Lënia jashtë e kapitenit të kombëtares shqiptare Ansi Agolli nga trajneri Christian Panucci për miqësoren ndaj Turqisë bëri jo pak bujë në media. Për të sqaruar situatën ka menduar vetë mbrojtësi i Qarabagut dhe kapiteni i kuqezinjve, i cili i ftuar në emisionin “Zona Gol” në Supersport ka shuar çdo polemikë.
“Panucci më telefonoi dhe më shprehu besimin e tij. Për të unë vazhdoj të jem pjesë shumë e rëndësishme e kombëtares. Trajneri ka një projekt afatgjatë te Shqipëria dhe kërkon të provojë sa më shumë lojtarë, kjo është arsyeja kryesore që unë nuk jam pjesë e këtij grumbullimi, pasi bëhet fjalë thjeshtë për një ndeshje miqësore. Tërheqja ime nga kombëtarja? Këtë nuk mund ta them, në futboll nuk mund të bësh parashikime, nuk e di edhe për sa kohë do të luaj. Unë gjithsesi ndihem i kompletuar për ato çfarë kam arritur me Shqipërinë. Jam kapiteni i kombëtares dhe kam luajtur në një kampionat europian, pasi përsa i përket trofeve, me Shqipërinë kjo gjë është e pamundur”, u shpreh Agolli.
Edhe pse është 35 vjeç te Qarabagu, Ansi Agolli po përjeton një rini të dytë. Pak ditë më parë, ai u përfshi në formacionin më të mirë të javës në Champions League. Agolli nuk e fsheh kënaqësinë, ndërsa shpreson të vazhdojë të luajë gjatë me skuadrën azere. Për momentin, kapiteni i kuqezinjve as që e mendon rikthimin në Kategorinë Superiore. “Deri tani kemi bërë paraqitje shumë të mira me skuadrën e Qarabagut në Champions League, normalisht është një kënaqësi më vete të japësh më të mirën tënde, në mënyrë që ekipi të arrijë ato objektiva që ka. Sigurisht që u ndjeva mirë që e pashë veten në formacionin e javës në Champions. Unë te Skënderbeu? Kam kontratë me Qarabagun, ndihem mirë te klubi ku jam dhe dua të qëndroj sa më gjatë aty”, tha ai.
Agolli nuk ka asnjë peng nga karriera e tij e deritanishme, ndërsa ëndërron që në të ardhmen të festojë edhe një tjetër titull kampion me Tiranën. “Nuk kam asnjë peng nga karriera ime e deritanishme. Për fat të mirë i kam arritur të gjitha ato që kam dashur dhe për të cilat kam luftuar, gjithmonë bëhet fjalë brenda mundësive. Megjithatë, kam edhe një dëshirë të fundit përpara se të var këpucët në gozhdë, të fitoj edhe një tjetër titull kampion me Tiranën, pasi ndjesitë dhe emocionet që kam përjetuar kur kam qenë pjesë e bardhebluve nuk do t’i harroj kurrë. Kam kaluar një periudhë të bukur te Tirana dhe kam ndjesi të veçanta për atë skuadër”, përfundoi Agolli.

