Lajme të mira nga infermieria e Interit rreth gjendjes fizike të Mauro Icardit, i cili humbi madje edhe grumbullimin me Argjentinën pas një problemi në gju, që fillimisht u mendua serioz. Ekzaminimet më të specializuara kanë përjashtuar ndonjë këputje të mundshme të tendinës, por thjesht ka enjtje të pjesës së përparme të gjurit të djathtë, shkaktuar gjatë një përplasjeje në ndeshjen e të dielës me Torinon. Sulmuesi argjentinas do të punojë për 4-5 ditë i veçuar, nën kujdesin e fizioterapistit, për t’u vënë më pas nën urdhrat e Luçiano Spallettit. Kapiteni do të jetë i gatshëm për takimin e 19 nëntorit kundër Atalantës së Etrit Berishës.
Lajmet e fundit në lidhje me lëvizjet e Inter në merkaton e janarit tregojnë, se klubi milanez ka një strategji të qartë: asnjë çmenduri, investime të llogaritura, në pritje të thesarit që mund të vijë nga kualifikimi në Champions League. Kështu, ata që presin një Inter shumë aktiv në merkaton e ardhshme mund të mbeten të zhgënjyer.
Por është një lojtar që zikaltrit e ndjekin prej kohësh dhe që është një ‘fiksim’ i vjetër i Walter Sabatini-t. Bëhet fjalë për Javier Pastore, ish-fantazisti i Palermo-s, aktualisht te Paris Saint-Germain. Karakteristikat e tij do të ishin perfekte për të skemën 4-2-3-1 që po përdor trajneri Luçiano Spalletti. Kontrata e tij me PSG-në skadon në 2019-ën dhe, sipas “Transfermarkt”, vlera e tij në tre është 20 milionë euro, po drejtuesit francezë e vlerësojnë 10 milionë euro më shumë.
Këtyre shumave u duhet shtuar edhe rroga 6.5 milionë euro në sezon. E pamundur të ketë të njëjtin shpërblim edhe te zikaltrit, por për këto detaje do të flitet vetëm nëse do të krijohen kushtet e një transferimi. Shtypi francez, ndërkohë, shkruan se Pastore nuk është aspak i kënaqur me zgjedhjet e trajnerit Emery, i cili e ka aktivizuar në vetëm 8 ndeshje në këtë sezon. Një situatë kjo që nuk pëlqehet nga lojtari, i cili mund të largohet në janar. Inter do të provojë të bindë klubin francez, duke i ofruar atyre të fundit portugezin Joao Mario, i cili ka përfunduar jashtë planeve të Spalletti-t.

Marcelo, mbrojtësi brazilian i Real Madrid, beson se e vetmja arsye pse tifozët vërshëllejnë lojtarët është se këta të fundit duhet të përmirësojnë lojën e tyre. “Viktima” e fundit e këtyre vërshëllimave ka qenë sulmuesi francez, Karim Benzema, loja e të cilit kundër Las Palmas, ndeshje e fituar 3-0 nga “Los Blancos”, nuk është pëlqyer nga mbështetësit madrilenë. Skuadra e Zidane është kthyer te fitorja pas dy humbjeve të pësuara kundër Girona dhe Tottenham, por Benzema dhe Ronaldo kanë patur përsëri vështirësi për të gjetur golin të dielën në mbrëmje.
Benzema ka humbur dy raste të pastra dhe është vërshëllyer nga një pjesë e tifozëve të pranishëm në “Santiago Bernabeu”, me sulmuesin francez që ka realizuar vetëm dy gola në 12 ndeshje të luajtura në të gjitha kompeticionet këtë vit.
“Nuk mund të flas për një padrejtësi, sepse të gjithë ne jemi vërshëllyer”, ka thënë Marcelo. “Nëse ata të vërshëllejnë, do të thotë se duhet të përmirësosh diçka. Është e vështirë të luash kur të vërshëllejnë, por duhet të stërvitesh si Benzema dhe të përballesh me këtë situatë siç bën ai. Vërshëllimat janë pjesë e futbollit. Nuk mund të shkojë gjithçka mirë”. Braziliani ka shtuar edhe se Benzema me Ronaldon janë të parët që zemërohen me veten e tyre kur nuk shënojnë. “Ata kanë punuar për ekipin, i kam parë të luajnë mirë. Janë shumë të zemëruar, sepse nuk kanë shënuar, por kanë qenë të lumtur për fitoren”.
Cristiano Ronaldo nuk duket të jetë shumë i shqetësuar për statistikat e tij në këtë sezon të La Ligas, por edhe nëse është, ka bindjen e plotë që do ta kthejë situatën në favorin e tij. Mediat spanjolle kanë zbuluar se në përfundim të ndeshjes me Las Palmasin (sfida e radhës ku portugezi nuk mundi ta gjente rrugën e rrjetës), ai u është drejtuar shokëve të skuadrës, duke u premtuar se në fund do të jetë golashënuesi më i mirë i Primera Division.
Një “bast” shumë i vështirë për t’u fituar nga CR7, që në 11 javët e para të kampionatit ka mundur të realizojë vetëm një gol, në fitoren 1-2 ndaj Getafes, ndërkohë që rivali i tij i madh, Lionel Mesi, ka arritur shifrën e 12 finalizimeve. Cristiano shpreson që të nisë ndryshimin e kësaj tendence shqetësuese për të që në takimin e radhës, në derbin me Atleticon, në Wanda Metropolitano. Një përplasje e veçantë kjo për të, pasi do të luajë për herë të parë në këtë stadium të ri.
Sipas “El Chiringuito”, portugezi beson se klubit është duke i munguar sulmuesi anësor, Gareth Bale. Bale gjatë katër viteve në kryeqytetin spanjoll ka munguar shpesh për shkak të problemeve me lëndime dhe momentalisht është jashtë për shkak të një dëmtimi në kofshë. Uellsiani mungon tash e 40 ditë dhe thuhet se, Ronaldo mendon se mungesa e Bale e dëmton performimin e klubit dhe të tijën në veçanti. Por, lajmi i mirë për Realin dhe Ronaldon është se Bale siç duket do të kthehet për ndeshjen derbi ndaj Atletico Madridit, e cila do të zhvillohet në “Wanda Metropolitano” pas ndeshjeve të kombëtareve.

