Alibia e Orest Sotës se 863 mijë eurot ishin të destinuara për blerjen e hekurit tek Kompania Kurum kanë rënë. Kompania e pyetur nga prokurorët ka sqaruar se Sota nuk bën pjesë tek lista e klientëve të kësaj kompanie dhe se ajo në asnjë rast nuk operon me shumë para në dorë, por vetëm përmes transfertave bankare.
Sota kishte deklaruar se paratë ishin për blerjen e hekurit tek kjo kompani, ndaj dhe kishte marrë drejtimin drejt vendit ku ndodhet fabrika. Kjo rezulton një mashtrim, i cili nxjerr zbuluar Sotën. Po përse duhet të gënjejë Sota? Kjo është pyetja që ka një përgjigje tjetër. Ai po kërkon të fshehë të vërtetën. Kjo nuk është gënjeshtra e parë e Sotës për prokurorët. Ai ka gënjyer edhe kur është pyetur për Tahirin duke deklaruar se nuk e njeh atë. Në të vërtetë dokumentat e bëra publike nga Basha kanë treguar se Sota ka udhëtuar tre herë së bashku me ish-ministrin e Brendshëm jashtë vendit.

Hetimet i kalojnë Prokurorisë së Krimeve të Rënda

Hetimet e mëtejshme të dosjes Sota dhe dy patentave të Tahirit kanë kaluar nga Prokuroria e Elbasanit në Prokurorinë e Krimeve të Rënda. Do të jetë kjo Prokurori, e cila do të zbardhë të vërtetën e 863 mijë eurove si dhe të dy patentave të Tahirit. Po kjo Prokurori vazhdon të hetojë edhe dosjen e Antimafias italiane për Habilajt dhe Tahirin.

Udhëtimet e Sotës me Tahirin

Ish-ministri i Brendshëm, Saimir Tahiri dhe Orest Sota janë bashkëpunëtorë në trafikun e drogës. Tahiri ka udhëtuar dy herë jashtë shtetit me Sotën, një herë në Itali dhe një herë tjetër në Malin e Zi, ndërsa një herë tjetër Tahiri i ka dhënë Sotës makinën e tij për të udhëtuar jashtë shtetit. Denoncimi është bërë ngë kryetari i PD, Lulzim Basha. Në një postim në Facebook, Basha shkruan se, sa më shumë përpiqet Edi Rama të mbrojë Tahirin, aq më shumë i del boja si i lidhur me krimin dhe përfitues i tij. “Rama po gënjen prapë për llogari të Tahirit, sepse kjo është e vetmja mënyrë për të mbrojtur veten e tij. Tahiri dhe Sota janë bashkëpunëtorë në trafikun e milionave të drogës dhe po përpiqen çdo minutë të fshehin provat.
Burime të sigurta informojnë se:
1. Tahiri dhe Sota kanë udhëtuar bashkë për në Itali, me datë 2 gusht 2016 nga Porti i Durrësit. Ata janë larguar nga Italia bashkë dhe janë rikthyer në Shqipëri me datë 7 gusht 2016 me të njëjtën linjë.
2. Në 1 shtator 2017 Tahiri dhe Sota janë larguar bashkë nga Shqipëria nëpërmjet Muriqanit dhe janë kthyer bashkë me datë 3 shtator 2017 po nëpërmjet Muriqanit.
3. Në 6 shtator 2017 Orest Sota ka dalë nga Shqipëria, duke përdorur makinën e Tahirit.
Fakte të tjera tronditëse pritet të publikohen së shpejti. Edi Rama dhe qeveria e tij janë të zhytur në krim dhe të kapur nga krimi. Largimi i tyre është imperativ kombëtar”, deklaroi Basha.
Sota u arrestua nga Policia e Elbasanit, ku gjatë një kontrolli iu gjetën në makinë 863 mijë euro dhe 2 leje drejtimi për mjete lundruese në emër të Saimir Tahirit. Policia mbajti të fshehtë lajmin dhe u detyrua ta publikojë pas denoncimit të kryetarit të PD, Basha. Në deklaratën e saj, Policia nuk e thotë shumën e eurove të bllokuara dhe gjetjen në makinën e Sotës të dy patentave të drejtimit të mjeteve lundruese të Tahirit.