Jose Mourinho nuk deshi t’i shtrëngonte duart me Antonio Conte, pasi Manchester United u mund 1-0 nga Chelsea të dielën. Çifti ka mbajtur një marrëdhënie të vështirë, që kur Conte mbërriti në Premier League dhe temperamentet u ndezën në sezonin e kaluar, kur italiani u akuzua se si festoi gjatë një përplasjeje të humbur 4-0 nga “Djajtë e Kuq”. Të dielën, gjithashtu, Mourinho u anashkalua nga Conte në bilbilin përfundimtar, pasi trajneri i Chelsea shkoi drejt e në fushë për të përshëndetur lojtarët e tij, duke e lënë “Special One” me anëtarët e stafit të tij me “gisht në gojë”.
Trajneri i Manchester United, megjithatë, këmbënguli se nuk kishte asnjë problem mes të dyve, kur u pyet për shtrëngimin e duarve, që mungoi. “Doni që unë të shkoj dhe ta ndjek atë në mes të fushës? Unë isha atje. I shtrëngova duart me njerëzit që ishin atje, u tha portugezi gazetarëve pas ndeshjes. Unë mendoj se njëri prej tyre ishte vëllai i tij, asistenti, kështu që ndjej se duke i shtrënguar duart e vëllait dhe asistentëve të tjerë, e kam bërë detyrën time. Nuk mund të shkoj e të vrapoj për ta ndjekur Conten. Pse duhet të pres në tunel? Ai nuk duhet të presë. Nuk kam problem me të fare. Ju jeni gjithmonë të shqetësuar me këto gjëra, por nuk ka problem”.
Mourinho shtoi se, Manchester United deshi të marrë diçka larg shtëpie, në një ndeshje që u vendos përfundimisht nga goli i Alvaro Morata. “Ishte një ndeshje e madhe në mënyrë taktike, emocionale, fizike. Sigurisht që na mungonin disa lojtarë të rëndësishëm, që nuk ishin në dispozicion. Ne treguam iniciativë, kurajë dhe patëm rastin të barazojmë, gjë që do të ishte një rezultat i drejtë”.
Antonio Conte fiton sfidën me Murinho-n, ndërsa Chelsea mund Manchester United në ndeshjen e javës së 11 të kampionatit anglez. Në “Stamford Bridge”, ndeshja mes këtyre dy skuadrave u mbyll me rezultatin e ngushtë 1-0 me Chelsea, që kishte edhe mundësi të tjera për shënim, ashtu sikurse i pati edhe United në portën e Courtois.
Ai që vendosi sfidën në favorin e “Bluve” ishte një njohje e vjetër e Mourinho, Alvaro Morata, i cili e shënoi golin e fitores për kampionët e Anglisë në minutën e 55 të ndeshjes. Ai që u gëzua më shumë për fitoren e Chelsea-t ishte Pep Guardiola, trajneri i Manchester City-t, që pas fitores 3-1 me Arsenalin e ka çuar në 8 pikë diferencën me rivalët e United në vendin e dytë.
Manchester City po tregon një formë fantastike këtë sezon në Premier League, duke arritur fitore pas fitoreje, madje edhe ndaj rivalëve kryesorë. Këtë herë ishte radha e Arsenalit të dorëzohej përballë skuadrës së drejtuar nga Guardiola, e cila fitoi 3-1. De Bruyne realizoi që në minutën e 19-të, duke i dhënë një drejtim të pakthyeshëm sfidës, ndërsa në fillim të pjesës së dytë Aguero i çoi shifrat në 2-0 me golin e tij të 179-të me fanellën e City-t. Lacazzete rihapi përkohësisht takimin në minutën e 69-të, pasi 5 minuta më vonë, Gabriel Jesus realizoi të tretin për ekipin e tij dhe të fundit të sfidës.

Ronaldo, legjenda e futbollit brazilian, ka sugjeruar se Neymar mund të jetë larguar nga Barcelona për shkak të problemeve që ka patur me bordin drejtues, siç i ka ndodhur atij në 1997-ën. “Fenomeni” ka qenë i papërmbajtshëm në sezonin e tij të vetëm me katalanasit, duke realizuar 34 gola në 37 ndeshje të luajtura në kampionat, por u transferua tek Inter, pasi negociatat për rinovimin e kontratës dështuan. Largimi i Neymar nga Barcelona ka qenë po aq i zhurmshëm, me të dy palët që kanë kërcënuar se do t’i drejtoheshin Gjykatës, teksa “O Ney” ka shkuar te PSG për një shifër rekord (222 milionë euro) gushtin e kaluar.
“Largimi i Neymar nga Barcelona ka qenë i ngjashëm me largimin tim. Unë shkova tek Inter, kur kampionati italian ishte më i fortë nga sa është ai francez tani”, ka thënë Ronaldo për “Veja”. “Nuk i di detajet dhe nuk e di se çfarë është thënë gjatë negociatave. Ndoshta, ai ka patur probleme me bordin drejtues të klubit, siç ndodhi në rastin tim. Unë do të bëja përsëri të njëjtën gjë”. Më parë është thënë se, Neymar zgjodhi të largohej nga Barcelona, sepse donte më shumë para dhe për të mos qëndruar më në hijen e Mesi-t.

Emri i Mauricio Pochettinos ka përfunduar në listën e dëshirave të drejtuesve të Realit të Madridit, për të pasuar Zinedine Zidane-n, në stolin e skuadrës. Gjithsesi argjentinasi shprehet se është 100% i fokusuar në drejtimin e Tottenhamit, që për të është klubi më i mirë në botë. Pak orë para sfidës me Crystal Palace-n, trajneri i ‘Spurs-ave’, sqaroi se për momentin nuk e çon ndërmend largimin nga Tottenhami, për asnjë klub në botë. “Jam 100% i përqendruar në drejtimin e Tottenhamit dhe nuk kam ndërmend të largohem. Mund t’ju them me siguri se, Tottenham është klubi më i mirë në botë, ku unë ushtroj qetësisht detyrën time dhe ndjesia e emocioni që marr këtu, më lidhin akoma më shumë me këtë ambient”, tha Pochettino, duke shuar zërat që e lidhin të ardhmen e tij me klubin madrilen.

