Gjykata e Ankimimit të Katanias hedh poshtë kërkesën e rekursit të vendimit të arrestit me burg për Moisi Habilaj. Pas ekzaminimit të akteve, trupi gjykues konfirmon masën e arrestit me burg për Moisi Habilaj, duke i ngarkuar dhe shpenzimet administrative të procesit të rekursit. Trupi gjykues i Gjykatës së Ankimimit përbëhej nga kryetarja Gabriella Larato, Dorotea Catena e Laura Benanti.
Gjykata e Rivlerësimit e Katanias vendosi nëjditë më parë mosndryshimin e masës së sigurisë dhe qëndrimin e Moisi Habilajt dhe 9 bashkëpunëtorëve të tjerë të tij, duke i lënë në burg. Vendimi u depozitua të enjten në mesditë në Sekretarinë e Gjykatës së Katanias nga gjyqtarët; Iarato, Benanti si dhe Catena, pasi kanë dëgjuar për 48 orë pretendimet e 10 prej të arrestuarve në kuadër të dosjes “Habilaj”. Organi i akuzës së Katanias ka parashtruar në seancën gjyqësore prova që kanë qenë bindëse për Gjykatën, e cila ka dhënë masën e sigurisë ‘arrest me burg’ për shqiptarët.
Ndërkohë, Prokuroria e Krimeve të Rënda ka marrë në pyetje të dyshuarin si bashkëpunëtorin e ngushtë të Moisi Habilajt, Nezar Seitin. Ky i fundit gjendet në burg me afat 20 ditë, teksa pritet që të ekstradohet në Itali, si i përfshirë në trafikun ndërkombëtar të drogës që kryente grupi kriminal. Marrja në pyetje ka ardhur, pasi Krimet e Rënda kanë siguruar dosjen e Nezar Seitit, të ardhur nga Prokuroria e Katanias, e cila u përkthye në Ministrinë e Drejtësisë. Pikërisht, Krimet e Rënda e kanë pyetur Nezarin për përgjimet dhe rolin e tij në trafikun ndërkombëtar të drogës.
Seiti ka pranuar para prokurorëve të Krimeve të Rënda se ka lidhje krushqie me Habilajt, pasi gruaja e tij i ka kushërinj. Lidhur me trafikun e drogës, dhe rolin e tij si bashkëpunëtor i Moisi Habilajt, Nezar Seiti nuk ka preferuar të japë shpjegime. Ai ka kërkuar që të gjykohet në shtetin fqinj, ku janë ngritur akuzat e para, duke i thënë “po” ekstradimit.

Emisioni investigativ “Stop” denoncoi një rast skandaloz në Zyrën Arsimore të Gramshit. Një rast, që ashtu si Liza Tabaku, provon punësimet korruptive që kryhen nga zyrtarët e shtetit në sistemin arsimor. Të implikuar në këtë aferë korruptive dhe të abuzimit me detyrën janë Kryetarja e Bashkisë së Gramshit, Luljeta Dollani (PS) dhe kryetari i Zyrës Arsimor të Gramshit, Xhevit Dyrmishi.
Alma Jonuzi iu drejtua emisionit për të denoncuar pushimin nga puna si mësuese Matematike, pa motivacion, pas 15 vjetësh punë. Pas interesimit të “Stop” ajo telefonohet nga një punonjës i Zyrës Arsimore të Gramshit, Ramazan Llaha, i cili i premton se nëse tërheq denoncimin, do të rikthehet në punë.
Në mesin e zhurmës së shkaktuar nga denoncimi publik në media, mësueses së shkarkuar i kërkohet takim edhe nga kryetarja e Bashkisë së Gramshit, Luljeta Dollani, e cila i premton ta rikthejë brenda javës në punë.
Më parë, financierja e Zyrës Arsimore, Flutura Sinani, në një tjetër video, e kishte kërcënuar se nëse nuk do të tërhiqte denoncimin, nuk do të fillonte kurrë punë sa të ishte ajo në atë detyrë. Mësuesja i kujton financieres se një vit më parë i ka dhënë 1.5 milionë lekë (të vjetra) për të mos e larguar nga puna.
Denoncimi i “Stop” nxjerr në pah disa skandale të njëpasnjëshme. Ai tregon se si vazhdon të funksionojë shteti nën qeverinë e Edi Ramës, se si korrupsioni vazhdon të qëndrojë këmbëkryq në prehërin e çdo zyrtari apo punonjësi të thjeshtë të lidhur me shefat, se si njerëzit vazhdojnë të pushohen pa motiv nga puna, ku kanë investuar gjithë jetën e tyre, se si bëhen punësimet duke paguar para nën dorë, se si zyrat e shtetit përdoren për korrupsion, se si një administratë e korruptuar në çdo qelizë.

11.5 kg kokainë u gjetën nga policia italiane në shtëpinë e një 31-vjeçari shqiptar. Bëhet e ditur se, shqiptari jeton në rrugën “Don Giovanni Fornasini”, në zonën “Corticella” në periferi të Bolonjës. Apartamenti u kontrollua nga efektivët, si pjesë e një hetimi më të madh, të koordinuar nga Prokuroria, raportojnë sot mediat lokale.
Droga, kokaina me një pastërti të lartë dhe peshë prej 11.5 kg, u gjet e fshehur në një fund të dyfishtë në një dollap në banesën e shtetasit shqiptar, Besian Elezaj. Arrestimi i shqiptarit për akuzën e posedimit dhe shpërndarjes së drogës u cilësua i rregullt nga Gjykata dhe Elezaj u la në arrest shtëpiak.
Ndërkohë, një 40 vjeçar shqiptar u kap dje në Itali me 93 kg marijuana me vlerë 200 mijë euro. Shqiptari u arrestua në San Martino, ndërsa ishte i njohur për policinë për shkak të precedentë të mëparshëm kriminal. Mediat italiane shkruajnë se shqiptare banonte prej vitesh në Xhenova.
Hetimet ndaj tij nisën për shkak të pranisë së shpeshtë gjatë tre muajve të fundit në San Martino dhe San Fruttuoso, ndërsa u identifikuan disa lokale në përdorim nga 40 vjeçari në lagjen Marassi.
Policia, pas disa pritash dhe duke u maskuar veten në mesin e tifozëve të rinj që këto ditë kanë mbërritur në zonë për shkak të derbit të fundjavës, kanë qenë në gjendje të zbulojnë hapësirën ku ishte fshehur lënda narkotike e ndarë në 96 pako me qese plastike të mbyllura në bindona plastikë.
Shqiptari, i cili i befasuar nga arrestimi brenda restorantit, u transferua mbrëmjen e shkuar në burgun e Marasit. Nëse lënda narkotike do të ishte shitur në tregun me pakicë, do të fitonte më shumë se 200 mijë euro.

Një shqiptar u arrestua nga policia italiane në Brindisi, pasi u kap me një sasi lënde narkotike heroinë. Karabinierët ndaluan për kontroll rutinë një makinë, në bordin e së cilës ndodheshin tre persona, dy prej të cilëve ishin shqiptarë. Dyshimet e karabinierëve nisën kur njëri prej shqiptarëve u bë nervoz dhe kështu vendosën për një kontroll më të imtësishëm në të gjithë automjetin.
Gjatë kontrollit në brendësi të një çante u gjet 1 kilogramë heroinë, e paketuar me letër alumini.
Të gjithë personat që ndodheshin në makinë u shoqëruan në polici për t’u marrë pyetje, deri kur njëri prej shqiptarëve, emri i të cilit nuk bëhet me dije, pranoi se çanta me lëndën narkotike i përkiste atij.