Oresti kishte lidhje edhe me Ramën dhe Olsin

Orest Sota kishte lidhje jo vetëm me Tahirin, por edhe kryeministrin Rama dhe vëllain e tij Olsin. Një qytetar ka informuar ish-Kryeministrin Berisha se, Tahiri në kohën kur ishte ministër i Brendshëm e përcillte Orestin në Rinas drejt Gjermanisë. “Ja lidhjet e Orestit me Olsi, Edi Ramën dhe si e përcillte Sajmir Trafiku, Orestin në Rinas! Lexoni mesazhin e qytetarit dixhital”, shkruan Berisha.
“Përshëndetje Doktor. Desha të informoj për disa fakte mbi lidhjet e Orestit me Ramën dhe Tahirin. Thuhet se burri i motrës së Orestit që u ndalua është tek ai grupi i kokainës, ku bën pjesë Olsi. Sidoqoftë duhet riverifikuar. Atë vit, Oresti shtroi të jëmën në spital në Gjermani me talasemi, ku ishte shtruar dhe babai i Tahirit dhe u bënë shumë miq. Që atëhere, ai hynte e dilte nga VIP i Rinas me valixhe që njoftohej nga Tahiri ose i jati. Në VIP, këtë e dinë të gjithë si familjar i Tahirit dhe është regjistruar.

Ja kush e pajisi me leje lundrimi Tahirin

Ish-Kryeministri Berisha në një postim të tij të fundit në profilin e tij në Facebook ka treguar nëpërmjet një mesazhi të ardhur nga qytetari dixhital, se si është pajisur Saimir Tahiri me patentë lundrimi. “Ja si u pajis me dy patenta lundërtari i madh Saimir Trafiku! Dokeri dixhital denoncon”, shkruan Berisha.
“Përshëndetje doktor. Lefter Sota është partner biznesi me Ibrahim Domin. Ibrahim Domi ka të vetin Hamdi Domin. Hamdi Domi është ai që ka firmosur patentat dhe që është përgjegjësi i sektorit të mjeteve lundruese dhe detare (gjithashtu dhe pjesë e QNOD). Për firmosjen e patentave të Saimir Tahirit në kundërshtim me çdo ligj është paguar mirë edhe Paulin Ndreu.
Nga ana tjetër, Ibrahim Domi është edhe partner me Fatmir Volotin, që besoj se e di që është prestanome i Gjushit. Voloti është një nga dy-tre të vetmit që ndërton sot në Durrës. Ka ndërtuar te Lulishte “1 Maji” ku u zhdukën ato rrënojat antike”, shkruan qytetari.