Kolni konfirmoi formën e dobët të këtij fillimsezoni, teksa pësoi humbjen e 9-të sezonale, këtë radhë 0-3 në shtëpi nga Hoffenheimi. Skuadra mike u tregua e pamëshirshme, teksa shënoi që në minutën e 10-të me Geiger. Megjithë përpjekjet e Kolnit për të ndryshuar rrjedhën e lojës, miqtë gjetën edhe golin e dytë me Wanger me 11-metërsh, ndërsa “vulosën” shifrat në 0-3 po me Wagner, 10 minuta para përfundimit të kohës së rregullt. Kjo disfatë e mban Kolnin në vendin e fundit në Bundesligë, ndërsa Hoffenheimi ngjitet në vendin e 5-të me 19 pikë.
6 gola u shënuan në ndeshjen mes Wolfsburgut dhe Herthës së Berlinit, por kjo sfidë nuk nxorri fitues. Ibiseviç shënoi për miqtë që në minutën e parë, por “ujqërit” realizuan dy herë në fund të pjesës së parë me Mallin dhe Gomez (ky i fundit kishte humbur një 11-metërsh). Barazoi Rekik në fillim të fraksionit të dytë, por sërish Wolfsburgu mori avantazhin me Origin. S’ishte e thënë që të kishte një fitues në “Volkswagen Arena”, pasi Hertha barazoi me Selke në minutën e 83-të.

Duke folur për mikrofonat e “Domenica Sportiva”, pas fitores së Milanit ndaj Sassuolo, Leonardo Bonucci ka marrë pak kohë për të ndarë një shaka me drejtorin menaxhues të Juventusit, Beppe Marotta, i pranishëm në studio si mysafir. Këto janë fjalët e ish-mbrojtësit të Juventusit: “Sinqeritet maksimal në atë që ka ndodhur në shtatë vitet e kaluara së bashku, pastaj i dhashë fund një pjese të karrierës sime. Unë nuk kam asnjë problem me Juventusin, as me drejtorin. Kështu që nuk mund ta ndihmoj, por e falenderoj Juventusin, sepse në sajë të tij u bëra lojtari i admiruar. E kaluara është e mbyllur, ajo që ka qenë, ishte një pasojë normale e asaj që ndodhi, por unë nuk dua të kthehem pas. Kapitulli i Juventusit u mbyll, s’do të kthehem te motivet”.

Sulmuesi i Real Madridit, Karim Benzema, ka folur mbi fëmijërinë dhe babanë e tij në një intervistë për revistën “Les Inrockuptibles”. Revista franceze zbulon se si ishin fillimet e tij të ashpra dhe rolin e rëndësishëm që kishte suksesi i tij nga karakteri i rreptë i babait, i cili nuk e lejoi kurrë të heqë dorë. “Unë jam te Real Madrid prej tij, tha Karim gjatë intervistës. Unë mendoj se një foto e babait tim më përsëritet përditë në kokë. Vij nga një vend i vështirë dhe kam qenë me fat që babai im ishte gjithmonë pas meje. Deri në 18 ose 20 vjeç, nuk më është ndarë”. Ngurtësia e karakterit të babait të tij nuk e ka penguar që lojtari të mbetet i afërt me familjen: “Sot, marrëdhëniet tona janë më të qeta. Babai është personi i vetëm në familjen time, që vjen të më shikojë në Madrid, merr pjesë në trajnim, në ndeshje, është shumë i pranishëm”.
Benzema, i cili pretendon se nuk ka kujtime të mira për disa faza të fëmijërisë së tij, gjithmonë ka luajtur futboll: “Fillova të luaja shumë herët, fillimisht jetonim në një lagje, ku nuk kishte stadium. Dy pemë të mëdha u përdorën në rolin e shtyllave të portës, ku shënoja golat. Në moshën 8 vjeç u zhvendosa në Bron-Terraillon, në periferi të Lionit, ku ishte një fushë futbolli. Ajo ishte e vendosur dhjetë metra larg nga shtëpia. Unë kam qenë shumë i lumtur që të luaja aty”. Lojtari francez, i cili ka rinovuar me Real Madridin deri në vitin 2021, foli edhe për vitet e tij në Sain-Luis: “Ishte me të vërtetë diçka rigoroze, nuk kam kujtime të mira, por nuk kam pasur tjetër zgjedhje. Në moshën 15-vjeçare arrita të bashkohesha me qendrën e trajnimit të Olympique de Lyon”.