tha se, provat e Iranit me raketa balistike, të papërfshira në marrëveshje, duhet të ndalohen dhe duhet të vendoset një kufizim më përcaktues ndaj programit të tij bërthamor. Zoti Tillerson tha se, marrëveshja aktuale “thjesht shtyn procesin” mbi ambicjet bërthamore të Iranit. Ndërkohë, nëse Kongresi shqyrton nëse do të vërë sanksione të reja, tha zoti Tillerson, Shtetet e Bashkuara dhe vendet e tjera nënshkruese duhet që të zbatojnë plotësisht marrëveshjen.
Ministri i Jashtëm i Iranit, Javad Zarif, që negocioi paktin për Teheranin, i tha emisionit “Face the Nation” në kanalin televiziv CBS se me kundërshtimin e marrëveshjes nga zoti Trump, “askush tjetër nuk do të besojë ndonjë administratë amerikane që të angazhohet në negociata afatgjata, sepse zbatimi i marrëveshjeve afatgjata tani e tutje varet nga zgjatja e mandatit të një presidenti amerikan”.
Ambasadorja amerikane në Kombet e Bashkuara, Nikki Haley, i tha rrjetit televiziv NBC se mendonte se, për momentin Shtetet e Bashkuara do të respektojnë marrëveshjen me shpresat për të përmirësuar situatën dhe se ky ishte synimi. Nuk po braktisim marrëveshjen, tha ajo, por po mundohemi që ta përmirësojmë situatën në mënyrë që amerikanët të ndihen më të sigurtë, u shpreh ajo. Asnjë nga pesë shtetet apo Bashkimi Evropa që arritën marrëveshjen me Iranin nuk është pajtuar me qëndrimin kundër të Presidentit Trump.

Qeveria e Spanjës thotë se lideri separatist i Katalonjës, Carles Puigdemont, ka dështuar të qartësojë nëse ai e ka shpallur pavarësinë pas referendunit në këtë rajon autonom.
Madridi i kishte dhënë afat zotit Puigdemont deri sot për ta qartësuar qëllimin e tij para se qeveria qendrore të lëvizte për suspendimin e autonomisë së Katalonjës.
Në një letër të publikuar para se të kalonte afati, Puigdemont ka kërkuar dy muaj të negociatave me qeverinë e Spanjës.
Zëvendëskryeministrja e Spanjës, Soraya Saenz de Santamaria, tha sot se Puigdemont nuk ka dhënë përgjigje adekuate në letrën e tij dhe se deri më 19 të këtij maji, ai duhet t’i kthehet respektimit të legjislacionit të Spanjës.
Më 10 tetor, liderët e Katalonjës e kanë nënshkruar deklaratën e pavarësisë, por e kanë ndalur implementimin e saj për të mundësuar bisedime me Madridin.
Gjykata Kushtetuese e Spanjës e ka shpallur ilegal votimin në referendum.