Prokuroria, nën hetim të gjitha pasuritë e Orest Sotës

E gjithë pasuria e Orest Sotës pritet të kalojë nën sitën e Prokurorisë. Biznesmeni 25-vjeçar do të duhet të justifikojë para drejtësisë burimin e 863 mijë eurove që iu gjetën në makinë, së bashku me dy patenta për lundrim të ish-ministrit të Brendshëm, Saimir Tahiri. Ai ka deklaruar se, paratë i kishte për të paguar një paradhënie në kompaninë Kurum për të blerë hekur për një firmë ndërtimi të babait të tij, por ky version është rrëzuar nga Kurum.
Prokuroria dyshon se kjo shumë mund të ketë ardhur nga aktivitete të paligjshme ose nuk është deklaruar për t’iu fshehur tatimeve. Nisur nga këto dyshime, dosja mund të kalojë në Prokurorinë e Krimeve të Rënda. Prokuroria e Përgjithshme dhe ajo e Elbasanit po shqyrtojnë të dhënat hetimore dhe do të vendosin për të nisur hetimin për pasuritë e Sotës dhe të afërmve të tij.
Në sitën e hetuesve mund të kalojë kompania “Eko Konstruksion” e Sotës apo firma e ndërtimit e babait të tij. I ati i Sotës mësohet se është shprehur se paratë ishin kursime të tij ndër vite dhe ishin të destinuara për blerjen e hekurit te kompania Kurum.
Burime nga grupi hetimor thonë se, pritet që të merren deklarime në formë proceduriale nga drejtuesit dhe menaxherët e kompanisë turke në Elbasan. Ata pritet të japin deklarime, nëse kishin porosi për hekur nga biznesmeni Sota dhe nëse kishin ndonjë pagesë për të marrë me paratë që mbante me vete 25-vjeçari.
Edhe pse dosja mund të kalojë te Krimet e Rënda, burime nga grupi hetimor sqarojnë se deri tani nuk ka ndonjë të dhënë për ta bashkuar dosjen e biznesmenit me hetimin e nisur për ish-ministrin e Brendshëm, Saimir Tahiri, si të përfshirë në grupin e trafikut të drogës, të drejtuar nga vëllezërit Habilaj.