“Shpresoj që e ardhmja ime të jetë brilante, në shkollë dhe jo vetëm. Veçanërisht në karrierën time si futbollist. Dua të kem një jetë ndryshe dhe ta bëj familjen time të lumtur dhe të tjerët të ndihen krenar për mua. Kam vetëm një objektiv në jetën time dhe ajo është të bëhem një futbollist profesionist dhe shpresoj që kjo të ndodhë te Manchester United”.
Kjo ishte ëndrra e Marcus Rashford, e ruajtur në një copë letër, të cilën e shkruajti kur ishte 11 vjeç. Ambiciet e një futbollisti fare të ri në moshë u bënë realitet, sepse ai sot është një nga futbollistët më të vlerësuar nga Jose Mourinho. “Djali i Mrekullueshëm”, siç e therrasin të gjithë, pak ditë më parë festoi 20-vjetorin.
Sulmuesi është rritur në akademinë e Manchester United, skuadër të cilën e ëndërronte që fëmijë. Debutim ëndrrash për Rashord në atë mbrëmje në Eurupa League, përballë Midtylland, e më pas ndaj Arsenalit. Njeriu i duhur, në vendin e duhur e në momentin e duhur.
Vite më parë 20-vjeçari ka vuajtur nga një problem shëndetësor, që nuk e linte atë të rritej, por e kaloi shumë shpejt. Nuk rritej dot fizikisht, por talentin e tij askush nuk e pengonte dot të zhvillohej. Maturimi erdhi në të gjitha kuptimet, jo vetëm në atë trupor, por edhe atë profesional, nga United në Kombëtaren angleze. Fjalëpak e punëshumë, si në shkollë ashtu dhe në fushë. Qëndron larg zhurmave mediatike, sepse puna për të vlen më shumë se gjithçka. Ky është Marcus Rashford, “Wonderboy” i “Djajve të Kuq”.

Besiktas shpreson të nënshkruajë me Marouane Fellaini nga Manchester United, sipas një anëtari të bordit drejtues të kampionëve turq. Mesfushori i kombëtares së Belgjikës është jashtë kontratës në fund të sezonit 2017-2018 dhe ishte i lidhur me një lëvizje te kolegët e Besiktas, gjigantët e “Super Lig”, Galatasaray, para këtij sezoni. Jose Mourinho i hodhi shpejt poshtë ato thashetheme, edhe pse spekulimet rigjykuan shkurtimisht javën e kaluar, kur pamjet në mediat sociale treguan një burrë që përputhej me kokën e veçantë të Fellainit, duke kaluar kohë në Stamboll.
Më vonë ndodhi që vëllai i Fellainit, Mansour, u kap edhe në kamera me Metin Albayrak, një anëtar i bordit ekzekutiv të Besiktas. Klubi turk ka konfirmuar se po mban një fokus mbi 29-vjeçarin. “Fellaini është në listën tonë, ne kemi bërë përpjekje të nënshkruajmë me belgun, por jo vetëm me atë, thuhet në mediat turke. Ai nuk është i vetmi lojtar që ne e kemi ndjekur. Planet e transferimit nuk përfundojnë kurrë, ne gjithmonë punojmë. Ne po mbajmë skeda mbi disa lojtarë”.

Michael Emenalo ka dhënë dorëheqjen si drejtor teknik i Chelsea-it. Ai ka qenë një figurë kyçe në mekanizmat e klubit londinez nën drejtimin e Roman Abramovich, por ka qenë nën një presion të madh për shkak të luftës së brendshme që po zhvillohet mes Marina Granovskaia, krahu i djathtë i Abramovich, dhe trajnerit Antonio Conte. E ardhmja e këtij të fundit te londinezët nuk është aspak e sigurt, por ai, sipas shtypit anglez, nuk është arsyeja për largimin e nigerianit.
Kështu, pas pakënaqësive të verës për një merkato të varfër dhe një fillim sezoni aspak të mirë, te Chelsea ka rënë koka e parë. Dhe tani mund të fillojë revolucioni: pas 10 vitesh, drejtuesi historik i epokës Abramovich, Michael Emanolo, është larguar nga klubi. Ka qenë një vendim personal i tij dhe lajmi është bërë i ditur nga vetë klubi. Duke filluar nga Abramovich, të gjithë e kanë përshëndetur ish-drejtuesin, duke përfshirë këtu edhe Marina Granovskaia me Antonio Conte, i cili ka thënë: “Më vjen shumë keq që largohet, më ka dhënë shumë këtu. I uroj më të mirat”.