Muajin e parë që Mimi Kodheli është emëruar në krye të Ministrisë së Mbrojtjes, është tentuar të kalojë një anije e pakontrolluar, por është ndaluar nga QNOD në ikje. Pas kësaj është kërcënuar personalisht nga vetë ministri i Brendshëm, Saimir Tahiri, njëri nga drejtorët e policisë detare përpara se të vinte shkarkimi i tij. Skandali është denoncuar nga dy oficerë, të cilët i janë drejtuar me mesazhe ish-Kryeministrit Berisha. Oficerët deklarojnë se, pas janarit 2014 ku drejtori i QNOD dorëzoi detyrën për Maksim Malajn, radarët janë fikur disa herë, por media ka publikuar vetëm një rast, që ishte vera e këtij viti.
“Ushtarakët dixhital denoncojnë Ndrikull Kodhelin dhe Gjeneral Trafikun për mbështetje të fuqishme për narkotrafiqet! I bëj thirrje Prokurorisë së shtetit të hetojë me guxim për krimin e tyre të shëmtuar, pjesëmarrjen në narkotrafiqe!”, shkruan Berisha.
“Zoti Berisha, po ju kontaktoj me adrese anonime për arsye sigurie, por dua të ndaj me ju një shqetësim dhe ju lutem publikojeni. Shqetësimi është ky:
Sot u hodh baltë mbi një institucion që u mor nga normaliteti në vitin 2013 dhe u kthye në portën e trafikimit të drogës në vitet 2013-2017, siç është QNOD (Qendra Ndërinstitucionale Operacionale Detare). Mimi Kodheli mashtroi hapur kur tha që radarët nuk punonin, pasi që ditën që drejtori në ikje, z.Shefqet Bruka ka dorëzuar detyrën, radarët kanë qenë në gjendje optimale dhe nuk janë fikur asnjëherë. Eshtë tentuar një herë, por me ndërhyrjen e autoriteteve tuaja gjithçka ka përfunduar pa pasoja. Menjëherë, pasi Mimi Kodheli ka ardhur në krye të Ministrisë së Mbrojtjes, në muajin e parë të emërimit dikush ka tentuar fillimisht të kalojë një anije të pakontrolluar, por është ndaluar nga QNOD në ikje. Pas kësaj është kërcënuar personalisht nga vetë ministri i Brendshëm, Saimir Tahiri, njeri nga drejtorët e policisë detare përpara se të vinte shkarkimi i tij. Pas janarit 2014 ku drejtori i QNOD dorëzoi detyrën për Maksim Malajn, radarët janë fikur disa herë, por media ka publikuar vetëm një rast, që ishte vera e këtij viti.
Deklarimi i ministres së Mbrojtjes, Mimi Kodheli para mediave, më datën 19 shkurt 2014, gjatë vizitës në Qendrën Ndërinstitucionale Operacionale Detare (QNOD) në Plepa, Durrës, me rastin e ngritjes së kapaciteteve të vëzhgimit të hapësirës detare, (e cila shoqërohej edhe nga Shefi i Shtabit të Përgjithshëm të FA, Gjeneral Major Jeronim Bazo, dhe Seks-eristi Kraja), për “vendosjen në funksion të plotë pune të Sistemit të Integruar të Vëzhgimit të Hapësirës Detare – SIVHD-së” nuk ishte i vërtetë, sepse deri në atë datë ishin vendosur në gatishmëri pune vetëm 3 nga 7 radarë të sistemit. Ky deklarim ishte një mashtrim spektakolar dhe shumë i guximshëm, veçanërisht përpara përfaqësuesve ndërkombëtarë që monitorojnë këtë qendër, mashtrim, i cili ka vazhduar edhe në sallën e Parlamentit shqiptar (ministrja Kodheli ka deklaruar që janë vendosur në muajin janar 2014). Kushtet dhe faktorët që detyruan ministren të pranojë këtë lloj deklarimi jo të vërtetë kanë qenë tepër dominues, imponuese, detyrues ndaj/nga firma IDEA-TEL Sh.p.k. Firma (sepse kish marrë 20% si “dhuratë për Krishtlindjet) duhet ta kishte realizuar kontratën për vendosjen në gatishmëri pune të sistemit deri në 15 shkurt 2014, kontratë e cila u zgjat edhe me 45 ditë të tjera edhe me një shtesë kontrate 20% tjetër, (sepse Mrika u embëlsu shumë nga hera e parë).
Njëkohësisht ministrja e Mbrojtjes, Mimi Kodheli mashtroi gjithashtu me deklarimet si për: kohën e mosfunksionimit të sistemit (sipas deklarimit të saj: “jo funksional prej mëse 3 vjetësh”- pra prej vitit 2011), sikurse “mashtron çdo herë për radarët), sikurse edhe për kostot financiare për riparimin e sistemit (referuar deklarimit të saj: gjysmën e fondit të parashikuar nga qeveria e mëparshme).
Sistemi i radarëve ka patur defektim të dy radarëve gjatë vitit 2012, deri në muajin maj të vitit 2013 ka patur në gjendje pune pjesërisht katër radarë dhe prej shtatorit 2013 vetëm dy radarë në gjendje pune, por kur sistemi nuk ka qenë jashtë funksionit, pasi funksiononin nënsisteme dhe mjete të tjera evidentimi-zbulimi në hapësirën detare shqiptare. Radarët janë vendosur vetëm 80% në punë në fund të muajit mars 2014 – sipas dokumentave-datave të pasqyruara në Raportin teknik të muajit të radhës (Ah po tani vetëm sa rrotullohen, ca nga era ca nga rotori). Kjo Mrikë, me procedurën e re të “Mirëmbajtjes të sistemit 3-vjeçar” në vitin 2015, i transferoj “depot e pajisjeve të sistemit” tek firma private, nuk siguroj asnjë “pjesë rezervë”, pavarësisht se edhe sot e kësaj dite “depot e repartit janë plot dhe do të flaken, sepse Mrika e ndryshoi sistemin, Frekuencat ja ka vazhduar tja dhurojë përsëri po të njëjtës firmë, edhe bisedat e raportimet e personelit ushtarak, tani përgjohen dhe monitorohen nga firma.
Së fundmi instaloi dhe kamera tek konteinerët që të koordinojë saktë “fikjen-bllokimin e radarëve. Kjo ka ndodhur vetëm tek ne, Mrika ka harruar se jemi në NATO, kishte hallin e “Buxhetit familjar”, të “ekskursioneve të paguara me koncera, por vetëm se nisej nga Italia, që të mos e zbulonin, pa thënë të tjerat – se i ka “buzët” akoma me “jargë kastraveci”. Mrikë, përgatitu për Byronë Kombëtare të Hetimit, nuk të shpëton dot as Rama, as Arjani, as edhe “Radari i ri” i Zonjës së Re!. Kjo po e fillon nga Ajri. Në ato dokumenta dalin edhe fakte tronditëse se QVD ka raportuar për fluturimet e avionëve dhe helikopterëve, që fluturonin në distanca – lartësi të ulëta, por Mrika dhe Shefi-Sekseri i Drogës Gjenerali “Konjaku”, nuk i raportonin dhe analizonin të dhënat. Mrika ka qenë “vdekja” e moralit, shkollimit, arsimimit, suportit dhe drejtësisë për FA, e vetmja ministre, që kur u largua vetëm “qentë” e MM e përcollën. Ministrja më e dështuar në MM, shkatërroi të gjithë inteligjencën dhe profesionalizmin ushtarak, largoi të gjithë Profesorët, numrin më të lartë të të larguarve nga ushtria, mbylli kurset e Doktoraturave, shkatërrove reparte të tëra (ja dhuroi SK Partizanit), fale prona pa hesap, asnjë rritje financiare apo trajtim për ushtarakët, asnjë premtim të shprehur nuk mbajte, shpërbleve të gjithë mediokrët, injorantët, dallaverexhinjtë, spiunët, regjistruesit e chateve, vodhe me tenderat e mbyllur – çdo tender shkoi tek FastTech dhe IDEA TEL, aplikove stilin e gradimeve dhe shpërndarjes së yjeve me lekë”, shkruan oficeri.
“Përshëndetje Doktor Berisha, shumë falenderim dhe mirënjohje për mbështetjen në këtë “kauzë” shtetërore të luftës kundër kanabizimit, mega korrupsionit dhe shumë aferave të tjera skandaloze të ish-ministres Kodheli. Ndrikulla doli dje në TV për t’u prononcuar, pasi mori konfirmimin e “Kunati” Gent Ibrahimi, renditet i pari në listën e pikëve për në KLGJ, dhe doli përsëri dhe “Mashtroi”, por në mënyrën më të skrupullt dhe duke buzëqeshur. Do të të dërgoj faktet e mashtrimeve të saj unikale, por do të duhet që Prokuroria të veprojë. Vetëm dje, ajo ka “kundërshtuar” disa herë pohimet e mëparshme të saj. Do të të dërgoj një material tjetër. Shumë mirënjohje dhe respekte për mbështjetjen”, shkruan një oficer tjetër.

Adrian Xhillari, i shpallur në kërkim prej vitit 2015 pasi kishte kontrabanduar 4.4 milionë litra naftë bruto për të shmangur akcizën, është arrestuar nga Interpoli në Zvicër. Burime nga Prokuroria e Fierit bënë të ditur se, Xhillari ishte ndaluar javën e kaluar në Zvicër, ndërkohë që pala shqiptare pret që ai të ekstradohet për t’u përballur me drejtësinë. Të njëjtat burime thanë se, Prokuroria e Përgjithshme ka dërguar menjëherë letër-porosinë e shoqëruar me urdhër-ndalimin dhe dosjen hetimore në ngarkim të Xhillarit, me qëllim ekstradimin e tij në Shqipëri.
Administratori i kompanisë “Tea Construksion & Petrol sh.a”, Adrian Xhillari akuzohet për veprat penale “fshehje e të ardhurave”, “mospagim i taksave” dhe “pastrim i produkteve të veprës penale ose veprimtarisë kriminale” dhe ndaj tij vazhdon të qëndrojë në fuqi masa e sigurimit “arrest në burg” e dhënë në mungesë.
Sipas organit të akuzës, kompania e Adrian Xhillarit, “Tea Construction & Petrol”, ka kontrabanduar 4.4 milionë litra naftë bruto për të shmangur akcizën, duke e shitur naftën në tregun vendas, kryesisht në Fier, Vlorë, Durrës, Shkodër dhe Tropojë. Sipas Prokurorisë, gjithçka ka nisur në maj të vitit 2010, ku “Tea Construction & Petrol”, ka blerë nga Kombinati i Përpunimit të Thellë të Naftës Ballsh sasinë prej 5.6 milionë litra “naftë virxhin”, e cila ishte e depozituar në një depozitë në Ballsh dhe në 4 depozita në Kodër Mëzez, Tiranë.
Pas 3 vitesh, në janar të 2014, Drejtoria e Përgjithshme e Doganave, ka kryer një kontroll tatimor në subjektin “Tea Construction & Petrol”, ku ka rezultuar se në depozitat në Kodër Mëzez gjendej në total sasia prej 4.4 milionë litra lëndë djegëse, e cila është cilësuar si naftë “virxhin”, pasi nuk plotësonte standardet. Rreth 7 muaj më vonë, në janar të 2014, pas kontrollit të bërë nga tatimet dhe doganat, administratori i “Tea Construction & Petrol”, Adrian Xhillari, ka kërkuar nga Drejtoria e Doganave heqjen e plumçeve nga magazinat e naftës në Kodër-Mëzez, në mënyrë që të bënte lëvizjen e naftës drejt rafinerisë së Ballshit.
Sipas dokumenteve, nga data 15-21 gusht 2015, “Tea Construction & Petrol” ka kryer lëvizjen e naftës virxhin, nën pezullim akcize, nga depozitat në Kodër-Mëzez, për në Rafinerinë e Ballshit, në një sasi prej 4.4 milionë litrash, e cila është depozituar në depozitën G-43. Por në datë 2 qershor 2015, grupi i “Crown Agents” dhe Dega e Doganës Fier, kanë zbuluar gjatë kontrollit në depozitën G-43 se depozitat ishin bosh. Referuar sasisë së naftës, vlera e akcizës së papaguar është 242.755.600 lekë.

Kontrabanda 4.4 milionë, si u hodh në treg nafta virxhin

Pas arrestimit të shtatë zyrtarëve të Drejtorisë së Doganave, javën e parë të muajit dhjetor 2015 të akuzuar për “zhdukjen” e 4.4 milionë litrave naftë “Virxhin”, Prokuroria zbardhi skemën si ka ndodhur krimi i rëndë. Sipas Prokurorisë, vepra është kryer nga “Tea Construction & Petrol”.
Në dosjen e Prokurorisë, thuhet se kompania e Xhillarit ka blerë nga rafineria e Fierit naftë “Virxhin” për eksport të cilën fillimisht e ka depozituar në depozitat e marra me qira në Mëzez të Tiranës. Më pas, gjatë periudhës 15 deri 21 gusht të 2014 me leje të zëvendësdrejtoreshës Njebza ka përpiluar raportet e dërgimit të sasisë prej 4.4 milionë litër naftë “Virxhin” drejt rafinerisë së Ballshit. Po më 21 gusht doganieri tashmë i arrestuar, ka përpiluar një procesverbal fiktiv, duke shënuar se ka dyllosur depozitat me naftë “Virxhin” të një sasie prej 4.4 milionë litër.
Ndërkohë, në qershor të 2015 është ushtruar kontroll në këto depozita nga inspektorët doganorë, ku ka rezultuar se të gjitha depozitat ku mendohet se mbaheshin 4.4 milionë litër naftë “Virxhin” janë bosh. Kjo ka bërë që Prokuroria të dyshojë se ata janë shpërndarë dhe shitur nëpër pika karburanti në gjithë Shqipërinë nga kompania e Xhillarit. Duke iu shmangur kështu detyrimeve tatimore me vlerë rreth 250 milionë lekë të reja.

Si tentoi qeveria të fshehë skandalin e naftës virxhin

Ishte presioni i opozitës që bëri të dështonte skenari i qeverisë për mbulimin e vjedhjes së akcizës nëpërmjet tregtimit të paligjshëm të naftës virxhin. Për të fshehur skandalin e vjedhjes së miliona eurove nga nafta virxhin, në qershor të vitit 2014, Lula Njebza nga kryetare dogane në Lezhë u emërua kryetare dogane në Fier. Ajo qëndroi në këtë detyrë deri dy javë para se të arrestohej më nëntor të vitit 2015. Emërimi i saj në krye të doganës së Fierit u bë për të mbuluar gjurmët e skandalit me Xhillarin. Ajo ka qenë nëndrejtoreshë e doganave, si dhe drejtoreshë akcize.
Çelësi i hetimit ishte në doganën e Fierit, pasi të gjitha shkresat për evadimin e kësaj sasie si dhe kontrollin e depozitave e kishte dogana e Fierit. Në këtë doganë mblidhen rreth 50% të të ardhurave të akcizës së naftës në raport me planin e përgjithshëm. Pra, ky emërim ishte mjaft i rëndësishëm dhe nuk mund të kalonte pa pëlqimin e kryeministrit.
Edhe vetë Xhillari nuk mund të vepronte pa lejen e ndonjë shefi të madh, pasi në lojë ishin shuma të mëdha parash. Çështja u tentua të hetohej nga drejtuesit e mëparshëm dhe më pas, ata dhanë dorëheqjen. Në nëntor 2014 dha dorëhqejen drejtoresha e Përgjithshme e Doganave, Elisa Spiropali. Atëherë u fol dorëheqja e Spiropalit që lidhet me këtë çështje, pra është një dorëheqje presioni.
Një zyrtar i doganës që i tregoi zëvendësdrejtorit Shtylla se çfarë kishte ndodhur u largua nga puna, pasi u kërcënua me jetë nga qarqe kriminale, duke përdorur dhe punonjës policie të krimeve. Madje, deri në sajesa për ta arrestuar në një skenar identik i rastit “Zagani”.
Pikërisht në këtë periudhë bëri një vizitë në Tiranë, Ndihmëssekretarja Nuland. Fill pas këtij takimi kryetari i PD, Basha bëri disa deklarata që më pas tronditën qeverinë për skandalin e naftës virxhin dhe inkurajuan fillimin e procedimit për skandalin e naftës.
Kryetari i PD, Basha e denoncoi këtë skandal në një mbledhje të Grupit parlamentar të PD. “Muaj më parë kemi denoncuar kontrabandën kolosale të naftës virxhin në sasi prej qindra mijëra tonë që hyri në Shqipëri me dokumenta të falsifikuara sikur do ta çonin në rafineritë e naftës, ndërsa në fakt e hodhën në tregun e shitjes me pakicë, duke e përzier me karburantin që tregtohet për qytetarët që kanë në zotërim një automjet. Dëmi i kësaj kontrabande ishte i shumëfishtë. Miliona euro dëme për arkën e shtetit, mijëra e mijëra automjete të qytetarëve të dëmtuara nga cilësia e keqe e naftës së përzier, impakt shumë negativ në cilësinë e ajrit dhe mjedisit. Hetimi dhe ndëshkimi ligjor i këtij krimi të përbindshëm duhet të përfshijë gjithë rrjetin kriminal që e ka mundësuar, që nga komanduesit, kontrabandistët dhe shpërndarësit; është një imperativ për organet e drejtësisë, për të rikthyer besimin në forcën e ligjit, për të vënë në vend të drejtat e goditura hapur apo në mënyrë tinzare të qytetarëve nga xhepat e të cilëve janë zhvatur miliona, sepse kanë paguar si naftë të cilësisë së parë, naftën kallpe. Pse zvarritet ky hetim, pse mbahet i bllokuar, nga kush dhe përse? Prokuroria ka gjithë mbështetjen e opozitës dhe publikut për t’i shkuar në fund këtij hetimi, pa u ndalur para asnjë pengese”, deklaroi atëherë Basha në një mbledhje të Grupit parlamentar të PD.

GFI: Kontrabanda e naftës bruto, 70 milionë dollarë në vit

GFI Albania më datë 11 dhjetor 2015 bëri të ditur përmes një deklarate për shtyp se, evazioni fiskal në sektorin e naftës bruto vlerësohet të jetë në nivelin e 70 milionë dollarëve në vit. Sipas kompanisë së markimit dhe monitorimit të hidrokarbureve, kushtet e marrëveshjes konçesionare të GFI Albania me Autoritetin Kontraktues parashikonin markimin dhe monitorimin e karburanteve si dhe të naftës bruto, por Autoriteti nuk respektoi detyrimin ligjor dhe kontraktual të markimit të naftës bruto.
GFI ka listuar gjithashtu arsyet, që kjo kompani ka kontribuar në luftën ndaj evazionit fiskal në Shqipëri. “GFI Albania ka punuar që nga viti 2013 vetëm me 30% të kapacitetit të planifikuar. Megjithë humbjet financiare të akumuluara gjatë këtyre dy viteve, ne jemi krenarë për kontributin tonë në luftën kundër evazionit fiskal:
• Sepse përmes punës së GFI Albania, buxheti i shtetit gjatë vitit të fundit i ka rritur të ardhurat me 60 milionë USD shtesë, në një kohë që shumë tregues të tjerë fiskalë kanë pësuar rënie;
• Sepse kemi zbuluar dhe i kemi raportuar me prova Autoritetit Kontraktues, që disa qindra pika karburanti në vend furnizonin qytetarët me karburante kontrabandë apo të përziera, duke shkaktuar kështu jo vetëm humbje fiskale, por edhe dëme për ambientin, mjetet motorike dhe shëndetin publik;
• Sepse i kemi vënë në duar Autoritetit Kontraktues një instrument të teknologjisë së lartë, që duhet të përdoret për të luftuar evazionin fiskal edhe në sektorin e naftës bruto që vlerësohet të jetë në nivelin e 70 milionë dollarëve në vit”, thuhet në njoftim.
GFI theksonte se, “markimi dhe monitorimi i naftës bruto është detyrim ligjor si dhe instrumenti i duhur për të luftuar evazionin në këtë industri, ndaj kompania do të vijojë programin e saj, duke vënë në punë sistemet dhe teknologjitë që i shërbejnë këtij qëllimi”.

Xhillari i “naftës virxhin” hetohet edhe për pastrim parash

Adrian Xhillari, akuzohet nga Prokuroria edhe për një vepër të re penale. Njësia Task Forcë e Prokurorisë ka ngritur ndaj tij akuzën e “pastrimit të produkteve të veprës penale”. Adrian Xhillari ishte aksioner i vetëm në kompaninë “TEA OIL ITALIA” me zotërimin e gjithë aksioneve. Në vitin 2013, në muajin mars, shtetasi i huaj Amiran Dzanashvilli rezulton se është bërë bashkortak i kompanisë së Xhillarit, duke blerë 51% të aksioneve. Një sasi prej 1.8 milionë lekësh të rinj ka kaluar në llogaritë e Adrian Xhillarit, i cili më pas ka krijuar shoqërinë “Tea Construction & Petrol”.
Për këtë subjekt, Prokuroria e Fierit ka ngritur akuzën e kontrabandës me vlerë rreth 2 milionë euro përmes hedhjes në treg pa zhdoganuar e pa përpunuar naftën virgin, e cila është e ndaluar të shitet në atë gjendje. Rreth 12 muaj pas shitjes së aksioneve, shtetasi i huaj Amiran Dzanashvilli ia ka kthyer aksionet Adrian Xhillarit, siç rezulton në dokumente, kësaj here jo duke ia blerë, por duke ia falur.
Në këtë kohë, shtetasi i huaj ka firmosur një kontratë ku deklaron se po ia kthen aksionet Xhillarit për t’ia falur. Pikërisht një veprim i tillë, sipas Prokurorisë, dyshohet se është kryer për të pastruar një shumë të konsiderueshme parash në emër të kompanisë “TEA OIL ITALIA”.
Për këtë subjekt, sipas Prokurorisë, Drejtoria e Pastrimit të Parave pranë Policisë së Shtetit ka konstatuar miliona transaksione të dyshimta dhe për pasojë ka paraqitur edhe kallëzimin penal përkatës.